1, 2. Mɛɛ Chiisu kuɛ o choo choo niŋ, a yɛɛ okɔɔ kiilaa nduaa wa yɛ kiisaŋndo?

BUƐIYAA Chiisuaa wa isisi o Pembii Ɔlifiive choo, ma cha mi masanɔ ndaa a chaaŋ nda Chiisu, chɔnɔŋndo o hueiye niŋ mbo wa helɔɔ choo choo haaa mi yumbu yumboo kumbu ndu. (Walta Wanaa Chiisuaa 1:9, 10) Le suɛi wɔsila tiɔɔŋ, Chiisu wa nda pɛɛkoo, kɔllo nda dɛɛniaa, vɛlɛ a nda nɛi chɔmaa kioo. Kɛ Chiisu kuɛnuŋ. Yɛɛ ndaa nɔ yɛ niko ma tosa?

² Tuupa mi Chiisu kua choo choo, mbo dimul tol kɔɔliaa nduaa aa, “La cho kpaayaa sɔla le seileŋ tɛndaa. La dimul niŋ waŋnda nyɛ nya sina a ya okɔɔ wo, Chulusɛlɛm chiee ni, a o lɛŋnde Chudiaaleŋ kpede, a lɛŋnde Sameeliaaleŋ, a ba o ba fee o chieeŋndo choo.” (Walta Wanaa Chiisuaa 1:8) Vɛɛ ndaa tiu yɛ niŋ ba ma tosa wali koŋ? Mi Chiisu chuel nda buŋgɛi maa nyina diandaa Mɛlɛkaa cho nda mala. (Walta Wanaa Chiisuaa 1:5) Kɛ nɛɛnɛ cho yɛ nda nɛi chɔmaa ke nduyɛ mbo kɔɔna wali dimiaa yooŋgu kɛndɔɔ hoo chieeŋndo balɔɔ silɔ? Mi kiilaa sina maa Chɛhowa soliŋ niŋ puaa kpeku sindɛ le Isɔluɛiya nɛiyo chɔmndo. Lelaŋ, kiisaŋndo wa nda te  wana cheleŋ Chɛhowa cho hɛli le chilaŋ chuaa ni.

3. (a) Mɛɛ Chiisu hel choo choo, kɛɛsiaa sɔvɛ kuɛɛ kiilaa ndaa nɔ tiindaŋndo o Mɛlɛka niŋnda tosa yɛ? (b) Nyunala kuɛɛ naŋ cho yɛ yaasiaa o buŋgɛi hei niŋ?

³ Mɛɛ Chiisu hel dɔɔ o choo choo niŋ, mi buɛiyaa nduaa yaasiaa Diom Mɛlɛkaa, ma piɛi Mɛlɛka le malaa, nduyɛ ma hɛli Mataya le mbo miiŋgu o foofo Chuda Isikaliɔɔ wo le mbo wa kiilanɔ 12. (Walta Wanaa Chiisuaa 1:15-26) Le yɛɛ hɛlioo hoo wa yɛ nyɛ sɔvɛ bɛndu le nda a Chɛhowa? Mi kiilaa sina maa yeemɛi wa le mi kiilaa wa 12. * (Tofa tɛɛsiaa amatou.) Le wali sɔvɛ sɔviɔɔ tosaa wanaa Mɛlɛkaa tɛɛŋ Chiisu ndoo hɛli kiilaa ni nduyɛ mbo pɛɛku nda. Yɛɛnɛ wa yɛ wali koŋ nduyɛ vɛɛ Chɛhowa nda Chiisu bɛɛndiaa yɛ nda le wali koŋ tosaa? Kɛɛsiaa kuɛɛ cho yɛ hau mbo velaŋ a kɛɛsiaa koŋ? Nduyɛ vɛɛ naŋ loonuŋ yɛ ‘wanaa cho chilaŋ chuaa naa tɛɛŋnda,’ taama taama “buɛi cho sakpo, nduyɛ, mbo wa buɛi kɔl kalu wo”?—Hibuluiya 13:7, NW; Maatiu 24:45.

