1-2. Yɛɛ yɔŋnuŋ yɛ teleŋnda bɔɔbɔɔ te waŋnda wa pɛ yiŋɔɔ sɔlaa, nduyɛ yɛɛ naŋ cho yɛ pɛɛku o buŋgɛi hei niŋ?

 KANI bɛɛ a che niŋ pa waŋnda yiŋɔɔ sɔlaa? Te lende i cho ni, mɛɛ i cho kpendekele maa ma cha mɛɛ nda wa a kɔl kɛndɛ yɛ, teleŋ nda wa mulilaŋ yɔŋgoo le nyunala tiɔɔŋnda nda nyuna nda laŋ ndo. Ma cha mɛɛ wanayaŋ ndaŋ a chaŋyaŋ ndaŋ wa a kɔl kɛndɛ le nda o paaleleŋ choo yɛ. Mɛɛ wana nda yiŋndo wa fulaa o mɛŋndaŋ bɛŋgu, ma cha mi waŋnda tiaam balaŋ, nduyɛ o wa a kɔl kɛndɛ tau. O dimi niŋ, o lɔɔ o lɔɔ bɛŋgu, waŋnda o waalaŋ niŋ yɔŋgu yoomula ndalaŋ o Chɛhowa lo ni, okoŋ ma sɔla yiŋɔɔ.

² Kɛ num yɛ? Te o yɔŋ pɛ maa a cho yiyaŋndo le yiŋɔɔ sɔlaa, mɛɛ a cho o sɔvɛ o chieeŋ dɛnɛwɔɔŋndo hoo niŋ kanifuule, a cho Chɛhowa piɛiyo. (Sam 14:​1, 2) O yɔŋ bɛɛ maa a cho o yuuwɛi ɔɔ a cho feleŋgɔnɔ, kɛsiŋ o kɔl maa le num kpeekpei buŋgɛi hei cho ni. Kɛ naŋ sɔla niŋ yiŋɔɔ wa bɛɛ, ŋ nɔ miŋ kɛɛsiaŋ o kɔl le hiouwɔɔ lachi a Chɛhowa piɛiyo lefafɛɛŋ. Ŋ nɔ sabulaŋ tau le Chɛhowa piɛiyo. Kɛ o buŋgɛi hei niŋ, ŋ cho pɛɛku a layaa okɔɔ.

3. Le yɛɛ buɛiyaa Chɛhowaa kaala yɛ tonyaa a sakpoyɛi? (Sam 19:​8; 119:​163)

³ Chɛhowa dimul wanaa nduaa le ma “kaala tonyaa.” (Sɛka. 8:​19) Mi Chiisu dimul buɛiyaa nduaa le ma landuŋ kɔl le nyɛ cho sakpo Mɛlɛka o hɔllo tosaa. (Maa. 5:​6) Hei sim ni maa, ŋ nɔ miŋ nɔ yeemɛi le nyɛ cho o kɛndɔɔ wo tosaa, nduyɛ miŋ wa a diandaa Mɛlɛka o hɔl. A kaala pa tonyaa a sakpoyɛi? Ŋ nɔ tiindaŋndo maa a kaala tonyaa a sakpoyɛi. A tul choolaŋ a yɔŋ wɔɔŋndo leyɛ. (Nuawɔ Sam 19:​8; 119:​163.) Wana o wana dimi choolaŋ, tamasi Setanaa masaa le chieeŋndo hoo o cho  tolɔɔ kɔɔli ni. (Chɔŋ 8:​44; 12:​31) Tuu Setanaa opilɛ cho ni, le Chɛhowa Mɛlɛka tɔɔ tɛɛmbuuwo. O bii niŋ choolaŋ pɛŋgɛlaa a Mɛlɛka naa okɔɔ chɔŋ a teleŋ Adam nda Ifi tosa nilakalulaŋ o kpeloo Idɛŋ niŋndo. Mbo tosa mi waŋnda yiyaŋ maa wana ikaayioo a Masa lakafaa Chɛhowa cho ni. Nduyɛ maa, o yeema mi waŋndachieeya sɔla nyɛ cho o kɛndɔɔ wo le. (Chɛ. 3:​1, 4, 5) Choolaŋ ndaŋ, la cho hau tosaa mi waŋnda nɔ yiyaŋ wɔɔŋndo a Chɛhowa okɔɔ. Te waŋndachieeya hɛli pɛ le ma kɛɛ tonyaa kaalaa, mi Setana nyindu nda le ma wou balaŋ o sɔɔŋ wɔɔŋndoŋ a o kaala wɔɔŋndaŋ niŋ.—Luomaŋ. 1:​25-31.

