1. Chɔmndɔ tamaseliiyo le sabu naŋ nɔ miŋ tol nɛi chɔmaa Chɛhowaa kɔɔli wo.

 YIYAŊNDƆ maa a luusiaŋ o bundɛ bɛndoo niŋ. Bundɔɔ hoo yɛ, wanaa biyaa cho leniŋ, visiaa wɔɔŋnda, kɛuwa a nyɛm wɔɔŋ cheleŋ. Vɛɛ kɔllo wa yɛ num te wana sina bundɛ koŋ ndo chɔm num pɛ nɛiyo? O kpeekpei niŋ, ma wa a kɔl kɛndɛ tau. Ŋ tuu chieeŋndo hoo a bundɛ bɛndu koŋ. O cho o pia cha a sɔɔŋ wɔɔŋ tɛɛmbuu chaŋyɛi nɛi a Chɛhowa woŋ. Kɛ wana naa kɛndɛ chɔm naa nɛiyo wo cho Chɛhowa ni. Mbo mala naa le miŋ fafaŋ kpundɔɔ, nduyɛ mbo yɛɛ naa o nɛi naŋ sɔla yoomu fafɛɛŋndo o chieeŋ sɛnɛiyo niŋndo choo.

2. Vɛɛ Chɛhowa ke yɛ naa nɛi chɔmaa?

² Vɛɛ Chɛhowa ke yɛ naa nɛi chɔmaa? O tasoo, mbo soliŋ Diom ndɔɔ Baabuiyo kpeku. Kɛ, mbo soliŋ vɛlɛ waŋnda chieeya kpeku le naa nɛi chɔmaa kioo. Le tamaseliiyo, mbo soliŋ “buɛi cho sakpo, nduyɛ mbo wa buɛi taasi wo” kpeku, le naa nyɛm mala naa le pɛɛkoo a ndu okɔɔ woŋ kioo. Mbo mala naa vɛlɛ miŋ tosa kɛɛsiaala kɛndɛlaŋ. (Maa. 24:45) Mbo soliŋ vɛlɛ puaa nɔ taasioo wa kpeku le naa nɛi chɔmaa kioo. Le tamaseliiyo, mi buɛiyaa ibuŋgaa a bɛnduaa kundaa ke naa kɔl dɛɛniaa a nɛi chɔmaa le naa malaa miŋ biunuŋ o teleŋnda kala kalalaŋ bɛŋgu. Ŋ mel bɔɔ Chɛhowa balika le naa nɛi chɔmaa kioo o palɛi mɛɛlɛi hei niŋ. Hei cho naa malaa le miŋ tosa nyɛ o hɛnaŋndo, nduyɛ miŋ hiou lachi a kɔlaŋ o nɛi yoomoo choo.

3. Yɛɛ buŋgɛi hei cho yɛ naa mala miŋ che?

³ Kɛ lepum, miŋ che ndi ikala le nɛi chɔmaa Chɛhowaa chɛlɔɔ, taama taama te o soliŋ pɛ wanaa lahakiaa kpeku le naa ndu kioo. Le yɛɛ? Naapum ŋ hɛnaŋ a nɛi chɔmaa nda ke naa wo le.  Ɔɔ lepum yɛ, miŋ yiyaŋ maa nɛi chɔmaa nda cho naa kioo wo taasi cho leniŋ te, nduyɛ maa o fula Chɛhowa o ba le. A teleŋnda waa nuaa, ŋ nɔ miŋ sina maa Chɛhowa kpeekpei cho wanaa nduaa nɛila chɔmaalaŋ kioo ni. Nduyɛ te ŋ tol laŋ pɛ kɔɔli, miŋ sɔla salalaŋ tau. Le tiindaŋ naa kindioo poŋ, buŋgɛi hei cho naa mala miŋ che (1) mɛɛ Chɛhowa ndoo ke wanaa nduaa o paandoo niŋ nɛi chɔmaa yɛ, (2) mɛɛ o cho naa hau nɛi chɔmaa kioo yɛ, nduyɛ (3) mɛɛ naŋ sɔla tɔnɔɔ yɛ te ŋ hiou pɛ lachi a nɛi ndɔ chɔmaa tolɔɔ kɔɔli.

