1. Nɛɛ yaa kila yɛ kunda leKilisiɔŋndo Filipai?

MƐƐ wana Chiisu vem hɔlte ndɔ wo Pɔɔl, Sailaa, Luku a Timoti fuuluu Filipai a yooŋgu kɛndɔɔ dimioo, mi wanaa bɔɔbɔɔ yaŋ nda nilaŋ. Puaapiliaa haa ndaa nɔ bɔɔ sɛmbɔɔ nduyɛ nda kila kunda leKilisiɔŋndo Filipai ni. O viu bɛɛ le, mi puaapiliaa a ndepiliaa sɛnɛiya haa kandu bɔŋaŋndaŋ biyɔɔ. Naapum o Lediaa lo chiɛiniŋ ndaa bii bɔŋaŋndaŋ o tasela ndɔ ni kanifuule, ndepilɛnɔ ikɛndɔɔ pila o wa ni.—Walta. 16:​40.

2. Simul kuɛɛ ndoo komal lɛ puaapiliaa a ndepiliaa sɛnɛiya Filipai?

² Haupa mi simul kala kalaa komal puaapiliaa a ndepiliaa sɛnɛiya haa. Mi Setana hiau wanaa tul tonyaa leyɛ wa kɔɔli le ma kuuna Pɔɔl a chaaŋaa nduaa yooŋgu kɛndɔɔ dimioo. Ma bii Pɔɔl nda Sailaa, ma luaa nda lɔɔ pila a yɔmnde nduyɛ ma duau nda o chiɛi manyumndo niŋ. Mɛɛ nda soli nda, ma miiŋgu pila o puaapiliaa a ndepiliaa haa lo le nda kɔl dɛɛniaa kioo. Okoŋ, mi Pɔɔl, Sailaa a Timoti mal chioo. Kɛ naapum mi Luku ndu lo loŋ. Yɛɛ puaapiliaa a ndepiliaa sɛnɛiya haa ndaa nɔ yɛ niko ma tosa? Mi nyina Chɛhowaa luei nda yoomuaŋ nduyɛ ma hiau lachi a ndu piɛiyo. (Filipi. 2:​12) Mi Pɔɔl naŋ kɔl tau le mɛɛ nda hiou lachi a Chɛhowa piɛiyo yɛ!

3. A mɛɛ Filipiaŋnda 1:​9-11 dimi yɛ, a yɛɛ okɔɔ Pɔɔl ndoo piɛi yɛ?

³ Mɛɛ suɛi wɔsila tɔ hiou okoŋ kɔɔli, mi Pɔɔl poonyial kundaa Filipai yauwo. Te a wa pɛ diomndaŋ veeloo o yauwo hoo niŋ, a nɔla ma sina mɛɛ kpɛ Pɔɔl ndoo kaala puaapiliaa nduaa yɛ. Mbo poonyial nda aa, “Mɛɛ Chiisu Kiliti kaala nya yɛ lende kpeŋ kaalaa cho o kɔl nuu niŋ di le nya ni.” (Filipi. 1:​8) Mbo dimi vɛlɛ maa mi ndoo piɛi le nda. Mbo dimul Chɛhowa maa o mala nda  mi kaala ndaa hiou lachi, ma hɛli suɛi hiou bɛnda le tosaa ve, ma wa a diandaa walaŋ o kɔlta ndalaŋ niŋ, ma pɛŋgi tosaa mi acheleŋnda tosa yɔŋ wɔɔŋndo, nduyɛ ma nɔ kaala cho la kɛndɛ sakpo laŋ. A tonya, naa bɛɛ sɔla hau tɔnɔɔ tau o sɔɔŋ Pɔɔl poonyial nda muŋ ndoŋ niŋ. Mɛɛ ŋ veeluŋ ndɔ niko diomndaŋ o yau kalaa niŋ. (Nauwɔ Filipiaŋnda 1:​9-11.) Okoŋ, miŋ yaasiaa sɔɔŋ o poonyial nda muŋ ndoŋ ŋtiŋ, nduyɛ miŋ che mɛɛ naŋ duau muŋ hau o wali niŋ yɛ.

