1. Vɛɛ Baabuiyo tɛɛsiaa yɛ kaala kpeekpeiyo?

 ‘MƐƐ yiŋndeŋ le sandu nuaa yɛ, lende kaalaa cho ni. Yiŋnde bɛndule Chɛhowaleŋ. A yɔŋ bɛɛ aa mɛŋndaŋ o pee mɛŋma ihɛllo kpou, ma nɔla yiŋnde kaalaa leŋ nyumi le. Mɛŋndaŋ o peelaŋ kpou ma chuuŋgiaŋ bɛɛ naapilɛ, ma nɔla mi ma tosa mi kaalaa o lo le.’ b (Chondii Sɔlɔ. 8: 6, 7) Nuawɔ se tɛɛsiaa kɛndɛ le kaala kpeekpeiyo! Diomndaŋ ndaŋ la tiuba mi la dɛɛniaa wanaa cho o nɔɔ niŋnda kɔllo tau. A tiuba ma nɔ kaalaa o kala poŋ ndapila tɛɛŋ.

2. Yɛɛ wanaa cho o nɔɔ niŋnda nɔ yɛ ma tosa le halikpeŋ kaala ndaa tul toolo le?

² Le mi wanaa cho o nɔɔ niŋnda nɔ kaala kpeekpeiyo ndapila tɛɛŋ, mɛɛ ma dɔu sɛmbɔɔ tau. Le tamaseliiyo, le mi yiŋndeŋ le hiou lachi a sandei, mɛɛ ma wa kilioŋ beeŋguuwo, nduyɛ ma wa yɔmnde wouwo. Te a tosa lende le, yiŋnde leŋ le cho wa kɔlaŋ a nyumndo o pɔmpɔmbɔ. O nɛi pilɛ koŋ choo, le mi kaala cho pɔnɔɔ a lanɔɔ tɛɛŋndo hiou lachi a waa o kala poŋ, mɛɛ ma wa chaŋyɛi ndɛi kindioo. Lepum, mi pɔnɔɔ a lanɔɔ che maa kaala ndaa cho tolɔɔ toolo taama taama te bahawɛi nyɛsɔlaa, bahawɛila kɛndiaa, ɔɔ te chuauwa mandaa wa pɛ nda kindilaa tau. Lelaŋ, te o yɔŋ pɛ ma nɔ pɔnɔɔ ɔɔ lanɔɔ, yɛɛ ŋ nɔ yɛ ma tosa le mi ‘yiŋnde bɛndule Chɛhowaleŋ’ le hiou lachi a sandei o nɔ nyaa niŋ? O buŋgɛi hei niŋ, ŋ cho pɛɛku a nɛilaŋ layaa okɔɔ, la mala num mi nɔ numndo wa o kala poŋ, nduyɛ ma tuei ndu yeela wo. c

3. Te pɔnɔɔ a lanɔɔ nɔ pɛ kaalaa o kala poŋ le Chɛhowa, vɛɛ keŋ mala yɛ nda le ma hiou lachi a kaalaa nɔɔ ndapila tɛɛŋ? (Ikilisiaatii 4:​12) (Tofa vɛlɛ fotueiyo.)

³ Le mi ‘yiŋnde bɛndule Chɛhowaleŋ’ le hiou lachi a sandei, pɔnɔɔ a lanɔɔ nɔ ma kindiŋ kpoke le mi chaŋyɛi ndɛi wa ikala poŋ a Chɛhowa. Vɛɛ hei tosaa mala yɛ nda? Te pɔnɔɔ a lanɔɔ che pɛ chaŋyɛi ndɛi a Finya nda o choo choo niŋ isɔvɛ, keŋ mala nda ma dɔu silala ndɔlaŋ o wali niŋ. Nduyɛ mi keŋ tosa ma fafaŋ bahawɛila tosa niŋ mi kaala ndaa tol toolo wo. (Nuawɔ Ikilisiaatii 4:​12.) Mi wanaa nɔ chaŋyɛi kpɛɛluŋnde a Chɛhowa wa kindiŋ le tamasi ndɔɔ tolɔɔ kɔɔli, vɛlɛ ma nɔ suliŋnda kɛndɛlaŋ mɛɛ kɛndɛi, biuwɔŋndo, a malɔɔ hakioo cho nuaa yɛ. (Ɛfi. 4: 32–5:​1) Te pɔnɔɔ a lanɔɔ nɔ pɛ suliŋndaŋ ndaŋ, mi keŋ tosa mi kaala ndaa hiou lachi a hindɔɔ. Mi ndepilɛnɔ pilɛ diolaŋ Lena cho niŋ o nɔɔ le wɔsilaŋ hiouwɔɔ 25 wo dimi aa: “Te waŋndo nɔ pɛ chaŋyɛi kpɛɛluŋnde a Chɛhowa, mi i wa tɛtɛlɛ le ndu kaalaa a ndu bɛɛleŋ kioo.”

