1-3. (a) Simul kuɛɛ feleŋguaa kpou nɔ yɛ, nduyɛ a yɛɛ naŋ tuu yɛ ndu? (Tofa fotueiyo o peeleŋ ndeŋ choo.) (b) Yɛɛ mala yɛ feleŋguaa o simullo hoo bɛŋgu?

YIYAŊNDƆ maa a kɛɛsiaa le dunyɛi teŋgeŋnde tosaa o chiee cho landaŋ ndo. Le kɔlaŋ loŋ, a nɔ ma chua mɔmbillo. O tase ndɔɔ, mi hɔlla hiŋ num te a kuɛ pɛ o fondaŋ nda chua mɔmbiltaŋ ndo. Kanifuule, waŋnda cho wa loŋ tau a mɔmbiltaŋ la hɔbɛi. Kɛ a cho a kɔl kɛndɛ kanifuule, a sina fondaŋ kpeekpei ŋ yeema kɔlaŋ ndo, a mɔmbil ŋ nɔ ma chua wo. O cho mɔmbil kɛ kɛ fee le ŋ chua le kanifuule, a sina maa o cho num yɔɔ o fondaŋ ŋ sina le wo.

² Yoomoo cho maa kɔlaŋ o tiŋ vilɛiyo niŋ, nduyɛ nya feleŋguaa cho maa wanaa cho o fondaŋ chuaa la mɔmbillo wo. Teleŋndaŋ lapum, chuaŋ chuaa a kɛɛsiaala hiŋ nya hɔlla o yoomoo niŋ-ndaŋ la cho tau. Kɛ te la sina pɛ naa nya yeema le kɔlaŋ nda, o wa tɛtɛlɛ le mi la hɛli nyɛ bɛnda wo. Nɛi kuɛɛ nya nɔ yɛ mi la tol kɔɔli?

³ Buŋgɛi hei cho nyuna koŋ muli, nduyɛ i cho nya dɛɛniaa le mi la handu kɔllo o Chɛhowa kɔllo nɛŋioo choo. Koŋ sim ni, sila Chɛhowaa tolɔɔ kɔɔli o kɛɛsiaala kɛ kɛ nya nɔ mi la tosa o yoomu  nyaa niŋ. Mɛɛ dɛnɛ sinaa ɔɔ wali ŋ nɔ ma tosa wo cho naa yɛ, ɔɔ te a nɔ pɛ ma chua nɔɔ ma velu chuauwa. Ndu sim vɛlɛ ni, wallo tosaa le kpeleŋnda iMɛlɛkayalaŋ komallo, koŋ cho ni, kpeleŋnda tosa ma sɔɔŋguu Chɛhowa ikɛi kpɛɛluŋ ndaŋ. Te la handu pɛ kɔllo o Chɛhowa piɛiyo choo, la nɔla mi la nɔ tiindaŋndo maa o cho nya salaa dɔwɔɔ, nduyɛ mbo mala nya le batiuwaa sɔlaa.—Nuawɔ Pulɔwaa 16:​3.

4. Yɛɛ naŋ cho yɛ yaasiaa o buŋgɛi hei niŋ.

⁴ O bɛnda mi wana kɛsi kpeleŋnda iMɛlɛ-kayalaŋ. Le sabu yɛɛ? Ŋ cho sabulaŋ la yaa yaasiaa. Kpeleŋ tasoo a o diiŋ ndɔɔ cho num mala le chɔɔ maa wallo tosaa le ma komal kpeleŋnda iMɛlɛkayalaŋ tosa ma simnuŋ chaaŋ kɛndɛ kɛndɛ Chɛhowaa. Kpeleŋ yaa ndɔɔ cho chɔm le sabu o bɛnda ma kɛsi kpeleŋndaŋ teleŋ ŋ cho feleŋgɔnɔ wo.

