1. Yɛɛ Aisaya dimi yɛ a Chiisu okɔɔ, nduyɛ le yɛɛ hei cho yɛ suɛi kɔl dɛɛniaa?

NYƐ Aisaya dimi a Chiisu Kiliti okɔɔ wo dɛɛniaa naa nduyɛ mbo ke naa tiindaŋndo. Mi Aisaya dimi maa Chiisu “kilul niŋ waŋnda iyama a nyɛ o che a hɔlta ndɔlaŋ ndo, kɛlɛŋgaa a nyɛ o tuei a nila ndɔlaŋ ndo le.” Nduyɛ maa “o cho wanaa tambɛiya yamaŋ kilul o nɛi sakpo.” (Aisaya 11:​3, 4) Le yɛɛ hei cho yɛ suɛi kɔl dɛɛniaa? Kanifuule, ŋ cho o chieeŋ hɛliaŋ lekaawo niŋ, o waŋnda kilul acheleŋnda yamaŋ le nyɛ nda cha a lehɔl lo wo. Ŋ yeema bɔɔ wana kialaa ŋyama walaŋndo, Chiisu. Nduyɛ kposoŋ bɛɛ o kilul naa niŋ iyama a mɛɛ o che naa yɛ le!

2. Yɛɛ Chiisu dimullɛ naa le tosaa, nduyɛ yɛɛ naŋ cho yɛ pɛɛku o buŋgɛi hei niŋ?

² Lepaa o lepaa, miŋ dimi sɔɔŋ a wanaa cheleŋnda okɔɔ. Kɛ ŋ cho walaŋ maa Chiisu le. Lelaŋ, sɔɔŋ naŋ dimi woŋ bɛɛ cho walaŋ te. Nyɛ naŋ cha a lehɔl lo nyindu naa le hei tosaa ni. Kɛ mi Chiisu dimul naa aa, “La pɛŋgi waŋnda yamaŋ kilullo le kiolɔɔ leŋ. La wa waŋndo yamɛi kilullo pɛ, la tosa ndi o nɛi sakpo.” (Chɔŋ 7:​24) Lelaŋ, Chiisu yeema naa miŋ wa maa ndu, nduyɛ  miŋ pɛŋgi acheleŋnda yamaŋ kilullo a mɛɛ naŋ cha nda yɛ. O buŋgɛi hei niŋ, ŋ cho yaasiaa nyɔɔŋ sala yaa, ŋ nyindu naa le sɔɔŋ pum dimioo woŋ. Kɔɔleŋ ɔɔ kaale waŋndo, mɛɛ kpɛ o nɔ kanioŋ yɛ, nduyɛ a mɛɛ o nɔ wɔsioŋ yɛ. O suɛi kɛ kɛ niŋ, ŋ cho pɛɛku mɛɛ naŋ diikuŋ Chiisu yɛ, nduyɛ ŋ kilul waŋnda yamɛi a mɛɛ naŋ cha nda yɛ le.

3, 4. (a) Le yɛɛ Pitɛ siŋga yɛ yiyaŋ ndoo nɔ le wanaa ve ŋChuu le wa? (Tofa fotueiyo o peele naŋ kandu leŋ choo.) (b) Tonya sɛnɛi kuɛɛ Chɛhowa ndoo pɛɛku yɛ Pitɛ?

