Ma Cha Mɛɛ Puaapiliaa Chɔm Nda Kaala Kpeekpeiyo Yɛ
YOMALA nɔ yemaa a ŋiɔɔŋ. Diola ndalaŋ aa Masilo a Hivai. O sɔndɔkɔlɔ nɔ diolaŋ aa Kuatemala wo niŋ nda cho ni. Mi Yomala kandu Baabuiyo pɛɛkoo a Seiyaa Chɛhowaa. Okoŋ kɔɔli, mi yemaa nduaa bɛɛ kandu Baabuiyo pɛɛkoo. Kɛ ndaa nɔ bahawɛiyo. Nda yaa kpou a sumɛiya nda cho ni. Nduyɛ ndaa chiee diomndaŋ veelu o yaula wanaa sumɛiya niŋ te. Lelaŋ, mi wana ndoo pɛɛku nda wo ndoo veelul nda diomndaŋ o yau ndaa pɛɛku wo niŋ vɛlɛ a bolii Baabui wa o yau koŋ niŋnde.
Ndaa nɔ vɛlɛ bahawɛiyo le kɔlaŋ o bɔŋaŋnda leKilisiɔŋndaŋ. Ndaa tiuba le kɔlaŋ o Toŋgo leMasa wa nda ikɛiyo le chemchemndaŋ 40 a ba nda le. Kɛ mi puaapiliaa o kunda koŋ niŋ tosa kɛɛsiaa le waa kɔlaŋ a nda o bɔŋaŋndaŋ. Nduyɛ, mɛɛ nda kandu sɔɔŋ yɔŋgoo o sukuuwo choo o bɔŋaŋ naŋ bii o lɔɔ tɛɛŋndo, mi puaapiliaa ndaa mala nda le ma loonuŋ nyɛ nda nɔ le dimioo wo te a wa pɛ suɛi yɔŋgoo.
A Bukuloo wɔsi 2019, ma kandu bɔŋaŋnda leKilisiɔŋndaŋ biyɔɔ o sɔndɔkɔlɔ nda wa wo niŋ. Nduyɛ a teleŋ koŋ, pɔnɔɔ a lanɔɔ wa kɔɔfaa wa wa niŋ o sɔndɔkɔlɔ nda koŋ niŋ. Mi pɔnɔɔ a lanɔɔ hoo kɛsi kpeleŋndo le Yomala nda yemaa nduaa pɛɛkoo mɛɛ nda poonyiaa, nduyɛ ma veelu diomndaŋ o yaula wanaa sumɛiya niŋ yɛ, mi che bɛɛ ndapila ndaa tosa wɔ ndi paandu le. Mi ndaa kuɛ naa kɛsiaa layauwa le yaasiaa tosaa, okoŋ ma sina nɛila wana soliŋ kpeku le wanaa sumɛiya pɛɛkoo laŋ.
Masilo cho mulioo yɔŋgoo o bɔŋaŋndo
Mɛɛ paŋgoŋ ŋtiŋ hiou, mi Yomala nda yemaa nduaa kandu diomndaŋ veeloo o yaula wanaa sumɛiya niŋ nyɛkɛndɛi. Hei cho nda malaa tau le hiouwɔɔ lachioo tosaa o Mɛlɛka piɛiyo niŋ. a Nda yaa kpou cho niŋ kɔɔfaa lɔɔlɔɔ wa. Masilo cho niŋ suŋ suŋ buɛi malalaŋndo. Nduyɛ nda kpou cho a yɔŋgaŋ tau le walta iMɛlɛkayalaŋ tosaa teleŋ o teleŋ. Sɛmbɛ nda cho hoo dɔwɔɔ wo cho acheleŋnda piiliaŋndo tau.
Yomala nda yemaa nduaa nɔ balika melaa tau le toolu kundaa cho nda wo. Mi Yomala dimi aa: “Chɔŋ a teleŋ tase naŋ chiikaŋ a Seiyaa Chɛhowaa wo, a cho wɔ hiouwɔɔ lachi a naa kaala leKilisiɔŋndo chɔmndo.” Mi Masilo bɛɛ dimi aa: “Ŋ nɔ chaŋyaŋ kɛndɔŋ tau o kunda leKilisiɔŋndo niŋ. Nduyɛ, ŋ cho puaapiliaa a ndepiliaa kaaliaŋ vellaa velle chieeŋndo balɔɔ silɔ wa tɛɛŋ.” Yomala nda yemaa nduaa cho chumndo le ma huŋ chɔ teleŋ chieeŋndo hoo kpou simnuŋ niŋ kpele hɛnɛkiɔɔ wo.—Sam 37:10, 11; Aisaya 35:5.
a A toosiaa buluchiɔɔ wo hoo, Learn to Read Braille (Pɛɛku le Diomndaŋ Veeloo o Yaula Wanaa Sumɛiya Niŋ) le wanaa sumɛiya ɔɔ wanaa chi lapi le wa malaa ma poonyiaa, nduyɛ ma veelu diomndaŋ o yaula wanaa sumɛiya niŋ.