5. Yɛɛ cho yɛ sabu sɔvɛ sɔviɔɔ le kpeleŋnda iMɛlɛkayalaŋ kɛsioo?

⁵ Sabu sɔvɛ sɔviɔɔ le kpeleŋnda iMɛlɛkayalaŋ kɛsioo cho le Chɛhowa balikaa mello le kaala o chɔm naa wo, vɛlɛ a nyɛ o tosal naa wo ni. Mi wana poonyiaa ŋChondu pilɛ dimi aa, “O cho bɔɔ suɛi kɛndɛ le num balikaa mello Mɛlɛka Yaawɛɛ, . . . kani fondole, nyɛ o nyɛ ŋ tosa Mɛlɛka Yaawɛɛ, kɔllo ya I naŋ ni, nduyɛ mi soli chonduŋ kɔl kɛndɔŋ le num saŋgalaa.” (Sam 92:​1, 4) Yiyaŋndɔ a nyɛm Chɛhowa ke num ndoŋ kpou. Yoomu numndo, Chɛhowa sinaa a tonyaa a ndu okɔɔ, Baabuiyo, Kundaa, a tiindaŋndo le waa achal lefafɛɛŋ o Kpele Hɛnɛkiɔɔ niŋ. Te a kɛsi pɛ kpeleŋnda iMɛlɛkayalaŋ, mɛɛ a chɔm maa a nɔ balika melaa le nyɔɔŋ muŋ kpou, ŋ tosa ma sɔɔŋguu Chɛhowa ikɛi kpɛɛluŋ ndoŋ.

6. (a) Vɛɛ Kpeleŋnda iMɛlɛkayalaŋ la piiliaŋ yɛ chaŋyɛi numnde nya Chɛhowa tɛɛŋ? (b) Kpeleŋnda kuɛɛ ŋ nɔ yɛ ma kɛsi teleŋ ŋ cho feleŋgɔnɔ wo?

⁶ Sabu diiŋ ndɔɔ le kpeleŋnda iMɛlɛkayalaŋ kɛsioo cho ni, te a tosa wallo le laŋ komallo pɛ, mɛɛ wali kɛndɔɔ ŋ cho koŋ tosaa le Chɛhowa ni. Hei cho tosa ma sɔɔŋguu ndu ikɛi kpɛɛluŋ. Mi Pɔɔl, wana Chiisu vem hɔlte ndɔ wo dimi aa, “Mɛlɛka ndu nɔ lakafa le. O puɛɛŋ a wali nya tosa wo le. Nduyɛ, o puɛɛŋ a mɛɛ nya chɔm kaala nya nɔ le ndu wo yɛ le.” (Hibuluiya 6:​10) A hiu wa o pɔmbɔ le kpeleŋndaŋ kɛsioo le. Le taamaseliiyo, Kilisiŋ wa wɔsilaŋ 10 mbo kɛɛsiaa le diomndaŋ veeloo lɔɔlɔɔ a bundɔŋ puaapiliaa a ndepiliaa dɔu tiindaŋndo o Mɛlɛka niŋnda okɔɔ. Tobi wa wɔsilaŋ 12 mbo kɛsi kpeleŋndo le diomndaŋ veeloo o Baabuiyo niŋ kpou tuupa mbo sɔla yiŋɔɔ. Masim wa wɔsilaŋ 11 nduyɛ yema ndɔ wa wɔsilaŋ 10 ma yiŋ. Mi nda ŋiɔɔŋ kpou kɛsi kpeleŋndo le wallo tosaa o Bɛtɛɛl. Le ma handu kɔllo o kpeleŋ koŋ choo, ma hol yau nda poonyiaa le kɔlaŋ o Bɛtɛɛl lo o ndalo chiɛiniŋ. Num yɛ? A nɔla pa ma yiyaŋ a kpeleŋnda ŋ nɔ ma kɛsi, nduyɛ ma kandu wallo tosaa le laŋ komallo wo?—Nuawɔ Filipiaŋnda 1:​10, 11.

7, 8. (a) Vɛɛ kpeleŋndaŋ kɛsioo tosa yɛ ndi tɛtɛlɛ le kɛɛsiaa tosaa? (b) Le yɛɛ feleŋgɔnɔ pum hɛli yɛ le kiɔɔ kɔlaŋ o sukuu bɛndoo niŋ?