4. Le yɛɛ Chɛhowa hɛli yɛ Choosɛ nda Meele le ma wa kalaŋ chuauwaa Mɛsayanɔɔ?

⁴ Ŋ tofaŋndɔ tamaseliiyo opilɛ o Baabuiyo niŋ. Mɛɛ Chɛhowa ndoo yeema le pɔnɔɔ a lanɔɔ hɛlioo le ma wa kalaŋ chuauwaa Mɛsayanɔɔ, mbo hɛli Choosɛ nda Meele o yuŋgula fula o pulale Deeve leŋ choo laŋ tɛɛŋ. Le yɛɛ? Kanifuule nda ŋiɔɔŋ kpou ndaa nɔ chaŋyɛi kpɛɛluŋnde a ndu. Nduyɛ, Chɛhowa ndoo sina maa a cho hiouwɔɔ lachi a ndu kɛsioo wana tasoo o nɔ ndaa niŋ. Yɛɛ wanaa cho o nɔlaŋ niŋnda pɛɛku yɛ Choosɛ nda Meele o ba?

5. Yɛɛ piaanduaa pɛɛku yɛ Choosɛ o ba?

⁵ Choosɛ wa o bɛɛndiaŋ teleŋ o teleŋ le nɛi chɔmaa Chɛhowaa tolɔɔ kɔɔli. Nduyɛ, mi keŋ tosa mbo simnuŋ pɔnɔ kɛndɛ. Bɛmbɔɔ leyaa kpulukuu, mi Chɛhowa ke ndu nɛi chɔmaa a yuŋgu ndɔɔ okɔɔ. Nduyɛ teleŋ kɛ kɛ, haupa mi ndoo dɔu nɛi chɔmaa koŋ o wali niŋ, o yɔŋ bɛɛ mi ndii wa ikala ndu o ba. (Maa. 1:​20, 24; 2:​13-15, 19-21) Mɛɛ Choosɛ tol nɛi chɔmaa Mɛlɛkaa kɔɔli, mi keŋ mala ndu le mbo manda Meele, mbo toolu ndu, vɛlɛ mbo ke ndu nyɛm o hauba woŋ. A tonya, naapum mi hei tosa mi Meele chɔɔlu Choosɛ kaala, nduyɛ mbo chɔɔlu bɛɛleŋ nɔ le ndu. Piaanduaa, la tual tamasi Choosɛ wo kɔɔli, te la wa pɛ silala tɔlnuŋ o Baabuiyo choo laŋ tolɔɔ kɔɔli le yuŋgula nyalaŋ biyɔɔ nyɛkɛndɛi. d Te la wa pɛ hei tosaa o yɔŋ bɛɛ mi i wa ikala, keŋ tosa mi la chɔm kaalaa le landaa nyaa, nduyɛ mi la kindi nɔla nyalaŋ poŋ. Mi ndepilɛnɔ pilɛ o Vanuatu niŋ, o cho niŋ o nɔɔ le wɔsilaŋ hiouwɔɔ 20 ndo dimi aa: “Te pɔnɔ nuu tol pɛ nɛi chɔmaa Chɛhowaa kɔɔli, mi keŋ tosa mi chɔɔlu ndu bɛɛleŋ ke tau. Mi i tosa vɛlɛ mi wa hɛnɛkɛ nduyɛ mi chɔɔlu tiindaŋndo dɔwɔɔ o kɛɛsiaala ndɔlaŋ niŋ.”

