1. Le yɛɛ nda ke yɛ naa silaa lepum, nduyɛ le yɛɛ naŋ nɔ yɛ miŋ yaŋ ndu nilaŋ?

TELEŊ o teleŋ, naa kpou yeema mi waŋndo sila naa. Nduyɛ lepum, miŋ nyuna wana naŋ nɔ bɛɛleŋ tau le ndu wo le mbo sila naa. Ɔɔ teleŋndaŋ lapum, mi waŋndo hiŋ sakpo o naa lo, okoŋ mbo ke naa silaa maa ŋ kandu kɔlaŋ o nɛi wɔɔŋndo choo, nduyɛ maa ŋ cho suei kiolɔɔ le keŋ. (Kalee. 6:​1) Nduyɛ lepum te ŋ tosa pɛ biondɔŋndo, mi waŋndo sila naa le naa miŋgioo o nɛi. Ŋ nɔ miŋ yaŋ silaa nilaŋ mɛɛ mɛɛ waŋndo ke naa ndu. Hei tosaa cho suɛi kɛndɛ le naa, nduyɛ i piŋi yoomu naa.—Pulɔ. 6:​23.

2. A mɛɛ Pulɔwaa 12:​15 dimi yɛ, le yɛɛ naŋ nɔ yɛ miŋ yaŋ silaa nilaŋ?

² Bolle Baabuile buŋgɛi hei tɔlnuŋ choo leŋ le dɛɛniaa naa maa, ŋ nɔ mi ‘yaŋ nilaŋ nyɛkɛndɛ kɛndɛ, miŋ tuei sɔɔŋ taasiŋ wanaa taasiaa a dimi woŋ.’ (Pulɔ. 22:​17) Wana o wana sina sɔɔŋ kpou le. Mɛɛ mɛɛ naŋ wa, waŋndo cho o hiou naa kɔl kaloo ɔɔ o nɔ taasioo mbo hiau naa wo. (Nuawɔ Pulɔwaa 12:​15.) Lelaŋ te ŋ yaŋ pɛ nilaŋ o sila nda ke naa wo, mɛɛ ŋ cho chɔm kpendekele maa, wanaa tusiaŋnda naŋ cho ni. Hei cho vɛlɛ chɔm maa ŋ sina kpeleŋ naa, nduyɛ maa ŋ yeema mi waŋndo mala naa le miŋ komal kpeleŋnda naalaŋ. Sanaa a nyina Mɛlɛkaa, mi Sɔlɔmɔŋ Masa taasioo dimi aa: “Tuula bɔɔ bɔɔ mi la tambu, le wana silaa lepɛŋndo.”—Pulɔ. 15:​22.

3. O nɛila kuɛɛ choo naŋ sɔla yɛ silaa?

³ Lepum, mi waŋndo hiŋ sakpo o naa lo le naa silaa ɔɔ miŋ sɔla silaa o nɛi cheleŋ choo. Vɛɛ naŋ sɔla yɛ silaa o nɛi cheleŋ choo? Naapum te ŋ veelu pɛ diomndaŋ o Baabuiyo niŋ ɔɔ o yaula naalaŋ niŋ, mi keŋ tosa miŋ sim kpɛ, okoŋ miŋ yiyaŋ a nyɛ naŋ tosa wo okɔɔ, nduyɛ mi i nyindu naa le yɛlɛmiaalaŋ tosaa. (Hibu. 4:​12) Ŋ dimi maa silaa o nɛi cheleŋ choo cho koŋ ni. Yɛɛ naŋ yiyaŋ yɛ te ŋ dimi pɛ maa, waŋndo hunɔɔ sakpo o naa  lo le naa silaa? Lepum, mi bɛndu kundaa ɔɔ puaapilɛnɔ cheleŋ sila naa, nduyɛ mbo chɔm naa nyɛ naŋ nɔ miŋ tosa wallo choo wo. Ŋ dimi maa sila waŋndo ke naa sakpo wo cho koŋ ni. Te waŋndo kaala naa pɛ mbo ke naa sila tɔlnuŋ o Baabuiyo choo wo, ŋ chɔm maa ŋ nɔ balika melaa, te ŋ yaŋ ndu pɛ nilaŋ, nduyɛ miŋ dɔu sila koŋ o wali niŋ.

