1, 2. (a) Le yɛɛ waŋnda ndaa duau yɛ baltaŋ a chɛleŋ vɛlɛ a hɛnɛkɛyɛi okɔɔ o palɛi Pɔɔl, wana Chiisu vem hɔlte ndɔ wo niŋ? (b) Nɛɛnɛ Pɔɔl ndoo dimi yɛ maa ndu cho Puundule hɛnɛkɛyɛi kpeekpeiye ni?

KILISIƆŊAA tasiaa wa o Masale maLuomaŋnda bɛŋgu, naa waŋnda ndaa heeluŋ a sawalaŋ, sakpoyɛi, a hɛnɛkɛyɛi ndaa nɔ ve wa. Kɛ a koŋ fau, chiaa masale kpaaya le bɛndule leŋ lee tiindaŋ le walta kala kalala siaama tosaa ni. A boondei pum, o Masale maLuomaŋndo bɛŋgu, te num oo chɔm pɛ wanaa yaa kɛ kɛ, chiɔɔ opilɛ wa nda tɛɛŋ. Le hei, mi waŋnda ndaa dɔu baltaŋ tau a chɛleŋ vɛlɛ a hɛnɛkɛyɛi okɔɔ, nduyɛ Kilisiɔŋnda bɛɛ.

² Mi Pɔɔl, wana Chiisu vem hɔlte ndɔ wo ndoo poonyiaa daandi daandi a hɛnɛkɛyɛi okɔɔ. Kɛ o ve kindiŋ te o wa le bahawɛi chieeŋndo hoo solioo le, o wanaa bɔɔbɔɔ o teleŋ koŋ niŋ ndaa yeema le tosaa wo. Kɛ mi Pɔɔl a chaaŋaa nduaa Kilisiɔŋnda tosa wallo kekelee le waŋnda pɛɛkoo a yooŋgu kɛndɛ Masale Mɛlɛkaleŋ okɔɔ, nduyɛ le nda malaa ma bii bila mɛɛ sala baŋaa Chiisu Kilitioo wa nyɛ  sɔvɛ bɛndu yɛ. Mi Pɔɔl dimul chaaŋaa nduaa Kilisiɔŋnda naa nda nɔ ma saaluŋ Puundule hɛnɛkɛyɛi kpeekpeileŋ nda. Mbo poonyiaa aa, “Ba o ba Masanɔɔ Mɛlɛka Nyina ndɔɔ wa pɛ, a baŋaŋnda waŋnda loŋ a wa ni.”—Kɔliŋtiaŋ Diiŋ Ndɔɔ 3:​17.

3, 4. (a) A yɛɛ okɔɔ fɛŋ Pɔɔl ndoo soo yɛ tuupa mbo dimi nyɛ cho o Kɔliŋtiaŋ Diiŋ Ndɔɔ 3:​17 wo? (b) Yɛɛ naŋ nɔ yɛ miŋ tosa le sɔlaa hɛnɛkɛyɛi fula Chɛhowa o ba ve?

³ O yau diiŋ ndɔ o poonyial Kɔliŋtiaŋnda wo niŋ, mi Pɔɔl suaa a nyɛ ndoo yɔŋnuŋ Muuse teleŋ o fula o Pembii Saanaive choo wo, teleŋ o fula suukaŋndo nda maalikɛinɔ Chɛhowaa wo. Hɔlla wa ndu ŋɛlɛŋgi ŋɛlɛŋgi bɛndu! Mɛɛ Isɔluɛiya che Muuse, mi siooŋnde bii nda. Okoŋ, mbo handuŋ kola waaŋgaa wo o hɔl. (Ɛsɔdɔɔ 34:​29, 30, 33; Kɔliŋtiaŋ Diiŋ Ndɔɔ 3:​7, 13) Mi Pɔɔl tɛɛsiaa aa, “Kɛ nduyɛ, pɛŋgu o pɛŋgu waŋndo muliŋ o Masanɔɔ Mɛlɛka lo pɛ, kolaa hoo faŋaŋ.” (Kɔliŋtiaŋ Diiŋ Ndɔɔ 3:​16) Yɛɛ Pɔɔl ndoo yiyaŋ yɛ?

