1-2. Yɛɛ mala yɛ naa miŋ bii bila mɛɛ Chɛhowa wa sinaŋndo yɛ, mɛɛ Setana dimi choolaŋ a ndu okɔɔ?

 YIYAŊNDƆ a hei okɔɔ: Ŋ dimi wɔ maa, wana ŋ buulaŋ a ndu okɔɔ wo dimi suɛi wɔɔŋnde ipum a num okɔɔ. A sina maa choolaŋ o dimi ni. Kɛ, mi apum laalaŋ ndu. I hiou le wɔu kpou ve, mi wanaa kaŋ wa sondoo miŋgioo o choola laŋ choo, nduyɛ pɛŋ mi wanaa bɔɔbɔɔ laalaŋ a laŋ. Vɛɛ ŋ sinaŋ yɛ? Te o yɔŋ pɛ ma buulaŋ a waŋnda chieeya nduyɛ a diola numnda kɛndɛlaŋ, mi choola nda dimi a num okɔɔ laŋ la tɛɛmbuu num kɔllo tau. Baa keŋ cho tonya le?—Pulɔ. 22:1.

² Tamaseliiyo hoo mala naa le miŋ bii bila mɛɛ Chɛhowa wa sinaŋndo yɛ, mɛɛ nda tɛɛmbuu diola ndɔlaŋ. Mi po ndɔɔ opilɛ o choo choo niŋ dimi choolaŋ a ndu okɔɔ o Ifi lo, nduyɛ mi Ifi laalaŋ choola laŋ. Mi choola laŋ la tosa mi Adam nda Ifi kɛɛ Chɛhowa diikɔŋndo. Okoŋ kɔɔli, mi waŋnda chieeya kpou simnuŋ wanaa lahakiaa, nduyɛ miŋ sɔla piɔmndo le haki naa. (Chɛ. 3:​1-6; Luomaŋ. 5:12) Kpɔkɔsila naŋ cha hau o chieeŋndo niŋndaŋ, mɛɛ piɔmndaŋ, chɔulaŋ, a saŋgaa cho nuaa yɛ, la tɔlnuŋ o choola Setana pɛŋgɛla o kpeloo niŋ Idɛŋ ndaŋ choo. Baa mi Chɛhowa sinaŋ pa nyɛ nɛiyaa le choola laŋ, nduyɛ a fulamakɔɔlila la hiŋ ndaŋ? Ei. Kɛ, o tembu kɔl tau, ɔɔ mbo miŋgi maa le. Nduyɛ pɛŋ, Mɛlɛka “kɔl kɛndɔɔ” o cho ni.—1 Timo. 1:11.

3. Dikeŋnaŋ kuɛɛ naŋ nɔ yɛ?

³ Ŋ nɔ dikeŋnaŋndo le tooloo le diola Chɛhowalaŋ dindioo, sanaa a nɛi chɔmaa hoo diikɔŋndo. Ndu cho ni: ‘Saŋgala diola  Chɛhowalaŋ.’ (Sam 113:1) Ŋ tosa hei te ŋ dimul pɛ acheleŋnda a sɔɔŋ kɛndɛŋ o tosa woŋ, nduyɛ a tonyala cho a ndu okɔɔ laŋ. O bɛnda bɔɔ ma tosa keŋ. Ŋ tofaŋndɔ sɔɔŋ sala yaa mala naa, miŋ saŋgala diola Chɛhowalaŋ a kɔl naa kpou wo.

