1, 2. (a) Yɛɛ Ɛlifaasi nda Bilidaa ndaa dimi yɛ a mɛɛ Mɛlɛka che piɛile naaleŋ yɛ? (b) Yɛɛ Chɛhowa ndoo dimi yɛ a keŋ okɔɔ?

O WƆSIŊ bɔɔbɔɔ hiou woŋ niŋ, mi puaa a yaa kua o Choobu lo, buɛi ndoo dɔu tiindaŋndo o Mɛlɛka niŋndo le suɛi o ndulo. Puaa haa opilɛ wa Ɛlifaasi ni, fulaa Tɛmaŋ chiee. Mbo dimul Choobu sɔɔŋ ŋpum aa, “Choobu, tɔnɔ yɛɛnɛ Mɛlɛka sɔla yɛ o wana chioo niŋ? Tɔnɔ o tɔnɔ Mɛlɛka nɔ o wana chioo niŋ te. Waŋndo wa bɛɛ wana kɔl kalu, kɔl kalu, ndɔ koŋ nɔla mbo mala Mɛlɛka le, ndu pila koni o mala ni. A yɔŋ bɛɛ ma wa wana kɛndɛ, Mɛlɛka kpuluŋgumaa bɛndoo sɔla tɔnɔ o tɔnɔ o keŋ niŋ te. Kindi kindi bɛɛ ma wa ndu o hɔl sakpo, mala o mala sakpoyɛi num i keŋ i mala ndu le.” (Choobu 22:1-3) Mi Ɛlifaasi yiyaŋ maa tonyaa kɛsɛ o wa Choobu dimullo ni. Poo opilɔɔ wa Bilidaa ni, Suhaitiinɔɔ. Mi ndu bɛɛ handu lechoo maa o kendu le mi Mɛlɛka che waŋchieeya sakpo.—Nuawɔ Choobu 25:4.

² Mi Ɛlifaasi nda Bilidaa kindiŋ le Choobu yiyaŋndo kioo maa nyɛ fondoo fuu kindiŋ o wa le Chɛhowa piɛiyo wo wa ni.  Puaa haa ndaa yeema mi Choobu laalaŋ maa mɛɛ pulempoo, kɔɔluŋndo, ɔɔ dondopoloo cho naa yɛ naŋ cho Mɛlɛka o hɔl ni. (Choobu 4:19; 25:6) Baa dimioo nda wa ni maa le mɛɛ ndaa tuisiŋ yɛ? (Choobu 22:29) Tonya i cho ni maa wana kpaaya bɛndoo Chɛhowa cho ni, nduyɛ wanaa taaniŋnda naŋ cho ni te ŋ tuu pɛ naapila a ndu. Te o yɔŋ pɛ miŋ wa o pembii vilɛi vilɛiye bolleŋ, miŋ sinapɛŋgu maa wanaa taaniŋnda naŋ cho ni nduyɛ maa ŋ cho wanaa sɔvɛ le. Kɛ baa lende Chɛhowa cho yiyaŋndo a kindi kindiŋ naŋ cho le ndu piɛiyo wo, vɛlɛ a wali naŋ cho tosaa kalaŋ le Masale ndɔleŋ ndo ni? Sako! Mi Chɛhowa dimul Ɛlifaasi, Bilidaa, a po yaa ndɔɔ Sofaa, maa choolaŋ nda wa dimioo ni. Okoŋ, mi Mɛlɛka dimi maa ndoo naŋ kɔl a Choobu nduyɛ mbo veelu ndu aa “buɛi nuu.” (Choobu 42:7, 8) Lelaŋ, ŋ nɔ tiindaŋndo maa Mɛlɛka nɔ ‘tɔnɔɔ’ o waŋchieeya niŋ.