6. Yɛɛ laanduaa pɛɛku yɛ Meele o ba?

 ⁶ Meele ndoo nɔ chaŋyɛi kpɛɛluŋnde a Chɛhowa. Laalaŋ ndɔɔ ndoo tolnuŋ o sɔɔŋ Choosɛ ndoo tosa woŋ choo le. Ndoo sina Diom Mɛlɛkaa nyɛkɛndɛi. e (Luku 1:​46) Nduyɛ mi ndoo chua teleŋndo tau le yiyaŋndo o sɔɔŋ ŋMɛlɛkayaŋ choo. (Luku 2:​19, 51) I cho tonya maa, chaŋyɛi kpɛɛluŋ Meele ndoo nɔ a Chɛhowa ve tosa ni mbo wa lanɔ kɛndɛ. Hau bɛɛ, laanduaa bɔɔbɔɔ cho kindiŋndo le ma wa maa Meele. Le tamaseliiyo, mi ndepilɛnɔ pilɛ diolaŋ Imiko dimi aa: “Teleŋ ya wa yembu wo, yaa nɔ kɛɛsiaa le sɔɔŋ ŋMɛlɛkayaŋ tosaa. Kɛ chɔŋ a teleŋ ya chal o nɔɔ wo, pɔnɔ nuu piɛi le naa ni, nduyɛ ndu chua chilaŋ o sɔɔŋ ŋMɛlɛkayaŋ niŋ ni. Le hei, mi cha maa laalaŋ nuu ndoo tɔlnuŋ o sɔɔŋ pɔnɔ nuu ndoo tosa woŋ choo. Lelaŋ, mi yiyaŋ maa I nɔ mi siiluŋ kalaŋ nuu le chaŋyɛi nii kindioo poŋ a Chɛhowa. Suŋ suŋ niŋ, I nɔ kɛɛsiaa le piɛileŋ, diomndaŋ veeloo o Baabuiyo niŋ, a yiyaŋndo o nyɛ ya pɛɛku wo choo.” (Kalee. 6:​5) Laanduaa, te la hiou pɛ lachi a chaŋyɛi nyɛi kindioo poŋ a Chɛhowa, piaandaa nyaa cho sabulaŋ nɔ tau le ma saŋgala nya, vɛlɛ ma kaala nya.—Pulɔ. 31:​30.

7. Yɛɛ pɔnɔɔ a lanɔɔ pɛɛku yɛ Choosɛ nda Meele o ba te o hiŋ pɛ a Chɛhowa piɛiyo diompilɛ?

⁷ Mi Choosɛ nda Meele ndaa tosa vɛlɛ wallo diompilɛ, le mi chaŋyɛi ndɛi a Chɛhowa hiou lachi a waa ikala poŋ. Ndaa sina mɛɛ i cho suɛi sɔvɛ le mi yuŋgoo piɛi Chɛhowa diompilɛ yɛ. (Luku 2:​22-24, 41; 4:​16) Naapum, hei wa ikala kpoke le tosaa taama taama mɛɛ nda velu chuauwa tau. Nuawɔ sei tamasi kɛndɛ bɛndu le wanaa cho hau o nɔlaŋ niŋnda! Te o yɔŋ pɛ mi la nɔ chuauwa maa Choosɛ nda Meele, naapum mi i wa ikala num o ba le kɔlaŋ o bɔŋaŋndaŋ, ɔɔ le teleŋndo sɔlaa le pɛɛku leyuŋgoo tosaa. Naapum mi i wa vɛlɛ ikala le mi num a wana nya cho o nɔɔ niŋndo pɛɛku, ɔɔ le mi la piɛi diompilɛ. Kɛ loonuŋ maa, te la wa pɛ Chɛhowa piɛiyo diompilɛ, keŋ mala nya mi la sɔɔŋgaŋ ikɛi, nduyɛ mi la sɔɔŋguu vɛlɛ Chɛhowa ikɛi kpɛɛluŋ. Lelaŋ, la handu Chɛhowa piɛiyo nyɛ tasoo o yoomula nyalaŋ niŋ.

8. Yɛɛ wanaa nɔ bahawɛilaŋ o nɔla ndalaŋ niŋnda nɔ yɛ ma tosa le ma tuei pɛɛku leyuŋgoo yeela?

⁸ Te o yɔŋ pɛ mi la nɔ bahawɛilaŋ o nɔ nyaa niŋ, naapum mi i wa ikala le pɛɛku leyuŋgoo tosaa. Te lende i cho ni, mɛɛ la kandu suukaŋndo o biŋgi o suɛi nya ŋiɔɔŋ kpou chɛlaŋ choo ve, nduyɛ mi la tosa mi wana o wana tuei suukaŋ koŋ yeela. Hei tosaa mala nya mi la chɔɔlu kaaliaŋ, nduyɛ mi la nɔ yeemɛi le Chɛhowa piɛiyo diompilɛ.