4. A mɛɛ Ikilisiaatii 7:​9 dimi yɛ, yɛɛ naŋ nɔ yɛ miŋ tosa te waŋndo ke naa pɛ silaa?

⁴ Wana dimi isɔɔ a tonya, miŋ che ndi ikala te waŋndo hiŋ pɛ sakpo o naa lo le naa silaa. Lepum, mi keŋ tɛɛmbuu naa kɔllo. Le yɛɛ? Mi che bɛɛ ŋ sina maa wanaa lahakiaa naŋ cho ni, kɛ lepum te waŋndo che pɛ biondɔŋ naŋ tosa wo, nduyɛ mbo sila naa, mi i wa simullo le ndi chɛlɔɔ. (Nuawɔ Ikilisiaatii 7:​9.) Nduyɛ lepum, miŋ kandu nɛilaŋ nuuviaa le kafɛilaŋ yɔŋgoo ɔɔ miŋ nɔ yiyaŋ wɔɔŋndo a wana ke naa silaa wo okɔɔ, nduyɛ a mɛɛ o ke naa ndu yɛ. Naapum, miŋ pɛɛsa wana koŋ, okoŋ miŋ nyunaŋ aa: ‘Nɛɛnɛ ke yɛ ndu dioo le mbo sila ya? Ndu bɛɛ mbo benduŋ.’ Nduyɛ mi hei tosa, ŋ chue sila nda ke naa wo le, te koŋ te miŋ nyuna wana cheleŋ le mbo sila naa ɔɔ mbo dimul naa sɔɔŋ naŋ yeema tueiyɔɔ woŋ.

5. Yɛɛ naŋ cho yɛ yaasiaa o buŋgɛi hei niŋ?

⁵ O buŋgɛi hei niŋ, ŋ cho yaasiaa tamaseliilaŋ o Baabuiyo niŋ a wanaa kɛɛ silaa wa okɔɔ vɛlɛ a wanaa chɛl silaa wa. Ŋ cho vɛlɛ yaasiaa nyɛ mala naa miŋ chɛl silaa, okoŋ miŋ sɔla tɔnɔɔ leniŋndo.

6. Mi Masaa Luehobowam kɛɛ sila bɛnduaa ndaa ke ndu wo. Yɛɛ naŋ pɛɛku yɛ o keŋ niŋ?

⁶ Ŋ yaasiaŋndɔ tamasi Luehobowam ndo. Mɛɛ o simnuŋ masaa le Isɔluɛi, mi wanaa o wa masaleŋ choo wa dimul ndu le mbo faŋa nda wolɔɔla lusulɛila finya ndɔ Sɔlɔmɔŋ ndoo handu nda choo laŋ. Nduyɛ i wa bɔɔ suɛi kɛndɛ bɛndu, mɛɛ Luehobowam nyuna bɛnduaa yuuwa o Isɔluɛi niŋ, le ma chɔm ndu mɛɛ o nɔ mbo bii wanaa kaŋ yɛ. Mi bɛnduaa yuuwa dimul ndu maa, te o tosa pɛ nyɛ wanaa kaŋ ndaa dimul ndu wo, a cho ndu toolu o masale ndɔleŋ niŋ. (1 Masaa. 12:​3-7) Wana che pɛ maa, Luehobowam ndoo hini kɔl a sila koŋ te. Le hei, mbo nyuna chaaŋaa nduaa nda chɛŋ nda le ma sila ndu. Ŋ dimi maa puaa haa wa niŋ o wɔsila 40 laŋ niŋ, nduyɛ maa ndaa sina niŋ sɔɔŋ ŋpum o yoomoo niŋ. (2 Kolo. 12:​13) Mi chaaŋaa nduaa haa ke ndu sila wɔɔŋndo. Ma sila ndu maa, o chɔɔlu wanaa kaŋ wolɔɔla lusulɛilaŋ handɔɔ choo. (1 Masaa. 12:​8-11) Mi Luehobowam sɔla niko kɛɛsiaalaŋ la tiɔɔŋ. Nduyɛ nyɛ ndoo nɔla mbo mala ndu wo, wa Chɛhowa nyunaa o piɛileŋ niŋ le mbo chɔm ndu sila o nɔ mbo tol kɔɔli wo ni. Kɛ mbo kɛɛsiaa le mbo chɛl sila chaaŋaa nduaa ke ndu wo. Le kɛɛsiaa wɔɔŋ o tosa koŋ ndo, mi ndu nda waŋnda Isɔluɛi saŋga tau. Naa bɛɛ, lepum sila nda ke naa wo ve nyɛ naŋ yeema tueiyɔɔ wo le. A koŋ kpou, te o yɔŋ pɛ maa o Baabuiyo choo sila koŋ tɔlnuŋ ni, ŋ nɔ miŋ chɛl ndu.

