Kɔ o sɔɔŋ lebolloŋ sakpo

Kɔ o sɔɔŋ lebolloŋ sakpo

Hiou Lachi a Waa Wana Mɛlɛkaa!

Hiou Lachi a Waa Wana Mɛlɛkaa!

“La ke nyina Mɛlɛkaa fondaa le mbo wa nya kɔɔli o nyɛ o nyɛ fee niŋ nya nɔ le tosaa.”—KALEESIAŊNDA 5:​16.

CHONDOŊ: 22, 75

1, 2. Sinapɛŋgu yɛɛ puaapilɛnɔ pum ndoo nɔ yɛ a ndupila okɔɔ? Nduyɛ yɛɛ ndoo tosa yɛ?

MI LƆBƆTI sɔla yiŋɔɔ teleŋ o wa tiŋ kpasu wo, kɛ tonyaa ve nyɛ sɔvɛ o yoomu ndɔɔ niŋ te. Mbo dimi aa, “Yaa tosa suɛi wɔɔŋ kɛ kɛ le, kɛ kɔl nuu wa poloŋ. Mi waŋnda ndaa che ya maa I kendu o Mɛlɛka piɛiyo niŋ, I wa kɔlaŋ o wali pollo niŋ, nduyɛ mi yaa chua kɔɔfale malalaŋndeŋ teleŋndaŋ lapum o wɔsioo niŋ. Kɛ nyɔɔ pum ndoo lo wɔ kɔɔli.”

2 Lɔbɔti ndoo sina nyɛ lo kɔɔli wo le haaa mɛɛ mbo chua lanɔɔ. Mi ndu nda laa ndɔ ndaa tosa pisultaŋ o nyunala Baabuiyo choo. Laa ndɔ ndoo sina Baabuiyo nyɛkɛndɛi nduyɛ o ve ikala le nyunalaŋ mulioo le. Kɛ lepum, Lɔbɔti ndoo sina mulilaŋ te, nduyɛ mi siɔmbulaŋ laa bii ndu. Mbo dimi aa, “Mii yɔŋnuŋ maa yaa sina nyɛ nyɛ le. Mi yiyaŋ o yapila niŋ maa, ‘Te I yeema pɛ mi wa chilaŋ chuaa o sɔɔŋ Mɛlɛkaŋ niŋ le laa nuu, I nɔ mi tosa nyɛ.’” Nduyɛ mbo tosa keŋ. Mbo dimi aa, “Mi pɛɛku Baabuiyo, mi pɛɛku, mi pɛɛku haaa, okoŋ, mi sina tonyaa nyɛkɛndɛi. Mi sɔla sinapɛŋgoo, nduyɛ i hiou wa i sɔvɛ kpou ve, mi chaŋyɛi sɔvɛi wa naa Chɛhowa tɛɛŋ.”

3. (a) Yɛɛ bundɛi Lɔbɔti ve pɛɛku yɛ naa? (b) Sɔɔŋ sɔvɛŋ kuɛɛ naŋ cho yɛ yaasiaa?

3 Ŋ nɔla miŋ pɛɛku sɔɔŋ sɔviɔŋ o bundɛi Lɔbɔti ve niŋ. Kɛlɛŋgaa ŋ nɔ kɔl kalu Baabuiyo o tiŋ, nduyɛ miŋ kuɛ lɔɔlɔɔ o bɔŋaŋnda leKilisiɔŋndaŋ a o wali pollo niŋ. Kɛ keŋ sii-ŋguu naa wanaa landuŋ kɔl o sɔɔŋ Mɛlɛkaŋ nda le. Ɔɔ naapum ŋ tosa niŋ wallo kekelee le simnɔŋndo wanaa landuŋ kɔl o sɔɔŋ Mɛlɛkaŋ nda. Kɛ te ŋ mɛɛndaŋ naapilɛ pɛ, miŋ che nɛila naŋ nɔ miŋ tosa hiouwɔɔ lachioo laŋ. (Filipiaŋnda 3:​16) O buŋgɛi hei niŋ, ŋ cho nyunala sɔvɛlaŋ la yaa muli. Laŋ la cho ni, (1) Yɛɛ mala yɛ naa le sinaa te ŋ cho pɛ wanaa landuŋ kɔl o sɔɔŋ Mɛlɛkaŋ nda? (2) Vɛɛ naŋ looku yɛ simnɔŋ a kala poŋ o Mɛlɛka piɛiyo niŋ? (3) Vɛɛ waa a kala poŋ o Mɛlɛka piɛiyo niŋ mala yɛ naa lepaa o lepaa o yoomu naa niŋ?