9. Le yɛɛ pɔnɔɔ a lanɔɔ nɔ yɛ ma chua teleŋndo diompilɛ?

⁹ Wanaa cho o nɔlaŋ niŋnda, la tiu vɛlɛ ba mi la hiou lachi a kaala cho nya tɛɛŋndo kindioo poŋ, te la wa pɛ teleŋndo chuaa diompilɛ. Hei tosaa mala num ma sina yeemaŋ wana nya cho o nɔɔ niŋndo, vɛlɛ a yiyaŋnda ndɔlaŋ. (Chɛ. 2:​24) Tofawɔ nyɛ Lilia nda Lusilaŋ saaluŋndo mɛɛ nda chal o nɔɔ niŋ. Wɔsilaŋ 15 la hiou niŋ ni chɔŋ a teleŋ nda chal o nɔɔ niŋndo. Mi Lilia dimi aa: “Miŋ cha maa naŋ tiuba miŋ chua teleŋndo diompilɛ mɛɛ naŋ yiyaŋ yɛ le. Mi wallo a kpekulaŋ chiɛiniŋ ndoo chua teleŋndo tau naa o ba. Nduyɛ mɛɛ naŋ velu chuauwa, mi nda bɛɛ kandu naa teleŋndo chuaa o ba. Miŋ saaluŋ maa te ŋ nuuviaa teleŋndo le naapila le, keŋ cho tosa ŋ sɔɔŋgaŋ niŋ ikɛi kpɛɛluŋ te.”

10. Vɛɛ wanaa cho o nɔlaŋ niŋnda duau yɛ sawa mandaa cho o Ɛfisiaŋnda 5:​15, 16 niŋndo o wali niŋ?

¹⁰ Yɛɛ wanaa cho o nɔlaŋ niŋnda nɔ yɛ ma  tosa le ma chua teleŋndo diompilɛ? Naapum, la kɛɛsiaa teleŋndo le waa diompilɛ. (Nuawɔ Ɛfisiaŋnda 5:​15, 16.) Mi puaapilɛnɔ pilɛ o Naŋchiiliaa niŋ diolaŋ Uzondu dimi aa: “Te I wa pɛ teleŋ ya nɔ mi tosa walta yɛ yɛlaŋ ndo kɛɛsiaa, mi kɛɛsiaa teleŋ ya naa laa nuu cho wa diompilɛ wo, nduyɛ mi kɛsi teleŋ koŋ nyɛ tasoo.” (Filipi. 1:​10) Tofawɔ mɛɛ lanɔ buɛi ibuŋga pilɛ o Mɔdova niŋ diolaŋ Anasitasia soliŋ teleŋ ndɔɔ kpeku nyɛkɛndɛi yɛ. Mbo dimi aa: “Mi kindiŋ le walta nilaŋ tosaa teleŋ pɔnɔ nuu wa kpɔndi kpɔndi a kalaŋnda ndɔlaŋ ndo. Okoŋ te o chii pɛ, ŋ soliŋ teleŋ lo wo kpeku le waa diompilɛ.” Kɛ te o wa yɛ maa i cho ikala nya o ba le teleŋndo sɔlaa le waa diompilɛ?

11. Walta kuɛɛ Akuila nda Pilisila ndaa tosa yɛ diompilɛ?

¹¹ Wanaa cho o nɔlaŋ niŋnda tiuba ma pɛɛku tau o tamasi Akuila nda Pilisila wo niŋ. Kilisiɔŋnda o wɔsiŋ kɛmɛ tasoŋ niŋ ndaa nɔ bɛɛleŋ tau le pɔnɔɔ a lanɔɔ hoo. (Luomaŋ. 16:​3, 4) Mi che bɛɛ Baabuiyo suu tau a nɔ ndaa okɔɔ le, kɛ o chɔm maa mi ndaa tosa wallo, mi ndaa dimi yooŋgu kɛndɔɔ diompilɛ, nduyɛ mi ndaa mala acheleŋnda diompilɛ. (Walta. 18:​2, 3, 24-26) Nduyɛ pɛŋ, teleŋ o teleŋ Baabuiyo wa pɛ suɛi a nda okɔɔ, diompilɛ nda wa ni.

