Le yɛɛ wana o wana nɔ di mbo handu yaula Seiyaa Chɛhowaa o tɛɛŋguŋ cheleŋndoŋ choo le?

Apum yiyaŋ maa le mɛɛ naŋ yɔŋgu yaula naalaŋ ŋ kilul nda ikani le yɛ, a nɔla ma handu laŋ o tɛɛŋguŋ cheleŋndoŋ choo. Kɛ hei nɔla mii chuu naa kpundɔɔ tau, nduyɛ ŋ nɔla miŋ tɛɛmbuu sawa cho a Nyɛ Ŋ Nɔ Ma Sina Tuupa Ma Soliŋ Tɛɛŋgei Hei Kpeku Wo * (tofa tɛɛsiaa amatou) a tɛɛŋguŋ naŋ okɔɔ. Sawaa hoo dimi kpendekele maa wana o wana nɔ di mbo handu “fotuei nda tuuliaa wo, yaulaŋ o nyɛm mapuuloŋ choo, nyɛ nda sina naa wo, nyɛchaa, fotueilaŋ, vidueilaŋ, ɔɔ buŋgaŋ cho o tɛɛŋgei hei choo woŋ (o tɛɛŋgii kɛ kɛ choo le, o wa i nda piɔu nyɔɔŋ nde, vidueilaŋ, ɔɔ i nda suukaŋ choo ve).” Le yɛɛ sawalaŋ ndaŋ la yeemaŋ yɛ?

Nyɔɔŋ kpou o tɛɛŋgii nɛi choo nɔ di poonyiaa, koŋ sim ni maa, sawaa cho le muŋ mandaa. Hei cho suɛi sɔvɛ kanifuule, sawaa hoo mala, wana soliŋ tɛɛŋgii nɛi kpeku o nɛi wɔɔŋndo choo le. Lepum mi wanaa simul piɛile tonyaleŋ nda a wanaa cheleŋaa yeema wali naa lueiyo o kpundɔɔ niŋnda, handu yaula naalaŋ o tɛɛŋguŋ ndaŋ choo le halikpeŋ mi Seiyaa Chɛhowaa a wanaa cheleŋ soliŋ tɛɛŋguŋ ndaŋ kpeku. Kɛ o tɛɛŋguŋ muŋ choo, ma handu vɛlɛ nyɛm luei waŋnda kiisaŋndo o kɔltaŋ niŋndo. (Sam 26:​4; Pulɔwaa 22:​5) Waŋnda soliŋ niŋ nyɛm naŋ kpeku ɔɔ jw.org le nyɛm ndaŋ keelaa, mɛɛ foŋndaŋ, a nyɛm cheleŋ nda pisi woŋ cho naa yɛ. Kɛ le mɛɛ naŋ nɔ dioo nyɛm naŋ choo vɛlɛ a jw.org mandaa yɛ, ŋ tiuba miŋ kuɛ a nda o lemasa le nda kuunaa keŋ tosaa. (Pulɔwaa 27:​12) Kɛ masaa toolu naa le te ŋ chɛl pɛ waŋnda apum, hali puaapiliaa naa bɛɛ le yaula naalaŋ handɔɔ o tɛɛŋguŋ cheleŋndoŋ choo, ɔɔ le jw.org soliŋndo kpeku le nyɔɔŋ pisioo.

Te ŋ soliŋ pɛ tɛɛŋguŋ cheleŋndoŋ kpeku le yaula naalaŋ hivioo mbo ve jw.org le, keŋ wa suɛi kpundɛ. “Buɛi cho sakpo, nduyɛ, mbo wa buɛi kɔl kalu wo” kinɛi Chɛhowa cho soliŋndo kpeku ni le naa nyɔɔŋ kioo. (Maatiu 24:​45) Tɛɛŋguŋ naŋ kpeekpeiyoŋ kinɛi “buɛiyo” hoo cho soliŋndo kpeku ni le naa kioo nyɛm mala naa le pɛɛkoo a Mɛlɛka okɔɔ woŋ. Muŋ cho ni, www.pr418.com, tv.pr418.com, a wol.pr418.com. Nduyɛ, buɛiyo hoo nɔ vɛlɛ nyɔɔŋ ŋgaa ŋ naŋ soliŋ kpeku o nyɛm mapuuluŋ naŋ choo wo. Muŋ cho ni, JW Language^®, JW Library^®, a JW Library Sign Language^®. Ŋ seeluŋ nyɛm nda keela woŋ ɔɔ nyɛm chieeŋ Setanaa o tɛɛŋgoŋ muŋ ɔɔ o nyɔɔŋ muŋ choo le. Kɛ te ŋ wa pɛ tɛɛŋgii cheleŋnde soliŋndo kpeku le yaula naalaŋ sɔlaa, hei wa suɛi kpundɛ le naa kanifuule, naapum mi waŋnda siŋga sɔɔŋ tiŋ leniŋ.—Sam 18:​26; 19:​8.

Le handɔɔ lechoo, te ŋ handu pɛ nyɛm naŋ o tɛɛŋguŋ waŋnda nɔla ma poonyiaa sɔɔŋ ndo, hei ke wanaa simul piɛile tonyaleŋ nda a wanaa cheleŋnda dioo le sɔɔŋ wɔɔŋndoŋ dimioo a kɔɔna Chɛhowaa okɔɔ. Mi puaapiliaa apum hiŋaŋ diomndaŋ a waŋnda haa, nduyɛ hei ke Chɛhowa le bɛɛ kposoŋ te. Suukaŋ waa naa o Intanɛtiiyo choo cho nɛi kɛndɛ le yiyaŋ waŋndo siŋgaa, ɔɔ le ndu malaa mbo bii tonyaa bila le. (Timoti Tasoo 6:​3-5; Timoti Diiŋ Ndɔɔ 2:​23-25) Okoŋ kɔɔli, mi waŋnda apum kila tɛɛŋgoŋ le chɔmndo maa o kɔɔna Chɛhowaa niŋ ɔɔ o Dialii Kuumbaŋ Choo Ve choo nda cho ni. Kɛ wanaa lachoowaa nda cho ni. Puaapiliaa cho o Dialii Kuumbaŋ Choo Ve choo wa kpou, o kɛ kɛ nɔ tɛɛŋgii a ba ndɔ le.

Te ŋ chɔm pɛ waŋnda le kɔlaŋ o jw.org, mɛɛ ŋ cho wali dimiaa “yooŋgu kɛndɔɔ” tooloo. (Maatiu 24:​14) Tɛɛŋguŋ naŋ, a nyɛm mapuuluŋ naŋ soliŋ kpeku woŋ cho hiouwɔɔ lachi tuŋ a bɛndaa. Ŋ yeema mi wana o wana sɔla tɔnɔɔ o muŋ niŋ. Lelaŋ, ŋ nɔ dioo miŋ yɔŋ waŋndo yauwo o nyɛ mapuulu ndɔɔ choo, ɔɔ miŋ yɔŋgu ndu nɛi chɔmaa le tɛɛŋgii nɛi. O nɛiyo hoo choo, ŋ nɔla miŋ chɔm waŋnda maa “buɛi cho sakpo, nduyɛ, mbo wa buɛi kɔl kalu wo” kinɛi Chɛhowa cho soliŋndo kpeku ni le naa kioo nyɛm mala naa le pɛɛkoo a ndu okɔɔ woŋ ni.