1. Le yɛɛ Pɔɔl, wana Chiisu vem hɔlte ndɔ wo dimullɛ Kilisiɔŋaa Hibuluiya le chɔɔloo kɔltaŋ dɛɛniaŋndo vellaa velle?

O WƆSIŊ kɛmɛ tasoŋ niŋ, mi Pɔɔl, wana Chiisu vem hɔlte ndɔ wo ke Kilisiɔŋaa Hibuluiya silaa aa, “La ŋ nuuviaŋ nɛila naa ŋ nɔla mi ŋ kpeeŋiaa chaaŋaa naa vellaa velle le waŋnda kaalaa a sɔɔŋ kɛndɔŋ tosaa laŋ. La ŋ malnuŋ chuuŋgiaŋndo diompilɛ mɛɛ waŋnda a pum a nɔ kaa a chɛl le hunɔɔ o bɔŋaŋ niŋ te yɛ le. Kɛ, la ŋ dɛɛniaŋ vellaa velle a tiindaŋ naa ŋ nɔ o Mɛlɛka niŋndo okɔɔ. Taama nya pila la cho niŋ chɔɔ maa paale Masanɔɔ nɔ le mii-ŋgoo naŋ ndeŋ le cho niŋ kpɛɛluŋ.” (Hibuluiya 10:​24, 25) Naapum mi kɔndɔfillo bii puaapiliaa le sabu Pɔɔl dimul nda le chɔɔloo kɔltaŋ dɛɛniaŋndo vellaa velle wo. O fuuluu bɛɛ wɔsiŋ ŋuɛɛnu okoŋ kɔɔli le, mi saboo opilɛ chɔmnuŋ kpendekele. A boondii keŋ, ma cha maa paale kpundɛle Chɛhowa dimi le Chulusɛlɛm ndeŋ le wa niŋ kpɛɛluŋ. Ma sina maa a nɔ ma mal chioo ma nyaanuŋ a mɛɛ Chiisu dimul nda yɛ. (Luku 21:​20-22;  Walta Wanaa Chiisuaa 2:​19, 20) Mi paale Chɛhowa le leŋ le fuuluu o wɔsi 70 niŋ, teleŋ Luomaŋnda tɛɛmbuu Chulusɛlɛmndo.

2. Le sabu yɛɛ naŋ nɔ yɛ miŋ chɔɔlu yiyaŋ hau le kɔltaŋ dɛɛniaŋndo vellaa velle?

² Hau, naa bɛɛ cho o bahawɛi pilɛ koŋ niŋ kpe. “Paale Mɛlɛka Yaawɛɛ leŋ le cho paale kpundɛ le bɛndu.” Nduyɛ le cho niŋ kpɛɛluŋ. (Chowɛɛ 2:​11) Diomnda Sɛfanaya laŋ, wana ndoo suaa le Mɛlɛka wo bɛɛ la cho vɛlɛ le palɛi nɛi hei. “Paale Mɛlɛka Yaawɛɛ o kɔɔsa niŋ a waŋnda leŋ, le cho niŋ kpɛɛluŋ. Nduyɛ le cho hunɔɔ chɔchɔ.” (Sɛfanaya 1:​14) Le saboo hoo, ŋ nɔ miŋ ‘nuuviaa nɛila naa ŋ nɔla mi ŋ kpeeŋiaa chaaŋaa naa vellaa velle le waŋnda kaalaa a sɔɔŋ kɛndɔŋ tosaa laŋ.’ (Hibuluiya 10:​24) Ŋ nɔ miŋ chɔɔlu yeemɛi chɔm o puaapiliaa naa niŋ, le halikpeŋ miŋ dɛɛniaa nda kɔltaŋ a boondii nda yeema kɔl dɛɛniaa ve.

