1. Mɛɛ Adam nda Ifi tosa nila kalulaŋ, vɛɛ Chɛhowa ndoo ke yɛ waŋchieeya kɔl dɛɛniaa a tiindaŋndo?

CHƐHOWA cho Mɛlɛka dɛɛniaa waŋnda kɔltaŋ ndo ni. O cho niŋ hei tosaa chɔŋ a boondii waŋchieeya tosa hakioo ve. Nduyɛ pɛŋ, mɛɛ Adam nda Ifi tosal dɔɔ Mɛlɛka nila kalulaŋ, mi Mɛlɛka chɔm suɛi ndii nɔ le peelɔŋndo ve. Nduyɛ te suɛi keŋ ndii biinuŋ pɛ bila, i wa waŋchieeyaa ndaa nɔ le violɔŋndo o chilaŋ niŋnda kɔl sikpaa ke a tiindaŋndo. Ŋ saaluŋ suɛi dimiŋ keŋ le peelɔŋndo ve o Chɛnɛsee 3:​15 niŋ. Nduyɛ bolle Baabuileŋ ndeŋ le dimi maa Setana, Masa Nyinaa Wɔɔŋnda a walta ndɔla wɔɔŋndaŋ kpou cho hunɔɔ tambei sɔla.—Chɔŋ Tasoo 3:​8; Sɔɔŋ Chɔɔmaŋndoŋ 12:​9.

2. Vɛɛ Chɛhowa ndoo dɛɛniaa yɛ Nuuwa kɔllo?

² Yiyaŋndɔ mɛɛ Chɛhowa ndoo dɛɛniaa buɛi ndɔɔ Nuuwa kɔllo yɛ. Wanaa niilu latandaa a wanaa kaa nɔɔlɛiya wanaa wa  o teleŋ ndɔɔ niŋ nda wa ni. Nduyɛ Nuuwa nda yuŋgu ndɔɔ koni wa Chɛhowa piɛiyo ni. Hei ndii nɔla mii tɛɛmbuu Nuuwa kɔllo. (Chɛnɛsee 6:​4, 5, 11; Chudi 6) Kɛ mi Chɛhowa ke Nuuwa kɔl sikpa ndoo yeema wo, le hiouwɔɔ lachi a ndu piɛiyo vɛlɛ a sɔɔŋ tosaa sakpo. (Chɛnɛsee 6:​9) Mi Chɛhowa dimul Nuuwa maa o cho chieeŋ dɛnɛ wɔɔŋ koŋ tɛɛmbuu. Nduyɛ mbo tɛɛsial Nuuwa nyɛ ndu nda yu-ŋgu ndɔɔ ndaa nɔ ma tosa le kindaa sɔlaa wo. (Chɛnɛsee 6:​13-18) Chɛhowa wa Mɛlɛka kɔl dɛɛniaa le Nuuwa ni.

