1. Yɛɛ Chɛhowa dimullɛ buɛiyaa nduaa le tosaa? (Tofa vɛlɛ fotueiyo.)

 O NƐƐ lo naŋ muliŋ yɛ le nɛi chɔmaa a kɔl dɛɛniaa? Naa kpou sina mulioo le nyunaa hoo. Ŋ tiuba miŋ piɛi o Chɛhowa Mɛlɛka lo. Ndi kpeekpei o yeema naa ni miŋ tosa. O yeema naa miŋ wa piɛileŋ o ndulo le “teleŋ o teleŋ.” (1 Tɛsa. 5:​17) Ŋ tiuba miŋ wa fɛɛsɛŋ le piɛileŋ o ndulo, nduyɛ miŋ nyuna ndu le nɛi chɔmaa le nyɛ o nyɛ naŋ tosa o yoomoo niŋ. (Pulɔ. 3:​5, 6) Chɛhowa hendul naa kpeleŋ le piɛileŋ o ndulo le kanifuule, Mɛlɛka ikɛndɔɔ o cho ni.

2. Yɛɛ naŋ cho yɛ pɛɛku o buŋgɛi hei niŋ?

² Ŋ che bɔɔ dikeŋnaŋ naŋ nɔ le piɛileŋndo nyɛ sɔvɛ. A koŋ kpou, mi walta naalaŋ ɔɔ mi sɔɔŋ cheleŋndoŋ tosa mi i wa ikala le dikeŋnaŋndo hoo chuaa nyɛ sɔvɛ. Nduyɛ, lepum miŋ che maa ŋ nɔ miŋ tosa hiouwɔɔ lachioo o piɛile naaleŋ niŋ. Kɛ, ŋ naŋ kɔl tau kanifuule, miŋ sɔla kɔl dɛɛniaa a nɛi chɔmaa o Baabuiyo niŋ. O buŋgɛi hei niŋ, ŋ cho pɛɛku a tamasi Chiisu wo okɔɔ, nduyɛ miŋ che mɛɛ naŋ kɛsi teleŋndo le piɛileŋ yɛ. Ŋ cho vɛlɛ pɛɛku a sɔɔŋ sɔviɔŋ ŋuɛɛnu okɔɔ ŋ naŋ nɔ miŋ tosa o piɛile naaleŋ niŋndo, vɛlɛ a mɛɛ naŋ tosa hiouwɔɔ lachioo o piɛile naaleŋ niŋ yɛ.

3. Yɛɛ Chiisu ndoo bii yɛ bila a piɛileŋ okɔɔ?

³ Mi Chiisu bii bila maa, Chɛhowa che bɔɔ piɛileŋ nyɛ sɔvɛ. Tuupa mbo huŋ o chieeŋndo choo, mbo cha mɛɛ Chɛhowa muli piɛile puaa a waŋlaanduaa laalaŋnda yɛ. Le tamaseliiyo,  o wa Chɛhowa ikɛi mɛɛ o muli piɛile Hana leŋ, Deeve, Ilaacha a buɛiyaa laalaŋaa cheleŋ. (1 Saam. 1:​10, 11, 20; 1 Masaa. 19:​4-6; Sam 32:​5) Le saboo hoo kpeekpei Chiisu pɛɛku buɛiyaa nduaa ni le ma wa piɛileŋ teleŋ o teleŋ, nduyɛ ma nɔ tiindaŋndo maa Mɛlɛka cho piɛile ndaleŋ muli.—Maa. 7:​7-11.

4. Yɛɛ naŋ pɛɛku yɛ o piɛile Chiisuleŋ niŋ?

⁴ Mi Chiisu kɛsi tamasi kɛndɔɔ a mɛɛ ndoo piɛi o Chɛhowa lo yɛ. Teleŋ o wa wali pollo tosaa wo, mi ndoo piɛi teleŋ o teleŋ. Ndoo nɔ mbo kɛsi teleŋndo le piɛileŋ kanifuule, teleŋ o teleŋ mi ndoo wa kpɔndi kpɔndi nduyɛ mi waŋnda ndaa wa ndu a balaa silɔ. (Maki 6:​31, 45, 46) Mi ndoo chɛŋ idii puŋ le halikpeŋ mbo sɔla teleŋndo le piɛileŋ. (Maki 1:​35) Nduyɛ a teleŋ pilɛ, mɛɛ ndoo yeema kɛɛsiaa sɔvɛ sɔviɔɔ tosaa, mbo piɛi le nyumndaŋ kpulukuu. (Luku 6:​12, 13) O nyumma ndɔma mɛɛlaŋ choo, mbo piɛi teleŋnda bɔɔbɔɔ kanifuule, simul kala kalaa wa ndu komal le mbo siou wali sɔvɛ ndoo hiŋ tosaa o chieeŋndo choo wo.—Maa. 26:​39, 42, 44.