MƐƐ CHƐHOWA NDOO KE ISƆLUƐIYA NƐI CHƆMAA YƐ

4-5. Vɛɛ Chɛhowa chɔm yɛ maa Muuse o wa soliŋndo kpeku ni le Isɔluɛiya nɛi chɔmaa kioo? (Tofa vɛlɛ fotueiyo.)

⁴ Mi Chɛhowa yulu Muuse isu le mbo soli Isɔluɛiya o chɛleŋ niŋ Ichipi. Mbo chɔm nda kpendekele maa, ndu wa Muuse soliŋndo kpeku ni le nda nɛi chɔmaa kioo. Le tamaseliiyo, mbo ke nda yumbu yumbu ikpuŋgbaa le nda nɛiyo chɔmndo ipala, a yumbu yumbu leyiŋndo le nda nɛiyo chɔmndo ichɔl. (Ɛsɔ. 13:21) Mi Muuse tual yumbu yumboo kɔɔli, nduyɛ mbo yaa ndu nda Isɔluɛiya o Pee Siaŋa Mɛŋma Ihɛllo. Mi siooŋnde bii Isɔluɛiya nduyɛ ma yiyaŋ maa a luɛi o yaŋɔɔleŋ niŋ kanifuule, puaa chɔuwaa Ichipiaŋnda wa nda kiltaŋ kɔɔli, mi mɛŋndaŋ ma wa nda lachi. Ma yiyaŋ maa a cho nda biyɔɔ nduyɛ ma dii nda. Lelaŋ, ma dimi maa biondɔŋndo Muuse tosa ni, le hunɔɔ a nda o Pee Siaŋa Mɛŋma Ihɛllo le. Kɛ o kpeekpei niŋ, Muuse ndoo tosa biondɔŋ te. Chɛhowa ndoo soliŋ ndu kpeku ni, le mbo yɛɛ nda loŋ. (Ɛsɔ. 14:2) Nduyɛ mbo chiindiaa nda o nɛi nda ve kɔl te wo niŋ.—Ɛsɔ. 14:​26-28.

⁵ Mɛɛ wɔsilaŋ 40 la hiou okoŋ kɔɔli, mi Muuse hiau lachi a yumbu yumboo tolɔɔ kɔɔli le wanaa Mɛlɛkaa nɛi chɔmaa kioo o lɛŋnde polteŋ niŋ. a Le teleŋ tiŋ, mi Chɛhowa handu yumbu yumboo o tɛndii Muuse wo choo, nduyɛ Isɔluɛiya kpou wa ndu chɔɔ. (Ɛsɔ. 33:​7, 9, 10) O yumbu yumbu koŋ niŋ Chɛhowa ndoo suaa o ndu lo ni, mi ndu ndoo hivul wanaa nduaa. (Sam 99:7) Mi Isɔluɛiya cha kpendekele maa Muuse kɛsɛ Chɛhowa wa soliŋndo kpeku ni le nda nɛi chɔmaa kioo.

6. Yɛɛ Isɔluɛiya tosa yɛ a nɛi chɔmaa Chɛhowaa? (Nɔmbaa 14:​2, 10, 11)

⁶ Kɛ i cho suɛi imɔnɔ le sinaa maa, mi Isɔluɛiyaa bɔɔbɔɔ kɛɛ nɛi chɔmaa Muuse wa nda kioo wo tolɔɔ kɔɔli, mi che bɛɛ ma cha kpendekele maa ndu Chɛhowa wa soliŋndo kpeku ni. (Nuawɔ Nɔmbaa 14:​2, 10, 11.) Nduyɛ pɛŋ teleŋnda bɔɔbɔɔ, mi ndaa dimi maa o cho Muuse le Chɛhowa wa soliŋndo kpeku le nda nɛi chɔmaa kioo le. Fulamakɔɔlioo wa ni, mi Chɛhowa kɛɛ Isɔluɛiyaa bɔɔbɔɔ o kunda chɛŋ koŋ Ichipi wo tɛɛŋ. O chɛl nda ma luɛi o Lɛŋnde Mɛyaaleŋ niŋ te.—Nɔm. 14:30.

