1. Ɔɔ sɔɔŋ pum ŋ luei naa siooŋnde woŋ?

 Ŋ TOFAŊNDƆ sɔɔŋ yɔŋnaŋndoŋ muŋ. Nɛstɔɔ nda laa ndɔ Maliaa, ndaa yeema kɔlaŋ yooŋgu kɛndɔɔ dimioo naa yeemɛi cho tau wa. * Le mi ndaa tosa keŋ, ndaa nɔ ma tosa yɛlɛmiaalaŋ a mɛɛ nda pisi nyɛsɔlaa yɛ okɔɔ. Kɛ siooŋnde wa nda maa te o yɔŋ pɛ ma nɔ lɛ nyɛsɔlaa bɔɔ le, a ve lɛ niŋ a kɔl kɛndɛ le. Mɛɛ Biniaŋ simnuŋ Sei Chɛhowaa o lɛŋnde nda simul wali naa leŋ niŋ, mbo sina maa le mɛɛ o simnuŋ Sei Chɛhowaa yɛ, waŋnda cho ndu nyɛpalaa tusi choo. Mi hei luei ndu siooŋnde. Yuŋgu ndɔɔ ve Chɛhowa piɛi le. Le hei, mi siooŋnde chɔɔlu ndu biyɔɔ, mɛɛ o yiyaŋ a mɛɛ nda bii ndu niŋ yɛ okɔɔ. Mi wanaa chiɔuwaa dimul Valali maa, o nɔ naa kaŋsɛi wɔɔŋ wɔɔŋndo. Nduyɛ, o wa nuuviaa le wana chiɔuwaa chiɔu ndu niŋ o hivi ndu kooma o ŋdial te wo. O kpeekpei niŋ, siooŋnde wa ndu maa o cho piɔmndo sɔla.

2. Le yɛɛ ŋ nɔ miŋ hiu siooŋnde nɔ le?

² Kani bɛɛ sɔɔŋ waa nuaa komal num niŋ mi siooŋnde bii num? Sɔɔŋ muŋ komal niŋ naa a bɔɔbɔɔ. Te ŋ hiu pɛ siooŋnde nɔɔ o sɔɔŋ waa nuaa niŋ, mi keŋ nyindu naa le kɛɛsiaala wɔɔŋndaŋ tosaa. Nduyɛ pɛŋ, mi keŋ tosa miŋ tɛɛmbuu chaŋyɛi naŋ nɔ a Chɛhowa ve. Hei kpeekpei Setana yeema ni. Mbo kindiŋ le naa siooŋnde lueiyo le miŋ kɛɛ sawala Chɛhowalaŋ diikɔŋndo, mɛɛ sawaa le yooŋgu kɛndɔɔ dimioo cho nuaa yɛ. (Sɔɔŋ. 12:​17) Wana wɔɔŋndo pila Setana cho ni, nduyɛ o vi  ŋdial te, vɛlɛ o nɔ kpaayaa o hiou naa. Kɛ ŋ tiuba miŋ manda naapila o tiu naa ba le. O nɛi kuɛɛ choo?

3. Yɛɛ mala yɛ naa Setana luei naa siooŋnde le?

³ Te ŋ nɔ pɛ tiindaŋndo maa Chɛhowa kaala naa nduyɛ maa o cho a naa latulu, mi keŋ mala naa Setana luei naa siooŋnde le. (Sam 118:​6) Le tamaseliiyo, mi sɔɔŋ kindilaŋ bɔɔbɔɔ komal wana poonyiaa Sam bolle 118 wo. Ndoo nɔ yaamɔɔwa tau, nduyɛ apum ndaa nɔ kpaayaa ma hiau ndu (sɔɔŋ 9, 10). Teleŋndaŋ lapum, mi ndoo buulaŋ tau (sɔɔŋ 13). O fulawɔ okoŋ kɔɔli, Chɛhowa ndoo ke ndu niŋ sila kala kalaa o paandoo niŋ (sɔɔŋ 18). A koŋ kpou, mbo dimi aa: “Siooŋii bii ya le wana o wana le.” Yɛɛ nyindu yɛ ndu le hei dimioo? Ndoo sina maa Chɛhowa Finya ndɔ cho o choo choo niŋndo kaala ndu tau, mi che bɛɛ mbo ke ndu sila kala kalaa. Wana soliaa ŋchondoo hoo ndoo nɔ tiindaŋndo maa mɛɛ mɛɛ sɔɔŋ palaŋ komal ndu, Mɛlɛka ndɔɔ kaala ndu tau, nduyɛ maa o cho o bɛɛndiaŋ le ndu malaa.—Sam 118:​29.