MIŊ NƐŊI CHƐHOWA KƆLLO TE Ŋ SAŊGALA PƐ DIOLA NDƆLAŊ

4. Le yɛɛ saŋgala naa nɛŋi yɛ Chɛhowa kɔllo? Chɔmndɔ tamaseliiyo. (Tofa vɛlɛ fotueiyo.)

⁴ Ŋ nɛŋi Finya naa o choo choo niŋ kɔllo te ŋ saŋgala pɛ diola ndɔlaŋ. (Sam 69:​30, 31) Baa keŋ sim ni maa Mɛlɛka kpuluŋguma bɛndoo, cho maa wanaa lahakiaa a yeema saŋgalaa le kɔl dɛɛniaa ɔɔ yoomuaŋ miiŋgoo sɔlaa wa? Sako. Ŋ tofaŋndɔ tamaseliiyo hoo. Yiyaŋndɔ mɛɛ chuaambɔɔ nyaanuŋ nuaa o finya ndɔ lo, mbo kɔɔmiaŋ ndu, nduyɛ mbo dimi aa, “O chieeŋndo choo kpou, num hiou wa finya kɛndɛ!” Mi hei tosa mi finya ndɔ mam muɛɛŋ, nduyɛ mbo naŋ kɔl tau. Le yɛɛ? Ŋ dimi pa maa finya yeema saŋgalaa chua ndɔɔ o ba wo o cho ni? Sako. Kɛ le mɛɛ o kaala chua ndɔɔ tau yɛ, mbo naŋ kɔl le mɛɛ o chɔm ndu kaalaa a balika melaa yɛ. O sina maa suliŋnda waa nuaa la cho chua ndɔɔ mala le mbo wa a kɔl kɛndɛ mɛɛ o hindu fau. Le sabula waa nuaa, Chɛhowa, Finya naa kpou kpou wo naŋ kɔl ni te ŋ saŋgala ndu pɛ.

5. Te ŋ saŋgala pɛ diola Mɛlɛkalaŋ, vɛɛ keŋ mala yɛ naa miŋ chɔm maa wana lachoowaa Setana cho ni?

⁵ Te ŋ saŋgala pɛ Finya naa cho o choo choo niŋndo, mi keŋ mala naa le chɔmndo maa choolaŋ Setana dimi a naa a pilɛŋ pilɛŋnda okɔɔ ni. Setana dimi maa, wana chiee kɛ kɛ nɔla mbo lo o laalaŋ ndɔɔ choo le diola Mɛlɛkalaŋ te. Nduyɛ maa te ŋ wa pɛ o nyɛkindilaa bɛŋgu, ŋ nɔla miŋ lo o pimbi naa simiaa choo o Mɛlɛka lo le. Mbo dimi vɛlɛ maa, naa kpou cho Mɛlɛka kɛɛ diikɔŋ, te ŋ yiyaŋ pɛ maa ŋ cho tɔnɔɔ sɔla te ŋ tosa keŋ pɛ. (Choobu 1:​9-11; 2:4) Kɛ mi Choobu lo o laalaŋ ndɔɔ choo, nduyɛ mbo chɔm kpendekele maa wana lachoowaa Setana cho ni. Kɛ num yɛ? Naa a pilɛŋ pilɛŋnda kpou nɔ dikeŋnaŋndo le Finya naa tooloo a ndu kɔllo nɛŋioo, te ŋ lo pɛ o pimbi naa simiaa choo. (Pulɔ. 27:11) Dikeŋnaŋ bɛndoo pila cho hoo ni.