12. Yɛɛ pɔnɔɔ a lanɔɔ nɔ yɛ ma tosa le teleŋndo chuaa diompilɛ? (Tofa vɛlɛ fotueiyo.)

¹² Vɛɛ pɔnɔɔ a lanɔɔ tuallɛ tamasi Akuila nda Pilisila wo kɔɔli? Yiyaŋndɔ a sɔɔŋ num nya wana nya cho o nɔɔ niŋndo tiuba mi la tosa diompilɛ woŋ. Naapum la tiuba mi la tosa waltaŋ diompilɛ. Le tamaseliiyo, mi Akuila nda Pilisila ndaa kuɛ yooŋgu kɛndɔɔ dimioo diompilɛ. Baa mi la tosa pa kɛɛsiaa teleŋ o teleŋ le yooŋgu kɛndɔɔ dimioo diompilɛ? Mi Akuila nda Pilisila ndaa tosa vɛlɛ wallo diompilɛ. Naapum, num nya wana nya cho o nɔɔ niŋndo tosa wali pilɛ le. Kɛ baa la tosa pa kpekulaŋ chiɛiniŋ diompilɛ? (Ikili. 4:​9) Te la wa pɛ maaliaŋndo o kpekulaŋ ndaŋ niŋ, keŋ mala nya mi la wa wallo tosaa diompilɛ, nduyɛ mi la sɔla fondaa le suukaŋndo. Lɔbɔti nda Linda cho niŋ o nɔɔ niŋ le wɔsilaŋ hiouwɔɔ 50. Mi Lɔbɔti dimi aa: “O kpeekpei niŋ, ŋ nɔ teleŋ tau le yelelaŋndo tosaa diompilɛ le. Kɛ te I wa pɛ hɛŋgɛilaŋ tueiyo mi ndu wa laŋ wɔɔsuuwo, ɔɔ te I wa pɛ hɔɔnoo o bɛɛ mbo wa ya wallo tosaa ikɛi, mi keŋ tosa mi wa a kɔl kɛndɛ. Wallo tosaa diompilɛ mala naa niŋ miŋ sɔɔŋgaŋ ikɛi, nduyɛ kaala naa cho hiouwɔɔ lachi a hindɔɔ.”

13. Yɛɛ pɔnɔɔ a lanɔɔ nɔ yɛ ma tosa le ma wa o diompilɔɔ niŋ?

¹³ Loonuŋ maa, waa naapilɛ sim nuaa maa, la cho o diompilɔɔ niŋ te. Mi lanɔ pilɛ o Bilasil niŋ dimi aa: “Hau, yoomoo cho bɔɔ kpɔndi kpɔndi. Le hei, miŋ yiyaŋ maa ŋ cho o diompilɔɔ niŋ a wana naŋ cho o nɔɔ niŋndo le mɛɛ naŋ cho luaaŋ o lumui pilɔɔ niŋ yɛ. Kɛ I pɛɛku niŋ maa, waa naapilɛ cho letuu le. Ŋ nɔ miŋ tosa tau mbo hiou lende. Ŋ nɔ miŋ mulul wana naŋ cho o nɔɔ niŋndo hɔlla.” Tofawɔ nyɛ  Buluno nda laa ndɔ Teesi tosa le ma wa hɔlla mululaŋndo wo. Mi Buluno dimi aa: “Te ŋ wa pɛ teleŋndo chuaa diompilɛ, miŋ kɛsi foŋnda naalaŋ le halikpeŋ miŋ tuei teleŋ koŋ yeela.”

14. Te pɔnɔɔ a lanɔɔ tuii teleŋ nda chua diompilɛ wo yeela le, yɛɛ nda nɔ yɛ ma tosa?

¹⁴ Kɛ te o wa yɛ maa, num nya wana nya cho o nɔɔ niŋndo tuii teleŋ nya chua diompilɛ wo yeela le? Naapum mbo wa maa nya ŋiɔɔŋ kpou nɔ yeemaŋ pilɛ le, ɔɔ mi sɔɔŋ nya tosa woŋ tɛɛmbuu opilɛ a o cheleŋndo kɔllo. Yɛɛ ŋ nɔ yɛ ma tosa? Loonuŋ a yiŋnde bɛndule naŋ soo suŋ okɔɔ leŋ. Yiŋndeŋ le kendu sandei wule wule o lepilɛ niŋ te. Mɛɛ ma hiou lachi a kilioŋ beeŋguuwo vɛlɛ a yɔmnde wouwo. O nɛi pilɛ koŋ choo, naapum a kɛɛsiaa le mi la wa teleŋndo chuaa nyɛɛmbɔ diompilɛ lepaa o lepaa. La kindiŋ mi la tosa suɛi nya ŋiɔɔŋ kpou tuɛi yeela ve. O cho suɛi tɛɛmbuu nya kɔllo ve le. (Chemi. 3:​18) Te la wa pɛ teleŋ pɔmbɔ chuaa diompilɛ, keŋ mala nya o pɔmpɔmbɔ, mi la miŋgi vɛlɛ kaala nyaa kindi poŋ.