5. Vɛɛ naŋ tuallɛ tamasi Chiisu wo kɔɔli?

⁵ Tamasi Chiisu wo pɛɛku naa maa, mɛɛ mɛɛ naŋ wa kpɔndi kpɔndi, ŋ nɔ miŋ kɛsi teleŋndo le piɛileŋ. Maa Chiisu, ŋ nɔ miŋ kɛɛsiaa teleŋ naŋ nɔ miŋ piɛiyo. Naapum ŋ keleŋa chɔnɔŋ idii le piɛileŋ ɔɔ ŋ kɛsi teleŋndo ichɔl le waa piɛileŋ. Te ŋ tosa pɛ keŋ, ŋ cho chɔm Chɛhowa maa ŋ nɔ balika melaa le ke sɔvɛ o ke naa wo. Mi ndepilɛnɔ pilɛ diolaŋ Lene loonuŋ teleŋ tase o pɛɛku a dikeŋnaŋ naŋ nɔ le piɛileŋndo. Mbo dimi aa: “Mɛɛ ya pɛɛku maa I tiuba mi soo o Chɛhowa lo teleŋ o teleŋ, mi keŋ mala ya mi cha ndu maa chaŋyɛi nii kpɛɛluŋnde o cho ni, nduyɛ maa I nɔ mi tosa hiouwɔɔ lachioo o piɛile nileŋ niŋ.” I cho kpendekele maa, hei cho tonya a naa a bɔɔbɔɔ. Lelaŋ, ŋ pɛɛkuŋndɔ a sɔɔŋ sɔviɔŋ ŋuɛɛnu okɔɔ ŋ naŋ nɔ miŋ tosa o piɛile naaleŋ niŋndo.

6. A mɛɛ Sɔɔŋ Chɔɔmaŋndoŋ 4:​10, 11 dimi yɛ, yɛɛ Chɛhowa bɛnda yɛ mbo sɔla?

⁶ Saŋgala Chɛhowa. O yilaŋii kiilanɔɔ Chɔŋ che ve niŋ, bɛnduaa 24 wa Chɛhowa saŋgalaa. A wa dimioo maa Chɛhowa bɛnda ni mbo sɔla “biiloo, a bɛɛleŋ, a kpaayaa.” (Nuawɔ Sɔɔŋ Chɔɔmaŋndoŋ 4:​10, 11.) Maalikɛiya o  choo choo niŋ bɛɛ nɔ sabulaŋ tau le Chɛhowa saŋgalaa a ndu biiloo. A cho a ndu latulu o choo choo niŋ, nduyɛ a sina ndu nyɛkɛndɛi. Mi maalikɛiya che suliŋnda Chɛhowalaŋ kpendekele o sɔɔŋ o tosa woŋ niŋ. Nduyɛ te a che pɛ mɛɛ Chɛhowa tosa sɔɔŋ yɛ, mi keŋ nyindu nda le ndu piɛiyo.—Choobu 38:​4-7.

7. Le yɛɛ naŋ nɔ yɛ miŋ saŋgala Chɛhowa?

⁷ Naa bɛɛ nɔ miŋ saŋgala Chɛhowa o piɛileŋ niŋ. Ŋ tosa hei te ŋ wa ndu pɛ dimullo nyɛ naŋ kaala a ndu okɔɔ wo, a le sabu naŋ nɔ bɛɛleŋ le ndu wo. Te a wa pɛ diomndaŋ veeloo o Baabuiyo niŋ, kindiŋ ma saaluŋ suliŋnda Chɛhowalaŋ, taama taama la ŋ hɛnaŋ ndaŋ. (Choobu 37:​23; Luomaŋ. 11:​33) Okoŋ, ma dimul ndu mɛɛ ŋ yiyaŋ a laŋ okɔɔ yɛ. Ŋ nɔ miŋ saŋgala ndu le mɛɛ o cho naa a puaapiliaa vɛlɛ a ndepiliaa naa chieeŋndo balɔɔ silɔ malaa yɛ. O cho naa nyɛm naŋ hauba woŋ kioo teleŋ o teleŋ, nduyɛ mbo manda naa.—1 Saam. 1:​27; 2:​1, 2.