7. Yɛɛ naŋ pɛɛku yɛ o tamasi Masaa Yusaya wo niŋ?

⁷ Mi Masaa Yusaya bɛɛ kɛɛ sila nda ke ndu wo. A teleŋ pilɛ, mbo kua o chiɛi Mɛlɛkaa niŋ, okoŋ mbo luɛi o fondaŋ ndaa luam nyɛm chuŋ kɛndɔŋ ndo. Nduyɛ wanaa soliaa lasalaa kinɛi ndaa nɔ dioo ni, le luɛiyɔɔ o fondaŋ koŋ. Mɛɛ o luɛi loŋ, ndoo yeema nyɛm chuŋ kɛndɔŋ lomɔɔ o maaŋ ndaa luam nyɛm chuŋ kɛndɔŋ ndo choo. Mi wanaa soliaa lasalaa dimul ndu aa: “Yusaya, o cho num te nɔ ma lom nyɛm chuŋ kɛndɔŋ o Mɛlɛka Yaawɛɛ lo le. Wanaa soliaa lasalaa a fula o pulale Elɔŋdeŋ choo wa, nda sɔla dindioo Mɛlɛka o hɔl le kpeku koŋ tosaa ni.” Baa mi Yusaya chɛl pa sila koŋ? O kpeekpei niŋ, te ndoo wa pɛ wana tusiaŋ, o wa sila koŋ chɛlɔɔ, mi ndoo fula sakpo o chiɛi Mɛlɛkaa niŋ. Nduyɛ Chɛhowa wa ndu malɔɔ haki. Kɛ “[mbo] duaunuŋ tumbe.” Le yɛɛ ndoo kɛɛ yɛ  sila ndaa ke ndu wo? Naapum, mbo yiyaŋ maa le mɛɛ o wa masaa yɛ, o nɔ dioo le mbo tosa nyɛ o nyɛ o yeema pɛ. Kɛ o cho kɛɛsiaa Chɛhowaa le wa koŋ te. Nduyɛ mi Chɛhowa duau ndu naa ŋlɛlɔɔ choo le yoŋga ndɔɔ. ‘Naa wɔɔŋ koŋ lo ndu choo haaa mbo sɔla piɔmndo.’ (2 Kolo. 26:​16-21) Tamasi Yusaya wo pɛɛku naa maa, mɛɛ mɛɛ naŋ wa, te ŋ kɛɛ pɛ sila tɔlnuŋ o Baabuiyo choo wo, Chɛhowa hini kɔl a naa le.