3. Yɛɛ Pɔɔl, wana Chiisu vem hɔlte ndɔ wo dimi yɛ a kɔl dɛɛniaa okɔɔ? (Tofa fotueiyo o peele naŋ kandu leŋ choo.)

³ “Buulaŋndo wolɔɔla lusulɛila bɛndulaŋ pila o cho ni. Kɛ diomnda kɛndɛlaŋ ndaŋ ndaŋ, le teleŋ o teleŋ, kɔllo la nyɔɔlu wana ni.” (Pulɔwaa 12:​25) Mi naa kpou yeema kɔl dɛɛniaa teleŋndaŋ lapum. Mi Pɔɔl chɔm ndi kpendekele maa wanaa nɔ kalaŋndo le acheleŋnda kɔltaŋ dɛɛniaa wa bɛɛ yeema kɔl dɛɛniaa. Mbo poonyial puaapiliaa nduaa Luom aa, “Yeemɛi cho ya kpeekpei le nya chɔɔ le hali kpeŋ, mi I tosa mi la sɔla nyɛm Nyina . . . Mɛlɛkaa o ke wana laalaŋndo woŋ, le mi la sɔla kpaayaa. O cho yɛ ko nya le, kɛ nya ni a ya, mi ŋ maaliaŋ vellaa velle. Tiindaŋ nya nɔ o Chiisu niŋ ndo, ndu luei ya kpaayaa ni. Nduyɛ tiindaŋ ya bɛɛ ya I nɔ o Chiisu niŋ ndo, ndu luei nya kpaayaa ni.” (Luomaŋnda 1:​11, 12) Lelaŋ Pɔɔl, wana Chiisu vem hɔlte ndɔ wo bɛɛ ndoo yeema kɔl dɛɛniaa teleŋndaŋ lapum.—Nuawɔ Luomaŋnda 15:​30-32. *

4, 5. Nɛɛ yaa naŋ dɛɛniaa yɛ hau kɔltaŋ, nduyɛ le sabu yɛɛ?

⁴ Hau, ŋ dɛɛniaa wanaa cho o wali teŋgeŋ lɔɔlɔɔ Mɛlɛkaa niŋnda kɔltaŋ, mɛɛ kɔɔfaa cho loo o tiindaŋ ndaa choo wa cho nuaa yɛ. A bɔɔbɔɔ mal nyɛm nda wa tueiyɔɔ yeela o yoomu ndaa niŋndoŋ le halikpeŋ ma tosa kɔɔfaleŋ. Hei cho vɛlɛ tonya a misiɔnalueiya, Bɛtɛlaitiiya, buɛiyaa ibuŋgaa a laandaa ndaa, nduyɛ a wanaa cho wallo o fondaŋ hiviaa cho landaŋ a lɛuve wo. Nda kpou soliŋ sala tau le teleŋndo chɔɔloo soliŋndo kpeku o Mɛlɛka piɛiyo niŋ. Lelaŋ, ŋ nɔ miŋ dɛɛniaa nda kɔltaŋ. A bɔɔbɔɔ nɔ wɔ yeemɛi le mi ndaa wa o wali lɔɔlɔɔ Mɛlɛkaa niŋ, kɛ a nɔla lɛ le. Nda bɛɛ ma naŋ kɔl te a sɔla pɛ kɔl dɛɛniaa.

⁵ Nɛɛ yaa nɔ yɛ vɛlɛ ma sɔla kɔl dɛɛniaa? Ŋ nɔla miŋ dɛɛniaa puaapiliaa a ndepiliaa bɔɔbɔɔ hɛli le loo yembu haaa ma chal o nɔɔ niŋ a “wana laalaŋndo” wo. (Kɔliŋtiaŋ Tasoo 7:​39) Mi laanduaa sɔla kɔl dɛɛniaa te piaandaa ndaa dimul nda pɛ maa a kaala nda, nduyɛ maa a naŋ kɔl le nyɛm nda cho tosaa woŋ kpou. (Pulɔwaa 31:​28, 31) Kilisiɔŋaa cho tɔɔndaŋndo biuwɔŋndo ɔɔ ma wa a naalaŋ nda bɛɛ yeema kɔl dɛɛniaa. (Tɛsaloniaŋ Diiŋ Ndɔɔ 1:​3-5) Chɛhowa nda Chiisu cho wanaa laalaŋnda haa kpou kɔltaŋ dɛɛniaa.—Nuawɔ Tɛsaloniaŋ Diiŋ Ndɔɔ 2:​16, 17.