MƐƐ NAŊ LOOKU SINA MAA Ŋ LANDUŊ KƆL O SƆƆŊ MƐLƐKAŊ YƐ

4. Le nɛɛ yaa sila cho o Ɛfisiaŋnda 4:​23, 24 wo cho yɛ?

4 Mɛɛ naŋ kandu Mɛlɛka piɛiyo, miŋ tosa siŋgaŋnda piiliaŋ yoomu naalaŋ. Hei ndii mɛɛlu teleŋ naŋ sɔla yiŋɔɔ wo le. Baabuiyo dimul naa aa, “La hiou lachi a simnɔŋndo a sɛnɛi yuka o yiyaŋnda nyalaŋ niŋ.” (Ɛfisiaŋnda 4:​23, 24, NW) Le mɛɛ naŋ cho wanaa lahakiaa yɛ, ŋ nɔ miŋ hiou lachi a siŋgaŋndaŋ tosaa. O yɔŋ bɛɛ miŋ piɛi Chɛhowa le wɔsila bɔɔbɔɔ, ŋ nɔ miŋ kɛsi chaŋyɛi nɛi ikala poŋ a ndu.—Filipiaŋnda 3:​12, 13.

5. Nyunala kuɛɛ la mala yɛ naa le sinaa te ŋ landuŋ pɛ kɔl o sɔɔŋ Mɛlɛkaŋ?

5 Ŋ wa feleŋgɔnɔ ɔɔ bɛndu yuu, ŋ nɔ miŋ mɛɛndaŋ naapila nyɛkɛndɛi. Nyunaŋndɔ aa, ‘I cho pa chɔɔ maa I cho chɔɔloo kɔllo landɔŋndo le sɔɔŋ Mɛlɛkaŋ? I cho pa chɔɔloo simnɔŋndo maa Kiliti? Vɛɛ kaa nuu a mɛɛ ya tosa sɔɔŋ o bɔŋaŋndaŋ yɛ chɔm yɛ a ya okɔɔ? Vɛɛ balta ya duau laŋ la chɔm yɛ nyɛ kpeekpei ya yeema o yoomu nuu niŋndo? Vɛɛ mɛɛ ya pɛɛku yɛ, mɛɛ ya chuɛɛnuŋ yɛ, a mɛɛ ya bii silaa yɛ chɔm yɛ a ya okɔɔ? Baa I simnuŋ pa kaasoŋnɔɔ o Mɛlɛka piɛiyo niŋ?’ (Ɛfisiaŋnda 4:​13) Nyunalaŋ ndaŋ la mala naa le saalɔŋndo mɛɛ kpɛ naŋ tosa niŋ hiouwɔɔ lachioo o Mɛlɛka piɛiyo niŋ yɛ.

6. Yɛɛ cheleŋ mala yɛ naa le sinaa te ŋ landuŋ pɛ kɔl o sɔɔŋ Mɛlɛkaŋ?

6 Teleŋndaŋ lapum, ŋ yeema mi acheleŋnda mala naa le chɔɔ te ŋ cho pɛ wanaa landuŋ kɔl o sɔɔŋ Mɛlɛkaŋ nda. Mi Pɔɔl, wana Chiisu vem hɔlte ndɔ wo tɛɛsiaa maa wana cho wana Mɛlɛka le wo, ɔɔ wana nɔ kaa iwana chieeyaa wo, bii bila maa yoomu ndɔɔ cho Mɛlɛka kɔllo nɛŋi le le. Kɛ wana landuŋ kɔl o sɔɔŋ Mɛlɛkaŋ ndo nɔ sinapɛ-ŋgoo a mɛɛ Mɛlɛka cha sɔɔŋ yɛ. O sina maa Chɛhowa hɛnaŋ a kaa iwana chieeyaa le. (Kɔliŋtiaŋ Tasoo 2:​14-16, NW; 3:​1-3) Mi bɛnduaa nɔ yiyaŋ Kilitioo wa sina chɔ chɔ te puaapiliaa kandu dɔɔ pɛ sɔɔŋ iwana chieeyaŋ tosaa, nduyɛ ma kindiŋ le nda mi-ŋgioo o nɛi. Te bɛnduaa kindiŋ pɛ le naa miŋgioo o nɛi, ŋ cho pa chɛlɔɔ mala ndaa nduyɛ miŋ tosa siŋgaŋnda bɛnda laŋ? Te ŋ tosa pɛ lende, ŋ cho chɔm kɛsɛ maa ŋ yeema miŋ simnuŋ a kala poŋ o Mɛlɛka piɛiyo niŋ.—Ikilisiaatii 7:​5, 9.

