1. Yɛɛ waŋndo nɔ yɛ mbo tosa tuupa mbo kandu chiɛiyo taŋgullo?

YIYAŊNDƆ maa waŋndo yeema le chiɛiyo taŋgullo. Mi che bɛɛ o sina chiɛi suu o yeema taŋgullo wo, kɛ baa o chaŋ dɔɔ pa mbo kɔ piinduu nyɔɔŋ pum mbo kandu taŋgullo? Ɛ ɛ. Kanifuule, tuupa mbo kandu, o nɔ fɛŋ mbo tosa suɛi sɔvɛi ipum. O nɔ fɛŋ mbo sina mɛɛ kpɛ nyɛsɔlaa yeemaŋ yɛ. Le yɛɛ? Kanifuule, o nɔ mbo sina te nyɛsɔlaa o nɔ wo nɔla pɛ mbo chii ndu taŋgul. Te o chal pɛ mbo tuu nyɛkɛndɛi tuupa mbo kandu, mɛɛ o cho batiuwaa sɔla le ndu chiiyo.

2. A mɛɛ Luku 14:​27-30 dimi yɛ, yɛɛ ŋ nɔ yɛ ma tosa tuupa ma sɔla yiŋɔɔ?

² Baa kaalaa a balika melaa ŋ nɔ le Chɛhowa wo nyindu num niŋ pa ma wa yiyaŋndo le yiŋɔɔ? Te lende i cho ni, mɛɛ o vala pilɔɔ choo kpe nya chal nya po yeema chiɛiyo taŋgullo wo ni. Le yɛɛ naŋ dimi yɛ lende? Tofawɔ nyɛ Chiisu dimi o Luku 14:​27-30 niŋndo. (Nuawɔ.) O bolle Baabuileŋ niŋ, Chiisu wa suɛi a nyɛ yeemaŋ le waa buɛi ndɔ wo okɔɔ. Le miŋ simnuŋ buɛiyaa nduaa, mɛɛ miŋ bɛɛndiaŋ le sɔɔŋ palaŋ cho naa komal loŋ biuwɔŋndo. Nduyɛ, miŋ chɛl le mi nyɔɔŋ pum hɛluŋ naa. (Luku 9:​23-26; 12:​51-53) Lelaŋ tuupa ma yiŋ, a nɔ fɛŋ ma chal ma yiyaŋ nyɛkɛndɛi a nyɛ yeemaŋ niŋndo okɔɔ. Keŋ nɔla mii bɛɛndiaa num le hiouwɔɔ lachi a Chɛhowa piɛiyo o laalaŋndo choo te a yiŋ pɛ.

3. Yɛɛ naŋ cho yɛ yaasiaa o buŋgɛi hei niŋ?

³ Te a yiŋ pɛ ma simnuŋ buɛi Kiliti wo, baa tɔnɔ ŋ cho sɔla wo hiou a nyɛm cho num hiɔlɔŋ ndoŋ ɔɔ sɔɔŋ palaŋ cho num komal loŋ? Ei, tɔnɔ ŋ cho sɔla wo hiou poloŋ! Kanifuule, te a yiŋ pɛ, a cho salala bɔɔbɔɔ sɔla suŋ suŋ a o chilaŋ niŋ.  Ŋ yaasiaŋndɔ nyunala sɔvɛlaŋ lapum a yiŋɔɔ okɔɔ. Hei cho num mala ma sina te a suliŋ le yiŋɔɔ.

4. (a) Yɛɛ cho yɛ yɔŋgɔŋndo? (b) A mɛɛ Maatiu 16:​24 dimi yɛ, yɛɛ o sim yɛ le kiɔɔ ‘hɛnaŋ kɔl naa tosaa’?