7. Chɔmndɔ tamaseliila wanaa tol nɛi chɔmaa Chɛhowaa kɔɔli wa. (Nɔmbaa 14:24) (Tofa vɛlɛ fotueiyo.)

⁷ A koŋ kpou, mi Isɔluɛiya a tiŋ tual nɛi chɔmaa Chɛhowaa kɔɔli. Le tamaseliiyo, mi Chɛhowa dimi a Kelɛbi okɔɔ maa, mbo “diikuŋ [ndu] a kɔl ndɔɔ kpou.” (Nuawɔ Nɔmbaa 14:24.) Mi Mɛlɛka fanda Kelɛbi, nduyɛ mbo chɛl pɛŋ ndu le mbo hɛli naa o yeema le waa o lɛŋnde Kenaŋndeŋ niŋnda. (Chɔɔ. 14:​12-14) Mi Isɔluɛiyaa veluŋ o kaŋ kɔɔli wa bɛɛ kɛsi tamasi kɛndɔɔ le nɛi chɔmaa Chɛhowaa tolɔɔ kɔɔli. Mɛɛ Chɔɔsuaa miiŋgu o foofo Muuse wo, ‘ma ke ndu bɛɛleŋ haaa a piɔm ndɔɔ.’ (Chɔɔ. 4:14) Mi hei tosa mi Chɛhowa duau nda sala, nduyɛ mbo kua a nda o lɛŋnde o chuel nda buŋgɛi leŋ niŋ.—Chɔɔ. 21:​43, 44.

8. Tɛɛsiaawɔ mɛɛ Chɛhowa ndoo ke wanaa nduaa nɛi chɔmaa o teleŋ masaa waa niŋ yɛ. (Tofa vɛlɛ fotueiyo.)

 ⁸ Mɛɛ wɔsilaŋ latiŋ la hiou okoŋ kɔɔli, mi Chɛhowa yulu wanaa kialaa ŋyamaa isu le wanaa nduaa nɛi chɔmaa kioo. O teleŋ masaa waa niŋ, mbo yulu wanaa suaa le ndu wa isu le wanaa nduaa nɛi chɔmaa kioo. Mi masaa ndaa nɔ laalaŋndo wa tual sila wanaa ndaa suaa le Mɛlɛka wa kɔɔli. Le tamaseliiyo, Mi Masaa Deeve chɔm kaa tusiaŋndo, mɛɛ Netaŋ wana ndoo suaa le Mɛlɛka wo miŋgi ndu o nɛi. (2 Saam. 12:​7, 13; 1 Kolo. 17:​3, 4) Mi Masaa Chɛhosiafati tiindaŋ Chahasiɛɛ le nɛi chɔmaa, nduyɛ mbo dɛɛniaa waŋnda Chuda le ma “laalaŋ nyɛ wanaa suaa le Mɛlɛka wa a dimul” nda wo. (2 Kolo. 20:​14, 15, 20) Te nyɛkindilaa ndoo komal pɛ Masaa Hɛsɛkiya, mi ndoo nyuna Aisaya wana ndoo suaa le Mɛlɛka wo le malaa. (Aisaya 37:​1-6) Teleŋ o teleŋ Masaa waa ndaa tol pɛ nɛi chɔmaa Chɛhowaa kɔɔli, mi ndoo dɔu nda sala, nduyɛ mi ndoo manda wanaa nduaa. (2 Kolo. 20:​29, 30; 32:22) Wana o wana ndoo nɔ mi ndoo bii bila maa, Chɛhowa wa wanaa ndaa suaa le ndu wa soliŋndo kpeku ni, le wanaa nduaa nɛila chɔmaalaŋ kioo. Kɛ, masaa bɔɔbɔɔ a Isɔluɛiya a tiŋ ndaa yeŋ wanaa ndaa suaa le Mɛlɛka wa lani le.—Chɛlui. 35:​12-15.

