1-2. Ɔɔ sabu tasoo o naŋ nɔ miŋ nɔ yeemɛi o yau Sɔɔŋ Chɔɔmaŋndoŋ niŋndo?

 Ŋ DIMI wɔ maa a cho fotueila wana cheleŋ tofaa, nduyɛ ma wa chɔɔ wanaa bɔɔbɔɔ ŋ sina le wa. Kɛ mɛɛ ŋ che fotueiyo opum, ma sim kpɛ, okoŋ ma tofa ndu chiŋ. Le yɛɛ? Kanifuule, num bɛɛ cho o fotuei koŋ niŋ. Mɛɛ ŋ wa ndu tofaa, ma kindiŋ le loonɔŋndo teleŋ nya chua ndu wo a fondaŋ nya chua ndu wo. Ma kindiŋ vɛlɛ le sinaa wana o wana cho o fotuei koŋ niŋ. A tonya, ma hɛnaŋ tau a fotuei koŋ.

² Yau Sɔɔŋ Chɔɔmaŋndoŋ cho ko maa fotuei koŋ. Le yɛɛ? Le sabulaŋ latiɔɔŋ. O tasoo, le naa nda poonyiaa ndu ni. Suɛi tasei o yauwo hoo niŋ dimi aa: “Sɔɔŋ Chiisu Kiliti chɔm buɛiyaa nduaa woŋ cho muŋ ni. Mɛlɛka ke ndu muŋ ni, le mbo chɔm nda sɔɔŋ nɔ le yɔŋnɔŋndo o teleŋ biŋgi bɛŋgu woŋ.” (Sɔɔŋ. 1:​1) Le saboo hoo, sɔɔŋ poonyiaŋ o yauwo hoo niŋndoŋ cho le waŋnda kpou le, kɛ le naŋ yɔŋguŋ o Mɛlɛka lo wa. Le mɛɛ naŋ cho wanaa Mɛlɛkaa yɛ, kɔndɔfili nɔ mbo bii naa le sinaa nyɛ naŋ cho tosaa, le mi huuluŋ cho o yauwo hoo niŋndoŋ peeluŋndo le. O dimi niŋ, te ŋ wa pɛ diomndaŋ veeloo o yau Sɔɔŋ Chɔɔmaŋndoŋ niŋ, miŋ cheŋnuŋ naapila mɛɛ waŋndo chaŋnuŋ nuaa o fotueiyo niŋ yɛ.

3-4. A mɛɛ yau Sɔɔŋ Chɔɔmaŋndoŋ dimi yɛ, teleŋ kuɛɛ huuluŋ cho leniŋndoŋ cho yɛ peelɔŋ, nduyɛ yɛɛ hei nyindu yɛ naa le tosaa?

³ Sabu diiŋ ndɔɔ o naŋ nɔ yeemɛi o yau Sɔɔŋ Chɔɔmaŋndoŋ niŋndo cho ni maa, ŋ cho o teleŋ huuluŋ cho leniŋndoŋ cho peelɔŋndo wo niŋ. Mi kiilanɔɔ Chɔŋ chɔm naa teleŋ huuloŋ  muŋ nɔ le peelɔŋndo wo. Mbo dimi aa: “Mi nyina diandaa tosa mi cha yapila o paale Masanɔɔ niŋ.” (Sɔɔŋ. 1:​10) A wɔsi 96 o faŋaŋ Chiisu wo kɔɔli Chɔŋ poonyiaa diomndaŋ ndaŋ ni. A teleŋ koŋ, “paale Masanɔɔ” le wa wɔ landaŋ. (Maa. 25:​14, 19; Luku 19:​12) A mɛɛ huuluŋ cho o Baabuiyo niŋndoŋ chɔm yɛ, paaleŋ ndeŋ le kanduŋ a wɔsi 1914 mɛɛ Chiisu simnuŋ Masaa o choo choo niŋ. Chɔŋ niŋ a wɔsi koŋ, mi huuluŋ cho o yau Sɔɔŋ Chɔɔmaŋndoŋ niŋndo kandu peelɔŋndo a wanaa Mɛlɛkaa. A tonya, o “paale Masanɔɔ” niŋ kpeekpei naŋ cho niŋ ni!

