1. Yɛɛ kɛndɛ sala baŋaa tosa yɛ le naa?

SALA baŋaa Chiisoo tosa miŋ sɔla salalaŋ tau. Le taamaseliiyo, kɛɛsiaa sala baŋaa kumbul chuauwaa Adam nda kpou dioo, a kaala sakpoyɛi ya, le waa o yuŋgu Mɛlɛkaa niŋ o chilaŋ niŋ. Sala cheleŋ cho ni, ŋ nɔla miŋ wa achal a nyaale lefafɛɛŋ. I hiou kpou ve, sala baŋaa chiɛɛliaŋ a sɔɔŋ sɔvɛ sɔviɔŋ le nyaa yoomaa o choo choo niŋ a wana o wana cho o chieeŋndo choo.—Hibuluiya 1:8, 9.

2. (a) A sɔɔŋ sɔvɛ sɔvɛŋ kuɛɛ o choo choo niŋ a o chieeŋndo choo Chiisu ndoo wou yɛ o piɛile ndɔleŋ niŋ? (Tofa fotueiyo o peeleŋ ndeŋ choo.) (b) Yɛɛ naŋ cho yɛ yaasiaa o buŋgɛi hei niŋ?

² Wɔsilaŋ la tiɔɔŋ tuupa mi Chiisu wu, mbo pɛɛku buɛiyaa nduaa le piɛileŋ aa, “Mɛlɛka Finya naa o choo choo niŋ, waŋnda kpou ke diola numndaŋ bɛɛleŋ. Masale numndeŋ le huŋ. Hɛnaŋ numndo tosaŋ o chieeŋndo choo mɛɛ o cho tosaŋndo o choo choo niŋ yɛ.” (Maatiu 6:9, 10, NW) Ŋ yaasiaŋndɔ mɛɛ sala baŋaa chiɛɛliaŋ a Masale Mɛlɛkaleŋ, hɛnaŋ Mɛlɛkaa tosaa, a diola Chɛhowalaŋ dindioo yɛ.

3. Yɛɛ diola Chɛhowalaŋ la sim yɛ? Vɛɛ Setana simullɛ diola Chɛhowalaŋ?

³ O tasoo, mi Chiisu piɛi le mi diola Chɛhowalaŋ la sɔla diondɔɔ, ɔɔ miŋ bii laŋ maa nyɛ diandaa. Diola Chɛhowalaŋ la sim le Chɛhowa pila, nduyɛ la tɛɛsiaa Wana o cho wo. Ndu cho Mɛlɛka Kpaaya Kpou wo ni vɛlɛ a Wana sakpoo le choo choo a chieeŋndo. Mi Chiisu bɛɛ veelu ndu aa “Finya . . . [“diandaa,” NW].” (Chɔŋ 17:11) Le mɛɛ Chɛhowa cho wana diandaa yɛ, nyɛ o nyɛ o tosa nduyɛ sawa o sawa o dɔu pɛ, la cho la diandaa. Kɛ o kpeloo Idɛŋ niŋ, mi Setana simul di Mɛlɛka nɔ le waŋchieeya sawalaŋ kɛsullo wo. Mbo dimi choolaŋ a Chɛhowa okɔɔ nduyɛ mbo simul diola Mɛlɛkalaŋ.—Chɛnɛsee 3:1-5.

