LE WƆSIŊ bɔɔbɔɔ, mi Isɔluɛiya ndaa yɔŋgu nyɛsɔlaa le piɛile tonyaleŋ tooloo. Kɛ o palɛi Chiisu ve niŋ, Chuuwa ndaa nɔ ma yɔŋgu paawala bɔɔbɔɔ. Le hei, yoomoo wa o kala kpoke le nda.

Iwɔsi o wɔsi, puaa Chuuwa kpou ndaa nɔ ma yɔŋgu nyɛsɔlaa mɛɛ i wa i chɛlaŋ waŋ bɛnduaa tɛɛŋ yɛ, le chiɛi Mɛlɛkaa a le piɛile tonyaleŋ tooloo. O wɔsiŋ kɛmɛ tasoŋ niŋ, mi ndaa soliŋ nyɛsɔlaa hoo kpeku le salalaŋ solioo a maaŋ Hɛlɔɔ ndoo taŋgullo bɛɛndiaa. Mi Chuuwa apum nyuna Pitɛ le sinaa nyɛ Chiisu ndoo yiyaŋ a suɛi keŋ okɔɔ wo. Nduyɛ mi Chiisu dimi maa, o cho suɛi wɔɔŋ le paawaa malɔɔ le. Nduyɛ pɛŋ, mbo ke Pitɛ nɛi chɔmaa le halikpeŋ mbo sɔla nyɛsɔlaa okoŋ mbo mal paawaa le nda.—Maa. 17:​24-27.

O sindɔɔ niŋ, wanaa Mɛlɛkaa ndaa nɔ ma yɔŋgu kela leboltaŋ. Laŋ la cho ni, nyɛ o nyɛ ndaa sɔla pɛ, o tɔ o tɔ choo, ndaa nɔ ma faŋa opilɛ. (Lɛvi. 27:​30-32; Nɔm. 18:​26-28) Mi simlachiaa lepiɛiya baŋ Chuuwa le tɔlɔɔla ndala kɛ kɛ faŋaa lechoo le kelaŋ ndaŋ yɔŋgoo, mɛɛ ‘miŋti, diil a kiumiŋ’ cho naa yɛ. Chiisu ndoo pɛɛsa kelaŋ ndaŋ te, kɛ mbo dimi maa Falisiiya cho wanaa sondo yeelɛi kanifuule, ndaa handu kɔllo o kelaŋ ndaŋ biyɔɔ choo mbo hiau sɔɔŋ sɔviɔŋ.—Maa. 23:​23.

A teleŋ koŋ, Luomaŋnda ndaa nɔ Chuuwa kpaayaa choo ni. Le hei, mi ndaa nyuna Chuuwa le paawala bɔɔbɔɔ malɔɔ. Le taamaseliiyo, wanaa ndaa nɔ lɛŋnde wa ndaa nɔ ma paawa nyɛsɔlaa ɔɔ nyɛm cheleŋ le lɛŋii ndɛi. Te ndaa tɔl pɛ o lɛŋii ndɛi choo ma kendi tɔlɔɔ koŋ, o o hiɔɔlu o hiɔɔlu choo ɔɔ o o ŋuɛɛnu o ŋuɛɛnu choo, ndaa nɔ ma faŋa opilɛ le paawaa malɔɔ. O faŋaŋ okoŋ kɔɔli, Chuuwa ndaa nɔ vɛlɛ ma mal paawaa masa bɛndoo o ba. A paawaa hoo okɔɔ Falisiiya ndaa nyuna Chiisu ni. Nduyɛ mɛɛ nda nyuna ndu, mbo mulul nda aa: “La paawa masa bɛndoo nyɛm cho le ndu woŋ, nduyɛ, mi la paawa Mɛlɛka nyɛm cho le Mɛlɛka woŋ.”—Maa. 22:​15-22.

Te wanaa leyulaa ndaa wa vɛlɛ pɛ kɔlaŋ yulaleŋ tosaa o chiooŋ cheleŋ, mi ndaa bii nda paawaa o ba. O fondaŋnda dɛndɛla mamɛŋndaŋ laa sim ndo, o taltaŋ, o diola kpaki chioo, o nɛila bandoo ɔɔ o lɔɔlaŋ niŋ ndaa bii paawalaŋ ndaŋ ni.

Muŋ kpou tosa ni mi yoomoo wa o kala le waŋnda o masale maLuomaŋndeŋ bɛŋgu. Mi Tacitɔɔ, wana sinaa dɛndɛ pilɛ o Luom niŋ dimi maa a teleŋ Chiisu wa o lɛŋndeŋ choo wo, “Mi waŋnda Siiliaa a Chudiaa nyuna masaa Tibilɔɔ le mbo faŋa paawalaŋ latiŋ kanifuule, yoomoo wa o kala kpoke le nda.”

Nɛila ndaa soliŋ kpeku le paawalaŋ ndaŋ biyɔɔ wo tosa ni mi yoomoo wa o kala kpoke le waŋnda. Le mi waŋndo ndoo sɔla dioo le paawalaŋ ndaŋ biyɔɔ, mɛɛ mi ndoo yɔŋgu nyɛsɔlaa tau. Wanaa bɛnduaa ndaa nɔ wanaa wa wallo nda o ba bɛŋgu wa. Te wanaa kaŋ ndaa bii pɛ paawalaŋ ndaŋ, a faŋa tɔnɔɔ o tiŋ, okoŋ a ke wanaa ndaa bɛnduaa. Nduyɛ mi nda bɛɛ faŋa tɔnɔɔ o ndaa. Sakiɔɔ wa waŋndo opilɛ o wanaa bɛnduaa haa tɛɛŋ. (Luku 19:​1, 2) Mi nɛila yɛ yɛla ndaa soliŋ kpeku le paawalaŋ biyɔɔ wo tosa mi waŋnda kɛɛ le paawalaŋ malɔɔ, nduyɛ ma tul wanaa ndaa bii paawalaŋ ndaŋ nda leyɛ.