8. Ɔɔ sabulaŋ latiŋ la naŋ nɔ miŋ mel Chɛhowa balikaa laŋ? (1 Tɛsaloniaŋ 5:​18)

⁸ Mel Chɛhowa balikaa. Ŋ nɔ sabulaŋ tau le miŋ mel Chɛhowa balikaa o piɛileŋ niŋ. (Nuawɔ 1 Tɛsaloniaŋ 5:​18.) Ŋ nɔ miŋ mel ndu balikaa le nyɛm kɛndɛŋ naŋ nɔ woŋ. Nduyɛ pɛŋ, nyɛ o nyɛ kɛndɛ naŋ nɔ, ndu ke naa ni. (Chemi. 1:​17) Le tamaseliiyo, ŋ mel ndu balikaa le mɛɛ o toosiaa chieeŋ naa o kɛndɛ kɛndɛ yɛ, a le nyɛm kɔndɔfiliŋ o toosiaa woŋ. Ŋ mel ndu vɛlɛ balikaa le yuŋgu naa, chaaŋaa naa vɛlɛ a le tiindaŋ naŋ nɔ wo. Nduyɛ, ŋ nɔ miŋ mel ndu balikaa le mɛɛ o chɛl naa miŋ wa o chaŋyɛi kpɛɛluŋnde niŋ a ndu yɛ.

9. Le yɛɛ naŋ nɔ yɛ miŋ chɔm Chɛhowa balika melaa?

⁹ Naa a pilɛŋ pilɛŋnda nɔ miŋ yiyaŋ a sabula naŋ nɔ miŋ mel Chɛhowa balikaa laŋ okɔɔ. Wanaa bɔɔbɔɔ chɔm balika melaa kposoŋ te. Teleŋnda bɔɔbɔɔ, mi waŋnda haa handu kɔllo o nyɛ nda yeema wo choo, kɛ a chɔm balika melaa le nyɛ nda nɔ wo le. Te ŋ kandu pɛ tamasi waŋnda haa tolɔɔ kɔɔli, keŋ cho tosa teleŋ o teleŋ miŋ wa Chɛhowa nyunaa o piɛileŋ niŋ le nyɛm naŋ hauba woŋ kinɛi. Le hei fafaŋndo, ŋ nɔ miŋ hiou lachi a Chɛhowa balika melaa chɔmndo le nyɛ o nyɛ o cho naa tosallo.—Luku 6:​45.

10. Vɛɛ Chɛhowa balika melaa chɔmndo mala yɛ ndepilɛnɔ pilɛ mbo biunuŋ nyɛkindilaa komal ndu wo? (Tofa vɛlɛ fotueiyo.)

¹⁰ Chɛhowa balika melaa chɔmndo mala naa miŋ biunuŋ sɔɔŋ kindilaŋ. Ŋ tofaŋndɔ suɛi yɔŋnaŋii ndepilɛnɔ pilɛ diolaŋ Kiŋyuŋ sook. Suɛi yɔŋnaŋii nduɛi cho o Bandu Mɛŋgɛlaa hoo niŋ, Tɛɛkpaa 15, 2015. Mi wanaa chiɔuwaa saaluŋ ndepilɛnɔɔ hoo naa kaŋsɛiyo o yemnde. Mbo dimi aa: “Mi tambu kɔllo tau, nduyɛ mi yiyaŋ maa nyɛ o nyɛ hɛluŋ ya. Mi siooŋnde bii ya tau.” Yɛɛ mala yɛ ndu mbo biunuŋ? Mbo dimi maa ichɔl o ichɔl tuupa mi ndoo lɔl, mi ndoo hel o fondaŋ ndaa toosiaa o chiɛi ndaa choo le challe wo, okoŋ mbo piɛi a sɔɔŋ ŋ ŋuɛɛnu okɔɔ le Chɛhowa balika melaa chɔmndo. Mi hei ndii tosa ndoo buulaŋ  tau le, nduyɛ mi ndii tosa vɛlɛ mbo chɔm mɛɛ kpɛ o kaala Chɛhowa yɛ. Mbo cha kpendekele mɛɛ Chɛhowa mala buɛiyaa nduaa laalaŋnda yɛ, te sɔɔŋ kindilaŋ komal nda pɛ. Nduyɛ, mbo cha vɛlɛ maa salala naŋ sɔla Chɛhowa o ba laŋ la hiou, a sɔɔŋ kindilaŋ komal naa woŋ. Maa Kiŋyuŋ sook, ŋ nɔ sabulaŋ tau le Chɛhowa balika melaa chɔmndo o yɔŋ bɛɛ mi sɔɔŋ kindilaŋ wa naa choo. Te ŋ chɔm pɛ balika melaa o piɛileŋ niŋ, keŋ mala naa miŋ hiou lachi a waa a kɔl kɛndɛ.