4. Vɛɛ Chiisu ndoo bii yɛ diola diandaala Mɛlɛkalaŋ?

⁴ Kɛ o baa pilɔɔ choo, Chiisu ndoo kaala bɔɔ diola Chɛhowalaŋ nduyɛ mbo tosa nyɛ o nyɛ o tiuba le laŋ dindioo. (Chɔŋ 17:25, 26) Vɛɛ o tosa yɛ keŋ? O kaa ndɔɔ niŋ vɛlɛ a pɛɛkula ndɔlaŋ, mi Chiisu mala acheleŋnda le ma che maa sawala Chɛhowalaŋ la bɛnda, nduyɛ maa nyɛ o nyɛ o dimul naa pɛ le tosaa, le tɔnɔɔ naa o cho ni. (Nuawɔ Sam 40:8-10.) Mi che bɛɛ naa mi Setana tosa mbo saŋga nduyɛ mbo sɔla piɔm imɔnɔɔ, kɛ mi Chiisu chɔm lo lechoo ndɔɔ. Mbo chɔm maa wana walaŋndo nɔla mbo diikuŋ Chɛhowa nyɛ kɛndɛ kɛndɛi.

5. Vɛɛ naŋ nɔ yɛ miŋ bii diola diandaala Chɛhowalaŋ?

⁵ Vɛɛ naŋ chɔm yɛ maa ŋ kaala diola Mɛlɛkalaŋ? O kaala naalaŋ niŋ. Chɛhowa yeema naa miŋ wa a diandaa. (Nuawɔ Pitɛ Tasoo 1:15, 16.) Hei sim ni maa ndupilɛ kpe naŋ nɔ ni miŋ piɛi, nduyɛ miŋ diikuŋ ndu a kɔl naa kpou. O wa bɛɛ miŋ wa o tɔɔndaŋndo bɛŋgu, ŋ tiuba miŋ tosa o naŋ nɔla wo a mɛɛ Chɛhowa pɛɛku naa yɛ. Te ŋ tosa pɛ sɔɔŋ a mɛɛ sawala Chɛhowalaŋ la cho yɛ, mɛɛ ŋ ke diola ndɔlaŋ bɛɛleŋ. (Maatiu 5:14-16) Ŋ nɔ miŋ chɔm maa sawala ndɔlaŋ la cho nyɛ sɔvɛ nduyɛ maa wana lachoowaa Setana cho ni. Ŋ cho wanaa walaŋ te. Lelaŋ, miŋ benduŋ. Kɛ te ŋ benduŋ pɛ, ŋ nɔ miŋ mulul yɔŋ naa wɔɔŋndo kɔɔ nduyɛ miŋ tosa o kɛndɛ naŋ nɔla wo le miŋ mal sɔɔŋ tɛɛmbuu diola Chɛhowalaŋ ndo tosaa.—Sam 79:9.

6. Le yɛɛ Chɛhowa che yɛ naa maa wanaa sandaa, mi che bɛɛ ŋ cho wanaa walaŋ te?

⁶ O yɔŋ bɛɛ aa wanaa pɔyaŋnda ɔɔ “saa cheleŋ” nda naŋ cho ni, mi Chɛhowa mal naa haki te ŋ dɔu pɛ tiindaŋndo o sala baŋaa niŋ. Mbo chɛl wanaa yɔŋguŋ o ndulo nduyɛ ma wa ndu piɛiyo wa. Mbo veelu Kilisiɔŋaa pɔyaŋnda aa chuauwaa nduaa cho sakpo wa, nduyɛ “saa cheleŋ” nda, maa chaaŋaa nduaa. (Chɔŋ 10:16; Luomaŋnda 5:1, 2; Chemisi 2:21-25) Lelaŋ, suŋ suŋ bɛɛ, sala baŋaa hoo tosa miŋ nɔ chaŋyɛi kɛndɛi a Finya naa nduyɛ miŋ dindi diola ndɔlaŋ.