⁴ Ŋ pɛɛku o buŋgɛi naŋ hiou ve niŋ maa Chɛhowa, Wana Toosiaa nyɔɔŋ kpou wo, ndu pilɛ kpe cho Wana hɛnɛkɛyɛi nduɛi nɔ la kpeleŋ te ve ni. Lelaŋ, i cho suɛi kɔl kalu le dimioo maa hɛnɛkɛyɛi cho naa Chɛhowa cho wa, a “ba o ba Masanɔɔ Mɛlɛka Nyina ndɔɔ wa pɛ.” Kɛ mi Pɔɔl dimi maa te ŋ yeema pɛ hɛnɛkɛyɛi waa naa, ŋ nɔ miŋ muliŋ o Chɛhowa lo. Koŋ sim ni maa chaŋyɛi kpɛɛluŋnde nɔ mii wa naa tɛɛŋ a Chɛhowa. Isɔluɛiya wa sɔɔŋ chɔɔ o yondo pollo niŋ mɛɛ wanachioo cha sɔɔŋ yɛ, kɛ o cho mɛɛ Chɛhowa ndu cha sɔɔŋ yɛ le. I wa ko mɛɛ waŋndo kumbu yiyaŋ ndɔɔ a kɔl ndɔɔ a kola waaŋgaa wo yɛ. Ndaa yeema ma soliŋ hɛnɛkɛyɛi ndɛi sɛnɛiye kpeku le yeemaŋ ndaŋ tueiyɔɔ yeela.—Hibuluiya 3:​8-10.

5. (a) Hɛnɛkɛyɛi suu kuɛɛ nyina Chɛhowaa ke yɛ naa? (b) Vɛɛ naŋ looku yɛ sina maa waŋndo wa bɛɛ o chɛleŋ niŋ ɔɔ o chiɛi manyumndo niŋ, o nɔla wɔ mbo nɔ hɛnɛkɛyɛi Chɛhowa yɔŋgu ve? (c) Nyunala kuɛɛ naŋ nɔ yɛ miŋ muli?

⁵ Hɛnɛkɛyɛi nyina Chɛhowaa ke naa ve hiou hɛnɛkɛyɛi wana fula o chɛleŋ niŋndo sɔla wo. Nyina koŋ chuu naa hɛnɛkɛyɛi mbo hiou hɛnɛkɛyɛi waŋchieeya ke naa ve poloŋ. O soli naa o Chɛle hakioo niŋ a piɔmndo, a chɛle naŋ fula o piɛiyii lachoowɛi niŋ a naamula ndɔlaŋ nde. (Luomaŋnda 6:​23; 8:​2) Nuawɔ hɛnɛkɛyɛi kɛndɛ se! Wana cho bɛɛ o chɛleŋ niŋ ɔɔ o chiɛi manyumndo niŋndo nɔla mbo sɔla hɛnɛkɛyɛi hei. (Chɛnɛsee 39:​20-23) Mi ndepilɛnɔɔ diolaŋ Nancy Yuen nda Ŋgɔɔ Harold King viau o chiɛi manyumndo niŋ le wɔsila bɔɔbɔɔ le tiindaŋ ndaa. Kɛ a koŋ kpou, ndaa nɔ wɔ hɛnɛkɛyɛi suu waa naa. A nɔla ma che nda suɛi a sɔɔŋ yɔŋnuŋ nda woŋ okɔɔ o Tɛlivisiɔŋ Seiyaa Chɛhowaa. (Tofa o NYUNIAALAŊ A SƆƆŊ YƆŊNAŊNDOŊ > NYƐPALAA BIUWƆŊNDO.) Ŋ muliŋ ndɔ niko nyunalaŋ la tiɔɔŋ. Vɛɛ naŋ looku yɛ chɔm maa hɛnɛkɛyɛi nɛi cho nyɛ sɔvɛ le naa? Nduyɛ vɛɛ naŋ soliŋ yɛ hɛnɛkɛyɛi nɛi kpeku a taasi?

