Te hei wa tonya pɛ, yiyaŋndɔ a mɛɛ ndii piiliaŋ niŋ yoomu naa yɛ. Le taamaseliiyo, mi poombɔ puaapilɛnɔ pilɛ diinuŋ ndupila. Mi kɔllo tambu finya ndɔ tau. Mbo yiyaŋ te Chɛhowa che o chilaŋ niŋ ni nduyɛ mbo kɛɛsiaa maa ndu nda laa ndɔ nɔla ma biunuŋ kpundɔɔ hoo. O chieeŋndo hoo niŋ, kpundɛla bɔɔbɔɔ cho naa komal. Lelaŋ, ŋ nɔ pa miŋ laalaŋ maa nyɛ o nyɛ yɔŋnuŋ o yoomu naa niŋ Chɛhowa nɔ ndu kpaayaa choo?

Te ŋ wa pɛ Kɔliŋtiaŋ Tasoo 10:13 yaasiaa, ŋ cho chɔ maa Baabuiyo chɛl yiyaŋ koŋ te, maa teleŋndo lo landaŋ mi Chɛhowa sina nyɛ naŋ nɔla miŋ biunuŋ ndo, okoŋ, mbo kɛɛsiaa tɔɔndaŋnda suula cho naa komal taŋ te. Le yɛɛ naŋ dimi yɛ lende? Ŋ yaasiaŋndɔ sabulaŋ la hiɔɔlu.

O tasoo, Chɛhowa ke naa hɛnɛkɛyɛi, koŋ cho ni hɛnɛkɛyɛi le chuaŋ chuaa tosaa. O yeema naa miŋ tosa kɛɛsiaa a ba naa. (Ditɔnɔmii 30:19, 20; Chɔɔsuaa 24:15) Te ŋ hɛli pɛ le kɛɛsiaala nɛŋi Chɛhowa kɔllo laŋ tosaa, ŋ nɔla miŋ tiindaŋ ndu le naa nɛi chɔmaa kioo. (Pulɔwaa 16:9) Kɛ te ŋ tosa pɛ kɛɛsiaala wɔɔŋndaŋ, ŋ nɔ miŋ biunuŋ fulamakɔɔlioo. (Kaleesiaŋnda 6:7) Lelaŋ, te o wa pɛ maa Chɛhowa hɛli tɔɔndaŋnda komal naalaŋ ni, mɛɛ hɛnɛkɛyɛi pa naŋ nɔ keŋ kpeekpei ni?

O diiŋ ndɔɔ, Chɛhowa manda naa le te sɔɔŋ naŋ ve kɔl te woŋ yɔŋnuŋ naa pɛ. (Ikilisiaatii 9:12) Mi dɛnɛpalaa komal waŋndo kanifuule, o wa o fondaŋ wɔɔŋndo a teleŋ wɔɔŋndo. Mi Chiisu suaa a dɛnɛpalaa opum okɔɔ. Mbo dimi maa mi waŋnda 18 wu mɛɛ chiɛi choo choo del nda choo. Mbo chɔm ndi kpendekele maa o cho Mɛlɛka le tosa mi wanaa kaŋ wu le. (Luku 13:1-5) I cho suɛi kɔl kalu le yiyaŋndo maa tuupa mi dɛnɛpalaa yɔŋnuŋ, Mɛlɛka kɛɛsiaa fɛŋ wana cho kinda wo ɔɔ wana cho wu wo le.

Ŋgaa ndɔɔ, naa kpou nɔ dioo le miŋ chɔm pimbi naa simiaa o Chɛhowa lo. Setana dimi maa buɛiyaa Chɛhowaa cho Chɛhowa piɛiyo le nyɛmkiɔɔŋ. Mi Setana dimi maa te tɔɔndaŋndaŋ la komal naa pɛ, ŋ nɔla miŋ chɔm lo lechoo wo o Chɛhowa lo le. (Choobu 1:9-11; 2:4; Sɔɔŋ Chɔɔmaŋndoŋ 12:10) Te Chɛhowa manda naa pɛ o tɔɔndaŋndaŋ lapum bɛŋgu, miŋ kuɛ le ndi chɔɔ maa Setana nɔ di.

Hiɔɔloo, Chɛhowa hɛli le sinaa nyɛ o nyɛ nɔ le naa yɔŋnɔŋndo o chilaŋ niŋndo le. Tonya, Chɛhowa nɔla mbo sina nyɛ nɔ le yɔŋnɔŋndo o chilaŋ niŋndo te o yeema pɛ. (Aisaya 46:10) Kɛ Baabuiyo chɔm maa o hɛli le sinaa nyɛ o nyɛ fee nɔ le yɔŋnɔŋndo o chilaŋ niŋndo le. (Chɛnɛsee 18:20, 21; 22:12) Chɛhowa cho wana kaalaa nduyɛ o cho sakpo. Lelaŋ, o luei o hɛnɛkɛyɛi naŋ nɔ le kɛɛsiaalaŋ tosaa a ba naa wo niŋ te.—Ditɔnɔmii 32:4; Kɔliŋtiaŋ Diiŋ Ndɔɔ 3:17.