⁴ Le mɛɛ naŋ cho o paale Masanɔɔ niŋ yɛ, naa kpeekpei nɔ ni miŋ yaŋ nilaŋ o sila cho o Sɔɔŋ Chɔɔmaŋndoŋ 1:​3 niŋndo. Le dimi aa: “Wana o wana veelul pɛ waŋnda diomndaŋ o yauwo hoo niŋ, kɔl kɛndɔɔ cho le ndu. Nduyɛ wana o wana yaŋ pɛ nilaŋ, mbo tosa nyɛ o tueiyo, kɔl kɛndɔɔ cho le ndu. Kanifuule, boondii Mɛlɛka hɛli ve cho niŋ kpɛɛluŋ.” A tonya, ŋ nɔ miŋ ‘veelu diomndaŋ’ o yauwo hoo niŋ, miŋ ‘yaŋ nilaŋ’ nduyɛ miŋ ‘tosa nyɛ naŋ tueiyo.’ Ɔɔ sɔɔŋ ŋpum o yauwo hoo niŋ, ŋ naŋ nɔ miŋ tosa woŋ?

5. Yau Sɔɔŋ Chɔɔmaŋndoŋ chɔm maa ŋ nɔ miŋ tosa a sabu mi Chɛhowa chɛl piɛile naaleŋ. O nɛi kuɛɛ choo?

⁵ O bolle taseleŋ o yau Sɔɔŋ Chɔɔmaŋndoŋ niŋ, miŋ cha maa Chiisu sina nyɛ cho yɔŋnɔŋndo o kundalaŋ niŋndo. (Sɔɔŋ. 1:​12-16, 20; 2:​1) Mbo chɔm hei kpendekele sanaa a yooŋgula o yɔŋ o kundala ŋɔmmɛulaŋ niŋ o Eesiaa Mainɔ niŋndo. O yooŋgula laŋ niŋ, mbo ke Kilisiɔŋaa tasiaa nɛi chɔmaa le ma tosa a sabu mi Chɛhowa chɛl piɛile ndaleŋ. Nduyɛ nyɛ o dimi o yooŋgula laŋ niŋndo piiliaŋ hau wanaa Mɛlɛkaa kpou. Yɛɛ naŋ pɛɛku yɛ o hei niŋ? Ŋ pɛɛku maa, te ŋ nɔ pɛ chaŋyɛi kɛndɛi a Chɛhowa, mi Masanɔ naa Chiisu Kiliti sina. Naa kpou cho o manda ndɔɔ bɛŋgu, nduyɛ nyɛ o nyɛ cho o viaŋnaŋ ndu o hɔl te. O sina nyɛ naŋ nɔ miŋ tosa le miŋ hiou lachi a chaŋyɛi kɛndɛi nɔɔ a Chɛhowa wo. Yɛɛ o dimullɛ naa le miŋ tosa?

6. (a) A mɛɛ Sɔɔŋ Chɔɔmaŋndoŋ 2:​3, 4 chɔm yɛ, bahawɛi kuɛɛ kundaa Ɛfisɔɔ ndoo nɔ yɛ? (b) Yɛɛ naŋ pɛɛku yɛ o hei niŋ?

⁶ Nuawɔ Sɔɔŋ Chɔɔmaŋndoŋ 2:​3, 4. Ŋ nɔ miŋ mal kaala tase naŋ nɔ le Chɛhowa wo le. O yooŋgu Chiisu yɔŋ kundaa Ɛfisɔɔ wo niŋ, mbo suaa a biuwɔŋ ndaa okɔɔ. Nduyɛ mbo suaa vɛlɛ a mɛɛ nda wa hiouwɔɔ lachi a Chɛhowa piɛiyo yɛ, mi che bɛɛ simultaŋ la wa nda komallo. A koŋ kpou, mbo dimul nda maa a mal kaala tase ndaa nɔ wo. Nduyɛ maa te ndaa miiŋgu kaala tase koŋ nɔ le, Chɛhowa ve piɛile ndaleŋ chɛlɔɔ le. Hau bɛɛ, ŋ nɔ miŋ tosa tau mbo hiou simultaŋ biuwɔŋndo. Ŋ nɔ miŋ biunuŋ simultaŋ a yiyaŋ kɛndɔɔ. O cho ko o nyɛ naŋ tosa wo niŋ te Mɛlɛka naa nɔ yeemɛi le, kɛ o nɔ vɛlɛ yeemɛi o sabu naŋ cho ndu tosaa wo niŋ. Sabu naŋ tosa sɔɔŋ ndo cho o sɔvɛ ndu o hɔl kanifuule, o yeema naa miŋ piɛi ndu le mɛɛ naŋ nɔ kaala yiŋgoloŋndo a balika melaa le ndu yɛ.—Pulɔ. 16:​2; Maki 12:​29, 30.