³ Yiyaŋndɔ a mɛɛ Pitɛ ndoo yiyaŋ teleŋ nda dimul ndu le kɔlaŋ Sisaliaa wo, o bɛɛ Kɔniiliɔɔ ve Chuunɔ le wo! (Walta Wanaa Chiisuaa 10:​17-29) Chɔŋ a teleŋ Pitɛ wa o pɔmbɔ wo, ndoo laalaŋ maa wanaa ve ŋChuu le wa ndaa dindu le. Kɛ mi suɛi pum yɔŋnuŋ i ndii siŋga yiyaŋ ndɔɔ wo. Le taamaseliiyo, mi Mɛlɛka ke ndu yilaŋndo. (Walta Wanaa Chiisuaa 10:​9-16) O yilaŋ koŋ niŋ, mi Pitɛ cha nyɔɔ tolɔɔ lɛŋ fulaa o choo choo niŋ maa kola bɛndu, o wa o piaa cha a visiaa ndaa di le wa leniŋ. Okoŋ, mbo tuɛi diomndo aa, “Pitɛ, chɔŋ ma dii visiaa haa ma de.” Mi Pitɛ tuɛi diomndo hoo bɛmbɔɔ le yaa, kɛ mbo kɛɛ kpooŋ. Le bɛmbɛ kɛ kɛ, mbo tuɛi diomndo aa, “Nyɛ o nyɛ Mɛlɛka dimi pɛ maa o naŋ le dioo, num dimi maa o niŋ le dio le le.” Mɛɛ Pitɛ chii yilaŋndo hoo chɔ, ndoo bii nyɛ dimiŋ hoo wo bila le. O viu bɛɛ le, mi kiilaa chɛŋ o Kɔniiliɔɔ lo wa huŋ. Mi nyina diandaa dimul Pitɛ le kɔlaŋ o Kɔniiliɔɔ lo bɛɛ. Okoŋ, mbo kua latulu a kiilaa kaŋ.

⁴ Te Pitɛ ndoo kelu pɛ yamɛi “le kiolɔɔ leŋ,” kposoŋ bɛɛ o ve lakɔ o Kɔniiliɔɔ lo bɛɛ le. Chuuwa ndaa kue o wanaa cho ŋChuu le wa lo bɛɛ le. Kɛ le yɛɛ Pitɛ ndoo kuɛ yɛ niŋ? Mi che bɛɛ ndoo nɔ kaa hɛliaa le wanaa ve ŋChuu le wa, kɛ yilaŋii o che ve vɛlɛ a nɛi chɔmaa nyina diandaa ke ndu wo siŋga yiyaŋ ndɔɔ ni. Mɛɛ Pitɛ chii Kɔniiliɔɔ nilaŋ yaŋɔɔ, mbo dimi aa, “I sina niŋ maa i cho tonya maa Mɛlɛka hɛli ŋwaŋnda chiee le. Wana o wana piɛi ndu pɛ, mbo wa sakpo o kelala ndɔlaŋ niŋ pɛ, a yɔŋ bɛɛ aa lɛŋnde cheleŋ o fula ni, ndu Mɛlɛka chua ni maa wana ndɔ.” (Walta Wanaa Chiisuaa 10:​34, 35) Pitɛ ndoo naŋ bɔɔ kɔl a sinapɛŋgu sɛnɛiyo hoo, nduyɛ hei wa Kilisiɔŋnda kpou piiliaŋ. O nɛi kuɛɛ choo?

5. (a) Yɛɛ Chɛhowa yeema yɛ mi Kilisiɔŋnda kpou sina? (b) Mi che bɛɛ naa ŋ sina tonyaa, yiyaŋnda kuɛɛ naŋ nɔ yɛ lepum?

⁵ Mi Chɛhowa soliŋ Pitɛ kpeku le mi Kilisiɔŋnda kpou bii bila maa Chɛhowa cho wana hɛliaa le. Le Chɛhowa ndu, kɔɔle naaleŋ, kaale naaleŋ, a suɛi maŋgalɛi naŋ dimi ve cho nyɛ o nyɛ le. Te o yɔŋ pɛ miŋ nɔ siooŋii Mɛlɛkɛi, nduyɛ miŋ tosa nyɛ cho o kɛndɔɔ wo, o nɔla mbo chɛl naa. (Kaleesiaŋnda 3:​26-28; Sɔɔŋ Chɔɔmaŋndoŋ 7:​9, 10) Kɛlɛŋgaa a sina niŋ hei. Kɛ te o wa yɛ maa o lɛŋnde ɔɔ yuŋgu nɔ hɛliaŋ lekaawo niŋndo ŋ sul ni? O yɔŋ bɛɛ ma yiyaŋ maa a nɔ kaa hɛliaa  le, baa i yɔŋnuŋ pa le kaa hoo nɔɔ nyɛɛmbɔ? Mɛɛ Pitɛ chii acheleŋnda mala le sinaa maa Mɛlɛka cho wana hɛliaa le, mbo chɔm vɛlɛ kaa hɛliaa okoŋ kɔɔli. (Kaleesiaŋnda 2:​11-14) Lelaŋ, vɛɛ naŋ diikuŋ yɛ Chiisu nduyɛ miŋ pɛŋgi acheleŋnda yamaŋ kilullo le nyɛ naŋ cha a lehɔl lo?

