1-2. Kɛɛsiaa sɔvɛ kuɛɛ Chuuwaa wa Babilɔŋnda ndaa nɔ yɛ ma tosa? (Ɛsilua 1:​2-4)

 MI MASA bɛndoo le Paasiaa yɔŋgu yondaa! Mbo dimi maa, Chuuwaa wa o biyɔɔ niŋ Babilɔŋ le wɔsilaŋ 70 wa miiŋguŋ o ndalo Isɔluɛi. (Nuawɔ Ɛsilua 1:​2-4.) Chɛhowa tosa ni mi hei yɔŋnuŋ. Le yɛɛ naŋ dimi yɛ lende? Kanifuule, ndoo kendu ko mi waŋnda Babilɔŋ ndaa mal wanaa ndaa bii ya. (Aisaya 14:​4, 17) Kɛ mi masa bɛndoo le Paasiaa yam Babilɔŋ, nduyɛ mbo dimul Chuuwa le ma miiŋgu o lɛŋnde ndaleŋ niŋ. Le hei, Chuunɔ kɛ kɛ taama taama wanaa wa yuŋgulaŋ bolle wa, ndaa nɔ ma tosa kɛɛsiaa le Babilɔŋ malɔɔ, ɔɔ le ma loŋnuŋ loŋ. I ve bɛɛŋ bɛɛŋ le kɛɛsiaa koŋ tosaa le. Le yɛɛ?

² Naapum, i wa wa ikala le mi Chuuwaa wa a yuwɛiya miiŋgu o lɛŋnde ndaleŋ niŋ. Chuuwaa kaŋ apum, o Babilɔŋ niŋ nda veluŋ ni. Le hei, naapum ma yiyaŋ maa lɛŋnde finyaa ndaa mamaa le cho leŋ ni. O kpeekpei niŋ, i wa wa ikala le mi ndaa mal fondaŋ ndaa sina nyɛkɛndɛiyo. O faŋaŋ okoŋ kɔɔli, naapum mi Chuuwa apum sul tau o Babilɔŋ niŋ. Lelaŋ, naapum ma cha ndi ikala le ma mal fondaŋ nda wa tueiyɔɔ yeela wo, ɔɔ yulale ndaleŋ okoŋ ma kɔ chal o lɛŋnde ndaa sina le leŋ niŋ.

3. Sala kuɛɛ Chuuwaa wa miiŋgu o lɛŋnde ndaleŋ niŋ nda wa yɛ sɔla?

³ Mi Isɔluɛiyaa ndaa nɔ laalaŋndo wa sina maa, te ndaa miiŋgu pɛ o lɛŋnde ndaleŋ niŋ, Chɛhowa wa nda salaa dɔwɔɔ mbo hiou bɛɛ nyɛm nda wa soliŋ sala woŋ. Nduyɛ sala bɛndu ndaa sɔla niŋndo wa a piɛile tonyaleŋ okɔɔ ni. Mi che bɛɛ chiɛilaŋ hiouwɔɔ 50 la wa o Babilɔŋ niŋ ni le mɛlɛkaa lachoowaa piɛiyo, kɛ opilɛ bɛɛ ve loŋ le Chɛhowa piɛi le. Chuuwa ndaa nɔ bandu luamaa lasala le sala sawa Mɛlɛka ndoo ke Muuse wo lomɔɔ lechoo le. Nduyɛ wanaa soliaa lasala ve a kɔɔnaa le laŋ lomɔɔ le. O faŋaŋ okoŋ kɔɔli, wanaa wa mɛlɛkaa lachoowaa piɛiyo wa, ndaa hiou poloŋ a Chuuwa. Waŋnda haa ndaa nɔ lebɛɛ le  Chɛhowa vɛlɛ a sawala ndɔlaŋ te. Le hei, Chuuwaa ndaa nɔ siooŋii Mɛlɛkɛiya wa a yeemɛi kpeekpei, le ma miiŋgu o lɛŋnde ndaleŋ niŋ, okoŋ ma miŋgi piɛile tonyaleŋ pila.

