1, 2. (a) Yɛɛ waŋnda cho yɛ tosaa le hɛnɛkɛyɛi sɔlaa? (b) Fulamakɔɔli yɛɛ hei hiŋ yɛ?

HAU, mi wanaa bɔɔbɔɔ o fondaŋndaŋ lapum o chieeŋndo choo soo le dilaŋ sɔlaa a hɛnɛkɛyɛi. Apum yeema ma sɔla hɛnɛkɛyɛi le biyɔɔ lakafa nda cho nda wo, hɛli nda cho nda wo, a kuɛi nda cho niŋnde. Acheleŋnda cho nyunaa le ma ke nda hɛnɛkɛyɛi le dimioo nyɛ nda yeema wo, hɛlioo nyɛ nda yeema wo, a tosaa nyɛ nda yeema o yoomu ndaa niŋndo. Waŋnda ba o ba fee yeema ma wa hɛnɛkɛ.

² Mi waŋnda kɛɛsiaa le sɔŋgɔlaŋ mɛlioo le hɛnɛkɛyɛi sɔlaa. Kɛ ma sɔla pa kpeekpei nyɛ nda yeema wo? Sako. Fulamakɔɔlioo cho ni, saŋgaa cho chɔɔloo kuiyo, nduyɛ piɔmndaŋ bɛɛ. Nyɛ Masaa Sɔlɔmɔŋ dimi o Ikilisiaatii 8:​9 wo cho tonya. “Waŋnda apum a nɔ kpaayalaŋ, mi waŋnda a wa nda saŋgaa o ba bɛŋgu.”

3. Yɛɛ naŋ nɔ yɛ miŋ tosa le kɔl kɛndɛ kpeekpeiyo a kɔl hiniaa sɔlaa?

³ Baabuiyo dimul naa nyɛ naŋ nɔ miŋ tosa le kɔl kɛndɛ kpeekpeiyo a kɔl hiniaa sɔlaa wo. Mi buɛi Chiisoo Chemisi dimi aa, “Kɛ wana pɛɛku yooŋgoo hoo nyɛ kɛndɛi yo, nduyɛ mbo hiou  lachi a nyɛ o dimi wo tosaa wo, . . . salaa Mɛlɛka duau ndu le ndu tosaa ni.” (Chemisi 1:​25) O Chɛhowa lo yooŋgu walaŋ koŋ fula ni. Nduyɛ o sina nyɛ naŋ yeema le nyaale kpeekpeiyo sɔlaa a kɔl hiniaa wo. Mi Chɛhowa ke Adam nda Ifi hɛnɛkɛyɛi kpeekpeiye, a nyɛ o nyɛ ndaa hau ba le waa a kɔl kɛndɛ.

4. Hɛnɛkɛyɛi kuɛɛ Adam nda Ifi ndaa nɔ yɛ? (Tofa fotueiyo o peele naŋ kandu leŋ choo.)

⁴ Te ŋ veelu pɛ diomndaŋ o Chɛnɛsee bolleŋ 1 a 2, miŋ pɛɛku maa luaŋ koni waŋnda sɔl hau a hɛnɛkɛyɛi Adam nda Ifi ndaa nɔ ve ni. Ndaa nɔ nyɛ o nyɛ nda hau ba, siooŋii ve nda le nyɛ o nyɛ le, nduyɛ wana o wana ndoo tosal nda lakafa le. Ndaa nɔ buulaŋ nyɛdiaa le, buulaŋ wali le, buulaŋ naa, ɔɔ piɔm te. (Chɛnɛsee 1:​27-29; 2:​8, 9, 15) Kɛ baa hɛnɛkɛyɛi ndɛi ndii nɔ kpeleŋ te? Ŋ tofaŋndɔ.

