1. Kɛɛsiaa sɔvɛ kuɛɛ wana o wana nɔ yɛ mbo tosa hau?

 NAA kpou nɔ hau miŋ tosa kɛɛsiaa sɔvɛ sɔviɔɔ o yoomula naalaŋ niŋ. Baa ŋ cho pa Chɛhowa toolu maa Masaa le chieeŋndo kpou? Ɔɔ ŋ cho yaamɔɔnɔ ndɔɔ Setana tolɔɔ kɔɔli? Wana o wana nɔ mbo tosa chuaŋ chuaa le waa o kumbuei ipilɛ choo. Kɛɛsiaa kɛ kɛ naŋ tosa pɛ, o cho chila naalaŋ piiliaŋ lefafɛɛŋ. (Maa. 25:​31-33, 46) A teleŋ “nyɛpalaa bɛndoo,” a cho naa pondaleŋ handɔɔ le pioŋɔɔ sɔlaa ɔɔ le tambei sɔlaa.—Sɔɔŋ. 7:​14; 14:​9-11; Isi. 9:​4, 6.

2. (a) Yɛɛ Hibuluiya 10:​35-39 dɛɛniaa yɛ naa le tosaa? (b) Vɛɛ yau Sɔɔŋ Chɔɔmaŋndoŋ mala yɛ naa?

² Nuawɔ Hibuluiya 10:​35-39. Te a tosa niŋ pɛ kɛɛsiaa le Chɛhowa a Masale ndɔleŋ tooloo, mɛɛ kɛɛsiaa kɛndɔɔ pila ŋ tosa koŋ ni. Suŋ suŋ niŋ, a nɔ yeemɛi kpeekpei le acheleŋnda malaa mi nda bɛɛ tosa kɛɛsiaa kɛndɔɔ. Le hei tosaa, a soliŋ sɔɔŋ cho o yau Sɔɔŋ Chɔɔmaŋndoŋ niŋndo kpeku le nda malaa. Yau sɔviɔɔ hoo chɔm naa nyɛ cho hunɔɔ yɔŋnɔŋ a wanaa cho Chɛhowa simullo wa. O chɔm naa vɛlɛ, salala wanaa cho hiouwɔɔ lachi a Chɛhowa tooloo wa tuɛi niŋ yeela o chilaŋ niŋndaŋ. I cho bɔɔ suɛi sɔvɛ le miŋ yaasiaa sɔɔŋ tonyaŋ muŋ. Te ŋ tosa lende pɛ, keŋ cho naa yoomuaŋ luei le hiouwɔɔ lachi a Chɛhowa piɛiyo. Le handɔɔ lechoo, ŋ cho vɛlɛ nyɛ naŋ pɛɛku wo soliŋ kpeku le acheleŋnda malaa ma tosa kɛɛsiaa le Chɛhowa piɛiyo.

3. Yɛɛ naŋ cho yɛ yaasiaa o buŋgɛi hei niŋ?

³ O buŋgɛi hei niŋ, ŋ cho nyunalaŋ ndaŋ yaasiaa. Laŋ la cho ni: Salala kuɛɛ wanaa cho Mɛlɛka a masale ndɔleŋ tooloo wa tuɛi yɛ niŋ yeela? O baa pilɔɔ choo, yɛɛ cho yɛ yɔŋnɔŋ  a wanaa cho visi biyaa siaŋa sɔɔtɔtɔɔ tooloo, mi yau Sɔɔŋ Chɔɔmaŋndoŋ suaa a ndu okɔɔ wo?

4. Kunda kuɛɛ kiilanɔɔ Chɔŋ che yɛ o yilaŋnde niŋ, ma wa a Chiisu latulu o choo choo niŋ?

⁴ O yilaŋnde niŋ, mi kiilanɔɔ Chɔŋ cha wanaa cho masale Mɛlɛkaleŋ tooloo, nduyɛ ma sɔla yoomu fafɛɛŋndo wa kundalaŋ latiɔɔŋ. Kunda tasoo cho ŋwaŋ 144,000 ni. (Sɔɔŋ. 7:​4) Waŋnda haa cho fula o chieeŋndo choo le ma kɔ wa ŋmasa a Chiisu latulu o choo choo niŋ ni. A cho wa a ndu latulu le ma wa masaa le chieeŋndo kpou. (Sɔɔŋ. 5:​9, 10; 14:​3, 4) O yilaŋnde niŋ, mi Chɔŋ cha nda isisi o Pembii Saayɔŋnde choo o choo choo niŋ.—Sɔɔŋ. 14:​1.