4. (a) A mɛɛ Chɔŋ Tasoo 4:​9, 10 dimi yɛ, o nɛi kuɛɛ choo Chɛhowa chɔm yɛ naa kaalaa? (b) Vɛɛ kpɛ naŋ nɔ yɛ miŋ kaala Mɛlɛka?

⁴ Mi Chɛhowa chɔm naa kaala ndɔ bɛndoo mɛɛ o vem Po ndɔɔ o lɛŋndeŋ choo mbo huŋ wu le hakila naalaŋ. (Nuawɔ Chɔŋ Tasoo 4:​9, 10.) Kaala o chɔm naa hoo wo nyindu naa ni le ndu kaalaa. (Luomaŋ. 5:​8) Vɛɛ kpɛ naŋ nɔ yɛ miŋ kaala Mɛlɛka? Mi Chiisu muli nyunaa hoo mɛɛ o dimul Falisiinɔ pilɛ aa, “Kaala Masanɔɔ o cho Mɛlɛka ŋ piɛiyo wo nyɛ kɛndɛ kɛndɛi. Kaala ndu a kɔl numndo kpou, nduyɛ, ma wa yiyaŋndo a ndu okɔɔ teleŋ o teleŋ fee.” (Maa. 22:​36, 37) Ŋ nɔ miŋ kaala Mɛlɛka a sondo kinɛi le. Kɛ, kaala cho naa o lakɔl le ndu wo nɔ mbo hiou lachi a kaloo lepaa o lepaa. Mi Pɔɔl dimul Filipiaŋnda maa kaala ndaa nɔ mbo “hiou lachi kɛ kɛ.” Yɛɛ naŋ nɔ yɛ miŋ tosa le mi kaala naŋ nɔ le Mɛlɛka wo kendu poŋ?

5. Yɛɛ tosa yɛ mi kaala naŋ nɔ le Mɛlɛka wo kendu poŋ?

⁵ Mɛɛ miŋ sina fɛŋ Mɛlɛka malaŋ naŋ kaala ndu. Baabuiyo dimi aa, “Wana o wana kaala le, mɛɛ o sina wana Mɛlɛka cho wo le, kani fondole, kaa Mɛlɛkaa ndu cho hiouwɔɔ lachi a kaalaa lɔɔ lɔɔ ni.” (1 Chɔŋ 4:​8) Mi Pɔɔl dimi maa kaala naŋ nɔ le Mɛlɛka wo cho kalu, te o yɔŋ pɛ miŋ “chɔɔlu dɛnɛ sinaa kpeekpeiyo sɔla a kɔl kalu kpeekpeiyo” a ndu okɔɔ. (Filipi. 1:​9) Mɛɛ naŋ kandu Baabuiyo pɛɛkoo, miŋ kandu Chɛhowa kaalaa mi che bɛɛ naŋ sina wɔ tau a ndu okɔɔ le. Okoŋ, mɛɛ naŋ lambaŋ pɛɛkoo a ndu okɔɔ, mi kaala naŋ nɔ le ndu wo chɔɔlu kalu poŋ. Lelaŋ, i cho bɔɔ suɛi sɔvɛ le miŋ wa Baabuiyo pɛɛkoo lepaa o lepaa nduyɛ miŋ wa yiyaŋndo o nyɛ naŋ pɛɛku wo choo.​—Filipi. 2:​16.