4. Te ŋ nɔ pɛ tiindaŋndo maa Chɛhowa kaala naa, siooŋii kuɛɛ naŋ soliŋ yɛ o kɔl?

⁴ Ŋ nɔ miŋ nɔ tiindaŋndo kɛsɛ maa Chɛhowa kaala naa kpou. Hei cho naa mala miŋ soliŋ siooŋnde o kɔl le sɔɔŋ ŋgaa woŋ muŋ. Muŋ cho ni: (1) Siooŋnde nɔɔ maa ŋ tiu niŋ ba miŋ ke yuŋgu naa nyɛm nda hauba woŋ te. (2) Siooŋnde le wanachioo. (3) Siooŋnde le piɔmndo. Mi puaapiliaa a ndepiliaa naŋ soo a nda okɔɔ o pɛl tasoo niŋnda soliŋ siooŋnde o kɔl kanifuule, a nɔ tiindaŋndo maa Chɛhowa kaala nda.

5. Sɔɔŋ kuɛɛ tosa yɛ lepum mi yuŋgu lebollo buulaŋ tau? (Tofa fotueiyo o kɔɔ.)

⁵ Mi Kilisiɔŋnɔ cho yuŋgoo bolleŋndo chua kalaŋ o nɔ le yuŋgu ndɔɔ kioo nyɛm nda hauba woŋ ndo o sɔvɛ. (1 Timo. 5:​8) Te yuŋgu lebollo ŋ cho ni, naapum a naa Kolonaa hoo, a wa buulaŋndo maa wali numndo cho num hiɔlɔŋ. A wa vɛlɛ buulaŋndo maa a tiu niŋ ba ma ke yuŋgu numndo nyɛdiaa, paawa chiɛiyo malɔɔ ɔɔ nyɛm cheleŋ te. Naapum siooŋnde wa num vɛlɛ maa te wali numndo hɛluŋ num pɛ, a tiu niŋ ba ma sɔla wali cheleŋ te. Ɔɔ maa Nɛstɔɔ nda Maliaa naŋ soo suŋ a nda okɔɔ wa, siooŋnde cho num dɔɔ le ma tosa yɛlɛmiaalaŋ o wali numndo niŋ le halikpeŋ ma tosa yoomu numndo tɛtɛlɛ. Setana luei niŋ wanaa bɔɔbɔɔ siooŋnde o sɔɔŋ waa nuaa niŋ, nduyɛ mbo tiu nda ba.

6. Kiisaŋ yɛɛ Setana kindiŋ yɛ le naa lueiyo o kɔl?

⁶ Mi Setana kindiŋ le naa kiisaŋndo lueiyo o kɔl maa Chɛhowa buulaŋ a naa a pilɛ pilɛŋnda le. Nduyɛ maa o cho naa mala miŋ ke yuŋgu naa nyɛm nda hauba woŋ te. Mi hei ke naa yiyaŋndo maa ŋ nɔ miŋ tosa nyɛ o nyɛ naŋ tiuba le halikpeŋ miŋ lo o wali naa niŋ, o yɔŋ bɛɛ maa ŋ nɔ miŋ tosa nyɛ tɛɛmbuu sawala mandaala Baabuiyo wo.

7. Tiindaŋ yɛɛ Chiisu ke yɛ naa?

⁷ Chiisu sina Finya ndɔ nyɛkɛndɛi mbo hiau wana o wana. Lelaŋ pɛŋ o ke naa tiindaŋndo ni maa, ‘Mɛlɛka Finya naa sina nyɛ naŋ hauba wo tuupa bɛɛ miŋ nyuna ndu.’ (Maa. 6:​8) Nduyɛ, Chiisu sina maa Chɛhowa cho o bɛɛndiaŋ teleŋ o teleŋ le naa kioo nyɛm naŋ hauba woŋ. Naa Kilisiɔŋnda kpou, o yuŋgu Chɛhowaa niŋ naŋ cho ni. Nduyɛ Chɛhowa cho yuŋgoo hoo bolleŋ ni. Lelaŋ, ŋ nɔ miŋ nɔ tiindaŋndo maa o cho sawa mandaa o ke naa o 1 Timoti 5:​8 niŋndo dɔwɔɔ o wali niŋ.