3. Vɛɛ Chɛhowa ndoo dɛɛniaa yɛ Chɔɔsuaa kɔllo? (Tofa fotueiyo o peele naŋ kandu leŋ choo.)

³ Okoŋ kɔɔli, mi Chɛhowa dɛɛniaa buɛi ndɔɔ Chɔɔsuaa kɔllo, o ndoo nɔ le wali kala kalaa tosaa wo. Ndoo nɔ le wanaa Mɛlɛkaa simndaŋ lachi le kɔlaŋ o Lɛŋnde Mɛyaaleŋ niŋ. Nduyɛ ndoo nɔ mbo yem wanaa chɔuwaa kpaayaa wa o tanda koŋ niŋnda. Mi Chɛhowa sina maa Chɔɔsuaa ndoo nɔ saboo le siooŋnde nɔɔ. Lelaŋ mi Mɛlɛka dimul Muuse aa, “Chɔɔsuaa, ndu cho Isɔluɛiya isisi lachi ni, mbo taŋ Chɔɔdaŋ ndaŋ a nda le ma kɔ bii lɛŋnde ŋ cho lɛŋ chɔnɔŋ num lachi leŋ. Lelaŋ mala ndu mbo sɔla dialluŋ kalaŋ nduyɛ a kɔl simulaa nduyɛ ma chɔm ndu nyɛ o nɔ le tosaa wo.” (Ditɔnɔmii 3:​28) Okoŋ, mi Chɛhowa pila dɛɛniaa Chɔɔsuaa kɔllo, mbo dimul ndu aa, “Loonuŋ nyɛ ya I dimul num ndo, maa nɔ kɔl simulaa nduyɛ ma vesa hɔlla. Yɔŋ isiooŋ ma mal te, kani fondole ya Mɛlɛka Yaawɛɛ, Mɛlɛka nyaa, I cho wa num kɔɔli ba o ba nya kɔ.” (Chɔɔsuaa 1:​1, 9) Vɛɛ Chɔɔsuaa ndoo yiyaŋ yɛ a diomndaŋ ndaŋ?

4, 5. (a) Vɛɛ Chɛhowa ndoo dɛɛniaa yɛ wanaa nduaa kɔltaŋ o sindɔɔ niŋ? (b) Vɛɛ Chɛhowa ndoo dɛɛniaa yɛ Po ndɔɔ kɔllo?

⁴ Mi Chɛhowa dɛɛniaa vɛlɛ wanaa nduaa maa kunda. Le taamaseliiyo, mi Chɛhowa sina maa Chuuwa ndaa nɔ ma sɔla kɔl dɛɛniaa teleŋ nda wa o biyɔɔ niŋ Babilɔŋndo. Nduyɛ mbo dimul nda diomnda kɔl dɛɛniaalaŋ ndaŋ aa, “La yɔŋ isiooŋ te, kani fondole, I cho nya kɔɔli. La tambu kɔl te, ya cho Mɛlɛka nyaa ni, I cho nya dialluŋ kalaŋ ke, nduyɛ mi mala nya. I cho nya ba ni kɛndɔɔ handɔɔ choo.” (Aisaya 41:​10) Okoŋ kɔɔli, mi Chɛhowa dɛɛniaa Kilisiɔŋaa tasiaa kɔltaŋ, nduyɛ o cho naa kɔltaŋ dɛɛniaa o nɛi pilɛ koŋ choo kpe.—Nuawɔ Kɔliŋtiaŋ Diiŋ Ndɔɔ 1:​3, 4.

⁵ Mi Chɛhowa dɛɛniaa vɛlɛ Po ndɔɔ kɔllo. Mɛɛ Chiisu sɔla dɔɔ yiŋɔɔ, mbo tuɛi diomndo o choo choo niŋ aa, “Po nuu cho hoo ni. I kaala ndu. Nduyɛ, I hini kɔl a ndu.” (Maatiu 3:​17) Yiyaŋndɔ mɛɛ diomndaŋ ndaŋ laa luei Chiisu yoomuaŋ teleŋ o wa wali poli ndɔɔ tosaa o chieeŋndo choo wo!

6. Vɛɛ tale Chiisoo a kaniŋ talɛŋndoŋ okɔɔ dɛɛniaa yɛ naa kɔltaŋ?

⁶ Mi Chiisu tual taamasi Finya ndɔɔ kɔɔli le acheleŋnda kɔltaŋ dɛɛniaa le tiindaŋndo dɔwɔɔ o Mɛlɛka niŋ. Mbo tosa hei mɛɛ o dimi taloo a kaniŋ talɛŋndoŋ okɔɔ. Mbo dimi maa mi masanɔɔ dimul buɛi ndɔ kɛ kɛ chɔm sandei aa, “Niwali. A cho bɔɔ buɛi kɛndɛ, nduyɛ, a cho sanaa. Mɛɛ ŋ cho nuaa sanaa o nyɛm pɔmbɔŋ choo yɛ, I cho num handɔɔ nyɛm bana banaŋ bolleŋ. Sɔɔŋguu niko ŋ tosaŋ kɔl kɛndɔɔ latulu.” (Maatiu 25:​21, 23) Mi diomndaŋ ndaŋ la dɛɛniaa buɛiyaa nduaa kɔltaŋ le waa Chɛhowa piɛiyo a tiindaŋndo!