3. Yɛɛ Ɛlihu ndoo dimi yɛ a kindi kindiŋ naŋ cho le Chɛhowa piɛiyo wo okɔɔ? Yɛɛ ndoo yiyaŋ yɛ?

³ Po feleŋgɔnɔɔ diolaŋ Ɛlihu wa nilaŋ yaŋɔɔ o suukaŋ Choobu wa nda puaa yaa wa wo. Mɛɛ nda chii suukaŋndo, mi Ɛlihu dimul Choobu a Chɛhowa okɔɔ aa, “A yɔŋ bɛɛ ma wa wana sakpo, sakpoyɛi num keŋ i nɔla mi i mala Mɛlɛka le. Mɛlɛka yeema nyɛ o nyɛ num o ba le.” (Choobu 35:7) Baa dimioo Ɛlihu bɛɛ wa ni maa nyɛ fondoo fuu kindi kindiŋ naŋ cho le Chɛhowa piɛiyo wo cho ni? Sako. Chɛhowa miŋgi Ɛlihu o nɛi mɛɛ o miŋgi puaa yaa wa a piliaa o nɛi yɛ le. A nyɛ cheleŋ okɔɔ pɔ Ɛlihu wa suɛi ni. Dimioo o wa ni maa Chɛhowa beŋ naa le miŋ piɛi ndu le. Chɛhowa heu ba a nyɛ o nyɛ le. Nyɛ o nyɛ ŋ nɔla miŋ tosal ndu le mbo simnuŋ wana sulaa, ɔɔ wana kpaaya le. Nduyɛ pɛŋ, suiliŋ kɛndɛ kɛ kɛ ɔɔ ke kɛ kɛ naŋ nɔ, o Mɛlɛka lo o chɛŋ ni. Nduyɛ o sina mɛɛ naŋ soliŋ ndu kpeku yɛ.

4. Vɛɛ Chɛhowa yiyaŋ yɛ te ŋ tosal pɛ acheleŋnda kɛndɛi?

⁴ Te ŋ chɔm pɛ wanaa cho Chɛhowa piɛiyo wa kaala lo lechoo wo, mbo che sɔɔŋ naŋ tosal nda muŋndoŋ maa ndu naŋ tosal ni. Pulɔwaa 19:17 dimi aa, “Wana o wana tosal wana tambɛiyo tonyaa pɛ, mɛɛ a cho machuaa Mɛlɛka Yaawɛɛ kuoo wuuwo. Mɛlɛka Yaawɛɛ o cho num miŋgi paawa.” Teleŋ o teleŋ naŋ chɔm pɛ nyiɛɛye o acheleŋnda lo, mi Chɛhowa sina. Nduyɛ mi che bɛɛ Chɛhowa cho Wana Toosiaa chieeŋndo wo ni, mbo che sɔɔŋ kɛndɛŋ naŋ tosal waŋnda woŋ maa kuoo naŋ cho ndu wuuwo ni. Nduyɛ mbo miŋgi naa paawa a nyɛm kɛndɛŋ bɔɔbɔɔ. Mi Po Mɛlɛkaa, Chiisu, dimi maa tonya hei cho ni.—Nuawɔ Luku 14:13, 14.

5. Nyunala kuɛɛ naŋ cho yɛ yaasiaa?

⁵ O sindɔɔ niŋ, mi Chɛhowa dimul wana ndoo suaa le ndu wo Aisaya le mbo wa tofa lehɔl ndɔɔ, nduyɛ mbo piɛi ndu o nɛi teŋgeŋndo choo. (Aisaya 6:8-10) Mi Aisaya chɛl viomɔɔ hoo a kɔllo wulee nduyɛ mbo dimi aa, “A che ya. Viom ya.” Hau bɛɛ, Chɛhowa ke wanaa dɔu tiindaŋndo o ndu niŋnda dikeŋnaŋndo le wali ndɔɔ tosaa. Buɛiyaa Chɛhowaa o waalaŋ niŋ cho  kaa pilɔɔ hoo kpe chɔmndo maa Aisaya. A nɔ yeemɛi le waltaŋ chɛlɔɔ a kɔllo kpou le Chɛhowa piɛiyo o nɛila bɔɔbɔɔ choo a fondaŋnda yɛ yɛlaŋ. Vɛlɛ le kpɔkɔsilaŋ biuwɔŋndo a simulta komal ndalaŋ. Kɛ mi waŋndo opum dimuluŋ ndupila aa, ‘I naŋ kɔl a dikeŋnaŋ ya nɔ le yɔŋgɔŋndo o wali Chɛhowaa niŋ a kɔllo kpou wo, kɛ baa nyɛ kpeekpei ya nɔ mi tosa wo cho pa o sɔvɛ? I wa loŋ, I wa loŋ te, baa Chɛhowa tosa a sabu le mi wali ndɔɔ tosaŋ te?’ Baa a yiyaŋ niŋ pa o nɛiyo hoo choo? Ŋ yaasiaŋndɔ sɔɔŋ muŋ yɔŋnuŋ buɛiyaa Chɛhowaa a ŋiɔɔŋ o sindɔɔ niŋndo, Diboolua nda Baluaki. Nyɛ yɔŋnuŋ nda wo cho naa mala le nyunalaŋ ndaŋ mulioo.