6. (a) Yɛɛ mala yɛ naa le kaa hɛliaa malɔɔ? (b) Yɛɛ kona puaapilɛnɔ wa chilaŋ chuaa wo poonyiaa wo chɔm yɛ wana suu o cho wo?

⁶ Le sinaa te ŋ nɔ pɛ kaa hɛliaa, ŋ nɔ miŋ yaasiaa naapila. Ŋ nɔ miŋ tuu kaa naa a nyɛ naŋ pɛɛku o Diom Mɛlɛkaa niŋndo. (Sam 119:​105) Naapum ŋ nyuna chaaŋ naa le mbo chɔm naa te ŋ nɔ pɛ kaa hɛliaa. Kanifuule, naapila nɔla miŋ che maa ŋ nɔ kaa hoo le. (Kaleesiaŋnda 2:​11, 14) Naapum miŋ nɔ kaa hɛliaa nduyɛ ŋ ve bɛɛ pɛɛŋ o sina choo le! Hei ndii yɔŋnuŋ puaapilɛnɔ wa chilaŋ chuaa wo ni. Mbo poonyiaa konaa a pɔnɔɔ a lanɔ wa wallo kekelee o wali lɔɔlɔɔ Mɛlɛkaa niŋndo okɔɔ. O kaale waŋnda ndaa chua chɔdɔ leŋ niŋ pɔnɔɔ ndoo fula ni. Mi puaapilɛnɔ wa koŋ chilaŋ chuaa wo poonyiaa sɔɔŋ kɛndɔŋ tau a pɔnɔ koŋ okɔɔ. Kɛ mbo chɔɔlu dimi aa, “Mi che bɛɛ [o kaaleŋ ndeŋ niŋ o fula ni], kɛ kaala ndɔlaŋ, vɛlɛ a mɛɛ o cho yoomu ndɔɔ biyɔɔ yɛ, mala acheleŋnda le ma bii bila maa o cho [wanaa fula o kaale leŋ niŋnda] kpou le cho a nɔɔlɛi le, a mɛɛ wanaa bɔɔbɔɔ fula o kaaleŋ [ndeŋ] niŋnda cho yɛ le.” Yɛɛ hei pɛɛku yɛ naa? Mɛɛ mɛɛ naŋ nɔ kalaŋndaŋ o kɔɔna Chɛhowaa niŋ, ŋ nɔ miŋ yaasiaŋ naapila nduyɛ miŋ chɛl mi waŋndo mala naa le mbo chɔm naa te ŋ nɔ wɔ pɛ kaa hɛliaa kɛ kɛ. Yɛɛ cheleŋ naŋ nɔ yɛ miŋ tosa?

7. Vɛɛ naŋ chɔm yɛ maa ‘kɔlta naalaŋ la cho walaŋ’ le acheleŋnda?

⁷ Te ‘kɔlta naalaŋ la wa pɛ walaŋ’ le acheleŋnda, ŋ cho kaalaa miŋgi o foofo kaa hɛliaa. (Kɔliŋtiaŋ Diiŋ Ndɔɔ 6:​11-13) Baa a hɛnaŋ pa teleŋndo chuaa a wanaa nya nɔ kɔɔle pilɛleŋ, wanaa nya fula lɛŋnde pilɛleŋ, a wanaa nya dimi suɛi maŋgalɛi pilɛi kinɛi ya? Te lende i cho ni, kindiŋ vɛlɛ le teleŋndo chuaa a wanaa cheleŋnda. A nɔla ma veelu puaapiliaa a ndepiliaa fula o kɔɔlima yɛ yiaŋ nda le kɔlaŋ latulu o wali pollo niŋ. Ɔɔ a veelu nda o numndo bɛɛ le nyɛdiaa ɔɔ le yelelaŋ pɔmbɔ. (Walta Wanaa Chiisuaa 16:​14, 15) Boondei cho fuuluu mi kɔl numndo wa o piaa cha a kaalaa, nduyɛ a nɔ lɛ niŋ fonda le kaa hɛliaa nɔɔ le. Ŋ soonuŋndɔ vɛlɛ a nɛi cheleŋ o naŋ kialu lepum yamaŋ “le kiolɔɔ leŋ” ndo.