5. Yɛɛ cho yɛ suŋ yɔŋnɔŋ a Kilisiɔŋaa pɔyaŋaa cho wɔ o chieeŋndo choo wa?

⁵ Chɔŋ o sindɔɔ niŋ huŋ bii a hau, Chɛhowa bii niŋ waŋnda hɛlioo le ma wa o kunda ŋwaŋ 144,000 choo. (Luku 12:​32; Luomaŋ. 8:​17) O yilaŋii Chɔŋ che ve niŋ, ma dimul ndu maa wanaa cho lakɔ o choo choo niŋnda nyɛɛmbɔ koni cho wa wɔ o chieeŋndo choo ni, o palɛi mɛɛlɛi niŋ. Tuupa mi nyɛpalaa bɛndoo kanduŋ, a cho waŋnda haa “tamasioo” handɔɔ o ŋtendu, le chɔmndo maa Chɛhowa hini kɔl a nda. (Sɔɔŋ. 7:​2, 3; 12:​17) Nduyɛ a teleŋ nyɛpalaa bɛndoo, waŋnda haa cho lakɔ choo choo le ma kɔ wa latulu a Kilisiɔŋaa pɔyaŋaa cho niŋ loŋ nda. A cho simnɔŋ masaa a Chiisu latulu o Masale Mɛlɛkaleŋ choo.—Maa. 24:​31; Sɔɔŋ. 5:​9, 10.

6-7. (a) Kunda cheleŋ kuɛɛ Chɔŋ che yɛ, nduyɛ yɛɛ naŋ pɛɛku yɛ a nda okɔɔ? (b) O yɔŋ bɛɛ ma nɔ tiindaŋndo le kɔlaŋ choo choo ɔɔ le waa o chieeŋndo choo, le yɛɛ ŋ nɔ yɛ ma wa lehɔl le nyɛ dimiŋ o Sɔɔŋ Chɔɔmaŋndoŋ bolle 7 niŋndo chɔɔ o peelɔŋndo?

⁶ Mɛɛ Chɔŋ che kunda cho lakɔ choo choo wo, mbo cha vɛlɛ “waŋnda faŋga bɛndu bɛndoo.” Waŋnda haa cho maa kunda ŋwaŋ 144,000 le kanifuule, wana chii nda chɔm te. (Sɔɔŋ. 7:​9, 10) Yɛɛ naŋ pɛɛku yɛ a nda okɔɔ? Mi Chɔŋ poonyiaa aa: “Waŋnda haa fula o nyɛpalaa bɛndoo niŋ ni. Nduyɛ, ma tuaa domala ndalaŋ, ma siiŋguu laŋ la humbu fo fo o kooma Saa Fɔŋndɔɔ niŋ.” (Sɔɔŋ. 7:​14) Te nyɛpalaa bɛndoo hiou pɛ, faŋga bɛndoo hoo cho wa o chieeŋndo choo, nduyɛ ma tuei salala bɔɔbɔɔ yeela.—Sam 37:​9-11, 27-29; Pulɔ. 2:​21, 22; Sɔɔŋ. 7:​16, 17.

⁷ O yɔŋ bɛɛ ma nɔ tiindaŋndo le kɔlaŋ choo choo ɔɔ le waa o chieeŋndo choo, baa a laalaŋ pa maa a cho chɔ nyɛ dimiŋ o Sɔɔŋ Chɔɔmaŋndoŋ bolle 7 niŋndo peelɔŋndo? O kpeekpei niŋ, a nɔ ma laalaŋ maa a cho muŋ chɔ o peelɔŋndo. Nuawɔ se teleŋ kɛndɛ bɛndu wa niŋ le kundala tiɔɔŋ ndaŋ ndaŋ ndo! Ŋ cho wa a kɔl kɛndɛ tau le mɛɛ naŋ kɛɛsiaa le Chɛhowa a masale ndɔleŋ tooloo yɛ. Yɛɛ cheleŋ yau Sɔɔŋ Chɔɔmaŋndoŋ dimullɛ naa a nyɛpalaa bɛndoo okɔɔ?—Maa. 24:​21.