⁷ Yɛɛ cho yɛ sabu yaa ndɔɔ le nyɛ o bɛnda le kpeleŋndaŋ kɛsioo teleŋ ŋ cho feleŋgɔnɔ wo? Teleŋ ŋ cho feleŋgɔnɔ wo, ma nɔ kɛɛsiaalaŋ tau le tosaa. A nɔ ma kɛɛsiaa le dɛnɛ sinaa ɔɔ wali ŋ nɔ ma tosa wo, a sɔɔŋ bɔɔbɔɔ cheleŋ. Kɛɛsiaalaŋ ndaŋ la cho ko mɛɛ waŋndo wa kɔlaŋ mbo fuuluu o nɛila bandoo yɛ. Te a sina pɛ naa ŋ cho kɔlaŋ nda, i wa tɛtɛlɛ le kɛɛsiaa nɛi ŋ nɔ ma tol kɔɔli wo. O nɛi pilɛ koŋ choo, te o wa pɛ ma sina kpeleŋnda numndaŋ, o wa tɛtɛlɛ le kɛɛsiaalaŋ tosaa a taasi. Pulɔwaa  21:​5 dimi aa, “Te wana chaa kɛɛsiaa pɛ, a sɔla tau.” Te a che ndi pɛ tɛtɛlɛ le kɛɛsiaalaŋ tosaa, a dounuŋ tamala le fulamakɔɔli kɛndɔɔ sɔlaa le. Keŋ ndii yɔŋnuŋ Damalisi ni. Ndoo nɔ mbo tosa kɛɛsiaa sɔviɔɔ teleŋ o wa kpasu wo.

⁸ Mi Damalisi sɔla yau sɔviɔɔ teleŋ o chii sukuuwo wo. Ndoo nɔla mbo chɛl di nda ke ndu le kɔlaŋ sawaa pɛɛkoo o sukuu bɛndoo wo. Kɛ mbo hɛli le wali tɛtɛlɔɔ tosaa. Le sabu yɛɛ? Kanifuule, teleŋ o wa feleŋgɔnɔ wo, mbo kɛɛsiaa maa o cho kɔɔfaleŋ tosa. Mbo dimi aa, “Keŋ ndii sim ni maa wallo tosaa palɛi ipilɛŋ o lɔɔ bɛŋgu. Te yaa tosa dɛnɛ sinaa bɛndoo a sawaa okɔɔ pɛ, I wa kaniei sɔla tau, kɛ i ve wa suɛi bɛɛŋ le wali nda tosa palɛi ipilɛŋ o lɔɔ bɛŋgu wo sɔlaa le.” Damalisi cho niŋ kɔɔfanɔɔ le wɔsilaŋ 20. Baa o nɔ pa yiyaŋndo maa kpeleŋ kɛndɔɔ o kɛsi ni, nduyɛ maa kɛɛsiaa kɛndɔɔ ndoo tosa teleŋ o wa kpasu wo ni? Ei. Naa o tosa wallo wa, mbo chiikaŋ a wanaa kɔɔsa waŋnda wa, wali ndu bɛɛ ndoo nɔ mbo tosa te ndoo kuɛ pɛ o sukuu bɛndoo wo. Mbo dimi maa a bɔɔbɔɔ nda tɛɛŋ cho a kɔl kɛndɛ a walta ndalaŋ te. Damalisi dimi maa wɔsiŋ o chii niŋ o kɔɔfaleŋ tosaa niŋndoŋ chuu ndu nyaaloo tau, nduyɛ o mala ndu le kpakpalaa kiɔɔ waa a kɔl kɛndɛ maa nda.

9. Le yɛɛ naŋ cho yɛ a kɔl kɛndɛ le feleŋguaa naa?

⁹ Feleŋguaa naa o waalaŋ niŋ chieeŋndo balɔɔ silɔ cho sɔɔŋ tosaa nyɛkɛndɛi, nduyɛ a nɔ ma sɔla chandɔɔ. Chaŋyɛi ndɛi a Chɛhowa a kpeleŋnda ndala iMɛlɛkayalaŋ cho nyɛ tasoo o yoomula ndalaŋ niŋ ni. Feleŋguaa haa cho yoomoo tueiyɔɔ yeela, nduyɛ a cho vɛlɛ pɛɛkoo le nɛi chɔmaa Chɛhowaa tolɔɔ kɔɔli o nyɛ o nyɛ niŋ, kɔ bii a dɛnɛ sinaa, wallo, a yoomu leyuŋgoo. Mi Sɔlɔmɔŋ dimi aa, “Dɔu tiindaŋ numndo kpou o Mɛlɛka Yaawɛɛ niŋ.” Mbo dimi vɛlɛ aa, “O nyɛ o nyɛ ŋ wa tosaa niŋ, puɛɛnuŋ a Mɛlɛka Yaawɛɛ le. O nɔla mbo tosa mi nyɛ o nyɛ wa o kɛndɛ a num.” (Pulɔwaa 3:​5, 6) Feleŋguaa, Chɛhowa kaala nya bɔɔ! La cho bɔɔ a sɔvɛ ndu o hɔl, nduyɛ o cho nya manda, mbo chɔm nya nɛiyo, vɛlɛ mbo dɔu nya sala.

