A wɔsi 1988 ve Chak nda Maliliŋ kandu wali lɔɔlɔɔ Mɛlɛkaa ni. A cho lɔɔlɔɔ a bɛɛndiaŋ le kɔlaŋ ba o ba fee. Le hei, a tosa niŋ wali lɔɔlɔɔ Mɛlɛkaa tau o lɛŋnde Kuaadulupu leŋ niŋ a Filɛns Kayana. O lɛuve Filaŋsi bɛŋgu lɛŋnde hei cho niŋ ni. Ŋ nyuuniaŋ ndɔ Chak nda Maliliŋ a sɔɔŋ pum okɔɔ.

Yɛɛ nyindu yɛ nya le luɛiyɔɔ o wali lɔɔlɔɔ Mɛlɛkaa niŋ?

Maliliŋ: Kuaadulupu ya sul ni. Teleŋ ya wa o pɔmbɔ wo, mi naŋ niilu yooŋgu kɛndɔɔ dimioo kpɛŋ naa kala nuu. Nduyɛ ndoo nɔ bɔɔ sɛmbɔɔ. Kaala ya nɔ le waŋnda wo tosa ni, dimioo naa I chii sukuuwo a wɔsi 1985, mi kandu kɔɔfaleŋ.

Chak: Teleŋ ya wa feleŋgɔnɔ wo, wanaa wa o wali lɔɔlɔɔ Mɛlɛkaa niŋnda wa ya a balaa silɔ nduyɛ, ndaa kaala bɔɔ yooŋgu kɛndɔɔ dimioo. Mi yaa tosa kɔɔfale malalaŋndeŋ a teleŋ naŋ kinda sukuulaŋ ndo. O lɔɔ mɛɛlulaŋ, mi naŋ chua mɔmbillo miŋ kɔ niilu yooŋgu kɛndɔɔ dimioo a kɔɔfaa latulu. Te naŋ niilu pɛ yooŋgu kɛndɔɔ dimioo kpɛŋ a paale yɔŋgaŋ ndeŋ, naŋ kuɛ o daa choo le pɛŋgioo. Ŋ wa bɔɔ yoomoo tueiyɔɔ yeela o teleŋ koŋ niŋ!

Mɛɛ ya chua dɔɔ Maliliŋ o nɔɔ niŋ a wɔsi 1988, mi dimiŋ o kɔl aa, ‘Ŋ nɔ wɔ kalaŋ suŋ suŋ te. Ŋ nɔla wɔ miŋ chɔɔlu tosa tau o wali Chɛhowaa niŋ.’ Okoŋ, mi del Maliliŋ kɔɔli le kɔɔfaleŋ tosaa. Miŋ kua o sukuu lekɔɔfaa. Wɔsioo opilɛ okoŋ kɔɔli, ma dimul naa le kɔɔfale teŋgeŋ ndeŋ tosaa. Miŋ tuɛi walta teŋgeŋ teŋgeŋnda Mɛlɛkalaŋ yeela o Kuaadulupu niŋ tuupa ma yɔŋ naa Filɛns Kayana.

Ŋ che maa a yɔŋ nya niŋ fondaŋnda bɔɔbɔɔ o wɔsila hiou laŋ bɛŋgu. Yɛɛ mala yɛ nya le simultaŋ biuwɔŋndo?

Maliliŋ: Puaapiliaa wa chilaŋ chuaa o Bɛtɛɛl Filɛns Kayana wa ndaa sina maa bolle Baabuile naŋ hɛnaŋ tau leŋ le cho Aisaya 6:​8 ni. Lelaŋ te ndaa veelu naa pɛ, ndaa nyuna naa a lamamɔɔ aa, “La loonuŋ pa bolle Baabuile nya hɛnaŋ tau leŋ?” Te ndaa nyuna dɔɔ naa lende pɛ, ŋ sina dɔɔ maa a hiŋ naa yɔŋ naa cheleŋ. Okoŋ, ŋ dimul nda aa, “La Che Naa! La Viom Naa!”