6. Vɛɛ naŋ tuallɛ tamasi Masaa Deeve a o Livaiya kɔɔli? (Nɛhimaya 9:5)

⁶ Mi wanaa nɔ kaalaa le Chɛhowa wa saŋgala diola ndɔlaŋ a kɔl ndaa kpou. Mi Masaa Deeve poonyiaa aa: “I cho Mɛlɛka Yaawɛɛ saŋgala a kɔl nuu kpou, nduyɛ a yiyaŋ nuu kpou. I cho diola ndɔla [diandaa] laŋ saŋgala.” (Sam 103:1) Mi Deeve bii bila maa, te ŋ saŋgala pɛ diola Chɛhowalaŋ, mɛɛ ndupila kpeekpei naŋ saŋgala koŋ ni. Te ŋ tuei pɛ diola  Chɛhowalaŋ, miŋ yiyaŋ a wana suu o cho wo, suliŋnda ndɔlaŋ, nduyɛ a sɔɔŋ kɛndɛŋ o tosa niŋndoŋ. Deeve ndoo yeema mbo ke diola Mɛlɛkalaŋ bɛɛleŋ, nduyɛ mbo saŋgala laŋ. Ndoo yeema keŋ tosaa a kɔl ndɔɔ kpou. O nɛi pilɛ koŋ choo, mi Livaiya chua chilaŋ le Chɛhowa saŋgalaa. Ma dimi o nɛi lebɛɛ niŋ maa, saŋgala nda ke diola Chɛhowalaŋ ndo cho letuu le. (Nuawɔ Nɛhimaya 9:5.) A tonya, mi saŋgala waa nuaa tosa mi Chɛhowa naŋ kɔl tau.

7. Vɛɛ naŋ saŋgala yɛ Chɛhowa o yooŋgu kɛndɔɔ dimioo niŋ, a o yoomu naa niŋ lepaa o lepaa?

⁷ Hau bɛɛ, miŋ nɛŋi Chɛhowa kɔllo, te ŋ soo pɛ a ndu okɔɔ, miŋ chɔm ndu balika melaa, nduyɛ a mɛɛ kpɛ naŋ kaala ndu yɛ. Te ŋ wa pɛ o wali pollo niŋ, nyɛ naŋ kɛsi kɔllo choo wo cho acheleŋnda malaa ma naŋnuŋ Chɛhowa ikɛi, vɛlɛ ma che ndu maa Finya kaalaa o cho ni. (Chemi. 4:8) Ŋ cho a kɔl kɛndɛ le acheleŋnda chɔmndo mɛɛ Baabuiyo tɛɛsiaa a kaala Chɛhowaa, sandii nduɛi, taasi ndɔɔ, kpaaya ndɔɔ, vɛlɛ a suliŋnda ndɔla kɛndɛla cheleŋ okɔɔ yɛ. Ŋ saŋgala vɛlɛ Chɛhowa, nduyɛ miŋ nɛŋi ndu kɔllo te ŋ tosa pɛ o naŋ tiuba wo le tamasi ndɔɔ tolɔɔ kɔɔli. (Ɛfi. 5:1) Te ŋ tosa keŋ pɛ, mi acheleŋnda che maa ŋ cho teŋgeŋ a wanaa cheleŋ o chieeŋ dɛnɛwɔɔŋndo hoo niŋ. (Maa. 5:​14-16) Te ŋ wa pɛ latulu a nda lepaa o lepaa, ŋ nɔla miŋ chɔm nda le sabu naŋ cho teŋgeŋ a nda wo. Fulamakɔɔlioo wa ni, mi wanaa nɔ yeemɛiya sɔɔŋguu Mɛlɛka naa ikɛi. Te ŋ saŋgala Chɛhowa pɛ o nɛila waa nuaa niŋ, miŋ nɛŋi ndu kɔllo tau.—1 Timo. 2:​3, 4.

SAŊGALA DIOLA CHƐHOWALAŊ MA NƐŊI CHIISU KƆL

8. Vɛɛ Chiisu kɛsullɛ naa tamaseliiyo le diola Chɛhowalaŋ saŋgalaa?

⁸ Wana o wana cho o choo choo niŋ ɔɔ o lɛŋndeŋ choo mbo sina Chɛhowa maa Chiisu le. (Maa. 11:27) Chiisu kaala Finya ndɔ, nduyɛ mbo chua chilaŋ le diola ndɔlaŋ saŋgalaa. (Chɔŋ 14:31) Mbo saŋgala Mɛlɛka tau mɛɛ o wa yooŋgu kɛndɔɔ dimioo o lɛŋndeŋ choo. Mɛɛ o wa piɛileŋ o Finya ndɔ lo o nyumma ndɔma mɛɛlaŋ choo tuupa mbo sɔla piɔmndo, mbo dimi aa: “I chɔm nda diola numndaŋ.” (Chɔŋ 17:26) Yɛɛ ndoo yiyaŋ yɛ?