6. A mɛɛ Chɔŋ Tasoo 4:​11, 20, 21 dimi yɛ, o nɛi kuɛɛ choo kaala naa hiau yɛ lachi?

⁶ Kaala bɛndu Mɛlɛka chɔm naa wo nyindu naa ni miŋ kaala puaapiliaa naa. (Nuawɔ Chɔŋ Tasoo 4:​11, 20, 21.) Lepum, miŋ yiyaŋ maa puaapiliaa a ndepiliaa naa kaalaa cho suɛi kala le naa le. Le mɛɛ naŋ cho Chɛhowa piɛiyo miŋ wa kindiŋndo le taamasi ndɔɔ tolɔɔ kɔɔli yɛ naŋ yiyaŋ lende ni. Miŋ yiyaŋ vɛlɛ maa te taamasi Chiisu wo, o kaala naa mbo wu le naa wo naŋ cho tolɔɔ kɔɔli ni, mɛɛ ŋ nɔ kaalaa le puaapiliaa a ndepiliaa naa. Kɛ o kpeekpei niŋ, mii wa lepum ikala kpekiee le sawa dimi maa ŋ kaaliaŋ vellaa velle wo diikɔŋndo. Ŋ yaasiaŋndɔ nyɛ yɔŋnuŋ o kundaa Filipai niŋndo le hei sinaa.

7. Yɛɛ naŋ pɛɛku yɛ o sila Pɔɔl ke Yuwodiaa nda Siŋtike wo niŋ?

⁷ Ndepiliaa ndaa nɔ sɛmbɔɔ tau wa Yuwodiaa nda Siŋtike wa ni. Nda ŋiɔɔŋ kpou ma “tosa wallo” latulu a Pɔɔl. Kɛ mi sɛɛŋgiaŋndo mɛɛlu nda luɛiyɔɔ tɛɛŋ. Le hei, ndaa suukaŋ ndɛ le. Mi Pɔɔl pial Yuwodiaa nda Siŋtike diolaŋ o yau o poonyiaa le kunda nda wa niŋndo. Mbo sila nda o tuu kpɛi aa, “I nyɔɔlu nya a yandii la miiŋgu o diom pilɛ niŋ maa wanaa laalaŋ o Masanɔɔ Mɛlɛka niŋ.” (Filipi. 4:​2, 3) Okoŋ, mbo sila vɛlɛ kundaa kpou aa, “Nyɛ o nyɛ la wa ndu tosa pɛ, la tosa ndu a ŋɔɔchiaŋ te, kɛlɛŋgaa niŋ te mi la hiŋaŋ ladiom a chaaŋaa nyaa a ndu okɔɔ.” (Filipi. 2:​14) Mɛɛ i cho kpendekele maa o cho ko le ndepiliaa ŋiɔɔŋ nda haa le silaa ndoo yeemaŋ te, kɛ le wana o wana o kundaa  niŋ. Nduyɛ mi sila Pɔɔl ke hoo nda kpou wo tosa mi kaala ndaa hiau lachi.

8. Yɛɛ tosa yɛ ndi ikala le puaapiliaa naa kaalaa, nduyɛ vɛɛ naŋ chɔulaba yɛ ndu?

⁸ Te o yɔŋ pɛ miŋ kɛsi kɔllo o biondɔŋnda acheleŋnda choo, o wa ikala le miŋ kaala nda. Nduyɛ, nyɛ yɔŋnuŋ Yuwodiaa nda Siŋtike wo nɔla mbo yɔŋnuŋ naa. Naa kpou miŋ tosa biondɔŋndaŋ lepaa o lepaa. Kɛ te ŋ handu pɛ kɔllo lɔɔlɔɔ o biondɔŋnda acheleŋnda choo, mɛɛ kaala naŋ nɔ le nda wo cho tolɔɔ toolo. Le taamaseliiyo, naapum miŋ tuulu kɔl te puaapilɛnɔɔ puɛɛŋ pɛ le hunɔɔ Toŋgo leMasaa dindioo. Nduyɛ, te o yɔŋ yɛ pɛ miŋ kandu siɔwuŋ ndɔŋ paandoŋ chɔmndo, mɛɛ kɔllo cho naa chɔɔlu tuulu. Keŋ tosa mi kaala naŋ nɔ le ndu wo chuu naa o kɔl. Te a nɔ bahawɛi wa naa pɛ a waŋndo o kundaa niŋ, o bɛnda ma kɛsiŋ o kɔl maa Chɛhowa cho chɔɔ siɔwuŋ numndoŋ a ŋ puaapilɛnɔ koŋ. Kɛ a siɔwuŋ naŋ muŋ fau, o cho naa kpou kaala ndɔɔ chɔmndo lɔɔlɔɔ. Lelaŋ, ŋ nɔ miŋ tol taamasi Chɛhowaa kɔɔli le kɔllo kɛsioo o sɔɔŋ kɛndɛŋ puaapiliaa naa tosa woŋ choo. Te ŋ kindiŋ pɛ kpoke le puaapiliaa naa kaalaa, diompilɛ cho naa tɛɛŋndo cho chɔɔlu kalu poŋ.—Filipi. 2:​1, 2.