5. O fulawɔ o yiyaŋnda wanaa bɔɔbɔɔ kɔɔli, yɛɛ waŋnda hau yɛ ba le hɛnɛkɛyɛi sɔlaa?

⁵ Wanaa bɔɔbɔɔ yiyaŋ maa hɛnɛkɛyɛi kpeekpeiye sɔlaa cho ni, a nɔla ma tosa nyɛ o nyɛ nda yeema pɛ, nduyɛ buulaŋ ve nda le fulamakɔɔlilaŋ sɔlaa le. Yau wo hoo The World Book Encyclopedia dimi maa hɛnɛkɛyɛi cho “suliŋndo nɔɔ le chuaŋ chuaa tosaa, a nyɛ ŋ hɛli wo tosaa ni.” Kɛ, mi yau koŋ dimi vɛlɛ maa mi waŋnda nɔ hɛnɛkɛyɛi, te masaa waa kɛsul nda kpeleŋnda lakafalaŋ te, kpeleŋnda yeemaŋ te laŋ, ɔɔ la bɛnda le laŋ. Hoo sim ni maa kpeleŋndaŋ lapum la yeemaŋ le halikpeŋ mi wana o wana wa hɛnɛkɛ. Kɛ nɛɛnɛ nɔ yɛ dioo le kɛɛsiaa kpeleŋ nɔ lakafa le wo, o yeemaŋndo, a o bɛnda wo?

6. (a) Le yɛɛ naŋ dimi yɛ maa Chɛhowa ndupilɛ kpe nɔ hɛnɛkɛyɛi nɔ la kpeleŋ te ve ni? (b) Hɛnɛkɛyɛi suu kuɛɛ waŋchieeya nɔ yɛ, nduyɛ le sabu yɛɛ?

⁶ I cho suɛi sɔvɛ le miŋ loonuŋ maa Chɛhowa ndupilɛ kpe nɔ hɛnɛkɛyɛi nɔ la kpeleŋ te ve ni. Le sabu yɛɛ? Kanifuule, ndu toosiaa nyɛ o nyɛ fee ni, nduyɛ ndu cho Masa kpaaya kpou kpou wo le chieeŋndo ni. (Timoti Tasoo 1:​17; Sɔɔŋ Chɔɔmaŋndoŋ 4:​11) Masaa Deeve soliŋ diomnda kɛndɛ kɛndɛlaŋ kpeku le foofo Chɛhowaa tɛɛsiaa. (Nuawɔ Koloniko Tasoo 29:​11, 12.) O baa pilɔɔ choo, hɛnɛkɛyɛi nyaa yoomaa kpou o choo choo niŋ a o lɛŋndeŋ choo nɔ kpeleŋndaŋ. A nɔ hɛnɛkɛyɛi pilɛ a Mɛlɛka le. Chɛhowa Mɛlɛka yeema naa miŋ nɔ sinapɛŋgoo maa ndupilɛ kpe nɔ dioo ni le kɛɛsiaa kpeleŋnda nɔ lakafa le laŋ, la yeemaŋ ndaŋ, a la bɛnda laŋ. Chɔŋ o kandɔŋndo, mi Chɛhowa kɛsi kpeleŋndaŋ le nyɛm o toosiaa woŋ.

7. Sɔɔŋ kuɛɛ naŋ tosa yɛ miŋ ke naa nyaaloo?

⁷ Adam nda Ifi wa bɔɔ hɛnɛkɛ. Kɛ a koŋ kpou, hɛnɛkɛyɛi ndɛi ndii nɔ kpeleŋndaŋ. Kpeleŋndaŋ lapum wa o dialuŋ ndaŋ niŋ. Le taamaseliiyo, le waa achal, le yoomoo, a le luaŋ. Baa koŋ sim ni maa a ve hɛnɛkɛ le? Sako. Mi Chɛhowa tosa pɛɛŋ a sabu le ma wa a kɔl kɛndɛ nduyɛ ma nɔ kɔl hiniaa o sɔɔŋ muŋ tosaa niŋ. (Sam 104:​14, 15; Ikilisiaatii 3:​12, 13) Mi naa kpou tuei hueiyii kɛndɛi yeela, nyɛdiaa naŋ hɛnaŋndo dioo, a lɔma kɛndiaŋ tueiyɔɔ yeela. Nyɛ o nyɛ kuuna naa sɔɔŋ muŋ tosaa le. Nduyɛ lende koni Adam nda Ifi bɛɛ wa ni.

