A Yindimiiyo 22, 1929 nda velu ya ni, o sɔndɔkɔlɔ pɔmbɔ pilɛ niŋ diolaŋ aa Nɔvili. Sɔndɔkɔlɔɔ hoo wa kpɛɛluŋ a Bastɔŋ, o Bɛlchiɔm Adɛnisi niŋ, nduyɛ chiɔɔŋ ŋɔmahiɔɔlu wa loŋ ni. I wa a kɔl kɛndɛ tau teleŋ ya wa chuaambɔ, mi wa a wanaa velu ya wa o chiɛi nɛi niŋndo. Lepaa o lepaa mi ya naa pɔmbɔ nuu Lemɔŋ naŋ ke nauwa nɔnɔɔ, nduyɛ miŋ naŋ kuɛ a mɛɛma nauwa o bɛɛ. O sɔndɔkɔlɔ naa niŋ, mi wana o wana ndoo tosa wallo diompilɛ le maaliaŋndo vellaa velle.

Finya nuu diolaŋ aa Ɛmil, nduyɛ kala nuu diolaŋ aa Alisi. Nda ŋiɔɔŋ kpou Katolikiiya nda wa ni. Mi ndaa kuɛ o kaŋndeŋ Kuɛɛndu kɛ kɛ. Kɛ a wɔsi 1939, mi kɔɔfaa huŋ o sɔndɔkɔlɔ naa fulaa Iŋkilaŋ, ma ke finya nuu yau Tiondoo, nduyɛ ma dimul ndu le mbo yɔŋgu tooloo le ndu. Haupa mi finya nuu sina maa o saaluŋ tonya Baabuiyo. Le hei, mbo kandu diomndaŋ veeloo o Baabuiyo niŋ. Kɛ mɛɛ o mal kɔlaŋ o kaŋndeŋ, mi wanaa naŋ chiɛɛliaŋnda tuulu kɔl tau a ndu, mi che bɛɛ a wa wanaa ichaŋya o tasela ndɔ. A wa finya nuu kindilaa le mbo hiou lachi a kɔlaŋ o kaŋnde Katolikiiya niŋ, nduyɛ mi ndaa hiŋaŋ diomndaŋ teleŋ o teleŋ a keŋ okɔɔ.

Teleŋ o teleŋ wanaa naŋ chiɛɛliaŋnda ndaa handu pɛ finya nuu nyɛ kindilaa choo, mi yaa tambu kɔllo tau. Keŋ tosa ni mi piɛi o Mɛlɛka lo a kɔllo kpou le mbo mala naa. A piɛile leŋ okɔɔ ya soo o bundɛi hei kandɔŋndo ni. Mɛɛ wanaa naŋ chiɛɛliaŋnda pɛŋgi naa nyɛpalaa tusioo choo, mi naŋ kɔl tau. Nduyɛ mi keŋ ke ya tiindaŋndo kɛsɛ maa Chɛhowa cho “Wana Muli piɛileŋ ndo ni.”

A Bukuloo 10, wɔsi 1940, mi kunda lemasa nda veelu aa Naasi o Chamani niŋndo, huŋ del Bɛlchiɔm choo a chɔuwo. Nduyɛ mi keŋ tosa mi wanaa bɔɔbɔɔ nyaanuŋ. Mi yuŋgu naa bɛɛ nyaanuŋ Filaŋsi batouwo. O nyaanɔŋ koŋ niŋ, lepum mi naŋ wa o  kpundɔɔ niŋ kanifuule, mi puaa chɔuwa Chamani a puaa chɔuwa Filaŋsi ndaa chiŋalaŋ ndapila a chɔuwo o fondaŋ naŋ wa wo.

Mɛɛ teleŋ tiŋ hiou, miŋ miiŋgu o sɔndɔkɔlɔ naa. Kɛ miŋ saaluŋ maa mi waŋnda koma chiimbuu nyɛm bɔɔbɔɔ naŋ nɔ woŋ. Tuŋ naa kinɛi naŋ komal loŋ ni, diolaŋ Bɔbi. Mi hei tosa mi nyunaŋ aa: ‘Le yɛɛ chɔulaŋ a dɛnɛ wɔɔŋndo cho yɛ?’