4. Wali kuɛɛ kiilaa a bɛnduaa kundaa cheleŋnda o Chulusɛlɛm niŋ ndaa nɔ yɛ?

⁴ Mi kiilaa kandu chilaŋ chuaa o kunda leKilisiɔŋndo niŋ a Pɛŋtikɔɔsi o wɔsi 33 niŋ. Baabuiyo dimi maa “Pitɛ wa ŋwaŋ tɔ a wana piliaa Chiisu vem hɔlte ndɔ wa tɛɛŋ,” okoŋ, mbo pɛɛku faŋga bɛndoo tonya yɔŋgu yoomoo wo. (Walta Wanaa Chiisuaa 2:14, 15) Mi wanaa bɔɔbɔɔ o faŋga koŋ tɛɛŋ simnuŋ Kilisiɔŋnda. O koŋ kɔɔli, mi Kilisiɔŋaa sɛnɛiyaa kaŋ hiau lachi a tosaa nyɛm “wanaa Chiisu vem hɔlte ndɔ wa pɛɛku nda” woŋ. (Walta Wanaa Chiisuaa 2:42) Kiilaa i wa vɛlɛ kuee ni le nyɛsɔlaa kundaa biyɔɔ nyɛkɛndɛi. (Walta Wanaa Chiisuaa 4:34, 35) Ma pɛɛku vɛlɛ wanaa Mɛlɛkaa nduyɛ ma piɛi le nda aa, “Naa pila ŋ nɔla niŋ mi ŋ chua teleŋnda naalaŋ kpede le Mɛlɛka piɛiyo a suɛi Mɛlɛkɛi dimioo.” (Walta Wanaa Chiisuaa 6:4) Nduyɛ ma yɔŋ Kilisiɔŋaa taasiaa le yooŋgu kɛndɔɔ dimioo o tandala sɛnɛilaŋ niŋ. (Walta Wanaa Chiisuaa 8:14, 15) O koŋ kɔɔli, mi bɛnduaa kundaa pɔyaŋnda del kiilaa choo le chilaŋ chuaa o kundaa niŋ. Mi dialii kuumbaŋ choo ve yɔŋgu nɛi chɔmaa o kundalaŋ kpou lo.—Walta Wanaa Chiisuaa 15:2.

5, 6. (a) Vɛɛ nyina diandaa ndoo ke yɛ dialii kuumbaŋ choo ve kpaayaa? (Tofa fotueiyo o peele naŋ kandu leŋ choo.) (b) Vɛɛ maalikɛiya ndaa mala yɛ dialii kuumbaŋ choo ve? (c) Vɛɛ Diom Mɛlɛkaa ndoo ke yɛ dialii kuumbaŋ choo ve nɛi chɔmaa?

⁵ Kilisiɔŋnda o wɔsiŋ kɛmɛ tasoŋ niŋ ndaa sina maa Chɛhowa wa dialii kuumbaŋ choo ve nɛiyo chɔmndo o Chiisu niŋ sanaa ni. Vɛɛ ndaa looku yɛ niŋ hei laalaŋ? O tasoo, mi nyina diandaa ke dialii kuumbaŋ choo ve kpaayaa. (Chɔŋ 16:13) Mi Kilisiɔŋaa pɔyaŋnda kpou sɔla nyina diandaa, kɛ kiilaa a bɛnduaa  kundaa o Chulusɛlɛm niŋ wa wanaa kpeekpeiya le kpaaya nyina diandaa sɔlaa ni le walta ndalaŋ tosaa maa wanaa chua chilaŋ nda. Le taamaseliiyo, o wɔsi 49 niŋ, mi nyina diandaa ke dialii kuumbaŋ choo ve nɛi chɔmaa le kɛɛsiaa tosaa a hivi chiɛi kɔɔlioo okɔɔ. Mi kundaa tual nɛi chɔmaa koŋ kɔɔli. Fulamakɔɔlioo wa ni, ma “chɔɔlu laalaŋndo sɔla. Nduyɛ, lepaa o lepaa wanaa sɛnɛiya wa delɔɔ o kundala wanaa laalaŋnda choo.” (Walta Wanaa Chiisuaa 16:4, 5) O yau dialii kuumbaŋ choo ve poonyial kundalaŋ ndo niŋ, ŋ che maa nyina diandaa Mɛlɛkaa wa dialii kuumbaŋ choo ve choo, nduyɛ ma chɔm suiliŋndaŋ mɛɛ kaalaa a tiindaŋndo cho naa yɛ.—Walta Wanaa Chiisuaa 15:11, 25-29; Kaleesiaŋnda 5:22, 23.

