1-2. Te o hiŋ pɛ a piɛile naaleŋ okɔɔ, nyuna kuɛɛ naŋ nyunaŋ yɛ?

 BAA a nyunaŋ niŋ pa te mi Chɛhowa muli piɛile numndeŋ? Te lende i cho ni, mɛɛ a cho numpilɛ le. Mi puaapiliaa a ndepiliaa bɔɔbɔɔ nɔ yiyaŋ waa nuaa, taama taama te a wa pɛ o nyɛkindilaa bɛŋgu. Te ŋ wa pɛ saŋgaa, lepum naa bɛɛ mi i wa ikala le chɔɔ mɛɛ Chɛhowa cho piɛile naaleŋ mulioo yɛ.

² Ŋ tofaŋndɔ le sabu naŋ nɔ miŋ nɔ tiindaŋndo, maa mi Chɛhowa muli piɛile buɛiyaa nduaa wo. (1 Chɔŋ 5:​15) Ŋ cho vɛlɛ yaasiaa miŋ che mulilaŋ le nyunalaŋ ndaŋ. Laŋ la cho ni: Le yɛɛ naŋ yiyaŋ yɛ lepum maa Chɛhowa cho piɛile naaleŋ muli le? O nɛila kuɛɛ choo Chɛhowa muli yɛ hau piɛile naaleŋ?

3. Le yɛɛ Chɛhowa yeema yɛ naa miŋ piɛi o ndulo?

³ O Baabuiyo niŋ, mi Chɛhowa ke naa tiindaŋndo maa o kaala naa tau, nduyɛ maa ŋ cho a sɔvɛ ndu o hɔl. (Hakai 2:​7; 1 Chɔŋ 4:​10) Lelaŋ o dimul naa ni le miŋ piɛi o ndulo le mbo mala naa. (1 Pitɛ 5:​6, 7) O yeema mbo mala naa le miŋ lo ndu o ibuŋ, nduyɛ miŋ biunuŋ te sɔɔŋ kindilaŋ komal naa pɛ.

4. Vɛɛ naŋ looku yɛ sina maa mi Chɛhowa muli piɛile buɛiyaa nduaa? (Tofa vɛlɛ fotueiyo.)

⁴ Teleŋnda bɔɔbɔɔ te ŋ veelu pɛ diomndaŋ o Baabuiyo niŋ, miŋ che mɛɛ Chɛhowa muli piɛile buɛiyaa nduaa yɛ. A yiyaŋ pa a waŋndo opilɛ o Baabuiyo niŋ okɔɔ, o Chɛhowa muli piɛile ndɔleŋ ndo? Yiyaŋndɔ a Deeve okɔɔ. Deeve ndoo nɔ yaamɔɔwa tau o yoomu ndɔɔ niŋ. Kɛ teleŋ o teleŋ, mi ndoo nyuna Chɛhowa o piɛileŋ niŋ le mbo mala ndu. A teleŋ pilɛ, mbo piɛi o Chɛhowa lo aa: “Oo Mɛlɛka Yaawɛɛ, yandii tuei piɛile nileŋ. Yaŋ nilaŋ o piɛile nileŋ Mɛlɛka, ma tuiinuŋ ya inyiɛɛ. Mɛɛ ŋ cho wana sakpo, nduyɛ ma wa wana tonya yɛ, yandii muli ya diom.” (Sam 143:​1) Mi Chɛhowa muli piɛile Deeve leŋ nduyɛ  mbo piŋi ndu. (1 Saam. 19:​10, 18-20; 2 Saam. 5:​17-25) Le hei, mi Deeve dimi a tiindaŋndo aa: ‘Chɛhowa cho o bɛɛndiaŋ teleŋ o teleŋ, le wanaa nyuna ndu diomnda malaa.’ Naa bɛɛ nɔ miŋ nɔ tiindaŋ waa lende.—Sam 145:​18.

5. Te buɛiyaa Chɛhowaa o paandoo niŋ ndaa piɛi pɛ o ndulo, baa mi ndoo muli pa piɛile ndaleŋ teleŋ o teleŋ mɛɛ ndaa wa kɔllɛ? Chɔmndɔ tamaseliiyo. (Tofa vɛlɛ fotueiyo.)