⁴ Yɛɛ cho yɛ yɔŋgɔŋndo? Tuupa ma sɔla yiŋɔɔ, a nɔ fɛŋ ma yɔŋguŋ o Mɛlɛka lo. O piɛileŋ niŋ ŋ yɔŋguŋ o Mɛlɛka lo ni. O piɛileŋ ndeŋ niŋ, ma dimul Chɛhowa a kɔl numndo kpou maa a yeema ma piɛi ndu haaa a mɛɛlula yoomu numndo. Te a yɔŋguŋ niŋ pɛ o Mɛlɛka lo, mɛɛ a ‘tosa lɛ hɛnaŋ kɔl numndo le.’ (Nuawɔ Maatiu 16:​24.) Le Chɛhowa ŋ wa niŋ ni, nduyɛ bɛɛle bɛŋndeŋ pila ŋ sɔla leŋ ni. (Luomaŋ. 14:​8) Dimullo ŋ wa ndu koŋ ni maa chɔŋ a paale ŋ yɔŋguŋ o ndu lo leŋ haaa o mɛɛlulaŋ, ndu koni ŋ cho niŋ wa piɛiyo ni. Yɔŋgɔŋndo cho buŋgɛi chuaa o Mɛlɛka lo le ndu piɛiyo ni nduyɛ, o cho buŋgɛi wana pisul te i cho le. Mɛlɛka beŋ naa le buŋgɛi hei chuaa le, kɛ te ŋ chua ndi pɛ, o yeema naa le miŋ peelu ndi.—Sam 116:​12, 14.

5. Vɛɛ yɔŋgɔŋndo chiɛɛliaŋ yɛ a yiŋɔɔ?

⁵ Vɛɛ yɔŋgɔŋndo chiɛɛliaŋ yɛ a yiŋɔɔ? Nya Chɛhowa tɛɛŋ kinɛi yɔŋgɔŋ numndo cho ni. Kɛ yiŋɔɔ ndu, waŋnda o hɔl ŋ sɔla ndu ni, naapum o bɔŋaŋ ibuŋgaa ɔɔ bɔŋaŋ bɛndoo. Te a yiŋ pɛ, mɛɛ a chɔm waŋnda kpou maa a chii niŋ yɔŋgɔŋ o Chɛhowa lo. * Lelaŋ, yiŋɔɔ numndo chɔm waŋnda ni maa a kaala Chɛhowa a kɔl numndo kpou, yoomu numndo, yiyaŋ numndo, a kpaaya numndo. Nduyɛ maa a kɛɛsiaa a kɔl numndo kpou le ndu piɛiyo lefafɛɛŋ.—Maki 12:​30.

6-7. A mɛɛ Pitɛ Tasoo 3:​18-22 dimi yɛ, le sabula tiɔɔŋnda kuɛɛ naŋ nɔ yɛ miŋ yiŋ kaŋgalaŋ?

⁶ Baa mɛɛ mi wana yiŋ kaŋgalaŋ? Tofawɔ nyɛ dimiŋ o Pitɛ Tasoo 3:​18, 22 * niŋndo. (Nuawɔ.) Mi dɛndɛ Nuuwa wo chɔm waŋnda kpendekele maa ndoo nɔ tiindaŋndo o Mɛlɛka niŋ. Mɛɛ lende koni yiŋɔɔ ŋ cho sɔla wo cho ni. Ndu chɔm waŋnda ni maa a chii niŋ yɔŋgɔŋ o Chɛhowa lo. Kɛ baa mɛɛ mi wana yiŋ kaŋgalaŋ? Ei. Mi Pitɛ chɔm naa sabula yiŋɔɔ cho kaŋgalaŋ ndo. O tasoo, mbo dimi maa yiŋɔɔ kumbul naa nɛiyo le “pioŋɔɔ sɔlaa” ni. Mi yiŋɔɔ piŋi naa te ŋ chɔm pɛ maa ŋ nɔ tiindaŋndo o Chiisu niŋ nduyɛ miŋ laalaŋ maa ndu vi le naa ni. Ŋ nɔ vɛlɛ miŋ laalaŋ maa mɛɛ o miiŋgu yoomu mbo kua choo choo, nduyɛ maa o cho niŋ “o ba kɛndɛ Mɛlɛkaa choo.”