9. Vɛɛ Chiisu soliŋ yɛ taloo kpeku le tɛɛsiaa wana suu Finya ndɔ cho wo?

⁹ Mi Chiisu tosa tau, mbo hiau bɛɛ waŋnda dimullo maa diola Mɛlɛkalaŋ la cho Chɛhowa ni. Chuuwaa Chiisu wa pɛɛkoo wa ndaa sina niŋ a diola Mɛlɛkalaŋ okɔɔ. Kɛ mbo chua chilaŋ le waa “wana tɛɛsiaa [wana] suu Mɛlɛka cho wo.” (Chɔŋ 1:​17, 18) Le tamaseliiyo, mi yaula maHibuluilaŋ la tɛɛsiaa maa Mɛlɛka nɔ nyiɛɛye, a kɛndɛiyo Chɛhowa cho ni. (Ɛsɔ. 34:​5-7) Mi Chiisu chɔm hei kpendekele mɛɛ o dimi taloo a poombɔ ndoo laasiaŋndo, vɛlɛ a finya ndɔ okɔɔ. Mɛɛ finyaa che po ndɔ wookuŋ ndo hunɔɔ “landaŋ,” mbo nyaanuŋ le ndu demullo, nduyɛ mbo mal ndu haki a kɔllo kpou. Te ŋ veelu pɛ diomndaŋ a bundɛi hei okɔɔ, miŋ che kɛsɛ mɛɛ Chɛhowa nɔ nyiɛɛye yɛ. (Luku 15:​11-32) Mi Chiisu mala acheleŋnda le ma bii bila wana suu Chɛhowa cho wo.

10. (a) Vɛɛ naŋ looku yɛ sina maa mi Chiisu soliŋ diola kpeekpeila Finya ndɔlaŋ kpeku, nduyɛ yɛɛ ndoo yeema yɛ mi acheleŋnda tosa? (Maki 5:19) (Tofa vɛlɛ fotueiyo.) (b) Yɛɛ Chiisu yeema yɛ naa hau miŋ tosa?

¹⁰ Baa Chiisu ndoo yeema vɛlɛ pa acheleŋnda le ma soliŋ diola kpeekpeila Finya ndɔlaŋ kpeku? Ei. O palɛi nduɛi niŋ, simlachiaa lepiɛiya apum ndaa laalaŋ maa, i ve suɛi lebɛɛ kposoŋ le diola Mɛlɛkalaŋ veeloo le. Kɛ o chɛl mi naamula tolnuŋ ndaŋ o Diom Mɛlɛkaa choo le laŋ, la kɛɛlu ndu diola Mɛlɛkalaŋ bɛɛleŋ kioo le. Yiyaŋndɔ a teleŋ o siŋgi po nyinaa wɔɔŋnda wa kɔɔli o tanda Kɛluasiŋ ndo niŋndo. Mi siooŋnde bii waŋnda, nduyɛ ma nyɔɔlu Chiisu le mbo faŋaŋ ndoŋ. (Maki 5:​16, 17)  A koŋ kpou, ndoo yeema mi waŋnda ndaa sina a diola Chɛhowalaŋ okɔɔ o tanda koŋ niŋ. Lelaŋ, mbo dimul po o siŋgi wo le mbo dimul waŋnda, o cho a nyɛ ndu Chiisu tosal ndu wo le, kɛ a nyɛ Chɛhowa tosal ndu wo. (Nuawɔ Maki 5:19.) a Hau bɛɛ, Chiisu yeema naa miŋ tosa mi waŋnda sina diola Finya ndɔlaŋ o chieeŋndo choo kpou. (Maa. 24:14; 28:​19, 20) Te ŋ tosa keŋ pɛ, mɛɛ ŋ cho Chiisu Masanɔ naa kɔllo nɛŋi.