⁵ Lepum, Chɛhowa muli piɛile naaleŋ mɛɛ naŋ wa kɔllɛ le. Mi hei yɔŋnuŋ a kiilanɔɔ Pɔɔl. Mɛɛ o sɔla nyɛ nɛiyaa “mɛɛ yuɛi i huau nuaa waŋndo” yɛ, mbo nyuna Chɛhowa le mbo faŋga ndu nyɛ nɛiyaa koŋ choo. Mbo nyuna Chɛhowa bɛmbɔɔ leyaa le mbo mala ndu a bahawɛiyo hoo okɔɔ. Baa mi Chɛhowa muli pa piɛile ndɔleŋ? Ei, kɛ o muli leŋ mɛɛ Pɔɔl wa kɔllɛ le. O feŋa nyɛ nɛiyaa wa Pɔɔl choo wo le. Kɛ mbo ke ndu kpaayaa le mbo biunuŋ nyɛ nɛiyaa koŋ, nduyɛ mbo hiou lachi a loo o laalaŋndo choo.—2 Kɔliŋ. 12:​7-10.

6. Le yɛɛ naŋ yiyaŋ yɛ lepum maa Chɛhowa cho piɛile naaleŋ muli le?

⁶ Naa bɛɛ, lepum mi Chɛhowa muli piɛile naaleŋ, kɛ o ve mɛɛ naŋ wa kɔllɛ le. Ŋ nɔ miŋ nɔ tiindaŋndo kɛsɛ maa, o sina mɛɛ o nɔla mbo mala naa yɛ. O “nɔla mbo tosa mbo hiou bɛɛ nyɛ naŋ nyuna ndu wo poloŋ.” (Ɛfi. 3:​20) Le saboo hoo, lepum mbo muli piɛile naaleŋ a teleŋ naŋ ve kɔl te wo, ɔɔ o nɛi naŋ ve kɔl te wo choo.

7. Lepum, le yɛɛ naŋ nɔ yɛ miŋ siŋga nyɛ naŋ piɛi Chɛhowa le ndu wo? Chɔmndɔ tamaseliiyo.

⁷ Lepum, ŋ nɔ miŋ siŋga nyɛ naŋ piɛi Chɛhowa le ndu wo, te ŋ chɔɔlu pɛ nyɛ o yeema naa miŋ tosa wo sina. Ŋ tofaŋndɔ tamasi puaapilɛnɔ pilɛ diolaŋ Matɛŋ Puɛsiŋga. Mɛɛ o chua dɔɔ lanɔɔ, ma bii ndu, ma duau ndu o chiɛi manyumndo niŋ, o dɔɔŋgɔla ndaa kota waŋnda Naasi laŋ niŋ. O tasela ndɔ, mbo piɛi Chɛhowa le mbo mala ndu, ma soli ndu o chiɛi manyum koŋ niŋ, le halikpeŋ mbo wa a laa ndɔ latulu, nduyɛ mbo hiou lachi a yooŋgu kɛndɔɔ dimioo. Kɛ mɛɛ lɔɔlaŋ latiɔɔŋ la hiou, o chi nyɛ o nyɛ chɔm maa Chɛhowa wa ndu mala le. Le hei, mbo kandu niŋ piɛileŋ aa: “Chɛhowa, yandii chɔm ya nyɛ ŋ yeema ya mi tosa wo.” Okoŋ mbo kandu yiyaŋndo a nyɛkindilaa puaapiliaa nda dɔu o chiɛila manyumndaŋ niŋ o fondaŋ koŋ nda wa biuwɔŋndo wo okɔɔ. Puaapiliaa kaŋ a bɔɔbɔɔ wa yiyaŋndo a laandaa ndaa vɛlɛ a chuauwaa ndaa okɔɔ. Mɛɛ Ŋgɔɔ Puɛsiŋga yiyaŋ a nda okɔɔ, mbo piɛi o Chɛhowa lo aa: “Chɛhowa balika le wali sɛnɛi ŋ ke ya hoo wo. Yandii mala ya mi luei puaapiliaa haa yoomuaŋ, nduyɛ mi dɛɛniaa nda  kɔltaŋ.” Mi Ŋgɔɔ Puɛsiŋga chua wɔsilaŋ la ŋɔmahiɔɔlu o chiɛi manyum koŋ niŋ. Nduyɛ o wa hiouwɔɔ lachi a puaapiliaa nduaa kɔltaŋ dɛɛniaa.

