Chɛhowa Che “Amiina” Ŋ Dimi wo Nyɛ Sɔvɛ Bɛndu
CHƐHOWA che piɛile naaleŋ nyɛ sɔvɛ bɛndu. O cho ‘nilaŋ yaŋɔɔ’ o nyɛ buɛiyaa nduaa cho dimioo wo, nduyɛ mbo che nyɛ o nyɛ naŋ cho tosaa le ndu saŋgalaa o sɔvɛ bɛndu, o yɔŋ bɛɛ mbo wa o pɔmbɔ. (Mal. 3:16) Le taamaseliiyo, yiyaŋndɔ a diom naŋ soliŋ niŋ kpeku teleŋnda bɔɔbɔɔ wo. Diom koŋ cho “Amiina” ni. Baa Chɛhowa che pa diomnde taaniŋnde leŋ nyɛ sɔvɛ bɛndu? Ei, o che leŋ nyɛ sɔvɛ bɛndu! Le miŋ sina sabu o che leŋ diomnde sɔvɛ bɛndu wo, ŋ yaasiaŋndɔ nyɛ diom koŋ o simndo, nduyɛ miŋ che mɛɛ nda soliŋ ndeŋ kpeku o Baabuiyo niŋ yɛ.
“MI WAŊNDA KPOU A CHƐL VƐLƐ LEBƐŊGU AA, ‘AMIINA!’”
Diomndo hoo, “amiina” o Iŋkilisiiye niŋ sim ni, “o wa lende fɔ” ɔɔ “i yɔŋnuŋ lende fɔ.” O fula o diom maHibuluiyo niŋ. Ndu cho ni “chɔm tiindaŋndo,” “waa wana wana nɔla ma tiindaŋ.” Mi ndaa soliŋ ndu kpeku le sɔɔŋ waŋnda toosiaa tɛɛŋ. Nduyɛ, te waŋndo ndoo chua pɛ buŋgɛi, ndoo nɔ mbo dimi “amiina” le chɔmndo maa o feŋaŋ o nyɛ o dimi wo choo le, nduyɛ maa o cho chɛlɔɔ fulamakɔɔlila cho wa o nyɛ o dimi wo niŋndo. (Nɔm. 5:21, 22) Nduyɛ, te ndoo dimi pɛ “amiina” waŋnda o hɔl kpendekele, koŋ chɔm ni maa o nɔ sabu sɔviɔɔ le mbo lo o lediom.—Nɛhi. 5:13.
Taamasi kɛndɛ bɛndu cho a “amiina” soliŋndo kpeku okɔɔ wo cho o Ditɔnɔmii bolle 27 niŋ. Teleŋ Isɔluɛiya fuuluu o Lɛŋnde Mɛyaaleŋ niŋndo, ndaa nɔ ma kuɛ o Pembii Ɛbave a Pembii Kɛluisimnde tɛɛŋ, le ma yaŋ Sawala Mɛlɛka ndoo ke Muuse laŋ nilaŋ. Ndaa nɔ ko ma yaŋ nilaŋ te, kɛ ndaa nɔ ma chɔm kpendekele maa a chɛl nyɛ Sawalaŋ la dimi wo. Mɛɛ nda tuei nyɛ Sawalaŋ la dimi a fulamakɔɔlilaŋ le kiɔɔ diikɔŋndo wo, mi nda kpou dimi aa, “Amiina.” (Ditɔnɔ. 27:15-26) Yiyaŋndɔ a diomnda puaa, waŋlaanduaa, vɛlɛ a chuaambuaa o waalaŋ niŋ, a yɔŋgu mulioo choo choo kpeleŋnda! (Chɔɔ. 8:30-35) A tonya, a puɛɛnuŋ a diomnda nda dimi o paaleleŋ choo wo le. Mi Isɔluɛiyaa kaŋ lo o lediom. Baabuiyo dimi aa, “Isɔluɛiya lo Mɛlɛka Yaawɛɛ saaŋgiallo haaa mi Chɔɔsuaa wu. Nduyɛ mɛɛ o vi ma hiau vɛlɛ lachi a Mɛlɛka saaŋgiallo haaa mi laŋgbaa ndaa kalla, a che nyɛ o nyɛ Mɛlɛka Yaawɛɛ o tosal Isɔluɛiya wa a chuu wu.”—Chɔɔ. 24:31.
