“Nyɛ Wawoŋ Nya Nɔ Wo” Diondu le Chɛhowa Saŋgalaa
‘Nyɛ wawoŋ nya nɔ wo o diondu. Koŋ tosa ni, te waŋnda che pɛ . . . a saŋgala Mɛlɛka Finya nya.’—MAATIU 5:16.
1. Sabu teŋgeŋ kuɛɛ naŋ nɔ yɛ le waa a kɔl kɛndɛ?
Ŋ CHO bɔɔ a kɔl kɛndɛ le tueiyɔɔ mɛɛ buɛiyaa Mɛlɛkaa cho tosaa mi nyɛ wawoŋ ndaa wa diondɔɔ yɛ! Lapɔm, wanaa Chɛhowaa tosa pɛɛkula Baabuilaŋ hiouwɔɔ 10,000,000. Nduyɛ wanaa sɛnɛiya o miiliɔŋndaŋ niŋ hiŋ o Loonuŋyaa ni, nduyɛ ma pɛɛku a ke kaalaa sala baŋaa Chɛhowaa okɔɔ.—Chɔŋ Tasoo 4:9.
2, 3. (a) Yɛɛnɛ kuuna yɛ naa diondɔɔ “mɛɛ looŋ diandu nuaa o halaa niŋ yɛ” le? (b) Yɛɛnɛ naŋ cho yɛ yaasiaa o buŋgɛi hei niŋ?
2 O chieeŋndo choo kpou, mi Seiyaa Chɛhowaa dimi sɔɔŋ maŋgalaŋ tau. Kɛ hoo kuuna naa Chɛhowa saŋgalaa diompilɛ maa leyuŋgu le. (Sɔɔŋ Chɔɔmaŋndoŋ 7:9) Suɛi maŋgalɛi kɛ kɛ naŋ dimi ɔɔ ba o ba naŋ wa, ŋ nɔla miŋ dendu “mɛɛ looŋ diandu nuaa o halaa niŋ yɛ.”—Filipiaŋnda 2:15.
3 Wali poli naa, diompilɛ naa leKilisiɔŋndo, a sinaa maa ŋ nɔ miŋ tosa wallo chɔ chɔ chuu Chɛhowa saŋgalaa. Vɛɛ naŋ tosa yɛ mi nyɛ wawoŋ naa dendu o nɛila yaalaŋ ndaŋ niŋ?—Nuawɔ Maatiu 5:14-16.
MALA ACHELEŊNDA LE CHƐHOWA PIƐIYO
4, 5. (a) O fulawɔ o yooŋgu kɛndɔɔ dimioo kɔɔli, vɛɛ naŋ tosa yɛ mi nyɛ wawoŋ naa dendu? (b) Fulamakɔɔlila kɛndɛ kuɛɛ naŋ sɔla yɛ te ŋ chɔm pɛ kaa kɛndɔɔ? (Tofa fotueiyo o peele naŋ kandu leŋ choo.)
4 Yooŋgu kɛndɔɔ dimioo a waŋnda siiŋgoo buɛiya cho nɛi sɔvɛ naŋ tosa mi nyɛ wawoŋ naa dendu wo ni. (Maatiu 28:19, 20) O wɔsi 1925 niŋ, mi buŋgɛi hei, “Paŋgeloo o Nyumndaŋ Niŋ” dimi maa o palɛi mɛɛlɛi niŋ, wana o wana tiuba mbo dɔu tiindaŋndo o Masanɔɔ niŋ te, te o soliŋ “dikeŋnaŋ o nɔ wo kpeku le mi paŋgele ndɔɔ dendu le.” Mi buŋgɛi keŋ dimi vɛlɛ aa, “A nɔla ma tosa hei te a wa pɛ waŋnda o chieeŋndo choo yooŋgu kɛndɔɔ dimullo, nduyɛ mi kelala numndaŋ la chɛlaŋ a nyɛ wawoŋndo.” (Bandu Mɛŋgɛlaa Kooŋndo 1, 1925) O fulawɔ o yooŋgu kɛndɔɔ dimioo kɔɔli, mi kaa naa bɛɛ chuu Chɛhowa saŋgalaa. Mi wanaa bɔɔbɔɔ mɛɛndaŋ naa te ŋ wa pɛ yooŋgu kɛndɔɔ dimioo. Te ŋ mam o ndalo pɛ muɛɛŋ nduyɛ miŋ yil nda a dialuŋ fulaa, mbo mala nda le yiyaŋ kɛndɔɔ nɔɔ a naa okɔɔ vɛlɛ a Mɛlɛka naŋ cho piɛiyo wo.