8. Sawa kpeekpei kuɛɛ Mɛlɛka ndoo ke yɛ Adam nda Ifi, nduyɛ le yɛɛ?

⁸ Mi Chɛhowa ke Adam nda Ifi sawa teŋgeŋndo. Mbo dimul nda le ma velu chuauwa, ma pei chieeŋndo, nduyɛ ma manda ndu. (Chɛnɛsee 1:​28) Baa sawaa hoo ndoo faŋga pa hɛnɛkɛyɛi ndɛi? Sako bɛɛ! Mi hei ke nda fondaa le ma siiŋguu chieeŋndo kpede kpele hɛnɛkiɔɔ. Le mi ndaa siiŋguu ndu foŋndaŋ ndaa nɔla ma wa achal lefafɛɛŋ a chuauwaa ndaa walaŋnda wo. Sabu Mɛlɛkaa wa hoo ni. (Aisaya 45:​18) Hau, te waŋnda  kɛɛsiaa pɛ le kiɔɔ nɔɔ chuaa ɔɔ chuauwa violɔɔ, keŋ chɔm naa maa a cho kiɔɔ Mɛlɛka diikɔŋndo le. Mi che bɛɛ mi hei hiŋ a bahawɛilaŋ lapum, kɛ mi waŋnda chua nɔɔ nduyɛ ma velu chuauwa. (Kɔliŋtiaŋ Tasoo 7:​8, 9) Le sabu yɛɛ? Kanifuule, a cho lehɔl o nɛi le nyaaloo a kɔl hiniaa sɔlaa (Sam 127:​3) Te Adam nda Ifi ndaa tuei Chɛhowa diom pɛ, a wa nɔ ndaa a yuŋgu ndaa tueiyɔɔ yeela lefafɛɛŋ.

9. Le yɛɛ sawa Mɛlɛkaa o Chɛnɛsee 2:​17 niŋ ndoo nɔ yɛ lakafa le, ndoo yeemaŋ yɛ, ɔɔ ndoo bɛnda yɛ?

⁹ Mi Chɛhowa ke Adam nda Ifi sawa cheleŋ nduyɛ mbo dimul nda kpendekele fulama-kɔɔli nda wa sɔla wo te ndaa kɛɛ pɛ sawa koŋ diikɔŋndo. Mbo dimi aa, “Kɛ yɔm komɔɔ ndɔɔ tosa mi wana sina suɛi wɔɔŋnde a i kɛndɛi yo, dia ndu le pa. O paaleŋ niŋ bɛɛ te a de ndu pɛ a vi.” (Chɛnɛsee 2:​17) Baa sawa lakafaa wa hoo ni, o ve nyɛ yeemaŋ te, ɔɔ ndoo bɛnda le? Baa mbo faŋa pa hɛnɛkɛyɛi Adam nda Ifi ndaa nɔ ve? Sako. Nduyɛ pɛɛŋ, wanaa bɔɔbɔɔ pɛɛku a Baabuiyo okɔɔ wa yiyaŋ maa sawa Mɛlɛkaa hoo wa bɔɔ suɛi taasi nduyɛ kɔl kaloo wa leniŋ. Mi opilɛ o nda tɛɛŋ dimi maa sawa koŋ pɛɛku naa maa “Mɛlɛka ndu pilɛ kpe sina nyɛ bɛnda . . . le waŋchieeya wo ni, nduyɛ Mɛlɛka ndu pilɛ kpe sina nyɛ bɛnda . . . le nda le wo ni. Le ma tuei o ‘kɛndɔɔ’ yeela, waŋchieeya nɔ ma tiindaŋ o Mɛlɛka niŋ nduyɛ ma diikuŋ ndu. Te a kɛɛ ndu diom pɛ, a cho kɛɛsiaa a ba nda nyɛ bɛnda wo . . . a nyɛ bɛnda le wo.” I cho bɔɔ suɛi kala le mi waŋchieeya tosa keŋ a ba nda.