MƐƐ CHƐHOWA NDOO KE KILISIƆŊAA TASIAA NƐI CHƆMAA YƐ

9. Nɛɛ Chɛhowa ndoo soliŋ yɛ kpeku le Kilisiɔŋnda o wɔsiŋ kɛmɛ tasoŋ niŋ nɛi chɔmaa kioo? (Tofa vɛlɛ fotueiyo.)

⁹ O wɔsiŋ kɛmɛ tasoŋ niŋ, mi Chɛhowa kila kunda leKilisiɔŋndo. Vɛɛ ndoo ke yɛ Kilisiɔŋaa tasiaa kaŋ nɛi chɔmaa? Mbo yulu Chiisu isu le waa kunda leKilisiɔŋndo bolleŋ. (Ɛfi. 5:23) Kɛ, Chiisu pila ndoo suu o buɛiyaa nduaa lo a pilɛŋ pilɛŋ te. Kiilaa a bɛnduaa o Chulusalɛm niŋ ndoo soliŋ kpeku ni le nda nɛi chɔmaa kioo. (Walta. 15:​1, 2) Nduyɛ mbo yulu vɛlɛ bɛnduaa kundaa isu le ma wa kundalaŋ nɛila chɔmaalaŋ kioo.—1 Tɛsa. 5:12; Tai. 1:5.

10. (a) Vɛɛ Kilisiɔŋaa bɔɔbɔɔ o wɔsiŋ kɛmɛ tasoŋ niŋ bii yɛ nɛi chɔmaa ndaa sɔla wo? (Walta Kiilaa 15:​30, 31) (b) Le yɛɛ a tiŋ o sindɔɔ niŋ kɛɛ yɛ wanaa Chɛhowa wa soliŋndo kpeku wa? (Tofa kɔfoo hoo, “ Le Yɛɛ Apum Kɛɛ Yɛ?”)

¹⁰ Baa mi Kilisiɔŋnda o teleŋ koŋ niŋ chɛl pa nɛi chɔmaa kiilaa wa yɔŋgoo wo? A bɔɔbɔɔ wa a kɔl kɛndɛ le ma tol nɛila chɔmaala nda sɔla laŋ kɔɔli. Nduyɛ pɛŋ, mi ndaa ‘dɔɔnuŋ nyaale tau le kɔl dɛɛniaa’ ndaa sɔla wo. (Nuawɔ Walta  Kiilaa 15:​30, 31.) Vɛɛ Chɛhowa bii yɛ niŋ wanaa nduaa nɛi chɔmaa kioo o teleŋ naa niŋ?

MƐƐ CHƐHOWA CHO NAA HAU NƐI CHƆMAA KIOO YƐ

11. Chɔmndɔ tamaseliiyo mɛɛ Chɛhowa bii niŋ wanaa cho chilaŋ chuaa wa nɛila chɔmaalaŋ kioo o teleŋ naa niŋ yɛ.

¹¹ Chɛhowa cho hiouwɔɔ lachi a wanaa nduaa hau nɛi chɔmaa kioo. O bii niŋ Diom ndɔɔ soliŋndo kpeku, vɛlɛ a Chiisu Kiliti Po ndɔ le hei tosaa. Kɛ ŋ cho pa chɔɔ mɛɛ Chɛhowa cho hiouwɔɔ lachi a waŋnda chieeya soliŋndo kpeku o teleŋ naa niŋ yɛ? Ei. Ŋ tofaŋndɔ tamaseliiyo a hiouwɔɔ lachi yɔŋnuŋ o wɔsiŋ 1800 woŋ mɛɛlulaŋ ndo. Mi Chales Taas Lɔɔsɛl a chaaŋaa nduaa bii bila maa, wɔsi 1914 cho wa wɔsi sɔvɛ le Masale Mɛlɛkaleŋ kilaa. (Daan. 4:​25, 26) Huuluŋ Baabuiyoŋ mala nda ni le keŋ biyɔɔ bila. Baa Chɛhowa wa nda pa nɛi chɔmaa kioo o yaasiaa nda koŋ niŋ? I cho kpendekele maa, o wa keŋ tosaa. Nyɛ yɔŋnuŋ o chieeŋndo niŋ a wɔsi 1914 chɔm kpendekele maa, mi Masale Mɛlɛkaleŋ le kanduŋ. A wɔsi koŋ Chɔu Chieeŋ Tasoo kanduŋ ni, nduyɛ mi naala wɔɔŋndaŋ, lɛŋnde nyiiyaaleŋ, a nyɛdiaa lepɛŋndo kui tau. (Luku 21:​10, 11) Chɛhowa kpeekpei wa Sukuwaa Pɛɛkaa Baabuiyaa kaŋ soliŋndo kpeku ni le wanaa nduaa malaa.