7. Vɛɛ Chiisu ndoo dɛɛniaa yɛ wanaa o vem hɔlte ndɔ wa kɔltaŋ, taama taama Pitɛ?

⁷ Wanaa Chiisu vem hɔlte ndɔ wa wa lɔɔlɔɔ sɛɛŋgiaŋndo le wana cho wa wana banaa nda  tɛɛŋndo, kɛ Chiisu wa nda biuwɔŋndo. Mbo dɛɛniaa nda le ma tusiŋ nduyɛ ma tosa wallo le acheleŋnda, o cho le mi acheleŋnda wa wallo le nda le. (Luku 22:​24-26) Teleŋnda bɔɔbɔɔ, mi Pitɛ tosa biondɔŋndaŋ nduyɛ mbo tɛɛmbuu Chiisu kɔllo. (Maatiu 16:​21-23; 26:​31-35, 75) Kɛ Chiisu kɛɛ Pitɛ le. Mbo dɛɛniaa ndu kɔllo, nduyɛ mbo ke ndu pɛŋ wallo le acheleŋnda yoomuaŋ lueiyo.—Chɔŋ 21:​16.

8. Vɛɛ Hɛsɛkiya dɛɛniaa yɛ wanaa wa puaa chɔuwa bolleŋ nda a waŋnda Chuda kɔltaŋ?

⁸ Tuupa bɛɛ ma sɔla taamaselii Chiisu ndaa nɔ ma tol kɔɔli wo, buɛiyaa Chɛhowaa ndaa sina maa a nɔ ma dɛɛniaa acheleŋnda kɔltaŋ. Yiyaŋndɔ a Hɛsɛkiya. Mɛɛ Asiiliaŋnda wa hunɔɔ le Chulusɛlɛm chiŋalaŋndo, mbo chuuŋgiaa wanaa wa puaa chɔuwa bolleŋ nda a wanaa cheleŋnda le nda kɔltaŋ dɛɛniaa. Nduyɛ mɛɛ nda tuei diomnda Hɛsɛkiya laŋ, “ma simul kɔltaŋ.”—Nuawɔ Koloniko Diiŋ Ndɔɔ 32:​6-8.

9. Yɛɛ naŋ pɛɛku yɛ Choobu o ba a kɔl dɛɛniaa yɔŋgoo okɔɔ?

⁹ Ŋ pɛɛku vɛlɛ a kɔl dɛɛniaa yɔŋgoo okɔɔ Choobu o ba. Mi che bɛɛ ndupila ndoo yeema kɔl dɛɛniaa, kɛ mbo pɛɛku acheleŋnda mɛɛ nda nɔ ma dɛɛniaa waŋnda kɔltaŋ yɛ. Mi Choobu dimul puaa ndaa hiŋ ndu kɔllo dɛɛniaa wa maa, te ndoo yɔŋ pɛ aa ndu wa o fonda ndaa le nda kɔllo dɛɛniaa ni, o wa nda dimul sɔɔŋ luei nda yoomuaŋ ndoŋ, sɔɔŋ wa tosa mi ndaa sinaŋ nyɛkɛndɛiyoŋ, kɛ o cho sɔɔŋ muŋ tɛɛmbuu nda kɔllo woŋ te. (Choobu 16:​1-5) Kɛ o mɛɛlulaŋ kpɔŋ, mi Choobu sɔla kɔl dɛɛniaa Ɛlihu nda Chɛhowa o ba.—Choobu 33:​24, 25; 36:​1, 11; 42:​7, 10.