9. Ɔɔ sɔɔŋ “hiou bɛnda kpou le tosaa” woŋ ŋtiŋ ŋ Pɔɔl ndoo nɔ o kɔl loŋ?

⁹ Mi nyina diandaa Mɛlɛkaa nyindu Pɔɔl le poonyiallo Kilisiɔŋnda Filipai a haa o chieeŋ cheleŋ ndoŋ le ma “hɛli suɛi hiou bɛnda kpou le tosaa ve.” Keŋ naa bɛɛ nɔ hau le tosaa ni. (Filipi. 1:​10) Sɔɔŋ hiou bɛnda le tosaa woŋ ŋtiŋ cho diola Chɛhowalaŋ bɛɛleŋ kioo, tosaa mi sabula ndɔlaŋ la peeluŋ a tosaa mi kɔl nyuloo a diompilɔɔ wa o kundaa niŋ ni. (Maa. 6:​9, 10; Chɔŋ 13:​35) Ŋ chɔm maa ŋ kaala Chɛhowa te ŋ landuŋ pɛ kɔl le sɔɔŋ sɔviɔŋ muŋ o yoomu naa niŋ.

10. Yɛɛ naŋ nɔ yɛ miŋ tosa le miŋ wa a diandaa?

¹⁰ Mi Pɔɔl dimi vɛlɛ maa ŋ nɔ miŋ “wa a diandaa walaŋ.” Hei chɔm naa maa ŋ nɔ miŋ dendu haaa ŋ nɔ lɛ haki le le. Ŋ nɔla miŋ wa a diandaa mɛɛ Chɛhowa cho o diandaa walaŋ yɛ le. Kɛ ŋ nɔla miŋ wa a diandaa Chɛhowa o hɔl te o yɔŋ pɛ miŋ kindiŋ kpoke mi kaala naa hiou lachi nduyɛ miŋ hɛli suɛi hiou bɛnda kpou le tosaa ve. Nɛiyo opilɛ o naŋ chɔm maa ŋ nɔ kaalaa le acheleŋnda wo cho fafaŋndo sɔɔŋ tosa mi chaŋyɛi ndɛi a Chɛhowa tambu ve ni.

11. Le yɛɛ naŋ nɔ yɛ miŋ fafaŋ sɔɔŋ tosa mi acheleŋnda tosa yɔŋ wɔɔŋndo woŋ?

¹¹ Mi Pɔɔl yɔŋgu sila kala kalaa maa ŋ tosa mi acheleŋnda tosa yɔŋ wɔɔŋ o yɔŋ wɔɔŋ te. Vɛɛ naŋ tosa yɛ mi waŋndo tosa yɔŋ wɔɔŋndo? Ŋ tosa hei a yelelaŋnda naŋ hɛli laŋ lapum ɔɔ nyɛla naŋ chuɛinuŋ ndaŋ. Ŋ tosa vɛlɛ ndi a wali suu naŋ hɛli le tosaa wo. O kpeekpei niŋ, o ve naa maa sawa Chɛhowaa le naŋ wa tɛɛmbuu wo le. Kɛ te o wa pɛ maa sɔɔŋ naŋ hɛli le tosaa woŋ cho kɔlta iyamala acheleŋnda paaliaŋndo, mɛɛ keŋ cho suɛi lamamɔɔ le. Mi Chiisu dimi maa o bɛnda ma baa naa pou bɛndoo o labolo, ma mal naa o mɛŋma yiŋgilɛiyaŋ niŋ, mbo hiau tosaa mi puaapilɛnɔ naa tɛɛmbuu chaŋyɛi nduɛi a Chɛhowa.—Maa. 18:​6.