11. Mɛɛ Chiisu miiŋgu choo choo, le yɛɛ buɛiyaa nduaa ndaa yeema yɛ kɔl simulaa?

¹¹ Nyuna Chɛhowa le mbo ke num kɔl simulaa o wali pollo niŋ. Tuupa mi Chiisu miiŋgu choo choo, mbo loonuŋ buɛiyaa nduaa a wali o ke nda le ma timbi seileŋ a ndu okɔɔ “o Chulusalɛm niŋ, Chudiaa a Sameeliaa, a ba o ba fee o chieeŋndo choo” wo. (Walta. 1:​8; Luku 24:​46-48) Teleŋ biŋgi okoŋ kɔɔli, mi simlachiaa Chuuwa bii kiilanɔɔ Pitɛ nda Chɔŋ, ma kua a nda o laŋgbaa ndaa kialu yamaŋ nda lo, okoŋ ma dimul nda maa a pɛŋgi yooŋgu kɛndɔɔ dimioo. Nduyɛ pɛŋ, ma kɔŋgɔliaŋ nda tau. (Walta. 4:​18, 21) Yɛɛ Pitɛ nda Chɔŋ tosa yɛ?

12. A mɛɛ Walta Kiilaa 4:​29, 31 dimi yɛ, yɛɛ buɛiyaa Chiisuaa tosa yɛ?

¹² Mi Pitɛ nda Chɔŋ mulul simlachiaa lepiɛiyaa Chuuwa aa: “I kuɛɛ wa yɛ i kɛndɛ Mɛlɛka o hɔl? Diikɔŋndo nya ɔɔ nyɛ Mɛlɛka dimi wo tosaa? Nyapila kiolu wɔ yamɛi. Kɛ naa naa, ŋ nɔla miŋ pɛŋgi suɛi a sɔɔŋ naŋ che, nduyɛ miŋ tuɛiyoŋ okɔɔ le.” (Walta. 4:​19, 20) Mɛɛ nda mal Pitɛ nda Chɔŋ, mi buɛiyaa Chiisuaa kpou saŋgala Chɛhowa o piɛileŋ niŋ, nduyɛ ma nyuna ndu le mbo mala nda ma tosa hɛnaŋ ndɔɔ. Ma piɛi aa: “Mala buɛiyaa numnda ma hiou lachi a diom numndo dimioo a kɔl simulaa.” Mi Chɛhowa muli piɛile ndaleŋ.—Nuawɔ Walta Kiilaa 4:​29, 31.

13. Yɛɛ naŋ pɛɛku yɛ o tamasi Chiŋ Yuk wo niŋ?

¹³ Ŋ nɔla miŋ tol tamasi buɛiyaa Chiisuaa kɔɔli, te ŋ hiou pɛ lachi a yooŋgu kɛndɔɔ dimioo o yɔŋ bɛɛ mi masaleŋ le kuuna naa. Ŋ tofaŋndɔ tamasi Chiŋ Yuk wo. Ma duau puaapilɛnɔɔ hoo o chiɛi manyumndo niŋ le mɛɛ o kɛɛ balaŋ lueiyo o sovɛileŋ niŋ yɛ. Ma ke ndu wallo o chiɛi manyumndo niŋ le wanaa cheleŋaa wa o chiɛi manyum koŋ niŋnda walta cheleŋ tosallo. Kɛ ma dimul ndu maa, a walta nda ke ndu le tosaalaŋ kinɛi okɔɔ o nɔ ni mbo soo, o nɔ mbo soo a nyɛ o nyɛ cheleŋ okɔɔ le, hali Baabuiyo bɛɛ. Mbo piɛi o Chɛhowa lo le mbo ke ndu kɔl simulaa a taasioo le yooŋgu kɛndɔɔ dimioo teleŋ o teleŋ o sɔla pɛ fondaa. (Walta. 5:​29) Mbo dimi aa: “Mi Chɛhowa muli piɛile nileŋ. Mbo ke ya kɔl simulaa a taasioo le pɛɛkula Baabuilaŋ kandɔɔ o diola chiɛi manyumndo le chemchemndaŋ ma ŋuɛɛnu. Nduyɛ ichɔl o ichɔl, mi yaa poonyiaa yaulaŋ le wanaa cheleŋaa wa o chiɛi manyumndo niŋnda kioo diimandɔɔ.” Naa bɛɛ nɔ tiindaŋndo maa Chɛhowa cho naa mala le miŋ dimi yooŋgu kɛndɔɔ. Maa Chiŋ Yuk, ŋ nɔ miŋ piɛi o ndulo le mbo ke naa kɔl simulaa a taasioo.

