NAA kpou sina maa Chɛhowa cho hau wanaa nduaa nɛi chɔmaa kioo ni. Nduyɛ, o cho nda vɛlɛ kioo nyɛm mala nda ma hiou lachi a ndu piɛiyo woŋ o “palɛi mɛɛlɛi” hei niŋ. (2 Timo. 3:​1) Lelaŋ, o lo niko a naapila le Chɛhowa diikɔŋndo. Ŋ tuu teleŋ naa hoo a teleŋ Isɔluɛiya wa o pollo niŋndo. Ndaa nɔ ma yaŋ nilaŋ o putɛnɛila ndaa hɔŋ ndaŋ nduyɛ ma tol nɛi chɔmaa Chɛhowaa kɔɔli.

Mi Chɛhowa dimul Muuse maa o chua kanii humbuei mbo toosiaa putɛnɛilaŋ latiɔɔŋ. Putɛnɛilaŋ ndaŋ la wa le Isɔluɛiya “chuuŋgiaa naa pilɛ ni, nduyɛ a le nda dimullo le ma puusiaa dɔɔŋgɔɔ ma hiou lachi a kɔlaŋ.” (Nɔm. 10:​2) Wanaa soliaa lasalaa ndaa nɔ ma hɔŋ putɛnɛilaŋ ndaŋ o nɛila yɛ yɛlaŋ niŋ le mi waŋnda sina nyɛ nda nɔ ma tosa wo. (Nɔm. 10:​3-8) Wanaa Mɛlɛkaa bɛɛ cho hau nɛi chɔmaa sɔlaa o nɛila yɛ yɛlaŋ niŋ. Ŋ cho isɔɔ a nɛilaŋ ndaŋ layaa okɔɔ okoŋ, miŋ tuu laŋ a mɛɛ ndaa hɔŋ sindɛ putɛnɛilaŋ yɛ. O tasoo, mi Chɛhowa veelu wanaa nduaa kpou o bɔŋaŋndaŋ. O diiŋ ndɔɔ, mbo veelu wanaa cho chilaŋ chuaa wa le nda pɛɛkoo. Nduyɛ o yaa ndɔɔ, mbo tosa siŋgaŋndaŋ o kɔɔna ndɔɔ niŋ teleŋndaŋ lapum.

Te Chɛhowa ndoo yeema pɛ mi “waŋnda Isɔluɛi kpou” ndaa chuuŋgiaŋ o tɛndii Mɛlɛkaa, wanaa soliaa lasalaa ndaa nɔ ma hɔŋ putɛnɛilaŋ latiɔɔŋ diompilɛ. (Nɔm. 10:​3) Isɔluɛiya kpou ndaa nɔla ma tuei putɛnɛilaŋ ndaŋ kanifuule, o dɔɔŋgɔɔ tɛɛŋ tɛndii Mɛlɛkaa wa ni. Lelaŋ, wanaa wa dɔɔ o tɛndii Mɛlɛkaa ikɛi ya fɛŋ ndaa fuuluu. Naapum mi teleŋndo ndoo hiou fɛŋ tiŋ tuupa mi wanaa wa levil la ndaa fuuluu kanifuule, ndaa nɔ ma buli tiŋndo. O yɔŋ bɛɛ mi ndaa wa levil ɔɔ kpɛɛluŋ, Chɛhowa ndoo yeema nda kpou ma chuuŋgiaŋ le ma yaŋ nilaŋ o silala ndɔlaŋ.

O cho o tɛndii Mɛlɛkaa le naŋ chuuŋgiaŋ hau le, kɛ Chɛhowa cho wɔ wanaa nduaa veeloo o bɔŋaŋndaŋ. Bɔŋaŋndaŋ ndaŋ la tiŋ la cho bɔŋaŋnda bɛndaŋ a bɔŋaŋnda teŋgeŋndaŋ lapum ni. O bɔŋaŋndaŋ naŋ sɔla silala sɔvɛlaŋ a nɛi chɔmaa ni. Chieeŋndo balɔɔ silɔ, nyɛpilɔɔ kpe wanaa Chɛhowaa pɛɛku o bɔŋaŋ kɛ kɛ ni. Lelaŋ, mi wanaa chɛl le kɔlaŋ nda tuei chaŋyɛi kpɛɛluŋnde yeela a puaapiliaa ndaa. Mi waŋnda apum buli tiŋndo tau le kɔlaŋ o bɔŋaŋndo. Kɛ a koŋ kpou, waŋnda haa nɔla ma dimi maa tɔnɔ nda sɔla o bɔŋaŋndo wo hiau a tiŋ nda buli wo.