8. Vɛɛ nyɛpalaa bɛndoo kanduŋ yɛ niŋ, nduyɛ yɛɛ wanaa bɔɔbɔɔ tosa yɛ niŋ?

⁸ A mɛɛ naŋ pɛɛku o buŋgɛi naŋ hiou ve niŋ yɛ, masaa waa cho suŋ Babilɔŋ Bɛndoo delɔɔ choo. Ndu cho yɛ, kɔɔna piɛiyii lachoowɛi ni. (Sɔɔŋ. 17:​16, 17) Nduyɛ, keŋ cho wa kandɔŋ nyɛpalaa bɛndoo ni. Baa keŋ cho tosa ni mi wanaa bɔɔbɔɔ muliŋ le Chɛhowa piɛiyo? Sako. Sɔɔŋ Chɔɔmaŋndoŋ bolle 6 chɔm maa a teleŋ kala kala koŋ, wanaa cho Chɛhowa piɛi le wa cho muliŋ o kɔɔnala yalale chieeŋndeŋ a kɔɔnala leyula laŋ o chieeŋndo hoo niŋ le nda mandaa. Baabuiyo tuu kɔɔnalaŋ ndaŋ a pemboŋ. Le mɛɛ waŋnda haa toolu niŋ Masale Mɛlɛkaleŋ te yɛ, Mɛlɛka cho nda chɔ maa  wanaa simul ndu wa nda cho ni.—Luku 11:​23; Sɔɔŋ. 6:​15-17.

9. Vɛɛ wanaa Chɛhowaa wa yɛ niŋ teŋgeŋ a teleŋ nyɛpalaa bɛndoo, nduyɛ yɛɛ wa yɛ niŋ fulamakɔɔlioo?

⁹ A tonya, a teleŋ kala kala koŋ, wanaa Chɛhowaa cho wa teŋgeŋ. Nda kinɛi cho wa ndu piɛiyo o chieeŋndo choo o laalaŋndo choo ni. Nduyɛ a chɛl niŋ kposoŋ, le ma toolu visi biyaa le. (Sɔɔŋ. 13:​14-17) Le hei, wanaa cho Chɛhowa simullo wa cho tuulu kɔl tau a nda. Nduyɛ fulamakɔɔlioo cho wa ni, lɛŋnde cho chuuŋgiaŋ diompilɛ, le wanaa Mɛlɛkaa chiŋalaŋndo. Nyɛ nda tosa niŋ koŋ ndo Baabuiyo veelu ni aa Kɔɔki o Lɛŋnde Makɔkileŋ niŋ.—Isi. 38:​14-16.

10. A mɛɛ Sɔɔŋ Chɔɔmaŋndoŋ 19:​19-21 dimi yɛ, yɛɛ Chɛhowa cho yɛ tosa te waŋnda chiŋalaŋ pɛ wanaa nduaa?

¹⁰ Yɛɛ Chɛhowa cho yɛ tosa te waŋnda haa chiŋalaŋ pɛ wanaa nduaa? Mbo dimi aa: “I cho tumbe dɔɔnɔŋ o kala kala.” (Isi. 38:​18, 21-23) Mi Sɔɔŋ Chɔɔmaŋndoŋ bolle 19 tɛɛsiaa nyɛ cho yɔŋnɔŋ okoŋ kɔɔli wo. Chɛhowa cho Po ndɔɔ yɔŋ le mbo huŋ sɔŋga le wanaa nduaa, okoŋ mbo yem yaamɔɔwaa ndaa. Nduyɛ, “puaa chɔuwaa cho o choo choo niŋnda,” cho wa a Chiisu latulu o chɔuwo hoo niŋ. Nda cho yɛ maalikɛiya a ŋwaŋ 144,000 nda cho wa o masaleŋ choo wa ni. (Sɔɔŋ. 17:​14; 19:​11-15) Yɛɛ cho yɛ yɔŋnɔŋ o chɔuwo hoo niŋ? Wanaa simul Chɛhowa wa kpou cho tambei sɔla o chɔuwo hoo niŋ!—Nuawɔ Sɔɔŋ Chɔɔmaŋndoŋ 19:​19-21.

