1. Yɛɛ wa ikala naa a bɔɔbɔɔ o ba?

 NAA a bɔɔbɔɔ, mi i wa ikala naa o ba le kpeleŋ naŋ kɛsi o Mɛlɛka piɛiyo niŋndo komallo. b Te bahawɛi pilɔɔ hoo ŋ nɔ ni, mɛɛ a cho numpilɛ le. Le tamaseliiyo, Filipi ndoo yeema mbo chɔɔlu hiouwɔɔ lachioo tosa a mɛɛ ndoo piɛi o Chɛhowa lo yɛ okɔɔ. Kɛ i wa ndu ikala o ba le teleŋndo sɔlaa le piɛileŋ. Mi Ɛliki kɛsi kpeleŋndo le mbo wa kɔlaŋ o bɔŋaŋ wali pollo a teleŋndo. Kɛ sɔŋgɔ bɔŋaŋ kɛ kɛ, ndoo kue a teleŋ te. Mi Tɔmɔsi kindiŋ teleŋnda bɔɔbɔɔ le mbo veelu diomndaŋ o Baabuiyo niŋ kpou. Mbo dimi aa: “Yaa tuii diomndaŋ veeloo o Baabuiyo niŋ yeela le. Mi kindiŋ bɛmbɔɔ leyaa, kɛ teleŋ o teleŋ, o yau Lɛvitikɔɔ wo yaa mɛɛlu ni.”

2. Le yɛɛ ŋ nɔ miŋ tambu kɔl te, te ŋ komallɔ kpeleŋ naŋ kɛsi wo le?

² Te o yɔŋ pɛ maa a kɛsi niŋ kpeleŋndo kɛ a komallɔ ndu le, yandii tambu kɔl te. O yɔŋ bɛɛ aa kpeleŋ tɛtɛlɔɔ ŋ kɛsi ni, teleŋndo a wallo kalaŋ yeemaŋ ni le ndu komallo. Kindi kindiŋ ŋ cho le kpeleŋ koŋ komallo wo chɔm maa, a chua chaŋyɛi ŋ nɔ a Chɛhowa ve isɔvɛ, nduyɛ maa a yeema ma tosa nyɛ ŋ tiuba wo o ndu piɛiyo niŋ. Chɛhowa che sɛmbɛ ŋ cho dɔwɔɔ wo o sɔvɛ. O cho num kɔl le ma tosa mbo hiou mɛɛ ŋ tiuba yɛ le. (Sam 103:​14; Makal 6:​8) Lelaŋ, kɛsi kpeleŋnda ŋ tiuba ma komaltaŋ. Te a chii pɛ kpeleŋ ŋ tiuba ma komallo kɛsi, yɛɛ mala yɛ num ma komal ndu? Ŋ tofaŋndɔ nɛilaŋ lapum la mala numndaŋ.

3. Le yɛɛ yeemɛi nɔɔ le kpeleŋ numndo komallo cho yɛ nyɛ sɔvɛ?

³ Yeemɛi nɔɔ le kpeleŋnda numndaŋ komallo cho bɔɔ nyɛ sɔvɛ. Mi wana nɔ yeemɛi le kpeleŋ ndɔɔ komallo wo dɔu sɛmbɔɔ tau, nduyɛ mbo tosa wallo kalaŋ le ndu komallo. Ŋ tuu yeemɛi waŋndo nɔ le kpeleŋ ndɔɔ komallo wo a hueiyii nyindu dɛndɛ mamɛŋndo le mbo fuuluu o fondaŋ o nɔ le fuuluuwo wo. Te hueiye wa pɛ hiouwɔɔ lachi a hɔŋndo, mi keŋ mala wana cho kɔlaŋ a dɛndɔɔ wo mbo fuuluu o fondaŋ o yeema kɔlaŋ ndo. Nduyɛ te hueiyii keŋ wa pɛ hɔŋndo tau, naapum mi keŋ tosa mbo keleŋa fuuluu. O nɛi pilɛ koŋ choo, naa bɛɛ te ŋ nɔ pɛ yeemɛi le kpeleŋnda naalaŋ komallo, mi keŋ mala naa tau le laŋ komallo. Mi puaapilɛnɔ pilɛ o Ɛl Savado niŋ diolaŋ Deeve dimi aa: “Te a nɔ pɛ yeemɛi le kpeleŋ ŋ kɛsi wo komallo, mi keŋ mala num ma tosa wallo kalaŋ le ndu komallo. Ma kindiŋ kpoke le halikpeŋ nyɛ o nyɛ kuuna num ndu komallo le.” Lelaŋ, yɛɛ mala yɛ num le ma chɔɔlu yeemɛi nɔ, le kpeleŋ ŋ kɛsi wo komallo?