Naŋ tuu fondaŋ sɛnɛi nda yɔŋ naa wo a o naŋ mɛi kɔɔli wo le. Kanifuule naŋ sina maa te ŋ tosa lende pɛ, ŋ tui wali naa yeela le. Nduyɛ mi  naŋ kindiŋ vɛlɛ le puaapiliaa a ndepiliaa naŋ komal loŋ nda sinaa nyɛkɛndɛi.

Chak: Teleŋ pilɛ, chaaŋaa naa kaalaa ndaa yeema miŋ faŋaŋ nda ikɛi le. Lelaŋ mɛɛ nda yɔŋ naa o fonda cheleŋ, ma kindiŋ le naa kɔllo tɛɛmbuu wo. Kɛ mɛɛ naŋ faŋaŋ Kuaadulupu, mi puaapilɛnɔ pilɛ yiyalaŋ naa a nyɛ Chiisu dimi o Maatiu 13:​38 niŋndo okɔɔ maa: “Chieeŋndo ndu cho chiɛi . . . ni.” Lelaŋ o yɔŋ bɛɛ ma yɔŋ naa naa cheleŋ, miŋ loonuŋ maa o chiɛi pilɛi hei niŋ kpe naŋ cho ni. O fulawɔ okoŋ kɔɔli, nyɛ hiou wa o sɔvɛ wo cho wanaa cho o tanda koŋ niŋnda ni!

Te ŋ kuɛ pɛ o fonda nda yɔŋ naa sɛnɛiyo, miŋ che maa wanaa cho loŋ nda cho yoomoo tueiyɔɔ yeela. Le hei, mi naa bɛɛ kandu sɔɔŋ tosaa maa nda. Mi che bɛɛ nyɛdiaa naŋ dia paandu wo ve nyɛ pilɛ le, kɛ miŋ de o nda dia wo, nduyɛ miŋ kol mɛŋma nda kollaŋ. Nyɛ naŋ tosa wo suee cho mandaŋndo le kɛndiaa naa ni. Mi naŋ kindiŋ vɛlɛ kpoke le fafaŋndo ŋɔɔchiaŋndo a naa nda yɔŋ naa wa okɔɔ.

Maliliŋ: Miŋ pɛɛku vɛlɛ sɔɔŋ pum puaapiliaa a ndepiliaa naŋ komalla o ba. I loonuŋ nyɛ yɔŋnuŋ teleŋ tase naŋ fuuluu Filɛns Kayana wo. Paale pilɛ mɛɛ naŋ toosiaŋ le kɔlaŋ yooŋgu kɛndɔɔ dimioo, mi piɔɔ kandu siaa tau. Mi yiyaŋ maa mɛɛ mi piɔɔ veŋgu malaŋ naŋ kua, kɛ o yala vioŋgɔɔ le. Okoŋ, mi ndepilɛnɔɔ nyuna ya aa, “Ŋ fula ŋ kɔ?” Mi nyuna ndu aa, “O piɔɔ hoo bɛŋgu?” Mbo dimulla aa, “Chua teebilɛɛle numndeŋ miŋ hel o nɛɛsola naalaŋ choo.” Paale leŋ ya pɛɛku ni mɛɛ wana bii teebilɛɛleŋ ma wa vɛlɛ nɛɛsoo nyaanɔŋndo yɛ. Te yaa pɛɛku keŋ paale leŋ te, piɔɔ wa ya wa kuunaa yooŋgu kɛndɔɔ dimioo!

O cho suɛi bɛɛŋ le fondaa siŋgaa le nduyɛ nya tosa niŋ hei le bɛmbɔɔ 15. La nɔla mi la chɔm naa nyɛ mala nya le hei tosaa wo?