11. A yɛɛ okɔɔ yau Sɔɔŋ Chɔɔmaŋndoŋ mɛɛlu yɛ isɔɔ?

¹¹ Yiyaŋndɔ mɛɛ wanaa laalaŋaa Chɛhowaa sinaŋ niŋ yɛ, te a sɔla pɛ pioŋɔɔ mi yaamɔɔwaa Mɛlɛkaa kpou sɔla tambei. A tonya, teleŋ kɔl kɛndɔɔ pila wa niŋ koŋ ni! Mi che bɛɛ kɔl kɛndɔɔ cho wa o choo choo niŋ te Babilɔŋ Bɛndoo sɔla pɛ tambei, kɛ nyɛ cheleŋ cho vɛlɛ yɔŋnɔŋ o tosa niŋ mi wana o wana wa a kɔl kɛndɛ wo. (Sɔɔŋ. 19:​1-3) Ndu cho yɛ “nɔ kɛsiaa Saa Fɔŋndɔɔ” ni. A hei okɔɔ yau Sɔɔŋ Chɔɔmaŋndoŋ mɛɛlu isɔɔ ni.—Sɔɔŋ. 19:​6-9.

12. A mɛɛ Sɔɔŋ Chɔɔmaŋndoŋ 21:​1, 2 dimi yɛ, teleŋ kuɛɛ nɔ kɛsiaa Saa Fɔŋndɔɔ cho yɛ tosaŋ?

¹² A teleŋ kuɛɛ nɔ kɛsiaa hoo cho yɛ tosaŋ? Ŋwaŋ 144,000 kpou cho wa choo choo tuupa mi chɔu Amakɛdɔŋndo kanduŋ. Kɛ o cho teleŋ koŋ te nɔ kɛsiaa Saa Fɔŋndɔɔ cho tosaŋ te. (Nuawɔ Sɔɔŋ Chɔɔmaŋndoŋ 21:​1, 2.) Nɔ kɛsiaa hoo cho tosaŋ te chɔu Amakɛdɔŋndo hiou pɛ, nduyɛ mi yaamɔɔwaa Mɛlɛkaa kpou sɔla tambei.—Sam 45:​3, 4, 13-17.

13. Yɛɛ nɔ kɛsiaa Saa Fɔŋndɔɔ sim yɛ le wanaa cho challe o nɔɔ niŋnda?

¹³ Yɛɛ nɔ kɛsiaa Saa Fɔŋndɔɔ sim yɛ le wanaa cho challe o nɔɔ niŋnda? Hau, mi poo a chuaa chal o nɔɔ niŋ, le ma wa diompilɛ. O nɛi pilɛ koŋ choo, nɔ kɛsiaa Saa Fɔŋndɔɔ cho Masaa Chiisu Kiliti nda ŋwaŋ 144,000, nda cho yɛ ‘laa ndɔ’ ni, dɔwɔɔ diompilɛ. Nyɛ sɔvɛ yɔŋnuŋ niŋ koŋ ndo tosa niŋ ni mi masale Mɛlɛkaleŋ le kanduŋ o chieeŋndo choo le wɔsilaŋ waa pilɛ.—Sɔɔŋ. 20:​6.

14-15. A yɛɛ Sɔɔŋ Chɔɔmaŋndoŋ bolle 21 tuu yɛ ŋwaŋ 144,000? (Tofa fotueiyo o kɔɔ.)

¹⁴ Okoŋ kɔɔli, mi Sɔɔŋ Chɔɔmaŋndoŋ bolle 21 tuu ŋwaŋ 144,000 a chiee diandaa, diolaŋ “Chulusalɛm Sɛnɛiyo.” (Sɔɔŋ. 21:​2, 9) Chiyii kpaki chioo hoo ndii nɔ poutaŋ 12. Nduyɛ, “diola kiilaa 12 Saa Fɔŋndɔɔ la wa la poonyiaa o pouta 12 nda laŋ choo.” Le yɛɛ Chɔŋ ndoo nɔ yɛ yeemɛi tau o hei niŋ? Kanifuule, mbo cha diola ndɔlaŋ o pouta laŋ opilɛ choo. Nuawɔ se dikeŋnaŋ sɔvɛ bɛndu!—Sɔɔŋ. 21:​10-14; Ɛfi. 2:​20.

