LE MƐƐ yoomoo kendu o “palɛi mɛɛlɛi” hei niŋ yɛ, ŋ yeema biuwɔŋndo mbo hiau maa paandu. (Timoti Diiŋ Ndɔɔ 3:​1-5) Wanaa balu naa wa a bɔɔbɔɔ nɔ kaa biuwaŋ te. A nɔ kaayei, a hɛnaŋ sɛɛŋgiaŋndaŋ, nduyɛ a tiu kɔlta ndalaŋ ba le. Lelaŋ, ŋ nɔ miŋ nyunaŋ aa, ‘Baa I nɔ pa biuwɔŋ lepɛŋndo maa wanaa balu ya wa? Yɛɛ kpeekpei cho yɛ biuwɔŋndo? Yɛɛ ya nɔ yɛ mi tosa le mi biuwɔŋndo wa kaa ni?’

Yɛɛ diomndo hoo ‘biuwɔŋndo’ sim yɛ a mɛɛ Baabuiyo soliŋ ndu kpeku yɛ? O cho ko bahawɛiyo baa tiuwo le. Wana biuwaŋndo biunuŋ le saboo, koŋ cho ni, mbo nɔ tiindaŋndo kɛsɛ maa sɔɔŋ cho bɛnda. O cho ko a ndupila okɔɔ kinɛi le o yiyaŋ te, kɛ mbo buulaŋ vɛlɛ a yiyaŋnda wanaa cheleŋnda, hali wanaa pilaŋ ndu tana wa bɛɛ, ɔɔ a chiee ndu biyɔɔ le wa. Mbo hiou lachi a tiindaŋndo nɔɔ maa chaŋyɛi ndɛi cho bɛnda. Kaamaa bii naa le mɛɛ Baabuiyo dimi maa kaalaa le huŋ a biuwɔŋndo le. * (Tofa tɛɛsiaa amatou.) (Kɔliŋtiaŋ Tasoo 13:​4) Biuwɔŋndo cho vɛlɛ o nyɛm “nyina Mɛlɛkaa” o ke naa woŋ niŋ. (Kaleesiaŋnda 5:​22, 23) Lelaŋ, yɛɛ kpeekpei naŋ nɔ yɛ miŋ tosa le miŋ wa wanaa biuwaŋ?

Le miŋ nɔ kaa biuwaŋndo, ŋ nɔ miŋ piɛi le mala nyina Chɛhowaa. Chɛhowa ke wanaa duau tiindaŋndo o ndu niŋnda nyina ndɔɔ. (Luku 11:​13) Nyina koŋ o nɔ kpaayaa tau, kɛ ŋ nɔ miŋ tosa sɔɔŋ a mɛɛ naŋ piɛi yɛ. (Sam 86:​10, 11) Koŋ sim ni maa, ŋ nɔ miŋ kindiŋ lɔɔlɔɔ le kaa biuwaŋndo chɔmndo, a ndu dɔwɔɔ o wali niŋ. Kɛ lepum, ŋ sɔla batiuwaa le. Yɛɛ mala yɛ naa?

Ŋ nɔ miŋ pɛɛku, nduyɛ miŋ tol taamasi walaŋ Chiisoo kɔɔli. Mɛɛ wana Chiisu vem hɔlte ndɔ wo Pɔɔl wa suɛi a “wana chieeyɛi sɛnɛiye” okɔɔ, mbo suaa a biuwɔŋndo. Okoŋ mbo dɛɛniaa naa aa, “Kɔl nyulu Kiliti yɔŋgu wo ndu nɔ ni mbo chɔm nya o kɔlta nyalaŋ niŋ nyɛ bɛnda le tosaa wo.” (Kolosiaŋnda 3:​10, 12, 15) Le hei tosaa, mɛɛ miŋ tol taamasi Chiisoo kɔɔli, nduyɛ miŋ nɔ tiindaŋndo kɛsɛ maa a teleŋ bɛnda wo, Mɛlɛka cho sɔɔŋ siɛɛnduu. Te ŋ nɔ pɛ tiindaŋ waa naa, ŋ cho wa lɔɔlɔɔ biuwɔŋndo, o yɔŋ bɛɛ mi sɔɔŋ wɔɔŋndoŋ wa yɔŋnɔŋndo naa ikɛi.—Chɔŋ 14:​27; 16:​33.

