1. Le yɛɛ ŋ cho yɛ a kɔl kɛndɛ le Baabuiyo?

 Ŋ CHO bɔɔ a kɔl kɛndɛ le mɛɛ Chɛhowa ke naa Baabuiyo yɛ! Chɛhowa ke naa silala sɔvɛlaŋ o Baabuiyo niŋ le naa malaa miŋ biunuŋ bahawɛila komal naalaŋ. Nduyɛ o ke naa vɛlɛ tiindaŋ kpeekpeiyo le chilaŋ. I hiou kpou ve, Chɛhowa soliŋ Baabuiyo kpeku le naa suliŋnda ndɔla bɔɔbɔɔ chɔmndo. Mɛɛ naŋ yiyaŋ fau a suliŋnda ndɔlaŋ okɔɔ, mi keŋ pilaŋ naa kɔllo nduyɛ mi i nyindu naa le ndu sɔɔŋguuwo ikɛi kpɛɛluŋ, okoŋ miŋ simnuŋ chaaŋaa nduaa.​—Sam 25:​14. 

2. O nɛila yɛ yɛla kuɛɛ niŋ Chɛhowa ndoo suaa yɛ o waŋnda chieeya lo?

² Chɛhowa yeema mi waŋnda sina ndu. O sindɔɔ niŋ, mi ndoo soo o wanaa nduaa lo o lɔma sɔlaŋ niŋ, yilaŋndoŋ, nduyɛ mi ndoo vem vɛlɛ maalikɛiya le nda yooŋgula ndɔlaŋ dimullo. (Nɔm. 12:​6; Walta. 10:​3, 4) Kɛ vɛɛ naŋ wa yɛ pɛɛku a lɔma sɔlaŋ maŋ, yilaŋndoŋ, vɛlɛ a yooŋgula maalikɛiya haa dimilaŋ okɔɔ te ndaa poonyiaa laŋ te? Le saboo hoo kpeekpei Chɛhowa tosa ni, mi puaa poonyiaa nyɛ o yeema naa miŋ sina wo o yau choo. (Chɛlui. 30:2) Le mɛɛ “diomnda ndɔlaŋ la cho sakpo” yɛ, ŋ nɔla miŋ nɔ tiindaŋndo. Nɛi o soliŋ hoo kpeku le suɛi o naalo wo cho bɔɔ nɛi sɔvɛ, nduyɛ o ke naa tɔnɔɔ tau.​—Sam 18:30.

3. Vɛɛ Chɛhowa manda yɛ Diom ndɔɔ? (Aisaya 40:8)

³ Nuawɔ Aisaya 40:8. Diom Mɛlɛkaa ke niŋ waŋpiaanduaa a waŋlaanduaa laalaŋnda nɛi chɔmaa sɔviɔɔ le wɔsilaŋ o waalaŋ niŋ. Vɛɛ keŋ yɔŋnuŋ yɛ? O nyɛm muŋ nɛi tambu le woŋ choo nda poonyiaa sindɛ Diom Mɛlɛkaa ni. Lelaŋ, ŋ nɔ hau yaula kpeekpeila tasela nda poonyiaa sindɛ Diom Mɛlɛkaa lechoo laŋ te. Kɛ mi Chɛhowa tosa a sabu, le mi waŋnda miŋgi sɔɔŋ kpeekpei wa o yaulaŋ ndaŋ niŋndoŋ poonyiaa. Mi che bɛɛ wanaa lahakiaa miŋgi sɔɔŋ muŋ poonyiaa ni, kɛ a wa yekeŋ o muŋ poonyiaa niŋ. Le tamaseliiyo, mi wana sinaa dɛnɛ pilɛ poonyiaa  a yaula maHibuluilaŋ okɔɔ aa: “Ŋ laalaŋ kɛsɛ maa yau masindɛ kɛ kɛ cho o nda miŋgi poonyiaa nyɛkɛndɛi mbo sulaŋ a yaula maHibuluilaŋ te.” Mi che bɛɛ le teleŋ vilɛi niŋ nda poonyiaa laŋ ni, nduyɛ o nyɛm nɛi tambu le woŋ choo nda poonyiaa laŋ ni, vɛlɛ wanaa lahakiaa miŋgi laŋ poonyiaa ni, kɛ ŋ nɔ tiindaŋndo kɛsɛ maa diomnda naŋ veelu hau leniŋ ndaŋ la chɔm yiyaŋnda wana nɔ ndu wo, Chɛhowa.