¹⁵ Chiee diandaa hoo velaŋ a chiee cheleŋ te. Nɛi bɛndu keeku o chioo hoo niŋndo, a  kooliŋ kɛndɛ kɛndɔŋ nda toosiaa ndu ni. Pouta baa kalalaŋ, la wa o diola luɛiyaala 12 nda chioo hoo. A pouta baa kala kalalaŋ nda chɔu chiyii chioo hoo vɛlɛ a kpaki ndɔɔ ni. Nduyɛ, o wa o tuwaa kpeŋkpeŋ. (Sɔɔŋ. 21:​15-21) Kɛ mi Chɔŋ cha vɛlɛ maa nyɛ cheleŋ wa o ve o chioo hoo niŋ te wo. Tofawɔ nyɛ o dimi wo. Mbo dimi aa: “I chi chiɛi Mɛlɛkaa o chioo hoo niŋ te, kanifuule Chɛhowa, Mɛlɛka Kpaaya Kpou Kpou Wo, a Saa Fɔŋndɔɔ, nda cho chiɛi ndɔɔ ni. Chioo hoo heu ba a paaleŋ ɔɔ a paŋgei le nyɛ wawoŋ te, kanifuule biilu Mɛlɛkaa tosa ni mi nyɛ wawoŋndo wa, nduyɛ Saa Fɔŋndɔɔ cho lambui ndɔɔ ni.” (Sɔɔŋ. 21:​22, 23) Wanaa cho wa o chiee diandaa hoo niŋnda cho wa a Chɛhowa latulu. (Sɔɔŋ. 22:​3, 4) Chiisu cho niŋ wa masa wanaa soliaa lasalaa o choo choo niŋ, nduyɛ ndu cho nda lasisi lachi ni le Chɛhowa piɛiyo. (Hibu. 7:​27) Le hei, Chɛhowa nda Chiisu sim lewundu le chiɛiyo hoo ni.

16. A teleŋ Chiisu cho wa o Masaleŋ choo le Wɔsilaŋ Waa Pilɛ Wo, salala kuɛɛ wanaa cho wa o chieeŋndo choo wa tuɛi yɛ niŋ yeela?

¹⁶ I cho bɔɔ suɛi sɔvɛ le mi Kilisiɔŋaa pɔyaŋnda wa yiyaŋndo a chioo hoo okɔɔ. Kɛ wanaa nɔ tiindaŋndo le waa o chieeŋndo choo wa bɛɛ, nɔ ma nɔ yeemɛi o chioo hoo niŋ. A teleŋ Chiisu cho wa o Masaleŋ choo le Wɔsilaŋ Waa Pilɛ Wo, Chulusalɛm Sɛnɛiyo cho hunɔɔ a salalaŋ tau le waŋnda chieeya. Mi Chɔŋ cha salalaŋ ndaŋ tolɔɔ naŋ chaa “pee mɛŋma yɔŋgu yoomoo waŋ” ni. “Yɔmii yɔŋgu yoomoo ve wa o pioo hoo kɔŋgɔlaŋ vellaa velle. . . . Nduyɛ pei yɔmnde hei wa le waŋnda o chieeŋndo niŋ kpou siŋgioo.” (Sɔɔŋ. 22:​1, 2) Wanaa cho wa o chieeŋndo choo a teleŋ koŋ nda, cho salalaŋ ndaŋ tueiyɔɔ yeela. Nduyɛ o pɔmpɔmbɔ, a cho simnɔŋ walaŋ. A teleŋ koŋ, naa ve lɛ niŋ te, nyɛ nɛiyaa ve lɛ niŋ te, nduyɛ kɔl tambɛi ve lɛ niŋ te.—Sɔɔŋ. 21:​3-5.

17. A mɛɛ Sɔɔŋ Chɔɔmaŋndoŋ bolle 20:11-13 dimi yɛ, nɛɛ waa sɔla yɛ niŋ tɔnɔɔ a teleŋ Chiisu cho wa o masaleŋ choo le Wɔsilaŋ Waa Pilɛ Wo?

¹⁷ Nɛɛ waa cho yɛ salalaŋ ndaŋ tueiyɔɔ yeela? Wanaa tasiaa cho tuiyɔɔ salalaŋ ndaŋ yeela wa cho faŋga bɛndu cho pioŋɔɔ sɔla a teleŋ chɔu Amakɛdɔŋndo wo ni, vɛlɛ a chuauwaa nda vialu niŋ o chieeŋ sɛnɛiyo niŋnda. Kɛ Sɔɔŋ Chɔɔmaŋndoŋ bolle 20 dimi vɛlɛ maa, waŋvilɛiya cho miiŋgu yoomu. (Nuawɔ Sɔɔŋ Chɔɔmaŋndoŋ 20:​11-13.) “Wanaa sandu” kɛ ma wu o laalaŋ ndaa choo wa, cho miiŋgu yoomu. Nduyɛ “wanaa sendu le wa,” nda cho  yɛ wanaa sɔla fondaŋ le ma pɛɛku a Chɛhowa okɔɔ, okoŋ ma piɛi ndu le wa bɛɛ cho miiŋgu yoomu. (Walta. 24:​15; Chɔŋ 5:​28, 29) Baa hei sim ni maa wana o wana cho miiŋgu yoomu a teleŋ Chiisu cho wa o Masaleŋ choo le Wɔsilaŋ Waa Pilɛ Wo? Sako! Wanaa tuei a Chɛhowa okɔɔ kɛ ma tosa nilakalulaŋ ma kɛɛ le ndu piɛiyo wa, miiŋgu niŋ yoomu le. Ndaa nɔ teleŋndo le ma piɛi Chɛhowa kɛ ma kɛɛ. Mi hei chɔm kpendekele maa, a yeema ma wa o Kpele Hɛnɛkiɔɔ niŋ te.—Maa. 25:​46; 2 Tɛsa. 1:​9; Sɔɔŋ. 17:​8; 20:​15.