8. Suɛi sɔvɛi kuɛɛ naŋ nɔ yɛ miŋ kɛsiŋ o kɔl te ŋ wa pɛ piɛileŋ o Chɛhowa lo?

⁸ Ŋ nɔ miŋ kɛsiŋ o kɔl maa, Chɛhowa Mɛlɛka nɔ tuuwo, nduyɛ o cho ndu peelu a teleŋ o yeema wo. Ndu cho le bahawɛilaŋ vɛlɛ a sɔɔŋ palaŋ komal naa woŋ faŋaa lefafɛɛŋ ni. Sɔɔŋ palaŋ mɛɛ kpundɛlaŋ, naalaŋ a piɔmndaŋ la cho nuaa yɛ. Sanaa a Masale ndɔleŋ o cho tuu ndɔɔ hoo peelu ni. (Daan. 2:​44; Sɔɔŋ. 21:​3, 4) Kɛ haaa mi teleŋ koŋ fuuluu, Chɛhowa cho wɔ Setana chɛlɔɔ le mbo wa masaa le chieeŋndo hoo. b (Chɔŋ 12:​31; Sɔɔŋ. 12:​9) Te o yɔŋ pɛ mi Chɛhowa soli bahawɛila naalaŋ suŋ suŋ, i cho wa maa Setana cho batiuwaa sɔlaa o masale ndɔleŋ niŋ. Mi che bɛɛ Chɛhowa cho wɔ mɛɛla ndɔlaŋ lapum peelu le, kɛ keŋ sim nuaa maa o cho naa mala le le. Ŋ tofaŋndɔ sɔɔŋ ŋtiŋ ŋ Chɛhowa tosa le naa malaa wo.

9. Te ŋ yeema pɛ kɛɛsiaa tosaa, vɛɛ Chɛhowa mala yɛ naa? Chɔmndɔ tamaseliiyo.

⁹ Mi Chɛhowa ke naa taasioo. O mɛi lediom le naa taasioo kioo, le halikpeŋ miŋ tosa kɛsiaala kɛndɛlaŋ. Ŋ hauba a taasi o ke naa wo taama taama te ŋ wa pɛ kɛɛsiaalaŋ tosaa la piiliaŋ yoomu naa lefafɛɛŋ ndo. Mɛɛ kɛɛsiaa le loo yembu ɔɔ le wana naŋ cho ichali o nɔɔ niŋndo hɛlioo cho nuaa yɛ. (Chemi. 1:​5) Ŋ tofaŋndɔ suɛi yɔŋnaŋii ndepilɛnɔ pilɛ cho yemboo wo diolaŋ Maliaa. c O wa kɔɔfale lɔɔlɔɔ leŋ tosaa a kɔl kɛndɛ, mi puaapilɛnɔ pilɛ kaala ndu. Mbo dimi aa: “Mɛɛ chaŋyɛi nɛi ndii hiau lachi fau, lende koni kaala naa le opilɛ a o cheleŋndo ndoo kiandu poŋ ni. Mi sina maa I nɔ mi tosa kɛɛsiaa. Le hei, mi chua teleŋndo tau le piɛileŋ o Chɛhowa lo a ndi okɔɔ. Mi che bɛɛ yaa yeema nɛi chɔmaa Chɛhowaa, kɛ yaa sina maa o cho ndu le wa ya kɛɛsiaa tosal te.” Mbo cha maa mi Chɛhowa muli piɛile ndɔleŋ, nduyɛ mbo ke ndu taasioo. O nɛi kuɛɛ choo? Mɛɛ o tosa yaasiaa o yaula naalaŋ niŋ, mbo saaluŋ buŋgaŋ kpeekpei muŋ mala ndu le nyunala ndɔlaŋ mulioo wo. Mbo duau vɛlɛ sila taasi kala ndɔ ke ndu wo o wali niŋ. Mi sila koŋ mala ndu, mbo duau yeemaŋ ndɔŋ o mandaa bɛŋgu. Nduyɛ o mɛɛlulaŋ, mbo tosa kɛɛsiaa sɔvɛ sɔviɔɔ.

10. A mɛɛ Filipiaŋnda 4:​13 dimi yɛ, yɛɛ Chɛhowa tosa yɛ le buɛiyaa nduaa malaa? Chɔmndɔ tamaseliiyo. (Tofa vɛlɛ fotueiyo.)