6. Le yɛɛ i wa yɛ maa i wa tɛtɛlɛ le mi puaa chɔuwaa Chabiŋ nda yem Isɔluɛiya?

⁶ Kuubanɔ chɔu Isɔluɛiya Baluaki wa ni. Nduyɛ wana ndoo suaa le Mɛlɛka wo Diboolua wa ni. Le wɔsilaŋ 20, masa Kenanaitiiya Chabiŋ, wa Isɔluɛiya “nyɛ palaa bɛndoo tusioo choo.” Puaa chɔuwaa Chabiŋ nda ndaa tuulu nduyɛ kɔl vesɛiyo pila ndaa nɔ ni. Le hei, Isɔluɛiyaa wa o sɔndɔkɔltaŋ nda wa a siooŋnde le mi ndaa mal pɛŋ chiooŋ ndaŋ. Puaa chɔuwaa Chabiŋ nda ndaa nɔ nyɛla ŋchiliŋnda suaa naŋ ndaŋ 900, kɛ Isɔluɛiya ndaa nɔ nyɛm chɔu sɔvɛ le chɔulabaa ɔɔ le nda mandaa le.—Chɔɔchiaa 4:1-3, 13; 5:6-8. * (Tofa tɛɛsiaa amatou.)

7, 8. (a) Yɛɛ tase Chɛhowa ndoo dimullɛ Baluaki? (b) Vɛɛ Isɔluɛiya ndaa yem yɛ puaa chɔuwaa Chabiŋ nda? (Tofa fotueiyo o peele naŋ kandu leŋ choo.)

⁷ Te a tuu pɛ puaa chɔuwaa Chabiŋ nda a Isɔluɛiya, ma che maa Isɔluɛiya ndaa kindu ŋdial te, nduyɛ i wa tɛtɛlɛ le nda yomɔɔ. Kɛ mi Chɛhowa dimul Diboolua le mbo dimul Baluaki aa, “Kɔ, ma kɔ hɛli sovɛiya waalaŋ tɔ (10,000), o yuŋgu Nafitaliiyo choo, a yuŋgu Sɛbulɔŋ ndo, ma sim nda lachi ma kuɛ a nda o Pembii Tabɔɔve choo. I cho tosa mi Sisɛlua, wana cho sovɛiyaa Chabiŋ nda bolleŋ ndo, o chua nyɛla ndɔla nyaanaŋnda chɔula suaa a naŋ ndaŋ, a sovɛiyaa nduaa ma kɔ chiŋalaŋ nya a sɔŋgɔɔ Kisiɔŋ o peelo. Kɛ nduyɛ, I cho tosa mi la yem nda.”—Chɔɔchiaa 4:4-7.

⁸ Ma nyuna le wanaa yeema yɔŋgɔŋndo wa, nduyɛ mi puaa 10,000 chuuŋgiaŋ o Pembii Tabɔɔve. Mi Baluaki nda puaa nduaa kɔ chiŋalaŋ puaa chɔuwaa yaamɔɔwaa ndaa o fonda nda veelu aa, Taanaki wo. (Nuawɔ Chɔɔchiaa 4:14-16.) Baa mi Chɛhowa ndoo mala pa Isɔluɛiya? Ei. Mi piɔɔ hueiyii fuku fukuei tual yɛm, nduyɛ mi fondaŋ vesɛi nda wa koŋ chɔulabaa wo simnuŋ loolioo. Mi hei ke Isɔluɛiya fondaa le chɔuwo yomɔɔ. Mi Baluaki tuau puaa chɔuwaa Sisɛlua wa le mɛɛlilaŋ 15 (kilolaŋ 24), tei mbo fuuluu o fondaŋ nda veelu aa Halɔsiɛti wo. Mɛɛ nda fuuluu o fondaŋndo opum, mi nyɛm chɔu Sisɛlua woŋ, ŋ suaa a naŋndoŋ, hau o loolioo niŋ. Mbo tual lɛŋ, mbo nyaanuŋ Saananim chiee, kɛlɛŋgaa Kɛdɛsi ikɛi. Loŋ Sisɛlua kɔ vionuŋ o tɛndii chua ndoo nɔ diolaŋ aa Chayɛɛ wo niŋ ni. Sisɛlua wa o saŋgɛiyo yɔkɔɔ nduyɛ mbo hiaunuŋ o luaŋ chɔ chɔ. Mɛɛ o wa o malɔ, a kɔl sikpaa, mi Chayɛɛ dii ndu. (Chɔɔchiaa 4:17-21) Mi Chɛhowa tosa mi Isɔluɛiya yam yaamɔɔwaa ndaa! * (Tofa tɛɛsiaa amatou.)

