1. Le yɛɛ naa kpou yeema yɛ taasi chɛŋ o Mɛlɛka lo wo?

 KANI bɛɛ a tosa niŋ kɛɛsiaa sɔvɛ sɔviɔɔ o yoomu numndo niŋ? Te lende i cho ni, mɛɛ naapum a piɛi fɛŋ o Chɛhowa lo le mbo ke num taasioo. (Chemi. 1:​5) Mi Sɔlɔmɔŋ poonyiaa aa: “Taasioo cho o sɔvɛ mbo hiau nyɛ o nyɛ. Lelaŋ, kindiŋ ma sɔla ndu. O nyɛ o nyɛ ŋ nɔ niŋ, nɔ vɛlɛ sinapɛŋgoo.” (Pulɔ. 4:​7. NWT) O kpeekpei niŋ, Sɔlɔmɔŋ ve isɔɔ a taasi cheleŋ okɔɔ le. A taasi fula Chɛhowa Mɛlɛka o ba wo okɔɔ o wa suɛi ni. (Pulɔ. 2:​6) Kɛ baa taasi chɛŋ o Mɛlɛka lo wo nɔla pa mbo mala naa miŋ soli bahawɛila naalaŋ? Ei, o nɔla. O buŋgɛi hei niŋ, ŋ cho chɔ mɛɛ o mala naa yɛ.

2. Ɔɔ nɛiyo opilɛ o mala naa miŋ wa wanaa taasi wo?

² Nɛiyo opilɛ o mala naa miŋ wa wanaa taasi wo cho sɔɔŋ Sɔlɔmɔŋ nda Chiisu dimi woŋ pɛɛkoo, nduyɛ miŋ dɔu muŋ o wali niŋ ni. Puaa haa ndaa nɔ taasioo tau, nduyɛ waŋnda ndaa nɔ bɛɛleŋ le nda. Ŋ cho fɛŋ yaasiaa a Sɔlɔmɔŋ okɔɔ. Baabuiyo dimi maa, ‘mi Mɛlɛka ke Sɔlɔmɔŋ taasioo a sina pɛŋgoo tau tau.’ (1 Masaa. 4:​29) Ŋ cho vɛlɛ yaasiaa a Chiisu okɔɔ. Ndoo nɔ taasioo mbo hiau wana o wana o chieeŋndo choo. (Maa. 12:​42) Mi huuluei dimi pɛŋ a ndu okɔɔ aa: “Masa koŋ, Nyina Mɛlɛka Yaawɛɛ wo o wa niŋ ndu kɔɔli, mi nyina koŋ tosa mbo nɔ sina pɛŋgoo, . . . a taasioo.”—Aisaya 11:​2.

3. Yɛɛ naŋ cho yɛ yaasiaa o buŋgɛi hei niŋ?

³ Mi Mɛlɛka ke Sɔlɔmɔŋ nda Chiisu taasioo tau. Nduyɛ ma soliŋ taasi koŋ kpeku le naa silala sɔvɛ sɔvɛlaŋ kioo. O buŋgɛi  hei niŋ, ŋ cho yaasiaa silalaŋ ndaŋ la yaa. Laŋ la cho ni: Mɛɛ naŋ nɔ miŋ nɔ yiyaŋ kpeŋ kpeŋndo a kaniei, wallo, vɛlɛ a naapila okɔɔ yɛ.

4. Teŋgeŋ yɛɛ wa yɛ Sɔlɔmɔŋ tɛɛŋ nda Chiisu?

⁴ Sullo pila Sɔlɔmɔŋ ndoo sul ni. Nduyɛ ndoo nɔ chiɛila kɛndɛ kɛndɛlaŋ tau. (1 Masaa. 10:​7, 14, 15) O baa pilɔɔ choo, Chiisu ve wana sulaa le, nduyɛ ndoo nɔ pɛŋ chiɛi le. (Maa. 8:​20) A koŋ kpou, puaa haa ndaa nɔ yiyaŋ kpeŋ kpeŋndo a nyɛm kiɔɔŋ okɔɔ kanifuule, Chɛhowa o ba taasi ndaa ndoo chɛŋ ni.