Yooŋgu kɛndɛ naŋ dimi wo a kaa naa chuu Chɛhowa saŋgalaa
5 Mi Chiisu dimul buɛiyaa nduaa aa, “Chiɛi o chiɛi nya luɛi pɛ, la dimi nuaa aa, ‘Dɛnɛ kɛndɛ wa chiɛi niŋ nanuŋ.’” (Maatiu 10:12) O fonda Chiisu ndoo dimi yooŋgu kɛndɔɔ wo, naamu waŋnda i wa ni le mialla yiyaa o la ndalo chiɛiniŋ. O fondaŋnda bɔɔbɔɔ hau, hei cho lɛ naamu le. Teleŋnda bɔɔbɔɔ mi waŋnda yɔŋ siooŋnde ɔɔ ma dɔɔnuŋ tumbe te a che pɛ miallo o ndalo bɛɛ. Kɛ te ŋ wa pɛ wanaa ichaŋya nduyɛ miŋ chɔm kaa kɛndɔɔ, waŋnda cho wa fɛɛsɛŋ a naa. Te a wa pɛ yooŋgu kɛndɔɔ dimioo a pɛŋgɛi naa waŋnda hiau tau wa, a che niŋ pa maa te a mam pɛ muɛɛŋ nduyɛ ma yil waŋnda yilɔɔ ichaŋyaa, mi nda bɛɛ fula ŋdial le hunɔɔ yauwo chuaa? Ma yeema pɛŋ le suukaŋndo kandɔɔ a num!
6. Yɛɛ mala yɛ pɔnɔɔ a lanɔ yuwaa pum le dialuŋ fulaŋ nɔɔ o wali pollo niŋ?
6 Pɔnɔɔ a lanɔ yuwaa pum o Iŋgilaŋ niŋ nɔla lɛ yooŋgu kɛndɔɔ dimioo chiɛiyo a chiɛiyo maa paandu le kanifuule, kɛndiaa ndaa chɛllɛ nda le. Le hei, ma kɛsi tibiiyo a yaulaŋ lechoo o chiɛi ndaa ikɛi. O sukuuwo ikɛi nda cho ni. Lelaŋ, ma kɛsi yaula pilaŋ kalaŋ chuauwa kɔllo laŋ o tibiiyo koŋ choo, le kalaŋ chuauwaa huŋ chuauwaa ndaa chuaa o sukuuwa. Kalaŋ chuauwa apum chua niŋ yaulaŋ ndaŋ latiŋ, mɛɛ Questions Young People Ask—Answers That Work, O Tasoo a O Diiŋndɔɔ cho naa yɛ. Teleŋnda bɔɔbɔɔ mi ndepilɛnɔ kɔɔfanɔɔ sɔɔŋguu pɔnɔɔ a lanɔɔ hoo ikɛi. Mi kalaŋ chuauwa che maa wana ichaŋyaa ndepilɛnɔ koŋ cho ni, nduyɛ maa pɔnɔɔ a lanɔɔ hoo yeema kɛsɛ ma mala acheleŋnda. Mi kala chua pilɛ kandu pɛŋ Baabuiyo pɛɛkoo.