4. Vɛɛ Chɛhowa chɔm yɛ niŋ maa ndu cho ‘Mɛlɛka tonyaa’ ni? (Tofa vɛlɛ fotueiyo.)

⁴ Chɛhowa cho ‘Mɛlɛka tonyaa’ ni. Nduyɛ mbo pɛɛku vɛlɛ wanaa kaala ndu wa tonyaa. (Sam 31:​5) Mi hei mala wanaa kaala ndu wa, Setana hui lɛ nda a choola ndɔlaŋ te. Mi Chɛhowa pɛɛku vɛlɛ buɛiyaa nduaa le ma chɔm sandei, nduyɛ ma wa sakpo. Mi hei mala nda ma nɔ bɛɛleŋ le ndapila, vɛlɛ ma nɔ kɔl nyulu kpeekpeiyo. (Pulɔ. 13:​5, 6) Baa o tosa niŋ pa keŋ le num chɔŋ a teleŋ ŋ kandu Baabuiyo pɛɛkoo wo? A pɛɛku niŋ maa, nɛila ndɔlaŋ la bɛnda le waŋndachieeya ni, hali num bɛɛ. (Sam 77:​13) Le hei, a nɔ yeemɛi le nyɛ Mɛlɛka dimul naa wo tosaa. (Maa. 6:​33) Nduyɛ a nɔ vɛlɛ yeemɛi le simndaŋ yi le tonyaa a le chɔmndo maa choolaŋ Setana nyiinduu Chɛhowa ni. Vɛɛ ŋ tosa yɛ hei?

5. Vɛɛ ŋ chɔm yɛ maa a sim yi le tonyaa a sakpoyɛi?

⁵ A hɛli le yoomu numndo biyɔɔ o nɛi chɔm waŋnda kpendekele maa, a kɛɛ choola Setanalaŋ nduyɛ ma sim kɔl yi le tonyaa wo. A tiuba ma chɔm maa a yeema mi Chɛhowa wa Masa numndo, vɛlɛ maa a yeema ma tosa nyɛ o dimul num le tosaa wo. Vɛɛ ŋ tosa yɛ hei? A tosa hei te a yɔŋguŋ pɛ o ndu lo o piɛileŋ niŋ, nduyɛ ma sɔla yiŋɔɔ. Kaala ŋ nɔ le tonyaa a sakpoyɛiyo tiuba mbo nyindu num, le ma sɔla yiŋɔɔ.

6. Sabula kuɛɛ Sam 45:​4 ke yɛ num le Chiisu Kiliti kaalaa?

⁶ Le yɛɛ ŋ kaala yɛ Chiisu Kiliti? Tofawɔ sabulaŋ lapum. Baabuiyo dimi a ndu okɔɔ aa: “Nduyɛ o naŋɔɔ num bɛndoo niŋ, kɔ ma kɔ sɔla batiuwaa. Kɔ sɔŋga le tonyaa, sakpoyɛi a tusiŋndo. Nduyɛ ma tosa sɔɔŋ kɔndɔfiliŋ bɛndoŋ.” (Sam 45:​4, NWT) Mi Chiisu sɔŋga le tonyaa. O tusiŋ, vɛlɛ o kaala sakpoyɛi. Te a kaala pɛ tonyaa a sakpoyɛi, mɛɛ i cho  kpendekele maa a kaala Chiisu Kiliti. Yiyaŋndɔ mɛɛ Chiisu ndoo sim yi le tonyaa a nyɛ cho o kɛndɔɔ wo yɛ. (Chɔŋ 18:​37) Kɛ, vɛɛ o chɔm yɛ maa o tusiŋ?

