LAPƆM, puaapiliaa o waalaŋ niŋ chieeŋndo balɔɔ silɔ Mɛlɛka yulu iso le waa bɛnduaa kundaa a buɛiyaa malalaŋnda ni. Te a cho pɛ waŋndo opilɛ o puaapiliaa haa tɛɛŋ, a tonya, a cho a kɔl kɛndɛ le Chɛhowa a puaapiliaa numnda wallo tosallo o nɛiyo hoo choo.

Kɛ te o yɔŋ pɛ ma wa buulaŋndo, kɛsiŋ o kɔl maa i yɔŋnuŋ wana o wana. Mi bɛndu feleŋgɔnɔ pilɛ diolaŋ Chasiŋ dimi aa, “Mɛɛ nda yulu ya iso o tase ndɔ, mi cha maa wolɔɔla lusulɛilaŋ pila kalaŋnda sɛnɛila nda siiluu ya laŋ la cho ni.” Muuse nda Chɛluimaya bɛɛ ndaa yiyaŋ maa a suliŋ le ma tosa wali sɛnɛi Chɛhowa ndoo ke nda wo le. (Ɛsɔdɔɔ 4:​10; Chɛluimaya 1:​6) Te lende num bɛɛ cho yiyaŋndo ni, yɛɛ ŋ nɔ yɛ ma tosa le tiindaŋ numndo taŋgullo a hiouwɔɔ lachioo tosaa? A tiuba ma pɛɛku tau o taamasi Timoti wo niŋ.—Walta Wanaa Chiisuaa 16:​1-3.

Naapum Timoti wa wɔsilaŋ 20 mbo kandu kelaa nda wana Chiisu vem hɔlte ndɔ wo, Pɔɔl. Teleŋ tase Timoti sɔla veeloo hoo wo, naapum mbo yiyaŋ maa o suliŋ le acheleŋnda pɛɛkoo vɛlɛ a nda silaa le, kanifuule o wa wɔ feleŋgɔnɔɔ. (Timoti Tasoo 4:​11, 12; Timoti Diiŋ Ndɔɔ 1:​1, 2, 7) Kɛ mbo hiau lachi a hiouwɔɔ lachioo tosaa, nduyɛ wɔsilaŋ tɔ okoŋ kɔɔli, mi Pɔɔl dimul Filipiaŋnda aa, “I nɔ o kɔl le Timoti yɔŋndo suŋ naa nya chua. Te Masanɔɔ Chiisu chɛl pɛ.” Lɛ yɛɛ Pɔɔl ndoo yiyaŋ yɛ lende? Mbo tɛɛsiaa aa, “Wana o wana cheleŋ I nɔ nanuŋ mbo nɔ kɔl landaŋndo kpeekpei le dɛnɛ nya kɛndɔɔ maa ndu Timoti le.”​—Filipiaŋnda 2:​19, 20.

Le yɛɛ Timoti cho yɛ wana taamasi kɛndɛ le bɛnduaa kundaa? Ŋ yaasiaŋndɔ sabulaŋ la ŋɔmpum.

1. Ndoo buulaŋ bɔɔ le waŋnda. Mi Pɔɔl dimul puaapiliaa o Filipai niŋ maa Timoti cho nɔ ‘kɔl landaŋndo kpeekpei le dɛnɛ nda kɛndɔɔ.’ (Filipiaŋnda 2:​20) Timoti ndoo yeema mi puaapiliaa ndaa lo Chɛhowa o ibuŋ kpɛɛluŋ, nduyɛ ndoo nɔ yeemɛi le teleŋ ndɔɔ a yoomuma nduaŋ soliŋndo kpeku le nda.

Teleŋnda bɔɔbɔɔ, mi Wuliɛm o cho niŋ bɛndoo le wɔsilaŋ 20 ndo dimul puaapiliaa nda yulu iso sɛnɛiya aa, “La kaala puaapiliaa. La handu kɔllo o bahawɛila ndalaŋ choo, kɛ o cho a mɛɛ nya nɔ mi la kɔɔna sɔɔŋ yɛ le.” La wa maa wana nyaanuŋ mɔmbillo wo le. Mbo buulaŋ tau le fuuluu wo a teleŋndo o fondaŋ mɔmbillo nɔ mbo simndo, kɛ o nɔ buulaŋ le mbo chum wanaa o nɔ mbo chua o mɔmbillo niŋnda le.