7. Tɔnɔla kuɛɛ sala baŋaa hiŋ yɛ?

⁷ O piɛile Chiisu pɛɛku buɛiyaa nduaa leŋ niŋ, mbo dimi aa, “Masale numndeŋ le huŋ.” Vɛɛ sala baŋaa chiɛɛliaŋ yɛ a Masale Mɛlɛkaleŋ? Ŋwaŋ 144,000 Chɛhowa hɛli waŋchieeya tɛɛŋ nda cho wa a Chiisu latulu o Masale Mɛlɛkaleŋ choo o choo choo niŋ ni. Sala baŋaa tosa ni mi waŋnda haa sɔla fulasɛiniŋndo le helɔɔ choo choo. (Sɔɔŋ Chɔɔmaŋndoŋ 5:9, 10; 14:1) A cho wa masaa a wanaa soliaa lasalaa a Chiisu latulu le wanaa cho wa o chieeŋndo choo wa le wɔsilaŋ waapilɛ. O boondii keŋ niŋ, Chɛhowa cho Masale ndɔleŋ soliŋ kpeku le chieeŋndo siiŋgoo kpele hɛnɛkɛ, nduyɛ mi le mala mi waŋchieeya kpou  simnuŋ wanaa walaŋnda. Buɛiyaa Chɛhowaa o choo choo niŋ a o lɛŋndeŋ choo kpou cho simnɔŋ yuŋgoo opilɛ. (Sɔɔŋ Chɔɔmaŋndoŋ 5:13; 20:6) Chiisu cho Setana tɛɛmbuu nduyɛ mbo faŋa bahawɛila o chuu naalaŋ kpou.—Chɛnɛsee 3:15.

8. (a) Vɛɛ Chiisu mala yɛ buɛiyaa nduaa le ma bii bila mɛɛ Masale Mɛlɛkaleŋ le cho nyɛ sɔvɛ yɛ? (b) Vɛɛ naŋ toolu yɛ hau Masale Mɛlɛkaleŋ?

⁸ Mi Chiisu mala buɛiyaa nduaa le ma bii bila mɛɛ Masale Mɛlɛkaleŋ le cho nyɛ sɔvɛ yɛ. Vɛɛ o tosa yɛ keŋ? Mɛɛ Chiisu yiŋ dɔɔ, mbo kandu bɛɛ yooŋgu kɛndɔɔ dimioo a “masale Mɛlɛkaleŋ” okɔɔ ba o ba ndoo kuɛ pɛ. (Luku 4:43) Mbo dimul vɛlɛ buɛiyaa nduaa le ma tɛnda seileŋ a ndu okɔɔ “ba o ba fee o chieeŋndo choo.” (Walta Wanaa Chiisuaa 1:6-8) Hau, wali dimiaa yooŋgu kɛndɛ leMasaa hoo ke waŋchieeya dioo le pɛɛkoo a sala baŋaa okɔɔ, nduyɛ ma simnuŋ wanaa cho wa o Masale Mɛlɛkaleŋ bɛŋgu wa. Ŋ chɔm maa ŋ cho wa o Masale Mɛlɛkaleŋ bɛŋgu te ŋ mala pɛ Kilisiɔŋaa pɔyaŋnda le yooŋgu kɛndɔɔ dimioo chieeŋndo balɔɔ silɔ.—Maatiu 24:14; 25:40.

9. Le yɛɛ naŋ nɔ yɛ tiindaŋndo maa Chɛhowa cho peelu sabu ndɔɔ le waŋchieeya?

⁹ Yɛɛ Chiisu ndoo yiyaŋ yɛ mɛɛ o dimi vɛlɛ aa, “Hɛnaŋ numndo tosaŋ o chieeŋndo choo”? Te Chɛhowa dimi pɛ maa suɛi nɔ le yɔŋnɔŋndo, mɛɛ mii yɔŋnuŋ. (Aisaya 55:11) Nila kalula Setanalaŋ la kuuna Chɛhowa le. Yɛɛ wa yɛ hɛnaŋ Chɛhowaa le chieeŋndo? Ndoo yeema mi chieeŋndo pɛ cha a chuauwaa walaŋaa Adam nda Ifi wa. (Chɛnɛsee 1:28) Te Adam nda Ifi ndaa vi pɛ mi ndaa vilu le, sabu Mɛlɛkaa le chieeŋndo peiyo a chuauwaa ndaa wa simnɔŋ nyɛ fondoo fuu. Lelaŋ mi Chɛhowa mal nda ma vialu chuauwa. Sala baŋaa ke wana o wana dɔu tiindaŋndo dioo le simnɔŋndo wanaa walaŋ nduyɛ ma wa achal lefafɛɛŋ. Chɛhowa kaala waŋchieeya nduyɛ o yeema miŋ sɔla yoomu sɔvɛ bɛndu ndoo tuu le miŋ sɔla wo.