8. Yɛɛ Choobu ndoo tosa yɛ mɛɛ nda ke ndu silaa?

⁸ Baabuiyo chɔm naa vɛlɛ tamaseliilaŋ lapum, a wanaa chɛl silaa wa okɔɔ. Nduyɛ mi Chɛhowa duau nda sala le keŋ. Ŋ tofaŋndɔ tamasi Choobu wo. Mi che bɛɛ ndoo nɔ siooŋii Mɛlɛkɛi, kɛ o ve walaŋ te. Le mɛɛ ndoo wa o nyɛkindilaa bɛŋgu yɛ, mbo dimi sɔɔŋ wɔɔŋndoŋ ŋpum. Nduyɛ fulamakɔɔlioo wa ni, mi Ɛlihu a Chɛhowa ke ndu silaa le keŋ. Vɛɛ Choobu ndoo che yɛ sila nda ke ndu koŋ ndo? Mbo tusiŋ, nduyɛ mbo chɛl sila koŋ. Mbo dimi pɛŋ aa: “Nyɛ o nyɛ ya ii dimi I dimi lɛ le. Nyɛ koŋ ya I chal o chundoo niŋ a o pultaŋ niŋ ni le chɔmndo maa I tosa yɔŋ wɔɔŋndo a num.” Mi Chɛhowa duau Choobu sala le mɛɛ ndoo tusiŋ, nduyɛ mbo chɛl silaa yɛ.—Choobu 42:​3-6, 12-17.

9. Vɛɛ Muuse kɛsullɛ naa tamasi kɛndɛ kɛndɔɔ, te o hiŋ pɛ a silaa chɛlɔɔ okɔɔ?

⁹Muuse cho vɛlɛ tamaseliiyo opilɛ, le wanaa chɛl silaa le biondɔŋ ndaa wa. A teleŋ pilɛ, mbo duaunuŋ tumbe, nduyɛ mbo kɛɛ Chɛhowa bɛɛleŋ kioo. Mi keŋ tosa mi dikeŋnaŋ ndoo nɔ le luɛiyɔɔ o Lɛŋnde Mɛyaaleŋ niŋndo hialuŋ ndu. (Nɔm. 20:​1-13) Mɛɛ o wa Chɛhowa nyɔɔloo a suɛi keŋ okɔɔ, mi Chɛhowa dimul ndu aa: “I yeema lɛ pɛŋ ma soo naa ya chua a ndi okɔɔ le.” (Ditɔnɔ. 3:​23-27) Muuse dounuŋ tumbe le. Kɛ mbo chɛl kɛɛsiaa Chɛhowa tosa wo, nduyɛ mi Chɛhowa hiau lachi a ndu soliŋndo kpeku le Isɔluɛiya simndaŋ lachi. (Ditɔnɔ. 4:​1) Choobu nda Muuse kɛsul naa tamaseliila kɛndɛla naŋ nɔ miŋ tol kɔɔli laŋ, te o hiŋ pɛ a silaa chɛlɔɔ okɔɔ. Mi Choobu siŋga yiyaŋ ndɔɔ, nduyɛ o yɔŋgu lakafɛi le nyɛ ndoo tosa wo le. Mi Muuse bɛɛ chɔm maa o chɛl sila Chɛhowa ndoo ke ndu wo, sanaa a mɛɛ o hiou lachi a ndu piɛiyo o laalaŋndo choo, mi che bɛɛ mi dikeŋnaŋ sɔvɛ sɔviɔɔ hialuŋ ndu yɛ.

10. (a) Yɛɛ Pulɔwaa 4:​10-13 chɔm yɛ naa a tɔnɔla naŋ sɔla le silaa chɛlɔɔ laŋ okɔɔ? (b) Yɛɛ waŋnda apum ndaa tosa yɛ mɛɛ nda ke nda silaa?

¹⁰ Miŋ sɔla tɔnɔɔ tau, te ŋ tol pɛ tamaseliila wanaa chɔm lo lechoo wo wa kɔɔli, mɛɛ Choobu nda Muuse cho nuaa yɛ. (Nuawɔ Pulɔwaa 4:​10-13.) Puaapiliaa a ndepiliaa naa bɔɔbɔɔ tol niŋ tamaseliila waŋnda haa kɔɔli, nduyɛ ma chɛl silaa. Tofawɔ nyɛ puaapilɛnɔ pilɛ o lɛŋnde Koŋgoleŋ niŋ diolaŋ Imaanuɛɛ dimi a sila nda ke ndu wo okɔɔ wo. Mbo dimi aa: “Mi puaapiliaa o kunda nuu niŋ, a kendu o Mɛlɛka piɛiyo niŋnda cha maa, sɔɔŋ ya wa choo woŋ wa tosa mi yaa tɛɛmbuu chaŋyɛi nii a Chɛhowa. Le hei, ma kindiŋ le ya malaa. Mi duau sila nda ke ya wo o wali niŋ, nduyɛ mi keŋ mala ya mi fafaŋ bahawɛila bɔɔbɔɔ.” * Mi kɔɔfanɔɔ o lɛŋnde Kanadaleŋ niŋ diolaŋ Mɛkaŋ dimi nyɛ a sila nda ke ndu wo okɔɔ. Mbo dimi aa: “O cho nyɛ yaa yeema tueiyɔɔ wo le nda dimulla le. Kɛ nyɛ yaa nɔ mi tueiyo.” Mi puaapilɛnɔ pilɛ fulaa o lɛŋnde Kloeesiaaleŋ niŋ diolaŋ Mako dimi aa: “Mi dikeŋnaŋ yaa nɔ wo hialuŋ ya. Kɛ o mɛɛlulaŋ, mi sila koŋ mala ya le mi kindi vɛlɛ chaŋyɛi nii a Chɛhowa poŋ.”

