A Bukuloo 19, 1940 ya veluŋ ni, o chioo Amiɔŋ niŋ, lɛŋnde Lebanɔŋ ndeŋ. Mɛɛ wɔsilaŋ latiŋ la hiou, miŋ kua o chiee bɛndoo Tilipoli niŋ. O chiee bɛndu koŋ niŋ ya sul ni. Nduyɛ yuŋgu naa ndoo kaala bɔɔ Chɛhowa. Le hei, ŋ wa a kɔl kɛndɛ tau. Naa ŋuɛɛnu nda velu ni. Waŋ laanduaa a yaa, puaa a ŋiɔɔŋ. Nduyɛ ya wa chuaambɔɔ ni. Mi wanaa velu naa wa ndaa tosa wallo kalaŋ le naa nyɛm naŋ hauba woŋ kioo. Kɛ Baabuiyo pɛɛkoo, kɔlaŋ o bɔŋaŋndaŋ a wanaa cheleŋ malaa ma sina a Mɛlɛka okɔɔ wa nyɛ tasoo o yuŋgu naa niŋ ni.

Kilisiɔŋaa pɔyaŋaa bɔɔbɔɔ wa o kunda naa niŋ. Opilɛ wa Maikɛl Aboud ni. Ndu ndoo chua chilaŋ o bɔŋaŋ naŋ bii o Nɔŋgɔwaa choo wo ni. Bɔŋaŋ koŋ naŋ veelu hau ni aa, pɛɛku Baabui kundaa. O Niu Yɔk niŋ o pɛɛku tonyaa ni. Okoŋ o wɔsiŋ 1920 niŋ, mbo kua Lebanɔŋ le waŋnda malaa ma sina tonyaa. Wana lebiɔɔ pila o wa ni, nduyɛ mi ndoo mala waŋnda tau. I loonuŋ mɛɛ ndoo mala ndepiliaa ŋiɔɔŋaa ndaa fula o Sukuuwo Kiiliadi wa yɛ, Anne nda Kuɛŋ Biavo. Mi ndepiliaa haa simnuŋ chaŋyaŋ kɛndɛ kɛndɛ le naa. Nduyɛ mɛɛ wɔsiŋ bɔɔbɔɔ hiou, miŋ chiikaŋ naa Anne o Amɛlika niŋ. Teleŋ biŋgi okoŋ kɔɔli, miŋ chiikaŋ  vɛlɛ naa Kuɛŋ. Kuɛŋ ndoo chal niŋ nɔɔ Wiliflɛd Koch o ba. Nduyɛ a wa wallo tosaa o lɛuve Lɔndɔŋ, Lɛŋnde Iŋkilaŋ ndeŋ.

Teleŋ ya wa feleŋgɔnɔ wo, Seiyaa Chɛhowaa nyɛɛmbɔ koni wa o lɛŋnde Lebanɔŋ ndeŋ niŋ ni. Naŋ nɔ dialuŋfulaŋ tau le acheleŋnda dimullo a nyɛ naŋ wa pɛɛkoo o Baabuiyo niŋndo. Mi naŋ tosa hei o yɔŋ bɛɛ mi simlachiaa lepiɛiya ndaa simul naa. I loonuŋndɔ sɔɔŋ ŋpum, ŋ simlachiaa lepiɛiya ɔɔ wanaa cheleŋnda ndaa tosa le naa simullo wo.

