A Sina Pa?
Baa mi ndaa soliŋ pa tɔlɔɔ velaŋ a tɛiyo kpeku le dɛndɛlaŋ toosiaa o sindɔɔ niŋ?
Wanaa bɔɔbɔɔ sina maa o sindɔɔ niŋ, mi Ichipiaŋnda ndaa soliŋ tɔlɔɔ velaŋ hoo a tɛiyo kpeku le poonyiaa lechoo. Nduyɛ mi Kilikiiya a Luomaŋnda bɛɛ ndaa soliŋ ndu kpeku le poonyiaa lechoo. * O cho waŋnda tau le sina maa mi ndaa soliŋ ndu kpeku le dɛndɛlaŋ toosiaa le.
Le wɔsilaŋ hiouwɔɔ 2,500 niŋ, mi Aisaya wana ndoo suaa le Mɛlɛka wo poonyiaa maa, mi wanaa wa “o peela bɛndulaŋ Itoopiaa leeloo” wa viam “waŋnda hɔlte nda a yooŋgoo.” Nduyɛ o dɛndɛla ndaa toosiaa a tɔlɔɔ hoo laŋ niŋ nda taŋ ni. Okoŋ kɔɔli, mi Chɛluimaya wana ndoo suaa le Mɛlɛka wo bɛɛ dimi maa, te Midiaŋnda a Paasiaaŋnda del pɛ Babilɔŋ choo, a cho dɛndɛla nda toosiaa a tɔlɔɔ hoo laŋ lumi yɔŋii nda nyaanuŋ.—Aisaya 18:1, 2; Chɛlui. 51:32.
Mɛlɛka tosa ni ma poonyiaa diom o diom cho o Baabuiyo niŋ. Lelaŋ, te wanaa tuau nyɔɔŋ lɛŋ nda saaluŋ pɛ nyɔɔŋ pum ŋ chɔm maa, mi ndaa toosiaa dɛndɛlaŋ o sindɔɔ niŋ a tɔlɔɔ velaŋ hoo a tɛiyo, kɔndɔfili nɔ mbo bii naa le. (2 Timo. 3:16) Yɛɛ waŋnda haa saaluŋ yɛ? A saaluŋ niŋ nyɔɔŋ pum ŋ chɔm kpendekele maa, mi ndaa toosiaa dɛndɛlaŋ Ichipi a tɔlɔɔ hoo wo.
VƐƐ NDAA TOOSIAA YƐ DƐNDƐLAŊ A TƆLƆƆ HOO?
O Ichipi niŋ, mi ndaa yikpa sɛilaŋ. Nduyɛ mi ndaa tuuliaa o laŋ choo mɛɛ ndaa kialu tɔlɔɔ hoo ma toosiaa dɛndɔɔ a ndu yɛ. Te ndaa kelu ndu pɛ, a yii ndu a kpɔŋndaŋ. Okoŋ kɔɔli, a yii kpɔŋnda laŋ diompilɛ. Nduyɛ te a yii laŋ pɛ diompilɛ, la kendu poŋ. A mɛɛ yau masindɛ pilɛ o Ichipi niŋ dimi yɛ, mi dɛndɛla ndaa toosiaa a tɔlɔɔ hoo laŋ laa bandu le nɛiyo hiouwɔɔ 55. Nduyɛ mi laa nɔ fondaa leniŋ tau.
LE YƐƐ WAŊNDA NDAA TOOSIAA YƐ DƐNDƐLAŊ A TƆLƆƆ HOO?
Tɔlɔɔ hoo wa tau o pee bɛndoo Nail. Nduyɛ o faŋaŋndɔ okoŋ kɔɔli, dɛndɔɔ kindu toosiaa a tɔlɔɔ hoo le. Mɛɛ teleŋ tiŋ hiou, mi waŋnda kandu yɔmnde soliŋndo kpeku le dɛndɛla bɛndaŋ toosiaa. Kɛ wana che pɛ maa, mi doosuaa a wanaa yɔɔyaa hiau lachi a tɔlɔɔ hoo soliŋndo kpeku le dɛndɛla pɔmbɔlaŋ toosiaa.
Mi waŋnda hiau lachi a dɛndɛla nda toosiaa a tɔlɔɔ hoo laŋ soliŋndo kpeku le teleŋ vilɛi. Wana sinaa dɛnɛ Kilikiinɔ pilɛ diolaŋ Plutach wa o wɔsiŋ kɛmɛ tasoŋ niŋ. Nduyɛ mbo dimi maa, mi waŋnda ndaa soliŋ ndɔ dɛndɛlaŋ ndaŋ kpeku a teleŋ koŋ.
^ pɛl. 3 Mi tɔlɔɔ hoo wa tau o peela bɛndaŋ ikɛi, nduyɛ mbo bandu le nɛiyo 16. Mi bɛŋgu tɔlɔɔ hoo toŋgu le iŋchisiilaŋ 6.