11. A yɛɛ okɔɔ Chiisu pɛɛku yɛ buɛiyaa nduaa le ma piɛi, nduyɛ le yɛɛ keŋ cho yɛ suɛi sɔvɛ? (Isikiaa 36:23)

¹¹ Chiisu ndoo sina maa, sabu Chɛhowaa wa ni, le mi diola ndɔlaŋ la sɔla diondɔɔ, nduyɛ mbo faŋa tɔɔ wɔɔŋ cho laŋ choo wo. Lelaŋ o pɛɛku buɛiyaa nduaa ni le ma piɛi aa: “Finya naa o choo choo niŋ, maa diola numndaŋ la wa la diandaa.” (Maa. 6:9) Mi Chiisu dimi maa suɛi hei wa nyɛ sɔvɛ bɛndu le wana o wana o chieeŋndo choo. (Nuawɔ Isikiaa 36:23.) O choo choo niŋ a o lɛŋndeŋ choo, wana o wana tosa wallo le diola Chɛhowalaŋ dindioo mbo sulaŋ maa Chiisu le. Kɛ mɛɛ nda bii ndu, mi yaamɔɔwaa nduaa hɛɛnduu ndu choolaŋ choo maa, o tɛɛmbuu diola Finya ndɔlaŋ. Chiisu ndoo sina maa, diola Finya ndɔlaŋ tɛɛmbuuwo, haki wɔɔŋ wɔɔŋ ndoo hiou hakilaŋ kpou wo o cho ni. Mbo tambu kɔl tau mɛɛ nda nyiinduu ndu choolaŋ choo, nduyɛ ma bii ndu le haki o tosa le wo. Naapum hei kpeekpei tosa ni, mbo wa “mɔnɛi biyɔɔ tau” tuupa mi teleŋ nda wa ndu biyɔɔ wo fuuluu.—Luku 22:​41-44.

12. Vɛɛ Chiisu dindi yɛ diola Finya ndɔlaŋ o nɛi hiou kpou wo choo?

¹² Le diola Finya ndɔlaŋ dindioo, mi Chiisu biunuŋ saŋgala suu o suu. Ma yei ndu, nduyɛ ma hɛɛnduu ndu choolaŋ choo. Mbo sina maa o diikuŋ Finya ndɔ o sɔɔŋ niŋ kpou, nduyɛ siɔmbula ve ndu le nyɛ o nyɛ le. (Hibu. 12:2) Ndoo sina vɛlɛ maa Setana wa ndu chɔulabaa o teleŋ kala koŋ niŋ. (Luku 22:​2-4; 23:​33, 34) Setana ndoo laalaŋ maa, o cho Chiisu faŋga o laalaŋ ndɔɔ choo. Kɛ o sɔla batiuwaa le. Mi Chiisu chɔm kɛsɛ maa, wana lachoowa wɔɔŋ wɔɔŋndo Setana cho ni, nduyɛ maa Chɛhowa nɔ buɛiyaa chɔm ndu lo lechoo wo wa, o yɔŋ bɛɛ ma wa o nyɛkindilaa bɛŋgu.

13. Vɛɛ ŋ nɛŋi yɛ Masa numndo o choo choo niŋ kɔllo?

 ¹³ Baa a yeema pa ma nɛŋi Masa numndo o choo choo niŋ kɔllo? Hiou lachi a diola Chɛhowalaŋ saŋgalaa, nduyɛ ma mala acheleŋnda le ma pɛɛku a suliŋnda ndɔla kɛndɛlaŋ okɔɔ. Te a tosa keŋ pɛ, mɛɛ tamasi Chiisu wo ŋ cho koŋ tolɔɔ kɔɔli ni. (1 Pitɛ 2:21) Maa Chiisu, a cho Chɛhowa kɔllo nɛŋi nduyɛ ma chɔm kɛsɛ maa wana lachoowa bɛndu bɛndoo Setana cho ni.