7. Vɛɛ ŋ mala yɛ luɛfichiiyaa cho o fonda numndo wa?
7 O wɔsila laŋga hiou laŋ niŋ, wanaa bɔɔbɔɔ mal niŋ chalta ndalaŋ ma nyaanuŋ, nduyɛ ma simnuŋ luɛfichiiya o lɛŋii cheleŋnde niŋ. Yɛɛ ŋ nɔ yɛ ma tosa le vidueilaŋ a yaula cho o suɛi ndɛi maŋgalɛi niŋ o jw.org wo.—Ditɔnɔmii 10:19.
luɛfichiiya o fonda ŋ cho wo malaa ma pɛɛku a Chɛhowa okɔɔ? O tasoo, a nɔla ma pɛɛku yilɔɔ o suɛi ndɛi maŋgalɛi niŋ. Le handɔɔ lechoo, a tiuba ma soliŋ “JW Language app” kpeku le ma pɛɛku pulama biŋgi tosa ma nɔ yeemɛi le simndaŋ mi la suukaŋ ndo. Okoŋ, a chɔm nda vɛlɛ8, 9. (a) Vɛɛ bɔŋaŋnda naalaŋ o lɔɔ tɛɛŋ mala yɛ naa? (b) Vɛɛ kalaŋ chuauwa mala yɛ chuauwaa ndaa le hiouwɔɔ lachioo tosaa o mulila ndalaŋ niŋ o bɔŋaŋndaŋ?
8 Chɛhowa cho naa kioo nyɛm kpeekpei naŋ hau ba le yooŋgu kɛndɔɔ dimioo nyɛkɛndɛiyo. Le taamaseliiyo, nyɛ naŋ pɛɛku o Bɔŋaŋ Yoomu Naa leKilisiɔŋndo a Wali Pollo wo cho naa dialuŋ fulaŋ chɔɔloo kioo le miiŋgula makɔɔlaŋ a pɛɛkula Baabuilaŋ tosaa.
9 Te waŋnda hiŋ pɛ o bɔŋaŋnda naalaŋ, mi nyɔɔ hɛnaŋ nda tau a mulila chuauwaa naa yɔŋgu laŋ. Pɛɛku chuauwaa numnda le kiɔɔ bolleŋ baŋɔɔ kpu o yauwo choo le mulilaŋ yɔŋgoo. Waŋnda apum chua hau tonyaa le mɛɛ nda tuei chuaambuaa tiindaŋ ndaa chɔmndo o mulila tɛtɛlɛlaŋ yɔŋgoo niŋ a kɔl ndaa fau yɛ.—Kɔliŋtiaŋ Tasoo 14:25.
KINDI DIOMPILƆƆ
10. Vɛɛ pɛɛku leyuŋgoo mala yɛ yuŋgulaŋ le chɔɔloo diompilɔɔ nɔɔ?
10 Te ŋ kindiŋ pɛ kpoke le yuŋgu naa pɛɛkoo le wallo tosaa o diompilɔɔ niŋ a o kɔl nyuloo niŋ, miŋ chuu Chɛhowa saŋgalaa. Le taamaseliiyo, te kala chuaa ŋ cho ni, mɛɛ kɛɛsiaa le Pɛɛku leYuŋgoo Tɛlivisiɔŋ Seiyaa Chɛhowaa diompilɛ. Nduyɛ te a chii pɛ nua, a suukaŋ a mɛɛ nda duau nyɛ nda pɛɛku wo o wali niŋ yɛ. Loonuŋ maa nɛi chɔmaa chuaambɔ pɔmbɔɔ yeema wo cho teŋgeŋ a o chuaambɔ cho niŋ kpasu wo yeema wo. Tosa nyɛ o nyɛ ŋ tiuba le malaa wana o wana cho o yuŋgu numndo niŋ le tɔnɔɔ sɔlaa nyɛkɛndɛi o pɛɛku leyuŋgoo niŋ.—Sam 148:12, 13.
waa tosaa lɔɔlɔɔ. Mi yuŋgula bɔɔbɔɔ nuaI cho suɛi kɛndɛ le miŋ chua teleŋndo le waa a yuuwa latulu (Tofa pɛl 11)
11-13. Vɛɛ naŋ mala yɛ kunda naa le mi diompilɔɔ chɔɔlu wa leniŋ?