4. Mala yɛɛ Chɛhowa ndoo dimi yɛ le Chuuwaa wa miiŋgu o lɛŋnde ndaleŋ niŋ nda kioo?

⁴ Le mi Isɔluɛiya ndaa chɛŋ Babilɔŋ ma miiŋgu o lɛŋnde ndaleŋ niŋ, naapum paŋgoŋ ŋhiɔɔlu ndaa nɔ ni ma chua. Mi Chɛhowa dimi maa, o cho kpɔkɔsila kuuna niŋ nda miiŋgoo laŋ faaŋiaa nda lachi. Mi Aisaya poonyiaa aa: “La toosiaa nɛiyo o pollo niŋ Mɛlɛka Yaawɛɛ lachi. La toosiaa ndu mbo wa nyɛkɛndɛ sakpo Mɛlɛka naa lachi. . . . Nɛila doŋgili doŋgililaŋ kpou, la tosa mi la yɔŋnuŋ tɛlɛlɛ. Nɛila wɔɔŋndaŋ la tosa mi la simnuŋ nyɛ kɛndɛ tɛlɛlɛ.” (Aisaya 40:​3, 4) Yiyaŋndɔ a mɛɛ nɛi koŋ wa yɛ okɔɔ: Dɛŋgbɛlaŋ o pemboŋ tɛɛŋ kpou, ma peelu laŋ. Nduyɛ pemboŋ bɛɛ, ma pesi pesi muŋ miŋ yɔŋnuŋ tɛlɛlɛ. I cho kpendekele maa, mi wanaa wa kɔlaŋ o nɛi koŋ choo wa naŋ kɔl tau. I wa tɛtɛlɛ le mi Chuuwa ndaa keeku o nɛi kɛndɛ koŋ choo, mbo hiau kɔlaŋ o nɛi ŋpemboo ɔɔ o nɛi wɔɔŋ wɔɔŋndo choo. Nduyɛ o nɛi koŋ choo ndaa hiau niŋ keleŋa lakɔ.

5. Vɛɛ nɛi bɛndoo chɔŋ Babilɔŋ le kɔlaŋ Isɔluɛi ndoo nɔ yɛ diolaŋ?

⁵ Hau, mi nɛila bɛndula bɔɔbɔɔ nɔ diolaŋ ɔɔ nɔmbɛiyo. O nɛi pilɛ koŋ choo, nɛi bɛndu Aisaya poonyiaa a ndu okɔɔ wo bɛɛ ndoo nɔ diolaŋ. Baabuiyo dimi aa: “Nɛi bɛndoo o wa niŋ o fondaa hoo. Nɛi bɛndoo hoo a veelu ndu niŋ aa, ‘Nɛi Diandaa Mɛlɛkaa.’ Nduyɛ nɛiyo hoo wanaa cho a diandaa Mɛlɛka o hɔl te wa kinɛi, a kue lechoo le.” (Aisaya 35:​8) Yɛɛ hei ndii sim yɛ le Isɔluɛiya? Nduyɛ yɛɛ i sim yɛ le naa hau?

6. Le yɛɛ ndaa veelu yɛ nɛi bɛndu koŋ aa, “‘Nɛi Diandaa Mɛlɛkaa’”?

⁶ Nuawɔ se diola kɛndɛ bɛndu nɛi bɛndoo hoo ndoo nɔlaŋ! Le yɛɛ ndaa veelu yɛ nɛi bɛndu koŋ aa, “‘Nɛi Diandaa Mɛlɛkaa’”? Kanifuule, te Chuuwa ndaa miiŋgu pɛ o lɛŋnde ndaleŋ niŋ, wanaa ve a diandaa Mɛlɛka o hɔl te wa, ndaa ve niŋ loŋ te. Keŋ sim ni maa, wanaa wa balaŋ o kaala nɔɔlɛilaŋ niŋnda, a wa piɔmnda sooluuwo, ɔɔ hakila cheleŋ tosaa wa, ve wa nda tɛɛŋ te. Chuuwaa wa miiŋgu o lɛŋnde ndaleŋ niŋnda wa simnɔŋ a diandaa Mɛlɛka ndaa o hɔl. (Ditɔnɔ. 7:​6) Kɛ keŋ sim nuaa maa ndaa nɔ lɛ ma siŋgaŋ le ma nɛŋi Chɛhowa kɔl te le.

