LE HIBULUIYAA wa o Lɛŋnde Mɛyaaleŋ niŋ nda, a teleŋ ndaa waayiaa chiɔɔŋ ndaŋ ndo wɔsioo ndoo kanduŋ ni. Nduyɛ hau, teleŋ koŋ cho Tapioo ɔɔ Saa ni.

Paale paŋgei ndii fula leŋ waŋnda ndaa kandu palɛi chɔmndo ni, le sinaa mɛɛ kpɛ paŋgei viau yɛ. Nduyɛ ma cha maa, palɛi 29 ɔɔ 30 i chua ni tuupa mi i chuu. Mi ndaa tofa vɛlɛ paaleŋ le sinaa mɛɛ kpɛ palɛi wa o wɔsioo niŋ yɛ. Kɛ ma saaluŋ maa, palɛi nda chɔm le sinaa mɛɛ kpɛ paŋgei viau yɛ wo hiou wa i biŋgi o wɔsioo niŋ a i ndaa chɔm a paaleŋ okɔɔ wo. Le hei, ndaa nɔ ma nuuviaa nɛiyo le mi teleŋnda tiɔɔŋndaŋ ndaŋ la wa kpeŋkpeŋ. Le mi ndaa tosa hei, naapum ndaa nɔ ma chua palɛi itiŋ ɔɔ paŋgei ipilɛ okoŋ ma hol ndi o wɔsi cheleŋ kandɔŋndo. Keŋ wa mala mi paŋgoŋ muŋ wa kpeŋkpeŋ, nduyɛ mi teleŋ tualaa a teleŋ kuauwaa ndoo wa kpeŋkpeŋ.

Kɛ o teleŋ Muuse wo niŋ, mi Mɛlɛka dimi maa, wɔsi Isɔluɛiya nɔ mbo kanduŋ o paŋgii Abibi ve niŋ ɔɔ paŋgii Nisaŋ nde. Hau wana dimi maa, paŋguŋ muŋ cho Fuoo a Nyaakuɛiyo ni. (Ɛsɔ. 12:​2; 13:​4) O paŋgii keŋ niŋ ndaa bii bɔŋaŋ kuauwaa ŋchiɔɔ ni.—Ɛsɔ. 23:​15, 16.

Mi wana sinaa dɛnɛ pilɛ diolaŋ Amɛl Shulɛ dimi maa, i wa tɛtɛlɛ le mi waŋnda ndaa dɔu paŋgii cheleŋ o paŋgoŋ tɛɛŋ. Mbo dimi vɛlɛ aa, “Mɛɛ mi paŋgei ndii kilaŋ, nduyɛ mi paaleŋ lee del malaŋ ndaa bii Bɔŋaŋ Hiouwɔɔ Choo Wo. Te ndaa sina pɛ maa hei ve yɔŋnɔŋ o wɔsi wa lachi wo niŋ te, a faŋa paŋgei ipilɛ lechoo le halikpeŋ mbo bii o paŋgii Nisaŋ nde choo.”

Nɛiyo hoo Seiyaa Chɛhowaa soliŋ kpeku ni le sinaa paale nda nɔ ma bii Bɔŋaŋ Nyɛdiaa Ichɔl Salamanɔɔ wo. Nduyɛ o Nisaŋ 14 choo bɔŋaŋndo hoo ndoo biinuŋ ni. Teleŋndo lo landaŋ mi kundalaŋ chieeŋndo balɔɔ silɔ sina a paaleŋ ndeŋ okɔɔ. *

Kɛ vɛɛ Hibuluiya ndaa looku yɛ ma sina teleŋ paŋgei ndii nɔ le chuwɔɔ wo, a teleŋ i sɛnɛiye nɔ le kandɔŋndo wo? Hau, i cho tɛtɛlɛ le hei sinaa te a tofa pɛ yau ipaŋgu wa o pei choo wo ɔɔ o wa o nyɛ mapuuloo choo wo. Kɛ o sindɔɔ niŋ, mi hei ndii wa ikala le sinaa.