10. Le yɛɛ hɛnɛkɛyɛi nɔɔ cho yɛ nyɛ pilɛ a dioo nɔɔ le kɛɛsiaa nyɛ bɛnda wo a nyɛ bɛnda le wo le?

¹⁰ Mi waŋnda apum yiyaŋ lepum maa Chɛhowa ke Adam hɛnɛkɛyɛi le tosaa nyɛ ndoo yeema wo le. Kɛ, a dema le ndi biyɔɔ bila maa hɛnɛkɛyɛi, ɔɔ dioo nɔɔ le hɛlioo nyɛ ŋ nɔ ma tosa wo, cho nyɛ pilɛ a dioo nɔɔ le kɛɛsiaa nyɛ bɛnda wo a nyɛ bɛnda le wo le. Adam nda Ifi ndaa nɔ hɛnɛkɛyɛi le chuaŋ chuaa tosaa le ma diikuŋ Mɛlɛka ɔɔ ma kɛɛ ndu diikɔŋndo. Kɛ Chɛhowa kinɛi nɔ dioo ni le kɛɛsiaa nyɛ bɛnda wo a nyɛ bɛnda le wo ni. “Yɔm komɔɔ ndɔɔ tosa mi wana sina suɛi wɔɔŋnde a i kɛndɛi yo” chɔm Adam nda Ifi tonya koŋ ni. (Chɛnɛsee 2:​9) O cho lɔɔlɔɔ le naŋ nɔla miŋ sina fulamakɔɔli chuaŋ chua naŋ tosa wo chuu naa wo le. Nduyɛ o kpeekpei niŋ, ŋ nɔla miŋ sina te fulamakɔɔlilaŋ la cho wa lɔɔlɔɔ la kɛndɛ le. Nyɛ koŋ naŋ cha lɔɔlɔɔ waŋnda chuaŋ chuaa ɔɔ kɛɛsiaalaŋ tosaa a yiyaŋnda kɛndɛlaŋ ni, kɛ fulamakɔɔlioo cho saŋgaa, ɔɔ kpundɔɔ ni. (Pulɔwaa 14:​12) A tonya, waŋchieeya nɔ kpeleŋndo o nyɛ nda nɔla tosaa wo niŋ. Mɛɛ Chɛhowa ke Adam nda Ifi sawaa maa a dia komɔɔ yɔmndo le, pɛɛkoo o wa nda koŋ ni maa a nɔ ma diikuŋ ndu le ma sɔla hɛnɛkɛyɛi kpeekpeiye. Yɛɛ Adam nda Ifi ndaa kɛɛsiaa yɛ le tosaa?

11, 12. Le yɛɛ chuaŋ chua Adam nda Ifi tosa wo chuu yɛ nda kpundɔɔ? Chɔmndɔ taamaseliiyo.

¹¹ I cho suɛi kɔl tambɛi le sinaa maa mi Adam nda Ifi hɛli le kiɔɔ Chɛhowa diikɔŋndo. Mi Ifi hɛli le Setana nilaŋ yaŋɔɔ mɛɛ o chua buŋgɛi aa, “Hɔlta nyalaŋ la cho kumbiŋ nduyɛ, mi la sina suɛi kɛndɛi a i wɔɔŋnde pɛŋgu maa Mɛlɛka pila.” (Chɛnɛsee 3:​5) Baa mi  chuaŋ chua Adam nda Ifi tosa wo chɔɔlu nda hɛnɛkɛyɛi ke, a mɛɛ Setana ndoo dimul nda yɛ? Sako bɛɛ. Ma saaluŋ pɛɛŋ maa nɛi chɔmaa Chɛhowaa kiɔɔ chuu wana kpundɔɔ. (Chɛnɛsee 3:​16-19) Le yɛɛ? Kanifuule, Chɛhowa ke waŋchieeya hɛnɛkɛyɛi le mi ndapila kɛɛsiaa nyɛ bɛnda wo a nyɛ bɛnda le wo le.—Nuawɔ Chɛluimaya 10:​23, NW; Pulɔwaa 20:​24.

¹² Ŋ tuu hei a wana kua a dɛndɛ choo wo. Le mbo fuuluu naa o cho kɔlaŋ nda o kɛndiaa niŋ, o nɔ mbo tol nɛi bɛnda wo kɔɔli, mbo soliŋ nyɛm cho o dɛndɛ koŋ niŋ le ndu nɛiyo chɔmndo woŋ kpeku, nduyɛ mbo wa suukaŋndo a wanaa yɔŋgu nɛi chɔmaa le nyɛm nyaanaŋndoŋ nda. Kɛ te wana kua a dɛndɛ choo wo kɛɛ le nɛila chɔmaa laŋ ndaŋ tolɔɔ kɔɔli pɛ, nduyɛ mbo kuɛ naa o yeema wa pɛ, hei huŋ a kpundɔɔ. Maa wana kua hoo a dɛndɛ choo wo, Adam nda Ifi ndaa yeema ma tosa sɔɔŋ o nɛi ndaa choo. Ma kɛɛ nɛi chɔmaa Mɛlɛkaa. Yɛɛ wa yɛ fulamakɔɔlioo? Kpundɔɔ! Mi kɛɛsiaa ndaa luei nda, a chuauwaa ndaa wa violɔŋ o nda kɔɔli wa kpou o hakioo niŋ a piɔmndo. (Luomaŋnda 5:​12) Adam nda Ifi ndaa nɔ ma soliŋ hɛnɛkɛyɛi kpeku le kɛɛsiaa a ba nda nyɛ bɛnda wo a nyɛ bɛnda le wo le. Kɛ mi hɛnɛkɛyɛi kpeekpei Chɛhowa ndoo ke nda ve hialuŋ nda.

