1. Sila yɛɛ Pɔɔl, wana Chiisu vem hɔlte ndɔ wo ndoo ke yɛ Kilisiɔŋaa pɔyaŋnda?

MI PƆƆL, wana Chiisu vem hɔlte ndɔ wo yɔŋgu silaa aa, “La hiau lɛ lachi a kaala waŋnda o chieeŋndo hoo niŋ a tosalaŋ te.” (Luomaŋ. 12:​2) O Kilisiɔŋaa wa o wɔsiŋ kɛmɛ tasoŋ niŋnda lo Pɔɔl poonyiaa silaa hoo ni. Le yɛɛ Pɔɔl ndoo yɔŋgu yɛ sila kala kalaa hoo o Kilisiɔŋaa yɔŋguŋ o Mɛlɛka lo, nduyɛ ma sɔla pɔyaa a nyina diandaa wa?—Luomaŋ. 1:​7.

2-3. Vɛɛ Setana kindiŋ yɛ le naa faŋaa Chɛhowa o ibuŋ, nduyɛ yɛɛ ke yɛ naa “kpaayaa” le yiyaŋnda wɔɔŋnda chii niŋ naa luɛiyɔɔ o lakɔltaŋ malɔɔ?

² Pɔɔl ndoo yɔŋgu silaa hoo kanifuule, Kilisiɔŋnda apum wa kɔl kalu iwanachieeyaa a sɔɔŋ ŋdiɔm cho o chieeŋ Setanaa hoo niŋndoŋ tolɔɔ kɔɔli. (Ɛfi. 4:​17-19) Nyɛ pilɛ koŋ nɔla mbo yɔŋnuŋ naa hau. Setana cho mɛlɛka chieeŋ dɛnɛ wɔɔŋndo hoo ni, nduyɛ o yiŋ yauleŋ poŋ le halikpeŋ mbo faŋa naa Chɛhowa o ibuŋ. O cho nɛila yɛ yɛlaŋ soliŋndo kpeku le hei tosaa. Te o chiikuu pɛ maa ŋ nɔ yeemɛi le miŋ sɔla foofo bɛndoo ɔɔ miŋ fula tɔɔ o chieeŋndo hoo niŋ, o soliŋ yeemɛi keŋ kpeku le naa huiyo. Naapum mbo soliŋ pɛŋ kɔɔlima naŋ, naamu naa, ɔɔ dɛnɛ naa sinaa kpeku le miŋ tosa sɔɔŋ mɛɛ o yeema yɛ.

³ Yɛɛ ke yɛ naa “kpaayaa” le yiyaŋnda wɔɔŋnda chii niŋ naa luɛiyɔɔ o lakɔltaŋ malɔɔ? (2 Kɔliŋ. 10:​4) Tofawɔ muli Pɔɔl yɔŋgu wo. Mbo dimi aa, “Nduyɛ, mi ŋ tɛɛmbuu kɔɔsɔla  lachoowala waŋnda kɔɔsa laŋ, nduyɛ, mi ŋ nyumi sɔɔŋ sooluaŋ wanaa yoŋgaa a huŋ le dɛnɛ sinaa kpeekpei cho hoo a Mɛlɛka okɔɔ wo simullo wo. Yiyaŋ o yiyaŋ waŋnda nɔ, laŋ naa ŋ cho tosaa ni le mi la simnuŋ yiyaŋnda la Kiliti yeema nda ma nɔ laŋ.” (2 Kɔliŋ. 10:​5) A tonya, a mala Chɛhowaa, ŋ tiuba miŋ dɔu yiyaŋnda wɔɔŋnda huŋ naa o lakɔltaŋ o mandaa bɛŋgu. Mɛɛ kooma mialaŋ ma chɔulaba dialii nɛyɛi okoŋ mii seŋgu yɛ, lende koni Diom Mɛlɛkaa mala naa ni miŋ chɔulaba yiyaŋnda wɔɔŋnda chieeŋ Setanaa chii niŋ naa luei o lakɔltaŋ.