8. (a) Te ŋ wa pɛ a siooŋnde maa ŋ tiu niŋ ba miŋ ke yuŋgu naa nyɛm nda hauba woŋ te, yɛɛ mala yɛ naa miŋ soliŋ siooŋii keŋ o kɔl? (Maatiu 6:​31-33) (b) O fotueiyo choo, pɔnɔɔ a lanɔɔ yoo ndepilɛnɔɔ nda chua ndɔɔ nyɛdiaa. Vɛɛ naŋ tuallɛ tamasi ndaa kɔɔli?

⁸ Te ŋ nɔ pɛ tiindaŋndo maa Chɛhowa kaala naa a yuŋgu naa, kiisaŋ ve naa maa o tiuba mbo ke naa nyɛm naŋ hauba woŋ te le.  (Nuawɔ Maatiu 6:​31-33.) Chɛhowa nɔ yeemɛi le naa kioo nyɛm naŋ hauba woŋ. Nduyɛ, wana ikɛndɔɔ pila o cho ni! Mɛɛ o toosiaa chieeŋndo, o cho ko nyɛm naŋ yeema le waa yoomu woŋ te o ke naa le. Kɛ mbo toosiaa nyɛm bɔɔbɔɔ o chieeŋndo choo ŋ tosa miŋ tuei yoomoo yeela woŋ. (Chɛ. 2:​9) Teleŋndaŋ lapum, o yɔŋ bɛɛ maa o diaa kinɛi naŋ sɔla ni, ŋ nɔ miŋ loonuŋ maa Chɛhowa tosa ni miŋ sɔla ndu. Kani bɛɛ Chɛhowa bumba wɔ le naa kioo nyɛm naŋ hauba woŋ te. (Maa. 6:​11) Ŋ nɔ miŋ loonuŋ maa ŋ tuu nyɛm kɛŋ hɛluŋ naa woŋ a ŋ Chɛhowa cho naa kioo suŋ suŋ, vɛlɛ a ŋ naŋ sɔla niŋ o chilaŋ niŋndoŋ te. Hei kpeekpei Nɛstɔɔ nda Maliaa mɛɛlu sina ni.—Aisaya 65:​21, 22.

9. Yɛɛ naŋ pɛɛku yɛ o tamasi Nɛstɔɔ nda Maliaa wo niŋ?

⁹ Nɛstɔɔ nda Maliaa tuei niŋ yoomu sɔviɔɔ yeela o Kolombiaa niŋ. Ma dimi aa: “Miŋ yiyaŋ le yoomu naa tosaa tɛtɛlɛ. Okoŋ, miŋ chɔɔlu yɔŋgɔŋ tau o wali dimiaa yooŋgu kɛndɔɔ niŋ. Kɛ siooŋnde wa naa maa ŋ tiu niŋ ba miŋ wa a kɔl kɛndɛ le, te ŋ nɔ nyɛsɔlaa bɔɔ le.” Yɛɛ mala yɛ nda le siooŋnde hei soliŋndo o kɔl? Ma loonuŋ a mɛɛ Chɛhowa chɔm nda niŋ kaalaa o nɛila bɔɔbɔɔ niŋ yɛ. Le mɛɛ ndaa nɔ tiindaŋndo maa Chɛhowa cho wa nda kioo nyɛm nda hauba woŋ yɛ, ma mal walta bɛndula nda wa nda paawaa tau laŋ. Ma pisi chiɛi ndaa ma kua naa yeemɛi cho tau o lɛŋnde ndaleŋ niŋ le wanaa dimiaa yooŋgu kɛndiaa wa. Vɛɛ ndaa yiyaŋ yɛ a kɛɛsiaa nda tosa koŋ ndo okɔɔ? Mi Nɛstɔɔ dimi aa: “Miŋ cha mɛɛ Maatiu 6:​33 peeluŋ o yoomu naa niŋ yɛ. Ŋ nɔ nyɛ o nyɛ naŋ hauba, nduyɛ ŋ cho a kɔl kɛndɛ tau.”