SIMNUŊ O KALA POŊ O MƐLƐKA PIƐIYO NIŊ

7. Vɛɛ naŋ looku yɛ sina maa wana landuŋ kɔl o sɔɔŋ Mɛlɛkaŋ ndo cho kɔ wana nɔ kalu Baabuiyo wo le?

7 Kɔl kalu Baabuiyo nɔɔ cho letuu le waa wana landuŋ kɔl o sɔɔŋ Mɛlɛkaŋ ndo le. Masaa Sɔlɔmɔŋ ndoo sina tau a Chɛhowa okɔɔ, nduyɛ diomnda taasila o poonyiaa laŋ la cho o Baabuiyo niŋ. Kɛ o mɛɛlulaŋ kpɔŋ, mi chaŋyɛi nduɛi a Chɛhowa yɔŋnuŋ pɔmbɔlɔsɔɔ, nduyɛ o lo o tiindaŋ ndɔɔ choo le. (Masaa Bɛnduaa Tasiaa 4:​29, 30; 11:​4-6) Lelaŋ, yɛɛ naŋ nɔ yɛ miŋ chɔɔlu o kɔl kalu Baabuiyo choo? Ŋ nɔ miŋ hiou lachi a tiindaŋ naa kindioo. (Kolosiaŋnda 2:​6, 7) Vɛɛ naŋ tosa yɛ hei?

8, 9. (a) Yɛɛ mala yɛ naa le tiindaŋ naa kindioo? (b) Kpeleŋ kuɛɛ naŋ kɛsi yɛ te ŋ wa pɛ pɛɛkoo a yiyaŋndo? (Tofa fotueiyo o peele naŋ kandu leŋ choo.)

8 O wɔsila kɛmɛla taselaŋ niŋ, mi Pɔɔl dɛɛniaa Kilisiɔŋnda le hiouwɔɔ lachi ‘a sɔɔŋ ŋkaasoŋndoŋ pɛiyo.’ (Hibuluiya 6:​1) Vɛɛ naŋ duau yɛ silaa hoo o wali niŋ hau? Nɛi sɔviɔɔ opilɛ cho yauwo hoo pɛɛkoo ni, Lo o Kaala Mɛlɛka wo Bɛŋgu. Hei cho naa mala le biyɔɔ bila mɛɛ naŋ duau sawala mandaala Baabuiyo o wali niŋ yɛ. Te o yɔŋ pɛ maa a chii niŋ yau koŋ pɛɛku, yaula cheleŋ la cho la mala num le tiindaŋ numndo kindioo poŋ ndo. (Kolosiaŋnda 1:​23) Ŋ nɔ vɛlɛ miŋ yiyaŋ o nyɛ naŋ pɛɛku wo choo, nduyɛ miŋ nyuna Chɛhowa le naa malaa miŋ che nɛila naŋ duau ndu o wali niŋndaŋ.

9 Te ŋ wa pɛ pɛɛkoo nduyɛ miŋ wa yiyaŋndo, kpeleŋ naa nɔ mbo wa le yeemɛi nɔɔ le Chɛhowa kɔllo nɛŋioo a ndu diikɔŋndo. (Sam 40:​8; 119:​97) Ŋ nɔ vɛlɛ miŋ kɛɛ nyɛ o nyɛ kuuna naa le hiouwɔɔ lachioo tosaa o Mɛlɛka piɛiyo niŋ.—Taitɔɔ 2:​11, 12.