10. (a) Le yɛɛ wali dimiaa yooŋgu kɛndɔɔ nɔ yɛ mbo wa nyɛ sɔvɛ sɔviɔɔ opilɛ le naa? (b) Vɛɛ ŋ sɔla yɛ batiuwaa le laalaŋnda numndaŋ tɛɛsiaa nyɛkɛndɛi?

¹⁰ Te a handu pɛ kɔllo o Chɛhowa kɔllo nɛŋioo choo, a cho yeemɛi nɔ le acheleŋnda dimullo a ndu okɔɔ. Mi Chiisu dimi maa “mɛɛ mi yooŋgu kɛndɛ Mɛlɛkaa o wa fɛlɛŋ o dimiaŋ ba o ba fee o chieeŋndo choo.” (Maki 13:​10) Lelaŋ, wali dimiaa yooŋgu kɛndɔɔ cho choŋ choŋ, nduyɛ o nɔ mbo wa nyɛ sɔvɛ sɔviɔɔ opilɛ le naa. A nɔla pa ma kɛsi kpeleŋndo le yooŋgu kɛndɔɔ dimioo lɔɔlɔɔ? A nɔla pa ma tosa kɔɔfaleŋ? Kɛ te o wa yɛ maa a tuii yooŋgu kɛndɔɔ dimioo yeela tau le? Nduyɛ vɛɛ ŋ sɔla yɛ batiuwaa le laalaŋnda numndaŋ tɛɛsiaa nyɛkɛndɛi? Sɔɔŋ ŋmuuŋ mala num. Bɛɛndiaŋ nyɛkɛndɛi, nduyɛ wu ŋdial le acheleŋnda dimullo sɔɔŋ ŋ sina a Chɛhowa okɔɔ woŋ te. Kɔndɔfillo cho num biyɔɔ a mɛɛ kpɛ ŋ cho yooŋgu kɛndɔɔ dimioo tueiyɔɔ yeela yɛ.

11, 12. (a) Bɛɛndiaŋ yɛɛ ŋ nɔ yɛ ma tosa le suɛi o acheleŋnda lo o sukuu? (b) Vɛɛ puaapilɛnɔ feleŋgɔnɔɔ soliŋ yɛ dikeŋnaŋ o sɔla wo kpeku le suɛi a Chɛhowa okɔɔ o sukuu?

 ¹¹ Kandu bɛɛndiaŋndo le nyuuniaala chaaŋaa numnda o sukuu nyuna lɔɔlɔɔ laŋ. Tɛɛŋgii nɛi jw.org a yaula cheleŋ nɔ buŋgaŋ mala feleŋguaa le ma bɛɛndiaa mulilaŋ a ba nda le nyunala waŋnda nyuna lɔɔlɔɔ laŋ. Le taamaseliiyo, nyunaa hoo, “Yɛɛ Ya Tosa yɛ te A Wa Ya pɛ Nyindɔɔ le Hiniei Tosaa?” Buŋgɛi hei “I Nɔ pa Mi Laalaŋ Maa Nyɔɔŋ a Ba Ndɔ Ŋ Hiŋ Ni?” o yauwo hoo niŋ Mulilaŋ le Nyunalaŋ 10 Feleŋguaa Nyunalaŋ. Yauwo hoo cho num nɛi chɔmaa ke le mulila numndaŋ bɛɛndiaa.—Nuawɔ Kolosiaŋnda 4:​6.

