1. Yeemɛi yɛɛ naa kpou nɔ yɛ le wanayaŋ naŋ?

“MƐƐ ya pɛɛku tonyaa, yaa yeema bɔɔ mi wana o wana o yuŋgu nuu niŋ ndoo huŋ wa a ya latulu o Kpele Hɛnɛkiɔɔ niŋ.” Hei ndepilɛnɔ pilɛ diolaŋ Pɔliŋ * dimi ni. Mbo hiau lachi a dimioo aa, “Yaa yeema bɔɔ mi naŋ piɛi Chɛhowa latulu naa pɔnɔ nuu Weni, a poombɔ naa.” Baa a nɔ wanayaŋ ŋ sina wɔ Chɛhowa nduyɛ miŋ nɔ kaala le ndu le woŋ? Te o wa pɛ maa a nɔ, kɛlɛŋgaa yeemɛi Pɔliŋ nɔ le yuŋgu ndɔɔ ve num bɛɛ nɔ le nda ni.

2. Nyunala kuɛɛ naŋ cho yɛ yaasiaa o buŋgɛi hei niŋ?

² Ŋ nɔ kposoŋ miŋ baŋ wanayaŋ naŋ le nilaŋ yaŋɔɔ o yooŋgu kɛndɔɔ le. Kɛ, ŋ suaa o nda lo o nɛi dɛɛniaa nda kɔllo ma yaŋ nilaŋ o yooŋgu Baabuiyo nduyɛ ma yiyaŋ lechoo wo. (2 Timo. 3:​14, 15) Le yɛɛ naŋ nɔ yɛ miŋ dimul wanayaŋ naŋ yooŋgu kɛndɔɔ? Le yɛɛ naŋ nɔ yɛ miŋ kindiŋ le yiyaŋ ndaa sinaa? Yɛɛ naŋ nɔ yɛ miŋ tosa le wanayaŋ naŋ malaa ma kaala Chɛhowa mɛɛ naŋ kaala ndu yɛ? Nduyɛ vɛɛ puaapiliaa a ndepiliaa o kundaa niŋ yɔŋgu yɛ malaa?

3. A mɛɛ Pitɛ Diiŋ Ndɔɔ 3:​9 dimi yɛ, le yɛɛ naŋ nɔ yɛ miŋ dimul wanayaŋ naŋ yooŋgu kɛndɔɔ?

³ Chɛhowa cho suŋ hunɔɔ chieeŋ dɛnɛ wɔɔŋndo hoo tɛɛmbuu. Nduyɛ, “wanaa Mɛlɛka hɛli le ma sɔla yoomu kpeekpeiyo o nɔ lamɛɛlu le wo wa” koni cho pioŋɔɔ sɔla ni. (Walta. 13:​48) Miŋ soliŋ teleŋndo a yoomuma naŋ kpeku tau le wanaa naŋ sina le wa  yooŋgu kɛndɔɔ dimullo o tanda naa niŋ. Lelaŋ naŋ nɔ yeemɛi ni le mi wanayaŋ naŋ bɛɛ piɛi Chɛhowa a naa latulu. Finya naa kaalaa Chɛhowa, “hɛnaŋ mi wana o wana o huŋ wa o tɛɛmbaa le. O hɛnaŋ mi wana o wana o mal yɔŋnda ndɔla wɔɔŋndaŋ.”—Nuawɔ Pitɛ Diiŋ Ndɔɔ 3:​9.

4. Biondɔŋ yɛɛ naŋ tosa yɛ lepum te ŋ wa pɛ wanayaŋ naŋ yooŋgu kɛndɔɔ dimullo?

⁴ Ŋ nɔ miŋ kɛsiŋ o kɔl maa mɛɛ naŋ suaa o waŋnda lo yɛ tosa ma yaŋ nilaŋ o yooŋgu ke nda yoomu kpeekpeiyo wo ɔɔ ma kɛɛ nilaŋ yaŋɔɔ. Te ŋ wa pɛ wana naŋ sina le wo yooŋgu kɛndɔɔ dimullo, miŋ soo nyɛkɛndɛi o ndu lo. Kɛ ŋ suu lepum nyɛkɛndɛi o wanayaŋ naŋ lo le.