Naa kpou yeema mi chieeŋ sɛnɛiyo keleŋa hunɔɔ. Kɛ te ŋ yiyaŋ pɛ a mɛɛ Chɛhowa cho naa biuwɔŋndo yɛ, miŋ pɛɛku le chɔɔloo waa wanaa biuwaŋ. Baabuiyo dimi aa, “Waŋnda apum a yiyaŋ maa, Masanɔɔ Mɛlɛka cho pindiei le nyɛ o chua buŋgɛi yo tosaa. Kɛ nduyɛ i cho lende le. O cho machuaa nya biuwɔŋndo. Kani fuule, o hɛnaŋ mi wana o wana huŋ wa o tɛɛmbaa le. O hɛnaŋ mi wana o wana o mal yɔŋnda ndɔla wɔɔŋndaŋ.” (Pitɛ Diiŋ Ndɔɔ 3:​9) Lelaŋ, te ŋ yiyaŋ pɛ a mɛɛ Chɛhowa biunuŋ naa yɛ, naa bɛɛ tiuba miŋ chɔɔlu acheleŋnda biuwɔŋ. (Luomaŋnda 2:​4) Ɔɔ sɔɔŋ naŋ nɔ miŋ biunuŋ ndoŋ ŋpum?

Sɔɔŋ cho tau o yoomu naa niŋ ŋ naŋ nɔ miŋ biunuŋ lepaa o lepaa woŋ. Le taamaseliiyo, mɛɛ miŋ nɔ kaa biuwaŋndo le waŋndo kiɔɔ suɛi kiolɔɔ o sondo o yɔŋ bɛɛ miŋ nɔ suɛi sɔvɛi le ndu dimullo. (Chemisi 1:​19) Ŋ nɔ vɛlɛ miŋ nɔ kaa biuwaŋndo te waŋndo pilaŋ naa pɛ tana. Tuupa miŋ muli chɔ chɔ, o bɛnda miŋ loonuŋ mɛɛ Chɛhowa nda Chiisu bii biondɔŋnda naalaŋ yɛ. O cho biondɔŋnda naalaŋ kpou le nda handu kɔllo choo le. Kɛ ma che suliŋnda kɛndɛla naŋ nɔlaŋ, nduyɛ ma ke naa teleŋndo le hiouwɔɔ lachioo tosaa.—Timoti Tasoo 1:​16; Pitɛ Tasoo 3:​12.

Ŋ yeema vɛlɛ kaa biuwaŋndo te waŋndo dimul naa pɛ maa ŋ dimi ɔɔ tosa suɛi wɔɔŋ pum. Kɛlɛŋgaa nyɛ tase naŋ tosa wo cho tumboo dɔunɔŋndo nduyɛ miŋ chɔulaba le fulaŋndo leniŋ ni. Kɛ Diom Mɛlɛkaa dimul naa le kaa cheleŋ chɔmndo. O dimi aa, “Biuwɔŋndo o isɔɔ o isɔɔ niŋ ndu hiou naŋɔɔ a yoŋgaa tosaa. O bɛnda mi wana dɔɔnuŋ tumbe chɔ chɔ le, diɔmnda nda duaunuŋ tumbe ni nduyɛ ma kɛsiŋ sɔɔŋ o lakɔl.” (Ikilisiaatii 7:​8, 9) Lelaŋ, o yɔŋ bɛɛ aa choolaŋ kpeekpei nda nyiinduu naa choo ni, ŋ nɔ fɛŋ miŋ biunuŋ nduyɛ miŋ yiyaŋ nyɛkɛndɛi tuupa miŋ tosa nyɛ o nyɛ. Keŋ Chiisu tosa ni mɛɛ waŋnda nyiinduu ndu choolaŋ choo.—Maatiu 11:​19.