6. Vɛɛ Isɔluɛiya chɔm yɛ maa ndaa nɔ balika melaa le hɛnɛkɛyɛi Chɛhowa ke nda ve le?

⁶ Te waŋndo ke naa pɛ nyɛ sɔvɛ sɔviɔɔ, miŋ chɔm balika melaa tau le nyɛ wana koŋ ke naa wo. Kɛ Isɔluɛiya ndaa nɔ balika melaa le hɛnɛkɛyɛi Chɛhowa ke nda ve le. Mɛɛ Chɛhowa soli nda o chɛleŋ niŋ Ichipi, o viu bɛɛ le ma kandu yeemɛi nɔɔ le nyɛdiaa a muɛima ndaa nɔ Ichipi waŋ. Ma ŋɔɔchiaŋ a manɛiyo okɔɔ, nyɛdiaa Chɛhowa wa nda kioo wo. Ndaa yeema pɛɛŋ miiŋgɔŋndo Ichipi! ‘Suuwa, kɔkumbɛilaŋ, watamilɛilaŋ, yaawaŋ yɛ yiɔɔŋ a yaawaŋ nɛiyaŋ’ wa ŋ sɔvɛ le nda, mbo hiau hɛnɛkɛyɛi Chɛhowa ndoo ke nda le ma piɛi ndu wo. Lelaŋ pɛɛŋ Chɛhowa ndoo dɔɔnuŋ tumbe o kala kala a nda ni. (Nɔmbaa 11:​5, 6, 10; 14:​3, 4) Hei pɛɛku naa suɛi sɔvɛ.

7. Vɛɛ Pɔɔl ndoo dɔu yɛ sila o yɔŋgu o Kɔliŋtiaŋ Diiŋ Ndɔɔ 6:​1 wo o wali niŋ, nduyɛ vɛɛ naŋ tosa yɛ nyɛ pilɛ koŋ?

⁷ Mi Pɔɔl sila Kilisiɔŋnda kpou maa ŋ nɔ miŋ kɛɛ balika melaa chɔmndo le hɛnɛkɛyɛi Chɛhowa ke naa sanaa a Po ndɔɔ, Chiisu Kiliti wo le. (Nuawɔ Kɔliŋtiaŋ Diiŋ Ndɔɔ 6:​1.) Pɔɔl ve walaŋ te, chiɔɔ o wa hakioo a piɔmndo o ba bɛŋgu ni. Nduyɛ mi hei tɛɛmbuu ndu kɔllo tau. Kɛ a koŋ kpou mbo dimi aa, “Mɛlɛka ndu cho ya soli leniŋ o sabu Masanɔ naa Chiisu Kilitioo niŋ ni. Nduyɛ I mel Mɛlɛka balika tau le keŋ.” Le yɛɛ Pɔɔl ndoo dimi yɛ lende? Mi Pɔɔl tɛɛsial chaaŋaa nduaa Kilisiɔŋnda aa, “Te I wa o diom pilɔɔ niŋ a Chiisu Kiliti pɛ, koŋ tosa mi I wa o ba Nyina Mɛlɛkaa bɛŋgu, o ke ya yoomoo wo. Waa o ba Nyina . . . Mɛlɛkaa bɛŋgu, o baŋa ya mbo soli ya naa ya I wa yɔŋ wɔɔŋndo a piɔmndo o ba bɛŋgu wa.” (Luomaŋnda 7:​24, 25; 8:​2) Maa Pɔɔl, fɛŋ bɛɛ ŋ nɔ miŋ puɛɛnuŋ maa Chɛhowa soli naa o chɛle hakioo a piɔmndo ba bɛŋgu le. Piɔm Chiisoo tosa ndi a sabu le miŋ wa Mɛlɛka naa piɛiyo a kɔl iyama walaŋndo, nduyɛ hei ke naa nyaale kpeekpeiyo.—Sam 40:​8.