7. (a) A mɛɛ Sɔɔŋ Chɔɔmaŋndoŋ 3:​1-3 dimi yɛ, bahawɛi kuɛɛ kundaa Sadisi ndoo nɔ yɛ? (b) Yɛɛ naŋ nɔ yɛ miŋ tosa?

⁷ Nuawɔ Sɔɔŋ Chɔɔmaŋndoŋ 3:​1-3. Ŋ nɔ miŋ vi ŋdial o Mɛlɛka piɛiyo niŋ te. Wanaa wa o kundaa Sadisi niŋ nda bɛɛ ndaa nɔ bahawɛiyo. Mi che bɛɛ ndaa nɔ dialuŋ fulaŋ paandu o Mɛlɛka piɛiyo niŋ, kɛ a wa dialloŋ wuoo o pɔmpɔmbɔ. Le hei, mi Chiisu dimul nda maa a “tiondu” o luaŋ. Yɛɛ naŋ pɛɛku yɛ o hei niŋ? I cho tonya maa, Chɛhowa puɛɛnuŋ wali naŋ cho tosaa le ndu wo le. (Hibu. 6:​10) O wa bɛɛ lende, ŋ nɔ miŋ handu kɔllo o nyɛ naŋ tosa  niŋ paandu o wali ndɔɔ niŋndo le. Naapum ŋ tiu lɛ ba miŋ tosa maa paandu le. Kɛ ŋ nɔ miŋ wa a tuandaŋ “o wali Masanɔɔ” niŋ. Hei sim ni maa, ŋ nɔ miŋ vi ŋdial te. Ŋ nɔ miŋ wa lahɔl haaa o mɛɛlulaŋ.—1 Kɔliŋ. 15:​58; Maa. 24:​13; Maki 13:​33.

8. A mɛɛ Sɔɔŋ Chɔɔmaŋndoŋ 3:​15-17 dimi yɛ, yɛɛ naŋ pɛɛku yɛ o nyɛ Chiisu dimul kundaa Lawodisiaa wo niŋ?

⁸ Nuawɔ Sɔɔŋ Chɔɔmaŋndoŋ 3:​15-17. Ŋ nɔ miŋ nɔ sɛmbɔɔ, nduyɛ miŋ yɔŋguŋ a kɔllo kpou o wali Chɛhowaa niŋ. Kundaa Lawodiisiaa bɛɛ ndoo nɔ bahawɛiyo. A wa “cham cham” o Mɛlɛka piɛiyo niŋ. Le hei, mi Chiisu dimul nda maa, “a cho mɔnɛi biyɔɔ, ma wa o kuɛi niŋ.” Ndaa nɔ ma dɔu sɛmbɔɔ le Chɛhowa piɛiyo, nduyɛ ma yɔŋguŋ kpou le wali ndɔɔ tosaa. (Sɔɔŋ. 3:​19) Yɛɛ naŋ pɛɛku yɛ o hei niŋ? Ŋ pɛɛku maa, te ŋ sina pɛ maa ŋ kandu dialloŋ wuoo o Chɛhowa piɛiyo niŋ, mɛɛ ŋ nɔ miŋ yiyaŋ a sɔɔŋ Chɛhowa a kɔɔna ndɔɔ tosal naa niŋndoŋ, nduyɛ miŋ chɔm balika melaa le muŋ. (Sɔɔŋ. 3:​18) Ŋ nɔ miŋ kindiŋ le yoomu kɛndɔɔ nɔɔ suŋ suŋ, okoŋ miŋ handu wali Chɛhowaa nyɛ diiŋ ndɔɔ o yoomu naa niŋ te.