⁶ O diiŋ ndɔɔ, mi maalikɛiya mala dialii kuumbaŋ choo ve. Le taamaseliiyo, mi maalikɛinɔɔ dimul Kɔniiliɔɔ le mbo che kiilanɔɔ Pitɛ. O koŋ kɔɔli, mi Pitɛ dimul Kɔniiliɔɔ a yuŋgu ndɔɔ yooŋgu kɛndɔɔ, nduyɛ ma sɔla nyina diandaa, mi che bɛɛ naa puaa ndaa sɔla hivi chiɛi kɔɔli le. Okoŋ, mi Kɔniiliɔɔ simnuŋ Kilisiɔŋnɔ tasoo o wanaa ve ŋChuu le wa tɛɛŋ, o ndoo sɔla hivi chiɛi kɔɔli le wo. Mɛɛ kiilaa a puaapiliaa cheleŋnda tuei a hei okɔɔ, ma chɛl hɛnaŋ Mɛlɛkaa nduyɛ ma demul wanaa ve ŋChuu le wa o kunda leKilisiɔŋndo niŋ. (Walta Wanaa Chiisuaa 11:13-18) Hei chɔm ni maa maalikɛiya wa wali dimiaa yooŋgu kɛndɛ dialii kuumbaŋ choo ve wa nɛiyo chɔmndo wo tooloo kekelee. (Walta Wanaa Chiisuaa 5:19, 20) O yaa ndɔɔ, Diom Mɛlɛkaa wa dialii kuumbaŋ choo ve nɛi chɔmaa kioo. Mi puaa kaŋ soliŋ Diom Mɛlɛkaa kpeku le nda malaa le kɛɛsiaala sɔvɛlaŋ tosaa a laalaŋnda leKilisiɔŋndaŋ okɔɔ vɛlɛ a kundalaŋ nɛi chɔmaa kioo.—Walta Wanaa Chiisuaa 1:20-22; 15:15-20.

7. Le yɛɛ naŋ dimi yɛ maa Chiisu wa Kilisiɔŋaa tasiaa nɛi chɔmaa kioo ni?

⁷ Mi che bɛɛ dialii kuumbaŋ choo ve ndii nɔ kpaayaa o kundaa niŋ, kɛ mi wanaa wa o dialle hei niŋnda sina maa Chiisu Kiliti wa nda Bolleŋ ni. Vɛɛ naŋ looku yɛ keŋ sina? Mi kiilanɔɔ Pɔɔl dimi maa Kiliti hɛli “wanaa o vem hɔlte ndɔ wa.” Mbo dimi vɛlɛ maa Kiliti cho “bolle” kunda leKilisiɔŋndo ni. (Ɛfisiaŋnda 4:11, 15) Yɔŋi buɛiyaa Chiisuaa ndaa keŋnuŋ ndapila diolaŋ aa kiilaa, mi Mɛlɛka tosa ma “kandu wanaa laalaŋnda veeloo . . . aa Kilisiɔŋnda.” (Walta Wanaa Chiisuaa 11:26) Mi Pɔɔl sina maa i wa suɛi sɔvɛ le tolɔɔ sɔɔŋ Baabui kiilaa wa waŋnda pɛɛkoo woŋ kɔɔli, a puaa cheleŋ wa chilaŋ chuaa wa. A koŋ kpou, mi Pɔɔl dimi aa, “I hɛnaŋ nya mi la sina pɛŋgu maa Kiliti ndu cho wana pɔnɔɔ bolleŋ ni.” Hoo sim ni maa wana o wana cho o dialii kuumbaŋ choo ve niŋ. Mi Pɔɔl chɔɔlu vɛlɛ dimi aa, “Kiliti wana cho ndu bolleŋ ndo cho Mɛlɛka ni.” (Kɔliŋtiaŋ Tasoo 11:2, 3) A tonya, Chɛhowa yulu Chiisu Kiliti Po ndɔ iso ni le mbo wa kundaa bolleŋ.