12-13. Yɛɛ puaapiliaa wa chilaŋ chuaa wa tosa yɛ a teleŋ Chɔu Chieeŋ Diiŋ Ndɔɔ le wali dimiaa yooŋgu kɛndɔɔ hivioo lachi?

¹² Tofawɔ vɛlɛ nyɛ yɔŋnuŋ a teleŋ Chɔu Chieeŋ Diiŋ Ndɔɔ wo. O fondaŋnda leboltaŋ, mi puaapiliaa wa chilaŋ chuaa wa tosa yaasiaa yiŋgoloŋndo a nyɛ dimiŋ o Sɔɔŋ Chɔɔmaŋndoŋ 17:8 niŋndo okɔɔ. Nduyɛ ma bii bila o pɛɛku ndaa niŋ maa, Chɔu Chieeŋ Diiŋ Ndɔɔ cho wa haaa mi Amakɛdɔŋ fuuluu le. Ma sina maa te chɔuwo chuu pɛ, kɔl nyuloo cho wa le teleŋ tiŋ. Nduyɛ maa, Seiyaa Chɛhowaa cho fondaa sɔla le ma dimi yooŋgu kɛndɔɔ tau. Lelaŋ, ma kila Sukuuwo Kiiliadi le misiɔnalueiya pɛɛkoo le yooŋgu kɛndɔɔ dimioo chieeŋndo balɔɔ silɔ. A teleŋ koŋ, mi waŋndo ndoo yiyaŋ dɔɔ maa keŋ ve suɛi taasi kposoŋ te. A koŋ kpou, mi ndaa yɔŋ misiɔnalueiya o fondaŋnda cheleŋ mi che bɛɛ chɔuwo ndoo chuu wɔ le. Le handɔɔ lechoo, mi buɛi cho sakpo, nduyɛ mbo wa buɛi taasi wo kɛɛsiaa le Sukuu Mandaa iMɛlɛkayaa kandɔɔ o kundalaŋ niŋ. Sukuuwo hoo wa le wanaa dimiaa yooŋgu kɛndiaa malaa le yooŋgu kɛndɔɔ chaa dimioo  a waŋnda pɛɛkoo. b O nɛilaŋ ndaŋ niŋ, a wa wanaa Mɛlɛkaa bɛɛndiaa le wali wa nda lachi wo.

¹³ Hau, miŋ che kpendekele maa, Chɛhowa wa wanaa nduaa nɛi chɔmaa kioo o teleŋ kala kala koŋ niŋ ni. Chɔŋ a teleŋ Chɔu Chieeŋ Diiŋ Ndɔɔ, wanaa Chɛhowaa bii niŋ yooŋgu kɛndɔɔ dimioo fɛɛsɛŋ o lɛŋii bɔɔbɔɔ niŋ. Wanaa bɔɔbɔɔ sina niŋ Chɛhowa, nduyɛ buɛiyaa nduaa cho hiouwɔɔ lachi a yooŋgu kɛndɔɔ dimioo o chieeŋndo choo kpou.

14. Le yɛɛ naŋ nɔ yɛ miŋ tiindaŋ nɛi chɔmaa fula kɔɔna Chɛhowaa vɛlɛ a bɛnduaa kundaa o ba wo? (Sɔɔŋ Chɔɔmaŋndoŋ 2:1) (Tofa vɛlɛ fotueiyo.)