5. Yɛɛ naŋ nɔ yɛ miŋ kɛsiŋ o kɔl tuupa miŋ soo o wanayaŋ naŋ lo a tonya Baabuiyo okɔɔ?

⁵ Te ŋ yiyaŋ pɛ a teleŋ tase naŋ kindiŋ le wanayaŋ naŋ yooŋgu kɛndɔɔ dimullo wo, mi naa bɔɔbɔɔ tambu kɔl a mɛɛ naŋ soo o nda lo yɛ. Nduyɛ, miŋ yiyaŋ pɛŋ maa ndoo bɛnda mi naŋ soo o nda lo lende le. Mi Pɔɔl, wana Chiisu vem hɔlte wo sila Kilisiɔŋnda aa, “Mɛɛ wana chɔm waŋndo suɛi mbo hini kɔl, o koŋ kɔɔli, mi yeemɛi i bii ndu yɛ lende nya soo ni. Te wana o wana nyuna nya isɔɔ o isɔɔ pɛ, la sina mɛɛ nya muli ndu diom mbo wa sakpo yɛ.” (Kolo. 4:​5, 6) O bɛnda bɔɔ miŋ kɛsiŋ silaa hoo o kɔl te ŋ wa pɛ suɛi o wanayaŋ naŋ lo. Te o ve lende le, ŋ cho isɔɔ dimi ma tambu kɔl a naa okoŋ, ma kɛɛ niko le naa nilaŋ yaŋɔɔ.

6-7. Chɔmndɔ taamaseliiyo a mɛɛ Kilisiɔŋnɔ cho o nɔɔ nda wana cho Chɛhowa piɛi le wo nɔ mbo chɔm ndu nyiɛɛye yɛ.

⁶ Chɔm nyiɛɛye. Mi Pɔliŋ naŋ soo suŋ a ndu okɔɔ wo dimi aa, “Teleŋ tase ya pɛɛku tonyaa wo, a sɔɔŋ Mɛlɛkaŋ okɔɔ kinɛi yaa yeema ni mi naŋ dɔu baltaŋ naa pɔnɔ nuu. Naŋ suu ko a ‘sɔɔŋ cheleŋ’ okɔɔ le.” Kɛ pɔnɔɔ Pɔliŋ, Weni ndoo sina Baabuiyo tau le, nduyɛ ndoo bii nyɛ Pɔliŋ wa suɛiyo bila le. Mi Weni yiyaŋ maa  a kaaŋndeŋ ndɔleŋ okɔɔ kinɛi Pɔliŋ laa ndɔ buulaŋ niŋ ni. Mbo buulaŋ pɛŋ maa piɛile wɔɔŋ wɔɔŋndeŋ pila laa ndɔ luɛi leniŋ ni. Nduyɛ maa huiyo koni nda cho ndu ni.

⁷ Mi Pɔliŋ dimi vɛlɛ maa a palɛi yɔŋgaŋnde ipum a o lɔɔlaŋ mɛɛlulaŋ, teleŋndo pila ndoo chua a puaapiliaa a ndepiliaa nduaa ni. Mi ndaa kuɛ o bɔŋaŋnda leKilisiɔŋndaŋ, wali pollo a o chuuŋgiaŋnda cheleŋ. Mbo dimi aa, “Mi Weni ndoo hiŋ lepum o bɛɛ o komal wana o wana le.” Wana dimi isɔɔ a tonya, Weni ndoo yeema bɔɔ waa latulu nda laa ndɔ a po ndɔɔ teleŋ ndoo huŋ hoo o bɛɛ wo. Ndoo sina wanaa ndaa kua o nda lo wa le. Mi hei ke ndu yiyaŋndo maa Pɔliŋ chua chaaŋaa nduaa sɛnɛiyaa kaŋ a sɔvɛ mbo hiau ndu. Le hei, mi Weni kɔŋgɔlaŋ maa o cho ndu kɛɛ te o siŋgaŋ te. Yɛɛ ŋ yiyaŋ yɛ maa Pɔliŋ ndoo tosa le chɔmndo kɛsɛ maa o nɔ nyiɛɛye tau le pɔnɔ ndɔ?