8, 9. Wali sɔvɛ kuɛɛ Ŋgɔɔ Lɔɔsɛl ndoo nɔ yɛ?

⁸ Kanduŋ o wɔsi 1870 niŋ, mi Chaas Taas Lɔɔsɛl a chaaŋaa nduaa apum kandu Mɛlɛka piɛiyo a mɛɛ Baabuiyo dimi yɛ a wanaa cheleŋnda malaa le tosaa lende. Mi wanaa ndaa dimi sɔɔŋ maŋgalaŋ yɛ yiɔɔŋ nda bɛɛ sɔla malaa hoo. Mi “Zion’s Watch Tower Tract Society” kilaŋ o di lemasaa ba bɛŋgu o wɔsi 1884 niŋ. Nduyɛ mi Ŋgɔɔ Lɔɔsɛl simnuŋ wana chua chilaŋndo. * (Tofa tɛɛsiaa amatou.) Mbo pɛɛku  Baabuiyo nyɛkɛndɛi. Nduyɛ, siooŋii ve ndu le acheleŋnda dimullo maa pɛɛkula lekaaŋndaŋ, mɛɛ wanaa yaa o Mɛlɛka pilɔɔ niŋ cho naa yɛ, a pɛɛku yoomu vi le wo, ve o Baabuiyo niŋ te. Mbo pɛɛku maa hunɔɔ Chiisoo ve niŋ nyɛ naŋ che ndu le, nduyɛ maa “boondii Mɛlɛka yulu le mi wanaa cho a Chuu le wa” i cho fuuluu o mɛɛlulaŋ o wɔsi 1914 niŋ. (Luku 21:24) Mi Ŋgɔɔ Lɔɔsɛl soliŋ teleŋ ndɔɔ, yoomuma nduaŋ, a nyɛ ndɔ sɔlaa kpeku le acheleŋnda tonyaa hoo pɛɛkoo. A tonya, mi Chɛhowa nda Chiisu soliŋ Ŋgɔɔ Lɔɔsɛl kpeku o sindɔɔ niŋ le chilaŋ chuaa o teleŋ sɔvɛ koŋ niŋ.

⁹ Ŋgɔɔ Lɔɔsɛl ndoo yeema mi waŋnda ndaa bii ndu teŋgeŋ te. O wɔsi 1896 niŋ, mbo poonyiaa maa ndu ni a laŋgbaa kɔlkaluaa cheleŋnda ndaa yeema mi waŋnda ndaa saŋgala nda kposoŋ te. Ndaa yeema ma ke nda diola teŋgeŋ ndaŋ te, nduyɛ ndaa yeema ma ke kunda kɛ kɛ diola ndalaŋ te. Okoŋ kɔɔli mbo dimi aa, “O cho wali wanachiee le cho hoo le.”

10. (a) Teleŋ kuɛɛ Chiisu yulu yɛ “buɛi cho sakpo, nduyɛ, mbo wa buɛi kɔl kalu wo” iso? (b) Tɛɛsiaa wɔ mɛɛ Dialii Kuumbaŋ Choo Ve wa teŋgeŋ a “Watch Tower Society” yɛ.