10. Tɔnɔ yɛɛ sala baŋaa chuu yɛ wanaa vi wa?

¹⁰ Kɛ wanaa vi o biiliɔŋndaŋ niŋ a sɔla fonda kposoŋ le Chɛhowa sinaa le wa yɛ? Chɛhowa yeema mi waŋnda wa achal. Lelaŋ o cho pɛɛŋ wanaa vi wa miŋgi yoomu. Sala baŋaa tosa a sabu ni le ma miiŋgu yoomu. Mɛɛ a cho nɔla ma pɛɛku a Chɛhowa okɔɔ nduyɛ ma wa achal lefafɛɛŋ. (Walta Wanaa Chiisuaa 24:15) Chɛhowa cho puundule yoomoo ni. Te o miŋgi pɛ wanaa vi wa yoomu, o cho simnɔŋ Finya nda. (Sam 36:9) O piɛile Chiisu pɛɛku buɛiyaa nduaa leŋ niŋ, mbo dimi maa Chɛhowa cho “Finya naa o choo choo niŋ” ni. (Maatiu 6:9, NW) Chɛhowa ke Chiisu wali sɔvɛ bɛndoo le waŋvilɛiya miŋgioo yoomu. Mi Chiisu dimi aa, “Ya cho wana miŋgi waŋnda yoomu wo ni. Nduyɛ, ya tosa ni mi waŋnda a wa yoomu kpeekpei.”—Chɔŋ 6:40, 44; 11:25.

11. Yɛɛ cho yɛ hɛnaŋ Mɛlɛkaa le “faŋga bɛndu bɛndoo”?

¹¹ Mi Chiisu dimi vɛlɛ aa, “Wana o wana tosa hɛnaŋ Mɛlɛkaa pɛ, mɛɛ ndu cho pɔmbɔ nuu ni, mɛɛ ndu cho yema nuu ni, mɛɛ ndu cho kala nuu ni.” (Maki 3:35) Sabu Mɛlɛkaa cho ni maa le mi waŋnda o kaalaŋ niŋ kpou a isɔɔ o isɔɔ maŋgalaa niŋ simnuŋ wanaa cho ndu piɛiyo wa. A veelu nda aa “faŋga bɛndu bɛndoo. A wa faŋga haaa, nda aa chuu chɔm te.” A dɔu tiindaŋndo o sala baŋaa niŋ nduyɛ a yeema ma diikuŋ Mɛlɛka. Ma saŋgala ndu aa, “Saŋgalaa cho o Mɛlɛka naa lo, o cho ichali o kpeŋgbei lemasaa choo wo, nda Saa Fɔŋndɔɔ.”—Sɔɔŋ Chɔɔmaŋndoŋ 7:9, 10.