Yɛɛ Pɔɔl ndoo yiyaŋ yɛ niko mɛɛ o dimi maa Chɛhowa “chɛl mi tɔɔndaŋ nya nɔ kpaaya le hiouwɔɔ le wo o komal nya le”? O bolle Baabuileŋ ndeŋ niŋ, Pɔɔl wa tɛɛsiaa nyɛ Chɛhowa tosa o teleŋ naŋ wa o tɔɔndaŋndaŋ bɛŋgu wo, o cho tuupa mi la yɔŋnuŋ te. * (Tofa tɛɛsiaa amatou.) Te ŋ dɔu pɛ tiindaŋndo o Chɛhowa niŋ, o cho naa mala o tɔɔndaŋ kɛ kɛ bɛŋgu o yoomu naa niŋ. (Sam 55:22) Ŋ cho niko yaasiaa sabulaŋ la tiɔɔŋ le nyɛ Pɔɔl dimi lende wo.

Sabu tasoo cho ni maa tɔɔndaŋnda keeku naa choo laŋ la “komal niŋ waŋnda.” Te ŋ cho wɔ pɛ o chieeŋ Setanaa niŋ, naa kpou nyɛkindilaa cho naa komal, lepum pɛŋ kpundɔɔ. Kɛ te ŋ dɔu pɛ tiindaŋndo o Chɛhowa niŋ, ŋ nɔla miŋ biunuŋ  tɔɔndaŋndaŋ nduyɛ miŋ chɔm lo lechoo wo. (Pitɛ Tasoo 5:8, 9) O Kɔliŋtiaŋ Tasoo bolle 10 kandɔŋndo, mi Pɔɔl poonyiaa a tɔɔndaŋndaŋ lapum okɔɔ la komal Isɔluɛiya o lɛŋnde saafo leŋ niŋndaŋ. (Kɔliŋtiaŋ Tasoo 10:6-11) Mi wanaa ndaa dɔu tiindaŋndo o Chɛhowa niŋnda nɔla tɔɔndaŋnda laŋ biuwɔŋ. Kɛ mi Isɔluɛiya apum kɛɛ Chɛhowa diikɔŋndo. A chɔm lo lechoo ndaa le kanifuule, ndaa tiindaŋ Chɛhowa le.

Sabu diiŋ ndɔɔ cho ni maa “buŋgɛi Mɛlɛka chua le tosaa ve tosaa o tosa ndi ni.” Yɛɛnɛ hoo sim yɛ? Te ŋ tofa pɛ mɛɛ Chɛhowa manda niŋ buɛiyaa nduaa paandu yɛ, miŋ che maa mbo mala wanaa kaala ndu nduyɛ ma bii sawala ndɔlaŋ nda. (Ditɔnɔmii 7:9) Ŋ cho pɛɛku maa lɔɔlɔɔ mi Chɛhowa lo o lediom. (Chɔɔsuaa 23:14) Ŋ cho nɔ tiindaŋndo maa (1) Chɛhowa chɛl mi tɔɔndaŋ kala kala naŋ nɔla biuwɔŋ te wo komal naa le, nduyɛ (2) o nɔla mbo ‘chɔm nɛi naŋ looku miŋ hɛluŋ leniŋ ndo.’

Vɛɛ Chɛhowa ‘chɔm yɛ nɛi naŋ looku miŋ hɛluŋ leniŋ ndo’ le wanaa dɔu tiindaŋndo o ndu niŋnda? Ŋ sina maa o feŋa naa tɔɔndaŋndo choo le. Kɛ loonuŋ, mi Pɔɔl dimi maa Chɛhowa nɔla mbo “chɔm nɛi nya looku mi la hɛluŋ leniŋ ndo. Ndu yɔnuŋ ni maa kpaayaa nya lueiyo mi la sim a dialluŋ kala.” Lelaŋ, lɔɔlɔɔ mi Chɛhowa chɔm naa nɛiyo a mɛɛ o ke naa kpaayaa le miŋ chɔm lo lechoo wo yɛ. Ŋ yaasiaŋndɔ nɛila o tosa hei laŋ lapum.

• Chɛhowa “nyɔɔlu naa kɔltaŋ niŋ o dɛnɛ o dɛnɛ palaa niŋ ni.” (Kɔliŋtiaŋ Diiŋ Ndɔɔ 1:3, 4) Mbo dɛɛniaa naa kɔltaŋ a yiyaŋndaŋ a Baabuiyo, nyina diandaa, vɛlɛ a buɛi cho sakpo wo.—Maatiu 24:45; Chɔŋ 14:16; Luomaŋnda 15:4.

• Chɛhowa soliŋ nyina ndɔ diandaa kpeku le naa nɛiyo chɔmndo. (Chɔŋ 14:26) Nyina diandaa mala naa miŋ loonuŋ bundɛi Baabuiye vɛlɛ a sawala mandaalaŋ le halikpeŋ miŋ tosa kɛɛsiaala kɛndɛlaŋ.

• Chɛhowa soliŋ maalikɛiyaa nduaa kpeku le naa malaa.—Hibuluiya 1:14.

• Chɛhowa soliŋ puaapiliaa a ndepiliaa naa kpeku le naa malaa. Ma luei naa yoomuaŋ a nyɛ nda dimi wo vɛlɛ a nyɛ nda tosa wo.—Kolosiaŋnda 4:11.

Lelaŋ, yɛɛ naŋ pɛɛku yɛ o nyɛ Pɔɔl dimi o Kɔliŋtiaŋ Tasoo 10:13 niŋndo? Chɛhowa hɛli tɔɔndaŋnda suula cho naa komal taŋ te. Kɛ ŋ laalaŋ maa te ŋ tiindaŋ pɛ Chɛhowa, ŋ nɔla miŋ biunuŋ tɔɔndaŋ kɛ kɛ. Ŋ sina maa Chɛhowa cho lɔɔlɔɔ naa nɛiyo chɔm le halikpeŋ miŋ chɔm lo lechoo wo o ndulo.