4. Siŋgaŋnda kuɛɛ naa bɔɔbɔɔ naŋ nɔ yɛ le tosaa mɛɛ naŋ kandu tonya cho o Diom Mɛlɛkaa niŋndo pɛɛkoo?

⁴ Yiyaŋndɔ a siŋgaŋnda num aa nɔ le tosaalaŋ mɛɛ ŋ kandu tonya cho o Diom Mɛlɛkaa niŋndo pɛɛkoo nduyɛ ma kɛɛsiaa le ma piɛi Chɛhowa. Naa bɔɔbɔɔ mal fɛŋ kaala wɔɔŋnda naŋ wa choo laŋ tosaa tuupa miŋ suliŋ le miŋ piɛi Chɛhowa. (1 Kɔliŋ. 6:​9-11) Ŋ cho bɔɔ a kɔl kɛndɛ le mɛɛ Chɛhowa mala naa miŋ mal kaala wɔɔŋndaŋ ndaŋ tosaa yɛ!

5. Sɔɔŋ sala tiɔɔŋ kuɛɛ Luomaŋnda 12:​2 dimullɛ naa le tosaa?

⁵ Kɛ o wa bɛɛ lende, fɛŋ bɛɛ ŋ nɔ miŋ yiyaŋ maa ŋ nɔ lɛ le siŋgaŋnda cheleŋ tosa le le. Mi che bɛɛ ŋ mal fɛŋ kaala wɔɔŋnda naŋ wa paandu choo laŋ tosaa tuupa miŋ yiŋ, kɛ ŋ nɔ miŋ wa yekeŋ nduyɛ miŋ fafaŋ nyɛ o nyɛ tosa miŋ luei vɛlɛ balaŋ o kaalaŋ ndaŋ niŋ. Vɛɛ naŋ tosa yɛ keŋ? Mi Pɔɔl muli aa, “La hiau lɛ lachi a kaala waŋnda o chieeŋndo hoo niŋ a tosalaŋ te. La ke Mɛlɛka fondaa mbo maŋgala nya.” (Luomaŋ. 12:​2) Mɛɛ, sɔɔŋ ŋmuuŋ naŋ nɔ le tosaa ni. I tasei, ŋ nɔ lɛ miŋ hiou “lachi a kaala waŋnda o chieeŋndo hoo niŋ a tosalaŋ te,” ɔɔ miŋ tol yiyaŋ chieeŋndo hoo kɔɔli le. I diiŋ nduɛi, ŋ nɔ miŋ “ke Mɛlɛka fondaa mbo maŋgala” naa. Koŋ cho ni, yiyaŋnda naalaŋ kpou handɔɔ o sɔɔŋ Mɛlɛkaŋ choo, kɛ o cho o sɔɔŋ chieeŋndoŋ choo le.

6. Yɛɛ naŋ pɛɛku yɛ o nyɛ Chiisu dimi o Maatiu 12:​43-45 wo niŋ?

 ⁶ Mɛɛ Pɔɔl dimi maa la ke Mɛlɛka fondaa mbo maŋgala nya, o cho kɔɔle naaleŋ te ndoo yiyaŋ te, kɛ kɔl naa. Siŋgaŋnda naŋ tosalaŋ la nɔ mi la piiliaŋ nyɛ o nyɛ naŋ tosa o yoomu naa niŋ. (Tofa kɔfoo hoo, “ A Maŋgalaŋ pa Kpeekpei ɔɔ Chɔmndo ko Ŋ Cho o Lahɔl ni Maa A Maŋgalaŋ?”) Ŋ nɔ miŋ tosa siŋgaŋndaŋ o kaala naalaŋ niŋ, o yiyaŋnda naalaŋ niŋ a o yeemaŋ naŋ niŋ. Lelaŋ, naa kpou nɔ miŋ nyunaŋ aa, ‘Baa chɔmndo koni ya cho ni maa I cho siŋgaŋndaŋ tosaa le mi simnuŋ Kilisiɔŋnɔ tonyaa, ɔɔ o kɔllo niŋ dika la chɛŋ ni?’ I cho bɔɔ suɛi sɔvɛ le teŋgeŋndo sinaa siŋgaŋ le kɔɔ wo tɛɛŋ a siŋgaŋ chɛŋ o kɔllo niŋndo. Mi Chiisu chɔm nyɛ naŋ nɔ miŋ tosa wo o Maatiu 12:​43-45 niŋ. (Nuawɔ.) Suɛi sɔvɛ naŋ pɛɛku o bolle Baabuileŋ niŋndo cho ni maa, o cho letuu le yiyaŋnda wɔɔŋndaŋ siŋgaa le. Te ŋ siŋga laŋ pɛ, ŋ nɔ miŋ wa niko yiyaŋndo o sɔɔŋ Mɛlɛka yeema woŋ choo.