10. Yɛɛ feleŋguaa nɔ yɛ ma tosa le simnɔŋndo a kala poŋ o Mɛlɛka piɛiyo niŋ?

10 Te feleŋgɔnɔɔ ŋ cho ni, a nɔ pa kpeleŋndaŋ o Mɛlɛka piɛiyo niŋ? Puaapilɛnɔ pum cho wallo o Bɛtɛɛl. Nduyɛ teleŋnda bɔɔbɔɔ mbo suukaŋ a feleŋguaa wa yiŋɔɔ sɔlaa o bɔŋaŋ ibuŋgaa wa. Mbo nyuuniaa nda a kpeleŋnda nda kɛsi o Mɛlɛka piɛiyo niŋndaŋ okɔɔ. Mbo saaluŋ maa a bɔɔbɔɔ nɔ tuu kɛndɔɔ a mɛɛ nda yeema le Chɛhowa piɛiyo o chilaŋ niŋ yɛ. Apum kɛɛsiaa le wali lɔɔlɔɔ Mɛlɛkaa tosaa, ɔɔ le kɔlaŋ naa yeemɛi cho tau le wanaa dimiaa yooŋgu kɛndiaa wa. Kɛ feleŋguaa apum sina mɛɛ nda nɔ ma muli nyunala ndɔlaŋ yɛ le. Baa keŋ sim ni maa a nɔ iyeema le kpeleŋnda kɛsi o Mɛlɛka piɛiyo niŋ te? Te feleŋgɔnɔɔ ŋ cho ni, nyunaŋndɔ aa, ‘Baa I cho pa kɔlaŋ o bɔŋaŋndaŋ a o wali pollo niŋ kanifuule wanaa velu ya wa yeema ya mi tosa keŋ? Ɔɔ I nɔ pa chaŋyɛi a Mɛlɛka?’ O kpeekpei niŋ, naa kpou nɔ miŋ kɛsi kpeleŋndaŋ o Mɛlɛka piɛiyo niŋ, chuaambɔ ni, kaasoŋnɔ ni. Kpeleŋndaŋ ndaŋ la cho naa mala le simnɔŋndo a kala poŋ o Mɛlɛka piɛiyo niŋ.—Ikilisiaatii 12:​1, 13.

11. (a) Yɛɛ naŋ nɔ yɛ miŋ tosa le miŋ landuŋ kɔl o sɔɔŋ Mɛlɛkaŋ? (b) Taamasi Baabui kuɛɛ naŋ nɔ yɛ miŋ tol kɔɔli?

11 Te ŋ che pɛ naa naŋ nɔ miŋ tosa hiouwɔɔ lachioo wa, ŋ nɔ miŋ kandu siŋgaŋndaŋ tosaa. Hei cho bɔɔ suɛi sɔvɛ kanifuule, o piiliaŋ wa naa achal ɔɔ piɔm naa. (Kaleesiaŋnda 6:​7, 8) Chɛhowa sina maa ŋ cho walaŋ te, kɛ mbo ke naa nyina ndɔ diandaa le naa malaa. Nduyɛ ŋ nɔ miŋ tosa wallo kekelee. Mi Ŋgɔɔ Chɔŋ Baa, o wa waŋndo opilɛ o Dialii Kuumbaŋ Choo Ve choo wo suaa teleŋ pilɛ a nyɛ Luku 13:​24 dimi wo. Mbo dimi aa, “Waŋnda a bɔɔbɔɔ kɛɛ batiuwaa sɔlaa kanifuule, a cho wallo tosa kekelee le hiouwɔɔ lachioo tosaa le.” Ŋ nɔ miŋ wa maa Chekɔpu o sɔŋga a maalikɛinɔɔ wo. Nduyɛ o vi ŋdial te haaa mbo sɔla sala ndoo yeema wo. (Chɛnɛsee 32:​26-28) Mi che bɛɛ nyɛ yeelɛiyo pila Baabuiyo pɛɛkoo cho ni, kɛ ŋ nɔ miŋ chua ndu maa yau bundɔŋ mamaa le. Ŋ nɔ miŋ tosa wallo le tonyala sɔvɛla mala naalaŋ saalɔŋndo o ndu niŋ.