8. A mɛɛ Pitɛ Tasoo 3:​1, 2 dimi yɛ, yɛɛ piiliaŋ yɛ wanayaŋ naŋ tau?

⁸ Kaa num kɛndɔɔ nɔla mbo mala nda. Teleŋnda bɔɔbɔɔ, kaa naa piiliaŋ wanayaŋ naŋ mbo hiau nyɛ naŋ dimul nda wo. (Nuawɔ Pitɛ Tasoo 3:​1, 2.) Mi Pɔliŋ mɛɛlu hei biyɔɔ bila. Mbo dimi aa, “Mi sina kɛsɛ maa Weni kaala naa, nduyɛ maa o kpeekpei niŋ, o cho kɛɛ le ndoo yeema ya le. Kɛ kɔŋgɔlaŋ o kɔŋgɔlaŋ le ya kiɔɔ wo mala ya ni le sinaa maa I nɔ mi tol sila Chɛhowaa kɔɔli a nɔɔ okɔɔ. O cho suɛi tau o ndu lo a Baabuiyo okɔɔ le ndii yeemaŋ ya o ba le, kɛ kaa ni kɛndɔɔ.” Pɔliŋ ndoo beŋ ndɛ pɔnɔ ndɔ balta Baabui le. Nduyɛ, mi ndaa dɔu niŋ baltaŋ tau a sɔɔŋ cheleŋndoŋ okɔɔ. Mi Weni kandu chɔɔ maa o nɔ niŋ bɛɛle ndɔleŋ tau. Mbo cha vɛlɛ maa po ndaa bɛɛ nɔ niŋ manda sɔviɔɔ. (Pulɔ. 31:​18, 27, 28) Mɛɛ Weni che mɛɛ Baabuiyo wa yuŋgu ndɔɔ malaa yɛ, mbo kandu yeemɛi nɔɔ o balta Baabuilaŋ niŋ.—1 Kɔliŋ. 7:​12-14, 16.

9. Le yɛɛ naŋ nɔ yɛ miŋ hiou lachi a kindiŋndo le wanayaŋ naŋ malaa?

 ⁹ Hiou lachi a kindiŋndo le wanayaŋ numndoŋ malaa. Chɛhowa kɛsul naa taamasi kɛndɔɔ o hei niŋ. Baabuiyo dimi maa “le teleŋnda faŋga faŋga” mi ndoo dɛɛniaa wanaa nduaa le ma yaŋ ndu nilaŋ ma sɔla pioŋɔɔ. (Chɛlui. 44:​4) Mi Pɔɔl, wana Chiisu vem hɔlte ndɔ wo bɛɛ dimul Timoti le mbo hiou lachi a kindiŋndo le waŋnda yooŋgu kɛndɔɔ dimullo. Le yɛɛ? Kanifuule, keŋ wa ndu piŋi a wanaa wa ndu nilaŋ yaŋɔɔ wa. (1 Timo. 4:​16) Ŋ kaala wanayaŋ naŋ tau. Lelaŋ, ŋ yeema nda ma sina tonya cho o Diom Mɛlɛkaa niŋndo. Mi kaa kɛndɛ Pɔliŋ ndo a mɛɛ ndoo suaa niŋ yɛ chuu ndu fulamakɔɔli kɛndɔɔ tau. O cho niŋ hau a kɔl kɛndɛ le mɛɛ pɔnɔ ndɔ cho Chɛhowa piɛiyo yɛ. Nda ŋiɔɔŋ kpou cho kɔɔfaleŋ tosaa, nduyɛ bɛndu kundaa Weni cho niŋ ni.

