MI WANAA poonyiaa Baabuiya miŋgi sondoo o sɔɔŋ ŋpum choo teleŋnda bɔɔbɔɔ. Ŋ tofaŋndɔ nɛila yaala nyindu wanaa poonyiaa haa le keŋ tosaa wo:

Teleŋnda nda poonyiaa ndu laŋ. O Isɔluɛi niŋ sindɛ, wanaa bɔɔbɔɔ ndaa nɔ Sawalaŋ o yau choo a ba nda le. Teleŋ ndaa tuɛi Sawalaŋ ndaŋ ndo kinɛi wa teleŋ waŋnda ndaa diinuŋ naapilɛ o tɛndii Mɛlɛkaa ikɛiyo ni. (Ditɔnɔ. 31:​10-12) Kɛ mi sɔɔŋ ŋpum muŋ tosa ndaa tuii nyɛ nda wa nilaŋ yaŋɔɔ wo kpou le. Nduyɛ mi ndaa sim le hawɛila bɔɔbɔɔ. (Nɛhi. 8:​2, 3, 7) O bɔŋaŋnda waa nuaa choo, mi ndaa miŋgi sondoo o sɔɔŋ kulloŋ choo. Mi hei ndii tosa ndi tɛtɛlɛ le mi waŋnda loonuŋ Diom Mɛlɛkaa, nduyɛ ma dɔu ndu o wali niŋ. Mi sondo ndaa miŋgi koŋ o sɔɔŋ choo wo ndoo mala nda le ma loonuŋ nyɛ kpeekpei Mɛlɛka yeema nda ma sina wo.—Lɛvi. 18:​4-22; Ditɔnɔ. 5:1.

Mɛɛ o wa o poonyiaa yɛ. Te a piɔu pɛ Baabuiyo kumboŋ tɔ, kumbuei ipilɛ chondoŋ. Le tamaseliiyo, ŋ cho o yau Sam ndo, Chondii Sɔlɔmɔŋ Nde, a Chaŋ Imɔnɛ Chɛluimaya Wo niŋ. Teleŋndaŋ lepum, chondoŋ muŋ nɔ diomnda nda miŋgi sondoo lechoo laŋ, le mi wanaa cho nilaŋ yaŋɔɔ wa loonuŋ diomnda laŋ. Tofawɔ diomnda cho o Sam 115:​9-11 niŋndaŋ. La dimi aa, “Waŋnda Isɔluɛi, la dɔu tiindaŋ nyaa o Mɛlɛka Yaawɛɛ niŋ. O nɔla mbo mala nya nduyɛ mbo manda nya. Nya wanaa sooluu Mɛlɛka Yaawɛɛ wa kinɛi, O nɔla mbo mala nya nduyɛ mbo manda nya.” Te wanaa soliaa ŋchonduaa ndaa miŋgi pɛ sondoo o diomndaŋ ndaŋ choo, mi keŋ ndii mala nda ma kɛsiŋ suɛi kulle o kɔl.

Saboo le sondoo miŋgioo o sɔɔŋ kulloŋ choo. Lepum, mi wanaa poonyiaa Baabuiya ndaa miŋgi sondoo o sɔɔŋ sɔvɛ sɔviɔŋ choo. Le tamaseliiyo, mɛɛ Chɛhowa dimul Isɔluɛiya maa a dia koowaŋ te, mbo dimul Muuse le mbo loonuŋ nda a sabu o dimul nda lende wo le teleŋnda bɔɔbɔɔ. Mɛlɛka ndoo yeema mbo kindilal nda maa, yoomu cho o dialloŋ niŋndo o koowaŋ niŋ o cho ni. Keŋ sim ni maa, koowaŋ ma cho yoomoo ni. (Lɛvi. 17:​11, 14) Mɛɛ teleŋ tiŋ hiou, mi kilaa a bɛnduaa o Chulusalɛm niŋ poonyiaa a nyɛ Kilisiɔŋnda nɔ ma fafaŋndo okɔɔ, yɔŋii nda tosa nyɛ tɛɛmbuu Mɛlɛka kɔllo wo. Ma kindilal nda vɛlɛ le sabu nda nɔ ma fafaŋ koowaŋ ndo.—Walta. 15:​20, 29.

Chɛhowa ndoo nɔ iyeema le mi sondoo miŋgioo o diomnda ndɔlaŋ choo la simnuŋ naamoo le. Le tamaseliiyo, mi Chiisu dimi aa: “Te la wa piɛileŋ pɛ, la lambaŋ sondoo miŋgioo o diomnda pilɛ laŋ choo mɛɛ wanaa laalaŋ o Mɛlɛka niŋ te wa tosa yɛ le.” (Maa. 6:7) Mbo hiau lachi a naa chɔmndo sɔɔŋ naŋ nɔ miŋ piɛi le muŋ ndoŋ, a mɛɛ naŋ nɔ miŋ piɛi yɛ. (Maa. 6:​9-13) Te ŋ wa pɛ piɛileŋ, mi che bɛɛ ŋ miŋgi sondoo o sɔɔŋ pilɔŋ choo le, kɛ ŋ miŋgi sondoo o sɔɔŋ kuluŋ naŋ yeema piɛileŋ a muŋ okɔɔ woŋ choo.—Maa. 7:​7-11.

Mɛlɛka nɔ sabu o chɛl le ma miŋgi sondoo o sɔɔŋ a diomndaŋ lapum choo wo. Nɛiyo opilɛ o Wana Naa Pɛɛkaa Bɛndoo soliŋ kpeku le naa pɛɛkoo miŋ sɔla tɔnɔɔ leniŋndo cho koŋ ni.—Aisaya 48:​17, 18.