4. Yɛɛ naŋ cho yɛ pɛɛku o buŋgɛi hei niŋ?

⁴ “Nyɛ o nyɛ kɛndɛ naŋ sɔla, Mɛlɛka ke naa ndu ni.” (Chemi. 1:​17) Baabuiyo cho nyɛ sɔviɔɔ opilɛ o Chɛhowa ke naa wo. Te waŋndo ke naa pɛ nyɔɔ, mi keŋ chɔm mɛɛ kpɛ o sina naa, vɛlɛ a yeemaŋ naŋ yɛ. Nyɛ pilɛ koŋ kpe cho a wana ke naa Baabuiyo wo ni. Te ŋ mɛɛndaŋ pɛ kioo hoo nyɛkɛndɛi, mi keŋ mala naa miŋ sina wana suu Chɛhowa cho wo. Miŋ pɛɛku mɛɛ o sina naa nyɛkɛndɛi, vɛlɛ a nyɛ naŋ yeema wo yɛ. O buŋgɛi hei niŋ, ŋ cho pɛɛku a suliŋnda Chɛhowalaŋ layaa okɔɔ o Baabuiyo niŋ. Laŋ la cho ni: taasi ndɔɔ, sakpoyɛi nduɛi, vɛlɛ a kaala ndɔɔ. Kɛ ŋ yaasiaŋndɔ fɛŋ nɛila Baabuiyo chɔm maa Mɛlɛka nɔ taasioo laŋ.

5. Ɔɔ nɛiyo opilɛ o Baabuiyo chɔm maa Mɛlɛka nɔ taasioo wo?

⁵ Chɛhowa sina maa ŋ yeema sila ndɔɔ. Nduyɛ silala ndɔla taasilaŋ la cho tau o Baabuiyo niŋ. Mi silala Baabuiyo piiliaŋ waŋnda o nɛi kɛndɔɔ choo. Nduyɛ pɛŋ, mbo siŋga yoomula waŋnda. Mɛɛ Muuse poonyiaa yaula taselaŋ o Baabuiyo niŋ, mbo dimul wanaa Mɛlɛkaa, Isɔluɛiya aa: “Sawalaŋ ndaŋ la cho diomnda fondo fuu le, laŋ la cho yoomula nyalaŋ ni.” (Ditɔnɔ. 32:​47) Mi wanaa diikuŋ sawalaŋ ndaŋ nda tuei yoomoo yeela, nduyɛ ma wa a kɔl kɛndɛ. (Sam 1:​2, 3) Mi che bɛɛ Baabuiyo cho niŋ le teleŋ vilɛi, kɛ o nɔ wɔ kpaayaa kɛ le yoomula waŋnda siŋgaa. Le tamaseliiyo, te a tofa pɛ o jw.org o suɛi lebolle hei bɛŋgu, “Baabuiyo Siŋga Yoomulaŋ,” a cho chɔ sɔɔŋ yɔŋnaŋndoŋ tau a wanaa Baabuiyo siŋga yoomula ndalaŋ nda okɔɔ, le mɛɛ nda tol sila Baabuiyo kɔɔli yɛ.​—1 Tɛsa. 2:13.