10. Le yɛɛ naŋ nɔ yɛ miŋ wa wanaa biuwaŋ?

¹⁰ Wa wana biuwaŋ. Te ŋ pɛɛku tonyaa pɛ, miŋ siŋga yoomu naa a laalaŋnda naalaŋ le sawala Mɛlɛkalaŋ diikɔŋndo. I ve suɛi kpɛdɛ le mi wanayaŋ naŋ chɛl siŋgaŋndaŋ ndaŋ te. Siŋgaŋ nda keleŋa chɔ lepum ndo cho ni maa ŋ biilu lɛ dunyaŋ lepiɛiyoŋ a nda latulu le, nduyɛ maa bala naala cho lɛ o sɔɔŋ lemasaŋ niŋ te. Le hei, mi wanayaŋ naŋ ŋpum dɔɔnuŋ tumbe tau a naa o tasela ndɔ. (Maa. 10:​35, 36) Kɛ ŋ nɔ miŋ vi ŋdial a kindiŋndo le nda malaa ma bii laalaŋnda naalaŋ bila le. Te ŋ vi pɛ ŋdial le hei tosaa, mɛɛ yamɛi naŋ wa nda keŋ kilul lo ni maa a nɔ ma sɔla yoomu fafɛɛŋndo le. Kɛ Chɛhowa ke naa di le miŋ kilul waŋnda yamɛi keŋ te. Chiisu o ke di koŋ ni. (Chɔŋ 5:​22) Lepum, mi wanayaŋ naŋ mɛɛlu naa nilaŋ yaŋɔɔ te o yɔŋ pɛ miŋ wa wanaa biuwaŋ.—Tofa kɔfoo hoo “ Soliŋ Tɛɛŋgii Nɛi Kpeku le Waŋnda Pɛɛkoo.”

11-13. Yɛɛ ŋ pɛɛku yɛ o taamasi Alisi wo niŋ a mɛɛ o bii wanaa velu ndu wa yɛ?

¹¹ Chaa suɛi o nda lo, kɛ chɛl ma siŋga laalaŋ numndo le. (Pulɔ. 15:​2) Ŋ yaasiaŋndɔ nyɛ yɔŋnuŋ Alisi wo nyɛɛmbɔ. Wanaa velu ndu wa ndaa laalaŋ o Mɛlɛka niŋ te, nduyɛ a wa a yiŋnaŋ yikpi o sɔɔŋ lemasaŋ niŋ. Alisi wa landaŋ a nda mbo pɛɛku tonyaa. Mbo sina maa o nɔ mbo keleŋa nda dimul a sɔɔŋ kɛndɛŋ o wa pɛɛkoo woŋ okɔɔ. Mbo dimi aa, “Te a keleŋa yuŋgu numndo dimul a laalaŋnda numndaŋ okɔɔ le, mɛɛ a cho hunɔɔ tumbe dɔunuŋ tau te a huŋ sina ndi pɛ o mɛɛlulaŋ.” Mi ndoo nuuviaa sɔɔŋ o yiyaŋ maa ŋ nɔla miŋ pilaŋ wanaa velu ndu wa kɔllo woŋ, mɛɛ kaalaa cho naa yɛ. Nduyɛ mi ndoo poonyial nda yauwo a nyɛ Baabuiyo dimi a sɔɔŋ muŋ okɔɔ wo. Okoŋ, mbo nyuna niko yiyaŋ ndaa a nyɛ Baabuiyo dimi koŋ ndo okɔɔ. (1 Kɔliŋ. 13:​1-13) Mi ndoo mel wanaa velu ndu wa balikaa le mɛɛ nda manda ndu nduyɛ ma wa ndu chaa biyɔɔ yɛ. Nduyɛ mi ndoo yɔŋ nda nyɔɔŋ. Te ndoo kuɛ pɛ wanaa velu ndu wa yilɔɔ, waltaŋ pila ndoo mala kala ndɔ ni. O tasela ndɔ, wanaa velu Alisi wa ndaa niŋ kɔl kposoŋ le mɛɛ o pɛɛku tonyaa yɛ le.

¹² Te Alisi ndoo kuɛ pɛ wanaa velu ndu wa yilɔɔ, lepaa o lepaa mi ndoo veelu diomndaŋ o Baabuiyo niŋ. Mbo dimi aa, “Mi hei mala kala nuu le sinaa maa Baabuiyo cho bɔɔ nyɛ sɔvɛ le ya.” A teleŋ koŋ, mi finya ndɔ bɛɛ yeema Baabuiyo pɛɛkoo le sinaa nyɛ tosa mi chua ndɔɔ siŋga laalaŋ ndɔɔ wo. Nduyɛ ndoo yeema vɛlɛ siɔuwoŋ nuuviaa o Baabuiyo niŋ. Mi Alisi dimi aa, “Mi ke ndu Baabuiyo. Nduyɛ mi poonyiaa sɔɔŋ pum o Baabui ya ke ndu wo niŋ.” Yɛɛ wa yɛ fulamakɔɔlioo? Finyaa Alisi seeluŋ ŋsiɔu o Baabuiyo niŋ te, kɛ mi nyɛ o pɛɛku o Baabuiyo niŋndo pilaŋ ndu kɔllo tau.