14. Yɛɛ mala yɛ naa te bahawɛilaŋ la komal naa pɛ? (Sam 37:​3, 5)

¹⁴ Nyuna Chɛhowa le mbo mala num te bahawɛilaŋ la komal num pɛ. Naa a bɔɔbɔɔ cho saŋgaa kanifuule ŋ cho a naa, ɔɔ ŋ cho a kɔl tambɛiyo le mɛɛ wana naŋ kaala wo vi yɛ. Naapum ŋ cho bahawɛi kala kalaa biuwɔŋndo o yuŋgu naa niŋ, nyɛpalaa waŋnda tusi naa choo wo ɔɔ bahawɛila cheleŋ. Nduyɛ, mi naala kpundɛlaŋ a chɔulaŋ la tosa ndi ikala le bahawɛilaŋ ndaŋ biuwɔŋndo. Te bahawɛila waa nuaa la komal num pɛ, dimul Chɛhowa nyɛ o nyɛ a ndi okɔɔ. Dimul ndu a laŋ okɔɔ mɛɛ ŋ dimul nuaa chaaŋ num  kpɛɛluŋndo a bahawɛila numndaŋ okɔɔ yɛ. Nduyɛ nɔ tiindaŋndo maa, ‘o nɔla mbo mala num.’—Nuawɔ Sam 37:​3, 5.

15. Vɛɛ piɛileŋ le mala yɛ naa miŋ biunuŋ “o nyɛpalaa suu o suu niŋ”? Chɔmndɔ tamaseliiyo.

¹⁵ Piɛileŋ teleŋ o teleŋ o Chɛhowa lo mala naa miŋ biunuŋ “o nyɛpalaa suu o suu niŋ.” (2 Kɔliŋ. 1:​4) Chɛhowa sina nyɛ o nyɛ cho buɛiyaa nduaa choo, nduyɛ mbo ‘tuei piɛile ndaleŋ,’ okoŋ mbo mala nda. (Sam 145:​18, 19) Mi ndepilɛnɔ kɔɔfanɔ pilɛ cho wɔsilaŋ 29 wo diolaŋ Kilisiti cha maa hei cho tonya. O lepilɛ niŋ kpe, mi ndepilɛnɔɔ hoo kandu bahawɛi kɛndiaa sɔlaa. Fulamakɔɔlioo wa ni, mbo tambu kɔllo tau. Okoŋ kɔɔli, mbo tuɛi maa, wanaa chiɔuwaa saaluŋ kala ndɔ naa wɔɔŋ wɔɔŋndo opum. Mbo dimi aa: “Lepaa o lepaa, mi yaa piɛi o Chɛhowa lo a kɔllo kpou, le mbo luei ya yoomuaŋ mi biunuŋ. Mi kindiŋ le mi hiou lachi a sɔɔŋ ŋMɛlɛkayaŋ tosaa, mɛɛ kɔlaŋ o bɔŋaŋndaŋ a pɛɛkɔŋ ipilayaa tosaa cho nuaa yɛ.” Mbo chɔɔlu dimi aa: “Mi piɛileŋ le mala ya o teleŋ kala kala koŋ niŋ. Mi sina maa Chɛhowa wa ya malaa teleŋ o teleŋ. Nduyɛ yiyaŋndo a hei okɔɔ ndii dɛɛniaa ya kɔllo tau ni. Mi che bɛɛ bahawɛi kɛndiaa nuu feŋaŋ o lepilɛ niŋ kpe le, kɛ mi Chɛhowa muli piɛile nileŋ sanaa a ya kɔl nyulu kpeekpeiyo kioo. Nduyɛ mbo tosa mi kɛsi kɔllo.” La ŋ kɛsiŋ o kɔl teleŋ o teleŋ maa, “Chɛhowa sina mɛɛ o chiindiaa wanaa yɔŋguŋ o ndu lo wa o nyɛpalaa niŋ yɛ.”—2 Pitɛ 2:​9.