11 O yɔŋ bɛɛ aa feleŋgɔnɔɔ ŋ cho ni, a nɔla ma mala le mi wana o wana o kundaa niŋ yiyaŋ maa o cho o sɔvɛ. Nɛiyo opilɛ cho chaŋyɛi tosaa a puaapiliaa a ndepiliaa yuuwa ni. Nyuna nda le nyɛ mala nda ma wa hiouwɔɔ lachi a Chɛhowa piɛiyo le wɔsiŋ bɔɔbɔɔ wo. A cho num sɔɔŋ sɔvɛ sɔviɔŋ pɛɛku. Suukaŋ waa naa cho nda a num kɔllo dɛɛniaa! Nduyɛ naa kpou, ŋ wa feleŋguaa ɔɔ yuuwa, ŋ nɔla miŋ tosa le mi wanaa huŋ naa yilɔɔ o Toŋgo leMasaa wa che maa ŋ naŋ kɔl le nda chɔɔ. Yil nda, mam o ndalo muɛɛŋ, mala nda le naa chalaa sɔlaa, nduyɛ ma chɔm nda o acheleŋnda lo. Tosa ma sinaŋ maa a fuuluu o ndalo.
12 Te o wa pɛ ma dimul num le bɔŋaŋ wali pollo tosaa, a nɔla ma mala yuuwa le mi nyɛ nda wawoŋndo hiou lachi a diondɔɔ wakee. Tosa a sabu le ma sɔla tanda bɛnda le nda wo. Kɛɛsiaa le mi feleŋguaa tosa wallo a nda latulu. Mi puaapiliaa a ndepiliaa yuuwa, a wanaa nɔ kɛndiaa lepɛŋndo wa tambu kɔl teleŋnda bɔɔbɔɔ le mɛɛ nda tiu lɛ ba yooŋgu kɛndɔɔ dimioo maa paandu le yɛ. Kɛ te a sina pɛ maa a buulaŋ le nda, nduyɛ ma bii bahawɛi ndaa bila, ma sinaŋ nyɛkɛndɛi. O yɔŋ bɛɛ maa a yuuwa niŋ tau ɔɔ a viou niŋ tau o tonyaa niŋ, mi kɛndɛi numnde dɛɛniaa nda kɔllo le hiouwɔɔ lachi a yooŋgu kɛndɔɔ dimioo a dialuŋ fulaa.—Lɛvitikɔɔ 19:32.
A nɔla pa ma chɔɔlu puaapiliaa sina o kunda numndo niŋ nyɛkɛndɛi?
13 Mi Isɔluɛiya tuɛi Chɛhowa piɛiyo o diompilɔɔ niŋ yeela. Mi wana ŋchondoo poonyiaa aa, “I cho bɔɔ suɛi kɛndɛi bɛndu le wanaa Mɛlɛkaa waa diom pilɛ maa pɔmbuaa a bɛnduaa.” (Nuawɔ Sam 133:1, 2.) Mbo tuu diompilɔɔ hoo a chuɛima nda pɔya waŋndo waŋ, ma tosa mi waŋndo niŋgila nduyɛ mbo nɔ chuŋ kɛndɔɔ wo. O nɛi pilɛ koŋ choo kpe, ŋ tiuba miŋ niŋgiliaa puaapiliaa a ndepiliaa naa te ŋ wa pɛ wuye wuye a nda nduyɛ miŋ nɔ kɛndɛi. Mi hei chɔɔlu diompilɔɔ o kundaa niŋ. A nɔla pa ma chɔɔlu puaapiliaa sina o kunda numndo niŋ nyɛkɛndɛi?—Kɔliŋtiaŋ Diiŋ Ndɔɔ 6:11-13.
14. Yɛɛ ŋ nɔ yɛ ma tosa le mi nyɛ wawoŋ numndo dendu o fondaŋ ŋ cho wo?
14 Ba o ba ŋ wa, nyɛ wawoŋ numndo nɔla mbo dendu. Kaa num kɛndɔɔ nɔla mbo tosa le mi wanaa nya cho o fonda pilɔɔ wa nɔ yeemɛi le chɔɔloo sinaa a Chɛhowa okɔɔ. Nyunaŋndɔ aa, ‘Vɛɛ wanaa naŋ chiɛɛliaŋ nda yiyaŋ yɛ a ya okɔɔ? Chiɛi nuu cho pa o diandaa? O tosa pa fondaŋ ya cho wo o kɛndɛ? I cho pa wanaa naŋ chiɛɛliaŋ nda malaa?’ Nyuna Ɛfisiaŋnda 5:9.
