Wanaa bɔɔbɔɔ sina maa ma baŋ Chiisu o yɔmndo choo. Nduyɛ maa viiya a ŋiɔɔŋ tɛɛŋ nda baŋ ndu ni. (Maa. 27:​35-38) Baabuiyo dimi maa, mɛɛ nda baŋ Chiisu o yɔmndo choo nduyɛ mbo sɔla piɔmndo, mi waŋnda tusi dialuŋ ndɔŋ, okoŋ ma kɔ kumbu muŋ. Kɛ waŋnda apum dimi maa, nyɛ Baabuiyo dimi hoo wo cho tonya le.—Maki 15:​42-46.

Wanaa sɛɛŋgiaa sɔɔŋ dimiŋ o yaula soo a yoomu Chiisu wo okɔɔ laŋ niŋnda dimi maa, wanaa ndaa baŋ o yɔmndo choo wa ndaa sɔla kumbɔɔ sɔvɛ le. Kɛ maa mi ndaa tosa nyɛ cheleŋ a dialuŋ ndaŋ. Mi wana lakona pilɛ diolaŋ Aliaa Saba poonyiaa o yau pilɛ niŋ a yiyaŋ waŋnda haa okɔɔ aa: “Wanaa ndaa tosa yɔŋ wɔɔŋ wɔɔŋndo wa ndaa baŋ o yɔmndo choo ni. Nduyɛ mi wanaa sinaa dɛniaa apum dimi maa, i wa suɛi mamaa le mi waŋndo ndoo yiyaŋ maa mi Luomaŋnda ndaa kumbu wana nda baŋ o yɔmndo choo wo o sɛiyo niŋ.” Luomaŋnda ndaa yeema ma tɛɛmbuu viiya labɛɛ. Le hei, lepum mi ndaa mɛi dialuŋ waŋnda haa o yɔmndo choo le mi visiaa biyaa de muŋ. Te visiaa ndaa de muŋ pɛ, a kɔ nyindu ŋtɔŋ o sɛi wanaa bala fonduaa niŋ.

Kɛ nyɛ wanaa tuau nyɔɔŋ lɛŋ nda saaluŋ ndo cho teŋgeŋ a yiyaŋ waŋnda haa nɔ wo, te o hiŋ pɛ a mɛɛ ndaa bii Chuuwa apum yɛ te ndaa sɔla pɛ piɔmndo. Le tamaseliiyo, a wɔsi 1968, mi paa wana sɔla piɔmndo o wɔsiŋ kɛmɛ tasoŋ niŋndo fula chieeŋ. O sɛi ndaa kumbu yuŋgu Chuuwa wo niŋ Chulusalɛm ikɛi, nda saaluŋ paa koŋ ni. Nduyɛ a lɔndimɛi vilɛi vilɛiye ndaa baŋ wana koŋ o yɔmndo choo ni. Mi Saba dimi a hei okɔɔ aa: “Paa koŋ wa tɔndii kɔɔlii po pilɛ ni, diolaŋ Yehochanan. Nduyɛ, i wa i baŋaa o yɔmndo choo. Mi keŋ chɔm maa, nyɛ dimiŋ o yaula soo a yoomu Chiisu wo okɔɔ maa mbo sɔla kumbɔɔ wo cho tonya.” O kpeekpei niŋ, “tɔndii kɔɔlii Yehochanannde cho tamaseliiyo ni le chɔmndo maa, mi Luomaŋnda ndaa chɛl le mi Chuuwa ndaa kumbu wanaa ndaa baŋ o yɔmndo choo wa.”

Mi che bɛɛ ma saaluŋ tɔndii kɔɔlii Yehochanannde i baŋaa o yɔmndo choo, kɛ wanaa bɔɔbɔɔ nɔ wɔ yiyaŋnda yɛ yɛlaŋ a mɛɛ nda baŋ Chiisu o yɔmndo choo yɛ okɔɔ. A koŋ kpou, i cho suɛi sɔvɛiye cho ni maa, mi ndaa kumbu viyaa ndaa baŋ o yɔmndo choo wa, nduyɛ maa ndaa nyindu ko dialuŋ ndaŋ o sɛi wanaa bala fonduaa niŋ te. Le hei, i cho kpendekele maa nyɛ Baabuiyo dimi a dialuŋ Chiisu woŋ kumbɔɔ o sɛiyo niŋndo cho tonya. Nyɛ wanaa tuau nyɔɔŋ lɛŋ nda saaluŋ ndo toolu nyɛ Baabuiyo dimi wo.

I hiou wa isɔvɛ ve cho ni maa, mi Chɛhowa dimi sindɛ pa maa a cho dialuŋ Chiisu woŋ kumbɔɔ o sɛi wana sulaa niŋ. Nduyɛ wana o wana tiuba mbo kuuna nyɛ Mɛlɛka dimi wo yɔŋnɔŋndo le.—Aisaya 53:​9; 55:​11.