¹⁰ Mi Chɛhowa ke naa kpaayaa le miŋ biunuŋ. Mbo ke kiilanɔɔ Pɔɔl kpaayaa le mbo biunuŋ. Naa bɛɛ, o cho naa kpaayaa ke le miŋ biunuŋ tɔɔndaŋnda komal naalaŋ. (Nuawɔ Filipiaŋnda 4:​13.) Ŋ tofaŋndɔ mɛɛ Chɛhowa mala puaapilɛnɔ pilɛ diolaŋ Bɛŋjamɛŋ le mbo biunuŋ nyɛkindilaa yɛ. Teleŋ o wa  feleŋgɔnɔ wo, ndu nda yuŋgu ndɔɔ wa o dɔɔŋgɔla luɛfichiiya niŋ Afilika. Mbo dimi aa: “Mi yaa piɛi teleŋ o teleŋ o Chɛhowa lo, nduyɛ mi nyuna ndu le mbo ke ya kpaayaa le mi tosa nyɛ nɛŋi ndu kɔllo wo. Mbo muli piɛile nileŋ sanaa a ya kɔl nyuloo kioo, vɛlɛ a kɔl sikpaa le mi hiou lachi a yooŋgu kɛndɔɔ dimioo. Mbo tosa mi saaluŋ buŋgaŋ mala ya mi lo o kala poŋ o laalaŋ nuu choo wo.” Mbo hiau lachi a tɛɛsiaa aa: “Mɛɛ ya veelu diomndaŋ a sɔɔŋ yɔŋnaŋ chaaŋaa naa laalaŋnda okɔɔ, nduyɛ mi cha mɛɛ Chɛhowa mala nda ma biunuŋ sɔɔŋ kindilaŋ yɛ, mi keŋ luei ya yoomuaŋ le mi kɛɛsiaŋ o kɔl le loo o laalaŋ nuu choo.”

11-12. Lepum, vɛɛ Chɛhowa soliŋ yɛ puaapiliaa a ndepiliaa naa kpeku, le piɛile naaleŋ mulioo? (Tofa vɛlɛ fotueiyo.)

¹¹ Mi Chɛhowa soliŋ puaapiliaa a ndepiliaa naa kpeku. Mi Chiisu piɛi tau o nyumma ndɔma mɛɛlaŋ choo tuupa mbo sɔla piɔmndo. Mbo nyɔɔlu Chɛhowa le mbo tosa, waŋnda yiyaŋ maa wana tɛɛmbuu ndu tɔɔ wo le o cho le. Chɛhowa tosa mi keŋ yɔŋnuŋ te. Kɛ mbo mala Chiisu mɛɛ o vem maalikɛiya le ma luei ndu yoomuaŋ. (Luku 22:​42, 43) Naa bɛɛ, lepum mi Chɛhowa mala naa sanaa a veelula puaapiliaa a ndepiliaa veelu naa le naa yoomuaŋ lueiyo laŋ, ɔɔ yilɔɔla nda kua naa laŋ. Naa kpou nɔ miŋ nuuviaa teleŋndo le chaaŋaa naa laalaŋnda “diomnda kɛndɛlaŋ” dimullo.—Pulɔ. 12:​25.

¹² Ŋ tofaŋndɔ tamasi ndepilɛnɔ pilɛ diolaŋ Miiliam. Mɛɛ pɔnɔ ndɔ sɔla piɔmndo, lɔɔla biŋgi okoŋ kɔɔli, mbo kandu wanapilɛyɛi sinaŋndo, nduyɛ mbo tambu kɔl tau. Paale pilɛ mɛɛ o tambu kɔl tei, mbo kandu chaŋndo o ndulo chiɛiniŋ. Nduyɛ ndoo yeema waŋndo le mbo soo o ndu lo. Mbo dimi aa: “Yaa nɔ mayoomu le mi veelu wana o foŋndo choo le. Le hei, mi piɛi o Chɛhowa lo. I wa piɛileŋ a chaŋndo, mi waŋndo veelu ya o foŋndo choo. Bɛndu kundaa wa ya veeloo ni, nduyɛ chaŋyɛi kpɛɛluŋnde wa naa tɛɛŋ naa ndu.” Mi bɛndu kunda koŋ nda laa ndɔ dɛɛniaa Miiliam kɔllo tau. Mbo laalaŋ kɛsɛ maa Chɛhowa soliŋ puaapilɛnɔ koŋ kpeku ni, le ndu veeloo.