15. Le yɛɛ bɛɛleŋ le cho yɛ suliŋ sɔvɛ mala pɔnɔɔ a lanɔɔ le mi kaala ndaa hiou lachi a kaloo poŋ ndo?

¹⁵ Bɛɛleŋ le cho bɔɔ suliŋ sɔvɛ bɛndu o nɔɔ niŋ. O cho ko mɛɛ hueiye mala nuaa yiŋndeŋ le hiouwɔɔ lachi a sandei yɛ. Te hueiye ve hɔŋ te, haupa mi yiŋndeŋ le nyum. O nɛi pilɛ koŋ choo, te pɔnɔɔ a lanɔɔ keŋnaŋ bɛɛleŋ te, haupa mi kaala ndaa tol toolo. Kɛ te a keŋnaŋ pɛ bɛɛleŋ, mi keŋ tosa mi kaala ndaa hiou lachi a kaloo poŋ. Loonuŋ maa, a nɔ ma yiyaŋ maa a cho wana nya cho o nɔɔ niŋndo bɛɛleŋ kioo le. Kɛ ndupila nɔ ni mbo sina maa a cho ndu bɛɛleŋ kioo. Pɛni nda Alɛti cho niŋ o nɔɔ niŋ le wɔsilaŋ hiouwɔɔ 25. Mbo dimi aa: “Bɛɛleŋ keŋnaŋndo mala naa niŋ mi kaala naa wa o kala poŋ. Miŋ wa fɛɛsɛŋ le yeemaŋ naŋ chɔmaŋndo kanifuule, mi wana o wana che yiyaŋ chaaŋ ndɔ wo o sɔvɛ.” Lelaŋ, yɛɛ ŋ nɔ yɛ ma tosa le mi wana nya cho o nɔɔ niŋndo sina maa a cho ndu bɛɛleŋ kioo? Ŋ tofaŋndɔ tamasi Ebilaham nda Sela wo.

16. Yɛɛ piaanduaa pɛɛku yɛ o tamasi Ebilahamndo niŋ? (1 Pitɛ 3:7) (Tofa vɛlɛ fotueiyo.)

¹⁶ Mi Ebilaham ndoo bii Sela o nɛi lebɛɛ niŋ. Mɛɛ Sela chɔm ndu nyɛ wa ndu o kɔllo, mbo yaŋ ndu nilaŋ, nduyɛ mbo yiyaŋ o nyɛ o dimul ndu wo choo. A teleŋ pilɛ, mi Sela tambu kɔllo tau. Le hei, mbo duaunuŋ tumbe a Ebilaham. Nduyɛ pɛŋ, mbo bii ndu tɔɔyaŋ le nyɛ yɔŋnuŋndo. Baa mi Ebilaham muli pa a tumboo? Sako! Kanifuule ndoo sina maa Sela ndoo tusiŋ, vɛlɛ maa mi ndoo toolu ndu. Le hei, mbo yaŋ ndu nilaŋ nduyɛ mbo kindiŋ le bahawɛi koŋ solioo. (Chɛ. 16:​5, 6) Yɛɛ piaanduaa pɛɛku yɛ o hei niŋ? Piaanduaa, nya Mɛlɛka ke kalaŋndo ni le mi la tosa kɛɛsiaalaŋ le yuŋgula nyalaŋ. (1 Kɔliŋ. 11:​3) Kɛ, i wa bɔɔ suɛi kɛndɛ bɛndu le yiyaŋ laa numndo sinaa tuupa ma tosa kɛɛsiaa, taama taama te o wa pɛ maa kɛɛsiaa koŋ cho ndu piiliaŋ. (1 Kɔliŋ.  13:​4, 5) Lepum mi laa num tambu kɔl tau, nduyɛ mbo yeema num chɔmndo mɛɛ o cho sinaŋndo yɛ. Baa ma ke ndu pa bɛɛleŋ sanaa a ndu nilaŋ yaŋɔɔ yekeŋ? (Nuawɔ 1 Pitɛ 3:​7.) Aŋgɛla nda Dimitili cho niŋ o nɔɔ niŋ le wɔsilaŋ sɔŋgɔ 30. Mi Aŋgɛla chɔm nyɛ pɔnɔ ndɔ tosa le mbo sina maa o ke ndu bɛɛleŋndo. Mbo dimi aa: “Dimitili cho o bɛɛndiaŋ teleŋ o teleŋ le ya nilaŋ yaŋɔɔ te I tambu pɛ kɔl, ɔɔ te I yeema pɛ suɛi o ndulo. Mbo biunuŋ ya o yɔŋ bɛɛ mi dɔɔnuŋ tumbe.”