5. Yiyaŋ kpeŋ kpeŋ kuɛɛ Sɔlɔmɔŋ ndoo nɔ yɛ a kaniei okɔɔ?

⁵ Mi Sɔlɔmɔŋ dimi maa kaniei nɔla mi i “manda wana.” (Ikili. 7:​12) Mi kaniei mala naa le nyɛm naŋ hauba woŋ sɔlaa vɛlɛ a nyɛm cheleŋ naŋ yeema woŋ. Mi che bɛɛ mi Sɔlɔmɔŋ sul sullo pila, kɛ mbo dimi maa sɔɔŋ cheleŋ cho ŋ cho ŋ sɔvɛ miŋ hiau kanieiyo. Le tamaseliiyo, mbo poonyiaa aa: “Diola kɛndɛlaŋ la hiou naŋɔɔ a sullo.” (Pulɔ. 22:​1) Mi Sɔlɔmɔŋ cha vɛlɛ maa wanaa kaala kaniei ya ve a kɔl kɛndɛ kposoŋ te. (Ikili. 5:​10, 12) Le hei, mbo sila naa maa, ŋ nɔ miŋ dɔu tiindaŋndo o kaniei niŋ te. Kanifuule, nyɛ o nyɛ kaniei piandu ve lefafɛɛŋ te.—Pulɔ. 23:​4, 5.

6. Yiyaŋ kpeŋ kpeŋ kuɛɛ Chiisu ndoo nɔ yɛ a nyɛm kiɔɔŋ okɔɔ? (Maatiu 6:​31-33)

⁶ Chiisu bɛɛ ndoo nɔ yiyaŋ kpeŋ kpeŋndo a nyɛm kiɔɔŋ okɔɔ. Mi ndoo tuei nyɛdiaa kɛndɔɔ a muɛiyaŋ yeela. (Luku 19:​2, 6, 7) A teleŋ pilɛ, mbo siiŋguu mɛŋndaŋ muɛima kɛndɛ kɛndiaŋ. Nduyɛ pɛŋ, kaama ndɔ tasoo wa koŋ ni. (Chɔŋ 2:​10, 11) O paale o sɔla piɔmndo leŋ choo, nyɛla kɛndɛ kɛndɛlaŋ la wa ndu lekɔɔ. (Chɔŋ 19:​23, 24) Kɛ Chiisu siiŋguu nyɛm kiɔɔŋ nyɛ sɔvɛ sɔviɔɔ o yoomu ndɔɔ niŋ te. Mbo dimul buɛiyaa nduaa aa: “Waŋndo ve buɛiyo le masaa a ŋiɔɔŋ te. . . . Wana ve buɛiyo le Mɛlɛka, ma wa vɛlɛ buɛiyo le nyɛsɔlaa le.” (Maa. 6:​24) Mbo pɛɛku naa maa te ŋ kɛsi pɛ Masale Mɛlɛkaleŋ nyɛ tase, Chɛhowa cho naa ke nyɛm naŋ hauba woŋ.—Nuawɔ Maatiu 6:​31-33.

7. Tɔnɔ yɛɛ puaapilɛnɔ pilɛ sɔla yɛ le mɛɛ o nɔ yiyaŋ kpeŋ kpeŋndo a kaniei okɔɔ yɛ?

 ⁷ Puaapiliaa a ndepiliaa naa bɔɔbɔɔ sɔla niŋ tɔnɔɔ tau le mɛɛ nda dɔu sila Chɛhowa yɔŋgu a kaniei okɔɔ wo o wali niŋ yɛ. Tofawɔ tamasi puaapilɛnɔ pilɛ chue wɔ lanɔ le wo diolaŋ Daaniɛɛ. Mbo dimi aa: “Teleŋ ya wa feleŋgɔnɔ wo, mi kɛɛsiaa le sɔɔŋ ŋMɛlɛkayaŋ kɛsioo nyɛ tase o yoomu nuu niŋ.” Le mɛɛ Daaniɛɛ tosa yoomu ndɔɔ tɛtɛlɛ yɛ, mbo tiuba le teleŋ ndɔɔ a nyɛ o chaa tosaa wo soliŋndo kpeku o wali Chɛhowaa niŋ. Mbo chɔɔlu dimi aa: “Pesiŋ bɛɛ I kil isu le kɛɛsiaa ya tosa wo le. O kpeekpei niŋ, te yaa kɛsi pɛ kanioŋ nyɛ tase o yoomu nuu niŋ, naapum I wa muŋ sɔla tau. Kɛ, I ve chaŋyaŋ kɛndɛŋ ya nɔ hau woŋ sɔla le. Nduyɛ, I ve kɔl kɛndɛ ya nɔ suŋ suŋ le mɛɛ ya kɛsi Masale Mɛlɛkaleŋ nyɛ tasoo o yoomu nuu niŋ yɛ sɔla le.” A tonya, te ŋ fafaŋ pɛ kɔllo handɔɔ kpou o kaniei choo, nduyɛ miŋ handu kɔllo o sɔɔŋ ŋMɛlɛkayaŋ choo, ŋ cho tɔnɔlaŋ sɔla tau.