Baa mi kundala cho yololɛ nduyɛ mi la wa landaŋ a fonda bɔŋaŋndo laŋ la sɔla pa tɔnɔɔ? Ŋ naŋ bɔɔ kɔl le mɛɛ nyɛm mapuuloŋ cho hau yɛ. Mi puaapiliaa haa kue bɛɛ naa bɔŋaŋndaŋ lapum la wa biinɔŋndo wa le, a nɔla ma tuei nduyɛ ma che vɛlɛ nyɛ wa yɔŋnɔŋndo wo o teleŋ pilɔɔ bɛŋgu. Le taamaseliiyo, mi hɔlte fondaŋ lebollo kua yilɔɔ o lɛuve Bɛnii teleŋ pilɛ. Mi lɛuve soliŋ nyɛm mapuuloŋ kpeku le mi puaapiliaa cho Alit wa sɔla tɔnɔɔ o bɔŋaŋ nda bii wo niŋ. O lɛŋnde Naichaleŋ niŋ chioo hoo cho ni, naa nda tuau nyɔɔŋ lɛŋ o yondo pollo opum ikɛiya. Puaapiliaa a ndepiliaa bidiiŋ a pilɛ chuuŋgiaŋ ni a wanaa ndaa pɛɛkaa le bɔŋaŋndo hoo biyɔɔ. Mi che bɛɛ a wa levil a naa bɔŋaŋndo wa biinɔŋndo wa, kɛ ma sinaŋ maa  a wa diompilɛ a ŋwaŋ 44,131 wa o bɔŋaŋndo hoo wa. Mi puaapilɛnɔ pilɛ poonyial lɛuve yauwo aa: “La nuwali tau le mɛɛ nya tosa miŋ bii bɔŋaŋndo hoo diompilɛ a nya yɛ. La chɔm naa vɛlɛ kɛsɛ maa la kaala naa bɔɔ.”

Te wanaa soliaa lasalaa ndaa hɔŋ pɛ putɛnɛiyo opilɛ, mɛɛ “waŋ bɛnduaa [wa] bolii layuŋguei ya” koni ndaa nɔ ni ma chuuŋgiaŋ o tɛndii Mɛlɛkaa. (Nɔm. 10:​4) Te ndaa kuɛ pɛ, Muuse ke nda nɛi chɔmaa Mɛlɛkaa nduyɛ mbo pɛɛku nda. Keŋ ndii mala nda ni ma tosa wali ndaa nyɛkɛndɛi o yuŋgula ndalaŋ niŋ. Te num oo wa pɛ o teleŋ koŋ niŋ maa wa o waŋ bɛnduaa kaŋ tɛɛŋ, a wa pa lo kɔɔli le kɔlaŋ pɛɛkoo sɔlaa?

Bɛnduaa kundaa cho hau “waŋ bɛnduaa” le nduyɛ, a nɔ ma kindila wanaa Mɛlɛka ke nda le mandaa wa le. (1 Pitɛ 5:​1-3) Kɛ a nɔ ma kɛsi nda hɔlteŋ choo nduyɛ ma tosa wali ndaa nyɛkɛndɛi. Lelaŋ, te a veelu nda pɛ le kɔlaŋ pɛɛkoo sɔlaa, mɛɛ o Sukuu Bɛnduaa cho naa yɛ, a nɔ ma lo kɔɔli le. O sukuuwo hoo bɛnduaa pɛɛku ni mɛɛ nda nɔ ma tosa wali ndaa nyɛkɛndɛi o kundaa niŋ yɛ. Mi pɛɛkoo hoo tosa mi bɛnduaa a wanaa cho o kundaa niŋnda tosa hiouwɔɔ lachioo o Mɛlɛka piɛiyo niŋ. O yɔŋ bɛɛ maa a kue wɔ o sukuuwo hoo le, a cho niŋ dɔɔ tɔnɔɔ sɔlaa wanaa kuɛ niŋ nda o ba.

Mi wanaa soliaa lasalaa ndaa hɔŋ putɛnɛilaŋ le pilɛŋ pilɛŋ te Chɛhowa ndoo yeema pɛ mi Isɔluɛiya kpou ndaa puusiaa dɔɔŋgɔɔ. (Nɔm. 10:​5, 6) Te ndaa puusiaa dɔɔŋgɔɔ pɛ, mi nyɔɔ ndoo hɛnaŋ wana tau le nda chɔɔ kɔlaŋ a kɔɔnaa a yuŋgula ndalaŋ. Kɛ wallo pila ndoo yeemaŋ nda o ba ni le dɔɔŋgɔɔ puusiaa. Le hei, mi apum ndaa bumbulaŋ dɔɔ le faŋaŋndo o fondaa opum. Le yɛɛ?