13, 14. Vɛɛ naŋ looku yɛ hɛnɛkɛyɛi kpeekpeiye sɔla?

¹³ Waŋnda apum yiyaŋ maa te ŋ nɔ pɛ hɛnɛkɛyɛi nɔ kpeleŋ te ve, nyɔɔ bɛnda bɔɔ. Kɛ tonya pa keŋ cho ni? Mi che bɛɛ waa hɛnɛkɛ nɔ tɔnɔlaŋ tau, kɛ yiyaŋndɔ a mɛɛ chieeŋndo ndoo wa niŋ yɛ, te kpeleŋnda laa ve kposoŋ  te. Yauwo hoo The World Book Encyclopedia dimi maa sawalaŋ le kɔɔna kɛ kɛ kendu bɔɔ kanifuule, la nɔ mi la manda waŋnda, nduyɛ o baa pilɔɔ choo, mi kpeleŋndaŋ la wa le hɛnɛkɛyɛi ndɛi. Hei ve lɔɔlɔɔ tɛtɛlɛ le. Le sabu koŋ naŋ cha sawala bɔɔbɔɔ ni, wanaa suaa le waŋnda o lemasa wa, a wanaa kialaa ŋyamaa ni. Nduyɛ ma kindiŋ le sawalaŋ ndaŋ tɛɛsiaa a laŋ dɔwɔɔ o wali niŋ.

¹⁴ Mi Chiisu tɛɛsiaa mɛɛ naŋ sɔla hɛnɛkɛyɛi kpeekpeiye yɛ. Mbo dimi aa, “Te la hiou lachi a nyɛ ya I pɛɛku nya wo tosaa pɛ, mɛɛ buɛiyaa niaa nya cho lekɛndɛi ni. La cho tonya cho a Mɛlɛka okɔɔ wo sina, nduyɛ, mi tonya koŋ o baŋa nya” (Chɔŋ 8:​31, 32) Lelaŋ, le hɛnɛkɛyɛi kpeekpeiye sɔlaa, ŋ nɔ miŋ tosa sɔɔŋ ŋmuuŋ. I tasei, ŋ nɔ miŋ chɛl tonya Chiisu pɛɛku wo. O diiŋ ndɔɔ, ŋ nɔ miŋ simnuŋ buɛiyaa nduaa. Sɔɔŋ muŋ tosaa ke naa hɛnɛkɛyɛi kpeekpeiye ni. Kɛ kuɛɛ naŋ sɔla yɛ hɛnɛkɛyɛi? Mi Chiisu dimi aa, “Wana o wana tosa yɔŋ wɔɔŋndo pɛ, mɛɛ chiɔɔ o cho yɔŋ wɔɔŋndo o ba bɛŋgu ni.” Mbo dimi vɛlɛ aa, “Te Po Mɛlɛkaa baŋa num pɛ, mɛɛ a sɔla baŋaŋndo lekɛndɛi.”—Chɔŋ 8:​34, 36.