A teleŋ koŋ miŋ sɔla tɔnɔɔ tau, mɛɛ Ŋgɔɔ Ɛmil Suansi hiŋ naa yilɔɔ. a Bɛndu kundaa puaapilɛnɔɔ hoo wa ni, nduyɛ o wa kɔɔfaleŋ tosaa. Mbo soliŋ Baabuiyo kpeku le tɛɛsiaa nyɛkɛndɛi le sabu saŋgaa cho wo, nduyɛ mbo muli nyunala yaa nɔ a yoomoo okɔɔ laŋ. Mi keŋ tosa mi chɔɔlu chaŋyɛi yiŋgoloŋnde nɔ a Chɛhowa, okoŋ mi sina kɛsɛ maa Mɛlɛka kaalaa o cho ni.

Tuupa mi chɔuwo chuu, mi yuŋgu nuu ndoo chiikaŋ a Seiyaa Chɛhowaa cheleŋ, nduyɛ mi naŋ suukaŋ a sɔɔŋ bɔɔbɔɔ okɔɔ. A Naandɔɔ 1943, mi Ŋgɔɔ Choosɛ Nikolaa Minɛti, huŋ o sɔndɔkɔlɔ naa le suɛi yɔŋgoo. Mbo nyuna naa aa: “Nɛɛnɛ yeema yɛ mbo sɔla yiŋɔɔ?” Mi finya nuu heelu baa, okoŋ ya bɛɛ mi heelu baa. Miŋ sɔla yiŋɔɔ o pee pɔmbɔ wa o chiɛi nɛi ikɛiyo.

A Yindimiiyo 1944, mi puaa chɔuwa Chamani kandu chɔulaba nda mɛɛlaa, le chɔu chieeŋ diiŋ ndɔɔ, o Yulopi ba paaleŋ le del lo niŋ. Chɔulaba koŋ ndaa veelu ni aa, Chɔulaba Bɔliŋgi wo. O foŋndaŋ chɔulaba koŋ wa wo ikɛi naŋ wa ni. Le hei, le paŋgei ipilɛ kpulukuu, ŋ wa o foŋndaŋ wa o chiɛi naa bɛŋgu le vioŋnɔŋndo wo niŋ. Paale pilɛ, mɛɛ ya fula o bɛɛ le chɔluaa naa nyɛdiaa kioo, mi bɔmndaŋ la huŋ del o chiɛi nɛi niŋ, okoŋ mi la tɛɛmbuu yiŋndɔ wa o paŋga naa choo wo. Puaa chɔuwa le Amɛlika, opilɛ wa o foŋndaŋ naŋ duau nyɛdiaa le chɔluaa wo ikɛi. Mbo deŋi choo choo kpeleŋ aa: “Hini lɛŋ!” Mi nyaanuŋ chɔ chɔ okoŋ mi kɔ hini ndu ikɛi kpɛɛluŋ. Mbo handu ya mɔsil ndɔ chɔuwo o lebol le ya mandaa.

Mɛɛ chɔuwo chuu, miŋ kindiŋ kpoke le miŋ wa suukaŋndo teleŋ o teleŋ a puaapiliaa a ndepiliaa o kundaa Lɛɛchi niŋ. Chɔŋ o fondaŋ naŋ wa wo kɔ naa kunda koŋ wa wa, tiŋndo wa le mɛɛliilaŋ 56. Nduyɛ kumbuii ba luaŋndo kundaa hoo wa ni. Mɛɛ  teleŋ tiŋ hiou, miŋ kila kunda pɔmbɔɔ le Baabuiyo pɛɛkoo o Bastɔŋ niŋ. A teleŋ koŋ, mi kandu wallo a kunda bii paawaa wo, nduyɛ mi sɔla dikeŋnaŋndo le pɛɛkoo a sawaa okɔɔ. Okoŋ kɔɔli, mi kandu wallo o chiɛi lasawaa niŋ. A 1951, miŋ kɛɛsiaa le bɔŋaŋ ibuŋgaa biyɔɔ o Bastɔŋ niŋ. Nduyɛ waŋnda le kɛmɛ wa o bɔŋaŋ koŋ ni. Ndepilɛnɔ dialuŋ fulaa pila Ɛli Luta wa ni. Ndu bɛɛ wa o bɔŋaŋ koŋ. Mbo buli tiŋndo le mɛɛliilaŋ 31 o nɛɛsoo choo, le hunɔɔ o bɔŋaŋ koŋ. Teleŋ biŋgi okoŋ kɔɔli miŋ kaaliaŋ, nduyɛ mi yii kol ndɔɔ. Kɛ ndaa veelu niŋ Ɛli o sukuuwo Kiliaadi nyɔɔ ndoo viu wɔ bɛɛ le, tuupa mi hei yɔŋnuŋ. Lelaŋ mbo poonyial fondaŋ lebollo maa o tiu niŋ ba mbo kuɛ le, nduyɛ mbo tɛɛsial nda le sabu koŋ. Ŋgɔɔ Nɔɔ wa chilaŋ chuaa a teleŋ koŋ ni. Le hei, mbo poonyial Ɛli yauwo, nduyɛ mbo dimul ndu maa paale wa niŋ mi ndu nda pɔnɔ ndɔ kuɛ o sukuuwo kiliaadi. A Doŋdoŋndo wɔsi 1953, miŋ chal o nɔɔ niŋ.

