1, 2. (a) Vɛɛ Seiyaa Chɛhowaa cho yɛ teŋgeŋ a piɛiyii cheleŋnde? (b) Yɛɛ naŋ cho yɛ pɛɛku o buŋgɛi hei niŋ a i cho lachi ve?

TELEŊNDA bɔɔbɔɔ mi waŋnda nyuna Seiyaa Chɛhowaa aa, “Nɛɛ cho yɛ wana nya banaa?” Mi kɔndɔfillo bii nda a hei okɔɔ kanifuule, kaaŋii bɔɔbɔɔ wana pɔnɔɔ ɔɔ wana lanɔɔ cho wana nda banaa ni. Lelaŋ, ŋ cho a nyaale le dimioo maa Wana naa Banaa cho wanachiee le. Kɛ, Masanɔ naa cho Chiisu Kiliti ni! Nduyɛ o cho Chɛhowa Finya ndɔ, Wana cho ndu Bolleŋndo diikɔŋndo.—Maatiu 23:10.

² Ŋ nɔ vɛlɛ kunda puaa nda veelu aa, “buɛi cho sakpo, nduyɛ, mbo wa buɛi kɔl kalu wo.” Nda cho hau chilaŋ chua wanaa Mɛlɛkaa tɛɛŋ o lɛŋndeŋ choo ni. (Maatiu 24:45) Kɛ vɛɛ naŋ looku yɛ sina maa Chɛhowa kɛsɛ cho naa nɛiyo chɔmndo o sabu Po ndɔɔ niŋ ni? Ŋ cho sabulaŋ chɔ la yaa a hei okɔɔ. Mi che bɛɛ Chɛhowa cho niŋ waŋnda apum soliŋndo kpeku le wanaa nduaa nɛi chɔmaa kioo, ŋ cho sina walaŋ maa Chɛhowa wa sindɛ wanaa nduaa nɛiyo chɔmndo ni, nduyɛ ndu cho wɔ nɛiyo chɔmndo ni.—Aisaya 58:11.

3. Yɛɛ ke yɛ Muuse kpaayaa le Isɔluɛiya nɛiyo chɔmndo?

³ Mi nyina diandaa ke tofa lehɔlaa Mɛlɛkaa kpaayaa. Mi  Mɛlɛka hɛli Muuse le mbo wa simlachinɔɔ le Isɔluɛiya. Yɛɛ mala yɛ ndu mbo nɔla wali sɔviɔɔ hoo tosa? Mi Chɛhowa ke Muuse “Nyina ndɔɔ.” (Nuawɔ Aisaya 63:11-14.) Lelaŋ, Chɛhowa kpeekpei wa wanaa nduaa nɛiyo chɔmndo ni kanifuule, nyina ndɔɔ wa Muuse malaa ni.

4. Yɛɛ chɔm yɛ maa Muuse ndoo nɔ nyina Mɛlɛkaa? (Tofa fotueiyo o peele naŋ kandu leŋ choo.)

⁴ Waŋnda ndaa che pa maa nyina Mɛlɛkaa wa Muuse choo? Ei! Mi nyina diandaa Chɛhowaa ke Muuse kpaayaa le kaamaalaŋ tosaa nduyɛ mbo chɔm diola Mɛlɛkalaŋ o masa kpaaya bɛndoo lo le Ichipi, Felo. (Ɛsɔdɔɔ 7:1-3) Mi nyina diandaa mala vɛlɛ Muuse le mbo nɔ biuwɔŋndo a kaalaa. O wa bɔɔ teŋgeŋ a masaa wa ŋuasu ŋuasu nduyɛ ma nɔ kaayei o lɛŋii cheleŋnde niŋnda! (Ɛsɔdɔɔ 5:2, 6-9) A tonya, Chɛhowa hɛli Muuse ni le mbo wa simlachinɔɔ le wanaa Nduaa.