6. Le yɛɛ naŋ dimi yɛ maa yau kɛ kɛ cho mbo sulaŋ a Baabuiyo le?

⁶ Yau kɛ kɛ cho maa Diom Mɛlɛkaa le. Le yɛɛ naŋ dimi yɛ lende? Kanifuule Chɛhowa, Mɛlɛka kpaaya kpou kpou wo, Mɛlɛka cho le fafɛɛŋndo nɔ ndu ni. Nduyɛ taasi ndɔɔ nɔ velaŋ te. Mi waŋnda veelu diomndaŋ o yaula bɔɔbɔɔ niŋ, o yɔŋ bɛɛ mi wanaa poonyiaalaŋ nda sɔla piɔmndo. Nduyɛ silala wa o yaula laŋ niŋndaŋ la mɛɛlu lɛ wa la sɔvɛ le. O baa pilɔɔ choo, sawala mandaala cho o Baabuiyo niŋndaŋ la cho lefafɛɛŋ, nduyɛ teleŋ o teleŋ mi la chuu waŋnda tɔnɔlaŋ. Te ŋ veelu pɛ diomndaŋ o Baabuiyo niŋ, nduyɛ miŋ yiyaŋ yiŋgoloŋ o nyɛ naŋ pɛɛku wo choo, mi wana nɔ ndu wo soliŋ nyina ndɔ diandaa kpeku le naa malaa miŋ dɔu nyɛ naŋ pɛɛku wo o wali niŋ. (Sam 119:​27; Mala. 3:​16; Hibu. 4:​12) A tonya, wana nɔ Baabuiyo wo nɔ yeemɛi le num malaa. Hei nɔ mi i nyindu naa le diomndaŋ veeloo o Baabuiyo niŋ lepaa o lepaa.

7. Vɛɛ Baabuiyo ndoo mala yɛ wanaa Mɛlɛkaa o sindɔɔ niŋ le ma wa diompilɛ?

⁷ Nɛi cheleŋ Baabuiyo chɔm maa Mɛlɛka nɔ taasioo wo cho ni maa, mi Baabuiyo mala wanaa Mɛlɛkaa ma wa o diompilɔɔ niŋ. Mɛɛ Isɔluɛiya fuuluu o lɛŋnde mɛyaaleŋ niŋ, ma kila chaltaŋ o fondaŋnda yɛ yɛlaŋ. Mi apum simnuŋ wanaa yɔɔyaa, apum wanaa manda chɔluaa wa, nduyɛ apum chiɔɔŋ ndaa tosa ni. Lelaŋ hei ndii tosa mi Isɔluɛiya ndaa puɛɛnuŋ, a chaaŋaa ndaa Isɔluɛiyaa wa o fondaŋnda yɛ yɛlaŋ o lɛŋnde mɛyaaleŋ niŋndo. Kɛ mi Chɛhowa tosa kɛɛsiaa le mi Isɔluɛiya wa chuuŋgiaŋndo diompilɛ a teleŋnda yɛ yɛlaŋ le  pɛɛkoo a ndu okɔɔ. (Ditɔnɔ. 31:​10-13; Nɛhi. 8:​2, 8, 18) Yiyaŋndɔ mɛɛ Isɔluɛinɔ ndoo nɔ laalaŋndo wo ndoo wa a kɔl kɛndɛ yɛ, te ndoo hiŋ pɛ Chulusalɛm naapum mi ndoo che chaaŋaa nduaa laalaŋnda o miiliɔŋndaŋ niŋ fulaa o fondaŋnda yɛ yɛlaŋ o lɛŋnde Mɛyaaleŋ niŋ. O hei niŋ, mi Chɛhowa mala wanaa nduaa le ma wa diompilɛ. Okoŋ kɔɔli, mɛɛ kunda leKilisiɔŋndo kilaŋ, puaa a waŋlaanduaa ndaa dimi sɔɔŋ maŋgalaŋ yɛ yiɔɔŋ nda wa o kunda koŋ niŋ ni. Apum ndaa fula tɔɔ, apum ndaa nɔ nyɛsɔlaa tau, apum yɛ ndaa nɔ nyɛsɔlaa bɔɔ le. Nduyɛ o kɔɔlima yɛ yiaaŋ niŋ ndaa fula ni. Kɛ le mɛɛ ndaa nɔ kaalaa le Diom Mɛlɛkaa yɛ, mi keŋ tosa ma wa diompilɛ o Mɛlɛka piɛiyo niŋ. Wanaa ndaa simnuŋ wanaa laalaŋnda wa bɛɛ ndaa nɔla ma bii Diom Mɛlɛkaa bila te chaaŋaa ndaa laalaŋnda ndaa mala nda pɛ, nduyɛ mi ndaa wa chuuŋgiaŋndo diompilɛ nda ndaa.​—Walta. 2:​42; 8:​30, 31.