2. Mbo kɛsi wali Chɛhowaa nyɛ tasoo. Mi Pɔɔl dimi maa Timoti wa teŋgeŋ, kanifuule waŋnda a piliaa le “bala havɛila ndala nda pilalaŋ koni nda landuŋ kɔl ni. A lenduŋ kɔl o sɔɔŋ Chiisu Kilitioŋ te.” (Filipiaŋnda 2:​21) Mi Pɔɔl sina maa Puaapiliaa wa ndu a balaa wa ndaa handu bɔɔ kɔllo o yoomula ndalaŋ choo. Lepum, mi ndaa kɛsi yeemaŋ ndaŋ Chɛhowa piɛiyo lachi. Kɛ Timoti ve lende le! Mɛɛ o sɔla dɔɔ fondaa le chɔɔloo wali Mɛlɛkaa tosaa, mbo dimi mɛɛ Aisaya dimi yɛ aa, “A che ya. Viom ya.”—Aisaya 6:​8.

Vɛɛ ŋ nɔla yɛ ma wa kpeŋ kpeŋ le bahawɛila numndaŋ solioo a laŋ o kundaa niŋ? O tasoo, tol sila Pɔɔllo kɔɔli. “La hɛli suɛi hiou bɛnda kpou le tosaa ve.” (Filipiaŋnda 1:​10) Kɛsi wali Chɛhowaa nyɛ tasoo. O diiŋ ndɔɔ, kpakpala sɔɔŋ chua teleŋ numndo a yoomuma numndaŋ tau wo. Mi Pɔɔl dimul Timoti aa, ‘Kpakpala yeemaŋ chua piaandu yaŋ. Landuŋ kɔl le waa sakpo Mɛlɛka o hɔl, a tiindaŋndo dɔwɔɔ o Mɛlɛka niŋ, a kaalaa nɔɔ, a waa a kɔl nyulu a waŋnda chieeya.’—Timoti Diiŋ Ndɔɔ 2:​22.

3. Mbo tosa wallo kekelee o Chɛhowa piɛiyo niŋ. Mi Pɔɔl dimi a Timoti okɔɔ aa, “Mɛɛ finyaa wa nuaa nda po ndɔɔ o wallo niŋ yɛ lende Timoti cho ya malaa a wallo le Yooŋgu Kɛndɛ Mɛlɛkaa dimioo ni.”  (Filipiaŋnda 2:​22) Timoti ve wana dialuŋ vilɛi le. Mbo tosa wallo kekelee latulu a Pɔɔl, nduyɛ mi hei tosa mi chaŋyɛi ndɛi kiandu poŋ.

Wallo cho tau le tosaa o kɔɔna Chɛhowaa niŋ hau. Wallo hoo ke bɔɔ wana kɔl hiniaa, nduyɛ mbo mala num le sɔɔŋgoo puaapiliaa a ndepiliaa numnda ikɛi kpɛɛluŋ. Lelaŋ, tosa a sabu le hiouwɔɔ “lachi lɔɔ lɔɔ a wallo tosaa o kala kala, le Masanɔɔ Mɛlɛka.”—Kɔliŋtiaŋ Tasoo 15:​58.

4. Mbo duau sɔɔŋ o pɛɛku woŋ o wali niŋ. Mi Pɔɔl poonyial Timoti aa, ‘Num Timoti, a sina sɔɔŋ ya I pɛɛku waŋnda woŋ. A sina mɛɛ kaa nuu cho yɛ. nduyɛ, a sina nyɛ ya I kɛɛsiaa le tosaa o yoomu nuu niŋ ndo a tiindaŋ ya I nɔ o Mɛlɛka niŋ ndo. A sina a mɛɛ ya I biuŋ yɛ. Nduyɛ, a sina a mɛɛ kaalaa cho o kɔl nuu niŋ yɛ. A sina a mɛɛ ya I cho isisi o tiindaŋ Mɛlɛkaa niŋ yi yɛ.’ (Timoti Diiŋ Ndɔɔ 3:​10) Mi Timoti duau sɔɔŋ o pɛɛku woŋ o wali niŋ. Lelaŋ, mbo chɔɔlu pɛɛŋ kalaŋndaŋ sɔla.—Kɔliŋtiaŋ Tasoo 4:​17.

Baa o bɛnda ma nuuviaa bɛndu kunda nɔ sinapɛŋgoo tau wo le mbo wa maa taamasioo le num te? Mi Tɔm cho niŋ bɛndoo le wɔsila bɔɔbɔɔ wo loonuŋ mɛɛ bɛndu kunda nɔ sinapɛŋgoo tau wo chɔm yeemɛi o ndu niŋ, nduyɛ mbo ke ndu pɛɛku sɔvɛ sɔviɔɔ yɛ. Mi Tɔm dimi aa, “Mi yaa nyuna ndu le silaa lɔɔlɔɔ, nduyɛ mi yaa dɔu sila ndɔɔ o wali niŋ. Mi hei keleŋa tiindaŋ nuu taŋgul.”