Mi Chiisu bɛɛ ndoo soliŋ “amiina” kpeku le chɔmndo maa nyɛ o wa dimioo wo cho tonya, kɛ o nɛi teŋgeŋndo choo o tosa hei ni. Chiisu soliŋ “amiina” kpeku le muli yɔŋgu le. Kɛ mi ndoo dimi “amiina” (a hivi ndu o Iŋkilisiiye niŋ aa, “mi dimul nya”) tuupa mi ndoo dimi isɔɔ le kindilaa maa nyɛ o wa dimioo wo cho tonya. Teleŋndaŋ lapum, mi ndoo kpɔnda ndu dimioo aa, ‘amiina amiina.’ (Maa. 5:18; Chɔŋ 1:51) Mi Chiisu ke wanaa wa ndu nilaŋ yaŋɔɔ wa tiindaŋndo maa diomnda ndɔlaŋ la cho diomnda tonya kpeekpei. Mbo dimul nda tonyaa kanifuule, ndu koni wa wana ndoo nɔ dioo le mbo tosa mi mɛila Mɛlɛkalaŋ kpou la sɔla peelɔŋndo wo ni.—2 Kɔliŋ. 1:20; Sɔɔŋ. 3:14.
“MI WAŊNDA KPEDE A DEŊI CHOO CHOO MA DIMI AA, ‘AMIINA!’ MA SAŊGALA MƐLƐKA YAAWƐƐ”
Mi Isɔluɛiya bɛɛ ndaa soliŋ “amiina” kpeku te ndaa wa pɛ saŋgalaa vɛlɛ a piɛileŋ yɔŋgoo o Chɛhowa lo. (Nɛhi. 8:6; Sam 41:13) Amiina ndaa dimi o piɛileŋ mɛɛlulaŋndo chɔm kpendekele ni maa, wanaa wa nilaŋ yaŋɔɔ wa chɛl nyɛ dimiŋndo. Mi wanaa wa loŋnda kpou ndaa soliŋ diom koŋ kpeku, nduyɛ mi ndaa tuei Chɛhowa piɛiyo yeela o nɛiyo hoo choo. Mi hei yɔŋnuŋ a teleŋ Masaa Deeve hiŋ a Kɔfu Kpema Chɛhowaa Chulusɛlɛmndo. A mɛɛ Koloniko Tasoo 16:8-36 dimi yɛ, mi Masaa Deeve piɛi o Chɛhowa lo a kɔllo kpou o dunyɛi keŋ choo naŋ chaa chondei o wa ni. Mi hei pilaŋ wanaa wa loŋnda kɔllo tau, okoŋ “mi waŋnda kpede a deŋi choo choo ma dimi aa, ‘Amiina!’ Ma saŋgala Mɛlɛka Yaawɛɛ.” A tonya, a wa a kɔl kɛndɛ le Chɛhowa piɛiyo diompilɛ.
Mi Kilisiɔŋnda o wɔsiŋ kɛmɛ tasoŋ niŋ bɛɛ ndaa soliŋ “amiina” kpeku te ndaa wa pɛ Chɛhowa saŋgalaa. Mi wanaa poonyiaa Baabuiyo wa bɛɛ soliŋ diomndo hoo kpeku o yaula nda poonyiaalaŋ niŋ. (Luomaŋ. 1:25; 16:27; 1 Pitɛ 4:11) Nduyɛ pɛɛŋ, yau Sɔɔŋ Chɔɔmaŋndoŋ chɔm mɛɛ nyaa yoomaa cho o inyinaya o choo choo niŋnda wa Chɛhowa lisaa yɛ aa, “Lende i cho ni. Saŋgalaa cho le num Mɛlɛka.” (Sɔɔŋ. 19:1, 4) Teleŋnda bɔɔbɔɔ, mi Kilisiɔŋaa tasiaa ndaa dimi “amiina” te ndaa chii pɛ piɛileŋ o bɔŋaŋnda ndalaŋ. (1 Kɔliŋ. 14:16) Kɛ a koŋ kpou, ndaa dimi ndu le dimioo leŋ te.