⁷ O diiŋ ndɔɔ, mi yiŋɔɔ ke naa “kɔl iyama kɛndɔɔ.” Te ŋ yɔŋguŋ pɛ o Mɛlɛka lo miŋ yiŋ, mɛɛ ŋ luɛi o chaŋyɛi teŋgeŋnde niŋ a ndu. Le mɛɛ naŋ mulul yɔŋ naa wɔɔŋndo kɔɔ nduyɛ miŋ duau tiindaŋndo o sala soliaŋ Chiisoo niŋ yɛ, mi Mɛlɛka mal naa haki le yɔŋnda naala wɔɔŋndaŋ. Lelaŋ, ŋ tiuba niko miŋ nɔ kɔl iyama walaŋndo Mɛlɛka o hɔl.

8. Yɛɛ kpeekpei nɔ yɛ mbo nyindu num ma kɛɛsiaa le yiŋɔɔ?

⁸ Yɛɛ kpeekpei nɔ yɛ mbo nyindu num ma kɛɛsiaa le yiŋɔɔ? Le mɛɛ ŋ pɛɛku Baabuiyo nyɛkɛndɛi yɛ, a sina niŋ tau a Chɛhowa okɔɔ, suliŋnda ndɔlaŋ, a mɛɛ o tosa sɔɔŋ yɛ. Nyɛ ŋ pɛɛku hoo a ndu okɔɔ wo pilaŋ num kɔllo ni ma chɔɔlu ndu kaala tau. Kaala koŋ kpeekpei nɔ ni mbo nyindu num ma kɛɛsiaa le yiŋɔɔ.

9. A mɛɛ Maatiu 28:​19, 20 dimi yɛ, yɛɛ o sim yɛ le yiŋɔɔ sɔlaa o diola Mɛlɛka Finyaa, a Po ndɔɔ, a nyina Mɛlɛkaa niŋ?

 ⁹ Nyɛ cheleŋ nɔ vɛlɛ mbo nyindu num ma kɛɛsiaa le yiŋɔɔ wo cho ni maa, a pɛɛku niŋ Baabuiyo nduyɛ ma laalaŋ nyɛ ŋ pɛɛku wo. Tofawɔ nyɛ Chiisu ndoo dimi wo mɛɛ o dimul buɛiyaa nduaa le ma kɔ siiŋguu waŋnda buɛiyaa ndɔ. (Nuawɔ Maatiu 28:​19, 20.) Mi Chiisu dimi maa waŋnda nɔ ma sɔla yiŋɔɔ o “diola Mɛlɛka Finyaa, a Po ndɔɔ, a Nyina Mɛlɛkaa” niŋ. Yɛɛ hei sim yɛ? Hei sim maa a nɔ ma laalaŋ tonya cho o Baabuiyo niŋ a Chɛhowa, Chiisu Po ndɔ, vɛlɛ a nyina diandaa okɔɔ wo a kɔllo kpou. Tonyalaŋ ndaŋ la nɔ kpaayaa nduyɛ la nɔla mi la pilaŋ num kɔllo tau. (Hibu. 4:​12) Ŋ yaasiaŋndɔ vɛlɛ laŋ nyɛɛmbɔ.

10-11. Tonyala kuɛɛ ŋ pɛɛku yɛ niŋ a Mɛlɛka Finyaa okɔɔ nduyɛ ma laalaŋ?