13. Chɔmndɔ tamaseliiyo a mɛɛ Chɛhowa soliŋ wanaa cho ndu piɛi le wa kpeku, le piɛile naaleŋ mulioo yɛ.

¹³ Chɛhowa tiuba mbo soliŋ wanaa cho ndu piɛi le wa kpeku. (Pulɔ. 21:​1) Lepum, mi  Chɛhowa soliŋ wanaa cho ndu piɛi le wa kpeku, le piɛile buɛiyaa nduaa mulioo. Le tamaseliiyo, mɛɛ Nɛhimaya piɛi o ndulo le mbo mala ndu mbo miiŋgu Chulusalɛm, le chiee koŋ miŋgioo taŋgullo, mbo soliŋ Masaa Atasasɛɛ kpeku le piɛile leŋ mulioo. (Nɛhi. 2:​3-6) Hau bɛɛ, mi Chɛhowa soliŋ wanaa cho ndu piɛi le wa kpeku le naa malaa te bahawɛiyo komal naa pɛ.

14. Vɛɛ suɛi yɔŋnaŋii Soo Hiŋ nde dɛɛniaa yɛ num kɔllo? (Tofa vɛlɛ fotueiyo.)

¹⁴ Mi ndepilɛnɔ pilɛ diolaŋ Soo Hiŋ cha maa, mi Chɛhowa muli piɛile ndɔleŋ sanaa a wana ndɔ chiɔuwaa. Ndepilɛnɔɔ hoo po ndɔɔ wa saŋgaa tau a naa mahullo. Paale pilɛ, mi po ndɔ koŋ fula naa filioŋnda mbo del, nduyɛ mbo yɔŋuluŋ tau. Mi keŋ tosa mi ndu nda pɔnɔ ndɔ mal walta ndalaŋ le ma manda ndu. Fulamakɔɔlioo wa ni, mi bahawɛi nyɛsɔlaa komal nda. Mi Soo Hiŋ yiyaŋ maa, o tiu lɛ ba mbo hiou lachi a biuwɔŋndo le. Okoŋ, mbo dimul Chɛhowa nyɛ o nyɛ wa ndu o kɔl o piɛileŋ niŋ, nduyɛ mbo nyuna ndu le mbo mala ndu. Mi wana nda chiɔuwaa chɔm yeemɛi kpeekpeiye o nda niŋ. Mbo nuuviaa nɛilaŋ le ma wa malaa sɔlaa masaleŋ o ba, vɛlɛ ma sɔla fondaŋ lɔlaa nda paawa nyɛsɔlaa tau le wo. Okoŋ kɔɔli, mi Soo Hiŋ dimi aa: “Mi cha kpendekele mɛɛ Chɛhowa wa naa malaa o suɛi hei niŋ yɛ. A tonya, ‘ndu kpeekpei cho wana tuɛi piɛileŋ ndo ni.’”​—Sam 65:​2.

15. Yɛɛ mala yɛ ndepilɛnɔ pilɛ mbo cha maa Chɛhowa muli piɛile ndɔleŋ?

¹⁵ Lepum, o cho o nɛi kɔndɔfili niŋ te Chɛhowa muli piɛile naaleŋ te. Kɛ muli o ke naa wo wa nyɛ kpeekpei naŋ yeema le loo o laalaŋ naa choo wo ni. Lelaŋ, wa tofaa teleŋ o teleŋ mɛɛ Chɛhowa muli piɛile numndeŋ yɛ. Mi ndepilɛnɔ pilɛ diolaŋ Yoko yiyaŋ maa, Chɛhowa ve piɛile ndɔleŋ muli le. Le hei, mbo kandu sɔɔŋ o wa piɛileŋ a muŋ okɔɔ woŋ poonyiaa o yau choo. Mɛɛ teleŋ tiŋ hiou, mbo tofa yau ndɔ koŋ nduyɛ mbo cha maa mi Chɛhowa muli piɛile ndɔleŋ o sɔɔŋ bɔɔbɔɔ niŋ, hali ŋ ndoo puɛɛnuŋ niŋndoŋ bɛɛ. Naa bɛɛ, teleŋ o teleŋ ŋ nɔ miŋ wa yiyaŋndo a mɛɛ Chɛhowa muli piɛile naaleŋ yɛ okɔɔ.—Sam 66:​19, 20.

