1. A mɛɛ Hibuluiya 12:​1 dimi yɛ, yɛɛ naŋ nɔ yɛ miŋ tosa le miŋ lo nyaanɔŋndo haaa o mɛɛlulaŋ?

 BAABUIYO tuu naa Kilisiɔŋnda a wanaa nyaanuŋ nyaanɔŋ labɛɛlaa wa. Nduyɛ te ŋ lo pɛ nyaanɔŋndo haaa o mɛɛlulaŋ, Chɛhowa cho naa fanda a yoomu fafɛɛŋndo. (2 Timo. 4:​7, 8) Ŋ nɔ miŋ dɔu sɛmbɔɔ le hiouwɔɔ lachi a nyaanɔŋndo, kanifuule ŋ cho niŋ kpɛɛluŋ o mɛɛlulaŋ mbo hiau maa paandu. Mi kiilanɔɔ Pɔɔl nyaanuŋ haaa mbo fuuluu o mɛɛlulaŋ. Nduyɛ mbo chɔm naa nyɛ mala naa miŋ lo nyaanɔŋndo haaa miŋ fuuluu o mɛɛlulaŋndo. Mbo dimi aa: “La ŋ malnuŋ . . . nyɛ o nyɛ kuuna naa kɔlaŋ. Okoŋ miŋ biunuŋ nyaanɔŋndo haaa o mɛɛlulaŋ.”—Nuawɔ Hibuluiya 12:​1.

2. Yɛɛ o sim yɛ le “nyɛ o nyɛ kuuna naa kɔlaŋ” malɔɔ?

² Mi kiilanɔɔ Pɔɔl poonyiaa maa, ŋ nɔ miŋ mal “nyɛ o nyɛ kuuna naa kɔlaŋ.” Baa dimioo o wa ni maa, ŋ nɔ miŋ chua nyɛ o nyɛ o nyaanɔŋndo hoo niŋ te? Sako. Nyɛ ndoo yiyaŋndo cho ni maa, ŋ nɔ miŋ mal sɔɔŋ cho ŋ sɔvɛ le woŋ. Sɔɔŋ muŋ tosa miŋ yɔŋnuŋ pɔmbɔlɔsɔɔ o Mɛlɛka piɛiyo niŋ, nduyɛ miŋ vi ŋdial. Le miŋ biunuŋ o nyaanɔŋndo hoo niŋ, ŋ nɔ miŋ keleŋa sɔɔŋ muŋ sina vɛlɛ miŋ fafaŋ muŋ. O baa pilɔɔ choo, ŋ nɔ miŋ puɛɛnuŋ a nyɛm naŋ nɔ miŋ chua woŋ te. Te ŋ puɛɛnuŋ pɛ a muŋ okɔɔ, ŋ cho hiouwɔɔ lachi a nyaanɔŋndo hoo le. (2 Timo. 2:​5) Nyɛm kuɛɛ naŋ nɔ yɛ miŋ chua?

3. (a) A mɛɛ Kaleesiaŋnda 6:​5 dimi yɛ, ɔɔ nyɔɔ opilɛ o naŋ nɔ miŋ chua wo? (b) Yɛɛ naŋ cho yɛ pɛɛku o buŋgɛi hei niŋ, nduyɛ le yɛɛ?

³ Nuawɔ Kaleesiaŋnda 6:​5. Mi Pɔɔl chɔm nyɔɔ opilɛ o naŋ nɔ miŋ chua wo. Mbo poonyiaa aa: “Wana o wana cho kalaŋndo o ndɔɔ siilɔŋ.” O bolle Baabuileŋ ndeŋ niŋ, Pɔɔl wa  suɛi a kalaŋ naa a pilɛŋ pilɛŋnda nɔ Mɛlɛka o hɔllo. Nduyɛ naapila nɔ ni miŋ siiluŋ kalaŋndo hoo. O buŋgɛi hei niŋ, ŋ cho chɔ nyɛ ‘kalaŋnda naalaŋ’ la simndo, a mɛɛ naŋ siiluŋ ndaŋ yɛ. Ŋ cho vɛlɛ chɔ sɔɔŋ ŋtiŋ ŋ kuuna naa kɔlaŋ ndoŋ, vɛlɛ a mɛɛ naŋ mal muŋ yɛ. Te ŋ chua pɛ nyɛm naŋ nɔ miŋ chua woŋ, nduyɛ miŋ mal sɔɔŋ cho ŋ sɔvɛ le woŋ, keŋ mala naa miŋ lo nyaanɔŋndo haaa o mɛɛlulaŋ.