Kɛlɛŋgaa mi ndaa yiyaŋ maa a cho bɔɔ putɛnɛilaŋ hɔŋndo chuɛi chuɛi le dɔɔŋgɔɔ puusiaa ɔɔ maa a toosiaŋ le lakɔ le. “Teleŋndaŋ lapum le nyumndaŋ ma pilɛ koni yumbu [yumboo] ndu oo wa o tɛndiiyo choo ni.” Lepum yɛ, mi ndoo chii “palɛi iŋiiŋ . . . paŋgii pilɛ kɛlɛŋgaa mbo hiou lende.” Nduyɛ te ndoo faŋaŋ dɔɔ pɛ o tɛndii Mɛlɛkaa choo, mɛɛ Isɔluɛiya ndaa nɔ ma bii nɛiyo. (Nɔm. 9:​21, 22) Vɛɛ kpɛ Isɔluɛiya ndaa puusiaa yɛ dɔɔŋgɔ laŋ o kɔla ndalaŋ niŋ? A mɛɛ Nɔmbaa bolle 33 dimi yɛ, fondala nda kelu dɔɔŋgɔɔ laŋ laa wa le 40.

Kɛlɛŋgaa mi ndaa kelu dɔɔŋgɔɔ lepum o fondaŋ ma wundu kɛndɛ kɛndɔɔ. Mi nyɔɔ ndoo hɛnaŋ nda dɔɔ a fondaŋ waa lende kanifuule, o “lɛŋnde polte wɔɔŋnde bɛnduleŋ niŋ” nda wa kɔlaŋ ni. (Ditɔnɔ. 1:​19) Le hei, ndii wa tɛtɛlɛ le ma yiyaŋ maa te a faŋaŋ pɛ o fonda ma wundu koŋ, i cho wa ikala le ma sɔla vɛlɛ naa kɛndiaa waa lende.

Te putɛnɛilaŋ laa soo pɛ le pilɛŋ pilɛŋ, o cho nda kpou le ndaa nɔ ma kandu kɔlaŋ o foofo le. Kɛlɛŋgaa mi apum ndaa che ndi ikala le chumndo kanifuule, ndaa nɔ ma kuɛ a yuŋgulaŋ. Te wanaa soliaa lasalaa ndaa hɔŋ pɛ putɛnɛilaŋ le pilɛŋ pilɛŋ o tasela ndɔ, yuŋgula wa ba paaleŋ le chaŋndo laŋ laa nɔ ni mi la kandu kɔlaŋ. Laŋ la wa yɛ yuŋgu Chuda wo, Isaaka, a o Sɛbulɔŋ ndo ni. (Nɔm. 2:​3-7; 10:​5, 6) Te ndaa hɔŋ pɛ hɔŋɔɔ diiŋ ndɔɔ, yuŋgula yaa la wa kpeŋgii batouwo laŋ laa tol nda kɔɔli. Wanaa soliaa lasalaa ndaa lo hɔŋndo lende haaa mi nda kpou chuu lakɔ.

Naapum a tambu niŋ kɔl paandu mɛɛ siŋgaŋndaŋ lapum la yɔŋnuŋ o kɔɔna Chɛhowaa niŋ. Ɔɔ ma yiyaŋ dɔɔ lepum maa siŋgaŋndaŋ la cho niŋ bɔɔ kɔlaŋ a yɔŋnɔŋndo. Ɔɔ naapum num aa hɛnaŋ bɔɔ a mɛɛ sɔɔŋ wa paandu yɛ nduyɛ, num aa yeema miŋ siŋgaŋ te. Kɛlɛŋgaa ma cha ndi dɔɔ ikala le biuwɔŋndo mɛɛ siŋgaŋndo yɔŋnuŋ o lepilɛ niŋ kpe. Nduyɛ, naapum i ve suɛi bɛɛŋ le yɛlɛmiaalaŋ tosaa le. Kɛ mɛɛ mɛɛ la wa, te ŋ tosa pɛ yɛlɛmiaalaŋ a kɔl naa kpou le siŋgaŋnda komal naalaŋ, Chɛhowa nɔla mbo dɔu naa sala. Nduyɛ, miŋ mɛɛlu vɛlɛ sina maa siŋgaŋ kalaa bɛnda bɔɔ.

O teleŋ Muuse wo niŋ, mi Chɛhowa manda waŋnda o miiliɔŋndaŋ niŋ le ma keeku yɛlɛkɛlɛɛ o yondo pollo niŋ. Waŋpiaanduaa wa o waŋnda haa tɛɛŋ, waŋlaanduaa vɛlɛ a chuaambuaa. Te Chɛhowa ndoo ke nda nɛi chɔmaa le, nda kpou ve fula leniŋ te. Chɛhowa cho naa hau mandaa o palɛi mɛɛlɛi dɛnɛ wɔɔŋnde hei niŋ. O cho naa kioo nyɛm mala naa miŋ sɔɔŋguu ndu ikɛi nduyɛ mi tiindaŋ naa wa o kala poŋ ndo. Lelaŋ, maa naa kpou kɛɛsiaŋ o kɔl le ndu diikɔŋndo mɛɛ Isɔluɛiya ndaa diikuŋ ndu sindɛ yɛ te ndaa tuei pɛ putɛnɛilaŋ!