7. Yɛɛ hɛnaŋ yɛ num a kaa tusiaŋ Chiisu wo okɔɔ?

⁷ Mi Chiisu chɔm maa o cho wana tusiaŋ, sanaa a tamasi ndɔɔ. Le tamaseliiyo, mbo yɔŋgu saŋgalaa kpou o Finya ndɔ lo, kɛ o cho o ndupila lo le. (Maki 10:​17, 18; Chɔŋ 5:​19) Vɛɛ ŋ sinaŋ yɛ te a yiyaŋ pɛ a kaa tusiaŋ Chiisu wo okɔɔ? Baa keŋ nyindu num le ndu kaalaa, nduyɛ ma tol tamasi ndɔɔ kɔɔli le? A tonya, mi hei nyindu num le ndu kaalaa nduyɛ ma tol tamasi ndɔɔ kɔɔli. Le yɛɛ Chiisu nɔ yɛ kaa tusiaŋndo? Kanifuule o kaala Finya ndɔ, nduyɛ o yeema mbo tol tamasi ndɔɔ kɔɔli. Wana tusiaŋndo Chɛhowa cho ni. (Sam 18:​35; Hibu. 1:​3) Mi Chiisu tol suliŋnda Chɛhowalaŋ kɔɔli o nɛi walaŋndo choo. Baa hei tosa ma naŋnuŋ ndu ikɛi kpɛɛluŋ te?

8. Le yɛɛ naŋ kaala yɛ Chiisu le mbo wa Masa naa?

⁸ Ŋ kaala Chiisu le mbo wa Masa naa kanifuule, ndu bɛnda ni mbo wa Masaa. Chɛhowa pila pɛɛku Po ndɔɔ ni, nduyɛ mbo yulu ndu isu le mbo wa masaa. (Aisaya 50:​4, 5) Yiyaŋndɔ a kaala sala soliaŋ Chiisu chɔmndo okɔɔ. (Chɔŋ 13:​1) Le mɛɛ o cho Masa numndo yɛ, a nɔ ma kaala ndu. Mbo tɛɛsiaa maa, wanaa kaala ndu a kɔllo kpou wa cho chaaŋaa nduaa ni, vɛlɛ maa nda diikuŋ sawala ndɔlaŋ ni. (Chɔŋ 14:​15; 15:​14, 15) Nuawɔ se bɛɛle bɛndu le waa o chaŋyɛi niŋ a Po Chɛhowaa!

9. Vɛɛ yiŋɔɔ Chiisu sɔla wo velaŋ yɛ a yiŋɔɔ buɛiyaa nduaa sɔla wo?

⁹ Sawa Chiisu wo opilɛ cho ni maa, wanaa yeema ma simnuŋ buɛiyaa nduaa wa nɔ ma sɔla yiŋɔɔ. (Maa. 28:​19, 20) Mbo kɛsul naa tamaseliiyo o hei niŋ. Kɛ teŋgeŋndo cho yiŋɔɔ o sɔla wo tɛɛŋ, a o buɛiyaa nduaa sɔla wo o nɛilaŋ lapum choo. (Tofa kɔfoo hoo, “ Teŋgeŋ Kuɛɛ Cho yɛ Yiŋɔɔ Chiisu Sɔla Wo Tɛɛŋ a o Buɛiyaa Nduaa Sɔla Wo?”) A koŋ kpou, yiŋɔɔ o sɔla wo velaŋ a yiŋɔɔ buɛiyaa nduaa sɔla wo o nɛilaŋ lapum choo. Le tamaseliiyo, mɛɛ o sɔla yiŋɔɔ, mbo yɔŋguŋ a kɔllo kpou le hɛnaŋ Finya ndɔ wo tosaa. (Hibu. 10:​7) O nɛi pilɛ koŋ choo, te waŋndo yɔŋguŋ pɛ o Chɛhowa lo nduyɛ mbo sɔla yiŋɔɔ, mbo chɔm kpendekele maa o hɛnaŋ Chɛhowaa choo o handu niŋ kɔl ndɔɔ kpou ni, o cho lɛ le hɛnaŋ ndɔɔ tosa le. Mi wana koŋ chɔm vɛlɛ maa o cho tamasi Masanɔ ndɔɔ tolɔɔ kɔɔli.

10. Ɔɔ sabula ŋ nɔ le Chiisu kaalaa laŋ, nduyɛ vɛɛ ŋ chɔm yɛ maa a kaala ndu?