9. Yɛɛ Chɔɔchiaa 5:20, 21 pɛɛku yɛ naa a sɔŋgɔ yɔŋnuŋ Isɔluɛiya tɛɛŋ nda Sisɛlua wo?

⁹ Ŋ chɔɔlu pɛɛku a sɔɔŋ nda tɛɛsiaa o Chɔɔchiaa bolle 4 niŋndoŋ te ŋ veelu pɛ diomndaŋ o bolle 5 leŋ niŋ. Chɔɔchiaa 5:20, 21 dimul naa aa, “Looŋ cho o halaa niŋ choo choo woŋ bɛɛ mi ŋ sɔŋga a yaamɔɔwaa Isɔluɛiya, ŋ lo naa ŋ cho hiŋnɔŋndo o halaa niŋ nda, mi ŋ sɔŋga a Sisɛlua, bolle sovɛiyaa yaamɔɔwaa naa. Nda kpou ma lo Kisiɔŋ o peelo.” Baa hei sim ni maa maalikɛiya mala Isɔluɛiya teleŋ nda wa sɔŋgɔɔ wo ni, ɔɔ looŋ tɛnda duu woŋ deli nda choo ni? Baabuiyo tɛɛsiaa keŋ te. Kɛ wana che pɛ maa le wanaa nduaa piŋioo Chɛhowa tuisi piɔɔ bɛndoo yɛm ni o fondaŋ koŋ vɛlɛ a teleŋ koŋ, le halikpeŋ mbo kuuna nyɛm nyaanaŋ 900 suaa naŋndoŋ kɔlaŋ chɔ chɔ. Chɔɔchiaa 4:14, 15 dimul naa bɛmbɔɔ le yaa maa Chɛhowa Isɔluɛiya ke saŋgalaa le yaamɔɔwaa ndaa yomɔɔ ni. Wana o wana o Isɔluɛiyaa 10,000 yɔŋguŋ haa wa tɛɛŋ ndoo nɔ mbo saŋgalaŋ le chɔu koŋ yomɔɔ le.

10, 11. Yɛɛ Mɛlɔsi sim yɛ? Le yɛɛ o sɔla yɛ sendioo?

¹⁰ Ŋ yaasiaŋndɔ niko suɛi sɔvɛi pum. Mɛɛ Isɔluɛiya yem chɔuwo, mi Diboolua nda Baluaki soli chondoŋ le Chɛhowa saŋgalaa. Ma soli aa, “Mi kiilanɔ Mɛlɛka Yaawɛɛ wo o dimi aa, ‘Mbɔ maa Mɛlɛka o handu waŋnda Mɛlɔsi sendioo choo fɔ. Mbɔ maa sendi kala kala bɛndoo o wa waŋnda haa choo fɔ, fondole, le mɛɛ nda kɛɛ le hunɔɔ, le Mɛlɛka Yaawɛɛ sɔŋgɔɔ malaa yɛ, le mɛɛ nda kɛɛ le Mɛlɛka Yaawɛɛ sɔŋgɔɔ malaa a yaamɔɔwaa nduaa kpaayaa bɛnduaa yɛ.’”—Chɔɔchiaa 5:23.