11. Yɛɛ Ŋgɔɔ Kal Klɛiŋ dimi yɛ te o hiŋ pɛ a silaa chɛlɔɔ okɔɔ?

¹¹ Ŋgɔɔ Kal Klɛiŋ cho vɛlɛ waŋndo opilɛ o sɔla tɔnɔɔ wo, mɛɛ o chɛl sila ndaa ke ndu wo. Ŋgɔɔ Klɛiŋ wa waŋndo opilɛ o Dialii Kuumbaŋ Choo Ve choo. O suɛi nduɛi yɔŋnaŋnde niŋ, mbo  suaa a teleŋ o sɔla sila kala kalaa Ŋgɔɔ Choosɛ F. Lutafɔɔ o ba wo. Chaŋyɛi kpɛɛluŋnde wa nda tɛɛŋ. Kɛ mi Ŋgɔɔ Klɛiŋ dimi maa, mɛɛ Ŋgɔɔ Lutafɔɔ ke ndu silaa, mbo tambu kɔl tau o tasela ndɔ. Mbo dimi aa: “Mɛɛ Ŋgɔɔ Lutafɔɔ che ya okoŋ kɔɔli, mbo mam muɛɛŋ, okoŋ mbo yil la aa, ‘Kal, isɛ!’ Kɛ le mɛɛ yaa tambu kɔl a ndu yɛ, I mulul ndu le. Mbo dimulla aa: ‘Kal, mandaŋ! Nyina Wɔɔŋndo cho num bɛlu bɛluuwo!’ Mi siɔmbulaŋ la bii ya. Okoŋ mi dimul ndu aa: ‘Buulaŋ te Ŋgɔɔ Lutafɔɔ. Nyɛ o nyɛ cho yɔŋnɔŋ te.’ Kɛ le mɛɛ ndoo nɔ taasioo tau yɛ, mbo dimulla aa: ‘I bii num bila, kɛ mandaŋ. Nyina Wɔɔŋndo cho num bɛlu bɛluuwo.’ I wa bɔɔ suɛi kɛndɛ mbo miŋgi ya o nɛi. Te ŋ kɛsiŋ pɛ suɛi puaapilɛnɔ naa o kɔl, le mɛɛ o dimul naa nyɛ ndoo nɔ mbo dimul naa wo yɛ, mɛɛ ŋ cho Nyina Wɔɔŋndo fondaŋndo kioo le mbo tiu naa ba.” * (Ɛfi. 4:​25-27) Mi Ŋgɔɔ Klɛiŋ chɛl sila Ŋgɔɔ Lutafɔɔ ndoo ke ndu wo, nduyɛ mi chaŋyɛi kɛndɛi hiau lachi a nda waa tɛɛŋ.

