A sɔɔŋ yɔŋnuŋ Choosɛ woŋ okɔɔ Maatiu soo ni. Mbo tɛɛsiaa mɛɛ Choosɛ ndoo tosa yɛ mɛɛ o tuei maa Meele cho a folioo, lɔma o sɔl mi maalikɛinɔɔ tɛɛsial ndu suɛi keŋ ndo, vɛlɛ a mɛɛ o tol nɛi chɔmaa maalikɛinɔɔ kɔɔli yɛ. (Maatiu 1:​19-25) O chɔm vɛlɛ mɛɛ maalikɛinɔɔ dimul Choosɛ o lɔma sɔlaŋ niŋ le mbo nyaanuŋ Ichipi a yuŋgu ndɔɔ yɛ, nduyɛ mɛɛ o diikuŋ yɛ. Okoŋ kɔɔli, mi Maatiu dimul naa maa mi Choosɛ sɔl lɔma cheleŋ. O lɔma sɔlaa mamaŋ niŋ, mi maalikɛinɔɔ dimul ndu le mbo miiŋgu o lɛŋnde Isɔluɛileŋ niŋ, nduyɛ mbo miiŋgu, okoŋ, mbo kɛɛsiaa le mbo chal a yuŋgu ndɔɔ o Naasaluɛi niŋ. (Maatiu 2:​13, 14, 19-23) O bolii ŋiiŋ tasei o yau Maatiu wo niŋ, mi Maatiu poonyiaa diola Choosɛ laŋ bɛmbɔɔ 15, kɛ diola Meele laŋ bɛmbɔɔ 10 kinɛi.

Kɛ kona Luku wo ndu, a Meele okɔɔ o soo ni. O tɛɛsiaa mɛɛ maalikɛinɔɔ Kebilɛl kuɛ o Meele lo yɛ, mɛɛ Meele kuɛ wanayɛi nduɛi Lisabɛɛ yilɔɔ yɛ, vɛlɛ a chandɔɔ o chandu Chɛhowa wo. (Luku 1:​26-56) O tɛɛsiaa vɛlɛ nyɛ Simiɔŋ dimul Meele a nyɛpalaa keeku niŋ Chiisu choo o chilaŋ niŋ ndo. Okoŋ kɔɔli, mi Luku tɛɛsiaa teleŋ Chiisu nda yuŋgu ndɔɔ kuɛ o maaŋndo niŋ teleŋ o wa wɔsilaŋ 12 ndo. O konaa hoo niŋ bɛɛ, nyɛ Meele dimi wo Luku poonyiaa ni, o cho nyɛ Choosɛ dimi wo le. Nduyɛ mbo dimul naa maa mi sɔɔŋ yɔŋnuŋ muŋ ndoŋ piiliaŋ Meele tau. (Luku 2:​19, 34, 35, 48, 51) O bolii ŋiiŋ tasei Luku poonyiaa ve niŋ, mbo poonyiaa diola Meele laŋ bɛmbɔɔ 26, kɛ diola Choosɛ laŋ bɛmbɔɔ 10 kinɛi. Lelaŋ, Maatiu dimul naa tau a yiyaŋ Choosɛ wo vɛlɛ a nyɛ o tosa wo. Kɛ Luku ndu, a yiyaŋnda Meele laŋ vɛlɛ a nyɛ yɔŋnuŋ ndu wo okɔɔ o soo ni.

Pulale yuŋgu Chiisu fula choo leŋ bɛɛ, yaula tiɔɔŋ ndaŋ la dounuŋ kona pilɛ a leŋ okɔɔ le. Maatiu poonyiaa pulale yuŋgu Choosɛ leŋ ni, nduyɛ mbo chɔm maa Chiisu, po Choosɛ manda wo, ndoo nɔ dioo kpeekpei le challe o masale Deeveleŋ choo. Le yɛɛ? Kanifuule, o pulale Masaa Deeveleŋ choo Choosɛ fula ni sanaa a Sɔlɔmɔŋ, po Deeve wo. (Maatiu 1:​6, 16) Kɛ Luku ndu, a pulale yuŋgu Meele leŋ okɔɔ o soo ni, nduyɛ mbo chɔm mɛɛ Chiisu nɔ dioo le challe o masale Deeveleŋ choo yɛ, “a wana chieeyɛi nduɛi okɔɔ.” (Luomaŋnda 1:​3, 4) Le yɛɛ? Kanifuule, chua mama Deeve wo Meele wa ni, o fula o pulale Netaŋ ndeŋ choo wo, po Deeve wo. (Luku 3:​31) Kɛ le yɛɛ Luku dounuŋ kona maa chua Hɛli wo le Meele wa le? Kanifuule, diola puaa o yuŋgoo niŋ kinɛi la cho la poonyiaa o konala kpeekpeilaŋ niŋ ni. Lelaŋ, mɛɛ Luku poonyiaa diola Choosɛ laŋ, nduyɛ mbo tɛɛsiaa maa po Hɛli wo o wa ni, mi waŋnda bii bila maa lefoo Hɛli Choosɛ wa ni.—Luku 3:​23.

Konala Maatiu nda Luku poonyiaa a pulale yuŋgu Chiisu leŋ okɔɔ wo chɔm maa, Chiisu wa Mɛsayanɔ Mɛlɛka chua buŋgɛi yo ni. Wanaa bɔɔbɔɔ ndaa sina maa o pulale Masaa Deeveleŋ choo Chiisu fula ni. Le saboo hoo, Falesiiya a Sadusiiya bɛɛ ndaa sɛɛŋgiaa ndi le. Kona Maatiu nda Luku wo a pulale yuŋgu Chiisu leŋ okɔɔ cho kindi tiindaŋ naa. Nduyɛ, hoo ke naa tiindaŋndo maa mɛila Mɛlɛkala lo le peelɔŋndo laŋ la cho peelɔŋ.