Wɔsi pilɛ koŋ, mi ya a Ɛli kua o bɔŋaŋ biinuŋ Yankee stadium, Niu Yɔk wo a suɛi lebolle aa, Kɛɛsiaa Chieeŋ Sɛnɛiyo. Teleŋ naŋ wa loŋ le bɔŋaŋndo wo, mi chiikaŋ a puaapilɛnɔ pilɛ, nduyɛ mbo ke ya wali kɛndɛ kɛndɔɔ le tosaa. Kɛ mbo dimul la maa, I nɔ mi kɔ chal Amɛlika le wali koŋ tosaa. Mɛɛ ya a Ɛli piɛi a ndi okɔɔ, miŋ kɛɛsiaa le miŋ miiŋgu Bɛlchiɔm, miŋ kɔ toolu kunda pɔmbɔ wa Bastɔŋ ndo. Wanaa dimiaa yɔŋgu kɛndiaa le tɔ kinɛi wa o kunda koŋ niŋ ni. O wɔsioo pilɔɔ niŋ, mi Ɛli vialu po naa tasoo, nduyɛ miŋ ke ndu diolaŋ aa, Sɛɛchi. Paŋgoŋ ŋɔmmɛu okoŋ kɔɔli, mi Sɛɛchi del a naa, okoŋ mbo wu. Miŋ bii mɔnɛi tau. Kɛ miŋ piɛi o Chɛhowa lo a ndi okɔɔ, nduyɛ mi tiindaŋ naŋ nɔ maa waŋnda cho miiŋgu yoomu wo luei naa yoomuaŋ.

A saa wɔsi 1961, mi saaluŋ wali wana tosa palɛi itiŋ o lɔɔ tɛɛŋndo. Nduyɛ keŋ wa ya mala le mi yaa tosa kɔɔfale lɔɔlɔɔ leŋ. Paale kpeekpeile ya sɔla wali koŋ ndeŋ, mi wanaa wa chilaŋ chuaa o lɛuve Bɛlchiɔm nda opilɛ veelu ya o foŋndo choo. Mbo nyuna ya te I tiu pɛ ba mi kandu buɛile ibuŋgalaŋ tosaa. Kɛ mi nyuna ndu aa: “O bɛnda fɛŋ mi tosa kɔɔfaleŋ tuupa mi kandu buɛile ibuŋgaleŋ tosaa le?” Mi puaapiliaa wa kaŋ chilaŋ chuaa wa chɛl kɛɛsiaa nuu. Mɛɛ naŋ tosa kɔɔfaleŋ le paŋgoŋ ŋɔmaa, miŋ kandu buɛile ibuŋgaleŋ tosaa a Tapioo 1962.