4. Yɛɛ naŋ nɔ yɛ miŋ nyuna Chɛhowa le ndu? (Filipiaŋnda 2:​13) (Tofa vɛlɛ fotueiyo.)

⁴ Nyuna Chɛhowa mbo tosa ma nɔ yeemɛi. Sanaa a nyina ndɔ diandaa, o tiuba mbo tosa ma nɔ yeemɛi le kpeleŋ numndo komallo. (Nuawɔ Filipiaŋnda 2:​13.) Lepum, miŋ kɛsi kpeleŋndo kanifuule ŋ sina maa ndi naŋ nɔ ni miŋ tosa. Nduyɛ suɛi kɛndɛi pila cho keŋ ni. Kɛ o kpeekpei niŋ, naapum ŋ nɔ iyeema le ndu komallo le. Hei yɔŋnuŋ a ndepilɛnɔ pilɛ o Ukaŋnda niŋ ni diolaŋ Nɔlina. Mbo kɛsi kpeleŋndo le pɛɛkula Baabuilaŋ tosaa. Kɛ ndoo nɔ iyeema le kpeleŋ koŋ komallo le kanifuule, mbo yiyaŋ maa o cho wana pɛɛkaa kɛndɛ le. Yɛɛ mala yɛ ndu? Mbo dimi aa: “Mi kandu Chɛhowa nyunaa lepaa o lepaa o piɛileŋ niŋ, le mbo mala ya mi chɔɔlu yeemɛi nɔ le pɛɛkula Baabuilaŋ tosaa. Nduyɛ, I wa wallo tosaa kalaŋ le mi tosa hiouwɔɔ lachioo a mɛɛ ya pɛɛku waŋnda yɛ. Mɛɛ paŋguŋ biŋgi hiou, mi cha maa yeemɛi yaa nɔ le pɛɛkula Baabuilaŋ tosaa ve chɔɔlu kalu poŋ. O wɔsi pilɛ koŋ niŋ, mi kandu pɛɛkula Baabuilaŋ tosaa latiɔɔŋ.”

5. O yɛɛ choo naŋ nɔ yɛ miŋ yiyaŋ le miŋ chɔɔlu yeemɛi nɔ?

⁵ Yiyaŋ o sɔɔŋ Chɛhowa tosal num niŋndoŋ choo. (Sam 143:​5) Mi kiilanɔɔ Pɔɔl yiyaŋ o kɛndɛi Chɛhowa tosal ndu ve choo, nduyɛ mi keŋ mala ndu le wallo tosaa kalaŋ le ndu. (1 Kɔliŋ. 15:​9, 10; 1 Timo. 1:​12-14) O nɛi pilɛ koŋ choo, mɛɛ ŋ yiyaŋ fau a nyɛ Chɛhowa tosal numndo okɔɔ, lende koni ŋ chɔɔlu yeemɛi nɔ le kpeleŋnda numndaŋ komallo ni. (Sam 116:​12) Mi ndepilɛnɔ pilɛ o Hɔŋndulasi niŋ kɛsi kpeleŋndo le mbo simnuŋ kɔɔfanɔ lɔɔlɔɔ wo. Tofawɔ nyɛ mala ndu wo. Mbo dimi aa: “Mi yiyaŋ a mɛɛ kpɛ Chɛhowa kaala ya yɛ okɔɔ. Ndu mala ya ni mi saaluŋ wanaa nduaa. Nduyɛ mbo ke ya nyɛm ya hauba woŋ, vɛlɛ mbo manda ya. Mi yiyaŋndo o sɔɔŋ muŋ choo mala ya mi kindi kaala ya nɔ le ndu wo, nduyɛ mi chɔɔlu yeemɛi nɔ le kɔɔfaleŋ tosaa.”