Maliliŋ: O cho suɛi bɛɛŋ le kɔlaŋ naa cheleŋ te. Lelaŋ o bɛnda ma kɔ nuuwa fonda kɛndɔɔ naa ŋ wa a nyaale wa te a mal pɛ yooŋgu kɛndɔɔ dimioo.

Chak: Te ŋ kuɛ pɛ o fonda cheleŋ, teleŋnda bɔɔbɔɔ mi miŋgi pɔuwo suu o chiɛi naŋ wa niŋndo. Te puaapiliaa cho chilaŋ o lɛuve wa ndaa sina pɛ maa ŋ kue le viouwɔɔ o fondaa pum te, ma dimulla naapum aa, “Chak, yɛɛnuŋ ndɛ ikɔɔ le pɔuwo suu o laŋ te!”

Maliliŋ laa ni chaa bɔɔ wolɔɔlaŋ dovi! Mbo wou laŋ o bɔlɔlaŋ niŋ kpɛ kpɛ. Le taamaseliiyo, la cho le fonda pulaŋndo wo la nɔ bɔlɔɔ, laŋ le fonda lɔlaa bɔlɔɔ yɛ, la cho le fonda yawaa laŋ bɛɛ la nɔ bɔlɔɔ, a la cheleŋndaŋ. Lelaŋ te ŋ fuuluu dɔɔ pɛ o fonda nda yɔŋ naa wo, o wa tɛtɛlɛ le wolɔɔlaŋ kɛsioo o  fonda la nɔ le waa wo. Mbo poonyiaa nyɛ o nyɛ cho o bɔlɔ kɛ kɛ niŋ o yauwo choo nduyɛ, koŋ tosa ni miŋ keleŋa saalɔŋ nyɛ naŋ yeema wo.

Maliliŋ: Le mɛɛ naŋ dovi wolɔɔla naalaŋ kpɛ kpɛ yɛ, ŋ fuuluu dɔɔ pɛ o fonda nda yɔŋ naa wo, ŋ kandu bɛɛ kɔlaŋ yooŋgu kɛndɔɔ dimioo.

Kɛɛsiaa yɛɛ nya nɔ yɛ le ‘tosaa wali o wali cho nya o kenaŋ maa buɛiyaa Mɛlɛka’?—2 Timo. 4:​5.

Maliliŋ: O Koondoo choo naŋ pɛŋgi ni a bɛɛndiaŋndo le bɔŋaŋndaŋ. Chɔŋ niŋ o Nɔŋgɔwaa choo haaa lɔɔ mɛɛlulaŋ, yooŋgu kɛndɔɔ naŋ kua dimioo ni.

Chak: Mi che bɛɛ ŋ nɔ hawɛila cho naa kuee le miŋ tosalaŋ, kɛ o cho o laŋ choo le naŋ handu kɔllo le. Yooŋgu kɛndɔɔ dimioo hiou wa nyɛ sɔvɛ le naa. Chɔŋ a teleŋ naŋ mal o bɛɛ wo haaa miŋ miiŋgu, wana o wana naŋ komal pɛ, miŋ kindiŋ le suɛi o ndu lo.

Maliliŋ: Le taamaseliiyo, teleŋ o teleŋ naŋ wa pɛ kɔlaŋ o yelelaŋndo, mi kuɛ a yaula pɔmbɔlaŋ o ba. Mi che bɛɛ ŋ dimul waŋnda maa Seiyaa Chɛhowaa le naŋ cho le, kɛ ma nyuna naa le yaulaŋ. Le saboo hoo, miŋ wa yekeŋ a mɛɛ naŋ chuɛɛnuŋ yɛ nduyɛ a mɛɛ naŋ tosa sɔɔŋ yɛ kanifuule, naŋ sina maa waŋnda wa naa hɔlteŋ kɔɔli.