10, 11. (a) Le yɛɛ chua Chɛfitaa ndoo yeema yɛ kɔl dɛɛniaa? (b) Nɛɛ yaa naŋ dɛɛniaa yɛ hau kɔltaŋ?

¹⁰ Chua Chɛfitaa bɛɛ ndoo yeema kɔl dɛɛniaa. Wana kialaa ŋyamaa Chɛfitaa finya ndɔ wa ni. Nduyɛ o wa kɔlaŋ Amɔnaitiiya chiŋalaŋndo a sɔŋgɔɔ. Mbo chua buŋgɛi maa te Chɛhowa mala ndu pɛ mbo yem chɔuwo, wana tase cho fula o ndu lo chiɛiniŋ le ndu hunɔɔ demullo wo wa lakɔ wallo tosa o tɛndii Chɛhowaa niŋ. Mi Isɔluɛiya yam chɔuwo. Nduyɛ wana tase fula o ndu lo chiɛiniŋ le ndu hunɔɔ demullo wo wa chuale ndɔle pilɛleŋ ni. Mi Chɛfitaa tambu kɔl tau. Kɛ mbo lo o lediom, nduyɛ mbo yɔŋ chua ndɔɔ o tɛndii Chɛhowaa niŋ le wallo loŋ haaa a yoomu ndɔɔ mɛɛlulaŋ.—Chɔɔchiaa 11:​30-35.

¹¹ Mi che bɛɛ hei wa ikala le Chɛfitaa, kɛ wana che pɛ maa le chua ndɔɔ ndii hiou wa ikala. Kɛ, mbo yɔŋguŋ a kɔl ndɔɔ kpou le tosaa nyɛ finya ndɔ chua buŋgɛi yo. (Chɔɔchiaa 11:​36, 37) Hei ndii sim ni maa ndoo chel niŋ o nɔ ɔɔ mbo velu chua le. Pulale yuŋgu koŋ le wa mɛɛlu. Chua Chɛfitaa ndoo yeema kɔl dɛɛniaa tau. Baabuiyo dimi aa, “Mii simnuŋ maa kaa le Isɔluɛiya. Iwɔsi o iwɔsi, mɛɛ mi chuaambuaa laanduaa Isɔluɛi ndaa kuɛ le palɛi ihiɔɔlu o chua Chɛfitaa wo lo, wana waa Kiiliadi, le ndu chandɔɔ.” (Chɔɔchiaa 11:​39, 40, NW) Chua Chɛfitaa yiyalaŋ naa a Kilisiɔŋnda hau, a cho loo yembuaa le chɔɔloo  wali Chɛhowaa tosaa wo. Ŋ cho nda pa chandɔɔ nduyɛ miŋ wa nda kɔltaŋ dɛɛniaa?—Kɔliŋtiaŋ Tasoo 7:​32-35.

12, 13. Vɛɛ Pitɛ luei yɛ ‘chaaŋaa nduaa kpaayaa’?

¹² Ichɔl Chiisu ndoo nɔ le piɔmndo sɔlaa wo, mbo suaa o Pitɛ lo, wana o vem hɔlte ndɔ wo aa, “Saimɔŋ, Saimɔŋ, Setana, masa nyinaa wɔɔŋnda, dimul Mɛlɛka le mbo tɔɔndaŋ nya buɛiyaa niaa. O cho tosa a nya mɛɛ nda hɛi witiiyoŋ nuaa yɛ. Kɛ, I piɛi Mɛlɛka le num Saimɔŋ, yɔŋi ŋ mal tiindaŋ ŋ nɔ o ya niŋ ndo. Nduyɛ, te a miiŋgu ya o ibuŋ pɛ, luei chaa-ŋaa numnda kpaayaa.”—Luku 22:​31, 32.