8. Vɛɛ Baabuiyo mala yɛ hau wanaa Chɛhowaa le waa o diompilɔɔ niŋ?

⁸ Mɛlɛka naa nɔ taasioo wo cho hiouwɔɔ lachi a Baabuiyo soliŋndo kpeku le wanaa nduaa pɛɛkoo, a le nda malaa ma wa o diompilɔɔ niŋ. Baabuiyo cho nyɛ kpeekpei mala naa le tonyala cho a Chɛhowa okɔɔ laŋ pɛɛkoo ni. Teleŋ o teleŋ naŋ chuuŋgiaŋ pɛ le bɔŋaŋnda naalaŋ, bɔŋaŋnda ibuŋgalaŋ, a la bɛŋndaŋ, ma veelul naa diomndaŋ o Baabuiyo niŋ, nduyɛ ma tɛɛsial naa ndu le miŋ sina ndu pɛŋgu walaŋ. Baabuiyo cho nyɛ kpeekpei  Chɛhowa soliŋ kpeku le wanaa nduaa malaa ma piɛi ndu o diompilɔɔ niŋndo ni.​—Sɛfa. 3:9.

9. Suliŋ kuɛɛ mala yɛ naa le miŋ bii yooŋgu cho o Baabuiyo niŋndo bila? (Luku 10:21)

⁹ Ŋ tofaŋndɔ nyɛ cheleŋ chɔm vɛlɛ maa Chɛhowa nɔ taasioo wo. Fondaŋnda bɔɔbɔɔ o chɛl ma poonyiaa o Baabuiyo niŋndaŋ, wanaa tusiŋ nda kinɛi nɔla ni ma bii laŋ bila. (Nuawɔ Luku 10:​21.) Mi waŋnda ba o ba fee veelu diomndaŋ o Baabuiyo niŋ. Mi wana sinaa dɛnɛ pilɛ dimi aa: “Mi wanaa bɔɔbɔɔ veelu diomndaŋ o Baabuiyo niŋ mbo hiou yau kɛ kɛ. Ma wa yekeŋ te a wa pɛ diomndaŋ veeloo leniŋ.” Kɛ wanaa tusiŋ nda kinɛi bii ndu bila ni, nduyɛ ma dɔu nyɛ nda pɛɛku wo o wali niŋ.​—2 Kɔliŋ. 3:​15, 16.

10. Nɛi cheleŋ kuɛɛ Baabuiyo chɔm yɛ maa Chɛhowa nɔ taasioo?

¹⁰ Miŋ pɛɛku vɛlɛ a taasi Chɛhowaa okɔɔ o Baabuiyo niŋ o nɛi cheleŋ choo. Mi Chɛhowa soliŋ Baabuiyo kpeku o cho ko le naa pɛɛkoo kunda le, kɛ le naa pɛɛkoo a pilɛŋ pilɛŋnda a naa kɔl dɛɛniaa kioo. Mi naa kpou sinaŋ maa Chɛhowa nɔ yeemɛi o naa a pilɛŋ pilɛŋnda niŋ, te ŋ veelu pɛ diomndaŋ o Baabuiyo niŋ. (Aisaya 30:​21) Te bahawɛiyo komal num pɛ, teleŋnda bɔɔbɔɔ ma veelu diomndaŋ o bolle Baabuileŋ niŋ, nduyɛ ma yiyaŋ maa le num kpeekpei nda poonyiaa leŋ ni. Kɛ o kpeekpei niŋ, a poonyiaa Baabuiyo le mi waŋnda o miiliɔŋndaŋ niŋ bii ndu bila. Mɛɛ le yɛɛ yoo­ŋgu cho leniŋndo cho yɛ wɔ o sɔvɛ le bahawɛila numndaŋ solioo? Kanifuule, wana nɔ Baabuiyo wo nɔ taasioo mbo hiau wana o wana.​—2 Timo. 3:​16, 17.