¹⁰ A laalaŋ maa Chɛhowa Po ndɔ pilɔɔ kpe cho Chiisu ni, nduyɛ maa ndu o hɛli ni le mbo wa Masa naa. A sina maa Chiisu cho wana tusiaŋ, vɛlɛ maa mbo tol tamasi Finya ndɔ wo kɔɔli o nɛi walaŋndo choo. A pɛɛku niŋ maa, mbo ke wanaa wa a yiaaŋ nda nyɛdiaa, mbo dɛɛniaa waŋnda kɔltaŋ, okoŋ mbo siŋgi wanaa wa a naalaŋ nda. (Maa. 14:​14-21) Nduyɛ a che niŋ kpendekele mɛɛ o cho hau kunda leKilisiɔŋndo nɛiyo chɔmndo yɛ. (Maa. 23:​10) A sina vɛlɛ maa, le mɛɛ o cho Masaa le Masale Mɛlɛkaleŋ yɛ, o cho sɔɔŋ kɛndɔŋ tosa tau o chilaŋ niŋ. Vɛɛ ŋ chɔm yɛ maa a kaala ndu? A tosa hei te a tol pɛ tamasi ndɔɔ kɔɔli. (Chɔŋ 14:​21) Nduyɛ, nɛiyo opilɛ cho yɔŋgɔŋndo o Chɛhowa lo, ma sɔla yiŋɔɔ ni.

11. Sabu sɔvɛ kuɛɛ naŋ nɔ yɛ le yiŋɔɔ sɔlaa?

¹¹ Ɔɔ sabu kpeekpei naŋ nɔ le yiŋɔɔ sɔlaa wo? Mi Chiisu chɔm sawa hiou sawalaŋ kpou wo. Mbo dimi aa: “A nɔ ma kaala Chɛhowa Mɛlɛka numndo a kɔl numndo kpou, a yoomu numndo kpou, a yiyaŋ numndo kpou, nduyɛ a kpaaya numndo kpou.” (Maki 12:​30) Baa diomndaŋ ndaŋ la tɛɛsiaa pa mɛɛ kpɛ ŋ kaala Mɛlɛka yɛ?

12. Le yɛɛ ŋ kaala yɛ Chɛhowa? (Tofa vɛlɛ fotueiyo.)

¹² Ŋ nɔ sabulaŋ tau le Chɛhowa kaalaa. Le tamaseliiyo, a bii niŋ bila maa Chɛhowa “yɔŋgu yoomoo le nyɛ o nyɛ yoomaa ni.” Nduyɛ maa, “nyɛ o nyɛ kɛndɛ naŋ sɔla, [ndu] ke naa ndu ni.” (Sam 36:​9; Chemi. 1:​17) Nyɛ o nyɛ kɛndɛ ŋ cho tueiyɔɔ yeela, Mɛlɛka naa kaalaa ke num ni.

13. Le yɛɛ sala baŋaa cho yɛ ke sɔvɛ sɔviɔɔ?

¹³ Sala baŋaa cho ke sɔvɛ sɔvɛ Chɛhowa ke naa wo ni. Le yɛɛ naŋ dimi yɛ lende? Yiyaŋndɔ a chaŋyɛi kpɛɛluŋ cho Chɛhowa nda Po ndɔɔ tɛɛŋnde. Mi Chiisu dimi aa: “Finyaa kaala ya,” nduyɛ “I kaala Finya nuu.” (Chɔŋ 10:​17; 14:​31) Mi chaŋyɛi cho nda tɛɛŋnde chɔɔlu kalu poŋ, mɛɛ nda chua wɔsilaŋ o biiliɔŋndaŋ niŋ diompilɛ o choo choo niŋ tuupa mbo huŋ o chieeŋndo choo. (Pulɔ. 8:​22, 23, 30) Yiyaŋndɔ mɛɛ kpɛ Chɛhowa ndoo sinaŋ nyɛ nɛiyaa yɛ, mɛɛ o chɛl ma saaŋgiaa Po ndɔɔ, nduyɛ ma dii ndu. Chɛhowa kaala waŋndachieeya tau, hali num bɛɛ. Lelaŋ pɛŋ o yɔŋgu Po ndɔɔ ni, le mi num a acheleŋnda wa yoomu lefafɛɛŋ. (Chɔŋ 3:​16; Kalee. 2:​20) Sabu sɔvɛ sɔviɔɔ cho hoo ni le Mɛlɛka kaalaa.