¹⁴ Hau, puaapiliaa cho o Dialii Kuumbaŋ Choo Ve choo wa cho hiouwɔɔ lachi a nɛi chɔmaa Chiisu wo tolɔɔ kɔɔli. A yeema mi nɛila chɔmaala nda ke puaapiliaa laŋ la tɔlnuŋ o yiyaŋ Mɛlɛkaa choo. Koŋ mala mi buɛiyaa ibuŋgaa, a bɛnduaa kundaa yɔŋgu nɛi chɔmaa pilɛ koŋ o kundalaŋ ndo. c Bɛnduaa kundaa cho a pɔyaŋnda cho o ‘ba kɛndɛ’ Kiliti wo choo. (Nuawɔ Sɔɔŋ Chɔɔmaŋndoŋ 2:1.) I cho tonya maa, wanaa lahakiaa bɛnduaa kundaa cho ni, nduyɛ ma tosa biondɔŋndaŋ. Mi Muuse, Chɔɔsuaa, a kiilaa bɛɛ ndaa tosa biondɔŋndaŋ. (Nɔm. 20:12; Chɔɔ. 9:​14, 15; Luomaŋ. 3:23) Kɛ, Chiisu cho wɔ hiouwɔɔ lachi a buɛi cho sakpo wo vɛlɛ a bɛnduaa kundaa nɛi chɔmaa kioo. Nduyɛ o cho hiouwɔɔ lachi a keŋ tosaa “haaa mi chieeŋndo fuuluu o mɛɛlulaŋ.” (Maa. 28:20) Lelaŋ, te wanaa o yulu haa isu wa ke naa pɛ nɛi chɔmaa, ŋ nɔ sabulaŋ tau le miŋ tol laŋ kɔɔli.

MIŊ SƆLA TƆNƆƆ TE Ŋ HIOU PƐ LACHI A NƐI CHƆMAA CHƐHOWAA TOLƆƆ KƆƆLI

15-16. Yɛɛ ŋ pɛɛku yɛ o sɔɔŋ yɔŋnaŋ wanaa tol nɛila chɔmaala Chɛhowalaŋ kɔɔli wa niŋ?

¹⁵ Te ŋ hiou pɛ lachi a nɛi chɔmaa Chɛhowaa tolɔɔ kɔɔli, suŋ suŋ bɛɛ miŋ tuei salalaŋ yeela. Le tamaseliiyo, mi Andi nda Lobiŋ laa ndɔ, duau sila buɛi cho sakpo wo yɔŋgu le yoomoo tosaa tɛtɛlɛ wo o wali niŋ. (Tofa bolii Baabui nda tɛɛsiaa le pɛɛkoo ve le Maatiu 6:22.) Okoŋ, ma yɔŋguŋ le taŋgulta kɔɔnaa tooloo. Mi Lobiŋ dimi aa: “Teleŋndaŋ lapum, fondɛi naŋ wa ve ndii ve i bɔɔ le, nduyɛ naŋ nɔ pɛŋ naa yawaa le. Yaa nɔ mi pisi nyɛm mapuuluŋ yaa soliŋ kpeku le fotueilaŋ chua woŋ, mi che bɛɛ I kaala fotueilaŋ chuaa tau. Mi tambu kɔl tau mɛɛ ya pisi nyɔɔŋ muŋ. Kɛ maa lanɔɔ Ebilaham Sela, mi kɛɛsiaa le mi wa a kɔl kɛndɛ le nyɛ ya wa tosaa le Chɛhowa wo, kɛ o cho kɔllo  handɔɔ o nyɛm ya pisi woŋ choo le.” (Hibu. 11:15) Tɔnɔ yɛɛ Andi nda laa ndɔ Lobiŋ sɔla yɛ o kɛɛsiaala nda tosalaŋ niŋ? Mi Lobiŋ dimi aa: “Ŋ cho a kɔl kɛndɛ tau le yɔŋgɔŋ naa le wali Chɛhowaa tosaa a kɔllo kpou. Te ya naa pɔnɔ nuu wa pɛ wali Chɛhowa ke naa wo tosaa, miŋ che mɛɛ yoomu naa cho wa o chieeŋ sɛnɛiyo niŋ yɛ.” Mi Andi bɛɛ chɛl nyɛ laa ndɔ dimi hoo wo nduyɛ mbo chɔɔlu dimi aa: “Ŋ cho a kɔl kɛndɛ le mɛɛ naŋ cho a yɔŋgaŋ kpou le wali Chɛhowaa tosaa yɛ.”