10. Le yɛɛ waŋchieeya nɔ yɛ siooŋnde le chaaŋaa ndaa waŋchieeya?

¹⁰ Chɔŋ o sindɔɔ niŋ, waŋnda chieeya bii niŋ saŋgaa chaaŋaa ndaa waŋnda chieeya o ba bɛŋgu. (Ikili. 8:​9) Le tamaseliiyo, mi waŋnda soliŋ kpaaya ndaa kpeku o nɛi wɔɔŋndo choo. Mi viiyaa maŋtonduaa del waŋnda choo, mi chuaambuaa yiou chaaŋaa ndaa nduyɛ ma kɔŋgɔliaŋ nda o sukuu. O fulawɔ okoŋ kɔɔli, mi waŋnda apum tusi vɛlɛ wanaa nda cho o yuŋgoo niŋnda nyɛpalaa choo. Le sabu koŋ kpeekpei waŋnda chieeya nɔ siooŋnde le chaaŋaa ndaa waŋchieeya ni! O nɛi kuɛɛ choo Setana kindiŋ yɛ le naa siooŋii wanachioo lueiyo o kɔl?

11-12. Vɛɛ Setana luei yɛ naa siooŋii wanachioo o kɔl?

¹¹ Mi Setana kindiŋ le naa siooŋnde lueiyo le miŋ pɛŋgi yooŋgu kɛndɔɔ dimioo ɔɔ le miŋ  mal nyɛ Chɛhowa dimul naa wo tosaa. Setana cho hau masɛi nyindɔɔ le wali naa kuunaa a le naa nyɛpalaa tusioo choo. (Luku 21:​12; Sɔɔŋ. 2:​10) Mi wanaa bɔɔbɔɔ o chieeŋ ndɔɔ hoo niŋ pɛŋgɛla yooŋgula wɔɔŋndaŋ, a choolaŋ a Seiyaa Chɛhowaa okɔɔ. Mi wanaa laalaŋ choolaŋ ndaŋ nda mam naa, ɔɔ ma chiŋalaŋ naa. (Maa. 10:​36) Baa kɔndɔfillo nɔ pa mbo bii naa le hei? Sako! Nɛila pilɛlaŋ ndaŋ koni o wa soliŋndo kpeku o wɔsiŋ kɛmɛ tasoŋ niŋ ni!—Walta. 5:​27, 28, 40.

¹² Simul masaa waa simul naa wo cho ko nyɔɔ opilɛ o Setana soliŋ kpeku le naa siooŋnde lueiyo wo le. A bɔɔbɔɔ cho a siooŋnde, le nyɛ yuŋgula ndalaŋ la tosal nda niŋndo te a simnuŋ pɛ Seiyaa Chɛhowaa. Mi hei luei nda siooŋnde mbo hiou bɛɛ siooŋii nda nɔ le simullo ve. A kaala wanayaŋ ndaŋ tau, nduyɛ a yeema nda ma sina Chɛhowa vɛlɛ ma kaala ndu. Ma tambu kɔl tau te a tuei pɛ mi wanayaŋ ndaŋ wa sɔɔŋ wɔɔŋndoŋ dimioo a Mɛlɛka tonyaa, vɛlɛ a wanaa cho ndu piɛiyo wa okɔɔ. O sɔɔŋ bɔɔbɔɔ niŋ, mi wanaa ndaa simul wanayaŋ ndaŋ le tonyaa wa huŋ o tonyaa niŋ. Kɛ te o wa yɛ mi wanayaŋ naŋ kɛɛ naa le mɛɛ naŋ cho Chɛhowa piɛiyo yɛ? Yɛɛ naŋ nɔ yɛ miŋ tosa?

13. Vɛɛ tiindaŋ naŋ nɔ maa Mɛlɛka kaala naa wo mala yɛ naa te yuŋgula naalaŋ la kɛɛ naa pɛ? (Sam 27:​10)

¹³ Ŋ tiuba miŋ sɔla kɔl dɛɛniaa o tonya sɔvɛ sɔvɛ cho o Sam 27:​10 niŋndo. (Nuawɔ.) Te ŋ loonuŋ pɛ a mɛɛ Chɛhowa kaala naa yɛ okɔɔ, mi keŋ tosa ŋ ve a isiooŋ te o yɔŋ bɛɛ mi yuŋgula naalaŋ la kɛɛ naa. Ŋ nɔ tiindaŋndo maa o cho naa salaa dɔwɔɔ le biuwɔŋ naa. Chɛhowa tiuba mbo ke naa nyɛm naŋ hauba woŋ, nyɛm mala naa miŋ pɛɛku a ndu okɔɔ woŋ, nduyɛ mbo dɛɛniaa naa kɔllo mbo hiou wana o wana! Hei kpeekpei yɔŋnuŋ Biniaŋ naŋ soo suŋ a ndu okɔɔ wo ni.