12. Yɛɛ taamasi pɔnɔɔ a lanɔ kɔɔfanɔɔ pilɛ pɛɛku yɛ naa?

¹² Tofawɔ mɛɛ pɔnɔɔ a lanɔ pilɛ a cho kɔɔfaa wa dɔu sila Chiisu wo hoo o wali niŋ yɛ. A wa o kundaa niŋ a pɔnɔɔ a lanɔ pilɛ a sɔla yiŋɔɔ sɛnɛiya. Kɛ yuŋgula pɔnɔɔ a lanɔ yiŋ kaŋ sɛnɛiya mandaŋ niŋndaŋ laa nɔ bɔɔ sawalaŋ. Ndaa laalaŋ pɛŋ maa Kilisiɔŋnɔɔ nɔ mbo tofa vidueilaŋ kposoŋ te, o yɔŋ bɛɛ mi la nɔ sɔɔŋ nɔɔlɛi leniŋ te. Mɛɛ nda tuei maa pɔnɔɔ a lanɔ kɔɔfaa haa tofa vidueiyo, ma duaŋuŋ tumbe tau. Mɛɛ kɔɔfaa haa sina hei, ma kialu kɔlaŋ vidueilaŋ tofaa. Ma tosa hei haaa mi kɔlta iyamala puaapilɛnɔɔ a ndepilɛnɔ sɛnɛi koŋ chɔɔlu kalu le sinaa ikɛndɛi a iwɔɔŋnde. (Hibu. 5:​14)  Mi pɔnɔɔ a lanɔ kɔɔfaa haa kɛsi yeemaŋ acheleŋnda ŋ ndaŋ lachi. Hei kpeekpei chɔm ni maa o ve a sondo le ndaa kaala puaapilɛnɔɔ a ndepilɛnɔ sɛnɛi koŋ te, kɛ a kɔl ndaa kpou.—Luomaŋ. 14:​19-21; 1 Chɔŋ 3:​18.

13. Ɔɔ nɛi cheleŋ naŋ tosa mi acheleŋnda tosa yɔŋ wɔɔŋndo wo?

¹³ Nɛi cheleŋ naŋ tosa mi acheleŋnda tosa yɔŋ wɔɔŋndo wo cho sila wɔɔŋndo nda kioo ni. Vɛɛ naŋ tosa yɛ hei? Yiyaŋndɔ a taamaseliiyo hoo. Wana pɛɛkaa Baabuiyo lo kindiŋndo haaa mbo mal muɛiyaŋ kolɔɔ bɛndoo. Kɛ mbo cha maa mɛɛ mbo mal maŋ waŋ waŋ malaŋ sɔɔŋ bɛnda a ndu, okoŋ mbo mal. Mi hei mala ndu mbo keleŋa siŋgaŋnda cheleŋ tosa, nduyɛ mbo yiŋ. Kɛ paale pilɛ, mi puaapilɛnɔɔ veelu ndu o chuuŋgiaŋ pɔmbɔ le nyɛdiaa dioo, nduyɛ mbo ke ndu muɛiyaŋ. Mbo dimul ndu aa, “Wo le mamuɛi kolɔɔ le. Kilisiɔŋnɔɔ ŋ cho niŋ ni nduyɛ a nɔ nyina Mɛlɛkaa. Nyɔɔ opilɛ o nyina Mɛlɛkaa mala naa le tosaa wo cho kɔl naa baatiuwo ni. Te a nɔla pɛ ma tui kɔl numndo ba, mɛɛ a nɔla ma kol tuuleŋ.” I wa bɔɔ suɛi kɔl tambɛi te puaapilɛnɔɔ hoo yaŋ pɛ sila wɔɔŋ koŋ nilaŋ mbo kol, okoŋ mbo miiŋguŋ vɛlɛ yikpi o muɛiyaŋ niŋ!

14. O nɛila kuɛɛ choo bɔŋaŋnda naala leKilisiɔŋndaŋ la mala yɛ naa le sila cho o Filipiaŋnda 1:​10 niŋndo dɔwɔɔ o wali niŋ?