Paale pilɛ, mɛɛ naŋ wa yooŋgu kɛndɔɔ dimioo naa yema nuu Sana o chiɛi bɛndu pum niŋ, mi simlachinɔ lepiɛiyo huŋ naa naŋ wa yooŋgu kɛndɔɔ dimioo wa. Naapum waŋndo ndoo veelu ndu ni, le mbo huŋ tofa nyɛ naŋ wa tosaa wo. Mi simlachinɔ lepiɛi koŋ kandu yema nuu diomnda wɔɔŋndaŋ dimullo. Mbo tuulu kɔl tau, mbo nyindu ndu, nduyɛ mi Sana yɔŋuluŋ tau. O foofo koŋ choo, mi waŋnda veelu polisiiya. Mɛɛ nda hiŋ, ma huŋ kɔ a Sana o chiɛi chiɔuwaa. Nduyɛ ma kua a simlachinɔ lepiɛi koŋ o polisiiyo. Loŋ nda kɔ sina ni maa, yekpandioo wa ndu o ba. Okoŋ ma nyuna ndu aa: “Wana suu maavɛɛ ŋ cho yɛ? Baa waŋnda ŋ pɛɛku a Mɛlɛka okɔɔ ni ɔɔ baa waŋnda ŋ pɛɛku le sɔɔŋ wɔɔŋndoŋ tosaa ni?”

I loonuŋ vɛlɛ paale pilɛ, mi kunda naa kpou luɛi o mɔmbillo niŋ le kɔlaŋ yooŋgu kɛndɔɔ dimioo o fondaŋnda yololɛlaŋ. Mɛɛ naŋ fuuluu, miŋ kandu waŋnda yooŋgu kɛndɔɔ dimullo. Nduyɛ ŋ wa ndu tueiyɔɔ yeela tau. Kɛ mɛɛ simlachinɔ lepiɛiyo, o wa o fondaŋ koŋ ndo tuei a ndi okɔɔ, mbo duau waŋnda naapilɛ le naa kuunaa. Mi wanaa kaŋ kandu naa vii viiyo, nduyɛ ma via finya nuu bolleŋ. I loonuŋndɔ mɛɛ koowaŋ ma wa ndu ma tiuwaa o hɔl silɔ yɛ. Mbo miiŋgu naa naŋ kɛsi mɔmbillo wa, nduyɛ mi kala nuu a naa kpou kua ndu kɔɔli. I loonuŋ nyɛ kala nuu ndoo dimi wo mɛɛ o wa finya nuu pauvii keŋ wɔɔsuu wo. Mbo dimi aa: “Chɛhowa, yandii mal nda haki. A sina nyɛ nda cho tosaa wo le.”

A teleŋ cheleŋ vɛlɛ, miŋ kua wanayaŋ naŋ yilɔɔ o chiee naa. Mɛɛ naŋ kuɛ, miŋ komal simlachinɔ lepiɛi pum o finya naa mamaa lo chiɛiniŋ. Simlachinɔ lepiɛi koŋ ndoo sina maa, Seiyaa Chɛhowaa wanaa velu naa wa cho ni. Mi che bɛɛ wɔsilaŋ la ŋɔmpum ya wa ni, kɛ mbo veelu ya okoŋ mbo nyuna ya aa: “Le yɛɛnɛ a sɔla wɔ yiŋɔɔ le?” Mi dimul ndu maa, chuaambɔɔ ya cho wɔ ni. Nduyɛ maa le mi sɔla yiŋɔɔ, mɛɛ mi pɛɛku Baabuiyo nyɛkɛndɛi, nduyɛ mi nɔ tiindaŋ kala kalaa. Le mɛɛ muli yaa ke ndu wo hɛnaŋ ndu le yɛ, mbo dimul finya ni mamaa maa I tɛɛndaŋ ndu.

Lepilɛŋ sɔɔŋ waa naa muŋ yɔŋnuŋ naa ni. Kɛ o kpeekpei niŋ, waŋnda o lɛŋnde Lebanɔŋ ndeŋ niŋ nɔ kɛndɛi tau, nduyɛ a cho wanaa ichaŋya. Le hei, mi naŋ soo o wanaa bɔɔbɔɔ lo a Baabuiyo okɔɔ, nduyɛ mi naŋ pɛɛku apum Baabuiyo.