Chak: Miŋ dimi vɛlɛ yooŋgu kɛndɔɔ a mɛɛ naŋ tosal wanaa naŋ chiɛɛliaŋnda sɔɔŋ kɛndɔŋ yɛ. Mi bɛɛsuu biɔɔ a chiɛi kɔɔlioo nduyɛ mi viou bil naa kpou duau wo. Mi wanaa naŋ chiɛɛliaŋnda che ya sɔɔŋ muŋ tosaa nduyɛ lepum ma nyuna ya aa, “Yandii a mala ya mi sɔla Baabuiyo?”

La dimi niŋ yooŋgu kɛndɔɔ tau o sɔndɔkɔltaŋ. Isɔɔ yɔŋnuŋ nya pa o kela nyaa niŋ i nya loonuŋndɔ ve?

Chak: O Kayana niŋ, o ve bɛɛŋ le kɔlaŋ o fondaŋndaŋ lapum te. Teleŋnda bɔɔbɔɔ, miŋ kuɛ le mɛɛliilaŋ 370 ɔɔ kilolaŋ 600 o nɛila wɔɔŋndaŋ choo o lɔɔ bɛŋgu. I puɛɛnuŋ a teleŋ naŋ kuɛ o sɔndɔkɔlɔ pilɛ diolaŋ aa Saŋtele wo le. O bundɛ bɛndu nda veelu aa Amasoŋ ndo ikɛi chioo hoo cho ni. O mɔmbil bɛndoo niŋ naŋ kuɛ ni nduyɛ, bandei pila tiŋndo ndoo bandu ni. O fondaŋndaŋ lapum pɛŋ, o dɛndɛ mamɛŋndo niŋ naŋ kuɛ ni. Wanaa cho loŋ nda a bɔɔbɔɔ kooliiyoŋ nda tuau ni. Le ma chɔm balika melaa le yaula naŋ ke nda laŋ, mi apum yɔŋgu tooloo a kooliiyoŋ nyɛɛmbɔ! A paale yɔŋgaŋ ndeŋ, miŋ chɔm nda vidueila kɔɔnaa opilɛ. Mi wanaa bɔɔbɔɔ huŋ le ndu tofaa.

Maliliŋ: O wɔsiŋ hiou woŋ bɛŋgu, ma dimul Chak le mbo kɔ yɔŋgu suɛi Loonuŋyaa Kamopi. Le fuuluu wo loŋ, miŋ chua hawɛilaŋ la hiɔɔlu o dɛndɛ mamɛŋ maasiiyo niŋ o Oyapuaŋ choo. Nyɔɔ ndoo hɛnaŋ naa bɔɔ le kɔlaŋ loŋ.

Chak: Pioo hoo nɔ baltaŋ nduyɛ la wɔu bɔɔ o fondaŋndaŋ lapum. Mi siooŋnde kuɛ le num biyɔɔ te la wa pɛ fuuluu wo o ballo. Lelaŋ, mɛɛ mi wana kua a dɛndɔɔ wo chaa kpaŋ malaŋ nya hiau yɛlɛkɛlɛɛ. Fɛŋ bɛɛ ŋ puɛɛnuŋ a hei okɔɔ le. Mi che bɛɛ Seiyaa Chɛhowaa a 6 wa ni, kɛ wanaa bii Loonuŋyaa hoo wa ndaa wa le 50 nduyɛ, Amɛlidiaŋnda bɛɛ wa nda tɛɛŋ.

Maliliŋ: Nya feleŋguaa yeema mi la yɔŋguŋ tau o wali Chɛhowaa niŋnda, sɔɔŋ kɛndɛŋ waa naa chal nya chum. O hei niŋ, dɔu tiindaŋ numndo o Chɛhowa niŋ, nduyɛ tiindaŋ numndo cho kalu poŋ. Sɔɔŋ muŋ tosa miŋ sina kɛsɛ maa Chɛhowa cho naa lɔɔlɔɔ kɔɔli.

La dimi niŋ sɔɔŋ maŋgalaŋ tau. Baa mbo wa maa la nɛi isɔɔ maŋgalaa chaa le?