8, 9. (a) Sila kuɛɛ Pitɛ, wana Chiisu vem hɔlte ndɔ wo yɔŋgu yɛ a mɛɛ naŋ nɔ miŋ soliŋ hɛnɛkɛyɛi nɛi kpeku yɛ? (b) Vɛɛ waŋndo soliŋ yɛ hɛnɛkɛyɛi nduɛi kpeku o nɛi wɔɔŋndo choo?

 ⁸ O cho ko Chɛhowa balikaa mello le, kɛ ŋ nɔ miŋ wa vɛlɛ yekeŋ, yɔŋi naŋ soliŋ hɛnɛkɛyɛi nɛi kpeku o nɛi wɔɔŋndo choo. Le taamaseliiyo, mi Pitɛ, wana Chiisu vem hɔlte ndɔ wo sila maa naŋ soliŋ hɛnɛkɛyɛi nɛi kpeku le sɔɔŋ wɔɔŋndoŋ tosaa le. (Nuawɔ Pitɛ Tasoo 2:​16.) Hei loonuŋ naa a nyɛ yɔŋnuŋ Isɔluɛiya o yondo saafoo niŋndo. Hau, naa bɛɛ yeema silaa hoo mbo hiau pɛɛŋ o sindɔɔ niŋ. Setana a chieeŋ ndɔɔ cho nyɛm kɛndɔŋ solioo tau le chuɛɛnɔŋndo, dioo, kolɔɔ, a yelelaŋndo. Mi wanaa leyulaa nɔ taasioo wa soliŋ fotueila wanaa nɔ hɔlaa kɛndɛ kɛndiaa wa kpeku le halikpeŋ miŋ pendu nyɛm naŋ heu ba kpeekpei le woŋ. I wa tɛtɛlɛ le mi chieeŋndo hui naa le hɛnɛkɛyɛi nɛi soliŋndo kpeku o nɛi wɔɔŋndo choo.

⁹ Sila Pitɛ wo piiliaŋ vɛlɛ sɔɔŋ sɔvɛŋ cheleŋ o yoomoo niŋ, mɛɛ dɛnɛ sinaa, a wali naŋ nɔ miŋ hɛli wo cho naa yɛ. Le taamaseliiyo, a cho hau feleŋguaa nyindɔɔ le ma tosa wallo kekelee le halikpeŋ ma chɛl nda o sukuula bɛndula kɛndɛlaŋ niŋ. Mi wanaa bɔɔbɔɔ dimul nda maa te a sina dɛnɛ tau pɛ, a cho walta kɛndɛlaŋ sɔla, ma nɔ nyɛ sɔlaa tau, nduyɛ ma sɔla bɛɛleŋ. Mi waŋnda haa chɔm nda konalaŋ maa wanaa nɔ dɛnɛ sinaa bɛndoo wa sɔla nyɛsɔlaa mbo hiou wanaa nɔ dɛnɛ sinaa bɔɔ le wa. Naapum, mi dɛnɛ sinaa bɛndoo simnuŋ suɛi kɛndɛ le feleŋguaa te a wa pɛ chuaŋ chua piiliaŋ yoomu ndaa kpou wo tosaa. Kɛ yɛɛ wanaa velu nda wa a ndapila nɔ yɛ ma loonuŋ?