Mɛɛ naŋ tosa buɛile ibuŋgaleŋ le wɔsilaŋ la tiɔɔŋ, ma veelu naa o Bɛtɛɛl Bulusɛl. A Saa wɔsi 1964 naŋ kandu wallo loŋ ni. Miŋ sɔla salala bɔɔbɔɔ o wali sɛnɛi nda ke naa koŋ ndo niŋ. Mɛɛ Ŋgɔɔ Nɔɔ kuɛ lɛuvii nɛi yilɔɔ a wɔsi 1965, teleŋ biŋgi o koŋ kɔɔli mi kɔndɔfillo bii ya mɛɛ nda yulu ya iso, le waa wana chua chilaŋ o lɛuve wo. Okoŋ kɔɔli, ma veelu ya a Ɛli o sukuuwo kiliaadi, le toŋgo 41. Nyɛ Ŋgɔɔ Nɔɔ ndoo dimul Ɛli wo ndoo peeluŋ koŋ ni, nduyɛ wɔsilaŋ tɔ a layaa laa hiou niŋ ni, chɔŋ a teleŋ koŋ. Mɛɛ naŋ chii sukuuwo kiliaadi, miŋ miiŋgu o lɛuve bɛlchiɔm.

O wɔsila hiou laŋ niŋ, mi sɔla dikeŋnaŋndo le pɛɛku ya sɔla a sawaa okɔɔ wo soliŋndo kpeku, le suŋgɔɔ le dila wanaa Chɛhowaa o Yulopi niŋ, a o fondaŋnda cheleŋ. (Filipi. 1:7) Mi hei tosa mi chiikaŋ a wanaa tosa wallo o masaleŋ niŋnda, o lɛŋii nda kuuna wali naa otiŋ ɔɔ kpou ve niŋ, hiouwɔɔ  55. Kposoŋ bɛɛ yaa chɔɔmuŋ o waŋnda lo maa wana sina a sawaa okɔɔ wo le ya cho le. Kɛ mi yaa chɔɔmuŋ o nda lo maa, Wana Mɛlɛkaa ya cho ni. Teleŋ o teleŋ mi yaa nyuna Chɛhowa o piɛileŋ niŋ le mala ndɔɔ, kanifuule I sina maa, “Mɛɛ Mɛlɛka nɔ nuaa kpaayaa mɛŋndaŋ o peelo choo, ba o yeema maŋ mi ma kuɛ wo loŋ ma kua ni yɛ, lende o nɔ kpaayaa yiyaŋ masa bɛndoo choo ni.”—Pulɔ. 21:1.

Suɛi yɔŋnaŋii pilaŋ ya kɔllo tau ve, cho teleŋ ya chiikaŋ a wana pilɛ tosa wallo o chiɛi lasawaa o Yulopi niŋndo ni. Mi yaa kindiŋ teleŋnda bɔɔbɔɔ le ndu chɔɔ le mi suukaŋ a ndu, kɛ fonda bɛɛ yaa sɔla le. O mɛɛlulaŋ kpɔŋ, mbo chɛl le miŋ chiikaŋ. Mbo dimul la aa: “Chemchemndaŋ ma ŋuɛɛnu kinɛi ya cho num ke ni, le pilɛ bɛɛ I hendu niŋ lechoo le.” Okoŋ mi tundu bolleŋ mi piɛi o Chɛhowa lo. Mi siooŋnde bii po koŋ, nduyɛ mbo nyuna ya le nyɛ ya wa tosaa wo. Mɛɛ ya heelu bolleŋ, mi dimul ndu aa: “I mel Mɛlɛka balika kanifuule, wana wali ndɔɔ ŋ cho ni.” Mbo nyuna ya aa: “Yɛɛ ŋ yiyaŋ yɛ?” Mi chɔm ndu Luomaŋnda 13:4. Polotɛstaŋnɔɔ po koŋ wa ni. Le hei, mi bolle Baabuileŋ ndeŋ le pilaŋ ndu kɔllo tau. Fulamakɔɔlioo wa ni, miŋ suukaŋ le chemchemndaŋ beleyaa, nduyɛ mi sɔla batiuwaa. Mbo dimi pɛŋ maa, o ke wali Seiyaa Chɛhowaa cho tosaa wo bɛɛleŋ.

O wɔsila hiou laŋ niŋ, wanaa Chɛhowaa chɔulaba niŋ le dila ndalaŋ o Yulopi niŋ, a waa yuŋyeŋ okɔɔ, chuauwa mandaa, paawaa malɔɔ, a sɔɔŋ cheleŋ. Dikeŋnaŋ bɛndoo pila i cho le ya ni, le chɔɔ mɛɛ Chɛhowa mala naa o sɔɔŋ muŋ niŋ le batiuwaa sɔlaa yɛ. Seiyaa Chɛhowaa sɔla niŋ dioo o sɔɔŋ hiouwɔɔ 140 niŋ, o Toŋgo Kialaa Ŋyama Bɛndoo o Yulopi Niŋ.