Teleŋ ya wa wɔ o sukuuwo, mi puaapilɛnɔ feleŋgɔnɔ pum fula Vɛnisueela, mbo kua yilɔɔ Lebanɔŋ. O kunda naa niŋ ndoo bii bɔŋaŋndaŋ ni.  Nduyɛ mbo tosa chaŋyɛi a yema nuu Wafa. Mɛɛ teleŋ tiŋ hiou, ma chal o nɔɔ niŋ. Okoŋ kɔɔli, ma miiŋgu Vɛnisueela. Mi Wafa ndoo poonyial naa yaulaŋ tau. Nduyɛ o yaula laŋ niŋ, mi ndoo dimul finya naa le mbo kuɛ a naa kpou Vɛnisueela. Mi ndoo tosa hei kanifuule, ndoo yeema naa niŋ bɔɔ chɔɔ. Nduyɛ mɛɛ teleŋ biŋgi hiou, mi finya naa chɛl ndu diom. Okoŋ mi naa kpou kua Vɛnisueela.

A wɔsi 1953 naŋ kuɛ Vɛnisueela ni. Nduyɛ miŋ chal o chiee bɛndoo Kalakas, o fondaŋ masaa wa wo ikɛi. Le mɛɛ ya wa chuaambɔ yɛ, mi yaa naŋ kɔl tau le masaa chɔɔ hiouwɔɔ a mɔmbilta kɛndɛ kɛndɛlaŋ ndu kɔɔli. I ve bɛɛŋ bɛɛŋ le mi wanaa velu ya wa ndaa tosa yɛlɛmiaalaŋ le waa o lɛŋnde leŋ niŋ te. Kanifuule, sɔɔŋ bɔɔbɔɔ wa teŋgeŋ a fondaŋ naŋ fula wo, mɛɛ suɛi maŋgalɛi, naamoo a nyɛdiaa cho naa yɛ. Kɛ mɛɛ nda kandu dɔɔ yɛlɛmiaalaŋ tosaa, mi suɛi kɔl tambɛiye komal naa.

Mɛɛ finya naa del a naa, mi kɔndɔfillo bii naa tau kanifuule, o ve wana lakɔsɔ le. Mɛɛ naŋ kuɛ a ndu le tofaa, mi wana chiɔuwaa dimi maa o nɔ naa kaŋsɛiyo. Nduyɛ maa o nɔ mbo sɔla yambɔɔ. Mɛɛ nda chii ndu yambɔɔ, lɔɔ opilɛ kpe okoŋ kɔɔli mbo sɔla piɔmndo.

I cho ikala le tɛɛsiaa mɛɛ naŋ wa sinaŋndo a teleŋ koŋ yɛ. Wɔsilaŋ 13 kinɛi ya wa ni. Nduyɛ naa kpou ve kɔl maa finya naa cho wu le. Miŋ yiyaŋ maa, fɛŋ bɛɛ ŋ ve lɛ niŋ a kɔl kɛndɛ le. Le teleŋ tiŋ, kala nuu ndoo laalaŋ nyɛ ndoo yɔŋnuŋndo le. Kɛ mi Chɛhowa mala ndu a naa kpou le miŋ biunuŋ, nduyɛ miŋ hiou lachi a ndu piɛiyo. I wa wɔsilaŋ 16 mi chii sukuuwo. Nduyɛ yaa nɔ yeemɛi tau le yuŋgu nuu malaa.

Mɛɛ teleŋ tiŋ hiou, mi yema nuu Sana chal Lubɛŋ Alocho o ba o nɔɔ niŋ. Puaapilɛnɔɔ hoo ndoo kuɛ niŋ o Sukuuwo Kiiliadi. Nduyɛ mɛɛ o chii, ma miŋgi ndu o lɛŋnde Vɛnisueelaleŋ niŋ. Kɛ mɛɛ nda chal o nɔɔ niŋ, ma kɛɛsiaa le kɔlaŋ challe Niu Yɔk. Mɛɛ nda kuɛ, mi yuŋgu naa kɛɛsiaa maa ya kɔ wa nda o bɛŋgu choo, mi kuɛ o sukuu bɛndoo. Mi yema nuu a pɔnɔ ndɔ mala ya tau, le mi tosa hiouwɔɔ lachioo o Chɛhowa piɛiyo niŋ. O kunda Spanisiiyo niŋ ya wa ni, nduyɛ puaapiliaa ndaa kendu o Mɛlɛka piɛiyo niŋnda wa loŋ tau. A ŋiɔɔŋaa ya loonuŋ nda wa Miltɔŋ Hɛŋsiɛ nda Fɛdilik Filaŋs ni. Nduyɛ nda ŋiɔɔŋ kpou wa o Bɛtɛɛl, Bulukiliŋ.