7. Siŋgaŋnda kuɛɛ Chuuwa apum ndaa nɔ yɛ ma tosa? Chɔmndɔ tamaseliiyo.

⁷ A mɛɛ naŋ che o kandɔŋndo yɛ, Chuuwa haa a bɔɔbɔɔ o Babilɔŋ niŋ ndaa veluŋ ni. Nduyɛ naapum ndaa dɛli niŋ a sɔɔŋ tosaa, mɛɛ Babiloniaŋnda ndaa tosa sɔɔŋ yɛ. Mɛɛ Chuuwa haa miiŋgu Isɔluɛi, wɔsiŋ bɔɔbɔɔ okoŋ kɔɔli, mi Ɛsilua tuɛi maa, a wa waŋlaanduaa wa mɛlɛkaa cheleŋnda piɛiyo wa chuaa o nɔlaŋ niŋ. (Ɛsɔ. 34:​15, 16; Ɛsi. 9:​1, 2) Nduyɛ mɛɛ teleŋ tiŋ hiou, mi kɔndɔfillo bii Masa iBuŋgaa Nɛhimaya, mɛɛ o saaluŋ maa chuauwaa ndaa velu Isɔluɛiya, apum ndaa chiee suɛi maŋgalɛi Chuuwa ndaa dimi ve le. (Ditɔnɔ. 6:​6, 7; Nɛhi. 13:​23, 24) O Hibuluiye niŋ ndaa poonyiaa Diom Mɛlɛkaa ni. Lelaŋ, vɛɛ chuaambuaa feleŋguaa kaŋ wa yɛ pɛɛku le Chɛhowa kaalaa, nduyɛ ma piɛi ndu, te ndaa chiee Hibuluiye le? (Ɛsi. 10:​3, 44) A tonya, Chuuwa haa ndaa nɔ ma tosa siŋgaŋndaŋ. Kɛ i wa tɛtɛlɛ le ma tosa siŋgaŋndaŋ o Isɔluɛi niŋ, naa piɛile tonyaleŋ le wa miiŋgoo o pɔmpɔmbɔ wa.—Nɛhi. 8:​8, 9.

8. Le yɛɛ naŋ nɔ yɛ miŋ nɔ yeemɛi o sɔɔŋ yɔŋnuŋ muŋ sindɛ woŋ niŋ? (Tofa fotueiyo o kɔɔ.)

⁸ Naapum mi waŋndo dimi dɔɔ aa, ‘Bundɛi kɛndɛi pila cho hei ni. Kɛ baa, nyɛ yɔŋnuŋ koŋ Chuuwa sindɛ pa wo cho pa o sɔvɛ le naa hau?’ A tonya, o cho o sɔvɛ le naa. Kanifuule, naa bɛɛ cho kɔlaŋ o “‘Nɛi Diandaa Mɛlɛkaa’” choo. O yɔŋ bɛɛ miŋ wa Kilisiɔŋaa pɔyaŋnda, ɔɔ miŋ wa o kunda ‘saa cheleŋnda’  choo, naa kpou nɔ miŋ hiou lachi a kɔlaŋ o “Nɛi Diandaa” choo. Nɛiyo hoo mala naa ni miŋ luɛi o kpele hɛnɛkiɔɔ o Mɛlɛka piɛiyo niŋ. Nduyɛ, o cho tosa miŋ huŋ sɔla salala bɔɔbɔɔ o Masale Mɛlɛkaleŋ niŋ. b (Chɔŋ 10:​16) Chɔŋ a wɔsi 1919 o Faŋaŋ Chiisu Wo Kɔɔli, puaa, waŋlaanduaa, a chuaambuaa o miiliɔŋndaŋ niŋ cho Babilɔŋ Bɛndoo malɔɔ, ndu cho yɛ kɔɔna piɛiyii lachoowɛi ni, ma wa kɔlaŋ o nɛi diandaa hoo choo. Naapum num bɛɛ a cho nda tɛɛŋ. Mi che bɛɛ o cho niŋ le wɔsilaŋ 100 chɔŋ a teleŋ waŋnda kandu kɔlaŋ o nɛiyo hoo choo wo, kɛ wanaa cheleŋnda tosa fɛŋ wallo kalaŋ le ndu bɛɛndiaa, malaŋ nda kandu kɔlaŋ lechoo.