¹⁰ Yiyaŋndɔ a tonyala ŋ pɛɛku niŋ a Mɛlɛka Finyaa okɔɔ laŋ. A pɛɛku niŋ maa diola ndɔlaŋ la cho [“Chɛhowa”] ni, ndu pilɛ kpe cho “Mɛlɛka Hiou Kpou” wo ni, nduyɛ maa ndu cho vɛlɛ “Mɛlɛka kpeekpeiyo” ni. (Sam 83:​18; 1 Chɔŋ 5:​20) Ndu toosiaa naa ni, nduyɛ ndu cho wana “baŋa” naa wo ni. (Sam 3:​8; 36:​9) O chii niŋ kɛɛsiaa le naa solioo o hakioo niŋ a piɔmndo, nduyɛ mbo ke naa tiindaŋndo le yoomu fafɛɛŋndo. (Chɔŋ 17:​3) Yɔŋgɔŋ ŋ cho o Chɛhowa lo ma sɔla yiŋɔɔ wo cho tosa ni ma simnuŋ Sei Chɛhowaa. (Aisaya 43:​10-12) A cho wa waŋndo opilɛ o wanaa cho o chieeŋndo choo mi diola Mɛlɛkalaŋ la wa nda choo wa tɛɛŋ. Nduyɛ num bɛɛ tiuba ma chɔm wanaa cheleŋnda diola laŋ.—Sam 86:​12.

¹¹ O cho bɔɔ bɛɛle bɛndu le sinaa nyɛ Baabuiyo pɛɛku a Finya naa okɔɔ wo! Te a laalaŋ pɛ tonyalaŋ ndaŋ, nyɛ o nyɛ kuuna num yɔŋgɔŋndo o Chɛhowa lo ma sɔla yiŋɔɔ le.

12-13. Tonyala kuɛɛ ŋ pɛɛku yɛ niŋ a Po Mɛlɛkaa okɔɔ nduyɛ ma laalaŋ?

¹² Vɛɛ kɔllo wa yɛ num mɛɛ ŋ pɛɛku tonyalaŋ ndaŋ a Chiisu okɔɔ? Ma pɛɛku maa te Chɛhowa faŋaŋ pɛ, Chiisu cho wana diiŋ ndɔ hiou kpou wo ni. Nduyɛ, maa ndu yɔŋgu yoomu ndɔɔ wulee ni le naa baŋaa. Te ŋ chɔm pɛ a mɛɛ naŋ bii yoomu naa yɛ maa ŋ nɔ tiindaŋndo o sala soliaŋ ndɔɔ niŋ, Mɛlɛka cho naa malɔɔ haki le yɔŋnda naala wɔɔŋndaŋ. Keŋ tosa vɛlɛ miŋ nɔ chaŋyɛi kpɛɛluŋnde a Mɛlɛka, nduyɛ miŋ huŋ sɔla yoomu fafɛɛŋndo. (Chɔŋ 3:​16) Chiisu cho Masa Wanaa Soliaa Lasala naa ni. O yeema naa miŋ sɔla tɔnɔɔ o sala soliaŋ ndɔɔ niŋ nduyɛ miŋ nɔ chaŋyɛi kpɛɛluŋnde a Mɛlɛka. (Hibu. 4:​15; 7:​24, 25) Ndu cho Masaa le Masale Mɛlɛkaleŋ ni. Chɛhowa cho ndu hunɔɔ soliŋ kpeku le diola ndɔlaŋ dindioo a dɛnɛ wɔɔŋndo faŋaa o chieeŋndo choo, nduyɛ mbo hiŋ a salalaŋ lefafɛɛŋ o Kpele Hɛnɛkiɔɔ niŋ. (Maa. 6:​9, 10; Sɔɔŋ. 11:​15) Chiisu cho wana naŋ nɔ miŋ tol kɔɔli wo ni. (1 Pitɛ 2:​21) Mbo kɛsul naa taamaseliiyo mɛɛ o soliŋ yoomu ndɔɔ kpeku le hɛnaŋ Mɛlɛkaa tosaa.—Chɔŋ 4:​34.