17. Yɛɛ laanduaa pɛɛku yɛ o tamasi Sela wo niŋ? (1 Pitɛ 3:5, 6)

¹⁷ Mi Sela ndoo ke Ebilaham bɛɛleŋ sanaa a kɛɛsiaala ndɔlaŋ tooloo. (Chɛ. 12:​5) A teleŋ pilɛ, Mi Ebilaham kɛɛsiaa le mialaa nda ve kɔl te wa kɛndɛi tosallo. Mbo dimul Sela le mbo mal nyɛ o nyɛ o wa tosaa, okoŋ mbo toosiaa beediiyo tau le mialaa kaŋ. (Chɛ. 18:​6) Haupa mi Sela tosa nyɛ Ebilaham ndoo dimul ndu wo. Laanduaa, la tual tamasi Sela wo kɔɔli te la wa pɛ kɛɛsiaala piaandaa nyaa tooloo. Hei tosaa mala nya mi la kindi nɔla nyalaŋ poŋ. (Nuawɔ 1 Pitɛ 3:​5, 6.) Mi Dimitili naŋ laŋga soo a ndu okɔɔ o pɛl naŋ hiou wo niŋndo tɛɛsiaa nyɛ laa ndɔ tosa, le mbo sina maa o ke ndu bɛɛleŋ ndo. Mbo dimi aa: “I nɔ bɔɔ balika melaa le mɛɛ Aŋgɛla toolu kɛɛsiaala nilaŋ yɛ, o yɔŋ bɛɛ mbo nɔ yiyaŋ cheleŋ a kɛɛsiaa koŋ okɔɔ. Nduyɛ, miŋ sɔla bɛɛ fulamakɔɔli kɛndɛ o kɛɛsiaa koŋ niŋ te, o pɛɛsa ya le.” A tonya, mi i wa tɛtɛlɛ le wana ke num bɛɛleŋndo kaalaa.

18. Tɔnɔ yɛɛ wanaa cho o nɔlaŋ niŋnda sɔla yɛ te a tosa pɛ wallo kalaŋ, le mi kaala cho nda tɛɛŋndo hiou lachi a kaloo poŋ?

¹⁸ Hau, Setana yeema mbo nyumi kaala cho maa leyiŋ o nɔla leKilisiɔŋndaŋ niŋndo. Kanifuule, o sina maa te wanaa cho o nɔlaŋ niŋnda nɔ kaala ndapila tɛɛŋ te, keŋ tosa o pɔmpɔmbɔ ma kandu Chɛhowa faŋaŋndo o ibuŋ. Kɛ kaala kpeekpeiyo tul toolo le. Lelaŋ, maa kaala cho o nɔ nyaa niŋndo, wa maa kaala yau Chondii Sɔlɔmɔŋnde soo a ndu okɔɔ wo. La kɛɛsiaŋ o kɔl le Chɛhowa kɛsioo wana tasoo o nɔ nyaa niŋ. La wa teleŋndo chuaa diompilɛ, nduyɛ mi la wa bɛɛleŋ keŋnaŋndo vellaa velle. Te la tosa pɛ keŋ, mɛɛ nɔ nyaa cho Chɛhowa saŋgalaa chuu, wana cho puundule kaala kpeekpeiyo wo. Nduyɛ kaala nyaa cho wa teleŋ o teleŋ mɛɛ yiŋnde bɛnduleŋ le sandu nuaa wule wule yɛ.