¹³ O yɔŋ bɛɛ mi wanayaŋ naŋ simul naa, ŋ nɔ miŋ biuŋ nduyɛ miŋ chaa suɛi o nda lo. Kɛ ŋ nɔ miŋ chɛl kposoŋ ma siŋga laalaŋnda naalaŋ te. (1 Kɔliŋ. 4:​12b) Le taamaseliiyo, mi Alisi sɔla simullo tau kala ndɔ o ba, kɛ mbo biunuŋ. “Mɛɛ ya sɔla yiŋɔɔ, mi kala nuu dimi maa ‘chua wɔɔŋndo’ ya cho ni.” Kɛ yɛɛ Alisi ndoo tosa yɛ? Mbo hiau lachi a dimioo aa, “I feŋaŋ o laalaŋ  nuu choo le. Mi tɛɛsial kala nuu o nɛi lebɛɛ niŋ maa I chii kɛɛsiaŋ o kɔl maa Chɛhowa ya cho piɛi ni nduyɛ, I feŋaŋ o kɛɛsiaa koŋ choo le. Mi kindiŋ le kala nuu kɔllo dɛɛniaa maa I kaala ndu. Mi naa ŋiɔɔŋ kpou chaŋ, nduyɛ mi yau nyɛdiaa kɛndɛ kɛndɔɔ mi ke ndu. Chɔŋ niŋ a teleŋ koŋ, mi kala nuu kandu niko sinaa maa Baabuiyo tosa ni mi wa simnɔŋndo wana sɔviɔɔ.”

14. Le yɛɛ naŋ nɔ yɛ miŋ chɛl mi wanayaŋ naŋ kɛɛlu naa Chɛhowa piɛiyo le?

¹⁴ Naapum, o chua fɛŋ teleŋndo tau malaŋ wanayaŋ naŋ sina le sabu Chɛhowa piɛiyo cho nyɛ sɔvɛ o yoomu naa niŋndo. Le taamaseliiyo, mɛɛ Alisi kɛɛ le pɛɛkoo wali wanaa velu ndu wa nuuvial ndu wo le kɔɔfaleŋ tosaa, mi kala ndɔ chaŋ vɛlɛ. Kɛ mi Alisi sim yi o laalaŋ ndɔɔ choo. Mbo hiau lachi a dimioo aa, “Te a chɛl pɛ mi wanayaŋ numndoŋ siŋga kɛɛsiaa numndo o suɛi ipum choo, mɛɛ a cho wa lɔɔlɔɔ kindiŋndo le kɛɛsiaala numndaŋ siŋgaa. Kɛ te o yɔŋ pɛ ma chaa suɛi o nda lo nduyɛ ma chɛl nda diom le laalaŋnda numndaŋ siŋgaa le, apum cho num nilaŋ yaŋɔɔ.” Keŋ ndii yɔŋnuŋ Alisi ni. Kɔɔfaa wanaa velu ndu wa kpou cho niŋ suŋ suŋ ni, nduyɛ bɛndu kundaa finya ndɔ cho niŋ ni.