Mɛɛ ya hiŋ le wɔsi tasoo chiiyo o sukuu bɛndu koŋ, mi kandu yiyaŋndo a nyɛ ya wa tosa o yoomu nuu niŋndo okɔɔ. Mi yaa veelu diomndaŋ o Bandu Mɛŋgɛlaa niŋ a Kilisiɔŋaa ndaa kɛsi kpeleŋndaŋ o Chɛhowa piɛiyo niŋnda okɔɔ. Nduyɛ mi yaa yiyaŋ lechoo yiŋgoloŋ. Mi cha mɛɛ kɔɔfaa a Bɛtɛlaitiiya o kunda naa niŋ wa a kɔl kɛndɛ yɛ. Mi che bɛɛ yaa yiŋndɔ le, kɛ yaa yeema mi wa maa nda. Le hei mi sina maa, i cho suɛi sɔvɛ le mi yɔŋgu yoomu nuu o Chɛhowa lo. Mi tosa keŋ. Nduyɛ a Fuoo 30, 1957, mi sɔla yiŋɔɔ.

Mɛɛ ya sɔla yiŋɔɔ, mi kɛɛsiaa vɛlɛ le kpeleŋ sɔvɛ cheleŋ komallo. Ndu cho le luɛiyɔɔ o wali lɔɔlɔɔ Mɛlɛkaa niŋ ni. Yaa nɔ yeemɛi tau le hei tosaa. Kɛ mi cha maa, i wa wa ikala le kpeleŋ koŋ komallo. Vɛɛ ya wa yɛ kpeleŋ koŋ komal, nduyɛ mi wa vɛlɛ  kɔlaŋ o sukuu bɛndu koŋ niŋ a teleŋ pilɔɔ kpe? Mɛɛ ya poonyial yuŋgu nuu maa I yeema mi mal sukuu bɛndu koŋ okoŋ mi miiŋgu Vɛnisueela le mi kandu kɔɔfaleŋ, ma poonyial la yaula bɔɔbɔɔ.

Mi miiŋgu Kalakas a Kooŋndo 1957. Kɛ mi cha maa yuŋgu nuu ndoo yeema malaa tau. Waŋndo ndoo nɔ mbo wa wallo tosaa le halikpeŋ mbo ke nda nyɛm nda hauba woŋ. Mi nyunaŋ aa, vɛɛ ya tiu yɛ ba mi mala yuŋgu nuu? Mi sɔla wallo o chiɛi kɛsiaa nyɛsɔlaa niŋ. Kɛ a koŋ kpou, yaa yeema mi tosa kɔɔfaleŋ. Nduyɛ le keŋ kpeekpei yaa miiŋgu Vɛnisueela ni. Mi kɛɛsiaŋ o kɔl le sɔɔŋ muŋ ndoŋ muŋ kpou tosaa diompilɛ. Le wɔsiŋ bɔɔbɔɔ, mi yaa tosa wallo o chiɛi kɛsiaa nyɛsɔlaa niŋ, nduyɛ I wa vɛlɛ kɔɔfaleŋ. Kani bɛɛ I ve wɔ kpɔndi vɛlɛ a kɔl kɛndɛ o yoomoo niŋ maa a teleŋ koŋ te.