6. Yɛɛ naŋ pɛɛku yɛ a wali bɛnduaa tosa wo okɔɔ o Aisaya 32:​1, 2?

⁶ Nuawɔ Aisaya 32:​1, 2. O teleŋ kala kalaa niŋ naŋ cho ni, nduyɛ o wa tɛtɛlɛ le miŋ tambu kɔl. Chiisu cho hau “masaa” soliŋndo kpeku, nda cho yɛ bɛnduaa kundaa cho pɔmbuaa nduaa pɔyaŋnda a saa cheleŋnda tɛɛŋnda ni, le naa kɔltaŋ dɛɛniaa. O cho “a kaka” le bɛnduaa haa cho naa chɔmndo mɛɛ tiindaŋ naa nɔ le waa yɛ le, kɛ a cho ‘wallo a naa latulu’ le miŋ wa a kɔl kɛndɛ. A yeema ma mala naa le miŋ wa a kɔl kɛndɛ nduyɛ le loo o tiindaŋ naa choo.—Kɔliŋtiaŋ Diiŋ Ndɔɔ 1:​24.

7, 8. Vɛɛ bɛnduaa dɛɛniaa yɛ acheleŋnda kɔltaŋ a nyɛ nda dimi wo vɛlɛ a nyɛ nda tosa wo?

⁷ Bɛnduaa kundaa tual taamasi Pɔɔl, wana Chiisu vem hɔlte ndɔ wo kɔɔli, o ndoo kindiŋ lɔɔlɔɔ le puaapiliaa nduaa kɔltaŋ dɛɛniaa wo. Mbo poonyial Kilisiɔŋnda o Tɛsalonaika niŋ, a ndaa tusi tɔɔndaŋndo choo wa aa, “Le kaala naa ŋ kaala nya wo, o ve ko Yooŋgu Kɛndɛ Mɛlɛkaa le naa ŋ ke nya le. Yoomula naalaŋ bɛɛ ŋ wa a bɛɛndiaŋ le yɔŋgoo le nya. Kani fondole, ŋ kaala nya tau tau.”—Tɛsaloniaŋ Tasoo 2:​8.

⁸ Bɛnduaa nɔla ma dɛɛniaa acheleŋnda kɔltaŋ tau a nyɛ nda dimi wo. Kɛ baa keŋ cho pa lɔɔlɔɔ letuu? Mi Pɔɔl dimul bɛnduaa kundaa Ɛfisɔɔ aa, “I chɔm nya a nyɛ o nyɛ ya tosa, maa le mi ŋ nɔla le wanaa nɔ kpaaya tosaa nyɛ le wa malaa, mɛɛ mi ŋ tosa wallo lende o kala kala. Nduyɛ, ŋ loonuŋ diomnda Masanɔɔ Chiisu pila dimi laŋ. Mbo dimi aa, ‘Waŋndo nyɔɔ kioo ndu wana hiou salaa sɔla a waŋndo num nyɔɔ kioo.’” (Walta Wanaa Chiisuaa 20:​35) Pɔɔl ndoo nɔ yeemɛi le mbo ‘pisi nyɛ o nyɛ o nɔ’ nduyɛ le mbo “yɔŋguŋ kpou” le puaapiliaa nduaa malaa. Mbo chɔm o sɔɔŋ o tosa woŋ niŋ maa ndoo nɔ yeemɛi le nyɛ o tiuba wo tosaa le nda. (Kɔliŋtiaŋ Diiŋ Ndɔɔ 12:​15) O nɛi pilɛ koŋ choo bɛnduaa nɔ ma dɛɛniaa acheleŋnda kɔltaŋ ni, o cho ko a nyɛ nda dimi wo le, kɛ a nyɛ nda tosa wo. Hei chɔm kɛsɛ maa a buulaŋ a naa.—Kɔliŋtiaŋ Tasoo 14:​3.