¹³ Pitɛ wa waŋndo opilɛ le chilaŋ chuaa o kunda leKilisiɔŋ tasoo niŋ. (Kaleesiaŋnda 2:​9) Mbo dɛɛniaa puaapiliaa kɔltaŋ a sɔɔŋ kɔl sikpa ndoo tosa o paale Pɛŋtikɔɔsileŋ choo wo, a okoŋ kɔɔli wo. Mɛɛ o tosa wallo le wɔsila bɔɔbɔɔ, mbo poonyial puaapiliaa nduaa aa, “La sim nyɛ kɛndɛ yi o tiindaŋ nya nɔ o Mɛlɛka niŋ ndo choo. Nduyɛ la sina pɛ-ŋgu maa diomnda ya I cho laŋ nya dimullo laŋ, a Mɛlɛka kɛndɛi nduɛi kpeekpei okɔɔ la cho ni. La wa o kɛndɛi keŋ bɛŋgu pɛŋgu o pɛŋgu.” (Pitɛ Tasoo 5:​12) Mi yaula Pitɛ poonyiaa laŋ la dɛɛniaa Kilisiɔŋnda kɔltaŋ o palɛi nduɛi niŋ. Nduyɛ la cho wɔ naa hau kɔltaŋ dɛɛniaa mɛɛ naŋ chum fau le teleŋ sɔɔŋ Chɛhowa dimi woŋ cho peelɔŋ kpou wo!—Pitɛ Diiŋ Ndɔɔ 3:​13.

14, 15. Vɛɛ yaula Chɔŋ, wana Chiisu vem hɔlte ndɔ wo poonyiaa laŋ la cho yɛ naa kɔltaŋ dɛɛniaa?

¹⁴ Chɔŋ, wana Chiisu vem hɔlte ndɔ wo wa  vɛlɛ waŋndo opilɛ le chilaŋ chuaa o kunda leKilisiɔŋ tasoo niŋ. Mbo poonyiaa konala kɛndɛ kɛndɛlaŋ a wali Chiisoo okɔɔ. Mi yauwo hoo o Baabuiyo niŋ dɛɛniaa Kilisiɔŋnda le wɔsioŋ o kɛmɛlaŋ niŋ, nduyɛ o cho wɔ hiouwɔɔ lachi a naa kɔltaŋ dɛɛniaa hau. Le taamaseliiyo, o yau Chɔŋ ndo niŋ kinɛi Chiisu dimi ni maa a kaalaa waŋnda cho buɛiyaa nduaa kpeekpeiya sina ni.—Nuawɔ Chɔŋ 13:​34, 35.

¹⁵ Yaula yaa Chɔŋ poonyiaa vɛlɛ laŋ la nɔ tonya sɔvɛ sɔviɔɔ leniŋ. Te o yɔŋ pɛ miŋ tambu kɔl le biondɔŋnda naŋ tosalaŋ, ŋ tiuba miŋ sɔla kɔl dɛɛniaa te ŋ veelu pɛ diomndaŋ maa sala soliaŋ Chiisoo ‘dindi naa, mbo faŋa yɔŋ o yɔŋ wɔɔŋ naa ŋ tosa.’ (Chɔŋ Tasoo 1:​7) Nduyɛ te kɔl naa hiou lachi pɛ a naa pɛɛsaa, ŋ tiuba miŋ sɔla kɔl dɛɛniaa te ŋ veelu pɛ diomndaŋ maa, “Mɛlɛka ndu hiou a kɔlta naalaŋ.” (Chɔŋ Tasoo 3:​20) Chɔŋ kinɛi poonyiaa o Baabuiyo niŋ ni maa, “wana kaalaa Mɛlɛka cho ni.” (Chɔŋ Tasoo 4:​8; 16, NW) Yau ndɔ diiŋ ndɔɔ a o yaa ndɔɔ chandu Kilisiɔŋaa cho hiouwɔɔ lachi a “kɔlaŋ o nɛi tonyaa choo” wo.—Chɔŋ Diiŋ Ndɔɔ 4; Chɔŋ Ŋgaa Ndɔɔ 3, 4.