¹² Dimul chaaŋaa numnda o sukuu maa a nɔla ma tofa sɔɔŋ le ndapila o jw.org. Keŋ Luka ndoo tosa ni. Wanaa nda wa o toŋgo pilɔɔ niŋ o sukuu wa wa suɛi a kaaŋii yɛ yɛi okɔɔ. Mi Luka sina maa yau nda wa pɛɛkoo wo dimi sɔɔŋ cho tonya a Seiyaa Chɛhowaa okɔɔ le woŋ. Mi che bɛɛ Luka wa a siooŋnde, kɛ mbo nyuna wana nda pɛɛkaa te o nɔla pɛ mbo dimul wanaa nda cho o toŋgo pilɔɔ niŋnda le sabu sɔɔŋ muŋ ve tonya le woŋ. Mi wana nda pɛɛkaa chɛl le mbo tɛɛsiaa sɔɔŋ o laalaŋndoŋ. Nduyɛ mbo chɔm wanaa nda wa o toŋgo pilɔɔ niŋnda kpou tɛɛŋgii nɛi. Mi wana nda pɛɛkaa ke nda kpou wallo le kɔlaŋ tosaa o bɛɛ, le ma kɔ tofa vidueiyo hoo, Lɔɔ Wana Cho Num Mamɔɔ wo Kɛ o Wa a Bɔta Le. Yiyaŋndɔ mɛɛ Luka wa a kɔl kɛndɛ le suɛi a Chɛhowa okɔɔ o sukuu yɛ!

13. Le yɛɛ naŋ nɔ yɛ miŋ vi ŋdial te yɛ te simultaŋ la komal naa pɛ?

¹³ Te sɔɔŋ kala kalaŋ komal num pɛ, tambu kɔl te. Kɛ hiou lachi a wallo tosaa le kpeleŋnda numndaŋ komallo. (Timoti Diiŋ Ndɔɔ 4:​2) Keŋ Katalina ndoo tosa ni. O wa wɔsilaŋ  17 mbo kɛsi kpeleŋndo le chaaŋaa nduaa nda wa wallo latulu wa yooŋgu kɛndɔɔ dimullo. Mi opilɛ o nda tɛɛŋ ndoo dimul ndu diomnda wɔɔŋndaŋ teleŋnda bɔɔbɔɔ. Kɛ o puɛɛnuŋ a kpeleŋ ndɔ o kɛsi wo le. Mi Haŋs nda wa wallo latulu wo hɛnaŋ kaa ndɔ kɛndɔɔ tau. Mi Haŋs kandu diomndaŋ veeloo o yaula naalaŋ niŋ, mbo pɛɛku Baabuiyo, nduyɛ mbo sɔla yiŋɔɔ. Katalina ndoo sina a hei okɔɔ le kanifuule, ndoo hiou niŋ o fondaŋ cheleŋ a teleŋ koŋ. Kɛ mɛɛ wɔsilaŋ 13 hiou okoŋ kɔɔli, mi kaamaa bii ndu le chɔɔ Haŋs suɛi luŋnde yɔ-ŋgoo, o paale o bii bɔŋaŋndo nda yuŋgu ndɔɔ leŋ choo! Ndoo naŋ bɔɔ kɔl le mɛɛ o vi ŋdial le kpeleŋndo nɔɔ le chaaŋaa nduaa nda wa wallo latulu wa yooŋgu kɛndɔɔ dimullo yɛ le.

14, 15. (a) Yɛɛ ŋ nɔ yɛ ma loonuŋ te acheleŋnda nyindu num pɛ le ma tosa sɔɔŋ nda cho tosaa woŋ? (b) Yɛɛ ŋ nɔ yɛ ma tosa le loo o kala poŋ te acheleŋnda nyindu num pɛ le sɔɔŋ pum tosaa?