6. Yɛɛ cheleŋ mala yɛ naa miŋ chɔɔlu yeemɛi nɔ?

 ⁶ Handu kɔllo o tɔnɔla ŋ cho sɔla laŋ choo te a komal pɛ kpeleŋ numndo. Tofawɔ nyɛ mala Ɛlika naŋ soo suŋ a ndu okɔɔ le mbo komal kpeleŋ o kɛsi le kɔlaŋ o bɔŋaŋ wali pollo a teleŋndo wo. Mbo dimi aa: “Mi cha maa I wa sɔɔŋ bɔɔbɔɔ biondɔɔ le mɛɛ yaa kue a teleŋndo le yɛ. Kɛ te yaa kindiŋ pɛ mi kuɛ a teleŋndo, mi keŋ ndii mala ya mi yil puaapiliaa a ndepiliaa, nduyɛ mi chua teleŋndo latulu a nda. Mi ndii tosa vɛlɛ mi yaŋ nilaŋ o sɔɔŋ mala ya mi tuei wali pollo yeela, nduyɛ mi tosa hiouwɔɔ lachioo wo.” Mi Ɛlika handu kɔllo o tɔnɔla o wa sɔla laŋ choo, te o wa pɛ kɔlaŋ o bɔŋaŋ wali pollo a teleŋndo. Le hei, mbo kindiŋ le kpeleŋ koŋ komallo. Tɔnɔla kuɛɛ ŋ nɔ yɛ ma handu kɔllo choo? Te o yɔŋ pɛ ma kɛsi kpeleŋndo le diomndaŋ veeloo o Baabuiyo niŋ ɔɔ le piɛileŋ, yiyaŋndɔ mɛɛ keŋ kindi niŋ chaŋyɛi numnde a Chɛhowa yɛ. (Sam 145:​18, 19) Te a kɛsi pɛ kpeleŋndo le suliŋ leKilisiɔŋndo opum nɔɔ, handu kɔllo a mɛɛ o mala num niŋ le chaŋyɛi kɛndɛi nɔɔ a acheleŋnda yɛ. (Kolo. 3:​14) Poonyiaa sabula ŋ yeema ma komal kpeleŋ ŋ kɛsi wo o yau choo, nduyɛ ma wa yau koŋ tofaa teleŋ o teleŋ. Mi Tɔmɔsi naŋ soo suŋ a ndu okɔɔ wo dimi aa: “Te I nɔ pɛ sabulaŋ tau le kpeleŋ ya kɛsi wo komallo, mi keŋ mala ya mi tosa wallo kalaŋ le ndu komallo.”

7. Yɛɛ mala yɛ Chulio nda laa ndɔ le kpeleŋ nda kɛsi wo komallo?

⁷ Chua teleŋndo tau a wanaa mala num ma nɔ yeemɛiya. (Pulɔ. 13:​20) Mi Chulio nda laa ndɔ kɛsi kpeleŋndo le chɔɔloo tosaa tau o wali dimiaa yooŋgu kɛndɔɔ niŋ. Tofawɔ nyɛ mala nda wo. Mi Chulio dimi aa: “Miŋ hɛli chaŋyaŋ toolu naa le kpeleŋ naa komallo woŋ. Nduyɛ mi naŋ suukaŋ a nda a kpeleŋnda naalaŋ okɔɔ. Chaaŋaa naa haa a bɔɔbɔɔ komal niŋ kpeleŋnda waa lende. Le hei, ndaa tiuba ma chɔm naa sɔɔŋ mala naa woŋ. Mi ndaa nyuna naa mɛɛ sɔɔŋ wa kɔlaŋ a naa yɛ, nduyɛ mi ndaa dɛɛniaa naa kɔltaŋ a teleŋ naŋ yeema kɔl dɛɛniaa wo.”