4. Le yɛɛ buŋgɛi naŋ chuel Chɛhowa ve peeloo cho yɛ nyɛ kendu chua le? (Tofa vɛlɛ fotueiyo.)

⁴ Buŋgɛi naŋ chuel Chɛhowa ve peeloo. Mɛɛ naŋ yɔŋguŋ o ndulo, miŋ mɛi lediom maa, ŋ cho ndu piɛi nduyɛ miŋ tosa hɛnaŋ ndɔɔ. Ŋ nɔ miŋ peelu buŋgɛi keŋ. Kalaŋ lusulɛiyo pila naŋ nɔ ni le buŋgɛi hei peeloo. Kɛ o cho kalaŋ naŋ bumba chua le kanifuule, Chɛhowa toosiaa naa le miŋ tosa hɛnaŋ ndɔɔ. (Sɔɔŋ. 4:​11) Mbo toosiaa naa o velaŋ ndɔɔ niŋ, nduyɛ mbo duau naa yeemɛi o kɔl le pɛɛkoo a ndu okɔɔ. Fulamakɔɔlioo cho ni, ŋ tiuba miŋ sɔɔŋguu ndu ikɛi kpɛɛluŋ vɛlɛ miŋ wa a kɔl kɛndɛ le hɛnaŋ ndɔɔ tosaa. (Sam 40:​8) Te ŋ tosa pɛ hɛnaŋ Mɛlɛkaa, miŋ tol Po ndɔɔ kɔɔli, keŋ mala naa miŋ “sɔla pɛŋgioo o yoomula” naalaŋ niŋ.—Maa. 11:​28-30.

5. Yɛɛ mala yɛ naa miŋ peelu buŋgɛi naŋ chuel Chɛhowa ve? (1 Chɔŋ 5:​3)

 ⁵ Yɛɛ mala yɛ naa miŋ peelu buŋgɛi naŋ chuel Chɛhowa ve? Sɔɔŋ ŋmuuŋ mala naa ni. I tasei, hiou lachi a kaala numndo kindioo poŋ le Chɛhowa. A tosa keŋ te a wa pɛ yiyaŋndo a sɔɔŋ kɛndɛŋ o tosal num niŋndoŋ okɔɔ, vɛlɛ a salala o cho num dɔwɔɔ o chilaŋ niŋ ndaŋ. Mɛɛ kaala numndo le ndu hindu fau, lende koni i wa tɛtɛlɛ num o ba le ndu diikɔŋndo ni. (Nuawɔ 1 Chɔŋ 5:​3.) I diiŋ nduɛi, tol tamasi Chiisu wo kɔɔli. Mbo sɔla batiuwaa le hɛnaŋ Mɛlɛkaa tosaa kanifuule, mi ndoo piɛi teleŋ o teleŋ o ndulo le malaa, nduyɛ mbo handu kɔl ndɔɔ o fanda wa ndu lachi wo choo. (Hibu. 5:​7; 12:​2) Maa Chiisu, piɛi o Chɛhowa lo le mbo luei num yoomuaŋ vɛlɛ ma wa yiyaŋndo a tiindaŋ naŋ nɔ le yoomu fafɛɛŋndo sɔlaa o chilaŋ niŋndo okɔɔ. Mɛɛ kaala numndo le Mɛlɛka hindu fau, vɛlɛ ma tol tamasi Po ndɔɔ kɔɔli, keŋ cho num mala ma peelu buŋgɛi ŋ chuel ndu ve.