¹⁴ O nɛila bɔɔbɔɔ niŋ, mi bɔŋaŋnda naala leKilisiɔŋndaŋ la mala naa le sila cho o Filipiaŋnda 1:​10 niŋndo dɔwɔɔ o wali niŋ. O tasoo, nyɛ naŋ pɛɛku o bɔŋaŋndaŋ ndo mala naa le sinaa sɔɔŋ hiou bɛnda Chɛhowa o hɔlloŋ. O diiŋ ndɔɔ, ma chɔm naa mɛɛ naŋ duau sɔɔŋ naŋ pɛɛku muŋ ndoŋ o wali niŋ yɛ, le halikpeŋ miŋ  wa a diandaa. O yaa ndɔɔ, ma dɛɛniaa naa le “waŋnda kaalaa a sɔɔŋ kɛndɔŋ tosaa.” (Hibu. 10:​24, 25) Mɛɛ naŋ sɔla kɔl dɛɛniaa puaapiliaa naa o ba fau, lende koni kaala naŋ nɔ le Mɛlɛka a puaapiliaa naa wo hiau lachi ni. Nduyɛ te ŋ kaala pɛ Mɛlɛka a puaapiliaa naa a kɔllo kpou, fɛŋ bɛɛ ŋ nyindu nda le yɔŋ wɔɔŋndo tosaa le.

15. Yɛɛ o sim yɛ le “kaala cho la kɛndɛ sakpo laŋ” tosaa?

¹⁵ Pɔɔl wa lɔɔlɔɔ piɛileŋ maa Filipiaŋnda hiou lachi a “kaala cho la kɛndɛ sakpo laŋ” tosaa. (Filipi. 1:​11) Kaala kɛndɛlaŋ ndaŋ lapum la wa kaala ndaa nɔ le Chɛhowa a wanaa nduaa wo ni. Ndaa nɔ vɛlɛ mi ndaa dimul acheleŋnda a tiindaŋ ndaa nɔ o Chiisu niŋndo okɔɔ a sɔɔŋ kɛndɛŋ nda wa lehɔl o nɛiyoŋ. O Filipiaŋnda 2:​15 niŋ, mi Pɔɔl tuu kaala kɛndɛlaŋ ndaŋ a ‘looŋ diandaŋ o halaa niŋ.’ Nyɛ o dimi koŋ ndo loonuŋ naa a nyɛ Chiisu bɛɛ dimi maa buɛiyaa nduaa cho “maa nyɛ wawoŋ le waŋnda kpou o chieeŋndo choo” wo. (Maa. 5:​14-16) Mi Chiisu ndoo dimul vɛlɛ tol kɔɔliaa nduaa le ma “siiŋguu” waŋnda buɛiyaa ndɔ. Okoŋ kɔɔli, mbo dimi maa a “dimul niŋ waŋnda . . . ba o ba fee o chieeŋndo choo” a ndu okɔɔ. (Maa. 28:​18-20; Walta. 1:​8) Ŋ tosa “kaala cho la kɛndɛ sakpo laŋ” te o yɔŋ pɛ miŋ dɔu sɛmbɔɔ le wali sɔvɛ Chiisu ke naa hoo wo tosaa.

16. Vɛɛ Filipiaŋnda 1:​12-14 chɔm yɛ maa o yɔŋ bɛɛ miŋ wa o simulta kala kalalaŋ bɛŋgu, ŋ nɔla miŋ dendu maa looŋ o halaa niŋ? (Tofa fotueiyo o kɔɔ.)