10. Yɛɛ naŋ nɔ yɛ miŋ loonuŋ te ŋ wa pɛ chuaŋ chuaa tosaa o sɔɔŋ naapilaŋ niŋ?

¹⁰ Naapum mi waŋnda apum yiyaŋ maa le mɛɛ hei cho kɛɛsiaa ndapilaa yɛ, mɛɛ a nɔ hɛnɛkɛyɛi le hɛlioo nyɛ nda yeema wo, te i paaliaŋ kɔl nda iyamaa le. Mi che bɛɛ ŋ nɔ hɛnɛkɛyɛi le miŋ hɛli dɛnɛ sinaa ɔɔ wallo, kɛ ŋ nɔ miŋ loonuŋ maa hɛnɛkɛyɛi nɛi nɔ kpeleŋndaŋ, nduyɛ kɛɛsiaala naalaŋ kpou nɔ fulamakɔɔlilaŋ. Lelaŋ Pɔɔl dimi ni aa, “Waŋnda a pum a dimi maa, ŋ nɔ di mi ŋ tosa nyɛ o nyɛ fee. I cho tonya lende. Kɛ nduyɛ, o cho nyɔɔŋ fau le wana sɔla malaa leniŋ te. Waŋnda apum a dimi maa, ŋ nɔ di mi ŋ tosa nyɛ o nyɛ fee, kɛ nduyɛ, o cho nyɔɔŋ fau le ŋ nɔla mi ŋ hivi waŋndo lachi o laalaŋ ndɔɔ niŋ te.” (Kɔliŋtiaŋ Tasoo 10:​23) Mi che bɛɛ ŋ nɔ hɛnɛkɛyɛi le chuaŋ chuaa tosaa a ba naa o sɔɔŋ naapilaŋ niŋ, kɛ yeemɛi nɛi nɔ mii hiu wa i sɔvɛ le.

11. Le sabu yɛɛ Chɛhowa soli yɛ naa o chɛleŋ niŋ?

¹¹ Mi Pitɛ sila naa maa ŋ nɔ miŋ soliŋ hɛnɛkɛyɛi nɛi kpeku o nɛi wɔɔŋndo choo le. Kɛ mbo dimi maa naŋ soliŋ ndi kpeku o nɛi kɛndɔɔ choo, le miŋ “nɔ kaalaŋ maa buɛiyaa Mɛlɛka.” Sabu Chɛhowa soliŋ Chiisu kpeku le naa solioo o chɛle hakioo a piɔmndo niŋndo cho ni, le miŋ soliŋ yoomu naa kpou kpeku le ndu piɛiyo.

12. Taamaselii yɛɛ Nuuwa a yuŋgu ndɔɔ kɛsullɛ naa?

¹² Nɛi sɔvɛ naŋ soliŋ hɛnɛkɛyɛi nɛi kpeku wo cho teleŋ naa a yoomuma naŋ kpou soliŋndo kpeku le Chɛhowa  piɛiyo ni. Hei tosaa manda naa le kiɔɔ kpeleŋnda chieeŋndaŋ a yeemaŋ naŋ simnɔŋndo nyɛ sɔvɛ bɛndoo o yoomu naa niŋ. (Kaleesiaŋnda 5:​16) Yiyaŋndɔ a nyɛ Nuuwa nda yuŋgu ndɔɔ ndaa tosa wo. A wa achal o chieeŋ niilu latandaa a kaala nɔɔlɛilaŋ niŋ. Kɛ a wou laba o sɔɔŋ wanaa ndaa balu nda wa niŋ te. Ma hɛli le waa a tuandaŋ o wali Chɛhowa ke nda le tosaa wo niŋ. Ma taŋgul dɛndɔɔ, ma chuuŋgiaa nyɛdiaa le ndapila a visiaa, nduyɛ ma sila acheleŋnda a Mɛŋma Koŋgi Bɛnduaŋ okɔɔ. “Mi Nuuwa tosa mɛɛ o mɛɛ Mɛlɛka dimul ndu.” (Chɛnɛsee 6:​22) Fulamakɔɔlioo wa ni, mi Nuuwa a yuŋgu ndɔɔ sɔla kindaa mɛɛ chieeŋ koŋ sɔla tambei.—Hibuluiya 11:​7.