9. A mɛɛ Aisaya 57:​14 dimi yɛ, wali kuɛɛ tosaŋ yɛ niŋ, le “‘Nɛi Diandaa Mɛlɛkaa’” bɛɛndiaa?

⁹ Mi Chɛhowa tosa a sabu, le mi kpɔkɔsila laa kuuna niŋ Chuuwa miiŋgoo o lɛŋnde ndaleŋ niŋndaŋ, la faŋaŋ nda lachi. (Nuawɔ Aisaya 57:​14.) Kɛ “‘Nɛi diandaa’” o palɛi nɛi niŋ yɛ? Le wɔsilaŋ o kɛmɛlaŋ niŋ tuupa mi wɔsi 1919 fuuluu, mi Chɛhowa soliŋ puaa ndaa nɔ siooŋii nduɛi ya kpeku le waŋnda malaa ma mal Babilɔŋ Bɛndoo. (Tuuwɔ Aisaya 40:​3.) Mi puaa haa tosa wallo kalaŋ le halikpeŋ mi wanaa cheleŋnda bɛɛ ndaa huŋ mal piɛile lachoowaleŋ, okoŋ ma kandu Chɛhowa piɛiyo a wanaa nduaa latulu. Wali kuɛɛ puaa haa ndaa tosa yɛ? Ŋ tofaŋndɔ miŋ che.

10-11. Vɛɛ Baabuiyo solioo o pei choo a ndu hivioo mala yɛ niŋ, le mi waŋnda sina tonya cho leniŋndo? (Tofa vɛlɛ fotueiyo.)

¹⁰ Baabuiyo solioo o pei choo. Tuupa mi wɔsi 1450 fuuluu, a laba waŋnda ndaa poonyiaa Baabuiyo ni. Mi ndaa chua teleŋ vilɛi le mi ndaa chii ndu poonyiaa. Nduyɛ ndii wa ikala le mi wana aa che Baabuiyo. O faŋaŋ okoŋ kɔɔli, baa pila ndoo nɔ ni. Kɛ mɛɛ waŋnda toosiaa maasii soli poonyiaa o pei choo wo, i wa niŋ tɛtɛlɛ le Baabuilaŋ solioo tau o pei choo, le halikpeŋ mi waŋnda ndaa sɔla laŋ.

¹¹ Baabuiyo hivioo. Le wɔsiŋ bɔɔbɔɔ, o suɛi maŋgalɛi Latiŋnde niŋ Baabuiyo wa ni, nduyɛ wanaa ndaa sina dɛnɛ tau wa kinɛi ndaa bii suɛi maŋgalɛi hei bila ni. A teleŋ koŋ, i wa niŋ tɛtɛlɛ le Baabuilaŋ solioo tau o pei choo. Le hei, mi wanaa ndaa nɔ siooŋnde le Mɛlɛka wa duau sɛmbɔɔ tau, le Baabuiyo hivioo o sɔɔŋ maŋgalaŋ waŋnda ndaa bii bila woŋ niŋ. Mi hei mala wanaa ndaa veelu diomndaŋ o Baabuiyo niŋnda, le ma tuu nyɛ simlachiaa lepiɛiya wa nda pɛɛkoo wo, a nyɛ kpeekpei Baabuiyo pɛɛku wo.

12-13. Chɔmndɔ tamaseliiyo a mɛɛ wanaa wa Baabuiyo pɛɛkoo o wɔsiŋ 1,900 niŋ nda chɔɔmuu pɛɛkula piɛiyii lachoowɛi yɛ.

¹² Yaulaŋ le Baabuiyo pɛɛkoo. Mi wanaa wa Baabuiyo pɛɛkoo wa pɛɛku tonyala sɔvɛlaŋ tau. Nduyɛ ma kandu acheleŋnda dimullo a nyɛ nda wa pɛɛkoo wo okɔɔ. Kɛ simlachiaa lepiɛiya ve a kɔl kɛndɛ le hei le. O wɔsiŋ 1,900 niŋ, mi wanaa bɔɔbɔɔ kandu yaula pɔmbɔlaŋ solioo, le pɛɛkula piɛiyii lachoowɛi chɔɔmuuwo.