5. Nɛɛnɛ cheleŋ Chɛhowa ke yɛ nyina ndɔ diandaa le wanaa nduaa nɛiyo chɔmndo?

⁵ Nɛɛnɛ cheleŋ Chɛhowa ke yɛ nyina ndɔ diandaa le waa wanaa nduaa nɛiyo chɔmndo? Baabuiyo dimi aa, “Mi Chɛhowa ke Chɔɔsuaa, po Nɔŋ ndo nyina ndɔɔ, nduyɛ mbo sɔla taasioo tau.” (Ditɔnɔmii 34:9, NW) “Mi nyina Mɛlɛka Yaawɛɛ wo o tual Kidiɔŋ” choo. (Chɔɔchiaa 6:34) Nduyɛ mi “nyina Mɛlɛka Yaawɛɛ wo o tual Deeve kɔɔli [“choo,” NW] a kpaaya bɛndoo.” (Saamiɛɛ Tasoo 16:13) Mi puaa haa kpou tiindaŋ nyina Mɛlɛkaa le nda malaa ma tosa sɔɔŋ ndapila ndaa nɔla ma tosa a kpaaya ndaa le woŋ. (Chɔɔsuaa 11:16, 17; Chɔɔchiaa 7:7, 22; Saamiɛɛ Tasoo 17:37, 50) A tonya, Chɛhowa ndoo ke nda kpaayaa le sɔɔŋ tɔɔmaŋ tosaa ni. Lelaŋ, ndu kinɛi nɔ ni mbo sɔla lisaa.

6. Le yɛɛ Mɛlɛka ndoo yeema yɛ mi wanaa nduaa ndaa ke simlachiaa o Isɔluɛi niŋ bɛɛleŋ?

⁶ Yɛɛ Isɔluɛiya ndaa nɔ yɛ ma tosa mɛɛ nda sina maa nyina diandaa Mɛlɛka ke Muuse, Chɔɔsuaa, Kidiɔŋ, a Deeve kpaayaa? Ndaa nɔ ma ke nda bɛɛleŋ. Mɛɛ waŋnda ŋɔɔchiaŋ a Muuse, tofawɔ nyɛ Chɛhowa nyuna nda wo, “Vɛ mi waŋnda haa a wa wɔ hiouwɔɔ lachi kɛ a ya Mɛlɛka kiɔɔ?” (Nɔmbaa 14:2, 11) A tonya, Chɛhowa hɛli puaa kaŋ ni le waa wanaa nduaa nɛiyo chɔmndo. Mɛɛ waŋnda diikuŋ nda, Chɛhowa kpeekpei nda wa tolɔɔ kɔɔli ni, maa ndu wa Masa ndaa ni.

7. Vɛɛ maalikɛiya mala yɛ Muuse?

⁷ Mi maalikɛiya mala tofa lehɔlaa Mɛlɛkaa. (Nuawɔ Hibuluiya 1:14.) Mi Mɛlɛka soliŋ maalikɛiya kpeku le Muuse nɛi chɔmaa kioo. O tasoo, mi maalikɛinɔɔ fula ndu o hɔl o “bɔɔ pɔmbɔ wa sandeiyo niŋ.” (Walta Wanaa Chiisuaa 7:35) O diiŋ ndɔɔ, mi Mɛlɛka soliŋ maalikɛinɔɔ kpeku le Muuse Sawalaŋ kioo le Isɔluɛiya pɛɛkoo. (Kaleesiaŋnda 3:19) Ŋgaa ndɔɔ, mi Chɛhowa dimul ndu aa, “Kɔ a waŋnda o fondaŋ ya I dimul nya a ndu okɔɔ wo. Kiilanɔ nuu cho nya isisi lachi mbo kuɛ a nya.” (Ɛsɔdɔɔ 32:34) Baabuiyo dimi naa maa mi Isɔluɛiya cha maalikɛinɔɔ sɔɔŋ muŋ tosaa le. Kɛ, mɛɛ Muuse wa waŋnda nɛi chɔmaa kioo yɛ chɔm kɛsɛ ni maa maalikɛiya wa ndu malaa ni.