¹⁶ O yɔŋ bɛɛ miŋ wa o simulta kala kalalaŋ bɛŋgu, ŋ nɔla miŋ dendu maa looŋ o halaa niŋ. Teleŋndaŋ lapum, mi simulta naŋ yiyaŋ maa la cho naa kuuna yooŋgu kɛndɔɔ dimioo laŋ, la kumbul naa dioo le ndu dimioo. Le taamaseliiyo, o biyɔɔ niŋ Pɔɔl wa Luom ni mbo poonyial Filipiaŋnda yauwo. Kɛ biyɔɔ o wa koŋ niŋndo kuuna ndu suɛi o waŋnda lo le. Mbo dimul wanaa bii ndu wa a wanaa ndaa kua ndu yilɔɔ  wa yooŋgu kɛndɔɔ. Mbo hiau lachi a yooŋgu kɛndɔɔ dimioo a dialuŋ fulaa mi che bɛɛ o wa o simul kala koŋ bɛŋgu. Taamasi ndɔ koŋ tosa ni mi puaapiliaa sim kɔl yi “le suɛi Mɛlɛkɛi dimioo a yɔŋ isiooŋ te.”—Nuawɔ Filipiaŋnda 1:​12-14; 4:​22.

17. Vɛɛ puaapiliaa a ndepiliaa pum cho yɛ hau yooŋgu kɛndɔɔ dimioo mi che bɛɛ a cho o simulta kala kalalaŋ bɛŋgu?

¹⁷ O lɛŋnde ipum niŋ, a chɛl mi Seiyaa Chɛhowaa dimi yooŋgu kɛndɔɔ chiɛiyo a chiɛiyo le. Puaapiliaa a ndepiliaa naa cho o lɛŋii waa naa niŋnde cho taamasi Pɔɔllo tolɔɔ kɔɔli le kɔl sikpaa chɔmndo. Ma nuuviaa nɛilaŋ le halikpeŋ ma dimi yooŋgu kɛndɔɔ. (Maa. 10:​16-20) Mi buɛi ibuŋgaa o lɛŋnde hei lepilɛ niŋ kɛɛsiaa maa wana dimiaa yooŋgu kɛndɛ kɛ kɛ nɔ mbo dimi yooŋgu kɛndɔɔ o tanda ndɔɔ niŋ. Ndu cho ni, wanayaŋ ndaŋ, wanaa nda chiɛɛliaŋnda, wanaa nda kua o sukuuwa, wanaa nda tosa wallo latulu wa a wanaa nda siiniaŋ nda. Tuupa mi wɔsioŋ ŋmuuŋ bɔŋa, mi kundalaŋ la chɔɔlu kilaŋ tau o buŋgɛi keŋ niŋ. Naapum a kɛɛlu wɔ num yooŋgu kɛndɔɔ dimioo o lɛŋnde ŋ cho niŋ ndeŋ te. Kɛ ŋ pɛɛku nyɛ o taamasi puaapiliaa a ndepiliaa haa niŋ. Ndu cho ni, ŋ nɔ miŋ nuuviaa nɛilaŋ lɔɔlɔɔ le yooŋgu kɛndɔɔ dimioo nyɛkɛndɛi. Nduyɛ te ŋ tosa hei suŋ suŋ pɛ, o yɔŋ bɛɛ mi simultaŋ la komal naa o chilaŋ niŋ, Chɛhowa nɔla mbo mala naa miŋ hiou laŋ.—Filipi. 2:​13.

18. Yɛɛ naŋ nɔ yɛ miŋ kɛɛsiaŋ o kɔl suŋ suŋ le tosaa?

¹⁸ Ŋ nɔ miŋ kɛɛsiaŋ o kɔl suŋ suŋ le sila Pɔɔl poonyial Filipiaŋnda wo dɔwɔɔ o wali niŋ mbo hiou maa paandu. Maa ŋ hɛliŋ sɔɔŋ hiou bɛnda kpou le tosaa woŋ, nduyɛ miŋ wa a diandaa walaŋ o kɔlta naalaŋ niŋ. Ŋ nɔ vɛlɛ miŋ fafaŋ sɔɔŋ tosa mi acheleŋnda tosa yɔŋ wɔɔŋndo woŋ, nduyɛ miŋ nɔ kaala cho la kɛndɛ sakpo laŋ. Te ŋ tosa lende pɛ, mɛɛ kaala naa cho hiouwɔɔ lachi kɛ kɛ, okoŋ mi Finya naa kaalaa Chɛhowa sɔla bɛɛleŋ tau.