6. Le yɛɛ naŋ nɔ yɛ miŋ chua kalaŋnda naala leyuŋgu laŋ? (Tofa vɛlɛ fotueiyo.)

⁶ Kalaŋnda naala leyuŋgu laŋ. O nyaanɔŋ naŋ cho hoo le yoomoo sɔlaa wo niŋ, ŋ nɔ miŋ kaala Chɛhowa nda Chiisu mbo hiou wanayaŋ naŋ. (Maa. 10:​37) Kɛ hei sim nuaa maa, ŋ nɔ miŋ puɛɛnuŋ a kalaŋnda naala leyuŋgu laŋ okɔɔ le. Nduyɛ pɛŋ, le miŋ nɛŋi Mɛlɛka nda Kiliti kɔllo, ŋ nɔ miŋ chua kalaŋ naŋ nɔ o yuŋgoo niŋndo. (1 Timo. 5:​4, 8) Hei tosaa cho naa mala miŋ wa a kɔl kɛndɛ tau. Chɛhowa sina maa le mi yuŋgoo wa a kɔl kɛndɛ, mɛɛ mi pɔnɔɔ a lanɔɔ kaaliaŋ vɛlɛ ma keŋnaŋ bɛɛleŋ vellaa velle. Nduyɛ kalaŋ chuauwa nɔ ma kaala chuauwaa ndaa vɛlɛ ma pɛɛku nda. Chuauwa bɛɛ nɔ ma diikuŋ wanaa velu nda wa.—Ɛfi. 5:​33; 6:​1, 4.

7. Vɛɛ naŋ chua yɛ kalaŋ naa o yuŋgoo niŋ?

⁷ Vɛɛ ŋ chua yɛ kalaŋ numndo? O yɔŋ bɛɛ ma wa pɔnɔɔ, lanɔɔ, poleŋ ɔɔ chualeŋ o yuŋgoo niŋ, tol sila taasi Baabuiyo yɔŋgu a kalaŋ numndo okɔɔ wo kɔɔli. Tual nyɛ naamu nyaa ɔɔ nyɛ wanaa sinaa dɛniaa dimi wo kɔɔli le. (Pulɔ. 24:​3, 4) Soliŋ yaula naala tɔlnuŋ o Baabuiyo choo laŋ kpeku nyɛkɛndɛi. Yaulaŋ ndaŋ la nɔ kɛɛsiaala kɛndɛla mala naa miŋ dɔu sawala mandaala Baabuiyo o wali niŋndo. Le tamaseliiyo, buluchiɔɔ hoo, “Yuŋgu Numndo Nɔla Mbo Wa a Nyaale” a yauwo hoo, Tuei Yoomoo Yeela Lefafɛɛŋ!​ buŋgɛi 49 a 50, nɔ sawala mandaala mala pɔnɔɔ a lanɔɔ, kalaŋ chuauwa a chuauwa laŋ, te simultaŋ la komal nda pɛ. Kɛɛsiaŋ o kɔl le silala ŋ cho saalɔŋ leniŋndaŋ dɔwɔɔ o wali niŋ, o yɔŋ bɛɛ mi wanaa nya cho o yuŋgoo niŋnda ve keŋ tosa le. Te a tosa keŋ pɛ, yuŋgu numndo cho tɔnɔɔ sɔla, nduyɛ ma tuei salala Chɛhowalaŋ yeela tau.—1 Pitɛ 3:​1, 2.