¹⁰ O wɔsi 1919 niŋ, wɔsioŋ ŋgaa o piɔm Lɔɔsɛl wo kɔɔli, mi Chiisu yulu “buɛi cho sakpo, nduyɛ, mbo wa buɛi kɔl kalu wo” iso. Le sabu yɛɛ? Le buɛiyaa nduaa “nyɛ diaa nda nɔ le sɔlaa wo kioo o teleŋ nda nɔ le nyɛ diaa dioo wo.” (Maatiu 24:45) Nduyɛ o wɔsiŋ muŋ kandɔŋndo bɛɛ, mi puaapiliaa pɔyaŋnda o fondaŋnda leboltaŋ o Bulukiliŋ niŋ Niu Yɔk, ke buɛiyaa Chiisuaa nyɛdiaa. Veeloo hoo “dialii kuumbaŋ cho ve,” o wɔsi 1940 niŋ o kandu fulaa o yaula naalaŋ niŋ ni. A boondii keŋ, wanaa cha ko bɛɛ aa dialii kuumbaŋ choo ve wa simlachiaa le “Watch Tower Bible and Tract Society.” Kɛ o wɔsi 1971 niŋ, mii chɔmnuŋ kpendekele maa Dialii Kuumbaŋ Choo Ve wa teŋgeŋ a “Watch Tower Society,” o ndoo nɔ kalaŋndo le dilaŋ kinɛiyo piondɔɔ wo. Chɔŋ a teleŋ koŋ, puaapiliaa pɔyaŋnda ndaa wa o Dialii Kuumbaŋ Choo Ve niŋ mi ndaa ve bɛɛ simlachiaa le “Watch Tower Society” le. O boondii laŋga hiou ve niŋ, mi puaapiliaa kɔlkaluaa o “saa cheleŋ” nda tɛɛŋ chua chilaŋ le “Watch Tower Society” a dila cheleŋnda wanaa Mɛlɛkaa cho soliŋndo kpeku laŋ. Fulamakɔɔlioo wa ni, mi Dialii Kuumbaŋ Choo Ve muli hɔlla o silala Baabuiyo yɔŋgoo a nɛi chɔmaa yɔŋgoo. (Chɔŋ 10:16; Walta Wanaa Chiisuaa 6:4) Mi Bandu Mɛŋgɛlaa le Suɛɛsɔɔ 15, 2013 tɛɛsiaa maa, puaapiliaa pɔyaŋnda cho kunda pɔmbɔ “buɛi cho sakpo, nduyɛ, mbo wa buɛi kɔl kalu wo” ni, nduyɛ nda cho Dialii Kuumbaŋ Choo Ve ni.

11. Vɛɛ Dialii Kuumbaŋ Choo Ve tosa yɛ kɛɛsiaalaŋ?

¹¹ Mi wanaa cho o Dialii Kuumbaŋ Choo Ve niŋnda chuuŋgiaŋ o lɔɔ o lɔɔ bɛŋgu le kɛɛsiaala sɔvɛlaŋ tosaa. Chuuŋgiaŋ waa naa mala nda le suukaŋndo nyɛkɛndɛi nduyɛ ma wa o diompilɔɔ niŋ. (Pulɔwaa 20:18) Wana o wana cho  o Dialii Kuumbaŋ Choo Ve niŋ cho o sɔvɛ mbo hiau a piliaa le. Lelaŋ, iwɔsi o iwɔsi, puaapilɛnɔ cheleŋ chua chilaŋ le chuuŋgiaŋnda laŋ ni. (Pitɛ Tasoo 5:1) Lende koni i cho a kundala ŋɔmpum nda cho o Dialii Kuumbaŋ Choo Ve niŋndaŋ ni. Wana o wana o Dialii Kuumbaŋ Choo Ve niŋ yiyaŋ naa maa ndu le cho puaapiliaa nduaa bolleŋ te. Nda kpede buɛiya nda cho ni, nduyɛ a cho nyɛm mala naa le pɛɛkoo a Mɛlɛka okɔɔ woŋ soliŋndo kpeku, vɛlɛ ma tol nɛi chɔmaa buɛi cho sakpo wo kɔɔli.