8. Vɛɛ naŋ looku yɛ sina maa Sɔlɔmɔŋ ndoo nɔ yiyaŋ kpeŋ kpeŋndo a wallo okɔɔ? (Ikilisiaatii 5:​18, 19)

⁸ Mi Sɔlɔmɔŋ dimi maa wali kala kalaa tosaa mala naa, nduyɛ maa ‘ke Mɛlɛkaa’ cho koŋ ni. (Nuawɔ Ikilisiaatii 5:​18, 19.) Mbo poonyiaa aa: “Te wana tosa wallo o kala kala pɛ, a sɔla tɔnɔɔ o wali numndo niŋ.” (Pulɔ. 14:​23) Sɔlɔmɔŋ ndoo sina maa nyɛ o wa dimioo wo cho tonya. Wana wallo pila o wa ni. Ndoo nɔ chiɛilaŋ, kpelelaŋ, sooŋnda mamɛŋndaŋ, nduyɛ mbo taŋgul chieeŋ bɛndoŋ tau. (1 Masaa. 9:​19; Ikili. 2:​4-6) Wallo pila ndoo yeemaŋ ni le muŋ kpou tosaa. Nduyɛ mbo sɔla kɔl hiniaa o wali koŋ niŋ. Kɛ Sɔlɔmɔŋ hendu kɔllo o nyɔɔŋ muŋ choo kinɛi le kɔl hiniaa kpeekpeiyo sɔlaa le. Le hei, mbo tosa tau le Chɛhowa. Le tamaseliiyo, mbo taŋgul chiɛi tɔɔma bɛndoo le Chɛhowa piɛiyo. Nduyɛ, wɔsilaŋ la ŋɔmmɛu nda chua le chiɛi koŋ taŋgullo ni. (1 Masaa. 6:​38; 9:​1) Mɛɛ Sɔlɔmɔŋ tuu walta cheleŋnda o tosalaŋ a walta o tosa le Chɛhowalaŋ, mbo cha maa walta Chɛhowalaŋ tosaa hiou wa nyɛ sɔvɛ. Mbo poonyiaa aa: “Suɛi hei bolle ndɔleŋ le cho leŋ ni. Ke Mɛlɛka bɛɛleŋ, nduyɛ ma tosa nyɛ sawala ndɔlaŋ la dimi le tosaa wo.”—Ikili. 12:​13.

9. Vɛɛ Chiisu chɔm yɛ maa wali ndɔɔ ve o sɔvɛ mbo hiau sɔɔŋ ŋMɛlɛkayaŋ te?

⁹ Wana wallo pila Chiisu wa ni. Teleŋ o wa feleŋgɔnɔ wo, kaapindɛileŋ ndoo tosa ni. (Maki 6:​3) A tonya, mi wanaa velu ndu wa naŋ kɔl tau le mɛɛ o wa nda malaa le ma ke yuŋgu ndaa nyɛm nda hauba woŋ yɛ. Chiisu wa walaŋ, nduyɛ ndoo chaa wali lekaapindɛiyo nyɛkɛndɛi. Le hei, naapum mi wanaa bɔɔbɔɔ ndaa yeema le mbo tosal nda wallo. Mi Chiisu tuɛi wali ndɔɔ yeela tau. Mi che bɛɛ mi ndoo tosa wallo kalaŋ, kɛ ndoo nɔ teleŋndo le sɔɔŋ ŋMɛlɛkayaŋ tosaa. (Chɔŋ 7:​15) Okoŋ kɔɔli, mɛɛ o wa yooŋgu kɛndɔɔ dimioo, mbo sila wanaa wa ndu nilaŋ yaŋɔɔ wa aa: “La fafala le nyɛdiaa tambu wo le, kɛ la fafala le nyɛdiaa ke wana yoomu fafɛɛŋndo wo.” (Chɔŋ 6:​27) Nduyɛ teleŋ o wa waŋnda pɛɛkoo o Pembei choo wo, mbo dimul nda aa: “La chuuŋgiaa nyɛm sulaŋ o choo choo niŋ.”—Maa. 6:​20.