16, 17. Vɛɛ Pɔɔl, wana Chiisu vem hɔlte ndɔ wo ndoo dɛɛniaa yɛ Kilisiɔŋaa tasiaa kɔltaŋ?

¹⁶ Pɔɔl, wana Chiisu vem hɔlte ndɔ wo wa wana taamasi kɛndɛ kɛndɔɔ le puaapiliaa nduaa kɔltaŋ dɛɛniaa. O piɔm Chiisoo kɔɔli, o viu tau le mi wanaa Chiisu vem hɔlte ndɔ wa a bɔɔbɔɔ lo Chulusalɛm, chiee dialii kuumbaŋ choo ve wa wo. (Walta Wanaa Chiisuaa 8:​14; 15:​2) Mi Kilisiɔŋaa wa Chudiaa wa dimul wanaa ndaa nɔ niŋ laalaŋndo o Mɛlɛka  pilɔɔ niŋndo yooŋgu kɛndɔɔ a Kiliti okɔɔ. Kɛ mi nyina diandaa viam Pɔɔl le mbo kɔ dimi yooŋgu kɛndɔɔ o Kilikiiya lo, Luomaŋnda, a wanaa cheleŋaa ndaa piɛi mɛlɛkaa cheleŋnda wa.—Kaleesiaŋnda 2:​7-9; Timoti Tasoo 2:​7.

¹⁷ Mi Pɔɔl balu o tanda nda veelu niŋ hau aa lɛŋnde Tɔkileŋ ndo niŋ. Mbo kua vɛlɛ Kilisi a Itali. Mbo dimul wanaa ve ŋChuu le wa yooŋgu kɛndɔɔ o lɛŋii keŋ niŋ, nduyɛ mbo kila kundala leKilisiɔŋndaŋ loŋ. Yoomoo ve suɛi kpɛdɛ le Kilisiɔŋaa sɛnɛiya haa le. Mi wanaa nda wa o lɛŋii pilɛi niŋnda tusi nda nyɛpalaa choo. Lelaŋ, ndaa yeema kɔl dɛɛniaa. (Tɛsaloniaŋ Tasoo 2:​14) A wɔsi 50, mi Pɔɔl poonyiaa yau kɔl dɛɛniaa o kundaa Tɛsalonaika lo. Mbo dimi aa, “Pɛŋgu o pɛŋgu te ŋ wa Mɛlɛka piɛiyo pɛ, mɛɛ mi ŋ piɛi le nya. Nduyɛ, le pɛŋgu o pɛŋgu, ŋ cho Mɛlɛka balikaa mello le nya kpou. Te ŋ wa Mɛlɛka Finyaa naa piɛiyo pɛ, mɛɛ mi ŋ pɛl nya diolaŋ, a mɛɛ nya chɔm tiindaŋ nya nɔ o Mɛlɛka niŋ ndo, sanaa o kaala nyalaŋ niŋ yɛ. Nduyɛ mɛɛ mi ŋ chɔm a wali nya cho tosaa le kaala nya nɔ o lakɔl lo o kɔɔ.” (Tɛsaloniaŋ Tasoo 1:​2, 3) Mbo dimul vɛlɛ nda le ma lueinaŋ yoomuaŋ vellaa velle. Mbo poonyiaa aa, “Lelaŋ la wa kɔltaŋ dɛɛniaŋndo vellaa velle. Nduyɛ la wa maaliaŋndo vellaa velle le dialuŋ kalaŋ sɔlaa.”—Tɛsaloniaŋ Tasoo 5:​11.