7. Vɛɛ naŋ siŋga yɛ yiyaŋnda naalaŋ ɔɔ nyɛ cho naa o lakɔllo?

⁷ Baa ŋ nɔla pa kpeekpei miŋ siŋga yiyaŋnda naalaŋ ɔɔ nyɛ cho naa o lakɔllo? Diom Mɛlɛkaa muli aa, “La hiou lachi a simnɔŋndo a sɛnɛi yuka o yiyaŋnda nyalaŋ niŋ. O koŋ kɔɔli, la nɔ mi la wounuŋ wana chieeyɛi sɛnɛi Mɛlɛka toosiaa hei le waa maa ndu pila ve. O koŋ, mi la wa o nɛi tonyaa choo, koŋ cho ni, mi la simnuŋ wanaa cho sakpo, nduyɛ, mi la wa a yɔŋgaŋ o Mɛlɛka lo.” (Ɛfi. 4:​23, 24, NW) A tonya, ŋ nɔla miŋ siŋga yiyaŋnda naalaŋ kɛ o cho suɛi bɛɛŋ le hei tosaa le. O cho ko yeemaŋ wɔɔŋndoŋ vɛlɛ a kaala wɔɔŋndaŋ te naŋ nɔ miŋ chɔulaba le, kɛ ŋ nɔ miŋ simnuŋ “a sɛnɛi yuka o yiyaŋnda” naalaŋ niŋ. Koŋ cho ni, ŋ nɔ miŋ siŋga yeemaŋ naŋ, kaala naalaŋ, vɛlɛ a mɛɛ naŋ tosa sɔɔŋ yɛ. Hei chɔm maa ŋ nɔ miŋ wa hiouwɔɔ lachi a siŋgaŋndaŋ tosaa.

8-9. Vɛɛ nyɛ yɔŋnuŋ puaapilɛnɔ pilɛ wo chɔm yɛ maa i cho suɛi sɔvɛ le siŋgaŋndo tosaa o kɔllo niŋ dika?

⁸ Ŋ yaasiaŋndɔ taamaselii puaapilɛnɔ pilɛ o ndoo nɔ kɔl tuu bɛndoo wo. Mɛɛ o mal kɔl tuuwo vɛlɛ a muɛiyaŋ kolɔɔ bɛndoo, mbo suliŋ le yiŋɔɔ. Mi siŋgaŋ o tosa hoo wo timbi seile kɛndɛleŋ o tanda ndɔɔ niŋ. Teleŋ biŋgi hiouwɔɔ o yiŋɔɔ ndɔɔ kɔɔli, mi simul o ve kɔl te wo komal ndu ichɔl pilɛ. Mi po kolaa pilɛ huŋ o ndu lo bɛɛ le ma chɔulaba. Mi puaapilɛnɔɔ kɛɛ le ndu chɔulabaa. Kɛ mɛɛ po koŋ dimi sɔɔŋ wɔɔŋndoŋ a Chɛhowa okɔɔ, mi puaapilɛnɔɔ tuulu kɔl, nduyɛ, mbo kɔ lɔɔ po koŋ. Le yɛɛ o tosa yɛ keŋ? Mi nyɛ o pɛɛku o Baabuiyo niŋndo mala ndu mbo chɔulaba kɔl ndɔ tuuwo, kɛ ndoo simnuŋ ndɔ o sɛnɛi yuka o yiyaŋnda ndɔlaŋ niŋ te. O kpeekpei niŋ, ndoo siŋga wɔ yiyaŋ ndɔɔ le.

⁹ Kɛ puaapilɛnɔɔ hoo vi ŋdial te. (Pulɔ. 24:​16) A mala o sɔla bɛnduaa kundaa o ba wo, mbo chɔɔlu hiouwɔɔ lachioo tosa. Nduyɛ o mɛɛlulaŋ, mbo simnuŋ bɛndu kundaa. Kɛ ichɔl pilɛ, mi simul suu komal ndu paandu wo komal ndu vɛlɛ. Faŋaŋndo dɔɔ o Toŋgo leMasaa hɔlndɔ, mi po kolaa pilɛ huŋ le bɛndu kunda cheleŋ lɔɔ. Yɛɛ puaapilɛnɔɔ hoo tosa yɛ? Mbo tiu kɔl ndɔɔ ba, nduyɛ o nɛi tusiaŋ niŋ, mbo suaa o po kolaa koŋ ndo a lebɛɛ. Mi po koŋ pɔlul kɔl nduyɛ mi puaapilɛnɔɔ hoo mala ndu le mbo kuɛ o ndu lo bɛɛ. Le yɛɛ puaapilɛnɔ naa bii yɛ niŋ simul komal ndu hoo wo o nɛiyo hoo choo? Kanifuule, puaapilɛnɔ naa hoo ndoo simnuŋ niŋ o sɛnɛi yuka o yiyaŋ ndɔɔ niŋ. O kɔl ndɔɔ niŋ dika ndoo tosa niŋ siŋgaŋndo ni. Mbo simnuŋ wana kɔl nyulu, wana tusiaŋ, nduyɛ mi keŋ chuu Chɛhowa saŋgalaa.