15. Le yɛɛ hɛnɛkɛyɛi Chiisu dimul buɛiyaa nduaa le sɔlaa ve tosa yɛ miŋ “sɔla baŋaŋndo lekɛndɛi”?

¹⁵ Hɛnɛkɛyɛi Chiisu dimul buɛiyaa nduaa maa a cho sɔla ve cho bɔɔ i sɔvɛ mbo hiau hɛnɛkɛyɛi wanaa bɔɔbɔɔ yeema hau ve. Mɛɛ Chiisu dimi aa, “Te Po Mɛlɛkaa baŋa num pɛ, mɛɛ a sɔla baŋaŋndo lekɛndɛi,” a chɛle naŋ cho hakioo o ba bɛŋgu leŋ o wa suɛi ni, chɛle wɔɔŋ wɔɔŋnde waŋchieeya cho le bɛŋgu kani masindɛ leŋ. O nɛi kuɛɛ choo naŋ cho yɛ chiaa hakioo o ba bɛŋgu? Mi hakioo luei naa balaŋ o sɔɔŋ wɔɔŋndoŋ tosaa niŋ. Mbo kuuna naa vɛlɛ le nyɛ naŋ sina maa o kɛndɔɔ wo  tosaa, ɔɔ le sɔɔŋ tosaa a mɛɛ naŋ tiuba yɛ. Nduyɛ fulamakɔɔlioo cho kɔl tambɛiyo, nyɛ nɛiyaa, a saŋgaa ni, nduyɛ o mɛɛlulaŋ kpɔŋ, piɔmndo. (Luomaŋnda 6:​23) Mi Pɔɔl, wana Chiisu vem hɔlte ndɔ wo sinaŋ nyɛ nɛiyaa chɛle hakioo ke wana leŋ. (Nuawɔ Luomaŋnda 7:​21-25.) Mɛɛ mi hakioo faŋaŋ feu malaŋ naŋ sɔla hɛnɛkɛyɛi Adam nda Ifi ndaa nɔ o tase ndɔ wo.

16. Vɛɛ naŋ cho yɛ baŋaŋndo sɔla lekɛndɛi?

¹⁶ Nyɛ Chiisu dimi maa “te la hiou lachi a nyɛ ya I pɛɛku nya wo tosaa pɛ” chɔm maa te ŋ yeema pɛ mi Chiisu baŋa naa, ŋ nɔ miŋ tosa sɔɔŋ pum. Sɔɔŋ yɛɛ? Maa Kilisiɔŋaa yɔŋguŋ o Mɛlɛka lo wa, ŋ nɔ miŋ kɛɛ hɛnaŋ kɔl naa tosaa, nduyɛ miŋ hɛli le chɛlɔɔ kpeleŋnda Chiisu kɛsul buɛiyaa nduaa laŋ. (Maatiu 16:​24) A mɛɛ Chiisu dimi yɛ, ŋ cho sɔla baŋaŋndo lekɛndɛi o chilaŋ niŋ, te ŋ sɔla pɛ tɔnɔla sala baŋaa kpou.

17. (a) Vɛɛ naŋ looku yɛ nyaale kpeekpeiyo a kɔl hiniaa sɔla? (b) Yɛɛ naŋ cho yɛ pɛɛku o buŋgɛi cho lachi ve niŋ?

¹⁷ Le nyaaloo sɔlaa a kɔl hiniaa, ŋ nɔ miŋ diikuŋ pɛɛkula Chiisulaŋ maa buɛiyaa ndɔ. Te ŋ tosa hei pɛ, ŋ nɔla kɛsɛ miŋ sɔla baŋaa o chɛle hakioo a piɔmndo ba bɛŋgu. Mi Pɔɔl dimi aa, “Wanaa cho haa o diom pilɔɔ niŋ nda Chiisu Kiliti waa wa, Mɛlɛka kilul lɛ nda iyama mbo tusi nda nyɛ palaa choo le. Kani fondole, te I wa o diom pilɔɔ niŋ a Chiisu Kiliti pɛ, koŋ tosa mi wa o ba Nyina Mɛlɛkaa bɛŋgu, o ke ya yoomoo wo. Waa o ba Nyina . . . Mɛlɛkaa bɛŋgu, o baŋa ya mbo soli ya naa ya I wa yɔŋ wɔɔŋndo a piɔmndo o ba bɛŋgu wa.” (Luomaŋnda 8:​1, 2, NW; nuawɔ Luomaŋnda 8:​20, 21.) O buŋgɛi cho lachi ve niŋ, ŋ cho pɛɛku mɛɛ naŋ soliŋ hɛnɛkɛyɛi naŋ nɔ suŋ suŋ nde kpeku a taasi yɛ. Okoŋ, ŋ nɔla miŋ ke Chɛhowa bɛɛleŋ lefafɛɛŋ, Mɛlɛka nɔ hɛnɛkɛyɛi kpeekpeiye wo.