9. A mɛɛ yooŋgu Chiisu yɔŋ kundaa Pɛkamɔm a Tayatilua wo chɔm yɛ, yɛɛ naŋ nɔ yɛ miŋ fafaŋ?

⁹ Ŋ nɔ miŋ kɛɛ pɛɛkula wanaa simul tonyaa wa. Mi Chiisu sila waŋnda apum o kundaa Pɛkamɔm niŋ, le mɛɛ nda wa hunɔɔ a piɔuwaŋndo puaapiliaa tɛɛŋ yɛ. (Sɔɔŋ. 2:​14-16) Nduyɛ mbo chandu wanaa wa o kundaa Tayatilua niŋ nda le mɛɛ nda wa “sɔɔŋ yiŋgoloŋ Setana woŋ” fafaŋndo yɛ. Okoŋ mbo dɛɛniaa nda le ma bii tonyaa “kpiŋ.” (Sɔɔŋ. 2:​24-26) Kilisiɔŋaa ndaa kindu o Mɛlɛka piɛiyo niŋ te wa, nduyɛ ma wa pɛɛkula lachoowalaŋ tolɔɔ kɔɔli wa, ndaa nɔ ma mal yɔŋnda ndala wɔɔŋndaŋ. Naa bɛɛ, ŋ nɔ miŋ kɛɛ pɛɛkula wanaa simul tonyaa wa. Mi waŋnda haa “chɔm maa a cho a yɔŋgaŋ o Mɛlɛka lo, kɛ ma kɛɛ le mi kpaaya ndɔɔ tosa wallo o yoomula ndalaŋ niŋ.” (2 Timo. 3:​5) Mi i wa tɛtɛlɛ le pɛɛkula lachoowalaŋ sinaa a laŋ fafaŋndo, te ŋ wa pɛ Diom Mɛlɛkaa pɛɛkoo teleŋ o teleŋ.—2 Timo. 3:​14-17; Chudi 3, 4.

10. Yɛɛ cheleŋ naŋ pɛɛku yɛ o nyɛ Chiisu dimul kundaa Pɛkamɔm a Tayatilua wo niŋ?

¹⁰ Ŋ nɔ miŋ wou balaŋ ɔɔ miŋ chɛl sɔɔŋ kɛ kɛ cho a kaa ihini nɔɔlɛiyo okɔɔ woŋ te. Bahawɛi cheleŋ wa o kundaa Pɛkamɔm a Tayatilua niŋ. Mi Chiisu pɛɛsa waŋnda apum o kundalaŋ ndaŋ niŋ a ndaa kɛɛ le balaŋ solioo o kaa ihini nɔɔlɛiyo niŋ nda. (Sɔɔŋ. 2:​14, 20) Yɛɛ hei pɛɛku yɛ naa? Ŋ nɔ miŋ wa Chɛhowa kɔl le mbo chɛl naa miŋ luei balaŋ o kaa ihini  nɔɔlɛiyo niŋ te. O chɛl naa miŋ tosa keŋ kposoŋ te, o yɔŋ bɛɛ miŋ piɛi ndu niŋ le wɔsiŋ bɔɔbɔɔ ɔɔ miŋ nɔ dilakeŋnaŋndaŋ tau o kɔɔna ndɔɔ niŋ. (1 Saam. 15:​22; 1 Pitɛ 2:​16) O yeema naa miŋ diikuŋ sawala ndɔlaŋ, o yɔŋ bɛɛ mi waŋnda o chieeŋndo niŋ chi laŋ la sɔvɛ le.—Ɛfi. 6:​11-13.

11. Yɛɛ naŋ pɛɛku yɛ niŋ o buŋgɛi hei niŋ? (Tofa kɔfoo hoo, “ Sɔɔŋ Naŋ Nɔ Miŋ Kɛsiŋ o Kɔlloŋ.”)

¹¹ Yɛɛ naŋ pɛɛku yɛ niŋ o buŋgɛi hei niŋ? Ŋ pɛɛku maa, ŋ nɔ miŋ tosa a sabu le mi Chɛhowa chɛl piɛile naaleŋ. Te ŋ sina pɛ maa nyɛ naŋ cho tosaa wo chɛlaŋ a hɛnaŋ ndɔɔ le, mɛɛ ŋ nɔ miŋ keleŋa siŋgaŋndaŋ tosa. (Sɔɔŋ. 2:​5, 16; 3:​3, 16) Mi Chiisu suaa a nyɛ cheleŋ okɔɔ o yooŋgula o yɔŋ o kundalaŋ ndo niŋ. Yɛɛ cho yɛ nyɛ koŋ?