8. Vɛɛ kɛɛsiaala naalaŋ la piiliaŋ yɛ naa?

⁸ Chɛl fulamakɔɔlila ŋ sɔla le kɛɛsiaala numndaŋ ndo. Chɛhowa ke naa hɛnɛkɛyɛi le kɛɛsiaalaŋ tosaa, nduyɛ o yeema naa miŋ wa a kɔl kɛndɛ le mɛɛ naŋ tosa kɛɛsiaala kɛndɛlaŋ yɛ. Kɛ te ŋ tosa pɛ kɛɛsiaala wɔɔŋndaŋ, o kuuna fulamakɔɔlila wɔɔŋnda komal naalaŋ te. (Kalee. 6:​7, 8) Lelaŋ, ŋ nɔ miŋ chɛl fulamakɔɔlila wɔɔŋnda naŋ sɔla laŋ te ŋ tosa pɛ kɛɛsiaala wɔɔŋndaŋ, te koŋ te miŋ dimi ɔɔ miŋ tosa sɔɔŋ wɔɔŋndoŋ. Lepum, mi kɔl iyama naa paaliaŋ naa te ŋ tosa pɛ suɛi wɔɔŋnde. Kɛ, te ŋ sina pɛ maa naŋ nɔ kalaŋndo ni le kɛɛsiaala naŋ tosalaŋ, keŋ cho naa nyindɔɔ miŋ chɔɔmuu hakila naalaŋ, miŋ siɛɛnduu siɔwuŋ naŋ, nduyɛ ŋ miŋgi lɛ balaŋ o haki naŋ tosa wo niŋ te. Hei tosaa mala naa miŋ hiou lachi a nyaanɔŋndo le yoomoo sɔlaa.

9. Yɛɛ mala yɛ naa miŋ biunuŋ fulamakɔɔlila naŋ sɔla laŋ te ŋ tosa pɛ kɛɛsiaala wɔŋndaŋ? (Tofa vɛlɛ fotueiyo.)

⁹ Vɛɛ ŋ biunuŋ yɛ fulamakɔɔlila ŋ sɔla laŋ te  a tosa pɛ kɛɛsiaala wɔŋndaŋ? Te o yɔŋ pɛ maa a tosa niŋ kɛɛsiaa wɔɔŋndo o paandoo niŋ, yɛɛ ŋ nɔ yɛ ma tosa? Loonuŋ maa a tiuba ma siŋga nyɛ yɔŋnuŋndo le. Tɛɛmbuu teleŋndo a yoomuma numndaŋ le bau kɔɔsaa nuuviaa, ɔɔ le numpila ɔɔ le acheleŋnda tɔɔyaŋndo biyɔɔ le kɛɛsiaala wɔɔŋnda ŋ tosalaŋ te. Kɛ, chɛl biondɔŋnda ŋ tosalaŋ, okoŋ ma hiou lachi a nyɛ ŋ tiuba wo tosaa suŋ suŋ. Te kɔl iyama numndo wa num pɛ paaliaŋndo le haki ŋ tosa wo, piɛi o Chɛhowa lo, ma chɔm ndu haki ŋ tosa wo, nduyɛ ma nyuna ndu le mbo mal num haki. (Sam 25:​11; 51:​3, 4) Nyɔɔlu wanaa ŋ tɛɛmbuu kɔllo wa. Te o bɛnda pɛ, a dimul vɛlɛ bɛnduaa kundaa le ma mala num. (Chemi. 5:​14, 15) Pɛɛku o biondɔŋnda numndaŋ niŋ, nduyɛ ma kindiŋ o nɛi o nɛi niŋ a miŋgi lɛ laŋ tosa le. Te a tosa keŋ pɛ, a cho nɔ tiindaŋndo kɛsɛ maa, Chɛhowa cho num tuiinɔŋ inyɛi vɛlɛ mbo ke num mala ŋ yeema wo.—Sam 103:​8-13.

10. Le yɛɛ yiyaŋndo teleŋ o teleŋ maa ŋ nɔ miŋ tosa tau, cho yɛ wolɔɔ lusulɛiyo opilɛ? (Kaleesiaŋnda 6:​4)

¹⁰ Yiyaŋndo teleŋ o teleŋ maa ŋ nɔ miŋ tosa tau. Teleŋ o teleŋ naŋ wa pɛ tuuŋgaŋndo a acheleŋnda, mɛɛ wolɔɔ lusulɛiyo naŋ cho koŋ siilɔŋndo ni. (Nuawɔ Kaleesiaŋnda 6:​4.) Tuuŋgaŋndo a acheleŋnda tosa miŋ paŋala nda, nduyɛ miŋ wa kilulaŋndo a nda. (Kalee. 5:​26) Te ŋ kindiŋ pɛ o nɛi o nɛi niŋ le tosaa mɛɛ acheleŋnda cho tosaa yɛ, kɛ o kpeekpei niŋ ŋ tiuba miŋ tosa lende le, keŋ tosa miŋ saaŋgiaŋ naapila. Nduyɛ Baabuiyo dimi aa: “Te a wa nyɛ kɔl pɛ, ma sɔla ndu le, kɔllo pila ŋ tambu ni.” Lelaŋ, yiyaŋndɔ a mɛɛ kpɛ ŋ cho wa a kɔl tambɛiyo yɛ, te a wa pɛ kindiŋndo le nyɛ ŋ tiuba le wo tosaa. (Pulɔ. 13:​12) Hei tosaa tiuba mi i dii naa dialloŋ, vɛlɛ miŋ yɔŋnuŋ pɔmbɔlɔsɔɔ o nyaanɔŋ naŋ cho le yoomoo sɔlaa wo niŋ.—Pulɔ. 24:​10.