9. Vɛɛ bɛnduaa yɔŋgu yɛ silaa o nɛi kɔl dɛɛniaa niŋ?

⁹ Le puaapiliaa yoomuaŋ lueiyo, lepum, bɛnduaa nɔ ma yɔŋgu silaa. Bɛnduaa nɔ ma pɛɛku o Baabuiyo niŋ le hei tosaa o nɛi kɔl dɛɛniaa niŋ. Mi Chiisu kɛsi taamasi kɛndɛ kɛndɔɔ a silaa yɔŋgoo okɔɔ mɛɛ o yɔŋ yooŋgulaŋ o kundalaŋ lo o Eesiaa Mainɔ niŋ o piɔm ndɔɔ a fulasɛiniŋ ndɔɔ kɔɔli. Mi ndoo ke kundaa Ɛfisɔɔ, Pɛkamɔm, a Tayatilua sila kala kalaa. Kɛ tuupa mbo ke nda silaa, mbo chandu nda fɛŋ le sɔɔŋ kɛndɛŋ nda wa tosaa woŋ kpou. (Sɔɔŋ Chɔɔmaŋndoŋ 2:​1-5, 12, 13, 18, 19) Mi Chiisu dimul kundaa Lawodisia aa, “Wanaa ya I kaala wa nda ya I suaa le nyɛ nda tosa wo ni, nduyɛ mi tusi nda nyɛ palaa choo. Lelaŋ, la landuŋ kɔl o suɛi Mɛlɛkɛi, nduyɛ mi la mal yɔŋnda nyala wɔɔŋndaŋ.” (Sɔɔŋ Chɔɔmaŋndoŋ 3:​19) Mi bɛnduaa naa kindiŋ le Kiliti tolɔɔ kɔɔli te a wa pɛ silaa yɔŋgoo.

10. Vɛɛ naa kpou lueiyaŋ yɛ yoomuaŋ vellaa velle?

¹⁰ O cho ko bɛnduaa le nɔ ma dɛɛniaa acheleŋnda kɔltaŋ te. Mi Pɔɔl dimul Kilisiɔŋnda kpou le ma soo “diomnda mala waŋnda laŋ.” (Ɛfisiaŋnda 4:​29) Wana o wana nɔ mbo sina nyɛ acheleŋnda hau ba wo le halikpeŋ miŋ mala nda. Mi Aisaya poonyiaa aa, “La mala wanaa nɔ kpaaya o kpaaya le wa, mi la luei nda yoomuaŋ.” (Aisaya 35:​3; Hibuluiya 12:​12, 13) Naa kpou nɔla miŋ lueiyaŋ yoomuaŋ vellaa velle nduyɛ miŋ dɛɛniaŋ kɔltaŋ a nyɛ naŋ dimi wo, o yɔŋ bɛɛ aa feleŋguaa naŋ cho ni.

11. Yɛɛ ndoo mala yɛ Mate teleŋ o wa a kɔl tambɛiyo wo?

¹¹ Ndepilɛnɔɔ diolaŋ Mate wa a kɔl tambɛiyo  le teleŋndo pum. * (Tofa tɛɛsiaa amatou.) Mbo poonyiaa aa, “Paale pilɛ, I wa piɛileŋ le kɔl dɛɛniaa sɔlaa. Miŋ chiikaŋ naa ndepilɛnɔ yuu ndoo chɔm ya kaala a nyiɛɛye wo, nyɛ yaa hau ba kɛsɛ a teleŋ koŋ ndo. Mi ndu bɛɛ dimul la suɛi yɔŋnaŋnde i nduɛi, i ndii velaŋ a bahawɛi nuu wo. Nduyɛ mi cha maa o cho yapilɛ le nɔ bahawɛi waa lende le.” Naapum ndepilɛnɔ koŋ ndoo sina dɔɔ mɛɛ diomnda ndɔlaŋ la mala Mate yɛ le!

12, 13. Vɛɛ naŋ duau yɛ sila cho o Filipiaŋnda 2:​1-4 wo o wali niŋ?

¹² Mi Pɔɔl poonyial Kilisiɔŋnda o Filipai niŋ aa, “Le cho nya cho o diom pilɔɔ niŋ a Kiliti wo, koŋ tosa ni mi la wa a dialluŋ kala. Nduyɛ kaala o kaala nya wo ndu dɛɛniaa nya kɔltaŋ ni. La cho o naaŋaŋndo niŋ a Nyina Mɛlɛkaa. Nduyɛ, la cho kɛndɛi tosalaŋndo mi la tuiinaŋ nyiɛɛye vellaa velle. Le hei, la nɔ yiyaŋ pilɔɔ, nduyɛ, mi la kaaliaŋ vellaa velle, mi kɔlta nyalaŋ la wa naa pilɛ kpe, nduyɛ, mi la nɔ yeemɛi pilɛi. Te la tosa lende pɛ, mɛɛ la nɛŋi ya kɔl chapo chapo. Wana o wana tosa isɔɔ o isɔɔ le num pilɛ dɛnɛ num kɛndɔɔ suee le. Nduyɛ, la tosa isɔɔ o isɔɔ le chɔmnɔŋ o ŋwaŋnda chiee lo le. La wa a tusiaŋ vellaa velle o chaaŋaa nyaa lo. Wana o wana ma chua bɛɛ chaaŋ num maa ndu hiou bɛnda a num. Nduyɛ, wana o wana o cho ko le dɛnɛ num kɛndɔɔ num pilɛ suee le ŋ landuŋ kɔl te. Nɔ kɔl landaŋndo le chaaŋnda bɛɛ dɛnɛ nda kɛndɔɔ.”—Filipiaŋnda 2:​1-4.