14. Yɛɛ ŋ pɛɛku yɛ o tamasi Biniaŋndo niŋ?

¹⁴ Mi Biniaŋ simnuŋ Sei Chɛhowaa mi che bɛɛ ndoo sina maa simulta kala kalalaŋ la cho ndu komal. Ŋ tofaŋndɔ miŋ che mɛɛ tiindaŋ ndoo nɔ maa Chɛhowa kaala ndu wo mala ndu le siooŋii wanachioo soliŋndo o kɔllɛ. Mbo dimi aa: “Ma tusi ya nyɛpalaa choo mbo hiau pɛŋ mɛɛ yaa yiyaŋ yɛ. Yaa nɔ siooŋnde le nyɛpalaa yuŋgu nuu wa ya tusioo choo wo, mbo hiau siooŋii ya nɔ le nyɛpalaa masaleŋ le wa ya tusioo choo wo. Finya nuu ve Sei Chɛhowa le. Le hei, I wa siooŋnde maa te I simnuŋ pɛ Sei Chɛhowaa, o cho kɔllo tambu tau. Nduyɛ I wa vɛlɛ yiyaŋndo maa yuŋgu nuu cho dimi maa  wana fondoo ya cho ni.” Kɛ Biniaŋ ndoo nɔ tiindaŋndo maa teleŋ o teleŋ, mi Chɛhowa manda wanaa kaala ndu wa. Mbo chɔɔlu dimi aa: “Mi yiyaŋ a mɛɛ Chɛhowa mala niŋ acheleŋnda ma biunuŋ bahawɛi nyɛsɔlaa, kaa hɛliaa, a nyɛpalaa yɛ. Mi sina maa te I lo pɛ o laalaŋ nuu choo, Chɛhowa cho ya salaa dɔwɔɔ. Teleŋnda bɔɔbɔɔ mi ndaa bii ya, nduyɛ ma lɔɔ ya tau. Kɛ mi yaa che kɛsɛ mɛɛ Chɛhowa mala wanaa nduaa o teleŋnda waa lende niŋ yɛ, te a lo pɛ o laalaŋ ndaa choo.” Mi Chɛhowa simnuŋ Finyaa kpeekpei le Biniaŋ. Nduyɛ mi wanaa Chɛhowaa simnuŋ yuŋgu ndɔ kpeekpeiyo.

15. Le yɛɛ o bɛnda yɛ miŋ nɔ siooŋii piɔmndo?

¹⁵ Baabuiyo chɔm kpendekele maa yaamɔɔnɔ naa piɔmndo cho ni. (1 Kɔliŋ. 15:​25, 26) Te wanaa naŋ kaala wa ɔɔ naapila wa pɛ a naa kala kalaa, miŋ wa a siooŋnde tau kanifuule, ŋ yeema miŋ vi le. Le yɛɛ naŋ nɔ yɛ siooŋii piɔmndo? Kanifuule Chɛhowa toosiaa naa a yeemɛi le miŋ tuei yoomoo yeela lefafɛɛŋ. (Ikili. 3:​11) O kpeekpei niŋ, siooŋii piɔmndo mala naa miŋ manda yoomu naa. Le tamaseliiyo, i mala naa miŋ tosa kɛɛsiaa kɛndɔɔ le nyɛdiaa suu naŋ nɔ miŋ de wo, vɛlɛ a dialloŋ hiiluuwo. I mala naa vɛlɛ miŋ kuɛ o wanaa chiɔuwaa lo le miŋ sɔla danda yeemaŋndo, nduyɛ miŋ fafaŋ sɔɔŋ luei yoomula naalaŋ o kpundɔɔ niŋndo.