8. Te o wa pɛ maa mɛɛ miŋ nɔ yeemɛi malaŋ naŋ komal kpeleŋ naŋ kɛsi wo, yɛɛ yɔŋnuŋ yɛ? (Tofa vɛlɛ fotueiyo.)

⁸ O kpeekpei niŋ, naa kpou palɛi ipum ŋ nɔ iyeema le kpeleŋ naŋ kɛsi wo komallo le. Baa hei sim ni maa ŋ nɔla miŋ tosa wallo a kpeleŋ naa okɔɔ le? Sako. Le tamaseliiyo, mi hueiye nyindu dɛndɔɔ naa o nɔ le kɔlaŋ nda. Kɛ lepum, hueiye ve hɔŋ tau le. Nduyɛ pɛŋ, palɛi ipum hueiyii ve kposoŋ te. Baa hei sim ni maa wana wa kɔlaŋ a dɛndɔɔ wo hiu lachi a kɔlaŋ a ndu le? Sako. Dɛndɛlaŋ lapum la nɔ maasii mala nda le kɔlaŋ ndo. Lapum yɛ, la nɔ nyɛ cheleŋ nda soliŋ kpeku le kɔlaŋ ndo. Mi wanaa kua a dɛndɛlaŋ nda soliŋ nyɔɔŋ muŋ kpeku le ma hiou lachi a kɔlaŋ a dɛndɔɔ. O nɛi pilɛ koŋ choo, ŋ tuu yeemɛi naŋ nɔ le kpeleŋ naa komallo ve a hueiye. Palɛi ipum, miŋ nɔ yeemɛi tau. Kɛ ipum yɛ, ŋ nɔ iyeema kposoŋ le kpeleŋ naŋ kɛsi wo komallo le. Le hei, te o yɔŋ pɛ maa mɛɛ miŋ nɔ yeemɛi malaŋ naŋ komal kpeleŋ naŋ kɛsi wo, mɛɛ o kpeekpei niŋ, ŋ komal ndu niŋ te. Mi wana kua a dɛndɔɔ wo nuuviaa nɛila  cheleŋ le halikpeŋ mbo fuuluu o fondaŋ o yeema kɔlaŋ ndo. Naa bɛɛ nɔ miŋ nuuviaa nɛila cheleŋ le kpeleŋ naa komallo, o yɔŋ bɛɛ miŋ nɔ iyeema le. Mi che bɛɛ hei ve bɛɛŋ bɛɛŋ le tosaa le, kɛ miŋ wa a kɔl kɛndɛ te ŋ komal pɛ kpeleŋ naŋ kɛsi wo. Tuupa miŋ yaasiaa nyɛ naŋ nɔ miŋ tosa le kpeleŋ naa komallo wo, ŋ tofaŋndɔ fɛŋ nyuna wanaa bɔɔbɔɔ nyuna wo.

9. Baa i cho pa suɛi wɔɔŋ le miŋ hiou lachi a kindiŋndo le kpeleŋ naŋ kɛsi wo komallo, o yɔŋ bɛɛ miŋ nɔ iyeema le? Tɛɛsiaawɔ.

⁹ Chɛhowa yeema miŋ piɛi ndu a kɔl kɛndɛ vɛlɛ a kɔl naa kpou. (Sam 100:​2; 2 Kɔliŋ. 9:​7) Lelaŋ, baa i cho pa suɛi wɔɔŋ le miŋ hiou lachi a kindiŋndo le kpeleŋ naŋ kɛsi wo komallo, o yɔŋ bɛɛ miŋ nɔ iyeema le? Ŋ tofaŋndɔ tamasi kiilanɔɔ Pɔɔl wo. Mbo dimi aa: “I dɔu dialuŋ nuŋ o mandaa bɛŋgu, nduyɛ mi siiŋguu muŋ maa chɛ.” (1 Kɔliŋ. 9:​25-27) O yɔŋ bɛɛ mi Pɔɔl ndoo nɔ iyeema le nyɛ cho o kɛndɔɔ wo tosaa le, mi ndoo dɔu ndupila o mandaa bɛŋgu le ndu tosaa. Baa Chɛhowa ndoo hini pa kɔl a nyɛ Pɔɔl wa tosaa wo? Ei! Nduyɛ pɛŋ, mbo fanda ndu le sɛmbɛ o wa dɔwɔɔ wo.—2 Timo. 4:​7, 8.

10. Tɔnɔla kuɛɛ naŋ sɔla yɛ te ŋ hiou pɛ lachi a wallo tosaa kalaŋ le kpeleŋ naŋ kɛsi wo komallo, o yɔŋ bɛɛ miŋ nɔ iyeema le?