10. Simulta kuɛɛ naŋ sɔla yɛ lepum o wallo niŋ?

¹⁰ Taasi chɛŋ o Mɛlɛka lo wo mala naa miŋ nɔ yiyaŋ kpeŋ kpeŋndo a wallo okɔɔ. Baabuiyo dimul naa Kilisiɔŋnda maa, ŋ nɔ miŋ tosa wallo kalaŋ ɔɔ “wali kɛndɔɔ.” (Ɛfi. 4:​28) Teleŋnda bɔɔbɔɔ, mi wanaa chua naa le wallo wa che maa ŋ sandu, nduyɛ maa wallo pila naŋ tosa ni. Le hei, ma dimul naa maa a hɛnaŋ bɔɔ a mɛɛ naŋ tosa wallo yɛ. Lelaŋ miŋ kandu hawɛilaŋ  chuaa tau o wallo niŋ, le halikpeŋ mi wana chua naa le wallo wo nɔ yiyaŋ kɛndɔɔ a Seiyaa Chɛhowaa okɔɔ. O hei niŋ, haupa miŋ che maa, ŋ nɔ lɛ teleŋ bɔɔ le waa a yuŋgu naa latulu le sɔɔŋ ŋMɛlɛkayaŋ tosaa le. Te lende i cho ni, mɛɛ ŋ nɔ miŋ tosa siŋgaŋndaŋ, nduyɛ miŋ nɔ yiyaŋ kpeŋ kpeŋndo a wallo okɔɔ.

11. Yɛɛ puaapilɛnɔ pilɛ pɛɛku yɛ te o hiŋ pɛ a yiyaŋ kpeŋ kpeŋndo nɔɔ a wallo okɔɔ?

¹¹ Puaapilɛnɔ pilɛ diolaŋ Wiliam che niŋ mɛɛ i cho suɛi sɔvɛ le yiyaŋ kpeŋ kpeŋndo nɔɔ a wallo okɔɔ yɛ. Mɛɛ o wa suɛi a bɛndu kunda ke ndu wallo wo okɔɔ, mbo dimi aa: “Puaapilɛnɔɔ hoo nɔ tamasi kɛndɔɔ le yiyaŋ kpeŋ kpeŋndo nɔɔ a wallo okɔɔ. Mbo tosa wallo kalaŋ. Nduyɛ o nɔ chaŋyɛi kɛndɛi a acheleŋnda. Lepaa o lepaa te o mal pɛ wallo, mbo soliŋ teleŋ koŋ kpeku le waa a yuŋgu ndɔɔ latulu vɛlɛ a le sɔɔŋ ŋMɛlɛkayaŋ tosaa. Fulamakɔɔlioo cho ni, puaapilɛnɔɔ hoo cho a kɔl kɛndɛ tau o yoomoo niŋ!” *