12. Vɛɛ tusiŋndo mala yɛ naa le silaa chɛlɔɔ? (Sam 141:​5)

¹² Yɛɛ mala yɛ naa miŋ chɛl silaa? Ŋ nɔ miŋ nɔ kaa tusiaŋndo, nduyɛ miŋ loonuŋ maa wanaa lahakiaa naŋ cho ni. Lepum miŋ tosa sɔɔŋ bɛnda le woŋ. A mɛɛ naŋ yaasiaa suŋ yɛ, Choobu ndoo nɔ yiyaŋnda wɔɔŋndaŋ a sɔɔŋ ŋpum okɔɔ. Kɛ o mɛɛlulaŋ, mbo siŋga yiyaŋ ndɔɔ, nduyɛ mi Chɛhowa duau ndu sala. Le yɛɛ? Kanifuule Choobu wa wana tusiaŋ. Mbo chɔm maa wana tusiaŋndo o wa ni, sanaa a sila Ɛlihu ke ndu wo chɛlɔɔ, mi che bɛɛ ndoo chuu Ɛlihu okɔɔ. (Choobu 32:​6, 7) Kaa tusiaŋndo mala naa miŋ dɔu sila nda ke naa wo o wali niŋ, o yɔŋ bɛɛ miŋ yiyaŋ maa, ndaa nɔ ma ke naa sila koŋ te ɔɔ maa ŋ cho wana ke naa silaa wo bɛndu. Mi bɛndu kunda pilɛ o lɛŋnde Kanadaleŋ niŋ dimi aa: “Le mɛɛ naapila chiŋuŋ mɛɛ acheleŋnda cha naa yɛ le, vɛɛ naŋ tiu yɛ ba miŋ tosa hiouwɔɔ lachioo te waŋndo sila naa le?” Naa kpou nɔ miŋ nɔ suliŋnda nyina Mɛlɛkaa, le halikpeŋ miŋ chaa waŋnda yooŋgu kɛndɔɔ dimullo a nda pɛɛkoo.—Nuawɔ Sam 141:​5.

13. Vɛɛ naŋ nɔ yɛ miŋ che sila nda ke naa wo?

¹³Chɔ silaa maa nɛiyo opilɛ o Mɛlɛka chɔm num kaalaa wo cho koŋ ni. Nyɛ cho o kɛndɔɔ wo Chɛhowa yeema le naa ni. (Pulɔ. 4:​20-22) Te o sila naa pɛ sanaa a Diom ndɔɔ, yaula naalaŋ ɔɔ Kilisiɔŋnɔ kendu o ndu piɛiyo niŋndo, mɛɛ kaalaa o wa naa koŋ chɔmndo ni. Nduyɛ a mɛɛ Hibuluiya 12:​9, 10 dimi yɛ, “le tɔnɔ naa o sila naa ni.”

14. Yɛɛ naŋ nɔ yɛ miŋ handu kɔllo choo, te a ke naa pɛ silaa?

¹⁴Handu kɔllo o sila nda ke numndo choo, o cho a mɛɛ nda ke num ndu yɛ le. Lepum miŋ yiyaŋ maa, o cho o nɛi kɛndɛ choo kposoŋ te nda ke naa silaa le. I cho tonya maa, ŋ nɔ miŋ tosa a sabu le mi i wa tɛtɛlɛ le mi waŋndo chɛl  sila naŋ ke ndu wo. * (Kalee. 6:​1) Kɛ te o yɔŋ pɛ maa naa nda ke silaa ni, ŋ nɔ miŋ handu kɔllo o sila koŋ choo, o yɔŋ bɛɛ miŋ yiyaŋ maa, wana koŋ ndoo nɔ mbo soliŋ nɛi bɛnda wo kpeku le naa ndu kioo. Ŋ nɔ miŋ nyunaŋ aa: ‘Mi che bɛɛ waŋndo hoo soliŋ nɛi bɛnda wo kpeku le ya silaa le, kɛ baa tonyaa cho pa o nyɛ o dimi wo niŋ? Baa I tiu pa ba mi faŋa kɔllo o nɛi o ke ya silaa wo choo, nduyɛ mi sɔla tɔnɔɔ o sila o ke ya wo hoo niŋ?’ I wa bɔɔ suɛi taasi te ŋ nuuviaa pɛ nɛila naŋ tiuba, miŋ sɔla tɔnɔɔ o sila nda ke naa wo niŋ.—Pulɔ. 15:​31.