Kalaŋ chuauwa nɔ ma biunuŋ taama taama te a wa pɛ chuauwaa ndaa malaa le kaa ndaa siɛɛnduu wo ɔɔ le yeemaŋ wɔɔŋndoŋ kpakpalaa. Chua wɔ taamaselii Matias wo, o cho wallo o Bɛtɛɛl o lɛŋnde Sikandinaviaa leŋ niŋndo. Teleŋ Matias wa kpasu wo, mi chaaŋaa nduaa o sukuu ndaa mam ndu le laalaŋnda ndɔlaŋ. O tase ndɔ, wanaa velu ndu wa ndaa sina maa hei wa ndu yɔŋnɔŋndo le. Kɛ ma cha maa o kandu kiisaŋndo a laalaŋnda ndɔlaŋ. Mi Kilis, finyaa Matias dimi maa ndu nda laa ndɔ ndaa nɔ ma chɔm kaa biuwaŋndo tau o suɛi hei niŋ. Mi Matias ndoo nyuna nyunalaŋ ndaŋ aa, “Nɛɛ cho yɛ Mɛlɛka? Te o wa yɛ mi Baabuiyo ve Diom Mɛlɛka le? Vɛɛ naŋ looku yɛ sina maa Mɛlɛka kpeekpei yeema ni miŋ tosa sɔɔŋ muŋ?” Mi ndoo nyuna vɛlɛ finya ndɔ aa, “Le yɛɛ ma kilul la yamɛi te I laalaŋ a nyɛ nya laalaŋndo le?”

Mi Kilis tɛɛsiaa aa, “Teleŋndaŋ lapum, a kɔl tuuwo po naa ndoo nyuna ni. O cho a kala ndɔ ɔɔ a ya le ndoo tuulu kɔl te, kɛ a tonyaa. Ndoo yiyaŋ maa tonyaa cho yoomu  ndɔɔ tosaa o kala kpoke.” Vɛɛ Kilis ndoo mala yɛ po ndɔɔ? “Mi naŋ chal le baltaŋ dɔwɔɔ naa po nuu le teleŋ vilɛi.” Teleŋnda bɔɔbɔɔ, nilaŋ koni Kilis ndoo yaŋ Matias ni. Nduyɛ mi ndoo nyuuniaa ndu le sinaa yiyaŋnda ndɔlaŋ. Lepum, mi Kilis ndoo tɛɛsial po ndɔɔ suɛi ipum, nduyɛ mi ndoo dimul ndu le yiyaŋndo lechoo le paaleŋ le pilɛ ɔɔ hiouwɔɔ okoŋ choo tuupa ma soo vɛlɛ o suɛi keŋ choo. A teleŋnda cheleŋ, mi Kilis ndoo dimi maa, ndu bɛɛ ndoo nɔ mbo chua palɛi i tiŋ le yiyaŋndo o suɛi po ndɔɔ dimul ndu ve choo. Mi suukaŋ lɔɔlɔɔ wo hoo mala Matias mbo kandu nyɛ sala baŋaa simndo biyɔɔ bila, nduyɛ mbo bii vɛlɛ bila maa Chɛhowa kaala naa, vɛlɛ maa o nɔ dioo le waa Masa naa choo. Mi Finya ndɔ dimi aa, “Mbo chua teleŋndo tau, nduyɛ i ve suɛi bɛɛŋ te. Kɛ mi kaala Chɛhowaa hindu ndu o kɔl o pɔmpɔmbɔ. Ya naa laa nuu cho bɔɔ a kɔl kɛndɛ le biuwɔŋ naa le po naa malaa teleŋ o wa kpasu wo. Nduyɛ fulamakɔɔli kɛndɛ wa wo wa ni maa, mi hei pilaŋ poo naa kɔllo.”

Mɛɛ Kilis nda laa ndɔ wa po ndaa malaa a biuwɔŋndo, ndaa nɔ tiindaŋndo maa Chɛhowa cho nda mala. Mi Kilis dimi aa, “Mi yaa dimul Matias teleŋ o teleŋ maa kaala yiŋgoloŋ ya naa kala ndɔ nɔ le ndu wo, nyindu naa le piɛileŋ lɔɔlɔɔ maa Chɛhowa cho ndu mala mbo bii bila.” Kalaŋ chuauwa haa cho bɔɔ a kɔl kɛndɛ le mɛɛ nda biunuŋ a vi ŋdial te yɛ!