14. Nyɛ sɔvɛ kuɛɛ ŋ nɔ yɛ ma tosa o yoomu numndo niŋ?

¹⁴ Kaala ŋ nɔ le Chɛhowa wo cho hiouwɔɔ lachi a hindɔɔ kanifuule, a pɛɛku niŋ tau a ndu okɔɔ. Nduyɛ i cho kpendekele maa, a yeema ma sɔɔŋguu ndu ikɛi suŋ suŋ vɛlɛ a lefafɛɛŋ.  A tiuba ma tosa keŋ. O cho num dɛɛniaa teleŋ o teleŋ le ma tosa mbo naŋ kɔl. (Pulɔ. 23:​15, 16) A tosa hei o cho ko a diomnda ŋ dimilaŋ te, kɛ sanaa a sɔɔŋ ŋ tosa woŋ. Mɛɛ ŋ cho yoomu numndo biyɔɔ yɛ cho chɔm kpendekele maa, a kaala Chɛhowa a kɔl numndo kpou. (1 Chɔŋ 5:​3) Nyɛ sɔvɛ ŋ nɔ ma tosa o yoomu numndo niŋndo cho koŋ ni.

15. Vɛɛ ŋ chɔm yɛ maa a kaala Chɛhowa?

¹⁵ Vɛɛ ŋ chɔm yɛ maa a kaala Chɛhowa? O tasoo, a nɔ ma yɔŋguŋ o ndu lo o piɛileŋ niŋ. (Sam 40:​8) Okoŋ kɔɔli, a nɔ ma chɔm waŋnda kpendekele o hɔl maa, a yɔŋguŋ o ndu lo sanaa a yiŋɔɔ sɔlaa. A mɛɛ naŋ che o buŋgɛi hei kandɔŋndo yɛ, mi yiŋɔɔ tosa ma wa a kɔl kɛndɛ tau. Nduyɛ paale sɔvɛ leŋ pila le wa leŋ le num ni. Paaleleŋ ŋ cho chɔm ni maa, a yɔŋguŋ o Chɛhowa lo le hɛnaŋ ndɔɔ tosaa, o cho lɛ le hɛnaŋ numndo tosa le. (Luomaŋ. 14:​8; 1 Pitɛ 4:​1, 2) Naapum, ma yiyaŋ maa kɛɛsiaa bɛndoo pila cho hoo ni. Nduyɛ lende kpeekpei i cho ni. Kɛ ndu kumbul num nɛiyo ni, le ma tuei yoomoo yeela. O nɛi kuɛɛ choo?

16. A mɛɛ Sam 41:​12 dimi yɛ, vɛɛ Chɛhowa fanda yɛ wanaa yɔŋgu yoomula ndalaŋ o ndu lo le ndu piɛiyo wa?

¹⁶ Chɛhowa nɔ kɛndɛi mbo hiau wana o wana. Mɛɛ mɛɛ naŋ ke ndu, nyɛm o ke naa woŋ hiau poloŋ. (Maki 10:​29, 30) O cho tosa ma tuei yoomoo yeela, mbo fanda num, nduyɛ ma nɔ saboo o yoomoo niŋ mi che bɛɛ ŋ cho o chieeŋ dɛnɛ wɔɔŋndo hoo niŋ. Yoomu kɛndɛ ŋ cho hunɔɔ tueiyɔɔ yeela wo, kandɔŋndo koni cho hoo ni. Yiŋɔɔ ŋ cho sɔla wo nɔ lamɛɛlu kposoŋ te. A tiuba ma hiou lachi a Finya num kaalaa piɛiyo lefafɛɛŋ. Nduyɛ kaala ŋ nɔ le ndu wo cho hiouwɔɔ lachi a hindɔɔ. A tonya, a cho wa yoomu lefafɛɛŋ maa ndu.—Nuawɔ Sam 41:​12.

17. Mi che bɛɛ Chɛhowa nɔ choo choo a lɛŋndeŋ ni, kɛ yɛɛ ŋ tiu yɛ ba ma ke ndu?

¹⁷ Te a yɔŋguŋ pɛ o Chɛhowa lo, nduyɛ ma sɔla yiŋɔɔ, keŋ cho tosa ma nɔ dikeŋnaŋndo le Finya num nyɛ sɔvɛ sɔviɔɔ kioo. Nyɛ o nyɛ kɛndɛ ŋ nɔ, ndu ke num ni. Yoomu ŋ cho tueiyɔɔ yeela wo bɛɛ, ndu ke num ni. Le ndu balikaa mello, a tiuba ma ke ndu nyɛ o nɔ le wo, mi che bɛɛ ndu nɔ choo choo a lɛŋndeŋ ni. Yɛɛ  cho yɛ koŋ? Yɔŋgɔŋ numndo o ndu lo a kɔllo kpou. (Choobu 1:​8; 41:​11; Pulɔ. 27:​11) A tonya, nɛi sɔviɔɔ kpeekpei cho hoo ni le yoomu numndo biyɔɔ. I cho kpendekele maa kaala ŋ nɔ le Chɛhowa wo cho num nyindɔɔ ni, le ma sɔla yiŋɔɔ.