15. Le yɛɛ naŋ nɔ yɛ miŋ dimul waŋndo le mbo sila naa?

¹⁵ Baabuiyo dɛɛniaa naa le miŋ wa acheleŋnda dimullo, le ma sila naa. Pulɔwaa 13:​10 dimi aa: “Wana o wana yaŋ nilaŋ o silaa pɛ, mɛɛ wana kɔl kaloo ɔɔ wana taasioo cho koŋ ni.” Hei cho tonya kanifuule, mi wanaa dimul waŋndo le mbo sila nda wa tosa hiouwɔɔ lachioo tau o Mɛlɛka piɛiyo niŋ, mbo hiou wanaa chum fɛŋ mi waŋndo sila nda a nyɛ nda cho tosaa wo okɔɔ wa. Lelaŋ, wa acheleŋnda dimullo le ma sila num.

16. O sɔɔŋ kuɛɛ niŋ naŋ nɔ yɛ miŋ nyuna le ma sila naa?

¹⁶ A teleŋ kuɛɛ naŋ nɔ yɛ miŋ dimul chaaŋ naa Kilisiɔŋnɔɔ le mbo sila naa? Tofawɔ tamaseliilaŋ ndaŋ: (1) Ndepilɛnɔɔ dimul wana dimiaa yooŋgu kɛndɛ chaa yooŋgu kɛndɔɔ dimioo wo, le mbo liila ndu o pɛɛku ndɔɔ. Nduyɛ mɛɛ nda chii, mbo nyuna ndu le mbo chɔm ndu naa o nɔ mbo tosa hiouwɔɔ lachioo wa te o hiŋ pɛ a mɛɛ o pɛɛku waŋnda yɛ okɔɔ. (2) Ndepilɛnɔ chellɔ o nɔ le wo, yeema nyɛla chuɛɛnaŋndaŋ piondɔɔ. Okoŋ, mbo nyuna ndepilɛnɔ kendu o Mɛlɛka piɛiyo niŋndo, le mbo mala ndu la bɛnda laŋ hɛli. (3) Puaapilɛnɔɔ sɔla dikeŋnaŋndo le mbo yɔŋgu suɛi luŋnde. Okoŋ, mbo dimul puaapilɛnɔ chaa sɔɔŋ yɔŋgoo wo le mbo yaŋ ndu nilaŋ, teleŋ o cho wa sondoo keiyo o suɛi nduɛi choo wo, okoŋ mbo chɔm ndu naa o nɔ mbo siɛɛnduu suɛi keŋ nda. Nduyɛ o kpeekpei niŋ, puaapiliaa bii niŋ sɔɔŋ yɔŋgoo le wɔsiŋ bɔɔbɔɔ wa bɛɛ, nɔ ma nyuna wanaa chaa sɔɔŋ yɔŋgoo wa, le ma chɔm nda naa nda nɔ ma tosa hiouwɔɔ lachioo wa, nduyɛ ma dɔu sila nda ke nda wo o wali niŋ.

17. Yɛɛ naŋ nɔ yɛ miŋ tosa, le miŋ sɔla tɔnɔɔ o sila nda ke naa wo niŋ?

¹⁷ O lɔɔla cho hunɔɔ laŋ niŋ ɔɔ o paŋguŋ cho hunɔɔ woŋ niŋ, naapum waŋndo cho hunɔɔ sakpo, mbo ke naa silaa ɔɔ miŋ sɔla silaa o nɛi cheleŋ niŋ. Te keŋ yɔŋnuŋ pɛ, loonuŋ sɔɔŋ kuluŋ naŋ pɛɛku o buŋgɛi hei niŋndoŋ. Wa wana tusiaŋ. Handu kɔllo o sila nda ke numndo choo, o cho a mɛɛ nda ke num ndu yɛ le. Nduyɛ nuuviaa nɛilaŋ le ma dɔu sila koŋ o wali niŋ. Naa kpou, a vilu naa a taasi le. Kɛ te ‘ŋ yaŋ pɛ silaa nilaŋ, nduyɛ miŋ chua nyɛ nda dimul naa wo,’ Diom Mɛlɛkaa dimul naa maa, ŋ cho simnuŋ ‘wanaa taasi.’—Pulɔ. 19:​20.