12. Yɛɛ Chiisu ndoo dimullɛ kundaa Simana a Filadɛɛfiaa, mbo wa nyɛ sɔvɛ le naa hau? (Sɔɔŋ Chɔɔmaŋndoŋ 2:​10)

¹² Ŋ tofaŋndɔ vɛlɛ yooŋgu Chiisu ndoo yɔŋ kundaa Simana a Filadɛɛfiaa wo. Mbo dimul Kilisiɔŋnda haa maa, a nɔ ma wa a isiooŋ le nyɛpalaa waŋnda wa nda tusi choo wo le. Kanifuule, Chɛhowa wa nda fanda te ndaa lo pɛ o laalaŋ ndaa choo. (Nuawɔ Sɔɔŋ Chɔɔmaŋndoŋ 2:​10; 3:​10) Yɛɛ naŋ pɛɛku yɛ o hei niŋ? Ŋ pɛɛku maa, ŋ nɔ miŋ wa nyɛpalaa kɔl, nduyɛ miŋ wa a bɛɛndiaŋ le ndu biuwɔŋndo. (Maa. 24:​9, 13; 2 Kɔliŋ. 12:​10) Le yɛɛ hei cho yɛ i sɔvɛ?

13-14. Vɛɛ nyɛ dimiŋ o Sɔɔŋ Chɔɔmaŋndoŋ bolle 12 niŋndo piiliaŋ yɛ niŋ wanaa Mɛlɛkaa?

¹³ Yau Sɔɔŋ Chɔɔmaŋndoŋ chɔm naa maa, waŋnda cho wanaa Mɛlɛkaa nyɛpalaa tusi choo “o paale Masanɔɔ niŋ.” Sɔɔŋ Chɔɔmaŋndoŋ bolle 12 chɔm maa, mi chɔuwo del o choo choo niŋ mɛɛ Chiisu simnuŋ dɔɔ Masa. Mi Maikɛl, ndu cho yɛ Chiisu Kiliti ni a puaa nduaa chɔuwa, chɔulaba Setana nda nyinaa nduaa wɔɔŋnda. (Sɔɔŋ. 12:​7, 8) Fulamakɔɔlioo wa ni, ma soli yaamɔɔwaa Mɛlɛkaa haa o choo choo niŋ, ma mal nda o lɛŋndeŋ choo. Mi hei tosa mi saŋgaa a nyɛpalaa wa o lɛŋndeŋ choo. (Sɔɔŋ. 12:​9, 12) Kɛ vɛɛ hei piiliaŋ yɛ niŋ wanaa Mɛlɛkaa?

¹⁴ Sɔɔŋ Chɔɔmaŋndoŋ chɔm naa vɛlɛ nyɛ Setana tosa okoŋ kɔɔli wo. O nɔ lɛ kpaaya le miiŋgoo o choo choo niŋ te. Le hei, o cho a kɔl tuuwo, nduyɛ mbo wa Kilisiɔŋaa pɔyaŋaa cho wɔ o chieeŋndo choo wa chiŋalaŋndo. Kilisiɔŋaa pɔyaŋnda haa cho wa latulu a Chiisu o Masale Mɛlɛkaleŋ choo ni. Nduyɛ nda cho “yooŋgoo dimioo a Chiisu okɔɔ” ni. (Sɔɔŋ. 12:​17; 2 Kɔliŋ. 5:​20; Ɛfi. 6:​19, 20) Vɛɛ huuluei hei cho yɛ hau peelɔŋndo?