¹³ Te a laalaŋ pɛ nyɛ Baabuiyo pɛɛku a Po Mɛlɛkaa okɔɔ wo, a cho ndu chɔɔlu kaala tau. Kaala koŋ cho num nyindɔɔ ni ma soliŋ yoomu numndo kpeku le hɛnaŋ Mɛlɛkaa tosaa maa ndu. Hei tosa ma yɔŋguŋ o Chɛhowa lo nduyɛ ma sɔla yiŋɔɔ.

14-15. Tonyala kuɛɛ ŋ pɛɛku yɛ niŋ a nyina Mɛlɛkaa okɔɔ nduyɛ ma laalaŋ?

¹⁴ Vɛɛ kɔllo wa yɛ num mɛɛ ŋ pɛɛku tonyalaŋ ndaŋ a nyina Mɛlɛkaa okɔɔ? Ma pɛɛku maa nyina Mɛlɛkaa cho nyɛ yoomaa le, kɛ kpaaya Mɛlɛkaa o cho ni. Ndu Chɛhowa soliŋ kpeku ni le wanaa poonyiaa Baabuiyo wa nɛi chɔmaa kioo. Ndu koni mala naa vɛlɛ ni miŋ bii Baabuiyo bila nduyɛ miŋ dɔu nyɛ naŋ pɛɛku wo o wali niŋ. (Chɔŋ 14:​26; 2 Pitɛ 1:​21) Sanaa  a nyina diandaa, mi Chɛhowa ke naa ‘kpaayaa’ le miŋ biuŋ simultaŋ. (2 Kɔliŋ. 4:​7) Nyina koŋ koni luei naa vɛlɛ yoomuaŋ ni le yooŋgu kɛndɔɔ dimioo, miŋ chɔulaba tɔɔndaŋ ndaŋ a kɔl tambɛiyo, nduyɛ miŋ biuŋ sɔɔŋ palaŋ komal naa woŋ. Mbo mala naa vɛlɛ le tosaa kaala Mɛlɛka yeema mi waŋnda tosa laŋ. (Kalee. 5:​22) Mi Mɛlɛka ke wanaa nɔ tiindaŋndo o ndu niŋ nda nyina ndɔɔ, te a nyuna ndu pɛ le ndu.​—Luku 11:​13.

¹⁵ O cho bɔɔ suɛi kɔl kɛndɛ le sinaa maa mi nyina Chɛhowaa mala wanaa nduaa le ma hiou lachi a ndu piɛiyo! Te a laalaŋ pɛ tonyala ŋ pɛɛku a nyina Mɛlɛkaa okɔɔ laŋ, koŋ cho num nyindɔɔ ma yɔŋguŋ o Chɛhowa lo nduyɛ ma sɔla yiŋɔɔ.

16. Yɛɛ naŋ pɛɛku yɛ wɔ o buŋgɛi hei niŋ?

¹⁶ Kɛɛsiaa ŋ cho le yɔŋgɔŋndo o Chɛhowa lo nduyɛ ma sɔla yiŋɔɔ wo cho kɛɛsiaa la pisul te. A mɛɛ naŋ pɛɛku yɛ, a nɔ ma bɛɛndiaŋ le simultaŋ biuwɔŋndo nduyɛ, ma chɛl le mi nyɔɔŋ pum hɛluŋ num. Kɛ tɔnɔla ŋ cho sɔla laŋ la cho hiouwɔɔ poloŋ a nyɛ cho num hiɔlɔŋndo. Yiŋɔɔ nɔla mbo kumbul num nɛiyo le pioŋɔɔ sɔlaa, nduyɛ mbo tosa ma nɔ kɔl iyama kɛndɔɔ Mɛlɛka o hɔl. Kɛ kaala ŋ nɔ le Chɛhowa Mɛlɛka wo kpeekpei nɔ ni mbo nyindu num ma kɛɛsiaa le yiŋɔɔ. A nɔ vɛlɛ ma laalaŋ a tonyala ŋ pɛɛku a Finyaa, Po Ndɔɔ, vɛlɛ a nyina diandaa okɔɔ laŋ a kɔllo kpou. Te a yiyaŋ pɛ a nyɛ naŋ pɛɛku wɔ o buŋgɛi hei niŋndo okɔɔ, a dimi pa maa a suliŋ le yiŋɔɔ?