Seiyaa Chɛhowaa cheleŋ mɛɛ kaa nda kɛndɔɔ a taamasi nda kɛndɔɔ piiliaŋ wanayaŋ ndaŋ, wanaa nda chiɛɛliaŋ nda, wanaa nda tosa wallo latulu wa, ɔɔ chaaŋaa ndaa o sukuu yɛ.—LA WA A PUƐYAŊ TE
15. Le yɛɛ naŋ nɔ yɛ miŋ wa a puɛyaŋ te?
15 Te ŋ yeema pɛ mi nyɛ wawoŋ naa hiou lachi a diondɔɔ wakee, ŋ nɔ miŋ sina boondii naŋ cho niŋnde. Teleŋnda bɔɔbɔɔ, mi Chiisu dimul buɛiyaa nduaa aa, “La wa a puɛyaŋ te.” (Maatiu 24:42; 25:13; 26:41) Te ŋ yiyaŋ pɛ maa ‘nyɛ palaa bɛndoo’ cho wɔ levil, mɛɛ ŋ ve niŋ yekeŋ le nɛilaŋ nuuviaa le acheleŋnda malaa ma pɛɛku a Chɛhowa okɔɔ le. (Maatiu 24:21) Tuupa mi nyɛ wawoŋ naa wa diondɔɔ wakee, o cho kandɔɔ yɔŋnɔŋndo tɔliɔɔ, naapum pɛŋ mbo nyum pɔli.
16, 17. Yɛɛnɛ ŋ nɔ yɛ ma tosa le waa yekeŋ?
16 Ŋ nɔ miŋ wa lahɔl suŋ suŋ mbo hiou bɛɛ maa paandu. Sɔɔŋ o chieeŋndo niŋ cho hiouwɔɔ lachi a wɔuleŋ. Kɛ ŋ sina maa mɛɛlulaŋ la cho hunɔɔ a teleŋ Chɛhowa hɛli wo kpafii. (Maatiu 24:42-44) Kɛ le suŋ suŋ ndɔ, ŋ nɔ miŋ biunuŋ nduyɛ miŋ handu kɔllo o chilaŋ choo. Veelu diomndaŋ lepaa o lepaa o Baabuiyo niŋ, nduyɛ kposoŋ bɛɛ mal piɛileŋ o Chɛhowa lo le. (Pitɛ Tasoo 4:7) Pɛɛku puaapiliaa a ndepiliaa piɛi niŋ Chɛhowa le wɔsila bɔɔbɔɔ wa o ba. Le taamaseliiyo, a veelu diomndaŋ a sɔɔŋ yɔŋnaŋndoŋ okɔɔ. Mɛɛ buŋgɛi hei cho naa yɛ, “Wɔsioŋ Bele Ŋɔmmɛu A Cho Chuunɔɔ Domaa Saa Amakɔɔ,” o Bandu Mɛŋgɛlaa hoo niŋ, Nyaakuɛiyo 15, 2012, pei 18-21. O puuluei niŋ.
17 Wa o tuandaŋ o Chɛhowa piɛiyo niŋ. Tosal acheleŋnda sɔɔŋ kɛndɔŋ, nduyɛ ma nuuviaa teleŋndo le waa a puaapiliaa a ndepiliaa numnda latulu. Hei cho tosa ma wa a kɔl kɛndɛ, nduyɛ a cho chɔ maa teleŋndo cho bɔɔ kiltaŋ. (Ɛfisiaŋnda 5:16) Buɛiyaa Chɛhowaa tosa niŋ sɔɔŋ tau o wɔsiŋ kɛmɛ hiou woŋ niŋ. Nduyɛ hau, ŋ cho a tuandaŋ mbo hiau maa paandu. Wali Chɛhowaa kui mbo hiau mɛɛ naŋ wa kɔllɛ. Nyɛ wawoŋ naa cho diondɔɔ wakee!