18. Vɛɛ dialii kuumbaŋ choo ve ndii ke yɛ Filipi kɔl dɛɛniaa?

¹⁸ O wɔsiŋ kɛmɛ tasoŋ niŋ, mi Chɛhowa soliŋ dialii kuumbaŋ choo ve kpeku le Kilisiɔŋnda kpou kɔltaŋ dɛɛniaa, vɛlɛ a wana wa chilaŋ chuaa o kundala leKilisiɔŋndaŋ niŋnda. Mɛɛ Filipi dimi yooŋgu kɛndɔɔ a Kiliti okɔɔ o Sameeliaŋnda lo, mi dialii kuumbaŋ choo ve toolu ndu. Ma yɔŋ waŋnda a ŋiɔɔŋ nda tɛɛŋ, Pitɛ nda Chɔŋ, le ma kɔ piɛi le Kilisiɔŋaa sɛnɛiya haa le ma sɔla nyina diandaa. (Walta Wanaa Chiisuaa 8:​5, 14-17 NW) Mi Filipi nda puaapiliaa a ndepiliaa sɛnɛiya haa sɔla kɔl dɛɛniaa tau le toolu nda sɔla dialii kuumbaŋ choo ve o ba wo!

19. Vɛɛ Kilisiɔŋaa tasiaa ndaa yiyaŋ yɛ mɛɛ nda sɔla yau dialii kuumbaŋ choo ve poonyiaa wo?

¹⁹ Okoŋ kɔɔli, dialii kuumbaŋ choo ve ndii nɔ le kɛɛsiaa sɔviɔɔ tosaa. Baa wanaa ve ŋChuu le wa ndaa nɔ pa ma sɔla hivi chiɛi kɔɔlioo maa Chuuwa, a mɛɛ Sawa Mɛlɛka ke Muuse wo dimi yɛ? (Walta Wanaa Chiisuaa 15:​1, 2) Mɛɛ dialii kuumbaŋ choo ve piɛi le nyina diandaa, nduyɛ ma chɔm nyɛ Baabuiyo dimi wo, ma kɛɛsiaa maa hei ve lɛ i sɔvɛ le. Okoŋ, ma poonyiaa yauwo le tɛɛsiaa kɛɛsiaa nda tosa wo, nduyɛ ma viam puaapiliaa a yau koŋ o kundalaŋ niŋ. Mɛɛ Kilisiɔŋnda veelu diomndaŋ o yauwo hoo niŋ, “ma naŋ kɔl tau tau a diomnda nyɔɔlaala nda sɔla laŋ.”—Walta Wanaa Chiisuaa 15:​27-32.

20. (a) Vɛɛ Dialii Kuumbaŋ Choo Ve hau dɛɛniaa yɛ naa kpou kɔltaŋ? (b) Nyuna kuɛɛ naŋ cho yɛ yaasiaa o buŋgɛi cho lachi ve niŋ?

²⁰ Hau, Dialii Kuumbaŋ Choo Seiyaa Chɛhowaa cho Bɛtɛlaitiiya, wanaa cho o wali lɔɔlɔɔ teŋgeŋ Mɛlɛkaa niŋnda, a naa kpou kɔltaŋ dɛɛniaa. Maa puaapiliaa o wɔsiŋ kɛmɛ tasoŋ niŋ, miŋ dɔunuŋ nyaale te ŋ sɔla pɛ kɔl dɛɛniaa! Vɛlɛ, le dɛɛniaa wanaa mal tonyaa wa ma miiŋgu Mɛlɛka o ibuŋ, o wɔsi 2015 niŋ, mi Dialii Kuumbaŋ Choo Ve soli yauwo diolaŋ Miiŋgu Chɛhowa o Ibuŋ. Kɛ baa puaapiliaa cho chilaŋ chuaa wa koni dɛɛniaa acheleŋnda kɔltaŋ ni, ɔɔ naa kpou bɛɛ tosa keŋ? Ŋ cho nyunaa hoo yaasiaa o buŋgɛi cho lachi ve niŋ.