12, 13. (a) Yɛɛ mala yɛ naa le nyɛ Luomaŋnda 15:​5 dimi wo dɔwɔɔ o wali niŋ? (b) Vɛɛ taamasi Pitɛ wo a sila ndɔɔ mala yɛ naa? (c) Yɛɛ ŋ nɔ yɛ ma tosa le simnɔŋndo o kala poŋ o Mɛlɛka piɛiyo niŋ? (Tofa kɔfoo “ Nyɛ Ŋ Nɔ Ma Tosa le Hiouwɔɔ Lachi o Mɛlɛka Piɛiyo Niŋndo.”)

12 Te ŋ kindi kindiŋ pɛ le hiouwɔɔ lachioo tosaa o Mɛlɛka piɛiyo niŋ, nyina diandaa cho naa mala le yiyaŋ naa siŋgaa. O pɔm pɔmbɔ, ŋ cho pɛɛku le yiyaŋndo nɔɔ maa Kiliti. (Luomaŋnda 15:​5) Nyina diandaa nɔla mbo mala naa le yiyaŋnda wɔɔŋndaŋ naa faŋaa o kɔl nduyɛ miŋ nɔ suliŋnda nɛŋi Mɛlɛka kɔllo laŋ. (Kaleesiaŋnda 5:​16, 22, 23) Te ŋ saaluŋ pɛ maa ŋ cho kɔllo handɔɔ o nyɛm kiɔɔŋ choo ɔɔ yelelaŋndo, ŋ nɔ miŋ vi ŋdial te. Ŋ nɔ miŋ hiou lachi a Chɛhowa nyunaa le nyina diandaa le mbo mala naa le hɔlla mulioo o sɔɔŋ bɛnda woŋ choo. (Luku 11:​13) Loonuŋ a Pitɛ, wana Chiisu vem hɔlte ndɔ wo. Ndoo yiyaŋ lɔɔlɔɔ maa Kiliti le. (Maatiu 16:​22, 23; Luku 22:​34, 54-62; Kaleesiaŋnda 2:​11-14) Kɛ o vi ŋdial te, nduyɛ mi Chɛhowa mala ndu. O pɔm pɔmbɔ, mi Pitɛ pɛɛku le yiyaŋ Kilitioo nɔɔ. Nduyɛ naa bɛɛ nɔla miŋ tosa keŋ.

13 O koŋ kɔɔli mi Pitɛ chɔm suliŋnda kpeekpeila mala naalaŋ. (Nuawɔ Pitɛ Diiŋ Ndɔɔ 1:​5-8.) Ŋ nɔ miŋ tosa wallo kekelee le miŋ wa wanaa tiu kɔlta naalaŋ ba, miŋ wa wanaa biuwaŋ, nduyɛ miŋ biyaŋ vellaa velle maa pɔmbɔɔ a bɛndu, a suliŋnda kɛndɛla cheleŋ. Lepaa o lepaa, ŋ nɔ miŋ nyunaŋ aa, ‘Suliŋ kuɛɛ ya nɔ yɛ hau mi tosa wallo choo o mala ya le simnɔŋndo o kala poŋ o Mɛlɛka piɛiyo niŋndo?’