Ŋ nɔ vɛlɛ miŋ biunuŋ te ŋ wa wanayɛi nɛi ɔɔ chaaŋ naa cho a naa le teleŋ vilɛiyo mandaa pɛ. Chua wɔ taamasi Elɛŋ ndo * (tofa tɛɛsiaa amatou), ndu bɛɛ o lɛŋnde Sikandinaviaa leŋ niŋ o cho ni.

O hiou niŋ wɔsilaŋ la ŋɔmaa chɔŋ a teleŋ pɔnɔɔ Elɛŋ del a naa wo, nduyɛ mi naa koŋ tosa mi bolleŋ le hiŋnuŋ pɔnɔ ndɔ. Le hei, pɔnɔ ndɔ sinaŋ lɛ nyaale, kɔl tambɛi, ɔɔ inyiɛɛ le. Bahawɛiyo hoo cho bɔɔ o kala le Elɛŋ. Mbo dimi aa, “Biuwɔŋndo a piɛileŋ yeemaŋ tau ni.” Mbo chɔɔlu dimi aa, “Bolle Baabuile dɛɛniaa ya kɔllo tau leŋ le cho Filipiaŋnda 4:​13, NW ni. Le dimi aa, ‘Mɛlɛka ke ya kpaayaa le mi nɔla mi keeku o isɔɔ o isɔɔ niŋ ni.’” Kpaaya Chɛhowaa a mala ndɔɔ cho Elɛŋ malaa le bahawɛi ndɔɔ biuwɔŋndo ni.—Sam 62:​5, 6.

A tonya, Chɛhowa cho taamasi kɛndɔɔ le biuwɔŋndo ni. (Pitɛ Diiŋ Ndɔɔ 3:​15) Teleŋ o teleŋ, miŋ veelu diomndaŋ o Baabuiyo niŋ a biuwɔŋ ndɔɔ okɔɔ. (Nɛhimaya 9:​30; Aisaya 30:​18) A loonuŋ pa nyɛ Chɛhowa ndoo tosa teleŋ Ebilaham wa ndu nyuuniaa tau a kɛɛsiaa o tosa le Sodɔm tɛɛmboo wo? Chɛhowa kuuna Ebilaham te. Kɛ mbo yaŋ nilaŋ o nyuna kɛ kɛ Ebilaham ndoo nɔ nduyɛ mbo sina buulaŋnda ndɔlaŋ kpou. Okoŋ, mi Chɛhowa chɔm maa o tuei nyɛ Ebilaham dimi wo. Mbo ke ndu tiindaŋndo maa o cho Sodɔm tɛɛmbuu le te o yɔŋ pɛ mbo saaluŋ wanaa sakpuaa ŋwaŋ tɔ kinɛi o chiee koŋ niŋ. (Chɛnɛsee 18:​22-33) Mi Chɛhowa yaŋ nilaŋ lɔɔlɔɔ a biuwɔŋndo, nduyɛ pɛ pɛ bɛɛ o tosa isɔɔ a kɔl tuu le!

Biuwɔŋndo cho o wana chieeyɛi sɛnɛi Kilisiɔŋnda kpou nɔ kuee ma nɔ ve niŋ, nduyɛ hei cho bɔɔ suɛi sɔvɛ bɛndu. Te ŋ kindiŋ pɛ kpoke miŋ wa wanaa biuwaŋ, mɛɛ ŋ cho Chɛhowa, Finya naa cho naa mandaa nduyɛ mbo wa wana biuwaŋndo bɛɛleŋ ke. Vɛlɛ ŋ cho wa “wanaa dɔu tiindaŋ ndaa o Mɛlɛka niŋ, ma biuŋ, nduyɛ o hei niŋ ma sɔla nyɛ Mɛlɛka chuel nda buŋgɛi yo wa” tɛɛŋ.—Hibuluiya 6:​10-12.