Chak: Sako bɛɛ. Le mɛɛ bahawɛiyo wa yɛ ya pɛɛku sɔɔŋ maŋgalaŋ muŋ ni. Le taamaseliiyo, I tosa fɛŋ pɛɛku Bandu Mɛŋgɛlaa o Sulaŋtoŋguei * niŋ, tuupa mi yɔŋgu suɛi ni tasei le diomndaŋ veeloo o Baabuiyo niŋ. Mi nyuna puaapilɛnɔɔ te mi waŋnda bii ya bila. Mbo mulul la aa, “Ma kindiŋ, kɛ ŋ ve sɔɔŋ pum biyɔɔ bila le.” Chuaambuaa mala ya vɛlɛ tau ni mi dimi suɛi maŋgalɛi hei. Te yaa chiee dɔɔ nyɔɔ pum veelu le, a chɔm ya. Kɛ kaasoŋnda ndaa tosa lende le. Le hei, mi pɛɛku nda sɔɔŋ bɔɔbɔɔ o ba.

Maliliŋ: O tanda pilɛ niŋ, wanaa yaa pɛɛku Baabuiyo wa opilɔɔ Filaŋsiiye ndoo dimi ni, opilɔɔ Pɔtukiisiiye nduyɛ opilɔɔ Sulaŋtoŋguei. Le hei, mi ndepilɛnɔ pilɛ dimulla maa te I kuɛ nda pɛɛkoo pɛ, o bɛnda mi kandu a suɛi maŋgalɛi ya chiee lapi le ve mi mɛɛlu a i ya hiou chaa ve. Nyɔɔ viu bɛɛ le mi sina le sabu o ke ya silaa hoo wo.

 Paale pilɛ, yaa nɔ le wanaa ŋiɔɔŋ Baabuiyo pɛɛkoo. Mɛɛ ya chii wana tasoo pɛɛku o Sulaŋtoŋguei niŋ, mi kua o wana diiŋ ndɔɔ lo nduyɛ, Pɔtukiisiiye ndu dimi ni. Mɛɛ ya kandu ndu pɛɛkoo, mi ndepilɛnɔ naŋ kuɛ wo dimulla aa, “Maliliŋ, I che maa a kɛɛ puɛɛnɔŋ te!” Mi sina dɔɔ sakpo maa Sulaŋtoŋguei ya wa vɛlɛ dimioo ni. Pɔtukiisiiye chua ya wa niŋ hoo pɛɛkoo wo dimi ni kanifuule, Bilasil ndoo fula ni!

Puaapiliaa o kundala nya kei niŋndaŋ kpou kaala nya bɔɔ. Yɛɛ tosa yɛ mi chaŋyɛi kpɛɛluŋnde luɛi nya tɛɛŋ nya ndaa?

Chak: Pulɔwaa 11:​25 dimi aa: “Wana o wana cho wana ikɛndɔɔ, dɛnɛ kɛndɔɔ ndu o sɔla ni.” Lelaŋ, ba lusul naa le waŋnda kɛndɛi tosallo le. Nduyɛ miŋ chua vɛlɛ teleŋndo a nda. Lepum te ŋ kuɛ pɛ wallo o Toŋgo leMasaa, mi puaapiliaa apum dimulla aa: “Kɔ chalnuŋ, puaapiliaa cheleŋ cho tosa.” Kɛ mi dimi aa: “Ya bɛɛ puaapilɛnɔɔ ya cho ni. Lelaŋ te wallo wa pɛ le tosaa, ya bɛɛ nɔ mi tosa.” Wana o wana yeema teleŋndo le pɛŋgioo. Kɛ miŋ tosa a sabu maa pɛŋgi naa kuuna naa lɔɔlɔɔ waŋnda malaa le.