15. Nɛɛ waa sim yɛ le ‘seiyaa ŋiɔɔŋaa’ Sɔɔŋ Chɔɔmaŋndoŋ bolle 11 soo okɔɔ wa? Nduyɛ yɛɛ ndoo yɔŋnuŋ yɛ a nda?

¹⁵ O paandoo niŋ, mi Setana soliŋ yaamɔɔwaa wanaa Mɛlɛkaa kpeku, le Kilisiɔŋaa pɔyaŋaa wa chilaŋ chuaa le wali dimiaa yooŋgu  kɛndɔɔ wa nyɛpalaa tusioo choo. Kilisiɔŋnda haa ndaa sim le ‘seiyaa ŋiɔɔŋaa’ Sɔɔŋ Chɔɔmaŋndoŋ dimi maa ma sɔla piɔmndo wa. * (Sɔɔŋ. 11:​3, 7-11) A wɔsi 1918, ma bii puaapiliaa haa a ŋɔmaa, ma nyiinduu nda choolaŋ choo, okoŋ ma duau nda o chiɛi manyumndo niŋ. Ndaa yeema nda ma chii wɔsiŋ bɔɔbɔɔ o chiɛi manyum koŋ niŋ. O yiyaŋ iwana chieeyaa niŋ, i wa ko maa wali puaapiliaa haa wa tosaa wo ndoo fuuluu o mɛɛlulaŋ.

16. Suɛi kɔndɔfilii kuɛɛ yɔŋnuŋ yɛ a wɔsi 1919, nduyɛ yɛɛ Setana cho yɛ hiouwɔɔ lachi a tosaa?

¹⁶ Mi huului cho o Sɔɔŋ Chɔɔmaŋndoŋ bolle 11 niŋndo chɔm maa, te teleŋ biŋgi ndoo hiou pɛ, ‘seiyaa ŋiɔɔŋnda’ haa wa miiŋgu yoomu. Mi huuluei hei peeluŋ o nɛi kɔndɔfili niŋ. O fuuluu bɛɛ wɔsi pilɛ le, mi puaapiliaa nda dɔu kaŋ o chiɛi manyumndo niŋ nda sɔla malɔɔ. Hei yɔŋnuŋ a wɔsi 1919 kandɔŋndo. Nduyɛ okoŋ kɔɔli, ma faŋa sɔɔŋ ndaa hɛɛnduu nda choo woŋ kpou. Mɛɛ nda mal dɔɔ puaapiliaa haa, ma kandu vɛlɛ wali leMasaa tosaa. Kɛ keŋ kuuna Setana hiouwɔɔ lachi a wanaa Mɛlɛkaa chiŋalaŋndo le. Chɔŋ a teleŋ koŋ, o cho wɔ hiouwɔɔ lachi kɛ a wanaa Mɛlɛkaa nyɛpalaa tusioo choo. (Sɔɔŋ. 12:​15) A tonya, naa a pilɛŋ pilɛŋnda nɔ miŋ wa a bɛɛndiaŋ le nyɛpalaa biuwɔŋndo, nduyɛ miŋ sim o laalaŋ naa choo nyɛkɛndɛ yi.—Sɔɔŋ. 13:​10.

17. O nɛi kuɛɛ choo wanaa Mɛlɛkaa sɔla yɛ mala nda ve kɔl te wo, mi che bɛɛ Setana cho wɔ hiouwɔɔ lachi a nda chiŋalaŋndo?

¹⁷ Sɔɔŋ Chɔɔmaŋndoŋ bolle 12 chɔm maa wanaa Mɛlɛkaa cho mala nda ve niŋ kɔl te wo sɔla. I wa niŋ ko maa lɛŋndeŋ le ‘kumbi sondoo ni, mi le sɔɔsiaa pee bɛndoo.’ Pee bɛndu koŋ cho yɛ nyɛpalaa nda tusi naa choo wo ni. (Sɔɔŋ. 12:​16) Nduyɛ hei kpeekpei cho yɔŋnɔŋndo ni. Teleŋndaŋ lapum, mi wanaa bɛnduaa o chieeŋ Setanaa niŋ, mɛɛ wanaa kialaa ŋyamaa apum cho nuaa yɛ, soo le wanaa Mɛlɛkaa. O sɔɔŋ bɔɔbɔɔ niŋ, ma ke Seiyaa Chɛhowaa dioo le ma wa hɛnɛkɛ le wali ndaa tosaa. Vɛɛ nda soliŋ yɛ niŋ hɛnɛkɛyɛi hei kpeku? Teleŋ o teleŋ nda sɔla pɛ fondaa, ma soliŋ ndu kpeku le wali Chɛhowaa tosaa. (1 Kɔliŋ. 16:​9) Yɛɛ cho yɛ wallo hoo?