¹⁴ O kpeekpei niŋ, buŋgɛi hei dɛɛniaa num le ma tosa kɛɛsiaa le kɔllo handɔɔ o Chɛhowa kɔllo nɛŋioo choo, a kpeleŋnda iMɛlɛkayalaŋ kɛsioo. Kɛ o yelelaŋndo choo kinɛi feleŋguaa bɔɔbɔɔ nya nɔ wɔsiŋ pilɔŋ nda handu kɔllo ni. Nduyɛ naapum ma veelu num le ma tosa sɔɔŋ nda cho tosaa woŋ. O teleŋ biŋgi bɛ-ŋgu, a cho acheleŋnda chɔm mɛɛ kpeleŋnda numndaŋ komallo cho nyɛ sɔvɛ yɛ. Chɛl mi acheleŋnda tosa ma puɛɛnuŋ kpeleŋnda numndaŋ te. Te num oo wa pɛ o fondaŋ nda chua mɔmbiltaŋ ndo a mɛɛ naŋ dimi o buŋgɛi hei kandɔŋndo yɛ, a wa pa luɛiyɔɔ o mɔmbil kɛ kɛ niŋ le mɛɛ ŋ che waŋnda yelelaŋndo tosaa leniŋ yɛ? Sako bɛɛ!

¹⁵ Lelaŋ, yɛɛ ŋ nɔ yɛ ma tosa le loo o kala poŋ te acheleŋnda nyindu num pɛ le ma tosa sɔɔŋ nda cho tosaa woŋ? Kpakpala sɔɔŋ tosa ma mal num o kpundɔɔ niŋndoŋ. (Pulɔwaa 22:​3) Yiyaŋ a fulamakɔɔlila wɔɔŋnda ŋ sɔla le balaŋ lueiyo o sɔɔŋ wɔɔŋndoŋ tosaa niŋndo. (Kaleesiaŋnda 6:​7) Nduyɛ tusiŋ le chɛlɔɔ maa a nɔ ma sɔla sila sɔviɔɔ. Yaŋ nilaŋ o sɔɔŋ wanaa velu numnda, puaapiliaa a ndepiliaa o kundaa niŋ cho num dimullo woŋ.—Nuawɔ Pitɛ Tasoo 5:​5, 6.

16. Vɛɛ nyɛ yɔŋnuŋ Kilitɔɔfu wo chɔm yɛ maa i cho suɛi sɔvɛ le ma tusiŋ?

¹⁶ Mi tusiŋndo mala Kilitɔɔfu le sila sɔviɔɔ chɛlɔɔ. Mɛɛ o sɔla dɔɔ yiŋɔɔ, mbo kandu kɔlaŋ lɔɔlɔɔ o fondaŋ waŋnda hiiluu dialloŋ ndo. Loŋ, mi feleŋguaa cheleŋnda dimul ndu le mbo del o kunda nda lapisullo choo. Mbo suukaŋ a bɛndu kundaa a hei okɔɔ. Nduyɛ mi bɛndu koŋ dimul ndu le mbo yiyaŋ a kpundɛlaŋ lapum okɔɔ, mɛɛ kaa paŋalaa cho naa yɛ. Kɛ mi Kilitɔɔfu kɛɛsiaa le kunda koŋ delɔɔ choo. Nduyɛ mɛɛ teleŋndo hiou tiŋ, mbo sina maa niilu latandaa a kpundɔɔ cho o pisulta laŋ niŋ. Mbo suukaŋ vɛlɛ a bɛnduaa, nduyɛ ma ke ndu silaa o Baabuiyo niŋ. Mi Kilitɔɔfu dimi aa, “Mi Chɛhowa yɔŋ ya wanaa silaa sɔviaa, nduyɛ mi yaŋ Chɛhowa nilaŋ, mi che bɛɛ mbo chua teleŋndo o tiŋ.” A tusiŋ pa le sila sɔviɔɔ chɛlɔɔ?

17, 18. (a) Yɛɛ Chɛhowa yeema yɛ le feleŋguaa hau? (b) Vɛɛ ŋ kpakpala yɛ suei kiolɔɔ le nyɛ ŋ hɛli le tosaa teleŋ ŋ cho sulɔɔ kaasoŋnɔ wo? Chɔmndɔ suɛi yɔŋnaŋnde.