¹³ Naa kpou nɔ miŋ nuuviaa nɛilaŋ le maaliaŋndo vellaa velle. Ŋ nɔla miŋ dɛɛniaa puaapiliaa a ndepiliaa naa kɔltaŋ a kaalaa, buulaŋndo le nda, a nyiɛɛye nda tuiinɔŋndo.

14. Ɔɔ nɛiyo opilɛ le acheleŋnda kɔltaŋ dɛɛniaa?

¹⁴ Miŋ naŋ kɔl tau te ŋ tuei pɛ maa wanaa  naŋ mala o paandoo niŋnda cho hiouwɔɔ lachi a loo o tiindaŋ ndaa choo. Mi Pɔɔl, wana Chiisu vem hɔlte ndɔ wo poonyiaa aa, “Te I tuei pɛ maa, chuauwaa niaa o Kiliti niŋ a cho kɔlaŋ o tonya cho a Mɛlɛka okɔɔ wo choo, koŋ nɛŋi ya kɔl mbo hiou nyɛ o nyɛ.” (Chɔŋ Ŋgaa Ndɔɔ 4) Mi kɔɔfaa bɔɔbɔɔ naŋ kɔl tau te a tuei pɛ maa wana nda mala le tonyaa pɛɛkoo le teleŋ vilɛiyo cho wɔ hiouwɔɔ lachi a Chɛhowa piɛiyo a tiindaŋndo, kɛlɛŋgaa o cho pɛɛŋ kɔɔfaleŋ tosaa. Lelaŋ, te kɔɔfaa tambu pɛ kɔl, ŋ loonuŋ nda a sɔɔŋ kɛndɛŋ nda tosa le acheleŋnda malaa wo.

15. Yɛɛ naŋ nɔ yɛ miŋ tosa le wanaa cho Mɛlɛka piɛiyo a tiindaŋndo wa kɔltaŋ dɛɛniaa?

¹⁵ Buɛiyaa ibuŋgaa bɔɔbɔɔ a laandaa ndaa dimi maa, ma naŋ kɔl te a chii pɛ kundaa yilɔɔ ma sɔla yau balika melaa. Hei cho tonya le bɛnduaa, misiɔnalueiya, kɔɔfaa, a Bɛtɛlaitiiya bɛɛ, a cho hiouwɔɔ lachi a Chɛhowa piɛiyo wa, mi che bɛɛ a cho simultaŋ sɔlaa. Te ŋ mel nda balikaa pɛ, ŋ sina pɛɛŋ maa kɔllo le naŋ wa nda koŋ dɛɛniaa le.

16. Sɔɔŋ taaniŋ kuɛɛ dɛɛniaa yɛ acheleŋnda kɔltaŋ?

¹⁶ Kɛ te o wa yɛ maa i cho tɛtɛlɛ le acheleŋnda dimullo mɛɛ ŋ yiyaŋ a nda okɔɔ yɛ le? O kpeekpei niŋ, i cho tɛtɛlɛ le acheleŋnda kɔltaŋ dɛɛniaa le. Kindiŋ ma ke waŋndo hɔlaa mɛmɛlɛsɛɛ wa. Te nda ke num hɔlaa mɛmɛlɛsɛɛ wa le, kɛlɛŋgaa bahawɛiyo nda nɔ ni, ɔɔ a yeema ma dimul waŋndo isɔɔ. Naapum ma ke nda kɔl dɛɛniaa te a yaŋ nda nilaŋ pɛ.—Chemisi 1:​19.