SABU “AMIINA” Ŋ DIMI WO CHO NYƐ SƆVƐ WO
Ŋ che kpendekele maa mi buɛiyaa Chɛhowaa o sindɔɔ niŋ bɛɛ soliŋ diomndo hoo “amiina” kpeku. Nduyɛ, hei chɔm naa le sabu “amiina” cho nɛi sɔvɛ bɛndu le piɛileŋ kindaa wo. Te naapila ŋ piɛi pɛ, nduyɛ miŋ dimi “amiina” o mɛɛlulaŋ, ŋ chɔm kɛsɛ maa naa o kɔl di nyɛ naŋ dimi wo fula ni. Nduyɛ, te waŋndo chii pɛ piɛileŋ le kundaa, nduyɛ miŋ dimi “amiina” o yɔŋ bɛɛ o kɔl niŋ, ŋ chɔm maa ŋ chɛl nyɛ wana koŋ dimi wo. Ŋ yaasiaŋndɔ nyɛ cheleŋ le sabu “amiina” naŋ dimi wo cho nyɛ sɔvɛ bɛndu wo.
Miŋ yaŋ nilaŋ yekeŋ te wana cheleŋ wa pɛ piɛileŋ kanifuule, piɛileŋ le cho nɛiyo opilɛ o naŋ saŋgala Mɛlɛka wo. Miŋ saŋgala Chɛhowa o piɛileŋ niŋ o cho ko a nyɛ naŋ dimi wo le, kɛ a nyɛ naŋ tosa wo te waŋndo wa pɛ piɛileŋ. Yeemɛi naŋ nɔ le “amiina” dimioo a kɔllo kpou wo mala naa miŋ chɔm kaa lebiɔɔ, nduyɛ miŋ yaŋ nilaŋ yekeŋ o piɛileŋ.
Miŋ wa o diompilɔɔ niŋ. Piɛile kundaa tosa miŋ handu kɔllo o nyɛ kundaa kpou cho tueiyɔɔ wo choo. (Walta. 1:14; 12:5) Te ŋ nɔ pɛ yeemɛi le “amiina” dimioo diompilɛ naa puaapiliaa a ndepiliaa naa, mi hei tosa miŋ chɔɔlu diompilɔɔ nɔ. O yɔŋ bɛɛ miŋ dimi “amiina” choo choo ɔɔ o kɔlta naalaŋ niŋ, piɛile naaleŋ le nyindu Chɛhowa le mbo tosa nyɛ naŋ nyuna ndu wo.
“Amiina” naŋ dimi wo yɔŋgu tooloo le Chɛhowa saŋgalaa
Miŋ saŋgala Chɛhowa. Chɛhowa sina nyɛ o nyɛ naŋ tosa o piɛile naŋ cho ndu leŋ niŋ. (Luku 21:2, 3) Mbo che yiyaŋnda naalaŋ, vɛlɛ a nyɛ cho o kɔlta naalaŋ niŋndo. O yɔŋ bɛɛ aa o foŋndo choo naŋ cho bɔŋaŋndo nilaŋ yaŋɔɔ ni, ŋ nɔ tiindaŋndo maa mi Chɛhowa tuei “amiina” naŋ dimi wo. Te ŋ dimi pɛ “amiina,” mɛɛ ŋ chɔm kɛsɛ maa ŋ cho latulu a wanaa cho o bɔŋaŋndo ma wa Chɛhowa saŋgalaa wa.
Miŋ yiyaŋ maa “amiina” naŋ dimi wo cho nyɛ sɔvɛ le, kɛ nyɛ sɔvɛ sɔviɔɔ pila o cho ni. Mi yau encyclopedia pilɛ tɛɛsiaa Baabuiyo wo dimi maa, “sanaa a diomndo hoo soliŋndo kpeku,” buɛiyaa Mɛlɛkaa nɔla ma chɔm “laalaŋ ndaa, toolu ndaa, vɛlɛ a tiindaŋ kpeekpei cho o kɔlta ndalaŋ niŋndo.” Maa ŋ tosaŋ a sabu, mi “amiina” kɛ kɛ naŋ dimi hini Chɛhowa kɔllo.—Sam 19:14.