12. Nyuna kuɛɛ naŋ nɔ yɛ le mulioo?

¹² O cho nyina Mɛlɛkaa le suaa o Dialii Kuumbaŋ Choo Ve lo le, nduyɛ wanaa lahakiaa nda cho ni. Mii tosa biondɔŋndaŋ te i wa pɛ Baabuiyo tɛɛsiaa ɔɔ kɔɔnaa nɛiyo chɔmndo. Le taamaseliiyo, “Watch Tower Publications Index” nɔ suɛi lebolle hei “Beliefs Clarified.” Kanduŋ a wɔsi 1870, mbo chɔm yɛlɛmiaalaŋ a sinapɛŋgu naa o Baabuiyo niŋ okɔɔ. Chiisu dimi maa  buɛi cho sakpo wo cho naa nyɛdiaa ke nyɛkɛndɛi. Lelaŋ, vɛɛ naŋ cho yɛ nyɛ Chiisu dimi hoo wo biyɔɔ bila? Ndu cho ni, “I chɔm ndɔ nya buɛi cho sakpo, nduyɛ, mbo wa buɛi kɔl kalu wo.” (Maatiu 24:45) Yɛɛ chɔm yɛ maa Dialii Kuumbaŋ Choo Ve cho buɛi cho sakpo wo ni? Ŋ yaasiaŋndɔ nyɛm sala yaa pilɛ kpe mala dialii kuumbaŋ choo ve o teleŋ kiilaa niŋndo.

13. Vɛɛ nyina diandaa mala yɛ Dialii Kuumbaŋ Choo Ve?

¹³ Mi nyina diandaa mala Dialii Kuumbaŋ Choo Ve. Nyina diandaa mala niŋ Dialii Kuumbaŋ Choo Ve le biyɔɔ bila tonya Baabui ndaa bii bila o tase ndɔ le wo. Le taamaseliiyo, yiyaŋndɔ a laalaŋnda nda chɔɔlu tɛɛsiaalaŋ la naŋ laŋga soo a laŋ okɔɔ laŋ. Wana o wana tiuba mbo bii bila nduyɛ mbo tɛɛsiaa “nyɛm cho ŋ vianaŋ kpiŋ kpiŋ” a Mɛlɛka okɔɔ woŋ a ba ndɔ le! (Nuawɔ Kɔliŋtiaŋ Tasoo 2:10, NW.) Mi Dialii Kuumbaŋ Choo Ve yiyaŋ mɛɛ kiilanɔɔ Pɔɔl ndoo yiyaŋ yɛ. Mbo poonyiaa aa, “Lelaŋ, te ŋ wa waŋnda isɔɔ chɔm a hei okɔɔ pɛ, ŋ chɔm nda ndi a diomnda waŋnda pɛɛku naa o kɔl kalu iwana chieeyaa niŋ ndaŋ te. Diomnda nyina diandaa Mɛlɛkaa o pɛɛku naa laŋ a laŋ naa ŋ chɔm nda ndi ni.” (Kɔliŋtiaŋ Tasoo 2:13, NW) Mi wɔsilaŋ la hiau o kɛmɛlaŋ niŋ a pɛɛkula lachoowalaŋ nduyɛ nɛi chɔmaa walaŋ ndoo ve wɔ le. Chɔŋ a wɔsi 1919, le yɛɛ sinapɛŋgu naa Baabuiyo chɔɔluŋ yɛ? Saboo opilɛ kpe cho ni maa, Mɛlɛka cho malaa a nyina ndɔ diandaa!

14. A mɛɛ Sɔɔŋ Chɔɔmaŋndoŋ 14:6, 7 dimi yɛ, vɛɛ maalikɛiya mala yɛ Dialii Kuumbaŋ Choo Ve a wanaa Mɛlɛkaa hau?

¹⁴ Mi maalikɛiya mala Dialii Kuumbaŋ Choo Ve. Dialii Kuumbaŋ Choo Ve nɔ kalaŋ bɛndoo le wanaa dimiaa yooŋgu kɛndiaa hiouwɔɔ miiliɔŋndaŋ la ŋɔmaa nɛiyo chɔmndo le yooŋgu kɛndɔɔ dimioo chieeŋndo balɔɔ silɔ. Le yɛɛ wallo hoo sɔla yɛ batiuwaa? Saboo opilɛ cho ni, maalikɛiya cho ndu tooloo. (Nuawɔ Sɔɔŋ Chɔɔmaŋndoŋ 14:6, 7.) O sɔɔŋ bɔɔbɔɔ niŋ, maalikɛiya chɔm niŋ wanaa dimiaa yooŋgu kɛndiaa nɛiyo naa waŋndo wa piɛileŋ o Mɛlɛka lo le malaa wa! * (Tofa tɛɛsiaa amatou.) Wali dimiaa yooŋgu kɛndɔɔ a pɛɛkoo cho hiouwɔɔ lachi a hindɔɔ o wa bɛɛ o fondaŋnda simultaŋ la cho wo. Maalikɛiya cho malaa ni mi batiuwaa hoo wa sɔlaŋndo.