A teleŋ Mɛŋma Koŋgi Bɛnduaŋ, palɛi 30 waŋnda ndaa chɔm ni le paŋgei ipilɛ. (Chɛ. 7:​11-16, 24; 8:​3, 4) Okoŋ kɔɔli, palɛi Hibuluiya ndaa chɔm le paŋgoŋ ŋpum nde, ndii fuuluu palɛi 30 le. Mɛɛ mi paŋgii sɛnɛiye ndii fula, malaŋ ndaa kandu palɛi chɔmndo. Nduyɛ lepum mi ndaa chɔm palɛi 29 ɔɔ 30 tuupa mi paŋgii cheleŋ ndii fula.

A teleŋ pilɛ, mi Deeve nda Chonataŋ suaa a paŋgei okɔɔ aa: ‘Paŋgii sɛnɛiye cho siɔdii ni.’ (1 Saam. 20:​5, 18) Mɛɛ hei chɔm maa o teleŋ ndaa niŋ, paŋgei ndii fula le ma chii chɔm mɛɛ i cho palɛi chua yɛ. Kɛ vɛɛ Isɔluɛiya ndaa looku yɛ sina maa paŋgii sɛnɛiye kanduŋ? Sawala Chuuwa a naamula ndalaŋ la chɔm naa sɔɔŋ ŋtiŋ a hei okɔɔ. Teleŋ nda fula o biyɔɔ niŋ Babilɔŋndo, mi ndaa bii bɔŋaŋndaŋ o paŋgii ŋɔmmɛu ve niŋ. Nduyɛ mi wanaa kialaa ŋyamaa ndaa bii bɔŋaŋndo o paale 30 choo o paŋgii keŋ niŋ. Puaa haa ndaa nɔ kalaŋndo ni le chɔmndo teleŋ paŋgii sɛnɛiye nɔ le kandɔŋndo wo. Vɛɛ ndaa tosa yɛ hei?

Puaa ndaa wa mɛŋgɛlaa o fondaŋnda filioŋ ndaŋ nda ndaa mɛɛndaŋ choo ni, le sinaa teleŋ paŋgii sɛnɛiye cho fula wo. Te ndaa che dɔɔ pɛ mi paŋgei fula, a dimul wanaa kialu yamaŋ nda. Nduyɛ te wanaa kialu yamaŋ nda sina pɛ maa i cho tonya, ndaa dimul waŋnda kpou maa paŋgii sɛnɛiye kanduŋ. Kɛ lepum, wanaa mɛŋgɛlaa ndaa keleŋa paŋgii sɛnɛi wa fulaa ve chɔ le kanifuule, mi mɔmndo ndoo kumbu ndi. Yɛɛ  ndaa tosa yɛ o hei niŋ? Mi ndaa chua paŋgii nda wa niŋnde maa palɛi 30 i nɔ ni. Nduyɛ maa, paŋgii sɛnɛiye cho fula okoŋ kɔɔli.

Mi sawala Chuuwa a naamula ndalaŋ la chɔm vɛlɛ maa, mi wanaa kialaa ŋyamaa ndaa mɛndul yiŋndeŋ o Pembii Ɔlifiive choo Chulusalɛm ikɛi, le waŋnda chɔmndo maa paŋgii sɛnɛiye kanduŋ. Mi ndaa mɛndul vɛlɛ yiŋndeŋ o pembuŋ vilɛi cheleŋ choo o Isɔluɛi niŋ, le mi waŋnda sina a ndi okɔɔ. Mɛɛ teleŋ tiŋ hiou, ma kandu wanaa viamaa soliŋndo kpeku le waŋnda dimullo a ndi okɔɔ. Le hei, te paŋgii sɛnɛiye ndii kanduŋ dɔɔ pɛ, mi Chuuwaa wa Chulusalɛm a o Isɔluɛi niŋ nda kpou ndaa sina a ndi okɔɔ. Nduyɛ mi keŋ ndii tosa, ma bii baŋaŋnda ndaa nɔ le biyɔɔ laŋ a teleŋ pilɔɔ kpe.

Kɔfoo hoo lebɛŋgu cho num mala ma bii paŋguŋ maHibuluiyoŋ, bɔŋaŋnda ndaa biilaŋ, a teleŋnda ndala yɛ yɛlaŋ bila.