8. Vɛɛ maalikɛiya mala yɛ Chɔɔsuaa nda Hɛsɛkiya?

 ⁸ Nɛɛ cheleŋ maalikɛiya mala yɛ? Baabuiyo dimi maa mi wana cho “sovɛiyaa Mɛlɛka Yaawɛɛ wa bolleŋ” ndo, ndu yɔŋnuŋ ni maa maalikɛinɔɔ, mala Chɔɔsuaa le Kenanaitiiya yomɔɔ o chɔuwo. (Chɔɔsuaa 5:13-15; 6:2, 21) Okoŋ kɔɔli, mɛɛ Masaa Hɛsɛkiya wa kɔlaŋ a wanaa Mɛlɛkaa, mi wanaa chɔuwaa Asiiliaŋnda sɛlɛ bɛndoo kɔŋgɔlaŋ le Chulusɛlɛm tɛɛmboo. O nyumndaŋ ma pilɛ niŋ kpe, ‘mi kiilanɔ Mɛlɛka Yaawɛɛ wo o kua o dɔɔŋgɔ sovɛiya Asiiliaa, mbo kɔ diu sovɛiya waalaŋ kɛmɛ a bele-ŋɔmaa a la ŋuɛɛnu (185,000) nda tɛɛŋ.’—Masaa Bɛnduaa Diiŋ Nduaa 19:35.

9. Mi che bɛɛ wanaa lahakiaa tofa lehɔlaa Mɛlɛkaa wa ni, kɛ yɛɛ Isɔluɛiya ndaa nɔ yɛ ma tosa?

⁹ Maalikɛiya nɔ haki le. Kɛ wanaa nda wa malaa wa ndaa nɔ hakilaŋ. Le taamaseliiyo, teleŋ pilɛ, Muuse ke Chɛhowa lebɛɛ le. (Nɔmbaa 20:12) Mɛɛ waŋnda Kibiɔŋ ndaa yeema le chɛlaŋ kɔl nyuloo tosaa a ndu, o nyuna Mɛlɛka le. (Chɔɔsuaa 9:14, 15) Teleŋ pilɛ, mi Hɛsɛkiya heeluŋ. (Koloniko Diiŋ Ndɔɔ 32:25, 26) Mi che bɛɛ wanaa lahakiaa puaa haa wa ni, kɛ Isɔluɛiya ndaa nɔ ma tol nɛi nda chɔmaa kɔɔli. Isɔluɛiya ndaa nɔla ma che maa Chɛhowa wa maalikɛiya soliŋndo kpeku le puaa haa malaa. A tonya, Chɛhowa wa wanaa nduaa nɛiyo chɔmndo ni.

10. Vɛɛ Sawala Mɛlɛkalaŋ la chɔm yɛ Muuse nɛiyo?

¹⁰ Mi Diom Mɛlɛkaa chɔm tofa lehɔlaa Mɛlɛkaa nɛiyo. Baabuiyo veelu Sawala Isɔluɛiya ndaa nɔ laŋ maa “sawala . . . Muuse . . . laŋ.” (Masaa Bɛnduaa Tasiaa 2:3) Kɛ Baabuiyo chɔm kpendekele maa Chɛhowa ke Isɔluɛiya Sawalaŋ ni. Nduyɛ Muuse bɛɛ ndoo nɔ mbo bii laŋ. (Koloniko Diiŋ Ndɔɔ 34:14) Le taamaseliiyo, mɛɛ Chɛhowa dimul ndu le tɛndiiyo taŋgullo, “mi Muuse o tosa nyɛ o nyɛ Mɛlɛka Yaawɛɛ o dimul ndu le tosaa.”—Ɛsɔdɔɔ 40:1-16.

11, 12. (a) Yɛɛ Choosaya nda masaa wa wanaa Mɛlɛkaa choo wa ndaa nɔ yɛ ma tosa? (b) Vɛɛ Diom Mɛlɛkaa ndoo chɔm yɛ masaa waa nɛiyo?

