O buŋgɛi keŋ niŋ, miŋ pɛɛku maa suɛi kpeekpeiye i pum cho, i piiliaŋ hau waŋnda chieeya a maalikɛiya kpou ve. Ndi cho diola Chɛhowalaŋ dindioo ni. Kpuluŋgumayɛi nduɛi tooloo cho suɛi ipilɛ a hei okɔɔ. Hei sim le di o nɔ le waa masa wo. Nduyɛ, pimbi simiaa waŋnda chieeya bɛɛ cho suɛi ipilɛ a hei okɔɔ.

Le yɛɛ naŋ dimi yɛ maa suɛi kpeekpeiye cho diola Chɛhowalaŋ a laŋ dindioo ni? Ŋ tofaŋndɔ sabulaŋ la yaa.

O tasoo, mi Setana tɛɛmbuu diola Chɛhowalaŋ ɔɔ tɔɔ ndɔɔ o kpeloo Idɛŋ niŋ. Nyuna Setana nyuna Ifi wo chɔm maa Chɛhowa cho Mɛlɛka ikɛndɛ le, nduyɛ maa sawala o ke buɛiyaa nduaa laŋ la cho sawala kɛndɛ le. Okoŋ kɔɔli, mi Setana dimi nyɛ cheleŋ teŋgeŋ a nyɛ Chɛhowa ndoo dimi wo. O dimi niŋ, dimioo o wa ni maa, wana lachoowaa Mɛlɛka cho ni. Mbo tɛɛmbuu diola Chɛhowalaŋ. Okoŋ, mbo simnuŋ “Setana ɔɔ Nyina Wɔɔŋndo.” Koŋ cho ni, “wana tɛɛmbuu acheleŋnda tɔɔ wo.” (Chɔŋ 8:​44) Le mɛɛ Ifi laalaŋ choola Setanalaŋ yɛ, mi keŋ tosa mbo kɛɛ Chɛhowa diikɔŋndo, nduyɛ mbo simul kpuluŋgumayɛi Chɛhowɛi. (Chɛ. 3:​1-6) Chɔŋ a teleŋ koŋ huŋ bii a hau, Setana cho hiouwɔɔ lachi a diola Chɛhowalaŋ tɛɛmbuu wo, vɛlɛ a choolaŋ pɛŋgɛlaa a ndu okɔɔ. Teleŋnda bɔɔbɔɔ, wanaa laalaŋ choolaŋ ndaŋ nda kɛɛ Chɛhowa diikɔŋndo ni. Lelaŋ, wanaa Mɛlɛkaa che ndi maa, suɛi lakafɛi i cho ni le diola Chɛhowalaŋ tɔɔ tɛɛmbuuwo. Hei cho tosaa ni mi saŋgaa a dɛnɛ wɔɔŋndo wa hau o chieeŋndo niŋ.

O diiŋ ndɔɔ, Chɛhowa kɛɛsiaa le diola ndɔlaŋ dindioo, mbo faŋa tɔɔ wɔɔŋ cho lechoo wo le tɔnɔ wana o wana, hali maalikɛiya bɛɛ. Hei cho suɛi sɔvɛ sɔvɛi Chɛhowa o hɔl ni. Mbo dimi aa: “I cho lɛŋnde kpou o chieeŋndo niŋ chɔm, mɛɛ diola nilaŋ la cho la bɛndu . . . yɛ.” (Isi. 36:​23) Mi Chiisu chɔm nyɛ nɔ mbo wa nyɛ tasoo o piɛile buɛiyaa nduaa niŋndo. Mbo dimi aa: “Maa diola numndaŋ la wa la diandaa.” (Maa. 6:​9) Teleŋnda bɔɔbɔɔ, mi Baabuiyo chɔm mɛɛ i cho suɛi sɔvɛ le diola Chɛhowalaŋ saŋgalaa yɛ. Ŋ tofaŋndɔ tamaseliilaŋ latiŋ: “La saŋgala diola kɛndɛla bɛndula Mɛlɛka Yaawɛɛ laŋ.” (1 Kolo. 16:​29; Sam 96:​8) “La soli chondoŋ a mɛɛ diola ndɔlaŋ la cho diola lebɛɛ . . . yɛ okɔɔ.” (Sam 66:​2) “Le teleŋ o teleŋ, I wa niŋ waŋnda dimullo a mɛɛ [diola numndaŋ la cho la] bɛndu yɛ.” (Sam 86:​12) A teleŋ pilɛ, Chiisu wa o chiɛi Mɛlɛkaa niŋ Chulusalɛm, mi Chɛhowa suaa o choo choo niŋ. Okoŋ mi Chiisu dimi aa: “Kɛkɛ, tosa mi waŋnda saŋgala diola numndaŋ.” Mi Chɛhowa muli aa: “I tosa ma saŋgala laŋ, nduyɛ I cho vɛlɛ tosa ma saŋgala laŋ.”—Chɔŋ 12:​28. a