12. Vɛɛ Sɔlɔmɔŋ ndoo chɔm yɛ maa ndoo nɔ yiyaŋ kpeŋ kpeŋndo a ndupila okɔɔ, kɛ yɛɛ o tosa yɛ okoŋ kɔɔli?

¹² Teleŋ Sɔlɔmɔŋ wa Chɛhowa piɛiyo o laalaŋndo choo wo, ndoo nɔ yiyaŋ kpeŋ kpeŋndo a ndupila okɔɔ. Mɛɛ o wa feleŋgɔnɔ, mbo sina maa o nɔ taasi bɔɔ le. Le hei, mbo nyuna Chɛhowa le mbo ke ndu taasioo. (1 Masaa. 3:​7-9) Nduyɛ mɛɛ o simnuŋ vɛlɛ masa, mbo sina maa mi heelɔŋndo chuu wana kpundɔɔ. Mbo poonyiaa aa: “Yoŋgaa, mbo tɛɛmbuu yoomu waŋndo, hɔlaa heelaa bɛnduaa, ma mal wana kpɔŋ.” (Pulɔ. 16:​18) Kɛ i cho suɛi imɔnɔ le sinaa maa, mi Sɔlɔmɔŋ kɛɛ sila ndupila yɔŋgu hoo wo dɔwɔɔ o wali niŋ. Mɛɛ o simnuŋ masa kpaaya bɛndu, mbo kandu heelɔŋndo. Nduyɛ mbo kɛɛ sawala Mɛlɛkalaŋ dɔwɔɔ o wali niŋ. Le tamaseliiyo, sawa Mɛlɛkaa opilɛ wa ni maa, masa Hibuluiya ndoo nɔ mbo “kɛsi ŋlaandu tau tau le. Yɔŋi laanduaa kaŋ a faŋa ndu kɔllo o Mɛlɛka lo, ma tosa mbo muliŋ nyɛm cheleŋndoŋ sooluuwo.” (Ditɔnɔ. 17:​17) Sɔlɔmɔŋ dou  silaa hoo o wali niŋ te. Mbo chua laanduaa 700 a laanduaa pɔmbuaa 300. Nduyɛ a bɔɔbɔɔ mɛlɛkaa lachoowaa ndaa sooluu ni. (1 Masaa. 11:​1-3) Ndoo yiyaŋ maa, naapum hei chuu ndu niŋ kpundɛ le. Kɛ mɛɛ teleŋ tiŋ hiou, mbo kandu bahawɛilaŋ sɔlaa tau le mɛɛ ndoo mal Chɛhowa yɛ.—1 Masaa. 11:​9-13.

13. Yɛɛ naŋ pɛɛku yɛ te ŋ yiyaŋ pɛ a kaa tusiaŋ Chiisu nɔ wo okɔɔ?

¹³ Chiisu ndoo nɔ yiyaŋ kpeŋ kpeŋndo a ndupila okɔɔ. Tuupa mbo huŋ o chieeŋndo choo, mbo tosa sɔɔŋ kɔndɔfilloŋ tau a Chɛhowa latulu o choo choo niŋ. Baabuiyo dimi aa: “Ndu Mɛlɛka soliŋ kpeku ni le nyɛm cheleŋndoŋ kpou toosiaa. Muŋ o choo choo niŋ, a muŋ o lɛŋndeŋ choo.” (Kolo. 1:​16) Mɛɛ o sɔla yiŋɔɔ, naapum mbo loonuŋ sɔɔŋ ndoo tosa a Finya ndɔ latulu o choo choo niŋndoŋ. (Maa. 3:​16; Chɔŋ 17:​5) Mi che bɛɛ ndoo sina sɔɔŋ tau, kɛ keŋ tosa ndu mbo heeluŋ te. O chueŋnuŋ ndupila o bɛndu mbo hiau wana o wana le. Mbo dimul buɛiyaa nduaa maa, o hiŋ o chieeŋndo choo “le mi wana tosal ndu wali le. Kɛ le mbo tosal waŋnda wallo, nduyɛ mbo yɔŋgu yoomu ndɔɔ le wanaa bɔɔbɔɔ baŋaa.” (Maa. 20:​28) Mbo dimi vɛlɛ kpendekele maa, o tosa nyɛ o nyɛ a ba ndɔ le. (Chɔŋ 5:​19) Nuawɔ se kaa tusiaŋ bɛndu! Chiisu kɛsul naa tamasi kɛndɛ kɛndɛ naŋ nɔ miŋ tol kɔɔli wo.