16. Sɔɔŋ kuɛɛ Setana soliŋ yɛ kpeku le naa siooŋii piɔmndo lueiyo?

¹⁶ Setana sina maa ŋ kaala yoomula naalaŋ tau. Lelaŋ pɛŋ o dimi ni maa, miŋ chɛl mi nyɛ o nyɛ hɛluŋ naa, hali chaŋyɛi nɛi a Chɛhowa bɛɛ, le halikpeŋ miŋ manda yoomula naalaŋ. (Choobu 2:​4, 5) Hei cho tonya kposoŋ te! Setana tosa ni mi waŋnda sɔla piɔmndo. Le hei, mbo soliŋ siooŋii naŋ nɔ le piɔmndo ve kpeku le halikpeŋ miŋ mal Chɛhowa. (Hibu. 2:​14, 15) Lepum, mbo soliŋ wanaa cho ndu kɔɔli wa kpeku le wanaa cho Chɛhowa piɛiyo wa kɔŋgɔlaŋndo maa, te a mel laalaŋ ndaa le, a cho nda diyɔɔ. Ɔɔ lepum, te ŋ wa pɛ a naa kala kalaa, mi Setana soliŋ keŋ kpeku le naa nyindɔɔ miŋ mal laalaŋ naa. O sɔɔŋ waa nuaa niŋ, mi wanaa chiɔuwaa a wanaa cho Chɛhowa piɛi le wa kindila naa le miŋ tɛɛmbuu sawa Chɛhowa dɔu a kooma hiviaŋ okɔɔ wo. Ɔɔ mi wanaa cheleŋnda dɛɛniaa naa le miŋ chɛl dandala tɛɛmbuu sawala mandaala Baabuiyo wo.

17. A mɛɛ Luomaŋnda 8:​37-39 dimi yɛ, le yɛɛ naŋ nɔ yɛ miŋ nɔ siooŋii piɔm te?

¹⁷ Mi che bɛɛ ŋ yeema miŋ sɔla piɔm te, kɛ mi Chɛhowa hiou lachi a naa kaalaa o yɔŋ bɛɛ miŋ sɔla piɔmndo. (Nuawɔ Luomaŋnda 8:​37-39.) Mbo loonuŋ kɛ a chaaŋaa nduaa okɔɔ o yɔŋ bɛɛ ma sɔla piɔmndo. I wa ko naŋ chaa a cho wɔ yoomu. (Luku 20:​37, 38) O nɔ yeemɛi le mbo huŋ miŋgi nda yoomu pila. (Choobu 14:​15) Chɛhowa pendu naa kpali a kooma Po ndɔɔ, le halikpeŋ miŋ sɔla “yoomu fafɛɛŋndo.” (Chɔŋ 3:​16) Ŋ sina maa Chɛhowa kaala naa tau, nduyɛ o buulaŋ le naa. Lelaŋ, o yɔŋ bɛɛ miŋ wa a naa kala kalaa ɔɔ ma kɔŋgɔlaŋ naa le naa diyɔɔ, ŋ nɔ miŋ yɔŋ isiooŋ okoŋ miŋ mal Chɛhowa piɛiyo le. Kɛ ŋ nɔ miŋ muliŋ o ndu lo le mbo ke naa kɔl dɛɛniaa, taasioo, a yoomuaŋ. Hei kpeekpei Valali nda pɔnɔ ndɔ tosa ni.—Sam 41:​3.