18. Wali yɛɛ kpeekpei naŋ cho yɛ tosaa o palɛi mɛɛlɛi hei niŋ?

¹⁸ Mi Chiisu dimi maa wanaa nduaa cho ‘yooŋgu kɛndɔɔ dimi a Masale Mɛlɛkaleŋ  okɔɔ’ chieeŋndo balɔɔ silɔ, tuupa mi mɛɛlulaŋ la fuuluu. (Maa. 24:​14) Te wanaa Mɛlɛkaa wa pɛ yooŋgu kɛndɔɔ dimioo, ma sɔla malaa maalikɛinɔɔ ɔɔ maalikɛiya o ba. Baabuiyo dimi maa maalikɛinɔɔ “nɔ yooŋgu kɛndɛ cho le fɛɛŋ a fɛɛŋndo le mbo dimul waŋnda lekaa o lekaa, a lelɛŋ o lelɛŋ, a isɔɔ o isɔɔ maŋgalaa, a waŋnda suu o suu o chieeŋndo choo.”—Sɔɔŋ. 14:​6.

19. Yooŋgu kuɛɛ wanaa kaala Chɛhowa wa cho yɛ wa dimioo o chilaŋ niŋ?

¹⁹ O cho ko yooŋgu kɛndɔɔ a Masale Mɛlɛkaleŋ okɔɔ le wanaa Mɛlɛkaa nɔ le dimioo le. A nɔ vɛlɛ ma toolu maalikɛiya le yooŋgu cho o Sɔɔŋ Chɔɔmaŋndoŋ bolle 8 haaa 10 niŋndo dimioo. Mi maalikɛiya haa suaa a kpundɛla komal niŋ wanaa kɛɛ Masale Mɛlɛkaleŋ nda okɔɔ. A teleŋ koŋ, Seiyaa Chɛhowaa cho wa yooŋgu kɔɔsɔɔ dimioo. Yooŋgu koŋ wa niŋ ko mɛɛ “yiŋndeŋ a looŋ kpuŋgbaŋ” cho nuaa yɛ. A boondii keŋ, a cho wa waŋnda chɔmndo nyɛm Mɛlɛka cho hunɔɔ tɛɛmbuu o chieeŋ wɔɔŋ Setana wo niŋndo. (Sɔɔŋ. 8:​7, 13) Waŋnda nɔ ma sina maa mɛɛlula chieeŋndo hoo la cho niŋ kpɛɛluŋ, le halikpeŋ ma tosa siŋgaŋndaŋ o yoomula ndalaŋ niŋ, okoŋ ma huŋ sɔla pioŋɔɔ o paale Chɛhowaleŋ choo. (Sɛfa. 2:​2, 3) Kɛ o cho waŋnda kpou le tueiyɔ a yooŋgoo hoo okɔɔ le. Ŋ nɔ miŋ nɔ kɔl simulaa le ndu dimioo. A teleŋ nyɛpalaa bɛndoo, yooŋgu naŋ dimul niŋ waŋnda wo cho wa o tuu kpɛi, nduyɛ o tɛɛmbuu niŋ a bɔɔbɔɔ kɔltaŋ.—Sɔɔŋ. 16:​21.

20. Yɛɛ naŋ cho yɛ yaasiaa o buŋgaŋ muuŋ cho lachi woŋ niŋ?

²⁰ Ŋ nɔ kɛsɛ miŋ tosa nyɛ huului cho hei o Sɔɔŋ Chɔɔmaŋndoŋ niŋnde dimi wo. Kanifuule, i cho vɛlɛ peelɔŋndo a naa. (Sɔɔŋ. 1:​3) Kɛ yɛɛ mala yɛ naa miŋ hiou lachi a nyɛpalaa biuwɔŋndo, nduyɛ miŋ nɔ kɔl simulaa le yooŋgu kɛndɔɔ dimioo suŋ suŋ a le yooŋgu kpundɔɔ dimioo o chilaŋ niŋ? Sɔɔŋ ŋmuuŋ cho naa mala le hei tosaa ni. I tasei, nyɛ yau Sɔɔŋ Chɔɔmaŋndoŋ dimi a yaamɔɔwaa Mɛlɛkaa okɔɔ wo. I diiŋ nduɛi, salala naŋ cho hunɔɔ sɔla o chilaŋ niŋndaŋ te ŋ lo pɛ o laalaŋ naa choo. Ŋ cho sɔɔŋ muŋ yaasiaa o buŋgaŋ muuŋ cho lachi woŋ niŋ.