11. Yɛɛ mala yɛ num ma mal yiyaŋndo teleŋ o teleŋ maa a nɔ ma tosa tau?

¹¹ Vɛɛ ŋ mallɛ yiyaŋndo teleŋ o teleŋ maa a nɔ ma tosa tau? Kindiŋ le tosaa tau mbo hiou mɛɛ Chɛhowa yeema num ma tosa yɛ le. Pesiŋ bɛɛ o cho num kɔl le ma tosa mbo hiou mɛɛ ŋ tiuba yɛ le. (2 Kɔliŋ. 8:​12) Nɔ tiindaŋndo maa, o tuu nyɛ ŋ cho tosaa wo a nyɛ acheleŋnda cho tosaa wo le. (Maa. 25:​20-23) O nɔ balika melaa le mɛɛ ŋ cho ndu piɛiyo a kɔllo kpou yɛ, laalaŋ ŋ cho chɔmndo wo, vɛlɛ a biuwɔŋ numndo. Tusiŋ, nduyɛ ma chɛl maa wɔsila numndaŋ, kɛndiaa numndo, vɛlɛ a bahawɛi numndo tiu lɛ ba mbo chɛl num ma tosa mɛɛ ŋ yeema yɛ le. Maa Baasilai, wa o bɛɛndiaŋ le dilakeŋnaŋndaŋ lapum kiɔɔ, te a sina pɛ maa kɛndiaa numndo a yuwɛi tiuba mi i chɛl num le wali koŋ tosaa le. (2 Saam. 19:​35, 36) Nduyɛ maa Muuse, chɛl mala nda ke numndo. Te o bɛnda pɛ, ke acheleŋnda waltaŋ. (Ɛsɔ. 18:​21, 22) Hei tosaa cho num mala a hendu kɔllo o sɔɔŋ tosa ma saŋga tau o nyaanɔŋ naŋ cho hoo le yoomoo sɔlaa wo niŋ te.

12. Baa ŋ nɔ miŋ bii naapila tɔɔyaŋ le kɛɛsiaala wɔɔŋnda acheleŋnda tosalaŋ? Tɛɛsiaawɔ.

¹² Tɔɔyaŋndo biinɔŋndo le kɛɛsiaala wɔɔŋnda acheleŋnda tosalaŋ. Pesiŋ bɛɛ ŋ nɔ miŋ tosa kɛɛsiaalaŋ le acheleŋnda le. Nduyɛ ŋ kuuna fulamakɔɔlila nda sɔla le kɛɛsiaala wɔɔŋnda nda tosalaŋ te. Le tamaseliiyo, naapum mi poleŋ ɔɔ mi chualeŋ o yuŋgoo niŋ kɛɛsiaa maa le cho pɛŋgi Chɛhowa piɛiyo. I cho tonya maa, mi wanaa velu ndu wa tambu kɔl tau le kɛɛsiaa o tosa koŋ ndo. Kɛ, te kalaŋ chuauwaa kaŋ biinuŋ pɛ tɔɔyaŋ le kɛɛsiaa wɔɔŋ hɔɔ ndaa tosa wo, keŋ tosa ma siiluŋ kalaŋ lusulɛiyo. O cho wolɔɔ suu waa  nuaa le Chɛhowa yeema nda ma chua le.—Luomaŋ. 14:​12.