18. Yɛɛ ŋ pɛɛku yɛ o tamasi Valali wo niŋ?

¹⁸ Mɛɛ Valali wa wɔsilaŋ 35, mi wanaa chiɔuwaa dimul ndu maa o nɔ naa kaŋsɛi wɔɔŋ wɔɔŋndo. Ŋ tofaŋndɔ mɛɛ kaala Chɛhowa nɔ le ndu wo mala ndu mbo soliŋ siooŋii piɔmndo o kɔllɛ. Mbo dimi aa: “Mɛɛ nda saaluŋ maa I nɔ naa kaŋsɛi wɔɔŋ wɔɔŋndo, mi yoomu naa naa pɔnɔ nuu siŋgaŋ o lepilɛ niŋ kpe. Le mi yaa hiou lachi a waa yoomu, mɛɛ mi ndaa yambu ya. Mi dimul wanaa bɔɔbɔɔ ndaa yambu waŋnda wa a ndi okɔɔ. Kɛ ma dimi maa, mɛɛ ma landu ya koowaŋ malaŋ nda yambu ya. Kɛ mi kɛɛ kanifuule,  yaa yeema mi tol sawa Mɛlɛkaa kɔɔli a koowaŋ hivioo okɔɔ! Chɛhowa chɔm ya niŋ bɔɔ kaalaa o yoomu nuu niŋ. Ya bɛɛ teleŋndo yaa sɔla koŋ ni le mi chɔm mɛɛ kpɛ yaa kaala ndu yɛ. Teleŋ o teleŋ wanaa chiɔuwaa dimulla pɛ yooŋgu wɔɔŋndo a kɛndiaa nuu okɔɔ, mi kɛɛsiaŋ o kɔl le hiouwɔɔ lachi a Chɛhowa kɔllo nɛŋioo, nduyɛ mi tɛɛmbuu Setana kɔl. Mɛɛ teleŋ tiŋ hiou, ma yambu ya a hivi ya makoŋgo le. Mi che bɛɛ I nɔ lɛ kɛndiaa sɔvɛ le, kɛ Chɛhowa cho hiouwɔɔ lachi a naa kioo nyɛm naŋ hauba woŋ. Le tamaseliiyo, paale pilɛ mɛɛ naŋ kuɛ o bɔŋaŋndo o lɔɔ mɛɛlulaŋ, miŋ yaasiaa buŋgɛi hei: ‘Nɔ Kɔl Simulaa le Nyɛkindilaa Komal Numndo Biuwɔŋndo.’ * Nduyɛ a teleŋ koŋ, wanaa chiɔuwaa ndaa seeluŋ ndɔ maa I nɔ naa kaŋsɛiyo le. Mi buŋgɛi hei dɛɛniaa naa pɔnɔ nuu kɔllo tau mɛɛ nda saaluŋ maa I nɔ naa kaŋsɛi wɔɔŋ wɔɔŋndo. Teleŋ o teleŋ, mi naŋ veelu diomndaŋ o buŋgɛi keŋ niŋ. Buŋgaŋ waa nuaa mala naa niŋ le waa a kɔl nyulu, miŋ hiou lachi a sɔɔŋ ŋMɛlɛkayaŋ tosaa, nduyɛ miŋ tosa kɛɛsiaala kɛndɛlaŋ.

19. Yɛɛ cho yɛ suŋ hunɔɔ yɔŋnɔŋ?

¹⁹ A mala Chɛhowaa, Kilisiɔŋnda chieeŋndo balɔɔ silɔ tiu niŋ simulta komal nda laŋ ba, nduyɛ ma simul Masa Nyinaa Wɔɔŋnda. (1 Pitɛ 5:​8, 9) Num bɛɛ tiuba ma tosa nyɛ pilɛ koŋ kpe. O teleŋ biŋgi bɛŋgu, Chɛhowa cho Chiisu a wanaa nda cho wa o masaleŋ choo wa nɛi chɔmaa ke, “le walta Setanalaŋ tɛɛmbuuwo.” (1 Chɔŋ 3:​8) Okoŋ kɔɔli, sɔɔŋ tosa mi siooŋii bɛnduei bii waŋnda woŋ ŋ komallɛ niŋ wanaa Mɛlɛkaa, a cho wa o chieeŋndo choo wa le. (Aisaya 54:​14; Makal 4:​4) Haaa mi teleŋ koŋ fuuluu, ŋ nɔ miŋ tosa wallo kalaŋ le miŋ soliŋ siooŋnde o kɔl.

20. Yɛɛ mala yɛ naa le miŋ soliŋ siooŋnde o kɔl?

²⁰ Ŋ nɔ miŋ hiou lachi a tiindaŋ naa kindioo maa Chɛhowa kaala naa, nduyɛ maa o cho naa manda. Nyɛ mala naa le hei tosaa wo cho yiyaŋndo a mɛɛ Chɛhowa mala buɛiyaa nduaa o paandoo niŋ yɛ, vɛlɛ miŋ wa suɛi a ndi okɔɔ ni. Nduyɛ ŋ nɔ miŋ loonuŋ mɛɛ o mala naa yɛ teleŋ nyɛkindilaa komal naa wo. A mala ndɔɔ, ŋ tiuba miŋ soliŋ siooŋnde o kɔl!—Sam 34:​4.