15. Vɛɛ Dialii Kuumbaŋ Choo Ve cho yɛ teŋgeŋ a simlachiaa lepiɛiya? Chɔmndɔ taamaseliiyo.

¹⁵ Diom Mɛlɛkaa chɔm Dialii Kuumbaŋ Choo Ve nɛiyo ni. (Nuawɔ Chɔŋ 17:17.) Tofawɔ nyɛ yɔŋnuŋ o wɔsi 1973 niŋndo. Mi Bandu Mɛŋgɛlaa le Kooŋndo 1 nyuna te “wanaa mel lɔ taando dioo le wa te a suiliŋ pɛ le yiŋɔɔ sɔlaa.” Muli Bandu Mɛŋgɛlaa yɔŋgu le nyuna koŋ ndo ndoo tɔlnuŋ o sawala mandaala Baabuiyo choo, nduyɛ ndaa suiliŋ te! Mi Bandu Mɛŋgɛlaa chɔm bolii Baabuiye tau nduyɛ mbo tɛɛsiaa le sabu wana kɛɛ le sikɛɛtiiyo malɔɔ wo nɔ mbo sɔla solioo wo. (Kɔliŋtiaŋ Tasoo 5:7; Kɔliŋtiaŋ Diiŋ Ndɔɔ 7:1) Mi Bandu Mɛŋgɛlaa dimi maa sawaa hoo, o cho o wana chiee lo le o chɛŋ te, kɛ “o Mɛlɛka lo, o soo o Diom ndɔɔ niŋndo.” Kɔɔna lepiɛi kɛ kɛ chɛl lɔ a kɔl ndaa kpou le Diom Mɛlɛkaa tiindaŋndo le, mi che bɛɛ hei tosaa cho wa ikala kpoke le wanaa nduaa apum. Mi yau laŋga fula a piɛiye okɔɔ o Amɛlika niŋndo dimi aa, “Simlachiaa leKilisiɔŋnda siŋga niŋ pɛɛkula ndalaŋ daandi daandi le mi la chɛlaŋ a laalaŋndaŋ ɔɔ yiyaŋnda wanaa ndaa, le halikpeŋ ma sɔla nda tooloo o ba vɛlɛ a wanaa bɔɔbɔɔ cheleŋ.” O cho nyɛ waŋnda yeema wo le Dialii Kuumbaŋ Choo Ve  tual kɔɔli le. Kɛ, Diom Mɛlɛkaa cho wanaa nduaa nɛiyo chɔmndo ni, nduyɛ ndu chɔm ni maa Chɛhowa kɛsɛ cho hau wanaa nduaa nɛiyo chɔmndo ni.

16. Ɔɔ nɛiyo opilɛ o naŋ loonuŋ Dialii Kuumbaŋ Choo Ve wo?

¹⁶ Nuawɔ Hibuluiya 13:7, NW. Baabuiyo dimi maa naŋ ‘loonuŋ a wanaa cho naa chilaŋ chuaa tɛɛŋnda.’ Nɛiyo opilɛ o naŋ tosa heiyo cho Dialii Kuumbaŋ Choo Ve dɔuwɔɔ o piɛile naaleŋ niŋ ni. (Ɛfisiaŋnda 6:18) A nɔ kalaŋndaŋ tau. Lapum cho ni, toosiallo naa nyɛm mala naa le pɛɛkoo a Mɛlɛka okɔɔ woŋ, wali dimiaa yooŋgu kɛndɔɔ nɛiyo chɔmndo, a toolula kɔɔnaa sɔla laŋ biyɔɔ nyɛkɛndɛi. Lelaŋ, a yeema kɛsɛ miŋ wa piɛileŋ le nda lɔɔlɔɔ!