¹⁶ Te ŋ hiou pɛ lachi a nɛi chɔmaa Chɛhowaa tolɔɔ kɔɔli, ɔɔ nɛi cheleŋ naŋ sɔla tɔnɔɔ wo? Ŋ tofaŋndɔ tamasi Masia wo. Mɛɛ o chii sukuuwo, ndoo yeema mbo dɔu sila o sɔla le kɔɔfaleŋ tosaa wo o wali niŋ. (Maa. 6:33; Luomaŋ. 12:11) Mbo dimi aa: “Yaa tiuba mi kuɛ o sukuu bɛndoo le wɔsilaŋ lahiɔɔlu I paawa nyɛ o nyɛ le. Kɛ yaa yeema mi tosa tau le Chɛhowa. Lelaŋ, mi kɛɛsiaa le wali pɔmbɔ pɛɛkoo, o toolu ya le kɔɔfaleŋ tosaa wo. Kɛɛsiaa sɔviɔɔ opilɛ o ya tosa wo wa koŋ ni. Suŋ suŋ, I cho kɔɔfale lɔɔlɔɔ leŋ tueiyɔɔ yeela. Nduyɛ palɛi ya tosa wali le ve, mi kuɛ malaa o Bɛtɛɛl, vɛlɛ mi tuei walta cheleŋndaŋ tosaa yeela le Chɛhowa.”

17. Salala cheleŋ kuɛɛ naŋ sɔla yɛ, te ŋ hiou pɛ lachi a nɛi chɔmaa Chɛhowaa tolɔɔ kɔɔli (Aisaya 48:​17, 18)

¹⁷ Mi kɔɔnaa sila naa teleŋndaŋ lapum le naa malaa miŋ mal hɔlte nyɛm kiɔɔŋ, a sɔɔŋ nyindu naa le sawala Mɛlɛkalaŋ tɛɛmbuuwo woŋ. O hei niŋ bɛɛ, miŋ sɔla tɔnɔɔ te a tol pɛ nɛi chɔmaa Chɛhowaa kɔɔli. Nduyɛ miŋ nɔ kɔl iyama walaŋndo, vɛlɛ ŋ luei naapila o buulaŋ bɛndoo niŋ te. (1 Timo. 6:​9, 10) Mi hei mala naa miŋ yɔŋguŋ a kɔllo kpou le Chɛhowa piɛiyo. A tonya, hei kpeekpei ke naa nyaaloo a kɔl hiniaa ni.—Nuawɔ Aisaya 48:​17, 18.

18. Le yɛɛ naŋ nɔ yɛ miŋ kɛɛsiaŋ o kɔl le hiouwɔɔ lachi a nɛi chɔmaa Chɛhowaa tolɔɔ kɔɔli?

¹⁸ I cho kpendekele maa, Chɛhowa cho hiouwɔɔ lachi a waŋnda chieeya soliŋndo kpeku le naa nɛila chɔmaalaŋ kioo. O cho hei tosa a teleŋ nyɛpalaa bɛndoo, vɛlɛ a teleŋ Chiisu cho wa Masaa le Wɔsilaŋ Waa Pilɛ Wo. (Sam 45:16) Nduyɛ, ŋ cho wa nɛila chɔmaalaŋ ndaŋ tolɔɔ kɔɔli o yɔŋ bɛɛ miŋ hɛnaŋ a lapum te. I cho wa tɛtɛlɛ le naa te ŋ pɛɛku pɛ le laŋ tolɔɔ kɔɔli suŋ suŋ. Lelaŋ, maa ŋ kɛɛsiaŋ o kɔl le hiouwɔɔ lachi a nɛila chɔmaala Chɛhowalaŋ, vɛlɛ a la puaa o yulu isu le naa waa hɔlteŋ choo wa tolɔɔ kɔɔli. (Aisaya 32:​1, 2; Hibu. 13:17) Hei tosaa cho naa mala miŋ tiindaŋ Chɛhowa, wana cho lo naa nɛiyo chɔmndo haaa miŋ fuuluu o chieeŋ sɛnɛiyo niŋndo.