DIOLA CHƐHOWALAŊ SAŊGALAA CHIINDIAA YOOMULAŊ

14-15. Sɔɔŋ kɛndɛŋ kuɛɛ yɔŋnuŋ yɛ te ŋ pɛɛku pɛ waŋnda a Chɛhowa okɔɔ?

¹⁴ Te ŋ saŋgala diola Chɛhowalaŋ pɛ, miŋ mala le yoomula acheleŋnda chiindiaa. Vɛɛ naŋ tosa yɛ keŋ? A mɛɛ naŋ sina yɛ, Setana “suumiaa” wanaa laalaŋ o Mɛlɛka niŋ te wa kɔltaŋ. (2 Kɔliŋ. 4:4) Fulamakɔɔlioo cho ni, a laalaŋ niŋ hau choola Setana laŋ ndaŋ. Laŋ la cho ni, Mɛlɛka cho le, o cho landaŋ a naa, o buulaŋ a waŋnda chieeya le, wana dɛnɛ wɔɔŋndo o cho ni, nduyɛ mbo tusi wanaa dɛnɛ wɔɔŋnda nyɛpalaa choo le fɛɛŋ a fɛɛŋ. Setana dimi choolaŋ ndaŋ kanifuule, o yeema mbo tɛɛmbuu diola kɛndɛla Mɛlɛkalaŋ, vɛlɛ mbo kuuna waŋnda ndu sɔɔŋguuwo ikɛi. Kɛ te ŋ wa yooŋgu kɛndɔɔ dimioo pɛ, miŋ kuuna Setana kpeleŋ ndɔɔ komallo. Miŋ pɛɛku waŋnda a tonya cho a Finya naa okɔɔ wo, nduyɛ miŋ saŋgala diola ndɔlaŋ. Yɛɛ wa yɛ fulamakɔɔlioo?

¹⁵ Tonyala cho o Diom Mɛlɛkaa niŋndaŋ la nɔ kpaayaa tau. Te ŋ pɛɛku pɛ acheleŋnda a Chɛhowa okɔɔ, okoŋ ma sina wana suu o cho wo, miŋ che suɛi kɔndɔfilii bɛnduei o yɔŋnɔŋndo. Waŋnda ve lɛ a sumɛi a choola Setanalaŋ te, nduyɛ ma che suliŋnda kɛndɛla Finya naa. Mi kɔndɔfillo bii nda a kpaaya ndɔ bɛndoo okɔɔ. (Aisaya 40:26) Ma pɛɛku le laalaŋndo dɔwɔɔ o ndu niŋ kanifuule, o cho wana sakpo. (Ditɔnɔ. 32:4) Ma pɛɛku tau o taasi ndɔ bɛndoo niŋ. (Aisaya 55:9; Luomaŋ. 11:33) Ma sɔla kɔl dɛɛniaa te a pɛɛku pɛ maa ndu cho kaalaa ni. (1 Chɔŋ 4:8) Mɛɛ nda sɔɔŋguu Chɛhowa ikɛi fau, lende koni tiindaŋ nda nɔ le waa achal o chieeŋndo choo maa chuauwaa ndɔ wo simnuŋ nyɛ kpeekpei ni. Nuawɔ se dikeŋnaŋ bɛndu naŋ nɔ le waŋnda malaa ma sɔɔŋguu Finya nda ikɛiyo! Te ŋ tosa lende pɛ,  mi Chɛhowa chua naa maa, “wanaa walla naŋ cho latulu” a ndu ni.—1 Kɔliŋ. 3:​5, 9.