8. Yɛɛ naŋ pɛɛku yɛ o Lɛvitikɔɔ 19:​15 niŋ a mɛɛ sullo ɔɔ tambei piiliaŋ mɛɛ naŋ cha acheleŋnda yɛ?

⁸ Mɛɛ naŋ cha wanaa nɔ sullo wa ɔɔ a cho o tambei niŋnda yɛ piiliaŋ naa. Lɛvitikɔɔ 19:​15 dimi aa, “Te a wa waŋnda yamɛi kiolɔɔ tɛɛŋ pɛ, wa sakpo o ndi kiolɔɔ niŋ, nduyɛ ma dimi tonyaa. Sim waŋndo kɔɔli, le mɛɛ o cho wana tambɛi, ɔɔ wana sulaa yɛ ma ke ndu dioo le.” Vɛɛ sul waŋndo ɔɔ tambii nduɛi piiliaŋ yɛ mɛɛ naŋ cha ndu yɛ?

9. Diomnda yɛɛ Sɔlɔmɔŋ ndoo poonyiaa yɛ, nduyɛ yɛɛ hei pɛɛku yɛ naa?

 ⁹ Mi Mɛlɛka dimul Sɔlɔmɔŋ le mbo poonyiaa diomndaŋ ndaŋ aa, ‘Te wana tambu pɛ, wanaa nya chiɛɛliaŋ nda bɛɛ, a holnuŋ num te. Kɛ wana dii hoo dɛnɛ mbo sul lo, chaŋyaŋ pila o nɔ ni.’ (Pulɔwaa 14:​20) Yɛɛ bolle Baabuileŋ ndeŋ le pɛɛku yɛ naa? Te ŋ ve yekeŋ te, miŋ yeema lepum chaŋyaŋ tosaa a puaapiliaa nɔ sullo wa, kɛ o cho a puaapiliaa cho o tambei niŋnda le. Le yɛɛ i cho yɛ suɛi kpundɛ le waŋnda yamɛi kilullo le nyɛm nda nɔ woŋ ɔɔ ŋ nda nɔ le woŋ?

10. A bahawɛi kuɛɛ okɔɔ Chemisi ndoo sila yɛ Kilisiɔŋnda?

¹⁰ Te ŋ kilul pɛ puaapiliaa naa yamɛi le mɛɛ nda cho wanaa sulaa ɔɔ wanaa tambɛi yɛ, ŋ cho piɔuwaŋndo luei o kundaa niŋ. O wɔsiŋ kɛmɛ tasoŋ niŋ, mi hei yɔŋnuŋ o kundalaŋ lapum niŋ. Nduyɛ mi Chemisi sila Kilisiɔŋnda a ndi okɔɔ. (Nuawɔ Chemisi 2:​2-4) Ŋ nɔ miŋ chɛl le mi piɔuwaŋndo wa o kunda naa niŋ te. Nduyɛ vɛɛ naŋ kpakpala yɛ waŋnda yamɛi kilullo le nyɛm nda nɔ woŋ?