¹¹ Mɛɛ Chɔɔsuaa simnuŋ simlachinɔɔ, ndoo nɔ Diom Mɛlɛkaa o tiŋ. Nduyɛ mi Chɛhowa dimul ndu aa, ‘Wa ndu pɛɛkoo le idii a ichɔl. Nyɛ o nyɛ cho o yau koŋ niŋ, wa ndu tosaa. Koŋ tosa ni mi dɛnɛ kɛndɔɔ wa num choo.’ (Chɔɔsuaa 1:8) Masaa wa o masaleŋ choo o ndu kɔɔli wa bɛɛ ndaa nɔ ma nua o yau Sawaa niŋ lepaa o lepaa, ma poonyiaa ndu, nduyɛ ma diikuŋ “nyɛ sawala ndɔlaŋ a pɛɛkula ndɔlaŋ la dimi le tosaa wo tosaa o nɛi sakpoo choo.”—Nuawɔ Ditɔnɔmii 17:18-20.

¹² Vɛɛ Diom Mɛlɛkaa ndoo chɔm yɛ puaa wa simlachiaa wa nɛiyo? Yiyaŋndɔ a taamasi Masaa Choosaya wo okɔɔ. Mɛɛ nda saaluŋ yau laSawa Muuse wo, mi wana poonyiaa Choosaya wo kandu ndu diomndaŋ veelullo leniŋ. * (Tofa tɛɛsiaa amatou.) “Mɛɛ Masa Bɛndoo Choosaya o tuei nyɛ dimiŋ o yau lasawa Mɛlɛkaa niŋ ndo, mbo tambu kɔl, mbo sɛɛsiaŋ nyɛlaŋ lekɔɔ a kɔl tambɛiyo.” Okoŋ, mi Diom Mɛlɛkaa nyindu Choosaya mbo tɛɛmbuu piɔmnda kpou o lɛŋnde leŋ niŋ, nduyɛ mbo kɛɛsiaa le mi dunyɛi Hiouwɔɔ Choo bɛndu bɛnduei biinuŋ. Kani bɛɛ dunyɛi waa lende ndii biinuŋ ndɔ le. (Masaa Bɛnduaa Diiŋ Nduaa 22:11; 23:1-23) Mi Choosaya a masaa cheleŋaa tol Diom Mɛlɛkaa kɔɔli wa chɛl a kɔllo wulee le ma  yɔŋyɔla nɛi chɔmaa nda wa wanaa Mɛlɛkaa kioo wo. Mi siŋgaŋnda laŋ la mala wanaa Mɛlɛkaa le Ndu diikɔŋndo.

13. Vɛɛ masaa le wanaa Mɛlɛkaa wa yɛ teŋgeŋ a masaa o lɛŋii cheleŋnde niŋ?

¹³ Taasi iwana chieeyaa kinɛi ndoo chɔm masaa wa o lɛŋii cheleŋnde niŋnda nɛiyo ni. Le taamaseliiyo, masaa wa o lɛŋnde Kenaŋndeŋ niŋnda a wanaa ndaa wa sɔɔŋ wɔɔŋ wɔɔŋndoŋ tosaa. Ŋpum cho ni, hiniei ɔɔ nɔɔ tosaa a wanayɛi kpɛɛluŋnde, poo a poo hiniei tosaa, hiniei tosaa a visiaa, chuaambuaa salaa solioo, a piɔmnda sooluuwo. (Lɛvitikɔɔ 18:6, 21-25) Nduyɛ, masaa wa Babilɔŋ a Ichipi wa ndaa nɔ sawala pilɛ a diondɔɔ okɔɔ mɛɛ wanaa Mɛlɛkaa ndaa nɔ yɛ le. (Nɔmbaa 19:13) Kɛ, mi wanaa Mɛlɛkaa cha mɛɛ masaa dɔu tiindaŋndo o Mɛlɛka niŋnda wa nda dɛɛniaa le piɛile ndaleŋ kɛsioo le diandaa yɛ, le ma wa a diandaa o dialloŋ niŋ, a kaa ihini nɔɔlɛiyo kpakpalaa. A tonya, Chɛhowa wa wanaa nduaa nɛiyo chɔmndo ni.