13. Vɛɛ kala chuaa nɔ yɛ mbo bii kɛɛsiaa wɔɔŋ hɔɔ ndɔɔ tosa wo?

¹³ Vɛɛ naŋ mallɛ tɔɔyaŋndo biinɔŋndo le kɛɛsiaa wɔɔŋ acheleŋnda tosa wo? Kɛsiŋ o kɔl maa, naa kpou Chɛhowa ke naa hɛnɛkɛyɛi le chuaŋ chuaa tosaa. Mbo chɛl wana o wana le mbo tosa kɛɛsiaa a ba ndɔ. Hei sim ni maa, naapila nɔ ni miŋ tosa kɛɛsiaa le ndu piɛiyo. Chɛhowa sina maa kalaŋ chuauwa cho walaŋ te. O yeema nya mi la tosa nyɛ nya tiuba wo. Kalaŋ chua numndo i cho ni le kɛɛsiaa tosaa a ba ndɔ. O cho num te nɔ ma tosal ndu kɛɛsiaa le. (Pulɔ. 20:​11) Kɛ naapum, ma wa dɔɔ buulaŋndo a biondɔŋnda ŋ tosalaŋ. Te lende i cho ni, mɛɛ dimul Chɛhowa mɛɛ ŋ cho sinaŋndo yɛ, nduyɛ ma nyuna ndu le mbo mal num haki. O sina maa a tiuba ma siŋga nyɛ yɔŋnuŋ o paandoo niŋndo le. A koŋ kpou, o cho num kɔl le ma kuuna chua numndo fulamakɔɔlila wɔɔŋnda o nɔ mbo sɔla le kɛɛsiaala ndɔlaŋ ndo le. Loonuŋ maa, te chua numndo wa pɛ kindiŋndo le ndu miiŋgoo o ibuŋ, o cho wa a kɔl kɛndɛ le ndu demullo.—Luku 15:​18-20.

14. Le yɛɛ kɔllo tambei teleŋ o teleŋ le haki naŋ tosa wo, cho yɛ wolɔɔla lusulɛila naŋ nɔ miŋ mal taŋ?

¹⁴ Kɔllo tambei teleŋ o teleŋ le haki naŋ tosa wo. I cho tonya maa, o bɛnda miŋ tambu kɔl le haki naŋ tosa wo. Kɛ pesiŋ bɛɛ Chɛhowa yeema naa miŋ hiou lachi a kɔllo tambei le. Wolɔɔla naŋ nɔ miŋ mal taŋ opilɛ cho vɛlɛ hoo ni. Te ŋ chɔɔmuu pɛ yɔŋ naa wɔɔŋndo, miŋ mal sɔɔŋ naŋ wa tosaa woŋ, nduyɛ miŋ wa sɔɔŋ chɔm maa ŋ mal yɔŋ naa wɔɔŋndo woŋ tosaa, mɛɛ ŋ nɔ miŋ nɔ tiindaŋndo maa Chɛhowa mal naa haki. (Walta. 3:​19) Ŋ nɔ miŋ sina maa, te ŋ tosa pɛ sɔɔŋ muŋ, Chɛhowa yeema lɛ naa miŋ hiou lachi a kɔllo tambei le. O sina fulamakɔɔlila wɔɔŋnda kɔl tambɛiyo chuu naa laŋ. (Sam 31:​10) Te ŋ hiou pɛ lachi a kɔllo tambei le haki naŋ tosa wo, keŋ tosa miŋ vi ŋdial o nyaanɔŋ naŋ cho le yoomoo sɔlaa wo niŋ.—2 Kɔliŋ. 2:​7.