Teleŋ yilɔɔ kɔl dɛɛniaa, miŋ sɔla tɔnɔɔ o taasi Mɛlɛkaa niŋ (Tofa pɛlta 18, 19)
18, 19. Vɛɛ bɛnduaa mala yɛ naa le Chɛhowa piɛiyo a sɛmbɔɔ? Chɔmndɔ taamaseliiyo.
18 Mi che bɛɛ miŋ tosa biondɔŋndaŋ, kɛ Chɛhowa cho naa chɛlɔɔ miŋ wa ndu piɛiyo. Le naa malaa, mbo yɔŋgu naa puaa a nɔ kelaŋ nda, bɛnduaa kundaa. (Nuawɔ Ɛfisiaŋnda 4:8, 11, 12.) Lelaŋ te bɛnduaa kuɛ num pɛ yilɔɔ, soliŋ teleŋ ŋ sɔla koŋ le waa a nda latulu wo kpeku nyɛkɛndɛi, le ma pɛɛku nyɛ o taasi ndaa niŋ a sila ndaa.
19 Le taamaseliiyo, pɔnɔɔ a lanɔ pilɛ o Iŋgilaŋ niŋ ndaa nɔ bahawɛilaŋ lapum o nɔ ndaa niŋ, nduyɛ ma nyuna bɛnduaa a ŋiɔɔŋ le malaa. Mi lanɔɔ yiyaŋ maa pɔnɔ ndɔ ve chilaŋ chua o Chɛhowa piɛiyo niŋ te. Mi pɔnɔɔ yiyaŋ maa o ve wana pɛɛkaa kɛndɛ le, nduyɛ mbo dimi maa o ve kɛɛsiaa tosa le pɛɛku leyuŋgoo tosaa lɔɔlɔɔ le. Mi bɛnduaa mala pɔnɔɔ a lanɔɔ hoo le ma yiyaŋ a taamasi Chiisoo okɔɔ. Ma dɛɛniaa pɔnɔɔ le mbo tol taamasi Chiisoo kɔɔli a mɛɛ ndoo bii buɛiyaa nduaa yɛ. Ma dɛɛniaa laa ndɔ le mbo biunuŋ pɔnɔ ndɔ. Ma yɔŋgu vɛlɛ kɛɛsiaalaŋ mɛɛ pɔnɔɔ a lanɔɔ hoo looku ma tosa pɛɛku leyuŋgoo a chuauwaa ndaa ŋiɔɔŋnda yɛ. (Ɛfisiaŋnda 5:21-29) Mi pɔnɔɔ tosa wallo kalaŋ le mbo simnuŋ bolle yuŋgu kɛndɛ. Mi bɛnduaa dɛɛniaa ndu maa o wu ŋdial te, nduyɛ maa o hiou lachi a nyina Chɛhowaa tiindaŋndo. Kaalaa a kɛndɛi bɛnduaa chɔmnde mala bɔɔ yuŋgu koŋ!
20. Yɛɛ cho yɛ wa fulamakɔɔlioo te a tosa pɛ mi nyɛ wawoŋ numndo dendu?
20 “Wanaa nɔ haa siooŋii Mɛlɛka Yaawɛɛ ve, ma tosa nyɛ sawala ndɔlaŋ la dimi wo wa, a pɛl tɔnɔɔ.” (Sam 128:1) A cho wa a kɔl kɛndɛ te a tosa pɛ mi nyɛ wawoŋ numndo dendu. Lelaŋ, pɛɛku acheleŋnda a Mɛlɛka okɔɔ, tosa nyɛ o nyɛ ŋ tiuba le ma mala yuŋgu numndo a kundaa le waa o diompilɔɔ niŋ, nduyɛ wa o puɛyaŋ te. Acheleŋnda cho taamasi num kɛndɔɔ chɔ nduyɛ mi nda bɛɛ yeema le Finya naa saŋgalaa, Chɛhowa.—Maatiu 5:16.