13. Yɛɛ Chɛhowa dimullɛ naa le tosaa?

¹³ Yɛɛ Chɛhowa dimullɛ naa le tosaa hau? Naa buɛiyaa Chiisuaa, ŋ sina maa Mɛlɛka dimul naa le yooŋgu kɛndɔɔ dimioo. (Nuawɔ Luku 4:​18, 19.) Hau, Setana suumiaa wanaa bɔɔbɔɔ, nduyɛ a sina pɛɛŋ maa chiaa le nda cho le piɛiyii lachoowɛi, nyɛm kiɔɔŋ, a yalale chieeŋndeŋ te. (Kɔliŋtiaŋ Diiŋ Ndɔɔ 4:​4) Maa Chiisu, ŋ nɔ dikeŋnaŋndo le acheleŋnda malaa ma sina Chɛhowa nduyɛ ma piɛi ndu, Mɛlɛka nɔ hɛnɛkɛyɛi yo. (Maatiu 28:​19, 20) Acheleŋnda yooŋgu kɛndɔɔ dimullo cho suɛi bɛɛŋ te. O fondalaŋ lapum, waŋnda nɔ iyeema le sina a Mɛlɛka okɔɔ le, nduyɛ mi apum dɔɔnuŋ pɛɛŋ tumbe te ŋ dimul nda pɛ yooŋgu kɛndɔɔ. Kɛ le mɛɛ Chɛhowa dimul naa le yooŋgu kɛndɔɔ dimioo yɛ, ŋ nɔ miŋ nyunaŋ aa, ‘I soliŋ pa hɛnɛkɛyɛi nii kpeku le chɔɔloo wali Chɛhowaa tosaa?’

14, 15. Yɛɛ wanaa Chɛhowaa a bɔɔbɔɔ kɛɛsiaa yɛ le tosaa? (Tofa fotueiyo o peele naŋ kandu leŋ choo.)

¹⁴ I cho suɛi kɔl dɛɛniaa le sinaa maa wanaa Chɛhowaa a bɔɔbɔɔ sina niŋ maa mɛɛlula chieeŋndo hoo cho niŋ kpɛɛluŋ. Ma kɛɛsiaa le yoomula ndalaŋ tosaa tɛtɛlɛ, nduyɛ ma kandu kɔɔfaleŋ. (Kɔliŋtiaŋ Tasoo 9:​19, 23) Apum cho kɔɔfaleŋ o chalta ndalaŋ, mi apum kua o kundala yeema malaa laŋ niŋ. O wɔsiŋ ŋuɛɛnu hiou woŋ niŋ, waŋnda hiouwɔɔ 250,000 kandu kɔɔfaleŋ ni. Nduyɛ suŋ suŋ niŋ, waŋnda hiouwɔɔ 1,100,000 cho niŋ o kɔɔfale lɔɔlɔɔ leŋ niŋ ni. I cho bɔɔ suɛi kɛndɛ bɛndu le chɔɔ wanaa bɔɔbɔɔ hɛnɛkɛyɛi ndɛi soliŋndo kpeku le Chɛhowa piɛiyo o nɛiyo hoo choo!—Aisaya 6:​8.

¹⁵ Yɛɛ mala yɛ nda le hɛnɛkɛyɛi ndɛi soliŋndo kpeku a taasi? Yiyaŋndɔ a Chɔŋ nda Chuditi, a tosa wali Mɛlɛkaa o lɛŋii bɔɔbɔɔ niŋ le wɔsilaŋ niŋ 30 wo. Ma tɛɛsiaa maa mɛɛ Sukuu Kɔɔfaa kanduŋ o wɔsi 1977 niŋ, mi sukuuwa sɔla dɛɛniaa le kɔlaŋ naa yeemɛi wa tau wa. Le kpeleŋ koŋ komallo, Chɔŋ nda Chuditi ndaa nɔ ma tosa yoomu ndaa tɛtɛlɛ. Lelaŋ, Chɔŋ wa wali ndɔɔ siŋgaa teleŋ o teleŋ. O mɛɛlulaŋ kpɔŋ, ma kua  o lɛŋnde cheleŋ niŋ le yooŋgu kɛndɔɔ dimioo. Yɛɛ mala yɛ nda le simultaŋ tiuwo ba, mɛɛ suɛi maŋgalɛi sɛnɛiye pɛɛkoo cho naa yɛ, yɛlɛmiaalaŋ tosaa o naamu sɛnɛiyo niŋ, a fonda sɛnɛiyo? Ma piɛi o Chɛhowa lo nduyɛ ma tiindaŋ ndu le mbo mala nda. Vɛɛ nda yiyaŋ yɛ a Chɛhowa piɛiyo o nɛi waa naa choo le wɔsiŋ bɔɔbɔɔ hiou muŋ ndoŋ? Mi Chɔŋ dimi aa, “Mi sina maa I wa o yɔŋgaŋ o wali hiou wa o sɔvɛ a wali kɛ kɛ ya sina ɔɔ bii niŋ tosaa wo. Mi Chɛhowa simnuŋ wana kpeekpeiyo naa ya cha, mɛɛ finya kaalaa wa naa yɛ. Suŋ suŋ niŋ, I bii niŋ bila nyɛ Chemisi 4:​8 simndo, ‘Sɔɔŋguu Mɛlɛka ikɛi. Ndu bɛɛ o cho num sɔɔ-ŋguu ikɛi.’ Mi sina maa I saaluŋ nyɛ ya wa nuuviaa wo, yoomu kɔl hiniaa.”