Mi chɔɔlu wa a kɔl kɛndɛ tau mɛɛ naŋ chiikaŋ naa Silvia, nduyɛ miŋ chal o nɔɔ niŋ. Chamani ndepilɛnɔɔ hoo ndoo fula ni, nduyɛ ndoo naŋ, vɛlɛ ndoo kaala Chɛhowa tau. Ndu nda wanaa velu ndu wa ndaa hiŋ Vɛnisueela le challe. Nduyɛ mɛɛ teleŋ biŋgi hiou, miŋ vialu chuauwa a ŋiɔɔŋ. Mike nda Samila. Mi dimul kala nuu le mbo huŋ wa a naa latulu le halikpeŋ miŋ manda ndu. Mi kialu kɔɔfaleŋ kanifuule, yaa nɔ kalaŋndaŋ tau. Kɛ a koŋ kpou, mi yaa yɔŋguŋ tau le yooŋgu kɛndɔɔ dimioo. Mi ya a Silvia naŋ tosa kɔɔfale malalaŋndeŋ, teleŋ o teleŋ naŋ chua pɛ pɛŋgi pɔmbɔɔ.

A teleŋ nyɛ ya dimi o buŋgɛi hei kandɔŋndo wo yɔŋnuŋndo, chuauwaa naa wa wɔ kɔlaŋ o sukuu. O kpeekpei niŋ, yoomu naa wa nyɛkɛndɛi. Nduyɛ wanaa naŋ tosa wallo latulu wa ndaa nɔ bɛɛleŋ tau le ya. Kɛ a koŋ kpou, yaa yeema mi waŋnda ndaa che ya maa buɛi Chɛhowaa ya cho ni. Le hei mi kandu yiyaŋndo tau a ndi okɔɔ. Mi ya a laa nuu chal diompilɛ le suukaŋndo a nyɛsɔlaa naa okɔɔ. Miŋ kɛɛsiaa maa le mɛɛ naŋ nɔ kuei wana le yɛ, te I mal pɛ wali ya wa tosaa wo, miŋ tosa yoomu naa tɛtɛlɛ, nduyɛ mi wana ni banaa choŋguŋ ya a nyɛsɔlaa, nyɛsɔlaa cho wa naa o ba tuuleŋ le teleŋ vilɛi.

I ve bɛɛŋ bɛɛŋ le kɛɛsiaa koŋ tosaa le. Kɛ mi kala nuu a laa nuu toolu ya tau. Le hei, mi kɛɛsiaa vɛlɛ le mi luɛi o wali lɔɔlɔɔ Mɛlɛkaa niŋ. Mi naŋ kɔl tau! Kɛ mɛɛ ya hiŋ le kɔɔfaleŋ kandɔɔ, miŋ sɔla yooŋgu naŋ ve kɔl te wo.

Paale pilɛ, mi wana naa chiɔuwaa dimul naa maa, Silvia cho a folioo. Mi kɔndɔfillo bii naa tau. Mi che bɛɛ ŋ wa a kɔl kɛndɛ, kɛ mi yiyaŋ tau a kɔɔfale yaa yeema kandɔɔ leŋ okɔɔ. Vɛɛ hei wa yɛ kɛɛsiaa naŋ tosa wo piiliaŋ? Miŋ cha maa ŋ cho  kalaŋndo chɔɔlu sɔla te chɛlɛkpɛ koŋ veluŋ pɛ. Le hei, miŋ tosa yɛlɛmiaalaŋ tau. Kɛ baa miŋ siŋga pa kɛɛsiaa tase naŋ tosa wo? Sako.

Mɛɛ naŋ chii suukaŋ a kpeleŋnda naalaŋ okɔɔ, miŋ kɛɛsiaa maa, ŋ nɔ miŋ lo o kɛɛsiaa tase naŋ tosa wo choo. A Nyaakuɛiyo 1985, mi laa nuu vialu poo. Nduyɛ miŋ ke ndu diolaŋ aa Keebilɛ. A koŋ kpou, mi mal wali ya wa tosaa o chiɛi kɛsiaa nyɛsɔlaa niŋndo, nduyɛ mi kandu kɔɔfaleŋ a Kooŋndo 1985. Mɛɛ teleŋ tiŋ hiou, mi sɔla dikeŋnaŋndo le waa waŋndo opilɛ o kunda cho Lɛuve Vɛnisueela chilaŋndo choo. Nduyɛ chɔŋ Kalakas kɔ naa lɛuve cho wa, wa le mɛɛliilaŋ 50 ɔɔ kilolaŋ 80. Le hei, mi yaa kuɛ palɛi i ŋiiŋ ɔɔ i yaa o lɔɔ bɛŋgu.