18. Nyunala kuɛɛ ŋ nɔ yɛ ma nyunaŋ?

¹⁸ Baa a cho pa yiŋɔɔ sɔla? Numpilɛ kinɛi tiuba ni ma muli nyunaa hoo. Kɛ, naapum o bɛnda ma nyunaŋ aa, ‘Yɛɛ cho yɛ ya kuunaa yiŋɔɔ sɔlaa?’ (Walta. 8:​36) Loonuŋ a sabula yaala naŋ pɛɛku o buŋgɛi hei niŋndaŋ. O tasoo, a kaala tonyaa a sakpoyɛi. Nyunaŋndɔ aa, ‘Baa I yeema pa mi che teleŋ wana o wana cho tonyaa kaala, nduyɛ mbo tosa nyɛ cho sakpo wo?’ O diiŋ ndɔɔ, a kaala Chiisu Kiliti. Nyunaŋndɔ aa, ‘Baa I yeema pa mi Po Mɛlɛkaa wa Masa nuu, nduyɛ mi tol tamasi ndɔɔ kɔɔli?’ O yaa ndɔɔ, a kaala Chɛhowa. Sabu hiou sabulaŋ kpou wo cho hoo ni. Nyunaŋndɔ aa, ‘Baa I yeema pa mi nɛŋi Chɛhowa kɔl sanaa a ndu piɛiyo?’ Te mulila numndaŋ le nyunalaŋ ndaŋ la wa pɛ aa ei, mɛɛ yɛɛ cho yɛ num kuunaa yiŋɔɔ sɔlaa?—Walta. 16:​33.

19. Le yɛɛ a nɔ ma kiisaŋ le yiŋɔɔ sɔlaa le? Chɔmndɔ tamaseliiyo. (Chɔŋ 4:​34)

¹⁹ Te a wa pɛ kiisaŋndo le yiŋɔɔ sɔlaa, mɛɛ yiyaŋ a tamasi Chiisu soliŋ kpeku wo okɔɔ. (Nuawɔ Chɔŋ 4:​34.) Mi Chiisu tuu hɛnaŋ Finya ndɔɔ tosaa a nyɛdiaa. Le yɛɛ? Nyɛdiaa cho o sɔvɛ le naa. Chiisu ndoo sina maa, nyɛ Chɛhowa dimul naa le tosaa wo cho nyɛ sɔvɛ bɛnda le naa wo ni. Pesiŋ bɛɛ Chɛhowa yeema miŋ tosa nyɛ chuu naa niŋ kpundɔɔ wo le. Baa Chɛhowa yeema num pa ma sɔla yiŋɔɔ? Ei. (Walta. 2:​38) Lelaŋ, nɔ tiindaŋndo maa te a diikuŋ pɛ sawa o ke num le yiŋɔɔ sɔlaa wo, a cho tɔnɔɔ sɔla tau. Te o wa pɛ maa kiisaŋ ve num le nyɛdiaa kɛndɛ kɛndɔɔ tueiyo yeela le, mɛɛ le yɛɛ ŋ cho yɛ kiisaŋndo le yiŋɔɔ sɔlaa?

20. Yɛɛ naŋ cho yɛ pɛɛku o buŋgɛi cho lachi ve niŋ?

²⁰ Yɛɛ ŋ cho yɛ chumndo? Lepum, mi wanaa bɔɔbɔɔ muli nyunaa hoo aa, “I bɛɛndiaŋndɔ le.” I cho tonya maa, kɛɛsiaa ŋ cho tosa le yɔŋgɔŋndo o Chɛhowa lo ma sɔla yiŋɔɔ wo, cho kɛɛsiaa sɔvɛ hiou kpou wo ni. Lelaŋ, a nɔ ma yiyaŋ yiŋgoloŋ a kɛɛsiaa hoo okɔɔ. A nɔ ma chua teleŋndo, ma yiyaŋ nyɛkɛndɛi, nduyɛ ma dɔu sɛmbɔɔ tau le halikpeŋ ma suliŋ. Lelaŋ, yɛɛ ŋ nɔ yɛ ma tosa suŋ suŋ le ma suliŋ le yiŋɔɔ sɔlaa? Ŋ cho pɛɛku a hei okɔɔ o buŋgɛi cho lachi ve niŋ.