15. Yɛɛ mala yɛ num ma mal kɔllo hiuwo tambei le haki ŋ tosa wo? (1 Chɔŋ 3:​19, 20) (Tofa vɛlɛ fotueiyo.)

¹⁵ Yɛɛ mala yɛ num ma mal kɔllo hiuwo tambei  le haki ŋ tosa wo? Te a wa pɛ kɔllo hiuwo tambei le haki ŋ tosa wo, loonuŋ maa te Mɛlɛka mal naa ‘le yɔŋnda naalaŋ wɔɔŋndaŋ’ pɛ, o yiyaŋ lɛ a laŋ okɔɔ le. (Sam 130:​4) Te ŋ mal pɛ yɔŋ naa wɔɔŋndo a kɔllo kpou, nduyɛ mi Chɛhowa mal naa haki, mbo “puɛɛnuŋ a yɔŋ wɔɔŋ o yɔŋ wɔɔŋ” naŋ tosa. (Chɛlui. 31:​34) Hei sim ni maa, pesiŋ bɛɛ Chɛhowa yiyaŋ lɛ a yɔŋ wɔɔŋ ŋ tosa wo okɔɔ le. Lelaŋ, yiyaŋ nuaa maa fulamakɔɔlila wɔɔŋnda ŋ cho sɔlaa laŋ la chɔm maa Chɛhowa mel num haki le le. Nduyɛ tuulu kɔl a numpila, le mɛɛ hakila ŋ tosa o paandoo niŋndaŋ la cho num kuunaa tosaa tau o wali Chɛhowaa niŋ yɛ le. Pesiŋ bɛɛ Chɛhowa yiyaŋ lɛ a hakila ŋ tosalaŋ okɔɔ le. Num bɛɛ nɔ ma tosa nyɛ pilɛ koŋ kpe.—Nuawɔ 1 Chɔŋ 3:​19, 20.

16. Yɛɛ naŋ nɔ yɛ miŋ kɛsiŋ o kɔl o nyaanɔŋ naŋ cho wo niŋ?

¹⁶ Mɛɛ naŋ hiau lachi fau a nyaanɔŋndo le yoomoo sɔlaa, ŋ nɔ miŋ kɛsiŋ o kɔl maa, ŋ nɔ miŋ “nyaanuŋ le [miŋ] sɔla fandaa.” (1 Kɔliŋ. 9:​24) Le miŋ tosa hei, ŋ nɔ miŋ sina nyɛm naŋ nɔ miŋ chua woŋ a wolɔɔla naŋ nɔ miŋ mal taŋ. O buŋgɛi hei niŋ, miŋ pɛɛku nyɛɛmbɔ a hei okɔɔ. Kɛ sɔɔŋ cheleŋ cho o muŋ kɔɔli. Mi Chiisu dimi maa, ŋ tiuba miŋ yɔŋguŋ naapila “o nyɛdiaa dio bɛndoo niŋ, a kolɔɔ kala kalaa, a o kɔl landɛi nyɛ nuuviaa niŋ.” (Luku 21:​34) Bolii Baabuiye hei vɛlɛ a i cheleŋ tiuba mi i mala naa miŋ che naa naŋ nɔ miŋ tosa yɛlɛmiaalaŋ nda, le halikpeŋ miŋ hiou lachi a nyaanɔŋndo le yoomoo sɔlaa.

17. Le yɛɛ naŋ nɔ yɛ miŋ nɔ tiindaŋndo maa, ŋ cho batiuwaa sɔla o nyaanɔŋ naŋ cho hoo le yoomoo sɔlaa wo niŋ?

¹⁷ Ŋ nɔ miŋ nɔ tiindaŋndo maa ŋ cho batiuwaa sɔla, o nyaanɔŋ naŋ cho hoo le yoomoo sɔlaa wo niŋ kanifuule, Chɛhowa cho naa yoomuaŋ luei. (Aisaya 40:​29-31) Lelaŋ, wu ŋdial te. Tol tamasi kiilanɔɔ Pɔɔl wo kɔɔli. Mi Pɔɔl duau sɛmbɔɔ tau le mbo sɔla fanda wa ndu lachi wo. (Filipi. 3:​13, 14) Wana o wana tiuba mbo nyaanuŋ le num te. Kɛ a mala Chɛhowaa, a tiuba ma sɔla batiuwaa. O tiuba mbo mala num ma chua kalaŋnda numndaŋ, nduyɛ ma mal wolɔɔla ŋ nɔ ma mal taŋ. (Sam 68:​19) Sanaa a mala ndɔɔ, a nɔla ma biunuŋ o nyaanɔŋndo hoo niŋ haaa ma sɔla fandaa.