10. Yɛɛ yeemaŋ yɛ le siŋgaŋndaŋ tosaa o kɔllo niŋ dika?

¹⁰ Siŋgaŋndaŋ ndaŋ la yɔŋnuŋ o nyumma pilɛ niŋ te, nduyɛ la yɔŋnuŋ vɛlɛ a bandɔ le. Mɛɛ miŋ ‘kindiŋ kpoke’ nduyɛ miŋ wou sɛmbɔɔ le wɔsiŋ bɔɔbɔɔ. (2 Pitɛ 1:​5) O cho le mɛɛ naŋ cho niŋ o “tonyaa” niŋ le wɔsiŋ bɔɔbɔɔ yɛ le siŋgaŋndaŋ ndaŋ la yɔŋnuŋ vɛlɛ le. Ŋ nɔ miŋ tosa  wallo kalaŋ le yiyaŋnda naalaŋ siŋgaa o kɔllo niŋ dika. Sɔɔŋ ŋpum cho ŋ mala naa le siŋgaŋndaŋ tosaa wo. Ŋ yaasiaŋndɔ muŋ ŋtiŋ.

11. Vɛɛ piɛileŋ le mala yɛ naa miŋ siŋga yiyaŋnda naalaŋ?

¹¹ Nyɛ tase mala naa wo cho piɛileŋ ni. Ŋ nɔ miŋ wa piɛileŋ mɛɛ wana ŋchondoo bɛɛ piɛi yɛ aa, “Dɔu yiyaŋnda kɛndɛlaŋ o kɔl nuu niŋ Mɛlɛka, nduyɛ ma tosa ya mi wa wana diom tuɛiyaa.” (Sam 51:​10) Ŋ nɔ fɛŋ miŋ chɛl maa ŋ nɔ miŋ tosa siŋgaŋndaŋ o yiyaŋnda naalaŋ niŋ, nduyɛ miŋ nyuna Chɛhowa le mbo mala naa. Le yɛɛ naŋ nɔ yɛ tiindaŋndo maa Chɛhowa cho naa mala miŋ tosa siŋgaŋndaŋ? Nyɛ Chɛhowa ndoo dimul Isɔluɛiyaa nila kaluaa o palɛi Isikiaa ve niŋndo tiuba mbo ke naa kɔl dɛɛniaa. Mbo dimul nda aa, “I cho nya . . . ke . . . kɔlta tusiaŋndaŋ, a yiyaŋnda sɛnɛilaŋ, nduyɛ mi tosa mi la nɔ kɔlta tuɛiyaa isɔɔ laŋ.” (Isi. 11:​19) Chɛhowa ndoo nɔ yeemɛi le Isɔluɛiya haa malaa le mi ndaa siŋgaŋ, nduyɛ o nɔ vɛlɛ yeemɛi le naa malaa.

12-13. (a) A mɛɛ Sam 119:​59 dimi yɛ, o yɛɛ choo naŋ nɔ yɛ miŋ yiyaŋ? (b) Nyunala kuɛɛ ŋ nɔ yɛ ma nyunaŋ?

¹² Yiyaŋndo o nyɛ naŋ pɛɛku wo choo cho nyɛ diiŋ ndɔ mala naa wo ni. Te ŋ wa pɛ Diom Mɛlɛkaa pɛɛkoo lepaa o lepaa, o bɛnda miŋ chua teleŋndo le yiyaŋndo o nyɛ naŋ pɛɛku wo choo. Hei mala naa le sinaa siŋgaŋnda naŋ nɔ miŋ tosa o yoomu naa niŋndo. (Nuawɔ Sam 119:​59; Hibu. 4:​12; Chemi. 1:​25) Ŋ nɔ miŋ yaasiaa kɔl naa le sinaa te ŋ nɔ yeemɛi le kɔl kalu chieeŋndo hoo tolɔɔ kɔɔli. Ŋ nɔ vɛlɛ miŋ kindiŋ le sinaa dialuŋ naŋ vilɛiyoŋ, nduyɛ miŋ tosa wallo kalaŋ le muŋ malɔɔ.