16. Le yɛɛ naŋ yeema yɛ mala Chɛhowaa le tɔɔndaŋndo chɔulabaa?

¹⁶ Nyuna Chɛhowa le mbo mala num tɔɔndaŋndo chɔulaba. Le mɛɛ naŋ cho wanaa lahakiaa yɛ, teleŋ o teleŋ mɛɛ miŋ chɔulaba kalaŋ, le halikpeŋ ŋ wou laba o sɔɔŋ wɔɔŋndoŋ niŋ te. Nduyɛ Setana cho kindiŋndo o nɛi o nɛi niŋ, le mi hei chɔɔlu kalu kpoke le naa. Nɛiyo opilɛ o cho hei tosaa wo cho yiyaŋnda naalaŋ pɔsɔŋiaa a yelelaŋnda wɔɔŋndaŋ ni. Mi yelelaŋnda waa nuaa la nɔɔliaa yiyaŋnda  naalaŋ, nduyɛ mi la tosa miŋ wa a nɔɔlɛi Chɛhowa o hɔl. Mi la nyindu naa vɛlɛ le miŋ luei balaŋ o hakioo niŋ.—Maki 7:​21-23; Chemi. 1:​14, 15.

17. Te ŋ piɛi pɛ o Chɛhowa lo le mbo mala naa miŋ fafaŋ tɔɔndaŋndo, yɛɛ naŋ nɔ yɛ miŋ tosa? (Tofa vɛlɛ fotueiyo.)

¹⁷ Ŋ yeema mala Chɛhowaa le tɔɔndaŋndo tiuwo ba. Mɛɛ Chiisu wa buɛiyaa nduaa pɛɛkoo mɛɛ nda nɔ ma piɛi yɛ, mbo suaa a hei okɔɔ. Mbo dimi aa: “Chɛl mi tɔɔndaŋndo tiu naa ba le. Manda naa yɔŋii Setana tiu naa ba.” (Maa. 6:​13) I cho tonya maa, Chɛhowa nɔ yeemɛi le naa malaa. A koŋ kpou, ŋ nɔ miŋ nyuna ndu le naa malaa. Ŋ nɔ vɛlɛ miŋ tosa wallo o piɛile naaleŋ choo. Nɛilaŋ lapum la naŋ tosa heiyo cho ni, ŋ nɔ miŋ wa diomndaŋ veeloo a nilaŋ yaŋɔɔ o yiyaŋnda waŋnda nɔ o chieeŋ Setanaa niŋndaŋ te. (Sam 97:​10) Ŋ tiuba miŋ wa yiyaŋndo o sɔɔŋ kɛndɔŋ choo, te ŋ wa pɛ diomndaŋ veeloo o Baabuiyo niŋ. Kɔlaŋ o bɔŋaŋndaŋ a o wali pollo niŋ mala naa vɛlɛ miŋ manda yiyaŋnda naalaŋ. Chɛhowa mɛi lediom maa, kposoŋ bɛɛ o cho chɛlɔɔ mi tɔɔndaŋ naŋ nɔla biuwɔŋ te wo komal naa le.—1 Kɔliŋ. 10:​12, 13.

18. Te o hiŋ pɛ a piɛileŋ okɔɔ, yɛɛ naa kpou nɔ yɛ miŋ tosa?

¹⁸ Naa a pilɛŋ pilɛŋnda kpou nɔ miŋ piɛi suŋ suŋ mbo hiou maa paandu, le miŋ lo o laalaŋ naa choo taama taama o palɛi mɛɛlɛi hei niŋ. Kɛsi teleŋndo lepaa o lepaa, le piɛileŋ o Chɛhowa lo a kɔllo kpou. O yeema naa miŋ dimul ndu nyɛ o nyɛ cho naa o kɔl o piɛileŋ niŋ. (Sam 62:​8) Saŋgala ndu, nduyɛ ma mel ndu balikaa le nyɛ o nyɛ o cho tosaa. Nyuna ndu le mbo mala num ma nɔ kɔl simulaa o wali pollo niŋ. Nyɔɔlu ndu le mbo mala num ma biunuŋ bahawɛila numndaŋ, nduyɛ mbo mala num ma fafaŋ tɔɔndaŋnda komal numndaŋ. Chɛl mi nyɛ o nyɛ ɔɔ mi wana o wana kuuna num piɛileŋ o Chɛhowa lo teleŋ o teleŋ te. Kɛ, vɛɛ Chɛhowa muli yɛ piɛile naaleŋ? Ŋ cho pɛɛku a hei okɔɔ o buŋgɛi cho lachi ve niŋ.