11. Baa nyɛm kɛŋ waŋndo nɔ woŋ piiliaŋ chaŋyɛi nduɛi a Chɛhowa? Tɛɛsiaawɔ.

¹¹ Ŋ nɔ miŋ che puaapiliaa naa mɛɛ Chɛhowa che nda yɛ. Chɛhowa chi waŋndo wana sɔvɛ le mɛɛ o cho wana sulaa ɔɔ le mɛɛ o cho wana tambɛi yɛ le. Kaniŋ naŋ a nyɛm naŋ nɔ woŋ, nɔ nyɛ o nyɛ le tosa a chaŋyɛi nɛi a Chɛhowa le. Le saboo hoo Chiisu dimi ni  maa “i cho i kala mi wana sulaa luɛi o masale Mɛlɛkaleŋ niŋ.” Kɛ o dimi naa maa keŋ nɔla mii yɔŋnuŋ te le. (Maatiu 19:​23) Mi Chiisu dimi vɛlɛ aa, “Nya cho a tambɛi ya, la pɛl tɔnɔɔ. Kani fondole nya nɔ masale Mɛlɛkaleŋ ni.” (Luku 6:​20) Kɛ hei chɔm naa maa wanaa tambɛiya kpou le cho wa Chiisu nilaŋ yaŋɔɔ, nduyɛ ma sɔla salala teŋgeŋ ndaŋ te. Wanaa tambɛiya wa tau a tul Chiisu kɔɔli le wa. Tonyaa cho ni maa, ŋ nɔ miŋ kilul chaŋyɛi waŋndo nɔ a Chɛhowa ve iyama le nyɛm kɛŋ o nɔ woŋ te.

12. Yɛɛ Diom Mɛlɛkaa pɛɛku yɛ wanaa sulaa a wanaa tambɛiya?

¹² O wanaa Chɛhowaa tɛɛŋ, puaapiliaa a ndepiliaa sulaa a a tambɛiya cho. Kɛ nda kpou kaala Chɛhowa nduyɛ ma wa ndu piɛiyo a kɔllo kpou. Diom Mɛlɛkaa dimul wanaa sulaa maa “a duau tiindaŋndo o sulta ndalaŋ niŋ te. Kani fuule, nyɛ sɔlaa o cho nyɛ wana dɔu tiindaŋ leniŋ te. Mɛlɛka ndu pilɛ kpe nda dɔu tiindaŋndo o ndu niŋ ni.” (Nuawɔ Timoti Tasoo 6:​17-19.) Diom Mɛlɛkaa sila vɛlɛ buɛiyaa Chɛhowaa kpou, wana tambɛi ni wana sulaa ni, maa i cho suɛi kpundɛ le kanioŋ kaalaa. (Timoti Tasoo 6:​9, 10) Te ŋ che pɛ puaapiliaa naa mɛɛ Chɛhowa che nda yɛ, ŋ kilul nda iyama le nyɛ nda nɔ wo ɔɔ o nda nɔ le wo le. Kɛ wɔsiŋ waŋndo yɛ? Baa saboo pa cho koŋ ni le acheleŋnda yamɛi kilullo?

13. Yɛɛ Baabuiyo pɛɛku yɛ naa a bɛɛleŋ yuuwa kioo okɔɔ?

¹³ Teleŋnda bɔɔbɔɔ, mi Baabuiyo soo maa ŋ nɔ miŋ ke yuuwa bɛɛleŋ. Lɛvitikɔɔ 19:​32 dimi aa, “Te la che bɛnduaa pɛ, la chɔŋ isisi le nda bɛɛleŋ kioo. O koŋ kɔɔli, la nɔ siooŋii nii, nduyɛ, mi la tuei ya diom.” Pulɔwaa 16:​31 (NW) dimi maa “yuluŋii waŋndo sɔla hei o yuuwɛi nduɛi niŋnde, bɛɛleŋ pila i nɔ ni. Taama taama te wana koŋ wa pɛ sakpo.” Mi Pɔɔl dimul Timoti maa o pɛɛsa laŋgbaa kalla le, kɛ o bii nda a lebɛɛ maa finyaa ndɔ. (Timoti Tasoo 5:​1, 2) Mi che bɛɛ Timoti ndoo nɔ kpaayaa opum laŋgbaa kala choo, ndoo nɔ lɔɔlɔɔ mbo chɔm nyiɛɛye nduyɛ mbo ke nda bɛɛleŋ.