¹³ Le taamaseliiyo, nyunaŋndɔ aa, ‘Baa kaa yɛletulaa ɔɔ kaa paŋalɛiyo cho ya pa o kɔl?’ (1 Pitɛ 2:​1) ‘Baa kaa heelaŋndo cho ya pa o kɔl le kɔɔlima niaŋ, dɛnɛ ni sinaa, ɔɔ le mɛɛ ya nɔ kanioŋ tau yɛ?’ (Pulɔ. 16:​5) ‘Baa I cho pa acheleŋnda chuaa chɔdɔ le mɛɛ nda nɔ nyɛm ya nɔ woŋ te yɛ, ɔɔ le mɛɛ nda cho kaale cheleŋ yɛ?’ (Chemi. 2:​2-4) ‘Baa yeemɛi cho ya tau le nyɛm cho o chieeŋ Setanaa hoo niŋndoŋ sɔlaa?’ (1 Chɔŋ 2:​15-17) ‘Baa mi nua pa ɔɔ mi yaŋ pa nilaŋ o yelelaŋnda nɔ kaala nɔɔlɛilaŋ vɛlɛ a sɔŋgɔlaŋ ndaŋ?’ (Sam 97:​10; 101:​3; Emɔɔ. 5:​15) Mulila numndaŋ le nyunalaŋ ndaŋ la cho num mala ma che nyɛ ŋ nɔ ma tosa wallo choo wo. Te ŋ tiu pɛ ba le yiyaŋnda wɔɔŋnda cho naa o lakɔltaŋ siŋgaa, mɛɛ ŋ cho Finya naa cho o choo choo niŋndo kɔllo nɛŋi.—Sam 19:​14.

14. Le yɛɛ i cho yɛ suɛi sɔvɛ le chaŋyaŋ kɛndɔŋ hɛlioo?

¹⁴ Chaŋyaŋ kɛndɔŋ hɛlioo cho vɛlɛ nyɛ yaa ndɔ mala naa wo ni. Ŋ nɔ miŋ kɛsiŋ o kɔl maa mi wanaa naŋ tosa chaŋyɛi ya siŋga kaa naa. (Pulɔ. 13:​20) Nduyɛ, wanaa mala naa le hɛnaŋ Mɛlɛkaa tosa le wa cho naa a balaa silɔ naa naŋ tosa wallo wa ɔɔ o sukuu. Kɛ ŋ nɔla miŋ saaluŋ chaŋyaŋ kɛndɔŋ o bɔŋaŋnda naala leKilisiɔŋndaŋ. O bɔŋaŋndaŋ ndaŋ naŋ sɔla kɔl dɛɛniaa ni “le waŋnda kaalaa a sɔɔŋ kɛndɔŋ tosaa.”—Hibu. 10:​24, 25.

15-16. Vɛɛ Setana kindiŋ yɛ le yiyaŋ naa siŋgaa?

¹⁵ Loonuŋ maa, Setana yiinuŋ yauleŋ poŋ le yiyaŋ naa siŋgaa. O cho nɛila yɛ yɛlaŋ soliŋndo kpeku le mbo siŋga yiyaŋ naa a tonya naŋ pɛɛku o Diom Mɛlɛkaa niŋndo okɔɔ.