18. Te wɔsila waa pilɛ laŋ la chuu pɛ, vɛɛ wanaa cho wa o chieeŋndo choo wa cho yɛ wa?

¹⁸ Te wɔsila waa pilɛ laŋ la chuu pɛ, wanaa cho wa o chieeŋndo choo wa kpou cho simnɔŋ walaŋ. A teleŋ koŋ, wana o wana nɔ lɛ niŋ haki Adam tɛɛŋguu naa wo le. (Luomaŋ. 5:​12) Nyɛ o nyɛ haki Adam ndo cho hau tosaa, cho faŋaŋ lefafɛɛŋ. Hei sim ni maa wanaa cho wa o chieeŋndo choo a teleŋ koŋ nda cho wa yoomu lefafɛɛŋ kanifuule, a cho wa walaŋ.—Sɔɔŋ. 20:​5.

19. Le yɛɛ tofa mɛɛlaa cho yɛ wa?

¹⁹ Ŋ sina maa mi Setana tɔɔndaŋ Chiisu le ndu faŋaa o laalaŋ ndɔɔ choo. Kɛ o tiu ndu ba le. Mi Chiisu lo o laalaŋ ndɔɔ choo. Baa wanaa walaŋaa cho wa o chieeŋndo choo wa tosa niŋ nyɛ pilɛ koŋ te Setana huŋ sɔla pɛ fondaa le nda tofaa? Wana o wana nɔ mbo tosa kɛɛsiaa a ba ndɔ a teleŋ koŋ. Kanifuule te wɔsila waa pilɛ laŋ la chuu pɛ, a cho Setana soli o sooŋ yiŋgilɛi nɔ lamɛɛlu le wo niŋ. (Sɔɔŋ. 20:​7) Wanaa cho lo o laalaŋ ndaa choo a teleŋ tofa mɛɛlaa hoo wa, cho yoomu fafɛɛŋndo sɔla nduyɛ ma tuei hɛnɛkɛyɛi kpeekpeiye yeela. (Luomaŋ. 8:​21) Wanaa cho Chɛhowa kiɔɔ diikɔŋndo wa, cho tambii fafɛɛŋnde sɔla a Setana nda nyinaa nduaa wɔɔŋnda latulu.—Sɔɔŋ. 20:​8-10.

20. Vɛɛ kɔllo cho yɛ num le sɔɔŋ naŋ yaasiaa muŋ o yau Sɔɔŋ Chɔɔmaŋndoŋ niŋndo sinaa?

²⁰ Vɛɛ kɔllo cho yɛ num le sɔɔŋ naŋ yaasiaa muŋ o yau Sɔɔŋ Chɔɔmaŋndoŋ niŋndo sinaa? Baa a cho a kɔl kɛndɛ le chɔŋnɔŋndo o huuloŋ muŋ niŋ te? Baa hei nyindu num le ma chɔɔlu yeemɛi nɔ le acheleŋnda malaa ma sɔɔŋguu naa choo o piɛile tonyaleŋ niŋ te? (Sɔɔŋ. 22:​17) Ŋ cho a kɔl kɛndɛ tau le sɔɔŋ cho muŋ yɔŋnɔŋ o chilaŋ niŋndoŋ sinaa! Le hei, naa bɛɛ tiuba miŋ dimi diomnda kiilanɔɔ Chɔŋ dimilaŋ. Mbo dimi aa: “Amiina! Huŋ, Masanɔɔ Chiisu.”—Sɔɔŋ. 22:​20.