14. Le yɛɛ Chɛhowa ndoo sila yɛ wanaa wa masaa le wanaa nduaa wa apum?

¹⁴ O cho wanaa wa masaa le wanaa Mɛlɛkaa wa kpede le ndaa tol sawala Mɛlɛkalaŋ kɔɔli le. Mi masaa kɛɛ kaŋ tiindaŋndo dɔuwɔɔ o Mɛlɛka niŋnda kɛɛ kpoŋ nɛi chɔmaa nyina diandaa, maalikɛiya, a Diom Mɛlɛkaa. Teleŋndaŋ lapum, mi Chɛhowa ndoo sila masaa kaŋ ɔɔ mbo faŋa nda o masaleŋ choo. (Saamiɛɛ Tasoo 13:13, 14) O koŋ kɔɔli, mi Chɛhowa yulu waŋndo iso le waa masa walaŋndo.

15. (a) Vɛɛ wanaa ndaa suaa le Mɛlɛka wa chɔm yɛ maa masa walaŋndo nɔ le hunɔɔ? (b) Nɛɛ wa yɛ masa walaŋ koŋ?

¹⁵ Le wɔsilaŋ o kɛmɛlaŋ niŋ, mi Chɛhowa mɛi lediom maa o cho wana walaŋndo yulɔɔ iso le waa masaa. Le taamaseliiyo, mi Muuse dimul Isɔluɛiya aa, “Mɛlɛka Yaawɛɛ, Mɛlɛka nyaa, o cho waŋndo hɛli yuŋgula nyalaŋ o pilɛ tɛɛŋ, le mbo wa wana suaa le Mɛlɛka wo, mɛɛ ya I cho nuaa yɛ. Nduyɛ nyɛ o nyɛ wana koŋ o dimul niŋ nya, la tuei ndu diom.” (Ditɔnɔmii 18:15) Mi Aisaya dimi maa Waŋndo hoo cho wa “masaa lɛŋnde choo.” (Aisaya 55:4) Nduyɛ mi Daaniɛɛ poonyiaa a Mɛsayanɔɔ okɔɔ o cho hunɔɔ le waŋnda “piŋioo” ɔɔ mbo wa [“masaa,” NW] wo. (Daaniɛɛ 9:25) O mɛɛlulaŋ kpɔŋ, mi Chiisu chɔɔmuŋ ndupila maa ndu cho “masanɔɔ” le wanaa Mɛlɛkaa ni. (Nuawɔ Maatiu 23:8-10.) Mi buɛiyaa Chiisuaa tual ndu kɔɔli, nduyɛ ma laalaŋ maa ndu Chɛhowa hɛli ni. (Chɔŋ 6:68, 69) Yɛɛ ke yɛ nda laalaŋndo maa Chiisu Kiliti wa wana Chɛhowa ndoo nɔ le suei yulɔɔ le waa masaa wo ni?

16. Yɛɛ chɔm yɛ maa kpaaya nyina diandaa wa Chiisu choo?

¹⁶ Mi nyina diandaa ke Chiisu yoomuaŋ. Mɛɛ Chiisu sɔla yiŋɔɔ, mi Chɔŋ cha “halaa o kumbiaŋ. Nduyɛ, mi Nyina Mɛlɛkaa tual ndu choo o ikaŋgbo.” Mɛɛ keŋ i yɔŋnuŋ dɔɔ, “mi Nyina Mɛlɛkaa tosa mi Chiisu kua o pollo niŋ.” (Maki 1:10-12) Teleŋ Chiisu wa wali pollo tosaa o lɛŋndeŋ choo wo, mi nyina diandaa Mɛlɛkaa ke ndu kpaayaa le waŋnda pɛɛkoo a kaamaalaŋ tosaa. (Walta Wanaa Chiisuaa 10:38) Le handɔɔ lechoo, mi nyina diandaa mala Chiisu le suiliŋndaŋ ndaŋ chɔmndo mɛɛ kaalaa, kɔl kɛndɔɔ, a tiindaŋ kala kalaa cho naa yɛ. (Chɔŋ 15:9;  Hibuluiya 12:2) Masa kɛ kɛ cheleŋ ndoo nɔ kpaaya nyina diandaa Mɛlɛkaa maa Chiisu le. A tonya, mi Chɛhowa hɛli Chiisu le waa masaa.