16. Vɛɛ i piiliaŋ yɛ waŋnda apum mɛɛ nda pɛɛku a diola Mɛlɛkalaŋ okɔɔ?

¹⁶ O kandɔŋndo, lepum miŋ pɛɛku waŋnda maa diola Mɛlɛkalaŋ la cho Chɛhowa ni. Mi hei piiliaŋ ɔɔ mi i siŋga wana yeema pɛɛkoo a Mɛlɛka okɔɔ wo. Le tamaseliiyo, mi chua feleŋgɔnɔ pilɛ diolaŋ Aliya b mandaŋ o piɛile tolnuŋ o pɛɛkula Baabuiyo choo leŋ niŋ. Kɛ ndoo hini kɔl a piɛile leŋ te, nduyɛ ndoo nɔ chaŋyɛi kpɛɛluŋ a Mɛlɛka le. Kɛ mi sɔɔŋ siŋgaŋ mɛɛ o kandu Baabuiyo pɛɛkoo a Seiyaa Chɛhowaa. Mbo kandu Mɛlɛka chɔɔ maa chaaŋ ndɔ. Nduyɛ mi kɔndɔfillo bii ndu mɛɛ o pɛɛku maa a faŋa diola Mɛlɛkalaŋ o Baabuila bɔɔbɔɔ niŋ ma miŋgi Salamanɔɔ ɔɔ Masanɔɔ laŋ. Kɛ mɛɛ o sina diola Chɛhowalaŋ, mi keŋ siŋga yoomu ndɔɔ. Mbo dimi a kɔl kɛndɛ aa: “Chaaŋ ni kɛndɔɔ nɔ diolaŋ!” Okoŋ kɔɔli mbo dimi aa: “I cho niŋ o kɔl nyuloo niŋ. Mi cha maa bɛɛle bɛnduleŋ pila keŋ wa le ya ni.” O naamula Chuuwaa ndaa nɔ sawalaŋ tau wo niŋ po pilɛ diolaŋ Stiiviŋ mandaŋ ni. Chondoŋ ndoo soli ni. Mbo fafaŋ balaŋ lueiyo o piɛiye niŋ kanifuule, mbo cha maa kaala mulu muluaŋ ndaŋ la wa leniŋ. Kɛ mɛɛ kala ndɔ sɔla piɔmndo, mbo chɛl le Baabuiyo pɛɛkoo a Sei Chɛhowaa. Mɛɛ o pɛɛku a diola Mɛlɛkalaŋ okɔɔ, mi keŋ piiliaŋ ndu tau. Mbo dimi aa: “Kani bɛɛ I pɛɛku wɔ a diola Mɛlɛkalaŋ okɔɔ le.” Mbo chɔɔlu dimi aa: “Teleŋ tasoo cho hoo ni le mi bii bila maa Mɛlɛka cho kpeekpei. Mi cha ndu maa waŋndo kpeekpei o cho ni. Mi sina maa I saaluŋ chaŋyɛi.”

17. Le yɛɛ ŋ nɔ yɛ ma hiou lachi a diola Chɛhowalaŋ saŋgalaa? (Tofa vɛlɛ fotueiyo.)

¹⁷ Te a wa yooŋgu kɛndɔɔ dimioo a waŋnda pɛɛkoo pɛ, baa a chɔm nda pa a diola Chɛhowalaŋ okɔɔ? Baa ma mala nda pa ma che wana suu Mɛlɛka cho wo? O keŋ tosaa niŋ, a cho wa diola Mɛlɛkalaŋ saŋgalaa. Maa hiou lachi a diola Chɛhowalaŋ saŋgalaa, sanaa a waŋnda malaa le ma che wana suu o cho wo. O nɛi waa nuaa choo, a cho yoomula bɔɔbɔɔ piŋi, nduyɛ a cho nɛi chɔmaa Masanɔ numndo tolɔɔ kɔɔli, ndu cho yɛ Chiisu Kiliti ni. I hiou kpou ve, a cho Finya num kaalaa Chɛhowa kɔllo nɛŋi. Maa hiou lachi a diola “[ndɔlaŋ] saŋgalaa lepaa o lepaa.”—Sam 145:2.