¹¹ Yɛɛ kpeekpei Mɛlɔsi sim yɛ? Naa bɛɛ ŋ sina le. Kɛ sendi Mɛlɛka handu ndu choo wo bii ndu ni, lelaŋ naŋ seeluŋ hau fondaŋ kpeekpei Mɛlɔsi wa wo le ni. Kɛlɛŋgaa chiee bɛndoo Mɛlɔsi wa ni, o wanaa nduaa kɛɛ le yɔŋgɔŋndo le Baluaki malaa sɔŋgɔɔ wo. Te waŋnda 10,000 yɔŋguŋ pɛ le Kenanaitiiya chiŋalaŋndo a sɔŋgɔɔ, kɛlɛŋgaa mi waŋnda Mɛlɔsi bɛɛ tuɛi dɔɔ nyuna nda wa le mi waŋnda yɔŋguŋ ndo. Ɔɔ naapum Mɛlɔsi Sisɛlua keeku a kiltaŋ ni teleŋ o wa Baluaki nyaanɔŋndo wo. Kɛlɛŋgaa waŋnda Mɛlɔsi ndaa nɔ fondaa le Sisɛlua biyɔɔ, kɛ a tosa lende le. Yiyaŋndɔ mɛɛ nda wa chɔɔ kuubanɔ weenaŋndo hoo kiltaŋ o chiee ndaa tɛɛŋ le yoomu ndɔɔ yɛ! Ndaa nɔ mi ndaa tosa suɛi sɔvɛi le sabu Chɛhowaa tooloo. Te ndaa tosa lende pɛ, o wa nda fanda. Kɛ mɛɛ nda sɔla fondaa le Chɛhowa nyɛ tosallo, ma chalnuŋ. Wana che pɛ maa waŋnda Mɛlɔsi wa teŋgeŋ a Chayɛɛ, o ndoo tosa suɛi a kɔl sikpaa wo.—Chɔɔchiaa 5:24-27.

12. Vɛɛ Chɔɔchiaa 5:9, 10 chɔm yɛ kaala teŋgeŋnda waŋnda? Vɛɛ hei piiliaŋ yɛ naa?

¹² O Chɔɔchiaa 5:9, 10 niŋ, ŋ che maa kaa wanaa 10,000 yɔŋguŋ nda chɔmndo wa teŋgeŋ a kaa wanaa yɔŋguŋ te wa. Mi Diboolua nda Baluaki chandu “wanaa cho sovɛiyaa Isɔluɛi bolleŋ nda . . . , wanaa chɛl ma yɔŋguŋ nda pila le sɔŋgɔɔ a yaamɔɔwaa ndaa wa.” A wanuŋ bɔɔ teŋgeŋ a wanaa wa “balɔɔ o sofɛliaa kɛndɛ kɛndiaa choo” wa. Mi waŋnda haa yiyaŋ maa a cho bɔɔ wanaa sɔvɛ le ma yɔŋguŋ le wallo. Baabuiyo tɛɛsiaa nda maa a wa ichali “o bilala kɛndɛ kɛndɛla nda handu sofɛliaa o lakɔɔ le challe lechoo” laŋ,  ma wa yoomoo tueiyɔɔ yeela. Nduyɛ a ve maa wanaa yɔŋguŋ ma wa “balɔɔ o nɛilaŋ nda” le. Kɛ mi wanaa yɔŋguŋ a kɔllo kpou wa nda kua le sɔŋgɔɔ o pembuŋ lapouwoŋ o Tabɔɔ niŋ, a o kpoloŋnda huŋndaŋ o Kisiɔŋ niŋ. Mi Chɛhowaa dimul wanaa ndaa yeema yoomu tɛtɛlɔɔ wa le ma yiyaŋ a dilakeŋnaŋnda hɛluŋ nda le mɛɛ nda kɛɛ le yɔŋgɔŋndo le wali ndɔɔ tosaa yɛ. Hau, naa bɛɛ nɔ miŋ mɛɛndaŋ kaa naa le wali Mɛlɛkaa tosaa.