O wɔsiŋ 1990 niŋ, mi tosa wallo a puaapilɛnɔ pilɛ o fondaŋnda leboltaŋ, Ŋgɔɔ Filipi Bulɔŋli a puaapilɛnɔ pilɛ fulaa Itali diolaŋ Vɔlita Faniti, le suŋgɔɔ le dila puaapiliaa naa o Kiuba niŋ. Nduyɛ a teleŋ koŋ, wali naa otiŋ wa o kuunaa bɛŋgu. Mi poonyial wana bɛndu wa wallo o Bɛlchiɔm niŋ le Lɛŋnde Kiuba leŋ ndo yauwo. Okoŋ kɔɔli, mi chiikaŋ a wana wa chilaŋ chuaa o suɛi keŋ niŋ ndo. O bɔŋaŋ tase naŋ bii a ndu wo niŋ, ŋ sɔla batiuwaa le ndu tɛɛsiallo sabu masaleŋ le kuuna wali naa otiŋ o lɛŋnde leŋ niŋndo le.

Mɛɛ naŋ piɛi o Chɛhowa lo le nɛi chɔmaa, miŋ nyuna le ma chɛl naa miŋ kuɛ a Baabuilaŋ 5, 000 o Kiuba niŋ. Nduyɛ ma chɛl naa. Mi puaapiliaa o Kiuba niŋ sɔla Baabuila laŋ. Le hei, miŋ yiyaŋ maa Chɛhowa wa sɛmbɛ naa dɔwɔɔ sala ni. Okoŋ kɔɔli, miŋ nyuna vɛlɛ le ma chɛl naa, le miŋ yɔŋ Baabuila cheleŋ 27,500. Mi masaleŋ le chɛl vɛlɛ naa. I wa a kɔl kɛndɛ tau le puaapiliaa a ndepiliaa naa malaa o Kiuba niŋ, le ma nɔ Baabuilaŋ a ba nda.

I kuɛ niŋ Kiuba teleŋnda bɔɔbɔɔ, le malaa mi wali naa faŋaŋ o kuunaa bɛŋgu. Nduyɛ a teleŋnda  laŋ, mi kila chaŋyɛi kɛndɛi a wanaa bɔɔbɔɔ wa wallo o masaleŋ niŋnda.

O wɔsi 1994 niŋ, waŋnda hiouwɔɔ 1,000,000 nda dii, o chɔulaba lekaa yɔŋnuŋ o Luwaŋnda niŋndo ni, le yɛle tulaa le ndaa nɔ le wanaa wa o kaale Tutsi leŋ choo wa. I cho suɛi imɔnɔ le sinaa maa puaapiliaa naa apum wa o wanaa sɔla kaŋ piɔmndo wa tɛɛŋ. Teleŋ biŋgi okoŋ kɔɔli, ma ke puaapiliaa atiŋ wallo, le puaapiliaa a ndepiliaa sɔɔŋ palaŋ muŋ komal la, malaa yɔŋgoo.

Mɛɛ naŋ fuuluu Kikali, chiee bɛndoo le Luwaŋnda, miŋ cha mɛɛ chiliŋuŋ yekpandioŋ buuluu fondaŋ hiviaa wa landaŋ a lɛuve wo, vɛlɛ a fondaŋ ndaa kɛsi yaulaŋ ndo yɛ. Miŋ tuɛi sɔɔŋ yɔŋnaŋ ŋmɔnɔŋ a mɛɛ nda dii puaapiliaa a ndepiliaa a lɛɛŋndaŋ yɛ. Kɛ miŋ tuɛi vɛlɛ a mɛɛ puaapiliaa wa kaalaa chɔmaŋndo yɛ. Le tamaseliiyo, miŋ chiikaŋ a puaapilɛnɔ pilɛ wa o kaale Tuusi leŋ niŋndo. Puaapilɛnɔɔ hoo wa o viaŋnaŋ o sooŋndo niŋ o chiɛi yuŋgu pilɛ ikɛi le palɛi 28. Seiyaa Chɛhowaa yuŋgu koŋ wa ni, nduyɛ ma manda ndu mi che bɛɛ o kaale Hutu leŋ choo nda fula ni. O bɔŋaŋ naŋ bii Kikali wo, miŋ kindiŋ le puaapiliaa a ndepiliaa hiouwɔɔ 900 kɔl dɛɛniaa kioo, le ma lo o laalaŋ ndaa choo.