DƆU SAWALA MANDAALA BAABUIYO O WALI NIŊ LEPAA O LEPAA

14. Vɛɛ kɔllo landɔŋndo o sɔɔŋ Mɛlɛkaŋ piiliaŋ yɛ yoomu naa?

14 Te ŋ nɔ pɛ yiyaŋ Kilitioo, mbo piiliaŋ kaa naŋ nɔ miŋ chɔm o wallo niŋ ɔɔ o sukuu wo, mɛɛ naŋ suaa yɛ, a mɛɛ naŋ tosa kɛɛsiaalaŋ lepaa o lepaa yɛ. Kɛɛsiaala naŋ tosalaŋ la cho chɔm maa ŋ cho kindiŋndo le taamasi Kilitioo tolɔɔ kɔɔli. Le mɛɛ naŋ cho wanaa landuŋ kɔl o sɔɔŋ Mɛlɛkaŋ nda yɛ, ŋ yeema mi nyɛ o nyɛ tɛɛmbuu chaŋyɛi nɛi a Chɛhowa le. Te tɔɔndaŋndo komal naa pɛ le iwɔɔŋnde tosaa, kaasoŋyɛi naŋ nɔ o Mɛlɛka piɛiyo niŋndo cho naa mala le tɔɔndaŋ koŋ kpakpalaa. Tuupa miŋ tosa kɛɛsiaa, ŋ nɔ miŋ sim kpɛ nduyɛ miŋ nyunaŋ aa, ‘Sawala mandaala Baabui kuɛɛ mala yɛ ya? Yɛɛ Kiliti wa yɛ tosa o suɛi hei niŋ? Yɛɛ cho yɛ Chɛhowa kɔllo nɛŋi?’ Ŋ nɔ miŋ tosa ndi maa kaa naa le yiyaŋ waa naa nɔɔ. Lelaŋ, ŋ soonuŋndɔ a sɔɔŋ komal naa lepum ndoŋ. Le i kɛ kɛ, ŋ cho sawa mandaa Baabui mala naa wo nua le kɛɛsiaa tosaa a taasi.

15, 16. Vɛɛ yiyaŋndo maa Kiliti mala yɛ naa le kɛɛsiaa tosaa a taasi le (a) wana naŋ nɔ miŋ chua o nɔɔ niŋndo? (b) wanaa naŋ nɔ miŋ bii chaŋyɛi ya?

15 Wana naŋ nɔ miŋ chua o nɔɔ niŋndo. Sawa mandaa Baabui mala naa wo cho Kɔliŋtiaŋ Diiŋ Ndɔɔ 6:​14, 15 ni. (Nuawɔ.) Mi Pɔɔl chɔm kpendekele maa wanaa landuŋ kɔl o sɔɔŋ Mɛlɛkaŋ nda chi sɔɔŋ o nɛi pilɔɔ choo nda wanaa nɔ yiyaŋ iwana chieeyaa wa le. O cho o nɛi pilɔɔ choo le wanaa ŋiɔɔŋnda haa cha sɔɔŋ te. Vɛɛ sawa mandaa Baabuiyo hoo mala yɛ num le wana ŋ cho chuaa o nɔɔ niŋndo hɛlioo?

16 Wanaa naŋ nɔ miŋ bii Chaŋyɛi ya. Sawa mandaa Baabuiyo cho o Kɔliŋtiaŋ Tasoo 15:​33. (Nuawɔ.) Wana landuŋ kɔl o sɔɔŋ Mɛlɛkaŋ ndo tosa chaŋyɛi a wanaa tosa tiindaŋ ndɔɔ pɔmbɔlɔsɔɔ wa le. Yiyaŋ mɛɛ ŋ duau sawa mandaa Baabuiyo hoo o wali niŋ o sɔɔŋ yɛ yɔɔŋ niŋ yɛ. Le taamaseliiyo, vɛɛ o mala yɛ num le kɛɛsiaa tosaa le chaŋyaŋ biyɔɔ o Intanɛtiiyo choo? Vɛɛ o mala yɛ num le chɔɔ te a nɔ pɛ ma tosa pisultaŋ a wanaa ŋ sina le wa o Intanɛtiiyo choo?

Baa kɛɛsiaala nilaŋ la cho ya mala le simnɔŋndo wana landuŋ kɔl o sɔɔŋ Mɛlɛkaŋ ndo? (Tofa pɛl 17)

17-19. Vɛɛ waa wana landuŋ kɔl le sɔɔŋ Mɛlɛkaŋ ndo mala yɛ num (a) le sɔɔŋ fondoŋ kpakpalaa? (b) le kpeleŋnda kɛndɛlaŋ nɔɔ? (c) le sinaa mɛɛ ŋ nɔ ma bii kɛɛ sinapɛŋgoo yɛ.

