A Sina Pa?
O faŋaŋndɔ o nyɛ Baabuiyo dimi wo kɔɔli, yɛɛ chɔm yɛ vɛlɛ maa Isɔluɛiya wa o chɛleŋ niŋ Ichipi?
Baabuiyo dimi maa mɛɛ Midianatiiya kuɛ a Choosɛ Ichipi, mi Chekɔpu finya ndɔ bɛɛ mɛɛlu faŋaŋ Kenaŋ mbo kua loŋ a yuŋgu ndɔɔ kpou. Mɛɛ nda fuuluu Ichipi, ma kila chalta ndalaŋ o tanda Kuusiɛŋndo niŋ o dɛɛla cho o pioo Nail kɔŋgɔ wo. (Chɛ. 47:1, 6) Baabuiyo dimi maa mi Isɔluɛiya “vialu chuauwa, nduyɛ ma hiau lachi a kuiyo tau tau, ma tiu o lɛŋnde Ichipileŋ niŋ kpou.” Mi siooŋnde bii Ichipiaŋnda a kui nda wa hoo wo, okoŋ, ma siiŋguu nda chiaa.—Ɛsɔ. 1:7-14.
Wanaa sɛɛŋgiaa hau sɔɔŋ Baabuiyo wa dimi maa bundɛi lachoowɛi konaa hoo cho ni. Kɛ, waŋnda saaluŋ niŋ nyɛ cheleŋ chɔm maa Sɛmaitiiya * wa sindɛ chiaa Ichipi wo.
Le taamaseliiyo, wanaa tuau nyɔɔŋ lɛŋnda tou niŋ bembela cho Ichipi ba luaŋndo laŋ. Mi wana sinaa dɛnɛ pilɛ Chɔŋ Bimsiŋ dimi maa mɛɛ nda wa bembelaŋ ndaŋ touwɔɔ o fonda koŋ, chieeŋ Sɛmaitiiya nda saaluŋ ndoŋ muŋ hiou le 20. O faŋaŋndɔ o hei kɔɔli, mi laŋunɔ pilɛ Chemisi K. Hofimiaa o pɛɛku a sɔɔŋ waa Ichipi okɔɔ wo dimi aa: “Chɔŋ a wɔsi 1800 mbo kɔ bii a wɔsi 1540 tuupa mi Chiisu huŋ, wanaa ndaa dimi Sɛmaitiiye ma wa Eesiaa wa ndaa hɛnaŋ bɔɔ a Ichipi. Le hei, loŋ a bɔɔbɔɔ ndaa kua ni. O wɔsilaŋ ndaŋ niŋ koni ‘Finyaa Mamaa Isɔluɛiya’ bɛɛ wa achal ni. Nduyɛ, teleŋndo hoo chɛlaŋ a nyɛ dimiŋ o yau Chɛnɛsee wo niŋndo.”
Nyɛ nda saaluŋ vɛlɛ Ichipi batouwo wo bɛɛ chɔm kpendekele maa Isɔluɛiya wa loŋ o chɛleŋ niŋ. O fondaŋ koŋ, ma saaluŋ kpɛndɛma ndaa poonyiaa choo waŋ a diola waŋnda lechoo. Diola chiaa wa wallo le Masaa keeku loŋ sindɛ chɔŋ a wɔsi 2000 mbo kɔ bii a wɔsi 1600 nde wo, wa la poonyiaa o kpɛndɛmamaŋ choo ni. O diolaŋ ndaŋ tɛɛŋ, la velaŋ a diola Sɛmaitiiya wa laa hiou le 40. Chiaa haa apum wa le nyɛdiaa yauwo, kolalaŋ lɔɔ a walta cheleŋ. Mi Hofimiaa dimi vɛlɛ aa: “Te o wa pɛ maa Sɛmaitiiya hiouwɔɔ 40 wa chiaa le masaa wa Ichipi batouwo wa ni, mɛɛ a wa Ichipi kpou wa wa tau, taama taama a wa o dɛɛla cho o pioo Nail ikɛiyo.”
Mi Deeve Luoo, laŋunɔ tuau nyɔɔŋ lɛŋndo dimi maa diolaŋ ndaŋ lapum la “velaŋ bɔɔ a diola cho o Baabuiyo niŋndaŋ latiŋ.” Le taamaseliiyo, sɔŋgɔ nyɛ pilɛ lapum la cho a Isaaka, Asiɛɛ a Sifilua laŋ ni. (Ɛsɔ. 1:3, 4, 15) Mi laŋunɔɔ hoo hiau lachi a dimioo aa: “Hei chɔm kpendekele maa Isɔluɛiya wa chiaa Ichipi.”
Mi Bimsiŋ dimi vɛlɛ aa: “Sɔɔŋ masindɔŋ chɔm kɛsɛ maa nyɛ Baabuiyo dimi maa mi Isɔluɛiya kua Ichipi nduyɛ maa ma siiŋguu nda chiaa wo cho tonya.”
^ pɛl. 4 O pulale Siɛm, puaa yaawaa Nuuwa wa opilɛ niŋ Sɛmaitiiya fula ni. Nduyɛ, wanaa fula vɛlɛ o pulaleŋ ndeŋ niŋnda atiŋ wa vɛlɛ dɔɔ Ɛlamaitiiya, Aisiliaŋnda, Kaldiaŋaa masindiaa, Hibuluiya, Siiliaŋnda a wanaa fula o kayii Alueibiaŋii yɛ yɛi niŋnda.