17, 18. (a) Vɛɛ naŋ tuallɛ nɛi chɔmaa Dialii Kuumbaŋ Choo Ve kɔɔli? (b) Vɛɛ wali naa dimiaa yooŋgu kɛndɔɔ toolu yɛ Dialii Kuumbaŋ Choo Ve a Chiisu?

¹⁷ Ŋ loonuŋ vɛlɛ a Dialii Kuumbaŋ Choo Ve te ŋ wa pɛ tolɔɔ silala ndɔlaŋ a nɛi ndɔ chɔmaa kɔɔli. Dialii Kuumbaŋ Choo Ve ke naa nɛi chɔmaa sanaa o yaula naalaŋ niŋ, o bɔŋaŋnda naalaŋ o lɔɔ bɛŋgu, o bɔŋaŋnda ibuŋgalaŋ, a la bɛndaŋ. Mii yulu vɛlɛ buɛiyaa ibuŋgaa iso, nduyɛ mi nda bɛɛ yulu bɛnduaa kundaa iso. Buɛiyaa ibuŋgaa a bɛnduaa kundaa loonuŋ a Dialii Kuumbaŋ Choo Ve te a tol pɛ nɛi chɔmaa ndɔɔ kɔɔli. Naa kpou ŋ chɔm bɛɛleŋ le Wana cho naa Bolleŋ ndo, Chiisu, te ŋ wa pɛ wanaa o cho soliŋndo kpeku wa diikɔŋndo.—Hibuluiya 13:17, NW.

¹⁸ Nɛi cheleŋ naŋ loonuŋ a Dialii Kuumbaŋ Choo Ve wo cho yooŋgu kɛndɔɔ dimioo a mɛɛ naŋ nɔla yɛ ni. Hibuluiya 13:7 (NW) dɛɛniaa Kilisiɔŋnda le ma tol taamasi wanaa cho chilaŋ chuaa wa kɔɔli. Dialii Kuumbaa Choo Ve chɔm niŋ tiindaŋ kala kalaa a mɛɛ i cho yooŋgu kɛndɔɔ dimioo a sɛmbɔɔ vɛlɛ a ndu tooloo yɛ. Ŋ cho pa puaapiliaa kaŋ tooloo o wali sɔviɔɔ hoo niŋ? Te ŋ tosa pɛ lende, ŋ cho wa a nyaale te ŋ tuei pɛ mi Chiisu dimul naa aa, “Pɔmbuaa niaa cho haa waŋnda o hɔl maa wanaa fondo fuu wa, nyɛ o nyɛ la tosal nda pɛ, mɛɛ ya nya tosal ni.”—Maatiu 25:34-40.

19. Le yɛɛ ŋ wuu yɛ balle le Wana cho naa Bolleŋ ndo, Chiisu tolɔɔ kɔɔli?

¹⁹ Mɛɛ Chiisu miiŋgu choo choo, o mel tol kɔɔliaa nduaa le. (Maatiu 28:20) Mbo sina maa nyina diandaa, maalikɛiya, a Diom Mɛlɛkaa mala ndu ni le chilaŋ chuaa o lɛŋndeŋ choo. Hau bɛɛ, mala pilɔɔ kpe o cho buɛi cho sakpo wo kioo ni. Dialii Kuumbaŋ Choo Ve cho hiouwɔɔ lachi a “Saa Fɔŋndɔɔ,” Chiisu, tolɔɔ kɔɔli “ba o ba fee o kɔ.” (Sɔɔŋ Chɔɔmaŋndoŋ 14:4) Lelaŋ, te ŋ tol pɛ nɛi chɔmaa Dialii Kuumbaŋ Choo Ve kɔɔli, mɛɛ Wana cho naa Bolleŋ ndo, Chiisu, naŋ cho koŋ tolɔɔ kɔɔli ni. O cho suŋ naa lasisi lachi le kɔlaŋ a naa o yoomu fafɛɛŋndo niŋ. (Sɔɔŋ Chɔɔmaŋndoŋ 7:14-17) Simlachinɔ kɛ kɛ o waŋchieeya tɛɛŋ nɔla mbo chua buŋgɛi keŋ te!