17. Sɔɔŋ kuɛɛ waŋndo nɔ yɛ fɛŋ mbo tosa tuupa mbo suliŋ le yiŋɔɔ?

¹⁷ Te a yiyaŋ pɛ maa a suliŋ le ma sɔla yiŋɔɔ, mɛɛ a tosa niŋ sɔɔŋ bɔɔbɔɔ le ma nɔ chaŋyɛi kɛndɛi a Chɛhowa. * Pɛɛku ŋ cho Baabuiyo wo mala num niŋ ma sina sɔɔŋ tau a Chɛhowa nda Chiisu okɔɔ. Nduyɛ, a nɔ niŋ tiindaŋndo o Mɛlɛka niŋ. (Heb. 11:​6) Hei tosa niŋ ma nɔ tiindaŋndo o sɔɔŋ Mɛlɛka mɛi lediom o Baabuiyo niŋndoŋ. Nduyɛ ma nɔ vɛlɛ tiindaŋndo maa sala soliaŋ Chiisu wo cho num soli o hakioo niŋ a piɔmndo. A mulul niŋ vɛlɛ yɔŋ num wɔɔŋndo kɔɔ okoŋ, ma nyuna Chɛhowa le mbo mal num haki le sɔɔŋ wɔɔŋ ŋ tosa paandu woŋ. Nduyɛ, sɔɔŋ nɛŋi Mɛlɛka kɔllo woŋ ŋ cho niŋ tosaa suŋ suŋ ni. (Walta. 3:​19) A nɔ vɛlɛ yeemɛi tau le waŋnda dimullo a tiindaŋ numndo okɔɔ. Ma suliŋ ma simnuŋ wana dimiaa yooŋgu kɛndɛ yiŋ ndɔ le wo, okoŋ ma kandu yooŋgu kɛndɔɔ dimioo a kundaa latulu. (Maa. 24:​14) Chɛhowa hini bɔɔ kɔl a num le hiouwɔɔ lachi ŋ tosa hoo wo.—Pulɔ. 27:​11.

18. Yɛɛ cheleŋ ŋ nɔ yɛ ma tosa tuupa ma sɔla yiŋɔɔ?

¹⁸ Tuupa ma sɔla yiŋɔɔ, a nɔ wɔ ma tosa sɔɔŋ cheleŋ. A mɛɛ naŋ pɛɛku suŋ yɛ, a nɔ fɛŋ ma yɔŋguŋ o Mɛlɛka lo. Piɛi o ndu lo nya ŋiɔɔŋ kpeele, nduyɛ ma dimul ndu maa a cho ndu lo piɛiyo haaa a mɛɛlula yoomu numndo. (1 Pitɛ 4:​2) Okoŋ, ma dimul bɛndu kɔɔna sɔɔŋ  le bɛnduaa kundaa wo maa a yeema ma yiŋ. O cho bɛnduaa apum dimul le ma suukaŋ a num. Siooŋii wa num le suukaŋndo hoo le. Loonuŋ maa puaapiliaa haa sina num nduyɛ maa a kaala num. A cho num nyuuniaa le sinaa te a bii pɛ nyɛ ŋ pɛɛku o Baabuiyo niŋndo bila. Nduyɛ maa te a sina le sabu yɔŋgɔŋndo a yiŋɔɔ cho nyɛ sɔvɛ wo. Te a sina pɛ maa a suliŋ le yiŋɔɔ, a cho num dimul le ma yiŋ o bɔŋaŋ ibuŋgaa ɔɔ bɔŋaŋ bɛndu cho hunɔɔ wo.