O yaa ndɔɔ, tuu Chɛhowa ndoo nɔ o tasela ndɔ wo chiɛɛliaŋ a diola ndɔlaŋ, ɔɔ tɔɔ ndɔɔ. Yiyaŋndɔ a hei okɔɔ: Te Wɔsila Waa Pilɛla Kiliti Cho Wa o Masaleŋ Choo Laŋ la chuu pɛ, nduyɛ mi tofa bɛndoo hiou, yɛɛ cho yɛ yɔŋnɔŋ okoŋ kɔɔli? Baa  maalikɛiya a waŋnda chieeya nɔ lɛ niŋ pa yiyaŋnda yɛ yɛlaŋ a diola Chɛhowalaŋ dindioo okɔɔ? Le nyunaa hoo mulioo, ŋ tofaŋndɔ sɔɔŋ ŋmuuŋ. Muŋ cho ni, pimbi simiaa waŋnda chieeya a kpuluŋgumayɛi Chɛhowɛi. Baa wanaa lo niŋ o laalaŋ ndaa choo wa cha lɛ ndi niŋ pa ikala le loo o pimbi nda simiaa choo? Sako. Waŋnda haa cho wa walaŋ, nduyɛ ma kei o tofaa bɛŋgu. A teleŋ koŋ, a cho wa lehɔl o nɛi le yoomu fafɛɛŋndo sɔlaa. Baa ŋ suaa lɛ niŋ pa tau a kpuluŋgumayɛi Chɛhowɛi okɔɔ ɔɔ baa waŋnda chieeya a maalikɛiya nɔ lɛ niŋ pa yiyaŋnda yɛ yɛlaŋ a ndi okɔɔ? Sako. Kpuluŋgumayɛi Chɛhowɛi a di o nɔ le waa masa wo cho wa niŋ o chɔmnaŋ kpendekele lefafɛɛŋ. Kɛ diola ndɔlaŋ yɛ?

Diola Chɛhowalaŋ bɛɛ la cho wa la diandaa a teleŋ koŋ. Nduyɛ tɔɔ wɔɔŋ ve lɛ niŋ laŋ choo le. Kɛ wanaa cho loo o laalaŋ ndaa choo o choo choo niŋ a o lɛŋndeŋ choo wa cho hiouwɔɔ lachi a kɔllo handɔɔ o diola ndɔlaŋ choo. Le yɛɛ? Kanifuule, a cho hiouwɔɔ lachi a chɔɔ mɛɛ Chɛhowa cho wa sɔɔŋ kɔndɔfilloŋ tosaa yɛ. Yiyaŋndɔ a hei okɔɔ: Te Chiisu miŋgi pɛ Finya ndɔ masaleŋ o ba, Chɛhowa “cho wa niko bolleŋ le nyɛ o nyɛ” ni. (1 Kɔliŋ. 15:​28) Okoŋ kɔɔli, waŋnda chieeya o chieeŋndo choo cho wa a kɔl kɛndɛ, nduyɛ ma “sɔla baŋaŋndo maa chuauwaa Mɛlɛkaa.” (Luomaŋ. 8:​21) A teleŋ koŋ Chɛhowa cho tuu ndoo nɔ o tasela ndɔ wo peelu ni. Ndu cho yɛ maalikɛiya a waŋnda chieeya dɔwɔɔ diompilɛ, ma simnuŋ yuŋgu bɛndoo opilɛ kpe ni.—Ɛfi. 1:​10.

Vɛɛ sɔɔŋ muŋ piiliaŋ yɛ niŋ yuŋgu Chɛhowaa o choo choo niŋ a o lɛŋndeŋ choo? I cho kpendekele maa, ŋ cho wa a yeemɛi kpeekpei le diola Chɛhowalaŋ saŋgalaa. Sanaa a nyina diandaa Chɛhowaa, mi wana ŋchondoo Deeve poonyiaa aa: “Saŋgalaa cho le Mɛlɛka Yaawɛɛ. . . . Mbɔ maa waŋnda a ke diola numndaŋ bɛɛleŋ o num saŋgalaa niŋ le fɛɛŋ a fɛɛŋ fɔ.” (Sam 72:​18, 19) A tonya, ŋ cho hiouwɔɔ lachi a sabula kɛndɛlaŋ nɔɔ le diola Chɛhowalaŋ saŋgalaa lefafɛɛŋ.

Diola Chɛhowalaŋ la sim le nyɛ o nyɛ cho a ndu okɔɔ. O kpeekpei niŋ, mi diola ndɔlaŋ la loonuŋ naa a kaala o nɔ wo okɔɔ. (1 Chɔŋ 4:​8) Ŋ cho wa loonɔŋndo teleŋ o teleŋ maa le mɛɛ Chɛhowa kaala naa yɛ o toosiaa naa ni, mbo ke naa sala baŋaa, nduyɛ maa o nɛi sakpoo choo o tosa masaleŋ ni. Kɛ ŋ cho hiouwɔɔ lachi a chɔɔ mɛɛ o chɔm naa a nyɛm o toosiaa woŋ kaalaa yɛ. Hei cho naa nyindɔɔ le Finya naa sɔɔŋguuwo ikɛi a le diola ndɔlaŋ saŋgalaa o chondoŋ niŋ lefafɛɛŋ.—Sam 73:​28.