¹³ Naapum a wɔsi 1835, mi po pilɛ ndoo nɔ siooŋii Mɛlɛkɛiyo diolaŋ Hɛŋlue Kuluu soli yau pɔmbɔɔ. Nduyɛ mbo tɛɛsiaa o yau koŋ niŋ, nyɛ yɔŋnuŋndo te waŋndo vi pɛ. Sanaa a nyɛ o pɛɛku o Baabuiyo niŋndo, mbo tɛɛsiaa o yau koŋ niŋ maa Mɛlɛka kinɛi ke wana yoomu vi le wo ni. O cho a ndu le naŋ veluŋ a mɛɛ kaaŋii cheleŋnde wa pɛɛkoo yɛ le. A wɔsi 1837, mi wana bɛndu pilɛ diolaŋ Chɔɔchi Sitɔɔsi saaluŋ yaula pɔmbɔla laŋ opilɛ mɛɛ o luɛi o teeniiyo niŋ le kɔlaŋ inɛ. Mɛɛ o veelu diomndaŋ leniŋ, mbo laalaŋ kɛsɛ maa o saaluŋ tonya sɔvɛ sɔviɔɔ. Le hei, mbo kɛɛsiaa le acheleŋnda tonya  koŋ pɛɛkoo. A wɔsi 1842, mbo yɔŋgu suɛi o fondaŋnda bɔɔbɔɔ a suɛi lebolle aa, “An Inquiry—Are the Wicked Immortal?” (Kindiŋ Ma Sina, Baa Wanaa Dɛnɛwɔɔŋnda Nɔ Pa Yoomu Vi Le Wo?) Mi tonya Chɔɔchi Sitɔɔsi wa koŋ pɛɛkoo wo pilaŋ po feleŋgɔnɔ pilɛ diolaŋ Chaas Taas Lɔɔsɛl kɔllo tau.

14. O nɛila kuɛɛ niŋ Ŋgɔɔ Lɔɔsɛl nda chaaŋaa nduaa sɔla yɛ tɔnɔɔ, o wali waŋnda tosa o paandoo niŋ, le nɛi diandaa bɛɛndiaa wo? (Tofa vɛlɛ fotueiyo.)

¹⁴ O nɛila kuɛɛ niŋ Ŋgɔɔ Lɔɔsɛl nda chaaŋaa nduaa sɔla yɛ tɔnɔɔ, o wali waŋnda tosa o paandoo niŋ, le nɛi diandaa bɛɛndiaa wo? O pɛɛku ndaa niŋ, mi ndaa yaasiaa Baabuila yɛ yɛla waŋnda ndaa poonyiaa, ma hivi o paandoo niŋ, tuupa mi nda kandu Baabuiyo pɛɛkoo wo. Ma sɔla vɛlɛ tɔnɔɔ o yaasiaala puaa apum tosalaŋ niŋ. Mɛɛ Hɛŋlue Kuluu, Chɔɔchi Sitɔɔsi, a acheleŋnda cho nuaa yɛ. Mi Ŋgɔɔ Lɔɔsɛl nda chaaŋaa nduaa tosa wallo kalaŋ, le nɛi diandaa hoo bɛɛndiaa, sanaa a yaulaŋ, vɛlɛ a yaula pɔmbɔlaŋ solioo le tonyala Baabuiyo tɛɛsiaa.

15. Suɛi sɔvɛi kuɛɛ yɔŋnuŋ yɛ a wɔsi 1919?

¹⁵ A wɔsi 1919, mi kpaaya Babilɔŋ Bɛndoo ndoo nɔ wanaa Mɛlɛkaa choo wo hialuŋ ndu. O wɔsi koŋ niŋ “buɛi cho sakpo, nduyɛ mbo wa buɛi taasi wo” sɔlaŋ ni. Nduyɛ mi buɛiyo hoo kandu wallo kalaŋ, le wanaa ndaa nɔ yeemɛiya malaa, ma kandu kɔlaŋ o “‘Nɛi Diandaa Mɛlɛkaa’” choo. (Maa. 24:​45-47) Ŋ mel bɔɔ wanaa tosa wallo o paandoo niŋ le nɛiyo hoo bɛɛndiaa wa balikaa. Kanifuule hau niŋ, wanaa cho kɔlaŋ o nɛiyo hoo choo wa, tiuba ma chɔɔlu sinapɛŋgoo sɔla a tuula Mɛlɛkalaŋ okɔɔ. (Pulɔ. 4:​18) Nduyɛ a cho kindiŋndo o nɛi o nɛi niŋ, le yoomula ndalaŋ biyɔɔ o nɛi chɛlaŋ a hɛnaŋ Chɛhowaa wo choo. Pesiŋ bɛɛ Chɛhowa ve wanaa nduaa kɔl le ma tosa siŋgaŋndaŋ o lepilɛ niŋ kpe le. Kɛ mbo mala nda le ma siɛɛnduu yiyaŋnda ndalaŋ o pɔmpɔmbɔ. (Tofa kɔfoo hoo, “ O Pɔmpɔmbɔ Chɛhowa Siɛɛnduu Wanaa Nduaa Ni.”) A tonya, teleŋ cho fuuluu, mi sɔɔŋ naŋ tosa woŋ kpou nɛŋi Mɛlɛka kɔllo. Ŋ wa niŋ bɔɔ a kɔl kɛndɛ a teleŋ koŋ.—Kolo. 1:​10.

