Baabuiyo dimi kpendekele maa, Chɛhowa sina nyɛ nɔ le yɔŋnɔŋndo o chilaŋ niŋndo. (Aisaya 45:21) Kɛ, o chɔm naa teleŋ Chɛhowa tosa keŋ ndo vɛlɛ a mɛɛ o tosa ndi yɛ le. Lelaŋ, o cho kpede le naŋ sina a kpaaya Chɛhowa nɔ hoo le sinaa a chilaŋ okɔɔ wo le. Kɛ, ŋ tofaŋndɔ sɔɔŋ ŋtiŋ ŋ naŋ sina woŋ.

Nyɛ o nyɛ kuuna Chɛhowa sɔɔŋ tosaa le, mɛɛ mi ndupila yeema. Taasi ndɔɔ nɔ lamɛɛlu le. Lelaŋ nyɛ o nyɛ o yeema pɛ le dimioo a chilaŋ okɔɔ, ndu o dimi ni. (Luomaŋ. 11:33) Kɛ le mɛɛ o duau ndupila o mandaa bɛŋgu nyɛkɛndɛi yɛ, mbo kɛɛsiaa vɛlɛ le kiɔɔ sinaa nyɛ cho yɔŋnɔŋ o chilaŋ niŋndo.—Tuuwɔ Aisaya 42:14.

Mi Chɛhowa tosa mi hɛnaŋ ndɔɔ yɔŋnuŋ. Vɛɛ keŋ chɛlaŋ yɛ a kpaaya o nɔ le sinaa a chilaŋ okɔɔ wo? Mi Aisaya 46:10 dimi aa: “O kandɔŋndo mi dimul nya nyɛ nɔ le yɔŋnɔŋndo o mɛɛlulaŋndo, lɔɔpa bɛɛ mi i yɔŋnuŋ. Sɔɔŋ nɔ le hunɔɔ yɔŋnɔŋndo woŋ, mi dimul nya a muŋ okɔɔ sindɛ pa. Ya Mɛlɛka Yaawɛɛ, nyɛ o nyɛ ya I tuu pɛ, yɔŋnɔŋndo o yɔŋnuŋ ni. Nyɛ ya I yeema le tosaa wo, ndu ya I tosa ni.”

Lelaŋ, saboo opilɛ o Chɛhowa dimi a nyɛ nɔ le yɔŋnɔŋndo o chilaŋ niŋndo cho ni maa, o nɔ kpaayaa le tosaa nyɛ o yeema wo. Chɛhowa nɔ iyeema le keleŋaa sinaa nyɛ cho yɔŋnɔŋ o chilaŋ niŋndo le. I wa ko maa suɛi keŋ chuu niŋ yɔŋnɔŋ kɛ mbo wa hɔlteŋ keekoo lechoo. Kɛ mbo kɛɛsiaa maa, suɛi hei nɔ mi i yɔŋnuŋ a teleŋndo hoo, nduyɛ mbo tosa mi i yɔŋnuŋ a teleŋ koŋ.—Ɛsɔ. 9:​5, 6; Maa. 24:36; Walta. 17:31.

Le saboo hoo, mi Baabuiyo soliŋ diomndaŋ ndaŋ, “nyɛ ya I dimi maa o cho yɔŋnɔŋndo,” a “nyɛ ya I kɛɛsiaa le tosaa wo” kpeku, le tɛɛsiaa a nyɛ Chɛhowa tosa a sɔɔŋ nɔ le hunɔɔ yɔŋnɔŋndo woŋ okɔɔ. (2 Masaa. 19:25; Aisaya 46:11) Diomndaŋ ndaŋ la chɛlaŋ a diom nda soliŋ kpeku le “wana toosiaa ŋkpɛɛnɔɔ” wo. (Chɛlui. 18:​3, 4) Mɛɛ wana toosiaa ŋkpɛɛnɛ kɛndɔɔ o toosiaa nuaa kpɛɛnɛi yɛ, lende koni Chɛhowa bɛɛ miŋgi naa chɔuwɔɔ o nɛi o yeema wo choo ni le mi hɛnaŋ ndɔɔ o yɔŋnuŋ.—Ɛfi. 1:11.

Mi Chɛhowa chɛl le mi waŋnda tosa chuaŋ chuaa a ba nda. O chɔm nyɛ nɔ le hunɔɔ yɔŋnɔŋndo o yoomu waŋndo niŋndo le. Kɛlɛŋgaa niŋ te mbo chɛl le mi wanaa kɛndiaa tosa nyɛ yaa nda o kpundɔɔ niŋndo. Mbo chɛl le mi naa kpou bii yoomu naa mɛɛ naŋ yeema yɛ. Kɛ mbo pɛɛku naa mɛɛ naŋ nɔ miŋ bii ndu o nɛi sɔviɔɔ choo yɛ.

Ŋ tofaŋndɔ tamaseliilaŋ latiɔɔŋ. Tamaselii tasoo soo a wanaa wa o Ninivɛɛ niŋnda. Mi Chɛhowa dimi maa chiee koŋ nɔ le tambei sɔlaa le yɔŋ wɔɔŋ wa loŋ ndo. Kɛ mɛɛ wanaa wa o chiee koŋ niŋnda wookuŋ, mi Chɛhowa “maŋgala kɔl ndɔɔ o tusi lɛ nda dɛnɛ palaa choo mɛɛ ndu oo dimi yɛ le.” (Chona 3:​1-10) Mɛɛ waŋnda Ninivɛɛ tuei nyɛ Chɛhowa dimi le hunɔɔ tosaa wo okoŋ ma wookuŋ, mi Chɛhowa siŋga kɔl ndɔɔ.

Tamaselii diiŋ ndɔɔ cho a nyɛ dimiŋ a Sailɔɔ, wana ndoo nɔ mi ndoo soli Chuuwa o chɛleŋ niŋndo ni. Nduyɛ mbo yɔŋgu diomndeŋ le ma miŋgi chiɛi Chɛhowaa taŋgul. (Aisaya 44:26–45:4) Mi Sailɔɔ o wa Masaa le Paasiaa wo peelu huului dimiŋ hei ve. (Ɛsi. 1:​1-4) Sailɔɔ ndoo piɛi Mɛlɛka tonyaa le. Kɛ mi Chɛhowa soliŋ ndu kpeku le huuluei hei peeloo. Nduyɛ o beŋ ndu le mbo piɛi ndu le.—Pulɔ. 21:1.

Sɔɔŋ nyɛɛmbɔ koni cho muŋ ni, ŋ Chɛhowa yiyaŋ a muŋ okɔɔ te o wa pɛ suɛi a chilaŋ okɔɔ woŋ. O kpeekpei niŋ, wana o wana cho mbo bii bila mɛɛ Chɛhowa yiyaŋ ɔɔ mɛɛ o tosa sɔɔŋ yɛ le. (Aisaya 55:​8, 9) Kɛ, nyɛ naŋ sina kinɛiyo cho ni maa, mi Chɛhowa kindi tiindaŋ naa le sinaa maa, nyɛ cho o kɛndɔɔ wo o tosa lɔɔlɔɔ ni. Nduyɛ ŋ nɔ tiindaŋndo maa o cho hunɔɔ nyɛ pilɔɔ kpe tosa o chilaŋ niŋ.