19-20. Yɛɛ ŋ nɔ yɛ ma hiou lachi a tosaa te a yiŋ pɛ, nduyɛ vɛɛ ŋ tosa yɛ keŋ?

¹⁹ Te a yiŋ niŋ pɛ, yɛɛ ŋ nɔ yɛ niko ma tosa okoŋ kɔɔli? * Loonuŋ maa a chii buŋgɛi chua o Chɛhowa lo nduyɛ o yeema num ma peelu ndi. Lelaŋ te a yiŋ pɛ, a nɔ ma lo o lediom. Vɛɛ ŋ tosa yɛ keŋ?

²⁰ Holnuŋ puaapiliaa a ndepiliaa o kunda numndo niŋ. Te a yiŋ pɛ, mɛɛ a cho niŋ waŋndo opilɛ “chaaŋaa [naa] wanaa laalaŋnda” tɛɛŋ. (1 Pitɛ 2:​17) Puaapiliaa a ndepiliaa o kunda numndo niŋ cho niŋ wa maa yuŋgu numndo. Te a wa pɛ kɔlaŋ o bɔŋaŋndaŋ lɔɔlɔɔ, chaŋyɛi numnde nya ndaa cho chɔɔlu kalu poŋ. Wa diomndaŋ veeloo o Baabuiyo niŋ lepaa o lepaa. (Sam 1:​1, 2) Te a veelu pɛ diomndaŋ o Baabuiyo niŋ, chua teleŋndo ma yiyaŋ lechoo yiŋgoloŋ. Te a tosa lende pɛ, nyɛ ŋ pɛɛku loŋ ndo cho num kɔllo pilaŋ. Wa vɛlɛ piɛileŋ teleŋ o teleŋ. (Maa. 26:​41) Piɛile ŋ cho wa a kɔllo kpou leŋ le cho num mala ma sɔɔŋguu Chɛhowa ikɛi kpɛɛluŋ. A nɔ vɛlɛ ma “landuŋ . . . kɔl le mi Mɛlɛka wa” num choo masa. (Maa. 6:​33) A tosa hei te a kɛsi pɛ wali dimiaa yooŋgu kɛndɔɔ nyɛ tase o yoomu numndo niŋ. Te a wa pɛ kɔlaŋ lɔɔlɔɔ o wali pollo niŋ, a cho laalaŋ numndo kindi poŋ, nduyɛ naapum a cho waŋnda mala le ma tol nɛi yoomu fafɛɛŋndo kɔɔli.—1 Timo. 4:​16.

21. Tɔnɔla kuɛɛ ŋ cho yɛ sɔla te a yiŋ pɛ?

²¹ Kɛɛsiaa ŋ cho tosa le yɔŋgɔŋndo o Chɛhowa lo nduyɛ ma sɔla yiŋɔɔ wo cho o sɔvɛ mbo hiau kɛɛsiaa kɛ kɛ ŋ tosa niŋ o yoomu numndo niŋ. Tonya i cho ni maa a nɔ ma chɛl le mi nyɔɔŋ pum hɛluŋ num. Kɛ tɔnɔla ŋ cho sɔla laŋ la cho hiouwɔɔ poloŋ a nyɛm cho num hiɔlɔŋ ndoŋ! Nyɛ o nyɛ kindilaa cho num keekoo choo o chieeŋndo hoo niŋ, “le teleŋ biŋgi koni o cho ni.” (2 Kɔliŋ. 4:​17) Kɛ yiŋɔɔ ŋ cho sɔla wo cho num nɛiyo kumbul le ma wa a nyaale suŋ suŋ, nduyɛ ma huŋ sɔla “yoomu kpeekpeiyo” o chilaŋ niŋ. (1 Timo. 6:​19) Lelaŋ a yandii, yiyaŋ nyɛkɛndɛi nduyɛ ma piɛi le nyunaa hoo mulioo, “Baa I suliŋ pa le yiŋɔɔ?”