17 Sɔɔŋ luei kaa iMɛlɛkaya naa o kpundɔɔ niŋndoŋ. Ŋ saaluŋ sila sɔviɔɔ o Hibuluiya 6:​1. (Nuawɔ.) Yɛɛ cho yɛ “kaala fondola” naŋ nɔ miŋ kpakpala laŋ? Ndu cho sɔɔŋ fondoŋ ni, ŋ nɔla miŋ mala naa le simnɔŋndo a kala poŋ o Mɛlɛka piɛiyo niŋ te woŋ. Silaa hoo a kaala fondolaŋ okɔɔ mala naa le nyunalaŋ ndaŋ mulioo, ‘Baa wallo hoo ke ya pa tɔnɔɔ, ɔɔ nyɛ ke ya tɔnɔ le wo o cho ni? Baa I nɔ pa mi luei balaŋ o yulale ya kɛɛsiaa leŋ ndeŋ niŋ? Le yɛɛ I nɔ mi del wanaa cho kindiŋndo le chieeŋndo hoo si-ŋgaa wa choo le?’

Baa kɛɛsiaala nilaŋ la cho ya mala le kpeleŋndaŋ kɛsioo o Mɛlɛka piɛiyo niŋ? (Tofa pɛl 18)

18 Kpeleŋndaŋ o Mɛlɛka piɛiyo niŋ. O pɛɛku Chiisu wo o pembii Ɔlifiive choo, mi Chiisu ke naa sila sɔviɔɔ a kpeleŋndaŋ kɛsioo okɔɔ. (Maatiu 6:​33) Mi wana landuŋ kɔl o sɔɔŋ Mɛlɛkaŋ ndo kɛsi Masale Mɛlɛkaleŋ nyɛ tasoo peŋ o yoomu ndɔɔ niŋ. Sawa mandaa Baabuiyo hoo mala naa le nyunalaŋ ndaŋ mulioo, ‘I nɔ pa mi kuɛ o sukuu dɛnɛ sinaa bɛndoo te o yɔŋ pɛ mi chii sukuu dɛnɛ sinaa pɔmbɔɔ? I nɔ pa mi chɛl baalaa opum?’

Baa kɛɛsiaala nilaŋ la cho ya mala le kɔl nyuloo nɔɔ a wanaa cheleŋnda? (Tofa pɛl 19)

19 Kɛɛ sinapɛŋgoo. Sila Pɔɔl ke Kilisiɔŋnda o Luom niŋndo nɔla mbo mala naa te kɛɛ sinapɛŋgoo luɛi naa pɛ tɛɛŋ a wanaa cheleŋnda. (Luomaŋnda 12:​18) Taamasi Chiisoo naŋ cho tolɔɔ kɔɔli ni. Lelaŋ, miŋ kindiŋ le ‘mi kɔl nyuloo wa naa tɛɛŋ a wana o wana.’ Yɛɛ naŋ nɔ yɛ miŋ tosa te kɛɛ sinapɛŋgoo luɛi naa pɛ tɛɛŋ a wanaa cheleŋnda? I kendu pa le miŋ chɛl yiyaŋ wana cheleŋndo? Ɔɔ waŋnda sina naa pa le waa wana kindiŋ le kɔl nyuloo tosaa wo?—Chemisi 3:​18.

20. Le yɛɛ ŋ yeema yɛ hiouwɔɔ lachioo tosaa o Mɛlɛka piɛiyo niŋ?

20 Taamaseliilaŋ ndaŋ la chɔm mɛɛ sawala mandaala Baabuiyo mala naa le kɛɛsiaalaŋ tosaa yɛ, kɛɛsiaala chɔm maa nyina Mɛlɛkaa cho naa nɛi chɔmaa kioo laŋ. Te ŋ landuŋ pɛ kɔl o sɔɔŋ Mɛlɛkaŋ, yoomu naa cho nɔ nyaaloo a kɔl hiniaa. Mi Lɔbɔti naŋ soo suŋ a ndu okɔɔ wo dimi aa, “Mɛɛ ya kindi chaŋyɛi nɛi naa Chɛhowa tɛɛŋ, mi simnuŋ pɔnɔ kɛndɛ a finya kɛndɛ. Mi sɔla kɔl hiniaa a nyaaloo.” Te ŋ kindiŋ pɛ kpoke le simnɔŋndo wanaa Mɛlɛkaa, naa bɛɛ cho tɔnɔlaŋ tueiyɔɔ yeela tau. Ŋ cho nɔ nyaaloo suŋ suŋ, nduyɛ o chilaŋ niŋ, ŋ cho “sɔla yoomu cho yoomu kpeekpeiyo wo.”—Timoti Tasoo 6:​19.