5. Mbo hiau lachi a ndupila pɛɛkɔŋndo. Mi Pɔɔl sila Timoti aa, “Pɛɛkoo ŋ nɔ ni ma pɛɛku le waa wana laalaŋ kɛndɛ.” (Timoti Tasoo 4:​7) O yɔŋ bɛɛ mi wana tosa pisultaŋ lapum ndo nɔ wana pɛɛkaa, o nɔ kuee mbo pɛɛkuŋ ndupila. Mi Pɔɔl sila Timoti aa, “Hiou lachi a wanaa laalaŋnda diomnda Mɛlɛkalaŋ tombolal lo o Yau Mɛlɛkaa niŋ, a suɛi Mɛlɛkɛi dimioo, a nda ndi pɛɛkoo. . . . Pɛi sɔɔŋ muŋ tosaa. Yɔŋguŋ kpou o muŋ tosaa niŋ, mi wana o wana fee lo o koŋ mbo che mɛɛ ŋ cho hiouwɔɔ lachi yɛ.”—Timoti Tasoo 4:​13-15.

Num bɛɛ nɔ ma hiou lachi a suliŋnda numndaŋ chɔɔloo siɛɛndoo. Wa wana pɛɛkaa Baabui kɛndɛ, nduyɛ ma sina nɛi chɔmaa sɛnɛi kɔɔna Chɛhowaa yɔŋgu wo. Tiindaŋ o numpila niŋ te. I wa suɛi wɔɔŋ le yiyaŋndo maa a nɔ bɔɔ sinapɛŋgoo, nduyɛ maa a tiuba ma soli bahawɛi kɛ kɛ o yɔŋ bɛɛ ma tosa yaasiaa nyɛkɛndɛi le. Maa Timoti, “Manda num pila nyɛ kɛndɛ kɛndɛ, ma mandaŋ a nyɛ ŋ cho waŋnda pɛɛkoo wo.”—Timoti Tasoo 4:​16.

6. Mbo tiindaŋ nyina Chɛhowaa. Mɛɛ Pɔɔl wa suɛi a wali pol Timoti wo okɔɔ, mbo yiyalaŋ ndu aa, “Nyɛm kɛndɛŋ Mɛlɛka ke num le mandaa woŋ, manda muŋ nyɛ kɛndɛi a kpaaya Nyina Mɛlɛkaa o ke numndo. Ndu yɔnuŋ ni maa Nyina Mɛlɛka cho naa kɔɔli wo.” (Timoti Diiŋ Ndɔɔ 1:​14) Timoti ndoo nɔ mbo tiindaŋ nyina Mɛlɛkaa.

Mi Donaa cho niŋ bɛndoo le wɔsila bɔɔbɔɔ wo dimi aa, “Puaa Mɛlɛka yulu iso wa nɔ ma kaala chaŋyɛi ndɛi a Mɛlɛka. Te a tosa hei pɛ, a cho ‘dialluŋ kalaŋ sɛnɛiyoŋ sɔla.’ Te a piɛi pɛ le nyina Mɛlɛkaa nduyɛ ma kindiŋ le nyɛm o ke wana woŋ sɔlaa, salaa kɛsɛ nda cho wa le puaapiliaa ndaa ni.”—Sam 84:​7; Pitɛ Tasoo 4:​11.

I cho bɔɔ suɛi kɔl dɛɛniaa le chɔɔ buɛiyaa malalaŋaa sɛnɛiya a bɛnduaa kundaa maa num, a cho hiouwɔɔ lachioo tosaa o wali Chɛhowaa niŋndo. Mi Chasiŋ naŋ soo suŋ a ndu okɔɔ wo dimi aa, “Chɔŋ a teleŋ ya simnuŋ bɛndoo wo, I pɛɛku niŋ sɔɔŋ tau, nduyɛ tiindaŋ nuu chɔɔlu kalu. Suŋ suŋ, I cho bɔɔ wali nda ke ya wo tueiyɔɔ yeela, nduyɛ I che ndu maa dikeŋnaŋ sɔviɔɔ pila o cho ni!”

A cho pa wa hiouwɔɔ lachioo tosaa? Te a tol pɛ taamasi Timoti wo kɔɔli, num bɛɛ cho wa salaa le puaapiliaa a ndepiliaa numnda.