11. Vɛɛ Mɛlɛka chɔm yɛ maa o cho wana hɛliaa le a teleŋ nda poonyiaa Baabuiyo wo?

¹¹ Suliŋ cheleŋ Chɛhowa nɔ wo cho sakpoyɛi ni. (Ditɔnɔ. 32:4) Wana cho sakpo wo nɔ kaa hɛliaa kposoŋ te. Nduyɛ Chɛhowa cho wana hɛliaa le. (Walta. 10:​34, 35; Luomaŋ. 2:​11) Mbo chɔm kpendekele maa o cho wana hɛliaa le, mɛɛ o chɛl ma poonyiaa Baabuiyo o sɔɔŋ maŋgalaŋ waŋnda ndaa bii bila a boondii keŋ ndo. Yaula tasela 39 cho o Baabui­yo niŋndaŋ, la bɔɔbɔɔ o Hibuluiye niŋ nda poonyiaalaŋ ni. Kɛ a wɔsiŋ kɛmɛ tasoŋ, Kilikiiye waŋnda ndaa dimi tau ni. Lelaŋ, o suɛi maŋgalɛi hei niŋ nda poonyiaa yaula 27 la mɛɛlaalaŋ o Baabuiyo niŋ ni. Chɛhowa chɛl kposoŋ mi Diom ndɔɔ wa o suɛi maŋgalɛi ipilɛ niŋ te. Hau, waŋnda le biiliɔŋndaŋ la ŋɔmaa cho o chieeŋndo choo ni. Nduyɛ nda kpou sɔɔŋ maŋgalaŋ yɛ yiɔɔŋ nda dimi ni. Mɛɛ vɛɛ wanaa bɔɔbɔɔ cho yɛ hau pɛɛkoo a Chɛhowa okɔɔ?

12. Ɔɔ nɛiyo opilɛ o Daaniɛɛ 12:​4 peeluŋ niŋ o palɛi mɛɛlɛi hei niŋnde?

¹² O nyɛ Daaniɛɛ, wana ndoo suaa le Mɛlɛka wo poonyiaa wo niŋ, mi Chɛhowa chua buŋgɛi maa o palɛi mɛɛlɛi niŋ, o cho tosa mi ‘kɔl kalu kpeekpei’ cho o Baabuiyo niŋndo wa tau tau, nduyɛ mi wanaa bɔɔbɔɔ bii ndu bila. (Nuawɔ Daaniɛɛ 12:4.) Hei cho hau yɔŋnɔŋndo kanifuule, a cho Baabuiyo a yaula tɔlnuŋ o Baabuiyo choo laŋ hivioo o sɔɔŋ maŋgalaŋ yɛ yiɔɔŋ niŋ, ma wa laŋ solioo, nduyɛ mi wanaa bɔɔbɔɔ wa laŋ sɔlaa. Baabuiyo cho yau nda hiou hivi o sɔɔŋ maŋgalaŋ niŋ, nduyɛ mi wanaa bɔɔbɔɔ wa ndu sɔlaa o chieeŋndo choo wo ni. Baabuila kɔɔnala leyulalaŋ la hivi laŋ la kendu bɔɔ baa lepum. Kɛ wanaa Chɛhowaa hivi Baabuiyo otiŋ, ɔɔ kpou o sɔɔŋ maŋgalaŋ hiouwɔɔ 240 niŋ, nduyɛ wana o wana nɔla mbo sɔla ndu o paawa o nyɛ o nyɛ le. Fulamakɔɔlioo cho ni, waŋnda ba o ba fee o chieeŋndo choo cho pɛɛkoo a “yooŋgu kɛndɛ leMasaa” okɔɔ tuupa mi mɛɛlula chieeŋndo la fuuluu. (Maa. 24:​14) Mɛlɛka naa cho sakpo wo  yeema mbo ke ­wanaa bɔɔbɔɔ fondaa le ma veelu diomndaŋ o Baabuiyo niŋ le ndu sinaa nyɛkɛndɛi. Le sabu o kaala naa tau wo o cho hei tosaa ni.