Miŋ kɛɛsiaa vɛlɛ le kɔlaŋ o chiee bɛndoo La Victoliaa niŋ kanifuule, loŋ lɛuve cho ni. Hei wa naa mala mi naŋ wa kpɛɛluŋ a lɛuve. Siŋgaŋ bɛndoo pila wa vɛlɛ hoo ni le naa. I nɔ bɔɔ balika melaa le mɛɛ yuŋgu nuu wa ya tooloo yɛ. Mi yema nuu Baha yɔŋguŋ wulee le kala naa mandaa, nduyɛ mi Mike chua lanɔɔ. Samila nda Keebilɛ kinɛi wa niŋ naa o ba ni. Samila nda Keebilɛ ndaa nɔ ma mɛi chaŋyaŋ ndaŋ Kalakas, le mi naŋ kuɛ La Victoliaa. Nduyɛ laa nuu Silvia bɛɛ, ndoo nɔ mbo tosa yɛlɛmiaalaŋ le kɔlaŋ waa o chiee pɔmbɔɔ niŋ. Naa kpou, naŋ nɔ miŋ dɛli le waa o chiɛi pɔmbɔɔ niŋ. Miŋ tosa yɛlɛmiaalaŋ tau le halikpeŋ miŋ mal Kalakas, okoŋ miŋ kuɛ La Victoliaa.

Okoŋ kɔɔli, mi sɔɔŋ siŋgaŋ vɛlɛ. Mi Keebilɛ, po naa mɛɛlaa chua lanɔɔ. Nduyɛ Samila bɛɛ wa niŋ a ba ndɔ. Le hei, a wɔsi 2007, ma dimul la a Silvia le miŋ kuɛ o Bɛtɛɛl. Nduyɛ suŋ suŋ bɛɛ loŋ naŋ cho wɔ ni. Bɛndu kundaa po naa tasoo Mike cho niŋ ni. Nduyɛ ndu nda laa ndɔ Mɔnika cho kɔɔfaleŋ tosaa. Bɛndu kundaa Keebilɛ bɛɛ cho niŋ ni. Ndu nda laa ndɔ cho Itali. Samila bɛɛ cho kɔɔfaleŋ tosaa. Nduyɛ mbo yɔŋgu malaa o Bɛtɛɛl, mi che bɛɛ o cho landaŋ a Lɛuve.

Mi che bɛɛ mi tosa kɛɛsiaala bɔɔbɔɔ o yoomu nuu niŋ, kɛ I kil iso le laŋ kpou le. O yɔŋ bɛɛ mi sɔla fondaa le mi miiŋgu vɛlɛ chua piaandu, kɛɛsiaala pilɛlaŋ ndaŋ kpe ya tosa ni. I cho bɔɔ a kɔl kɛndɛ le walta yɛ yɛla ya tosalaŋ a dilakeŋnaŋnda ya sɔla o Chɛhowa piɛiyo niŋndaŋ. I che niŋ kpendekele o wɔsiŋ hiou woŋ niŋ maa, i cho bɔɔ suɛi sɔvɛ le miŋ nɔ chaŋyɛi kpɛɛluŋnde a Chɛhowa. O yɔŋ bɛɛ mi kɛɛsiaa naŋ nɔ le tosaa wo wa o bɛndu ɔɔ o pɔmbɔ, o nɔla mbo ke naa kɔl nyulu “wana chiee nɔla mbo sina bɛɛ pɛŋgu le wo.” (Filipi. 4:​6, 7) Silvia a ya cho a kɔl kɛndɛ tau, le mɛɛ naŋ cho wallo o Bɛtɛɛllɛ. Nduyɛ ŋ che niŋ kɛsɛ maa Chɛhowa dɔu naa sɔla le mɛɛ naŋ handu ndu wana tasoo o kɛɛsiaala naalaŋ niŋ yɛ.