14. Teleŋ kuɛɛ naŋ miŋgi yɛ waŋndo o nɛi o yɔŋ bɛɛ mbo wa naa kaasoŋnɔ?

¹⁴ Kɛ te o wa yɛ mi wana cho num kaasoŋnɔ wo tosa hakioo a siɛlɛi fuu, ɔɔ mbo wa suɛi nɛŋi Chɛhowa kɔl te ve hivioo lachi? Chɛhowa mel wana tosa hakioo a siɛlɛi fuu wo le, o yɔŋ bɛɛ mi wana koŋ yuuwa nduyɛ mbo wa wana lebɛɛ. Sawa mandaa o Aisaya 65:​20 (NW) dimi aa, “Wana tosa hakioo wo cho wu, o yɔŋ bɛɛ mbo chii wɔsilaŋ kɛmɛ.” Ŋ saaluŋ vɛlɛ sawa mandaa pilɔɔ kpe o yilaŋnde Isikiaa che leŋ niŋ. (Isikiaa 9:​5-7) Nyɛ sɔvɛ bɛndoo le naa cho Chɛhowa bɛɛleŋ kioo ni, Wana Cho Kani Masindɛ Wo. (Daaniɛɛ 7:​9, 10, 13, 14) Bɛɛle naŋ nɔ le Chɛhowa leŋ le cho kɔl sikpa yeemaŋ le wana yeema malaa wo miŋgioo o nɛi ni, mɛɛ mɛɛ o wa kaasoŋnɔ.—Kaleesiaŋnda 6:​1.

15. Yɛɛ naŋ pɛɛku yɛ Pɔɔl wana Chiisu vem hɔlte ndɔ wo o ba a bɛɛleŋ puaapiliaa feleŋguaa kioo okɔɔ?

¹⁵ Kɛ te o wa yɛ mi puaapilɛnɔɔ wa feleŋgɔnɔɔ? Baa hei sim ni maa ŋ nɔ miŋ ke ndu lebɛɛ le? Sako bɛɛ. Mi Pɔɔl poonyial Timoti aa, “Chɛl mi wana o wana che num chɔdɔ le mɛɛ ŋ cho chuaambɔ piaandu pɔmbɔ yɛ le. Wa maa taamasi naa wanaa laalaŋnda a piliaa chua. Chɔm nda a mɛɛ ŋ suaa yɛ, a kaa numndo, a mɛɛ ŋ kaala waŋnda yɛ, a tiindaŋ ŋ nɔ o Mɛlɛka niŋndo, a yoomu numndo waa o diandaa.” (Timoti Tasoo 4:​12) Teleŋ Pɔɔl  poonyiaa heiyo, naapum Timoti wa niŋ le wɔsilaŋ 30. Nduyɛ Pɔɔl ndoo ke ndu niŋ kalaŋnda sɔvɛ sɔvɛlaŋ. Yɛɛ hei pɛɛku yɛ naa? Ŋ nɔ miŋ kilul puaapiliaa feleŋguaa yamɛi a wɔsiŋ nda nɔ woŋ te. Yiyaŋndɔ a sɔɔŋ Chiisu tosa woŋ kpou teleŋ o wa wɔsilaŋ 33 kinɛiyo!

16, 17. (a) Vɛɛ Bɛnduaa kɛɛsiaa yɛ te puaapilɛnɔɔ suliŋ pɛ le waa buɛi malalaŋndo ɔɔ bɛndu kundaa? (b) Vɛɛ yiyaŋnda waŋndo ɔɔ naamula ndɔlaŋ la wa yɛ lepaum teŋgeŋ a nyɛ Diom Mɛlɛkaa dimi wo?