Maliliŋ: Miŋ kindiŋ o nɛi o nɛi niŋ le puaapiliaa a ndepiliaa naa biyɔɔ ichaŋya. Hei mala naa ni miŋ sina te a yeema pɛ mi waŋndo mala nda chuauwa biyɔɔ ɔɔ le nda kɔlaŋ chuaa o sukuu te a mal pɛ. Te ŋ sina pɛ maa a yeema mala waa naa, ŋ siŋga kɛɛsiaa naŋ tosa le mako naa wo le nda malaa. O nɛiyo hoo choo naŋ tosa chaŋyɛi kpɛɛluŋnde a waŋnda ni nduyɛ, miŋ wa lɔɔlɔɔ a bɛɛndiaŋ le nda malaa te a hauba pɛ.

Tɔnɔla kuɛɛ nya sɔla yɛ niŋ le yooŋgu kɛndɔɔ dimioo naa yeemɛi cho tau wa?

Chak: Wali lɔɔlɔɔ Mɛlɛkaa chuu naa niŋ salalaŋ tau. Hei tosa niŋ miŋ cha nyɛm Chɛhowa toosiaa woŋ ŋ bɔɔbɔɔ. Simultaŋ la komal naa niŋ tau. Kɛ a koŋ kpou, ŋ cho a kɔl kɛndɛ kanifuule, ŋ sina maa ba ba naŋ kuɛ pɛ, wanaa Mɛlɛkaa cho naa toolu.

Teleŋ ya wa chua piaandu wo, ma duau ya o chiɛi manyumndo niŋ Filɛns Kayana le mɛɛ ya kɛɛ sovɛileŋ yɛ. Lepilɛ bɛɛ I ve kɔl maa I miiŋgu niŋ loŋ te. Kɛ mɛɛ ya simnuŋ misiɔnalueinɔɔ, ma yɔŋ ya loŋ. Nduyɛ ma ke ya dioo le mi wa kɔlaŋ wanaa cho o chiɛila manyumndaŋ niŋnda yooŋgu kɛndɔɔ dimullo. A tonya, Chɛhowa dɔu ya bɔɔ sala!

Maliliŋ: Yɔŋgɔŋndo le waŋnda malaa chuu ya niŋ nyaaloo tau. Ŋ cho bɔɔ a nyaale le waa o wali Chɛhowaa niŋ. Hei mala naa vɛlɛ miŋ chɔɔlu kaaliaŋ o nɔ naa niŋ. Teleŋndaŋ lapum, mi Chak nyuna ya te o bɛnda pɛ miŋ veelu pɔnɔɔ a lanɔ cho a kɔl tambɛiyo wa o naa lo bɛɛ le nyɛdiaa. Mi mulul ndu aa, “Ya bɛɛ wa yiyaŋndo a keŋ okɔɔ!” Teleŋnda bɔɔbɔɔ yiyaŋ pilɔɔ kpe naŋ nɔ ni.

Chak: Wana chiɔuwaa laŋga saaluŋ ya kaŋsɛiyo. Mi che bɛɛ Maliliŋ laa ni niŋ kɔl le hei tueiyɔɔ le, kɛ mi dimul ndu aa: “Wɛɛŋ nuu, ‘I yuuwa wɔ kudɛɛ le.’ Kɛ o yɔŋ bɛɛ mi keleŋa wu, I sina maa I soliŋ yoomu nuu kpeku le tosaa nyɛ hiou wa o sɔvɛ wo. Ndu cho le Chɛhowa piɛiyo ni, nduyɛ keŋ nɛŋi ya kɔllo tau.”—Chɛ. 25:​7, 8.

Maliliŋ: Chɛhowa ke naa niŋ waltaŋ tau le tosaa. Paale pilɛ bɛɛ naŋ yiyaŋ maa ŋ cho nɔla walta waa naa tosa le ndu le. Ŋ tuei niŋ bɔɔ yoomu naa yeela. Lelaŋ, ba o ba fee kɔɔna ndɔɔ vem naa pɛ, kɔlaŋ naŋ kua ni kanifuule, ŋ nɔ tiindaŋndo maa o cho wa a naa latulu!