12. Yɛɛ naŋ pɛɛku yɛ o piɛile Chiisuleŋ niŋ a sabu Chɛhowaa okɔɔ le waŋchieeya?

 ¹² Ŋ pɛɛku tau a Chɛhowa okɔɔ vɛlɛ a sabu ndɔɔ le waŋchieeya o piɛile Chiisu pɛɛku buɛiyaa nduaa leŋ niŋ. Nyɛ tasoo, ŋ nɔ miŋ tosa nyɛ o nyɛ naŋ nɔla le diola Chɛhowalaŋ dindioo nduyɛ miŋ ke ndu bɛɛleŋ. (Aisaya 8:13) Sala baŋaa tosa miŋ sɔla dikeŋnaŋndo le pioŋɔɔ sɔlaa wo bɛɛ ke diola Mɛlɛkalaŋ bɛɛleŋ. Nduyɛ pɛŋ, Chiisu diola ndɔlaŋ la sim ni, “Chɛhowa Cho Wana Piŋiaa Ni.” O diiŋ ndɔɔ, Chɛhowa cho Masale ndɔleŋ soliŋ kpeku le waŋchieeya tɔnɔla sala baŋaa kpou kioo. Nduyɛ ŋgaa ndɔɔ, ŋ nɔ tiindaŋndo maa nyɛ o nyɛ tiuba mbo kuuna hɛnaŋ Chɛhowaa tosaŋndo le.—Sam 135:6; Aisaya 46:9, 10.

13. Le yɛɛ naŋ sɔla yɛ yiŋɔɔ?

¹³ Nɛi sɔvɛ naŋ chɔm balika melaa le sala baŋaa wo cho ni, yɔŋgɔŋndo o Chɛhowa lo nduyɛ miŋ sɔla yiŋɔɔ. Ŋ nɔla miŋ chɔm o nɛiyo hoo choo maa ŋ nɔ tiindaŋndo o sala baŋaa niŋ, nduyɛ maa “Masanɔɔ Mɛlɛka nɔ naa ni.” (Luomaŋnda 14:8) Te ŋ yiŋ pɛ, ŋ nyuna Chɛhowa le mbo tosa mi ‘kɔlta naalaŋ la dendu fo.’ (Pitɛ Tasoo 3:21) Chɛhowa soliŋ tɔnɔla sala baŋaa kpeku le piɛile naaleŋ mulioo. Nduyɛ ŋ laalaŋ kpeekpei maa o cho naa ke nyɛ o nyɛ o mɛi lediom.—Luomaŋnda 8:32.

14. Le yɛɛ Chɛhowa dou yɛ naa sawaa le acheleŋnda kaalaa?

¹⁴ Kaalaa nyindu Chɛhowa le nyɛ o nyɛ tosaa. Hɛnaŋ ndɔɔ cho ni, le mi wanaa cho ndu piɛiyo wa tol taamasi ndɔɔ kɔɔli. (Chɔŋ Tasoo 4:8-11) Te ŋ nɔ pɛ kaalaa le waŋnda, mɛɛ ŋ cho chɔmndo kpendekele maa ‘chuauwaa Mɛlɛka . . . Finya naa cho o fondaŋ ndɔɔ wo’ naŋ cho ni. (Maatiu 5:43-48) Sawala bɛndulaŋ la tiɔɔŋ la cho ni. O tasoo, Chɛhowa kaalaa, o diiŋ ndɔɔ, acheleŋnda kaalaa. (Maatiu 22:37-40) Nɛiyo opilɛ o naŋ chɔm kaalaa le waŋnda wo cho ni, pɛɛkoo nda a yooŋgu kɛndɛ leMasa Mɛlɛkaa okɔɔ. Te ŋ diikuŋ pɛ sawa Chɛhowaa le acheleŋnda kaalaa, taama taama puaapiliaa naa, kaala naa le ndu cho “fuuluu mɛɛ.”—Chɔŋ Tasoo 4:12, 20.

15. (a) Tɔnɔla kuɛɛ naŋ cho yɛ sɔlaa suŋ suŋ Chɛhowa o ba? (b) Nduyɛ la kuɛɛ naŋ cho yɛ sɔla o chilaŋ niŋ?