15. A mɛɛ Maatiu 5:​14-16 a Pitɛ Tasoo 2:​12 dimi yɛ, vɛɛ “sɔɔŋ kɛndɛŋ” acheleŋnda tosa woŋ mala yɛ wanayaŋ naŋ?

¹⁵ “Sɔɔŋ kɛndɛŋ” wanaa cho o kundaa niŋnda tosa woŋ Chɛhowa soliŋ kpeku ni le hunɔɔ a waŋnda naa ndu cha. (Nuawɔ Maatiu 5:​14-16; Pitɛ Tasoo 2:​12.) Te wana nya cho o nɔɔ niŋndo cho Chɛhowa piɛi le, baa o chiikaŋ niŋ pa a wanaa nya cho o kundaa niŋnda? Mi Pɔliŋ naŋ soo suŋ a ndu okɔɔ wo veelu puaapiliaa a  ndepiliaa o ndu lo bɛɛ le mi ndaa siiniaŋ nda Weni pɔnɔ ndɔ. Mi Weni loonuŋ a mɛɛ puaapilɛnɔ pilɛ mala ndu le sinaa wanaa suu Seiyaa Chɛhowaa cho wa. Mbo dimi aa, “Mi puaapilɛnɔɔ hoo chua paale pɛŋgiaa leŋ o naa nduaa walla mbo huŋ o ya lo, le miŋ nua bɔl nda wa lɔɔ wo latulu. Mi cha maa puaapilɛnɔɔ hoo hendu ko kɔllo o piɛile ndɔ leŋ choo suee le, kɛ sɔɔŋ muŋ bɛɛ o yeema muŋ.”

16. Le yɛɛ naŋ nɔ yɛ miŋ dimul wanayaŋ naŋ le kɔlaŋ o bɔŋaŋnda leKilisiɔŋndaŋ?

¹⁶ Nɛi sɔvɛ naŋ mala wanayaŋ naŋ le Chɛhowa piɛiyo wo opilɛ cho dimullo nda le kɔlaŋ a naa latulu o bɔŋaŋnda leKilisiɔŋndaŋ ni. (1 Kɔliŋ. 14:​24, 25) Bɔŋaŋ tase Weni biiyo wa Loonuŋyaa ni. Bɔŋaŋ Loonuŋyaa bendu tau le, nduyɛ a paale delaaleŋ doŋ naŋ bii ndu ni. Mɛɛ le hei Weni nɔla ndu biyɔɔ ni, kanifuule ndoo mal niŋ fɛŋ wallo. Mbo dimi aa, “I bii suɛi nda wa yɔŋgoo ve bila le. Kɛ wanaa wa loŋ nda ndaa naŋ bɔɔ kaa. Mɛɛ ya fuuluu, ma demul la a dialuŋ fulaa. Mi sina kɛsɛ maa wanaa kɛndiaa pila nda cho ni.” Pɔnɔɔ a lanɔ pilɛ ndaa kaala bɔɔ Pɔliŋ. Mi ndaa mala ndu po ndɔɔ biyɔɔ o bɔŋaŋndaŋ a o wali pollo niŋ. Mɛɛ Weni kɛɛsiaa le chɔɔloo sinaa a laalaŋnda laa ndɔ laŋ okɔɔ, mbo dimul puaapilɛnɔ koŋ le ndu Baabuiyo pɛɛkoo.

17. Le yɛɛ naŋ nɔ yɛ miŋ bii naapila tɔɔyaŋ te, kɛ le yɛɛ naŋ nɔ yɛ miŋ hiou lachi a kindiŋndo le wanayaŋ naŋ malaa?

¹⁷ Ŋ nɔ tiindaŋndo maa wanayaŋ naŋ kpou cho naa sɔɔŋguu ikɛi le Chɛhowa piɛiyo. Kɛ, mi che bɛɛ miŋ kindiŋ tau le wanayaŋ naŋ malaa ma simnuŋ buɛiyaa Mɛlɛkaa, lepum a chɛl le hunɔɔ o tonyaa niŋ te. Te hei yɔŋnuŋ pɛ, ŋ nɔ miŋ bii naapila tɔɔyaŋ te kanifuule, ŋ beŋ wana o wana le laalaŋnda naalaŋ chɛlɔɔ le. Kɛ te wanayaŋ naŋ che pɛ nyaale naŋ nɔ o Chɛhowa piɛiyo niŋndo, koŋ wa taamasi kɛndɔɔ tau le nda. Wa piɛileŋ le nda. Soo o nda lo nyɛkɛndɛi. Hiou lachi a kindiŋndo le nda malaa! (Walta. 20:​20) Nɔ tiindaŋndo maa Chɛhowa cho num dɔwɔɔ sala le kindiŋ ŋ cho wo. Te wanayaŋ numndoŋ yaŋ num pɛ nilaŋ, mɛɛ a cho pioŋɔɔ sɔla!