13. Vɛɛ kaa yuŋgu Lubɛŋ ndo, Daŋ, a Asiɛɛ wo wa yɛ teŋgeŋ a kaa Sɛbulɔŋ nda Nafitali yo?

¹³ Mi wanaa 10,000 yɔŋguŋ nda sɔla dikeŋnaŋndo le mi ndapila che mɛɛ Chɛhowa chɔm maa Masa Kpou Kpou Wo o cho ni yɛ. Ndaa nɔla ma dimul acheleŋnda a ndi okɔɔ mɛɛ nda wa suɛi a “sɔɔŋ bɛnduŋ Mɛlɛka Yaawɛɛ o tosa le yaamɔɔwaa yomɔɔ woŋ.” (Chɔɔchiaa 5:11) O baa pilɔɔ choo, mi yuŋgu Lubɛŋ ndo, Daŋ, a Asiɛɛ handu kɔllo o sulta ndalaŋ choo, chɔluaa ndaa, dɛndɛla ndala bɛnda kua o mɛŋndaŋ choo laŋ, a fondaŋ la simndo, mbo hiau wali Chɛhowaa. (Chɔɔchiaa 5:15-17) Kɛ o cho lende le yuŋgulaŋ kpou la wa le. Mi yuŋgu Sɛbulɔŋ ndo, a yuŋgu Nafitali yo, “pisi yoomula ndalaŋ chi o chɔuwo lachi” le Diboolua nda Baluaki tooloo. (Chɔɔchiaa 5:18) Ŋ nɔla miŋ pɛɛku suɛi sɔvɛi o kaala yɛ yɛla waŋnda haa niŋ a yɔŋgɔŋndo okɔɔ.

14. Vɛɛ naŋ chɔm yɛ maa ŋ cho kpuluŋgumayɛi Chɛhowɛi tooloo hau?

¹⁴ Hau, ŋ toolu masale Chɛhowaleŋ a chɔu le. Kɛ, ŋ yɔŋgu toolu naa le yooŋgu kɛndɔɔ dimioo a kɔllo sikpa vɛlɛ a dialuŋ fulaa. Waŋnda nɔ ma yɔŋguŋ tau le wali Chɛhowaa tosaa mbo hiou maa paandu. Puaapiliaa a ndepiliaa, vɛlɛ a feleŋguaa o miiliɔŋndaŋ niŋ cho yɔŋgɔŋndo le wali lɔɔlɔɔ mɛlɛkaa o nɛila yɛ yɛlaŋ niŋ. Le taamaseliiyo, wanaa bɔɔbɔɔ cho kɔɔfaleŋ, apum cho wallo o Bɛtɛɛl, Toŋgola leMasalaŋ taŋgullo, a yɔŋgɔŋndo le wallo tosaa o bɔŋaŋnda ibuŋgalaŋ a la bɛndaŋ. Bɛnduaa kundaa apum cho wallo tosaa kekelee o Kunda Suaa o Wanaa Chiɔuwaa lo Wo, a bɔŋaŋnda bɛndaŋ kɔɔnaa. Ŋ laalaŋ  kɛsɛ maa mi Chɛhowa hini kɔl a naa, te ŋ yɔŋgɔŋ pɛ a kɔl naa kpou le wali ndɔɔ tosaa o nɛi o nɛi niŋ. Nduyɛ o puɛɛnuŋ a kindi kindiŋ naa le.—Hibuluiya 6:10.

15. Vɛɛ naŋ tosa yɛ a sabu le chɔɔ maa dialuŋ naŋ fulaŋ cho tolɔɔ toolo le wali Chɛhowaa le?

¹⁵ Ŋ nɔ miŋ mɛɛndaŋ kaa naa a yɔŋgɔŋndo okɔɔ le wallo. Ŋ nyunaŋndɔ aa, ‘Baa I cho pa acheleŋnda waltaŋ malɔɔ o ba le tosaa? Baa I buulaŋ pa le nyɛmkiɔɔŋ sɔlaa tau mbo hiau Chɛhowa piɛiyo? Ɔɔ I cho pa taamasi Baluaki, Diboolua, Chayɛɛ, a ŋwaŋ 10,000 yɔŋguŋ nda tolɔɔ kɔɔli, le nyɛm kɛ kɛ ya nɔ soliŋndo kpeku le Chɛhowa piɛiyo? Baa I cho pa yiyaŋndo le kɔlaŋ o chiee cheleŋ ɔɔ o lɛŋnde cheleŋ niŋ, le halikpeŋ mi chɔɔlu kanioŋ nuuviaa le mi sɔla yoomu kɛndɔɔ? Te lende i cho ni, I cho pa piɛileŋ o Chɛhowa lo a mɛɛ kɔla waa naa la cho yuŋgu nuu a kundaa paaliaŋ yɛ?’ * (Tofa tɛɛsiaa amatou.)