¹⁵ Chɛhowa ke naa tiindaŋndo maa le mɛɛ naŋ dɔu tiindaŋndo o sala baŋaa niŋ yɛ, o cho hakila naalaŋ naa “faŋa kɔɔli.” O nɔla mbo mal hakila naalaŋ fasɛi. (Nuawɔ Walta Wanaa Chiisuaa 3:19-21.) A mɛɛ naŋ yaasiaa suŋ yɛ, sala baŋaa tosa a sabu ni mi Chɛhowa hɛli waŋchieeya le ma simnuŋ chuauwaa ndɔ o choo choo niŋ. Nda cho yɛ wanaa pɔyaŋnda ni. (Luomaŋnda 8:15-17) O veelu wanaa cho “saa cheleŋ” nda wa le ma wa o yuŋgu ndɔɔ niŋ o chieeŋndo choo. Te a simnuŋ pɛ wanaa walaŋnda, a cho tofa mɛɛlaa sɔla. Te a chɔm pɛ lo lechoo wo o Chɛhowa lo, nda bɛɛ o cho nda chua maa chuauwaa ndɔ. (Luomaŋnda 8:20, 21; Sɔɔŋ Chɔɔmaŋndoŋ 20:7-9) Chɛhowa cho wa chuauwaa nduaa kaalaa chɔmndo le teleŋ o teleŋ. Sala baŋaa cho wa hunɔɔ a tɔnɔlaŋ le fɛɛŋ a fɛɛŋ. (Hibuluiya 9:12) Chɛhowa chii naa ke sɔviɔɔ hoo yɔŋgu, nduyɛ wana o wana nɔla mbo puu naa ndu o ba le.

16. Vɛɛ sala baŋaa mala yɛ naa le waa hɛnɛkɛ?

¹⁶ Te ŋ mulul pɛ yɔŋnda naala wɔɔŋndaŋ kɔɔ, nyɛ o nyɛ Nyina Wɔɔŋndo nɔla mbo tosa le naa kuunaa le waa o yuŋgu Chɛhowaa niŋ te. “Le pilɛ kpeele” Chiisu vi ni. Le fɛɛŋ a fɛɛŋ sala baŋaa o yɔŋguŋ ni. (Hibuluiya 9:24-26) Adam chuu naa piɔmndo, kɛ sala baŋaa cho naa yoomu fafɛɛŋndo ke ni. Sala baŋaa nɔla mbo piŋi naa o chieeŋ Setanaa niŋ, nduyɛ mbo faŋa naa siooŋii piɔmnde o kɔl.—Hibuluiya 9:24-26.

17. Yɛɛ kaala Chɛhowaa sim yɛ le num?

¹⁷ Lɔɔlɔɔ mɛila Mɛlɛkalaŋ la cho wa peelɔŋndo. Mɛɛ sawala Chɛhowa ke nyɛm o toosiaa woŋ la siŋgaŋ te yɛ, lende koni Chɛhowa siŋgaŋ te ni. Fɛɛŋ bɛɛ o hui naa le. (Malakai 3:6) Chɛhowa ke naa nyɛ mbo hiau yoomu o ke naa wo poloŋ. O ke naa kaala ndɔɔ. “Ŋ sina mɛɛ kpɛ Mɛlɛka kaala naa yɛ, nduyɛ kaala koŋ naa ŋ tiindaŋ ni. Wana kaalaa Mɛlɛka cho ni.” (Chɔŋ Tasoo 4:16, NW) Mɛila ndɔlaŋ, peelɔŋndo la peelɔŋ ni. Chieeŋndo cho suŋ suŋ simnɔŋ kpele hɛnɛkɛ kɛndɛ kɛndɔɔ. Wana o wana cho wa yoomu cho taamasi Chɛhowaa tolɔɔ kɔɔli nduyɛ ma kaaliaŋ veelaa velle. Buɛiyaa nduaa kpou o choo choo niŋ a o lɛŋndeŋ choo cho dimi aa, “Num Mɛlɛka naa, saŋgalaa cho le num, a lisaa, a kɔl kaloo, a balikaa, a bɛɛleŋ, a kpaayaa, a dialluŋ kalaŋ le fɛɛŋ a fɛɛŋ. Amiina.”—Sɔɔŋ Chɔɔmaŋndoŋ 7:12.