16. Te o hiŋ pɛ a piɛileŋ okɔɔ, vɛɛ naŋ chɔm yɛ maa ŋ nɔ laalaŋndo? (Hibuluiya 11:​6)

¹⁶ Ŋ chɔm maa ŋ nɔ laalaŋndo o cho ko o piɛile naaleŋ niŋ te, kɛ ŋ nɔ vɛlɛ miŋ chɛl nɛi  o nɛi Chɛhowa soliŋ pɛ kpeku le piɛile naaleŋ mulioo. (Nuawɔ Hibuluiya 11:​6.) Ŋ tofaŋndɔ tamasi Miki nda Kilisi laa ndɔ wo. Mi nda ŋiɔɔŋ kpou kɛsi kpeleŋndo le wallo tosaa o Bɛtɛɛl. Mi Miki dimi aa: “Le wɔsiŋ bɔɔbɔɔ, ŋ wa yauwo peeloo le kɔlaŋ o Bɛtɛɛl. Nduyɛ mi naŋ piɛi o Chɛhowa lo teleŋ o teleŋ a kpeleŋ naa koŋ okɔɔ. Kɛ a veelu naa o Bɛtɛɛl te.” Mi Miki nda Kilisi hiau lachi a tiindaŋndo nɔɔ maa, Chɛhowa sina fondaŋ bɛnda mbo soliŋ nda kpeku wo ni. Le hei, ma hiau lachi a tosaa o nda tiuba wo. A wa kɔɔfaleŋ tosaa naa yeemɛi wa tau le wanaa dimiaa yooŋgu kɛndiaa wa, ma wa vɛlɛ yɔŋgɔŋndo le chiɛila naala lepiɛilaŋ taŋgullo. Suŋ suŋ niŋ, a cho buɛile ibuŋgaleŋ tosaa. Mi Miki chɔɔlu dimi aa: “O cho teleŋ o teleŋ te Chɛhowa muli piɛile naaleŋ mɛɛ naŋ wa kɔllɛ le. Kɛ mbo muli leŋ o nɛi naŋ ve kɔl te wo choo, mbo hiou pɛŋ mɛɛ naŋ yiyaŋ yɛ.”

17-18. A mɛɛ Sam 86:​6, 7 dimi yɛ, tiindaŋ yɛɛ naŋ nɔ yɛ miŋ nɔ?

¹⁷ Nuawɔ Sam 86:​6, 7. Deeve ndoo nɔ tiindaŋndo maa, mi Chɛhowa tuei piɛileŋ, nduyɛ mbo muli leŋ. Naa bɛɛ tiuba miŋ nɔ tiindaŋ pilɛ koŋ kpe. Tamaseliila naŋ che o buŋgɛi hei niŋndaŋ la chɔm naa maa, Chɛhowa tiuba mbo ke naa taasioo a kpaayaa le miŋ biunuŋ sɔɔŋ kindilaŋ komal naa woŋ. O tiuba mbo soliŋ puaapiliaa a ndepiliaa naa kpeku, ɔɔ wanaa cho ndu piɛi le wa le ma mala naa o nɛilaŋ lapum choo.

¹⁸ Mi che bɛɛ Chɛhowa muli piɛile naaleŋ teleŋ o teleŋ mɛɛ naŋ wa kɔllɛ le, kɛ ŋ sina maa mbo muli leŋ. Mbo ke naa nyɛ kpeekpei naŋ yeema wo, nduyɛ a teleŋ kpeekpei naŋ yeema ndu wo. Lelaŋ, hiou lachi a piɛileŋ o ndulo, nduyɛ ma nɔ tiindaŋndo maa o cho piɛile numndeŋ tueiyɔɔ. Nɔ vɛlɛ tiindaŋndo maa o cho num nyɛm ŋ hauba woŋ ke suŋ suŋ, nduyɛ maa o chilaŋ niŋ, o cho “tosa mi wana o wana hini kɔl” o chieeŋ sɛnɛiyo niŋ.​—Sam 145:​16.