13. Le yɛɛ naŋ dimi yɛ maa Baabuiyo chɔm maa Chɛhowa kaala naa? (Chɔŋ 21:25)

¹³ Baabuiyo mala naa le sinaa maa suliŋ bɛndu Chɛhowaa cho kaalaa ni. (1 Chɔŋ 4:8) Yiyaŋndɔ a sɔɔŋ Chɛhowa tosa ma poonyiaa o Baabuiyo niŋndoŋ okɔɔ, vɛlɛ a sɔɔŋ o mɛi kɔɔli woŋ. O ke naa nyɛ kpeekpei naŋ yeema le miŋ nɔ chaŋyɛi kɛndɛi a ndu wo, miŋ wa o kɔl nyulu niŋ suŋ suŋ, nduyɛ miŋ huŋ sɔla yoomu fafɛɛŋndo wo. Le mɛɛ Chɛhowa kaala naa yɛ, mbo tosa a sabu ma poonyiaa sɔɔŋ kpeekpei mala naa o ndu piɛiyo niŋndoŋ.​—Nuawɔ Chɔŋ 21:25.

14. O nɛi cheleŋ kuɛɛ choo sɔɔŋ cho o Baabuiyo niŋndoŋ chɔm yɛ maa Mɛlɛka kaala naa?

¹⁴ Mi Chɛhowa chɔm vɛlɛ maa o kaala naa mɛɛ o soliŋ nɛi sɔvɛ sɔviɔɔ kpeku le suɛi o ­naalo. O Baabuiyo niŋ, Chɛhowa kɛsul naa lasawa o lepula le nyɛ o nyɛ naŋ wa pɛ tosaa o yoomoo niŋ te. Mbo soliŋ sɔɔŋ kpeekpei yɔŋnuŋ waŋnda woŋ kpeku, huuloŋ, vɛlɛ a silala sɔvɛlaŋ le naa malaa miŋ soliŋ yiyaŋnda naalaŋ kpeku le kɛɛsiaala sɔvɛlaŋ tosaa. O hei niŋ, mi Diom Mɛlɛkaa nyindu naa le Mɛlɛka kaalaa, nduyɛ miŋ diikuŋ ndu a kɔl naa kpou.

15. (a) Vɛɛ Baabuiyo chɔm yɛ maa Chɛhowa nɔ yeemɛi o naa niŋ? (b) A mɛɛ naŋ cho chɔɔ o fotueiyo choo yɛ, a nɛɛ yaa okɔɔ o Baabuiyo niŋ chuaambɔɔ, puaapilɛnɔ feleŋgɔnɔɔ, a ndepilɛnɔ kaasoŋnɔɔ cho yɛ yiyaŋndo? (Chɛ. 39:​1, 10-12; 2 Masaa. 5:​1-3; Luku 2:​25-38)

¹⁵ Baabuiyo chɔm naa kpendekele maa Chɛhowa nɔ yeemɛi o naa niŋ tau. O nɛi kuɛɛ  choo? Baabuiyo nɔ bundɔŋ tau a mɛɛ waŋnda chieeya ndaa tosa sɔɔŋ yɛ okɔɔ. Ŋ tiuba miŋ bii bila a mɛɛ wanaa Baabuiyo soo a nda okɔɔ wa ndaa sinaŋ yɛ kanifuule, waŋnda chieeya nda “wa ni maa naa.” (Chemi. 5:​17) I hiou kpou ve, te ŋ mɛɛndaŋ pɛ a mɛɛ Chɛhowa bii naa yɛ, mi keŋ mala naa miŋ sina maa “wana inyiɛɛyo, a wana ikɛndɔɔ [o] cho ni.”​—Chemi. 5:11.