¹⁷ Baabuiyo dimi aa, “Nya feleŋguaa, la tuei yoomoo yeela boondii nya cho ŋfeleŋgɔ ve. Nduyɛ la wa a kɔl kɛndɛ boondii nya cho ŋfeleŋgɔ ve.” (Ikilisiaatii 11:​9, NW) Chɛhowa yeema num ma wa a kɔl kɛndɛ teleŋ ŋ cho feleŋgɔnɔ wo. O buŋgɛi hei niŋ, a pɛɛku maa nɛiyo opilɛ le waa a kɔl kɛndɛ cho kɔllo handɔɔ o kpeleŋnda iMɛlɛkayalaŋ choo ni, nduyɛ a sila Chɛhowaa tolɔɔ kɔɔli o tuula  numndaŋ niŋ, a o kɛɛsiaala numndaŋ niŋ kpou ni. Te a keleŋa pɛ hei tosa o yoomu numndo niŋ, a cho keleŋa sina mɛɛ Chɛhowa cho num nɛi chɔmaa ke, mbo manda num, nduyɛ mbo dɔu num sala yɛ. Yiyaŋndɔ a silala kɛndɛla o cho num kioo sanaa o Diom ndɔɔ niŋndo. Nduyɛ tol silaa hoo kɔɔli, “Boondii ŋ cho feleŋgɔnɔ ve, loonuŋ a wana toosiaa numndo.”—Ikilisiaatii 12:​1.

¹⁸ Mi feleŋguaa keleŋa hindɔɔ nduyɛ ma simnuŋ kaasoŋnda. I cho suɛi imɔnɛ le sinaa maa, mi a bɔɔbɔɔ kel suei le mɛɛ nda kɛsi kpeleŋnda wɔɔŋndaŋ teleŋ nda wa feleŋguaa wo yɛ, ɔɔ le mɛɛ ndaa nɔ kpeleŋ kɛ kɛ le yɛ. Kɛ te a handu pɛ kɔllo o kpeleŋnda numnda iMɛlɛkayalaŋ choo, a cho wa a kɔl kɛndɛ le mɛɛ ŋ hɛli le keŋ tosaa teleŋ ŋ cho sulɔɔ kaasoŋnɔ wo yɛ. Lende Michana yiyaŋ ni. Teleŋ o wa kpasu wo, ndoo chaa bɔɔ pisulta yɛ yɛlaŋ tosaa. Mi ndoo sɔla pɛɛŋ veeloo le pisulta lɛŋii bɔɔbɔɔ chuuŋgiaŋ le tosaa laŋ. Kɛ, mbo hɛli le wali lɔɔlɔɔ Chɛhowaa tosaa. Le wɔsilaŋ niŋ hiouwɔɔ 30, o cho wɔ o wali teŋgeŋ lɔɔlɔɔ Mɛlɛkaa niŋ nda pɔnɔ ndɔ. Mbo dimi maa wanaa yeema tɔɔ bɛndoo, bɛɛle bɛnduleŋ, kpaayaa, a sullo wa sɔla kɔl kɛndɛ kpeekpeiyo le. Mbo dimi vɛlɛ maa kpeleŋnda sɔvɛlaŋ la cho Mɛlɛka piɛiyo, a waŋnda malaa ma sina ndu ni.

19. Le sabu yɛɛ o bɛnda yɛ ma handu kɔllo o kpeleŋnda iMɛlɛkayalaŋ choo te a wa pɛ feleŋgɔnɔɔ?

¹⁹ Nya feleŋguaa, la nɔ kɛsɛ mi la sɔla chandɔɔ kanifuule, mi che bɛɛ sɔɔŋ kala kalaŋ cho nya komallo, la cho kɔllo handɔɔ o Chɛhowa piɛiyo choo. La kɛsi kpeleŋnda iMɛlɛkayalaŋ, nduyɛ mi la cha wali dimiaa yooŋgu kɛndɔɔ nyɛ sɔvɛ sɔviɔɔ o yoomula nyalaŋ niŋ. Vɛlɛ, la chɛl mi chieeŋndo tosa le mi la puɛɛnuŋ kpeleŋnda nyalaŋ te. La nɔ tiindaŋndo maa wali nya kala kalaa cho fondo fuu le. La nɔ puaapiliaa a ndepiliaa kaala nya nduyɛ ma wa nya tooloo wa. Lelaŋ, “te a wa nyɛ o nyɛ tosa pɛ, mal Mɛlɛka Yaawɛɛ o ba, o nɔla mbo tosa mi nyɛ o nyɛ kuɛ o kɛndɛ.”