¹⁰ O nɛi pilɛ koŋ choo, mi Chɛhowa naŋ kɔl a naa, te o che naa pɛ kindi kindiŋndo le kpeleŋ naa komallo, o yɔŋ bɛɛ miŋ nɔ iyeema le. Kanifuule, mi che bɛɛ o cho teleŋ o teleŋ te naŋ kaala nyɛ naŋ wa tosaa wo le, kɛ o sina maa ŋ cho ndu tosaa le mɛɛ naŋ kaala ndu yɛ. Mbo duau Pɔɔl sala le sɛmbɛ o wa dɔwɔɔ wo. Nduyɛ, naa bɛɛ o cho naa salaa dɔwɔɔ le sɛmbɛ naŋ cho dɔwɔɔ wo. (Sam 126:​5) Te Chɛhowa dɔu naa sala pɛ, mi keŋ tosa naapum miŋ kandu yeemɛi nɔɔ. Mi ndepilɛnɔ pilɛ o Polaŋ niŋ diolaŋ Lusina dimi aa: “Lepum, yaa nɔ iyeema le kɔlaŋ o wali pollo niŋ te, taama taama te yaa wa pɛ o saŋgɛiyo. Kɛ, mi yaa wa a kɔl kɛndɛ tau te yaa fula pɛ o wali pollo niŋ.” Ŋ tofaŋndɔ niko nyɛ naŋ nɔ miŋ tosa wo te ŋ nɔ iyeema le kpeleŋ naa komallo le.

11. Vɛɛ Chɛhowa mala yɛ naa le miŋ dɔu naapila o mandaa bɛŋgu?

¹¹ Piɛi le ma dɔu numpila o mandaa bɛŋgu. Teleŋnda bɔɔbɔɔ, diomndaŋ ndaŋ dɔwɔɔ numpila o mandaa bɛŋgu sim, le kiɔɔ balaŋ wouwo o sɔɔŋ wɔɔŋndoŋ tosaa niŋ. Kɛ suliŋndo hoo nyindu naa vɛlɛ le sɔɔŋ kɛndɔŋ tosaa taama taama te ŋ che ndi pɛ ikala, ɔɔ te ŋ nɔ iyeema le muŋ tosaa le. Loonuŋ maa, suliŋndo hoo cho o suliŋnda nyina Mɛlɛkaa tɛɛŋ. Lelaŋ, nyuna Chɛhowa le mbo ke num nyina ndɔ diandaa, le num malaa ma nɔ suliŋ sɔvɛ sɔviɔɔ hoo. (Luku 11:​13; Kalee. 5:​22, 23) Mi Deeve naŋ soo suŋ a ndu okɔɔ wo tɛɛsiaa mɛɛ piɛileŋ le mala ndu yɛ. Ndoo yeema mbo chɔɔlu teleŋndo chua le mbo wa pɛɛkɔŋ ndɔ ipilayaa tosaa teleŋ o teleŋ. Mbo dimi aa: “Mi yaa nyuna Chɛhowa le mbo mala ya mi dɔu yapila o mandaa bɛŋgu. Nduyɛ a mala ndɔɔ, mi tosa kɛɛsiaa le mi wa pɛɛkɔŋ ipilayaa tosaa teleŋ o teleŋ.”

12. Vɛɛ sawa mandaa cho o Ikilisiaatii 11:​4 niŋndo mala yɛ naa miŋ komal kpeleŋnda naalaŋ?

¹² Chum le mi sɔɔŋ bɛnda fɛŋ te. O chieeŋ dɛnɛwɔɔŋndo hoo niŋ, o cho teleŋ o teleŋ te sɔɔŋ bɛnda a naa le. Lelaŋ, te ŋ chum pɛ le mi sɔɔŋ bɛnda fɛŋ a naa, mɛɛ naapum kposoŋ bɛɛ ŋ komal niŋ kpeleŋnda naalaŋ te. (Nuawɔ Ikilisiaatii 11:​4.) Mi puaapilɛnɔ pilɛ diolaŋ Deniɛɛ dimi aa: “Sɔɔŋ bɛnda teleŋ o teleŋ te. Mɛɛ miŋ kandu nyɛ naŋ yeema wo tosaa, malaŋ sɔɔŋ bɛnda.” Mi puaapilɛnɔ pilɛ o Ukaŋnda niŋ diolaŋ Pɔɔl, chɔm vɛlɛ sabu cheleŋ naŋ nɔ miŋ chum le mi sɔɔŋ bɛnda wo le. Mbo dimi aa: “O yɔŋ bɛɛ mi sɔɔŋ bɛnda le, te ŋ kandu pɛ nyɛ naŋ yeema wo tosaa, mɛɛ ŋ ke Chɛhowa nyɛ le mbo dɔu naa sala.”—Mala. 3:​10.