17. Yɛɛ maalikɛiya tosa yɛ le Chiisu malaa?

¹⁷ Mi maalikɛiya mala Chiisu. Mɛɛ Chiisu yiŋ, o viu bɛɛ le, mi maalikɛiya huŋ naa ndu chua le ndu yoomuaŋ lueiyo. (Maatiu 4:11) Boondii o wa hunɔɔ piɔmndo sɔlaa ve, “mi kiilanɔɔ chaŋ o ɛchɛnɛ mbo huŋ naa ndu chua. Mbo luei ndu kpaayaa.” (Luku 22:43) Mi Chiisu sina maa Chɛhowa nɔla mbo yɔŋ maalikɛiya le ndu malaa teleŋ o teleŋ ndoo yeema pɛ malaa.—Maatiu 26:53.

18, 19. Vɛɛ Diom Mɛlɛkaa chɔm yɛ Chiisu nɛiyo a nyɛ o wa pɛɛkoo wo?

¹⁸ Mi Diom Mɛlɛkaa chɔm Chiisu nɛiyo. Chɔŋ a teleŋ Chiisu kandu wali ndɔ pollo wo mbo huŋ bii a piɔm ndɔɔ o yɔmndo choo, mbo chɛl le mi Diom Mɛlɛkaa chɔm ndu nɛiyo. Teleŋ o wa piɔmndo wo bɛɛ, mbo chɔm sɔɔŋ dimiŋ a Mɛsaya okɔɔ woŋ o yau Mɛlɛkaa niŋ. (Maatiu 4:4; 27:46; Luku 23:46) Kɛ, simlachiaa lepiɛiya a boondii keŋ wa bɔɔ teŋgeŋ a Chiisu. Te nyɛ nda wa waŋnda pɛɛkoo wo chɛlaŋ a nyɛ Diom Mɛlɛkaa dimi wo le, mi ndaa kɛɛ kpoŋ. Mɛɛ Chiisu wa suɛi a nda okɔɔ, mbo chɔm nda o Diom Mɛlɛkaa niŋ aa, “Waŋnda haa dimi a sondo maa a ke ya bɛɛleŋ. Kɛ nduyɛ, a hɛnaŋ ma tosa nyɛ ya I dimul nda le tosaa wo le. O bɛnda bɛɛ ma pɛŋgi a ya piɛiyo. Kani fuule, sawala nda pila toosiaa laŋ, laŋ nda pɛɛku waŋnda ni, ma dimi maa sawala nilaŋ ni.” (Maatiu 15:7-9) Kposoŋ bɛɛ Chɛhowa ndoo nɔla mbo hɛli puaa ndaa kɛɛ Diom ndɔɔ tolɔɔ kɔɔli wa le wanaa nduaa nɛiyo chɔmndo le.

¹⁹ Mi Chiisu soliŋ vɛlɛ Diom Mɛlɛkaa kpeku mɛɛ o wa waŋnda pɛɛkoo. Mɛɛ simlachiaa lepiɛiya simul ndu, o soliŋ taasi  ndɔɔ ɔɔ nyɛ yɔŋnuŋ ndu o yoomoo niŋndo kpeku le nda mulullo le. Kɛ, Diom Mɛlɛkaa ndoo soliŋ kpeku ni le waŋnda pɛɛkoo. (Maatiu 22:33-40) Nduyɛ, Chiisu ndoo nɔla mbo yusa waŋnda kɔltaŋ a nda bundɔŋ dimullo a la waa choo choo, ɔɔ mɛɛ choo choo a chieeŋndo looku toosiaŋ yɛ. Kɛ o tosa lende le kanifuule, ndoo kaala Diom Mɛlɛkaa. Yeemɛi wa ndu le acheleŋnda ndu pɛɛkoo, nduyɛ mbo “tosa ma sina nyɛ suɛi Mɛlɛkɛi dimi wo pɛŋgu.”—Luku 24:32, 45.