16. Yɛɛ naŋ pɛɛku yɛ a Chɛhowa okɔɔ te ŋ veelu pɛ diomndaŋ o Baabuiyo niŋ a wanaa ndaa tosa biondɔŋndaŋ nda okɔɔ? (Aisaya 55:7)

¹⁶ Baabuiyo chɔm naa vɛlɛ mɛɛ Chɛhowa kaala naa yɛ o nɛi cheleŋ choo. Nduyɛ o ke naa tiindaŋndo maa fɛɛŋ bɛɛ Mɛlɛka naa mel naa le, o yɔŋ bɛɛ miŋ tosa biondɔŋndaŋ. Mi Isɔluɛiya tosa hakioo a Chɛhowa teleŋnda bɔɔbɔɔ. Kɛ mɛɛ nda wookuŋ a kɔllo kpou, mbo mal nda haki. (Nuawɔ Aisaya 55:7.) Kilisiɔŋnda o wɔsiŋ kɛmɛ tasoŋ niŋ bɛɛ, ndaa sina maa Mɛlɛka ndoo kaala nda tau. Mi nyina diandaa mala kiilanɔɔ Pɔɔl le chaaŋaa nduaa laalaŋnda poonyiallo maa a mal po ndoo tosa haki wɔɔŋ wɔɔŋndo, kɛ mbo wookuŋ ndo ‘haki fasɛi, nduyɛ ma dɛɛniaa ndu kɔllo.’ (2 Kɔliŋ. 2:​6, 7; 1 Kɔliŋ. 5:​1-5) Nuawɔ se mɛɛ i cho suɛi sɔvɛ le sinaa maa Chɛhowa mel wanaa wa ndu piɛiyo wa le mɛɛ nda tosa biondɔŋndaŋ yɛ le! Kɛ mbo mala nda o nɛi kaalaa niŋ, mbo miŋgi nda o nɛi, nduyɛ mbo chɛl nda le ma miiŋgu ndu o ibuŋ. Nduyɛ o chua buŋgɛi le nyɛ pilɔɔ hoo kpe tosaa le wanaa mal hau yɔŋnda ndala wɔɔŋndaŋ nda.​—Chemi. 4:​8-10.

17. Le yɛɛ naŋ dimi yɛ maa ke sɔviɔɔ opilɛ o Mɛlɛka ke naa wo Baabuiyo cho ni?

¹⁷ Ke sɔviɔɔ opilɛ o Chɛhowa ke naa wo Baabuiyo cho ni. Le yɛɛ naŋ dimi yɛ lende? A mɛɛ naŋ pɛɛku niŋ yɛ, Baabuiyo chɔm naa a taasi Mɛlɛkaa okɔɔ, sakpoyɛi nduɛi vɛlɛ a kaala ndɔɔ. O chɔm vɛlɛ maa Chɛhowa yeema naa miŋ sina ndu, nduyɛ miŋ simnuŋ chaaŋaa nduaa.

18. Vɛɛ naŋ chɔm yɛ maa ŋ nɔ balika melaa le Baabuiyo, ke sɔvɛ Chɛhowa ke naa wo?

¹⁸ Ŋ nɔ miŋ che ke fula hoo Chɛhowa o ba wo maa nyɛ sɔviɔɔ pila o cho ni. (Chemi. 1:​17) Lelaŋ, maa ŋ hiounuŋ lachi a balika melaa chɔmndo le ke sɔviɔɔ hoo. Ŋ tosa hei te ŋ wa pɛ diomndaŋ veeloo leniŋ, nduyɛ miŋ yiyaŋ yiŋgoloŋ o nyɛ naŋ veelu diomndaŋ ndo choo. Mɛɛ naŋ tosa hei fau, ŋ cho nɔ tiindaŋndo maa wana nɔ Baabuiyo wo cho sɛmbɛ naa sala dɔwɔɔ, nduyɛ miŋ “sina vɛlɛ a ndu” okɔɔ.​—Pulɔ. 2:5.