¹⁶ O naamulaŋ lapum niŋ, waŋnda ke feleŋguaa lebɛɛ le. Nduyɛ fulamakɔɔlioo cho ni, mi bɛnduaa kundaa apum kɛɛ diola feleŋgɔnɔɔ yɔŋgoo le mbo simnuŋ buɛi malalaŋndo ɔɔ bɛndu kundaa, o yɔŋ bɛɛ mbo suliŋ. Kɛ Baabuiyo dimi naa maa puaapilɛnɔɔ nɔ mbo fuuluu wɔsilaŋ lapum tuupa mbo simnuŋ buɛi malalaŋndo ɔɔ bɛndu kundaa le. (Timoti Tasoo 3:​1-10, 12, 13; Taitɔɔ 1:​5-9) Te bɛndu kundaa siiŋguu pɛ hei maa sawaa le naamu ndɔɔ, mɛɛ o cho nyɛ Diom Mɛlɛkaa dimi wo tolɔɔ kɔɔli le. Bɛnduaa nɔ ma soliŋ yiyaŋnda ndalaŋ ɔɔ naamula ndalaŋ kpeku le feleŋguaa yamɛi kilullo le, kɛ a nɔ ma soliŋ sawala cho o Diom Mɛlɛkaa niŋndaŋ kpeku.—Timoti Diiŋ Ndɔɔ 3:​16, 17.

¹⁷ Te bɛnduaa tul sawala cho o Baabuiyo niŋndaŋ kɔɔli le buɛiyaa malalaŋnda ɔɔ bɛnduaa kundaa yulɔɔ iso le, koŋ tosa mi puaapiliaa suliŋ le ma yulu nda iso wa vi ŋdial. O lɛŋnde pilɛ niŋ, buɛi malalaŋndo wa walta sɔvɛlaŋ tosaa o kundaa niŋ nyɛkɛndɛi, nduyɛ mi bɛnduaa chɛlaŋ maa o nɔ suliŋnda Baabuiyo dimi laŋ le mbo simnuŋ bɛndoo. Kɛ, mi kaasoŋnda o bɛnduaa kundaa kaŋ tɛɛŋ dimi maa puaapilɛnɔɔ hoo cho wɔ o bɔɔ le mbo simnuŋ bɛndoo le. Lelaŋ, a yɔŋgu diola ndɔlaŋ le ma yulu ndu iso le. I cho suɛi imɔnɛ le dimioo maa, le mɛɛ puaapilɛnɔ koŋ ndoo nɔ wɔsiŋ bɔɔ le yɛ, a yulu ndu iso le. Nduyɛ yiyaŋ waa naa cho o fondaŋnda bɔɔbɔɔ o chieeŋndo choo. I cho bɔɔ suɛi sɔvɛ le miŋ tiindaŋ nyɛ Baabuiyo dimi wo, kɛ o cho yiyaŋnda naalaŋ ɔɔ naamula naalaŋ te. Hei cho chɔm maa ŋ cho Chiisu diikɔŋndo nduyɛ miŋ pɛŋgi waŋnda yamɛi kilullo a mɛɛ naŋ cha nda yɛ.

18, 19. Yɛɛ mala yɛ naa le puaapiliaa naa chɔɔ mɛɛ Chɛhowa che nda yɛ?

¹⁸ Wanaa lahakiaa naŋ cho ni. Kɛ, ŋ nɔla miŋ pɛɛku le acheleŋnda kiɔɔ hɛlioo maa Chɛhowa. (Walta Wanaa Chiisuaa 10:​34, 35) Lelaŋ, ŋ nɔ miŋ yaŋ nilaŋ o sila Diom Mɛlɛkaa cho naa wo. Te ŋ tol ndu kɔɔli pɛ, mɛɛ ŋ cho sawa Chiisoo tolɔɔ kɔɔli le ‘pɛŋgioo waŋnda yamaŋ kilullo le kiolɔɔ leŋ.’—Chɔŋ 7:​24.

¹⁹ Masanɔ naa Chiisu Kiliti cho suŋ waŋnda kpou yamɛi kilul. Yamɛi nduɛi cho tɔlnɔŋ o sawala sakpola Mɛlɛkalaŋ choo, kɛ o cho o nyɛ o cho chɔɔ a tueiyɔɔ wo choo le. (Aisaya 11:​3, 4) Ŋ cho lehɔl o nɛi le teleŋ kɛndɛ bɛndu koŋ!