13. Te ŋ kindiŋ pɛ o pɔmpɔmbɔ le kpeleŋ naa komallo, tɔnɔ yɛɛ naŋ sɔla yɛ?

¹³ Kindiŋ o pɔmpɔmbɔ. Lepum ŋ nɔ iyeema le kpeleŋ naŋ kɛsi wo komallo le kanifuule, miŋ  yiyaŋ maa o kendu bɔɔ tosa. Te bahawɛiyo hoo ŋ nɔ ni, mɛɛ naapum a piɔu kpeleŋ numndo a pɛltaŋ. Te o yɔŋ pɛ ma kɛsi kpeleŋndo le suliŋndo opum nɔɔ, baa o bɛnda ma kandu ndu chɔmndo o pɔmpɔmbɔ le? Te o yɔŋ pɛ ma kɛsi kpeleŋndo le diomndaŋ veeloo o Baabuiyo niŋ, baa a tiuba pa ma kandu teleŋndo chuaa o biŋgi le diomndaŋ veeloo leniŋ? Mi Tɔmɔsi naŋ soo a ndu okɔɔ o kandɔŋndo wo cha ndi ikala le chiiyo diomndaŋ veeloo o Baabuiyo niŋ o wɔsioo niŋ. Mbo dimi aa: “Mi cha maa bolii Baabuii yaa hɛli le diomndaŋ veeloo ve ndii bandu bɔɔ. Le hei, mi kɛɛsiaa le mi miŋgi kandɔɔ. Kɛ a teleŋndo hoo niŋ, mi hɛli bolii Baabuiye nyɛɛmbɔ le mi veelu diomndaŋ leniŋ lepaa o lepaa, okoŋ mi yiyaŋ lechoo. Nduyɛ fulamakɔɔlioo wa ni, mi kandu diomndaŋ veeloo tueiyɔɔ yeela.” Mɛɛ Tɔmɔsi ndoo tuɛi diomndaŋ veeloo yeela fau, lende koni ndoo kua a teleŋndo chuaa tau o laŋ veeloo niŋ ni. O pɔmpɔmbɔ, mbo chii diomndaŋ veelu o Baabuiyo niŋ. c

14. Simulta kuɛɛ komallɛ naa lepum?

¹⁴ O kpeekpei niŋ, o yɔŋ bɛɛ miŋ nɔ yeemɛi le kpeleŋ naŋ kɛsi wo komallo, ɔɔ miŋ dɔu naapila o mandaa bɛŋgu, lepum mi simultaŋ la komal naa. Le tamaseliiyo, lepum mi sɔɔŋ naŋ ve kɔl te woŋ chua teleŋ naŋ nɔ miŋ soliŋ kpeku le kpeleŋ naa komallo wo. (Ikili. 9:​11) Ɔɔ naapum mi simullo komal naa o tosa miŋ tambu kɔl, nduyɛ ŋ nɔ lɛ mayoomu le wo. (Pulɔ. 24:​10) Lepum vɛlɛ, le mɛɛ naŋ cho wanaa lahakiaa yɛ, miŋ tosa biondɔŋnda kuuna naa kpeleŋ naa komallo wo. (Luomaŋ. 7:​23) Ɔɔ lepum yɛ, miŋ wa a saŋgɛiya. (Maa. 26:​43) Yɛɛ mala yɛ naa miŋ tiu simultaŋ ndaŋ ba?