Okoŋ miŋ mal loŋ, miŋ taŋ o Lɛŋnde Saii leŋ niŋ, le nda veelu hau aa Lɛŋnde Koŋko leŋ ndo. Seiyaa Chɛhowaa kunda bɛndu mal Luwaŋnda, ma kua o Kampiilaŋ niŋ o chioo Koma ikɛiyo naŋ kuɛ nuuviaa ni, kɛ ŋ tiuba le nda saalɔŋndo le. Le hei, miŋ piɛi o Chɛhowa lo le mbo mala naa le halikpeŋ miŋ saaluŋ nda. Okoŋ, miŋ cha waŋndo hunɔɔ naa lachi. Miŋ nyuna ndu te o sina pɛ Sei Chɛhowɛinɔ kɛ kɛ. Mbo muli aa: “Sei Chɛhowaa ya cho ni. I naŋ niŋ bɔɔ kɔl le kɔlaŋ a nya o Kunda Yɔŋgu Malaa le Wanaa Kpundɔɔ Komal la Wo” lo. Mɛɛ naŋ chii bɔŋaŋ kɔl dɛɛniaa biyɔɔ a kundaa hoo, miŋ kɔ bii vɛlɛ bɔŋaŋ cheleŋ a luɛfichiiya 1,600, le nda kɔl dɛɛniaa kioo. Miŋ veelul nda vɛlɛ diomndaŋ o yau Dialii Kuumbaŋ Choo Ve yɔŋndo niŋ. Mɛɛ puaapiliaa a ndepiliaa tuei diomnda Dialii Kuumbaŋ Choo Ve poonyial nda laŋ maa, “ŋ choo loonɔŋndo a nya teleŋ o teleŋ o piɛileŋ niŋ, nduyɛ ŋ nɔ tiindaŋndo maa Chɛhowa mel niŋ nya le,” ma naŋ kɔl tau. Tonyaa kpeekpei diomnda laŋ la wa ni. Hau, Seiyaa Chɛhowaa hiouwɔɔ 30,000 cho Chɛhowa piɛiyo o Luwaŋnda niŋ ni!

Mɛɛ naŋ chii sɔŋgɔ wɔsilaŋ 58 naa laa ni kaalaa Ɛli, mbo sɔla piɔmndo a wɔsi 2011. Mi dimul Chɛhowa mɛɛ kpɛ yaa tambu kɔllo yɛ. Le hei, mi piɛi o ndu lo nduyɛ mbo dɛɛniaa ya kɔllo. Mi yooŋgu kɛndɔɔ dimioo o wanaa naŋ chiɛɛliaŋ nda lo luei ya vɛlɛ yoomuaŋ tau.

Mi che bɛɛ I cho niŋ o wɔsiŋ 90 niŋ, kɛ mi dimi wɔ yooŋgu kɛndɔɔ o lɔɔ o lɔɔ bɛŋgu. I cho a kɔl kɛndɛ le Kunda Suaa le Dila Seiyaa Chɛhowaa o lɛuve Bɛlchiɔm ndo malaa, le acheleŋnda dimullo suɛi nii yɔŋnaŋnde, a le feleŋguaa cho o yuŋgoo Bɛtɛɛl niŋnda kɔl dɛɛniaa kioo.

O cho niŋ wɔsilaŋ 84 chɔŋ a teleŋ tase ya piɛi o Chɛhowa lo wo. Yoomu sɔviɔɔ pila ya wa koŋ kandɔɔ ni, o tosa mi sɔɔŋguu Chɛhowa ikɛi kpɛɛluŋndo. O yoomu nuu niŋ kpou, I nɔɔ bɔɔ balika melaa le mɛɛ Chɛhowa ndoo muli piɛile nileŋ yɛ.—Sam 66:19. b