¹⁶ Le batiuwaa sɔlaa, Setana cho hiouwɔɔ lachi a nyuna pilɛ kpe ndoo nyuna Ifi o kpeloo niŋ Idɛŋndo soliŋndo kpeku. Ndu cho ni, “Baa Mɛlɛka dimi ma dimiaa aa . . . ?” (Chɛ. 3:​1) O chieeŋ cho hoo Setana o ba bɛŋgu wo niŋ, lepum mi waŋnda nyuna naa le naa kiisaŋndo lueiyo o kɔl a laalaŋnda naalaŋ. Ma nyuna aa, ‘Baa Mɛlɛka dimi ma dimiaa maa poo a poo ɔɔ chuaa a chuaa nɔ kposoŋ ma chal o nɔɔ niŋ te? Baa Mɛlɛka dimi ma dimiaa maa a nɔ ma biilu paale vialaŋnde Chiisuleŋ vɛlɛ a palɛi vialaŋii  cheleŋ kposoŋ te? Baa Mɛlɛka numndo dimi ma dimiaa maa a nɔ ma chɛl ma hivi num koowaŋ o ŋdial kposoŋ te? Baa Mɛlɛka nɔ kaalaa wo dimi ma dimiaa maa le mɛɛ wana ŋ kaala wo sɔla solioo o kundaa niŋ yɛ, a nɔ ma holnuŋ ndu kposoŋ te?’

17. Yɛɛ naŋ nɔ yɛ miŋ tosa te waŋnda nyuna naa pɛ nyunala tosa miŋ kiisaŋ a laalaŋnda naalaŋndo, nduyɛ a mɛɛ Kolosiaŋnda 2:​7 dimi yɛ, yɛɛ wa yɛ fulamakɔɔlioo?

¹⁷ Ŋ nɔ miŋ nɔ tiindaŋndo o kala poŋ o laalaŋnda naalaŋ niŋ. Te ŋ nuuviaa mulilaŋ le nyunala sɔvɛlaŋ lapum naa o lakɔl le laalaŋnda naalaŋ te, mɛɛ kiisaŋndo cho naa kandɔɔ luɛiyɔɔ o lakɔl. Mi kiisaŋ waa naa siŋga yiyaŋ naa, nduyɛ mbo yɔŋyɔla vɛlɛ tiindaŋ naa. Yɛɛ naŋ nɔ yɛ niko miŋ tosa? Diom Mɛlɛkaa dimul naa le miŋ maŋgala yiyaŋnda naalaŋ. Te ŋ tosa hei pɛ, ŋ cho sina ‘nyɛ Mɛlɛka hɛnaŋ ndo, . . . miŋ sina suɛi cho suɛi kɛndɛi . . . le tosaa ve. O koŋ kɔɔli, miŋ sina suɛi nɛŋi ndu kɔl le, nduyɛ miŋ sina nyɛ cho sanaa le tosaa wo.’ (Luomaŋ. 12:​2) Te ŋ wa pɛ Diom Mɛlɛkaa pɛɛkoo lɔɔlɔɔ, ŋ nɔla miŋ hiou lachi a tonya cho o Baabuiyo niŋndo sinaa. Okoŋ miŋ nɔ tiindaŋndo o kala poŋ maa sawala Chɛhowalaŋ la naŋ bɔɔ. Te ŋ tosa lende pɛ, mɛɛ ŋ cho hiouwɔɔ “lachi a waa a dialuŋ kala o tiindaŋ” naa niŋ mɛɛ puunduŋ yɔmndo ŋ luɛi naa lɛŋ dika yɛ.—Nuawɔ Kolosiaŋnda 2:​7.

18. Yɛɛ mala yɛ naa le yiyaŋnda chieeŋ Setanaa chuu naa laŋ chɔulabaa?

¹⁸ Naapila nɔ ni miŋ dɔu sɛmbɔɔ le tiindaŋ naa kindioo, o cho wana cheleŋ te. Lelaŋ, hiou lachi a simnɔŋndo o sɛnɛi yuka o yiyaŋnda numndaŋ niŋ. Wa piɛileŋ lɔɔlɔɔ, nduyɛ ma nyuna Chɛhowa le mbo mala num. Wa yiyaŋndo yiŋgoloŋ o nyɛ ŋ cho pɛɛku wo choo, nduyɛ ma hiou lachi a yaasiaa yeemaŋ cho num o kɔl loŋ. Nuuviaa chaŋyaŋ kɛndɔŋ, nduyɛ ma holnuŋ wanaa mala num le ma maŋgala yiyaŋnda wɔɔŋndaŋ nda. Te a tosa hei pɛ, a cho batiuwaa sɔla le yiyaŋnda wɔɔŋnda chieeŋ Setanaa chuu naa laŋ chɔulabaa. Nduyɛ ma fafaŋ yiyaŋ wanaa “yoŋgaa a huŋ le dɛnɛ sinaa kpeekpei cho hoo a Mɛlɛka okɔɔ wo simullo wo.”—2 Kɔliŋ. 10:​5.