14. Yɛɛ naŋ pɛɛku yɛ Chiisu o ba, te o hiŋ pɛ a yiyaŋ kpeŋ kpeŋndo nɔɔ a naapila okɔɔ?

¹⁴ Mi Chiisu pɛɛku buɛiyaa nduaa le ma nɔ yiyaŋ kpeŋ kpeŋndo a ndapila okɔɔ. Teleŋ pilɛ mbo dimul nda aa: “Yiiŋii cho nya o lebol le bɛɛ, Mɛlɛka sina mɛɛ kpɛ i cho yɛ.” (Maa. 10:​30) Nyɛ o dimi hoo wo dɛɛniaa naa kɔllo taama taama te ŋ yiyaŋ pɛ maa, ŋ cho a sɔvɛ le. Hei sim ni maa, Finya naa kaalaa cho o choo choo niŋndo kaala naa tau, nduyɛ maa o che naa a sɔvɛ. Te Chɛhowa che naa pɛ a sɔvɛ, nduyɛ mbo chɛl naa le luɛiyɔɔ o chieeŋ sɛnɛiyo niŋ, mɛɛ ŋ nɔ miŋ yiyaŋ maa ŋ cho a sɔvɛ le le.

15. (a) Yɛɛ Bandu Mɛŋgɛlaa dɛɛniaa yɛ naa le miŋ tosa? (b) A mɛɛ naŋ cho chɔɔ o fotueila cho o peele 24 choo yɛ, te ŋ hiu pɛ kɔllo handɔɔ o naapila choo, salala kuɛɛ hialuŋ yɛ naa?

¹⁵ Wɔsilaŋ 15 la hiou niŋ ni, chɔŋ a teleŋ Bandu Mɛŋgɛlaa dɛɛniaa naa le miŋ nɔ yiyaŋ kpeŋ  kpeŋndo a naapila okɔɔ wo. Mbo dimi aa: “Ŋ nɔ miŋ chuaŋnuŋ maa ŋ cho bɔɔ a sɔvɛ, okoŋ miŋ kandu kaa heelaŋndo nɔɔ le. Ŋ nɔ vɛlɛ miŋ yiyaŋ maa ŋ cho a sɔvɛ kposoŋ te le. Kɛ ŋ nɔ miŋ nɔ yiyaŋ kpeŋ kpeŋndo a naapila okɔɔ. Koŋ cho ni, sinaa maa ŋ tiuba miŋ tosa sɔɔŋ pum, nduyɛ maa miŋ nɔ vɛlɛ dialuŋ vilɛiyoŋ le sɔɔŋ pum tosaa. Mi chua Kilisiɔŋnɔ pilɛ dimi aa: ‘I sina maa I cho wana wɔɔŋ tau le. Nduyɛ I cho vɛlɛ wana kɛndɛ tau le. I nɔ kaala kɛndɛlaŋ, vɛlɛ I nɔ siɔuwoŋ tau. O kpeekpei niŋ, naa kpou lende naŋ cho ni.’” * A tonya, hei chɔm kpendekele maa i cho suɛi sɔvɛ le miŋ nɔ yiyaŋ kpeŋ kpeŋndo a naapila okɔɔ.

16. Le yɛɛ Chɛhowa ke yɛ naa silala taasilaŋ?

¹⁶ Mi Chɛhowa ke naa silala taasilaŋ sanaa o Diom ndɔɔ niŋ. Kanifuule o kaala naa, nduyɛ o yeema naa miŋ wa a kɔl kɛndɛ. (Aisaya 48:​17, 18) Kɛɛsiaa sɔvɛ naŋ nɔ miŋ tosa le miŋ nɔ kɔl kɛndɛ kpeekpeiyo wo, cho hɛnaŋ Chɛhowaa kɛsioo nyɛ tase o yoomu naa niŋ ni. Mi wanaa kɛɛ yiyaŋ kpeŋ kpeŋndo nɔɔ a kaniei, wallo, ɔɔ a ndapila okɔɔ wa sɔla bahawɛilaŋ tau. Kɛ te ŋ nɔ pɛ yiyaŋ kpeŋ kpeŋndo a sɔɔŋ muŋ okɔɔ, nduyɛ miŋ kɛsi hɛnaŋ Chɛhowaa nyɛ tase o yoomu naa niŋ, ŋ sɔla bahawɛila waa lende le. Maa naa kpou kɛɛsiaŋ o kɔl le miŋ wa wanaa taasi, nduyɛ miŋ tosa mi Chɛhowa naŋ kɔl!—Pulɔ. 23:​15.