20. (a) Vɛɛ Chiisu ndoo ke yɛ Chɛhowa bɛɛleŋ? (b) Teŋgeŋ yɛɛ wa yɛ kaa Chiisu wo tɛɛŋ a kaa Hɛlɔɔ Akilipa Tasoo?

²⁰ Mi che bɛɛ mi kɔndɔfillo ndoo bii wanaa ndaa yaŋ Chiisu nilaŋ nda a mɛɛ ndoo suaa yɛ, kɛ lɔɔlɔɔ wana ndɔ Pɛɛkaa, Chɛhowa, ndoo ke tɔɔ ni. (Luku 4:22) Mɛɛ po sulaa pilɛ kindiŋ le Chiisu lisaa mbo veelu ndu aa, “Tichɛinɔ Kɛndɔɔ,” mi Chiisu tuisiŋ mbo dimi aa, “Le yɛɛnɛ ŋ veelu yɛ ya aa, tichɛinɔ kɛndɔɔ? Wana o wana cho o kɛndɛ le mɛɛ Mɛlɛka ndu pilɛ kpe.” (Maki 10:17, 18) Kɛ, mɛɛ wɔsilaŋ la hiou la ŋɔmaa o koŋ kɔɔli, mi Hɛlɔɔ Akilipa Tasoo simnuŋ simlachinɔɔ le Chudiaa. Kɛ kaa ndɔɔ ndu waŋnuŋ bɔɔ teŋgeŋ a kaa Chiisoo! Paale pilɛ, o bɔŋaŋ teŋgeŋ pilɛ choo, mi Hɛlɔɔ doviŋ o nyɛla lemasa baa kala kɛndɛ kɛndɛlaŋ niŋ. Mɛɛ waŋnda che ndu nduyɛ ma tuɛi ndu suɛi, ma deŋi choo choo kpeleŋ aa, “Mɛlɛka cho hoo suɛi ni, o cho wana chiee le.” Hɛlɔɔ ndoo kaala bɔɔ le mi waŋnda saŋgala ndu. Kɛ yɛɛ ndoo yɔŋnuŋ yɛ? “Mi dondopolla dia ndu. Mbo wu. Kani fondole, le chɛlɔɔ o chɛl ma veelu ndu aa, Mɛlɛka, o kuuna nda le wo.” (Walta Wanaa Chiisuaa 12:21-23) A tonya, Chɛhowa ndoo hɛli Hɛlɔɔ le waa masaa le. Kɛ, mi Chiisu chɔm maa Chɛhowa ndoo hɛli ndu ni. Nduyɛ, teleŋ o teleŋ o wa Chɛhowa bɛɛleŋ kioo maa ndu cho Simlachi Kpou Kpou Wo le wanaa Nduaa ni.

21. Yɛɛ naŋ cho yɛ yaasiaa o buŋgɛi cho lachi ve niŋ?

²¹ O cho le wɔsi pilɛ le Chɛhowa ndoo yeema mi Chiisu wa Masa le. Mɛɛ Chiisu sɔla fulasɛiniŋndo, mbo dimul buɛiyaa nduaa aa, “Mɛlɛka ke ya kpaayaa nyɛ o nyɛ choo, choo choo ni, a o chieeŋndo choo.” Mbo chɔɔlu dimi aa, “La kɛsiŋ o kɔl maa I cho wa latulu a nya haaa mbo lo o koŋ mi chieeŋndo hoo fuuluu o mɛɛlulaŋ.” (Maatiu 28:18-20) Chiisu choŋnuŋ o choo choo niŋ wana chi ndu le. Vɛɛ o cho yɛ wanaa Mɛlɛkaa nɛiyo chɔm o chieeŋndo choo naŋ? Nɛɛnɛ Chɛhowa cho yɛ soliŋ kpeku maa tofa lehɔlaa Chiisuaa o chieeŋndo choo? Nduyɛ vɛɛ wanaa Mɛlɛkaa nɔla yɛ ma sina tofa lehɔlaa Mɛlɛkaa haa? Buŋgɛi cho lachi ve cho nyunalaŋ ndaŋ muli.