17. Yɛɛ ndoo dɛɛniaa yɛ puaapilɛnɔ feleŋgɔnɔ pilɛ kɔllo?

¹⁷ Mi puaapilɛnɔ feleŋgɔnɔɔ diolaŋ Hɛŋli tambu kɔl tau mɛɛ wanayaŋ ndɔŋ ŋ bɔɔbɔɔ mal Chɛhowa piɛiyo. Waŋndo opilɛ o wanaa kaŋ  tɛɛŋ wa finya ndɔ ni, o wa bɛndu kundaa wo. Mi buɛi ibuŋgaa sina maa Hɛŋli wa a kɔl tambɛiyo nduyɛ mbo dimul ndu le ma kɔ kol kafioo. Mbo yaŋ Hɛŋli nilaŋ nyɛkɛndɛi mɛɛ o wa ndu yiyaŋ ndɔɔ dimullo. Mi Hɛŋli sina maa nɛi o looku yuŋgu ndɔɔ mala kinɛi le miiŋgoo o tonyaa niŋndo cho loo o tiindaŋ ndɔɔ choo ni. Mbo sɔla vɛlɛ kɔl dɛɛniaa mɛɛ o veelu diomndaŋ o Sam 46, Sɛfanaya 3:​17, a Maki 10:​29, 30.

18. (a) Yɛɛ Masaa Sɔlɔmɔŋ poonyiaa yɛ a kɔl dɛɛniaa okɔɔ? (b) Kɛɛsiaa kuɛɛ Pɔɔl, wana Chiisu vem hɔlte ndɔ wo yɔŋgu yɛ?

¹⁸ Yɛɛ nyɛ yɔŋnuŋ Mate nda Hɛŋli wo pɛɛku yɛ naa? Wana o wana nɔla mbo dɛɛniaa puaapilɛnɔɔ ɔɔ ndepilɛnɔ yeema kɔl dɛɛniaa wo. Mi Masaa Sɔlɔmɔŋ dimi aa, “Te waŋndo dimi nyɛ nɔ le dimiŋndo wo a teleŋ kpeekpeiyo pɛ, kɔllo pila o naŋ ni. Waŋndo mamɔɔ kɛndɔɔ naa num chua, mbo tosa ma naŋ kɔl. Nduyɛ yooŋgu kɛndɔɔ tueiyɔɔ, mbo tosa ma sɔla yoomuaŋ.” (Pulɔwaa 15:​23, 30) Yiyaŋndɔ a wana ŋ sina mbo wa a kɔl tambɛiyo wo. Vɛ a tosa nyɛ tɛtɛlɔɔ le wana koŋ te, mɛɛ diomndaŋ veeloo o Bandu Mɛŋgɛlaa niŋ ɔɔ tɛɛŋgii nɛi cho naa yɛ le? Mi Pɔɔl pɛɛku vɛlɛ maa chonduŋ leMasaŋ solioo diompilɛ tosa miŋ sinaŋ nyɛkɛndɛi. Mbo poonyiaa aa, “La pɛɛkaŋ vellaa velle mi la siiliaŋ [ɔɔ “dɛɛniaŋ,” NW] o nɛi o nɛi kɔl kalu niŋ. O koŋ kɔɔli, la soli chonduŋ cho o Yau ŋChondu Mɛlɛkaa niŋ ndoŋ, a chondoŋ a Chiisu okɔɔ, a chonduŋ Nyina Mɛlɛkaa duau nya o lakɔl loŋ. La mel Mɛlɛka balika o chondoŋ niŋ a kɔlta nyalaŋ kpou.”—Kolosiaŋnda 3:​16; Walta Wanaa Chiisuaa 16:​25.

19. Le yɛɛ kɔl dɛɛniaa cho yɛ suŋ suŋ chɔɔlu simnɔŋ nyɛ sɔvɛ, nduyɛ yɛɛ naŋ nɔ yɛ miŋ tosa?

¹⁹ Mɛɛ naŋ sɔɔŋguu o paale Chɛhowaleŋ ikɛi fau, lende koni i chɔɔlu simnɔŋ i sɔvɛ le kɔltaŋ dɛɛniaŋndo vellaa velle ni. (Hibuluiya 10:​25) Ŋ cho wa a nyaale te ŋ tol pɛ sila Pɔɔllo hoo kɔɔli, “La wa kɔltaŋ dɛɛniaŋndo vellaa velle. La wa maaliaŋndo vellaa velle le dialuŋ kalaŋ sɔlaa mɛɛ nya cho nuaa tosaa yɛ.”—Tɛsaloniaŋ Tasoo 5:​11.