16. Vɛɛ waŋnda o waalaŋ niŋ soliŋ yɛ niŋ hɛnɛkɛyɛi ndɛi kpeku a taasi?

¹⁶ Apum, maa Chɔŋ nda Chuditi, nɔla ma tosa kɔɔfaleŋ le teleŋ vilɛi. Kɛ le bahawɛilaŋ lapum, mi apum tosa kɔɔfaleŋ le teleŋ biŋgi. Mi a bɔɔbɔɔ yɔŋguŋ vɛlɛ le walta taŋgulaalaŋ tosaa chieeŋndo balɔɔ silɔ. Le taamaseliiyo, puaapiliaa a ndepiliaa kuɛ le malaa fondaŋnda leboltaŋ le chieeŋndo taŋgullo Wɔɔwik, Niu Yɔk wo wa le 27,000. Mi apum kua le lɔɔlaŋ la tiɔɔŋ, apum le paŋgoŋ nyɛɛmbɔ, acheleŋnda le wɔsiei ɔɔ hiouwɔɔ koŋ choo. Mi puaapiliaa a ndepiliaa haa a bɔɔbɔɔ soliŋ sala tau le wallo tosaa Wɔɔwik. Taamaselii kɛndɔɔ pila nda cho ni, le wanaa soliŋ niŋ hɛnɛkɛyɛi ndɛi kpeku le Chɛhowa, Mɛlɛka nɔ hɛnɛkɛyɛi yo saŋgalaa a ndu bɛɛleŋ kioo wo!

17. Yɛɛ naŋ nɔ yɛ miŋ wa lehɔl o nɛi te ŋ soliŋ pɛ hɛnɛkɛyɛi nɛi kpeku a taasi suŋ suŋ?

¹⁷ Ŋ nɔ bɔɔ balika melaa le mɛɛ naŋ sina Chɛhowa, a hɛnɛkɛyɛi naŋ sɔla o ndu piɛiyo niŋndo. La ŋ chɔmnuŋ o nyɛm naŋ hɛli le tosaa woŋ niŋ maa, nyɛ sɔvɛ sɔviɔɔ hɛnɛkɛyɛi hei cho le naa ni. Tuupa miŋ soliŋ hɛnɛkɛyɛi kpeku o nɛi wɔɔŋndo choo, ŋ nɔ miŋ soliŋ ndi kpeku le Chɛhowa piɛiyo a yoomuma naŋ kpou. Okoŋ, ŋ nɔla miŋ tuei tɔnɔla Chɛhowa mɛi le diomndaŋ yeela a teleŋ suɛi Baabuiyo dimi hei ve cho peelɔŋndo, “Paale fuuluu niŋ mi Mɛlɛka soli muŋ o chɛleŋ niŋ, koŋ cho ni ŋ se lɛ le. Nduyɛ ŋ cho vɛlɛ lehɔl o nɛi maa muŋ bɛɛ ŋ cho baŋaŋndo sɔla nduyɛ, mi ŋ sɔla naŋɔɔ mɛɛ i yɔnuŋ a chuauwaa Mɛlɛkaa yɛ.”—Luomaŋnda 8:​21.