16. Mi che bɛɛ Chɛhowa nɔ nyɛ o nyɛ fee, yɛɛ naŋ nɔla yɛ miŋ ke ndu?

¹⁶ Chɛhowa ke naa bɛɛle bɛnduleŋ le mɛɛ o chɛl naa le masale ndɔleŋ tooloo yɛ. Chɔŋ a teleŋ Adam nda Ifi wo, Masa Nyinaa Wɔɔŋnda ndoo yeema mi waŋnda tol ndu kɔɔli le Chɛhowa simullo. Kɛ te ŋ toolu pɛ masale Chɛhowaleŋ, mɛɛ ŋ chɔm Setana kpendekele kpeŋgii naŋ sim choo ve. Tiindaŋ naa a lo lechoo naa nyindu naa le yɔŋgɔŋndo o wali Chɛhowaa niŋ, nduyɛ mi hei nɛŋi ndu kɔl tau. (Pulɔwaa 23:15, 16) Mi Mɛlɛka naa soliŋ toolu naŋ cho ndu wo kpeku a diikɔŋ naa le Setana cho ndu chuaa chɔdɔ wo mulullo. (Pulɔwaa 27:11) Diikɔŋ naa cho nyɛ sɔvɛ naŋ ke Chɛhowa wo ni, nduyɛ mi hoo chuu ndu nyaaloo tau.

17. Yɛɛ Chɔɔchiaa 5:31 pɛɛku yɛ naa a nyɛ cho yɔŋnɔŋ o chilaŋ niŋndo okɔɔ?

¹⁷ Wana o wana cho suŋ masale Chɛhowaleŋ yeema mbo hiou masale kɛ kɛ. Ŋ cho bɔɔ lehɔl o nɛi le teleŋ koŋ! Ŋ nɔ yiyaŋ pilɔɔ maa Diboolua nda Baluaki. Ma soli chondei aa, “Oo Mɛlɛka Yaawɛɛ, yaamɔɔwaa numnda kinɛi, mɛɛ i yɔnuŋ nuaa a Sisɛlua yɛ, lende i yɔnuŋ a nda ni fɔ. Kɛ nduyɛ wanaa kaala numnda kinɛi, a sɔla dialluŋ kalaŋ, nduyɛ ma dendu yaamɔɔwaa ndaa tɛɛŋ maa lepala fɔ.” (Chɔɔchiaa 5:31) Keŋ cho yɔŋnɔŋ te Chɛhowa tɛɛmbuu pɛ chieeŋ dɛnɛ wɔɔŋ Setanaa. Te chɔu Amakɛdɔŋndo kanduŋ pɛ, Chɛhowa yeema lɛ niŋ mi wana yɔŋguŋ le yaamɔɔwaa nduaa tɛɛmboo le. Kɛ, ŋ cho wa isisi “yi” nduyɛ miŋ “che mɛɛ Mɛlɛka Yaawɛɛ o cho nda yomɔɔ” yɛ. (Koloniko Diiŋ Ndɔɔ 20:17) Kɛ tei mi teleŋ koŋ fuuluu, ŋ nɔ dilakeŋnaŋnda sɔvɛlaŋ le masale Chɛhowaleŋ tooloo a kɔl sikpaa nduyɛ a dialuŋ fulaa.

18. Tɔnɔ yɛɛ yɔŋgɔŋ numndo ke yɛ acheleŋnda?

¹⁸ Mi Diboolua nda Baluaki kandu chondii nda yem chɔuwo ve solioo le Chɛhowa saŋgalaa, kɛ o cho le waŋchieeya le. Ma soli aa, “La ŋ saŋgalaŋ Mɛlɛka Yaawɛɛ le nyɛ yɔnuŋ ndo. . . . Waŋnda Isɔluɛi nda pila kɛsɛ kɛsɛ a yɔŋguŋ ni le kɔlaŋ sɔŋgɔɔ a yaamɔɔwaa ndaa.” (Chɔɔchiaa 5:1, 2) Naa bɛɛ te ŋ piɛi pɛ Chɛhowa a mɛɛ o yeema yɛ, acheleŋnda bɛɛ cho kɔl dɛɛniaa sɔla le Mɛlɛka Yaawɛɛ saŋgalaa!