16. Chɔŋ a wɔsi 1919, wali kuɛɛ bii yɛ niŋ tosaŋndo le “‘Nɛi Diandaa Mɛlɛkaa’” bɛɛndiaa? (Aisaya 48:​17; 60:​17)

¹⁶ Le mi nɛiyo wa o kɛndɛ, mɛɛ mi wallo wa tosaŋndo lechoo teleŋ o teleŋ. Chɔŋ a wɔsi 1919, wallo cho hiouwɔɔ lachi a tosaŋndo kalaŋ le “‘Nɛi Diandaa Mɛlɛkaa’” bɛɛndiaa, le halikpeŋ mi wanaa bɔɔbɔɔ mal Babilɔŋ Bɛndoo, okoŋ ma kandu kɔlaŋ lechoo. Mɛɛ buɛi cho sakpo mbo wa buɛi taasi wo sɔlaŋ dɔɔ, mbo kandu wallo tosaa kalaŋ. Nduyɛ a wɔsi 1921, mbo soli yauwo hoo, “The Harp of God,” (Towa Mɛlɛkaa) le wanaa sɛnɛiya malaa ma pɛɛku tonyala Baabuiyo. Ma soli ndu o pei choo le miiliɔŋndaŋ la ŋɔmpum o sɔɔŋ maŋgalaŋ 36 niŋ. Nduyɛ mi wanaa bɔɔbɔɔ pɛɛku tonyaa o yau koŋ niŋ. Suŋ suŋ, ŋ nɔ yau sɔvɛ sɔvɛ naŋ cho soliŋndo kpeku le waŋnda Baabuiyo pɛɛkoo wo. Ndu cho Tuei Yoomoo Yeela Lefafɛɛŋ! ni. O palɛi mɛɛlɛi hei niŋ, Chɛhowa cho kɔɔna ndɔɔ soliŋndo kpeku, le naa nyɛm mala naa le pɛɛkoo a ndu okɔɔ woŋ kioo, le halikpeŋ miŋ hiou lachi a kɔlaŋ o “‘Nɛi Diandaa’” hoo choo.—Nuawɔ Aisaya 48:​17; 60:​17.

17-18. Te ŋ lo pɛ kɔlaŋ o “‘Nɛi Diandaa Mɛlɛkaa’” choo, kuɛɛ naŋ cho yɛ fuuluu?

¹⁷ Ŋ tiuba miŋ dimi maa wana o wana chɛl pɛ le Baabuiyo pɛɛkoo, mɛɛ o sɔla dikeŋnaŋndo le kɔlaŋ o “‘Nɛi Diandaa Mɛlɛkaa’” choo. Mi waŋnda apum kandu kɔlaŋ o nɛiyo hoo choo, kɛ ma mal. O baa pilɔɔ choo, mi waŋnda apum kɛɛsiaŋ o kɔl le ma hiou lachi a kɔlaŋ lechoo haaa ma fuuluu o mɛɛlulaŋ. Te ŋ hiou pɛ lachi a kɔlaŋ o nɛiyo hoo choo, kuɛɛ naŋ cho yɛ fuuluu?

¹⁸ Le wanaa nɔ tiindaŋndo le kɔlaŋ choo choo wa, te a hiou pɛ lachi a kɔlaŋ o nɛiyo hoo choo, a cho fuuluu “o kpele hɛnɛkɛ Mɛlɛkaa” niŋ choo choo. (Sɔɔŋ. 2:​7) Kɛ te wanaa nɔ tiindaŋndo le waa o chieeŋndo choo wa hiou pɛ lachi a kɔlaŋ o nɛiyo hoo choo, a cho fuuluu o wɔsila 1,000 Chiisu Cho Wa o Masaleŋ Choo Laŋ mɛɛlulaŋ. Nduyɛ a teleŋ koŋ, a cho simnɔŋ walaŋ. Te o yɔŋ pɛ maa a cho niŋ kɔlaŋ o nɛiyo hoo choo, mɛɛ kposoŋ bɛɛ yiyaŋ a nyɛm ŋ mal ma kandu kɔlaŋ lechoo woŋ te. Nduyɛ mal kɔlaŋ o nɛiyo hoo choo le haaa ma fuuluu o chieeŋ sɛnɛiyo niŋ. Maa Chɛhowa mala num ma fuuluu kɛndɛ fɔ!