15. Te o yɔŋ pɛ mi simullo komal naa, baa keŋ sim ni maa ŋ sɔla batiuwaa le? Tɛɛsiaawɔ. (Sam 37:​23, 24)

¹⁵ Loonuŋ maa o yɔŋ bɛɛ mi simullo komal num, keŋ sim nuaa maa a sɔla batiuwaa le le. Baabuiyo dimi maa, lepum mi simultaŋ ɔɔ bahawɛilaŋ la tɔɔliaa naa komal. Kɛ o dimi vɛlɛ maa, sanaa a mala Chɛhowaa, ŋ tiuba miŋ komal kpeleŋnda naŋ kɛsi laŋ. (Nuawɔ Sam 37: 23, 24.) Mi puaapilɛnɔ pilɛ diolaŋ Filipi naŋ soo suŋ a ndu okɔɔ wo dimi aa: “I kɛsi kɔllo o teleŋnda ya bumba kpeleŋ nuu komallo laŋ choo le. Kɛ mi kɛsi kɔllo o sɛmbɛ ya dɔu le kpeleŋ nuu komallo wo choo.” Mi Deeve naŋ soo suŋ a ndu okɔɔ wo dimi aa: “Mi kindiŋ le simulta komalla laŋ chɔɔ maa nɛiyo ya sɔla koŋ ni, le Chɛhowa chɔmndo mɛɛ kpɛ ya kaala ndu yɛ.” A tonya, te ŋ kindiŋ pɛ kpoke le kpeleŋnda naalaŋ komallo o yɔŋ bɛɛ mi simultaŋ la komal naa, mi keŋ chɔm Chɛhowa kpendekele maa ŋ yeema miŋ nɛŋi ndu kɔllo. Nduyɛ, mbo naŋ kɔl tau te o che naa pɛ kindiŋndo le kpeleŋ naŋ kɛsi wo komallo.

16. Yɛɛ simulta komal naalaŋ la pɛɛku yɛ naa?

¹⁶ Pɛɛku o simul komal numndo niŋ. Yiyaŋndɔ a simulta komal num mi la kuuna num kpeleŋ numndo komallo laŋ okɔɔ, okoŋ ma nyunaŋ aa, ‘Baa I nɔ pa mi tosa siŋgaŋndo le halikpeŋ simul cheleŋ komalla le?’ (Pulɔ. 27:​12) Lepum, mi simulta komal naalaŋ la pɛɛku naa maa, ŋ tiuba miŋ komal kpeleŋ koŋ mɛɛ naŋ yeema yɛ le. Te bahawɛiyo hoo ŋ nɔ ni, mɛɛ yiyaŋ a kpeleŋ ŋ kɛsi wo okɔɔ, okoŋ ma kindiŋ le chɔɔ te a tiuba pɛ ma komal ndu. d Pesiŋ bɛɛ Chɛhowa cho yiyaŋ maa a sɔla batiuwaa o kpeleŋ ŋ kɛsi wo niŋ te le.—2 Kɔliŋ. 8:​12.

17. Le yɛɛ naŋ nɔ yɛ miŋ wa yiyaŋndo a batiuwaa naŋ sɔla niŋndo okɔɔ?

¹⁷ Wa yiyaŋndo a batiuwaa ŋ sɔla niŋndo okɔɔ. Baabuiyo dimi maa, “Mɛlɛka cho wana lakafa, mbo puɛɛnuŋ a wali nya cho tosaa wo le.” (Hibu. 6:​10) Lelaŋ, num bɛɛ puɛɛnuŋ a batiuwaa ŋ sɔla niŋndo okɔɔ le. Wa yiyaŋndo a ndu okɔɔ. O wa aa le chaŋyɛi kpɛɛluŋnde nɔɔ a Chɛhowa, le suɛi a ndu okɔɔ o acheleŋnda lo, ɔɔ le yiŋɔɔ sɔlaa. Mɛɛ Chɛhowa mala num ma komal kpeleŋnda ŋ kɛsi o paandoo niŋndaŋ yɛ, lende koni o cho num mala ni ma hiou lachi a la ŋ kɛsi suŋ suŋndaŋ komallo.—Filipi. 3:​16.

18. Yɛɛ naŋ nɔ yɛ miŋ loonuŋ te ŋ wa pɛ wallo tosaa kalaŋ le kpeleŋ naŋ kɛsi wo komallo? (Tofa vɛlɛ fotueiyo.)

¹⁸ A mala Chɛhowaa, a tiuba ma komal kpeleŋ ŋ kɛsi wo, mɛɛ wana kua a dɛndɔɔ wo fuuluu a dɛndɔɔ o fondaŋ o yeema kɔlaŋ ndo yɛ. Kɛ loonuŋ maa, mi wanaa kua a dɛndɛla mamɛŋndaŋ nda tuei tiŋ nda buli wo yeela. O nɛi pilɛ koŋ choo, mɛɛ ŋ hiau lachi fau a kindi kindiŋndo le kpeleŋ ŋ kɛsi wo komallo, puɛɛnuŋ le chɔɔ mɛɛ Chɛhowa cho num malaa a num salaa dɔwɔɔ yɛ le. (2 Kɔliŋ. 4:​7) Te a vi ŋdial te, a cho salalaŋ sɔla tau.—Kalee. 6:​9.